𑐎𑐰𑐶𑐟𑐵𑐫𑐵 𑐮𑐵𑐫𑑂𑐎𑐹𑐥𑐵𑐏𑐾𑑄 𑐧𑐴𑐸𑐨𑐵𑐲𑐷 𑐎𑐰𑐶𑐟𑐵 𑐐𑑀𑐲𑑂𑐛𑐷

𑐎𑐰𑐶𑐟𑐵𑐫𑐵 𑐮𑐵𑐫𑑂𑐎𑐹 𑐳𑑄𑐳𑑂𑐠𑐵𑐥𑐵𑐏𑐾𑑄 𑐳𑐩𑑂𑐥𑐡𑐵 𑐰𑐶𑐲𑐫𑐎 𑐧𑐴𑐸𑐨𑐵𑐲𑐶𑐎 𑐎𑐰𑐶𑐟𑐵 𑐐𑑀𑐲𑑂𑐛𑐷 𑐫𑐵𑐟 𑑋 𑐐𑑀𑐲𑑂𑐛𑐷𑐂 𑐣𑐾𑐥𑐵𑐮𑐨𑐵𑐲𑐵 𑐮𑐶𑐳𑐾𑑄 𑐏𑐳 𑐣𑐾𑐥𑐵𑐮𑐷, 𑐟𑐵𑐩𑐵𑐒, 𑐩𑐿𑐠𑐶𑐮𑐷, 𑐠𑐵𑐬𑐸, 𑐐𑐸𑐬𑐸𑐒, 𑐩𑐐𑑅, 𑐄𑐬𑐵𑑃𑐰, 𑐮𑐶𑐩𑑂𑐧𑐸 𑐰 𑐠𑐎𑐵𑐮𑐷 𑐨𑐵𑐳𑑄 𑐎𑐰𑐶𑐟𑐵 𑐰𑐵𑐔𑐣 𑐖𑐹𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐟𑑂𑐰𑐵𑑅 𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐰𑐫𑑂𑐎𑐮𑑄 𑐫𑐾𑑃𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐡𑐫𑐾𑐎𑐵𑐟𑑅𑐐𑐸 𑐥𑐬𑐩𑑂𑐥𑐬𑐵𑐐𑐟 𑐡𑐧𑐹 𑐢𑐫𑐵𑐐𑐸 𑐳𑐵𑐴𑐶𑐟𑑂𑐫𑐎𑐵𑐬, 𑐎𑐮𑐵𑐎𑐵𑐬 𑐄𑐟𑑂𑐥𑐵𑐡𑐣 𑐫𑐵𑐂𑐐𑐸 𑐠𑐵𑐫𑑂 𑐣𑑄 𑐏𑑅, 𑐄𑐎𑐶𑑄 𑐠𑐸𑐎𑐶𑐫𑐵𑐟 𑐥𑐸𑐣𑐬𑑂𑐖𑐷𑐰𑐶𑐟 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 ‘𑐬𑐶𑐨𑐵𑐂𑐨 𑐡𑐧𑐹’ 𑐢𑐎𑐵𑑅 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐵𑐐𑐸 𑐰 𑐠𑐸𑐐𑐸 𑐎𑐰𑐶𑐟𑐵 𑐥𑐵𑐛𑐫𑐵 𑐖𑑂𑐫𑐵𑐗𑑂𑐰𑑅 𑐣𑑄 𑐰𑐴𑐾 𑐀𑐨𑐶𑐫𑐵𑐣𑐫𑐵 𑐕𑐐𑐹 𑐀𑑄𑐐𑐫𑐵 𑐬𑐸𑐥𑐫𑑂 𑐳𑐘𑑂𑐔𑐵𑐮𑐣 𑐫𑐵𑐣𑐵𑐐𑐸 𑐏𑑅 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅 𑐫𑐾𑑃 𑐩𑐣𑐥𑐵 𑑑𑑒 𑐰𑐜𑐵𑐳𑑂𑐠𑐶𑐟 𑐟𑐷𑐣 𑐡𑐾𑐰𑐮 (𑐥𑐔𑐮𑐷 𑐨𑐿𑐬𑐰𑐫𑐵 𑐮𑐶𑐄𑐣𑐾) 𑐮𑐵𑐐𑐵𑐫𑐵 𑐡𑐧𑐸𑐮𑐶𑐂 𑐖𑐹𑐐𑐸 𑐏𑑅 𑑋 𑐫𑐾𑑃 𑐩𑐣𑐥𑐵𑐫𑐵 𑐐𑑂𑐰𑐵𑐴𑐵𑐮𑐶 𑐰 𑐣𑐾𑐥𑐵𑐮𑐩𑐞𑑂𑐜𑐮 𑐮𑐶𑐚𑑂𑐬𑐾𑐔𑐬 𑐎𑐮𑑂𑐔𑐬 𑐚𑑂𑐬𑐲𑑂𑐚𑐫𑐵 𑐳𑐴𑐎𑐵𑐬𑑂𑐫𑐫𑑂 𑐎𑐰𑐶𑐟𑐵𑐫𑐵 𑐮𑐵𑐫𑑂𑐎𑐹𑐥𑐵𑐏𑐾𑑄 𑐄𑐐𑐸 𑐐𑑀𑐲𑑂𑐛𑐷 𑐫𑐵𑑅𑐐𑐸 𑐏𑑅 𑑋

𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐰𑐶.𑐳𑑄. 𑑒𑑐𑑒𑑒 𑐳𑐵𑐮𑐫𑑂 𑐣𑐾𑐰𑐵𑑅𑐟𑐫𑑂𑐳𑑄 𑐫𑐵𑑅𑐐𑐸 𑐳𑐵𑐴𑐶𑐟𑑂𑐫𑐶𑐎 𑐁𑐣𑑂𑐡𑑀𑐮𑐣 𑐠𑐷𑐠𑐷 𑐡𑐧𑐸𑐮𑐶𑐂 𑐴𑐾 𑐳𑐩𑑂𑐥𑐣𑑂𑐣 𑐖𑐹𑐐𑐸 𑐰 𑐄𑐎𑐶𑑄 𑐫𑐎𑑂𑐰𑑄 𑐳𑐵𑐴𑐶𑐟𑑂𑐫𑐎𑐵𑐬𑐟 𑐖𑐣𑑂𑐩𑐾 𑐫𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐨𑐵𑐲𑐵 𑐁𑐫𑑀𑐐𑐫𑐵 𑐡𑐸𑐖𑑅 𑐳𑐸𑐬𑐾𑐱 𑐎𑐶𑐬𑐞𑑄 𑐩𑐵𑐟𑐺𑐨𑐵𑐲𑐵𑑄 𑐎𑐰𑐶𑐟𑐵 𑐥𑐵𑐛 𑐫𑐵𑐫𑐾𑐧𑐮𑐫𑑂 𑐄𑐎𑐷 𑐩𑐾𑐩𑐾𑐐𑐸 𑐟𑐟𑑂𑐰𑐫𑐵 𑐎𑐩𑐷 𑐖𑐹𑐳𑐵𑑄 𑐰𑐶𑐱𑐸𑐡𑑂𑐢 𑐎𑐰𑐶𑐟𑐵𑐫𑐵 𑐳𑐰𑐵𑑅 𑐰𑐂𑐐𑐸 𑐖𑐹𑐐𑐸𑐮𑐶𑑄 𑐎𑐰𑐶𑐟𑐫𑑂𑐳𑑄 𑐠𑑅𑐠𑑅𑐐𑐸 𑐩𑐵𑑄𑐨𑐵𑐳𑑄 𑐎𑐰𑐶𑐟𑐵 𑐔𑑂𑐰𑐫𑐾𑐐𑐸 𑐰 𑐧𑑂𑐰𑐣𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵𑐡𑐷𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐶𑐲𑑂𑐚 𑐥𑐵𑐴𑐵𑑄𑐥𑐶𑑄 𑐧𑐹𑐝𑐵𑐣𑐶𑐮𑐎𑐞𑑂𑐛 𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐩𑐾𑐫𑐬 𑐀𑐣𑐶𑐟𑐵 𑐮𑐵𑐩𑐵, 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐄𑐲𑐵 𑐱𑐾𑐬𑐔𑐣, 𑐢𑐶𑐬𑐾𑐣𑑂𑐡𑑂𑐬 𑐥𑑂𑐬𑐾𑐩𑐬𑑂𑐲𑐶, 𑐮𑐎𑑂𑐲𑑂𑐩𑐷 𑐩𑐵𑐮𑐷 𑐮𑐶𑐳𑐾𑑄 𑐳𑑂𑐣𑐾𑐴 𑐳𑐵𑐫𑑂𑐩𑐶, 𑐀𑐨𑐫 𑐱𑑂𑐬𑐾𑐲𑑂𑐛, 𑐳𑑂𑐰𑐥𑑂𑐣𑐶𑐮 𑐳𑑂𑐩𑐺𑐟𑐶, 𑐬𑐩𑐶 𑐥𑑂𑐬𑐶𑐫𑐵, 𑐨𑐹𑐩𑐶𑐎𑐵 𑐠𑐵𑐬𑐸, 𑐕𑐩 𑐐𑐸𑐬𑐸𑐒, 𑐩𑐣𑑂𑐡𑐶𑐬𑐵 𑐱𑑂𑐬𑐾𑐲𑑂𑐛, 𑐩𑑄𑐖𑐸 𑐱𑑂𑐬𑐾𑐲𑑂𑐛 𑐳𑐶𑑄𑐴, 𑐩𑐶𑐮𑐮𑐵 𑐱𑐬𑑂𑐩𑐵 𑐬𑐵𑐖𑑀𑐥𑐵𑐢𑑂𑐫𑐵𑐫, 𑐬𑐱𑑂𑐩𑐶 𑐣𑐵𑐥𑐶𑐟, 𑐔𑐣𑑂𑐡𑑂𑐬𑐧𑐴𑐵𑐡𑐸𑐬 𑐮𑐵𑐩𑐵, 𑐧𑐳𑐣𑑂𑐟 𑐣𑐎𑑅𑐩𑐶, 𑐴𑐶𑐬𑐵𑐩𑐟𑐷 𑐬𑐵𑐣𑐵 𑐩𑐐𑐬, 𑐃𑐱𑑂𑐰𑐬 𑐠𑑀𑐎𑐬, 𑐎𑐸𑐩𑐵𑐬𑐷 𑐱𑐬𑐞 𑐄𑐬𑐵𑑃𑐰, 𑐳𑐷𑐟𑐵 𑐟𑐸𑐩𑑂𑐏𑐾𑐰𑐵, 𑐰𑐶𑐣𑐶𑐟𑐵 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑑄𑐳𑑄 𑐎𑐰𑐶𑐟𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐎𑐰𑐶𑐟𑐵𑐫𑐵 𑐮𑐵𑐫𑑂𑐎𑐹𑐫𑐵 𑐕𑑂𑐫𑐵𑑄𑐖𑑂𑐫𑐾 𑐬𑐖𑐣𑐷𑐩𑐶𑐮𑐵𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐮𑐵𑐫𑑂𑐎𑐹𑐫𑐵 𑐣𑐵𑐫𑑅 𑐜𑐵. 𑐖𑑂𑐫𑑀𑐟𑐶𑐥𑑂𑐬𑐨𑐵 𑐟𑐸𑐮𑐵𑐢𑐬𑑄 𑐥𑑀𑐬𑑂𑐟𑐸𑐐𑐮𑑄 𑐕𑑂𑐰𑐫𑐵𑐡𑐷𑐐𑐸 𑐨𑐶𑑄𑐟𑐸𑐣𑐵 𑐳𑐣𑑂𑐡𑐾𑐱 𑐧𑑂𑐰𑐣𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋