𑐕𑐶𑐐𑐸 𑐳𑐦𑐮𑐟𑐵 𑐕𑐶𑐐𑐸 𑐴𑐾 𑐮𑑂𑐴𑐵𑐟𑐫𑑂

#𑐣𑐶𑐬𑑂𑐩𑐮 𑐰𑐖𑑂𑐬𑐵𑐔𑐵𑐬𑑂𑐫

‘𑐁𑑅 𑐕𑐸 𑐧𑑂𑐰𑐣𑐾𑐐𑐸 ?’ 𑐠𑑂𑐰 𑐣𑑂𑐴𑑂𑐫𑐳𑑅 𑐡𑑃𑐫𑑂𑐡𑐳𑑄 𑐥𑑂𑐫𑑄𑐐𑐹 𑐮𑐏 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐳𑑄 𑐠𑑅𑐎𑐾 𑐰𑐵 𑐩𑐾𑐥𑐶𑑄𑐎𑐾 𑐣𑑂𑐫𑐣𑐷𑐐𑐸 𑐕𑐐𑐹 𑐣𑑂𑐴𑑂𑐫𑐳𑑅 𑐏𑑅𑐳𑐵 ‘𑐁𑑅 𑐕𑐸 𑐧𑑂𑐰𑑄𑐎𑐾𑐐𑐸 ?’ 𑐢𑐂𑐐𑐸 𑐣𑑂𑐴𑑂𑐫𑐳𑑅 𑐣𑑄 𑐡𑑃𑐫𑑂𑐡𑐳𑑄 𑐴𑐾 𑐥𑑂𑐫𑑄𑐐𑐹 𑐮𑐏 𑐩𑐵𑑄𑐀𑐧𑐸𑐥𑐶𑑄𑐳𑑄 𑐠𑑅𑐎𑐾 𑐰𑐵 𑐩𑐾𑐥𑐶𑑄𑐎𑐾 𑐣𑑂𑐫𑐣𑐷𑐐𑐸 𑐣𑑂𑐴𑑂𑐫𑐳𑑅 𑐏𑑅 𑑋 𑐠𑑂𑐰 𑐣𑑂𑐴𑑂𑐫𑐳𑑅𑐫𑐵 𑐮𑐶𑐳𑑅 𑐩𑐣𑐹𑐥𑐟𑐶𑐎𑑄 𑐥𑐵𑐂 𑑋 𑐟𑐬, 𑐕𑐐𑐹 𑐮𑐶𑐳𑑅 𑐢𑐵𑑅𑐳𑐵 𑐗𑐶𑐡𑑃 𑐣𑑂𑐴𑑂𑐫𑑅 𑐖𑐎 𑐳𑐵𑐣𑑂𑐡𑐬𑑂𑐨𑐶𑐎 𑐖𑐹𑐳𑐵 𑐁𑑅 𑐠𑑁𑑄𑐎𑐣𑑂𑐴𑐫𑑂 𑐳𑐵𑐣𑑂𑐡𑐬𑑂𑐨𑐶𑐎 𑐩𑐖𑐸𑐂𑐢𑐸𑑄𑐎𑐮 𑑋

𑐰 𑐮𑐶𑐳𑑅 𑐏𑑅 , ‘𑐫𑐡𑐶 𑐕𑐶𑑄 𑐜𑐶𑐳𑑂𑐚𑐶𑐒𑑂𑐐𑐳𑐣 𑐩𑐵𑐬𑑂𑐎’ 𑐰𑑅𑐐𑐸 𑐏𑑅𑐳𑐵 𑐳𑐵𑐂𑐣𑑂𑐳 𑐧𑑂𑐰𑑃, 𑐦𑐳𑑂𑐚 𑐜𑐶𑐨𑐶𑐖𑐣 𑐰𑑅𑐳𑐵 𑐎𑐩𑐬𑑂𑐳 𑐧𑑂𑐰𑑃 𑐰𑐵 𑐳𑐾𑐎𑐾𑐣𑑂𑐜 𑐜𑐶𑐨𑐶𑐖𑐣 𑐰𑐵 𑐖𑐳𑑂𑐚 𑐥𑐵𑐳 𑐖𑐎 𑐏𑑅𑐳𑐵 𑐁𑐬𑑂𑐚 𑐧𑑂𑐰𑑄 𑑋’𑐣𑑂𑐴𑑂𑐫𑐵𑐩𑑂𑐴𑐾𑐳𑑂𑐫𑐵𑑄 𑐣𑑂𑐴𑑂𑐫𑐵𑐐𑐸 𑐴𑐾 𑐢𑐵𑑅𑐳𑐵𑑄 𑐠𑑁𑑄𑐎𑐣𑑂𑐴𑐫𑑂 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐠𑐵𑐫𑑂 𑐣𑑄 𑐩𑐡𑐫𑐾𑐎𑑄 𑐩𑐐𑐵𑑅 𑑋 𑐜𑐵𑐎𑑂𑐚𑐬, 𑐂𑐣𑑂𑐖𑐶𑐣𑐶𑐫𑐬, 𑐥𑐵𑐂𑐮𑐚, 𑐰𑐿𑐖𑑂𑐘𑐵𑐣𑐶𑐎, 𑐰𑐎𑐶𑐮, 𑐀𑐬𑑂𑐠𑐱𑐵𑐳𑑂𑐟𑑂𑐬𑐷 𑐰𑐵 𑐕𑐸𑑄 𑐣𑑄 𑐎𑐠𑑄𑐫𑐵 𑐩𑐵𑐣𑐰𑐷𑐫 𑐳𑑄𑐱𑐵𑐢𑐣𑐫𑐵𑐟 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐟 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑐩𑐵𑐳𑑂𑐚𑐬𑑂𑐳 𑐫𑐵𑐫𑐾𑐩𑐵𑑅 𑑋

𑐀𑐠𑐾𑐴𑐾 𑐡𑐎𑐮𑐫𑑂 𑐩𑑂𑐴𑑀 𑐥𑐬𑑂𑐳𑐾𑐣𑑂𑐚 𑐰𑑅𑐥𑐶𑑄𑐳𑑄 𑐁𑐬𑑂𑐚 𑐧𑑂𑐰𑐣𑐷 𑐢𑐵𑐫𑐾𑐐𑐸 𑐣𑑄 𑐳𑐩𑐫𑐳𑐵𑐣𑑂𑐡𑐬𑑂𑐨𑐶𑐎 𑐩𑐖𑐸𑐂 𑐢𑐸𑑄𑐎𑐮 𑑋 𑐕𑐐𑐹 𑐳𑑄𑐳𑑂𑐠𑐵 𑐣𑑂𑐴𑑂𑐫𑐵𑐎𑐾𑐟 𑐎𑐸𑐱𑐮 𑐥𑑂𑐬𑐱𑐵𑐳𑐎, 𑐳𑑄𑐔𑐵𑐬𑐎𑐬𑑂𑐩𑐷 𑐩𑐡𑐫𑐾𑐎𑑄 𑐩𑐐𑐵𑑅 𑑋𑐠𑑁𑑄𑐎𑐣𑑂𑐴𑐫𑑂 𑐳𑑂𑐰𑑄𑐐𑐹 𑐟𑐴𑐫𑐵 𑐳𑐬𑐎𑐵𑐬 𑐡𑐸 𑐎𑐵𑐣𑐸𑐣𑐰𑐶𑐡𑑂𑐟𑐫𑑂𑐐𑐸 𑐜𑐶𑐩𑐵𑐣𑑂𑐜 𑐁𑐥𑐵𑐮𑑄 𑐡𑐸, 𑐀𑐠𑐾 𑐖𑐸𑐫𑐵𑑅 𑐖𑐸𑐂 𑐠𑐸𑐐𑐸 𑐡𑑃𑐫𑑂 𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐊𑐮𑐊𑐮𑐧𑐷 𑐧𑑂𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐗𑐶𑐡𑑂𑐰𑐮𑑄 𑐩𑐮𑑂𑐫𑐵𑐎 𑐡𑐟 𑑋

𑐥𑑂𑐬𑐱𑐵𑐳𑐎 𑐰 𑐰𑐎𑐶𑐮, 𑐀𑐠𑐾𑐴𑐾 𑐎𑐮𑐵𑐎𑐵𑐬 (𑐔𑐶𑐟𑑂𑐬𑐎𑐵𑐬), 𑐳𑑄𑐐𑐷𑐟, 𑐳𑐩𑐵𑐖𑐱𑐵𑐳𑑂𑐟𑑂𑐬𑐷, 𑐧𑐵𑐫𑑀𑐮𑑀𑐖𑐶𑐳𑑂𑐚 𑐖𑐸𑐂𑐟 𑐁𑐬𑑂𑐚 𑐩𑐧𑑂𑐰𑑄𑐳𑐾𑑄 𑐩𑐐𑐵𑑅 𑑋 𑐀𑐠𑐾𑐴𑐾 𑐣𑑂𑐴𑐹𑐐𑐸 𑐣𑑂𑐴𑐹𑐐𑐸 𑐥𑑂𑐬𑐰𑐶𑐢𑐶 𑐁𑐰𑐶𑐲𑑂𑐎𑐵𑐬 𑐰 𑐄𑐥𑐔𑐵𑐬𑐫𑐵 𑐣𑐶𑑄𑐟𑐶𑑄 𑐳𑐵𑐂𑐣𑑂𑐳 𑐰𑐶𑐲𑐫 𑐩𑐧𑑂𑐰𑑄𑐳𑐾𑑄 𑐩𑐐𑐵𑑅 𑑋 𑐠𑐸𑐮𑐶 𑐏𑑃 𑐎𑐣𑐾 𑐢𑐸𑑄𑐎𑐵𑑅 𑐐𑐸𑐐𑐸 𑐥𑐟𑐶 𑐰𑐶𑐲𑐫 𑐐𑐸𑐮𑐶 𑐩𑐴𑐟𑑂𑐰 𑐢𑐎𑐵𑑅 𑐕𑐬𑑂𑐮𑑄𑐐 𑐴𑐾 𑐖𑐸𑐂𑐢𑐸𑑄𑐎𑐮 𑐖𑐸𑐂𑐩𑐵𑑅 𑑋

𑐏𑑃 𑐰𑐮, 𑐀𑐥𑑂𑐰𑑅 𑐥𑐬𑑂𑐳𑐾𑐣𑑂𑐚 𑐴𑑅𑐩𑑂𑐴𑐾𑐳𑑂𑐫𑐵𑑄 𑐳𑐵𑐂𑐣𑑂𑐳 𑐴𑐾 𑐧𑑂𑐰𑐣𑐾𑐩𑐵𑑅, 𑐎𑐩 𑐥𑐬𑑂𑐳𑐾𑐣𑑂𑐚 𑐴𑑅𑐩𑑂𑐴𑐾𑐳𑑂𑐫𑐵𑑄 𑐎𑐩𑐬𑑂𑐳 𑐰𑐵 𑐁𑐬𑑂𑐚𑐳 𑐧𑑂𑐰𑐣𑐾𑐩𑐵𑑅 𑐢𑐂𑐐𑐸 𑐢𑐵𑐬𑐞𑐵𑐫𑐵𑐟 𑐟𑑂𑐫𑐵𑐐 𑐫𑐵𑐫𑐾𑐩𑐵𑑅𑐐𑐸 𑐡𑐸 𑑋
𑑙𑑐 𑐥𑑂𑐬𑐟𑐶𑐱𑐟 𑐴𑑅𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑑄 𑐎𑐩𑐬𑑂𑐳 𑐧𑑂𑐰𑑄𑐳𑐵𑑄 𑐖𑐶𑐄, 𑐁𑐬𑑂𑐚 𑐧𑑂𑐰𑑄𑐳𑐵𑑄 𑐖𑐶𑐄, 𑐫𑐡𑐶 𑐰𑐫𑐵 𑐂𑐔𑑂𑐕𑐵 𑐡𑐸𑐳𑐵 𑐄𑐎𑐠𑑄 𑐧𑑂𑐰𑐣𑐾𑐩𑐵𑑅 𑑋 𑐳𑐵𑐂𑐣𑑂𑐳 𑐧𑐵𑐴𑐾𑐎 𑐩𑐾𑐐𑐸𑐮𑐶𑐂 𑐂𑐔𑑂𑐕𑐵 𑐴𑐾 𑐩𑐡𑐸𑐳𑐵 𑐳𑐵𑐂𑐣𑑂𑐳 𑐴𑐾 𑐧𑑂𑐰𑐣𑐾𑐩𑐵𑑅 𑑋

 

𑐠𑐣 𑐣𑑂𑐴𑑂𑐫𑐠𑐣𑐵𑐟𑐫𑐵𑐐𑐸 𑐟𑐳𑑂𑐧𑐶𑐬𑐫𑑂 𑐕𑐠𑐵𑐳𑑄 𑐴𑐾 𑐳𑑂𑐰𑑄𑐐𑐹 𑐰𑐶𑐢𑐵 (𑐎𑑂𑐟𑐔𑐨𑐧m) 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵𑐟 𑐠𑐸𑐎𑐠𑑄 𑐠𑐸𑐂𑐎𑐾 – 𑐕𑐸𑑄 𑐣𑑄 𑐎𑐠𑑄𑐫𑐵 𑐕𑐾𑑃 𑐡𑐣𑐾𑐟 𑐖𑐐 𑐩𑐟𑐳𑐾𑑄 𑐩𑐐𑐵𑑅, 𑐰 𑐖𑐐 𑐢𑐂𑐐𑐸 𑐴𑐾 𑐊𑐳𑐂𑐂𑐫𑐵 𑐱𑐶𑐎𑑂𑐲𑐵 𑐏𑑅 𑑋 𑐠𑑂𑐰 𑐟𑐐𑐶𑐩𑐫𑑂 𑐠𑑅𑐟 𑐫𑑅𑐳𑐵𑑄 𑐩𑐫𑑅𑐳𑐵𑑄 𑐠𑐷𑐠𑐷 𑐰𑐶𑐲𑐫 𑐧𑑂𑐰𑐣𑐾𑐩𑐵𑑅, 𑐧𑑂𑐰𑐣𑐷 𑐣𑑄 𑑋 𑐁𑑅 𑐰𑐣𑐾 𑐖𑐐 𑐟𑐫𑐾 𑐢𑐸𑑄𑐎𑐵𑑅 𑐕𑐸 𑐫𑐵𑐫𑐾𑐐𑐸 ? 𑐀𑐬𑑂𑐠𑐵𑐟 𑐐𑐖𑑂𑐫𑐵𑑅𑐐𑐸 𑐕𑐾𑑃 𑐡𑐫𑐾𑐎𑐾𑐐𑐸 ?

𑐴𑐳𑑂𑐥𑐶𑐚𑐮 𑐡𑐫𑐾𑐎𑐾𑐐𑐸 𑐏𑑅𑐳𑐵 𑐰 𑐴𑐾 𑐎𑐠𑑄 𑐎𑑂𑐰𑐠𑐵, 𑐮𑐧𑐶 𑐰𑐵 𑐩𑐾𑐩𑐾𑐐𑐸 𑐡𑐫𑐾𑐎𑐾 𑐩𑐵𑐮 𑑋 𑐫𑐡𑐶 𑐧𑐶𑐖𑐣𑐾𑐳 𑐎𑐩𑑂𑐥𑑂𑐮𑐾𑐎𑑂𑐳 𑐡𑐫𑐾𑐎𑐾𑐐𑐸 𑐏𑑅𑐳𑐵 𑐴𑐳𑑂𑐥𑐶𑐚𑐮𑐫𑐵 𑐳𑑀𑐔𑑄 𑐰𑐵 𑐝𑑄𑐐𑑄 𑐡𑐫𑐾𑐎𑐵𑑄 𑐩𑐖𑐶𑐄, 𑐧𑐶𑐖𑐣𑐾𑐱 𑐎𑐩𑑂𑐥𑑂𑐮𑐾𑐎𑑂𑐳 𑐎𑐠𑑄 𑐴𑐾 𑐡𑐫𑐾𑐎𑐾𑐩𑐵𑐮 𑐰𑐵 𑐰 𑐖𑐐𑐫𑑂 𑐰𑐺𑐡𑑂𑐢𑐵𑐱𑑂𑐬𑐩 𑐰𑐵 𑐧𑐵𑐮𑐐𑐺𑐴 𑐡𑐫𑐾𑐎𑐾𑐐𑐸 𑐏𑑅𑐳𑐵 𑐰 𑐴𑐾 𑐎𑐠𑑄 𑐖𑑂𑐫𑐵𑐏𑑃 𑐣𑑂𑐴𑑂𑐫𑐵𑐎𑐾𑐩𑐵𑐮 𑑋 𑐊𑐳𑐂𑐂𑐫𑐵 𑐖𑐐𑐫𑑂 𑐳𑐵𑐂𑐣𑑂𑐳 𑐣𑐵𑑄𑐫𑐵 𑐕𑐾𑑃 𑐡𑐣𑐾𑐐𑐸 𑐏𑑅𑐳𑐵 𑐕𑐐𑐹 𑐁𑐢𑐵𑐬 𑐩𑐡𑐫𑐾𑐎𑑄 𑐩𑐐𑐵𑑅, 𑐊𑐳𑐂𑐂 𑐰 𑐰𑐶𑐡𑑂𑐫𑐵𑐬𑑂𑐠𑐷 𑐳𑐵𑐂𑐣𑑂𑐳 𑐰 𑐀𑐥𑑂𑐳𑑂𑐣𑐮 𑐩𑑂𑐫𑐵𑐠 𑐰𑐶𑐲𑐫 𑐎𑐵𑑅𑐐𑐸 𑐴𑐾 𑐖𑐸𑐂𑐩𑐵𑑅 𑑋

𑐰𑐫𑐵𑑄 𑐮𑐶𑐥𑐵 𑐥𑐬𑑂𑐳𑐾𑐣𑑂𑐚 𑐎𑐩 𑐖𑐹𑐳𑐵𑑄 𑐳𑐵𑐂𑐣𑑂𑐳 𑐎𑐫𑐵𑑅 𑐧𑑂𑐰𑐣𑐾 𑐖𑐶𑐄, (𑐟𑐬 𑐎𑐮𑐾𑐖𑑄 𑐩𑐧𑑂𑐰𑑄𑐎𑐾𑐟 𑐳𑑂𑐰𑐫𑐾 𑐫𑑅) 𑐕𑐐𑐹 𑐖𑑂𑐰𑐮𑐣𑑂𑐟 𑐄𑐡𑐵𑐴𑐬𑐞 𑐩𑐡𑐸𑐩𑑂𑐴 𑐥𑑂𑐬𑐵. 𑐜𑐵. 𑐡𑐫𑐵𑐣𑐣𑑂𑐡 𑐰𑐖𑑂𑐬𑐵𑐔𑐵𑐬𑑂𑐫 𑑋 𑐰𑐫𑑂𑐎𑑅 𑑑𑑒 𑐡𑑃 𑐡𑐸𑐧𑐮𑐫𑑂 𑐊𑐳𑐊𑐮𑐳𑐷 𑐥𑐵𑐳 𑐖𑐸𑐮, 𑐟𑐬 𑐜𑐶𑐨𑐶𑐖𑐣 𑐳𑐾𑐎𑐾𑐣𑑂𑐜 𑐖𑐎 𑐰𑐮 𑑋 𑐳𑐵𑐂𑐣𑑂𑐳 𑐧𑑂𑐰𑐣𑐾𑐐𑐸 𑐂𑐔𑑂𑐕𑐵 𑐫𑐵𑐟, 𑐟𑐬 𑐎𑐮𑐾𑐖𑑄 𑐥𑐬𑑂𑐳𑐾𑐣𑑂𑐚 𑐎𑐩 𑐰𑑅𑐐𑐸𑐮𑐶𑑄 𑐁𑐬𑑂𑐚 𑐧𑑂𑐰𑐣𑐾𑐟 𑐢𑐵𑐮 𑑋

𑐟𑐬 𑐁𑐬𑑂𑐚 𑐧𑑂𑐰𑐣𑐾 𑐩𑐵𑐳𑑂𑐟𑐾 𑐴𑐾 𑐩𑐰𑑅, 𑐮𑐕𑐶 𑐣𑐶𑐮𑐵 𑐮𑐶𑐥𑐵 𑐀𑐳𑑂𑐎𑐮 𑐎𑐮𑐾𑐖𑐫𑐵 𑐥𑑂𑐬𑐶𑐣𑑂𑐳𑐶𑐥𑐮𑐫𑐵𑐟 𑐂𑐣𑐵𑐥 𑐫𑐵𑐣𑐵𑑅 𑐳𑐵𑐂𑐣𑑂𑐳 𑐴𑐾 𑐧𑑂𑐰𑐣 𑑋 𑐮𑐶𑐥𑐵 𑐰𑐣𑐵𑑅 𑐰𑐶𑐱𑑂𑐰𑐫𑑂 𑐴𑐾 𑐣𑐵𑑄𑐖𑐵𑑅𑐩𑑂𑐴 𑐰𑐿𑐖𑑂𑐘𑐵𑐣𑐶𑐎 𑐖𑐸𑐫𑐵𑑅 𑐥𑐶𑐡𑐣𑐾𑐟 𑐳𑐦𑐮 𑐖𑐸𑐮 𑑋 𑐠𑐸𑐎𑐶𑐫𑐵 𑐥𑐵𑐫𑑂𑐕𑐶 𑐀𑑅𑐏𑑅 𑐕𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑑄 𑐊𑐳𑐊𑐮𑐳𑐷𑐂 𑑘𑑗 𑐥𑑂𑐬𑐟𑐶𑐱𑐟 𑐴𑐮, 𑐟𑐬 𑐰𑐫𑐵𑐟 𑐳𑐵𑐂𑐣𑑂𑐳 𑐰𑐶𑐲𑐫 𑐧𑑂𑐰𑐣𑐾 𑐴𑐾 𑐩𑐵𑐳𑑂𑐟𑐶 𑐩𑐰𑑅, 𑐰𑑄 𑐎𑐩𑐬𑑂𑐳 𑐰𑐶𑐲𑐫 𑐮𑑂𑐫𑐮, 𑐎𑐵𑐬𑐞 𑐰𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐖𑐷𑐰𑐣 𑐧𑑂𑐰𑑃 𑐖𑐎 𑐧𑑂𑐰𑐣𑐵𑑅 𑐳𑐶𑐢𑐫𑐾𑐎𑐾 𑐩𑐵𑐳𑑂𑐟𑐶 𑐩𑐰𑑅 𑐏𑐣𑐶𑑄 𑑋

𑐧𑑂𑐰𑑃 𑐣𑑄 𑐧𑑂𑐰𑐣𑐾𑐐𑐸 𑐀𑐟𑐶𑐬𑐶𑐎𑑂𑐟 𑐎𑑂𑐬𑐶𑐫𑐵𑐎𑐮𑐵𑐥𑐫𑑂 𑐣𑑄 𑐳𑐎𑑂𑐬𑐶𑐫 𑐖𑐸𑐂𑐐𑐸 𑐣𑐵𑐥𑑄 𑐮𑐶𑐥𑐵 𑐰𑐣𑐵𑑅 𑐳𑐦𑐮 𑐄𑐡𑑂𑐫𑐩𑐷 𑐰𑐵 𑐎𑐸𑐱𑐮 𑐰𑑂𑐫𑐰𑐳𑑂𑐠𑐵𑐥𑐎 𑐖𑐸𑐂𑐐𑐸 𑐂𑐔𑑂𑐕𑐵 𑐡𑐸𑐐𑐸𑐮𑐶𑑄 𑐜𑐶𑐳𑑂𑐚𑐶𑐒𑑂𑐐𑐳𑐣 𑐰𑑅𑐳𑐵𑑄 𑐰𑑄 𑐳𑐵𑐂𑐣𑑂𑐳 𑐩𑐧𑑂𑐰𑑃𑐳𑐾 𑐎𑐩𑐬𑑂𑐳 𑐎𑐫𑐵𑑅 𑐧𑑂𑐰𑐣, 𑐄𑐎𑐶𑐂 𑐰 𑐀𑐟𑐶𑐎𑑄 𑐮𑐫𑑂𑐟𑐵𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐁𑑅 𑐴𑐵𑐣𑑄 𑐖𑐐𑐫𑐵 𑐧𑐵𑐬𑐾 𑐏𑑃 𑐮𑑂𑐴𑐵𑐫𑐾 –𑐊𑐳𑐂𑐂𑐫𑐵 𑐀𑑄𑐐𑐫𑑂 𑐜𑐵𑐎𑑂𑐚𑐬, 𑐂𑐣𑑂𑐖𑐶𑐣𑐶𑐫𑐬, 𑐥𑐵𑐂𑐮𑐚, 𑐣𑐬𑑂𑐳, 𑐰𑐿𑐖𑑂𑐘𑐵𑐣𑐶𑐎 𑐣𑐵𑑄𑐫𑐵 𑐕𑐾𑑃 𑐡𑐣𑐾𑐐𑐸 𑐏𑑅𑐳𑐵 𑐢𑐶𑐳𑐶𑐮𑐵𑑅𑐐𑐸 𑐖𑐐 𑐮𑐵 𑐡𑐫𑐾 𑐴𑐾 𑐢𑐸𑑄𑐎𑐮, 𑐀𑐖𑑂𑐫𑐵𑑅𑐐𑐸 𑐕𑐾𑑃 𑐡𑐣𑐾𑐟 𑐳𑐵𑐂𑐣𑑂𑐳 𑐜𑐶𑐖𑐵𑐂𑐣𑐫𑐵𑐐𑐸 𑐕𑐾𑑃 𑐡𑐣𑐾𑐩𑐵𑐮, 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐦𑐶𑐖𑐶𑐎𑑂𑐳, 𑐎𑐾𑐩𑐾𑐳𑑂𑐚𑑂𑐬𑐶, 𑐩𑑂𑐫𑐵𑐠 𑐰𑐵 𑐦𑐶𑐖𑐶𑐎𑑂𑐳, 𑐎𑐾𑐩𑐾𑐳𑑂𑐚𑑂𑐬𑐶 𑐧𑐵𑐂𑐮𑑀𑐖𑐶 𑐎𑐫𑐵𑑅 𑐀𑐢𑑂𑐫𑐫𑐣 𑐫𑐵𑐫𑐾𑐩𑐵𑐮 𑑋

𑐊𑐳𑐂𑐂𑐫𑐵 𑐖𑐐𑐫𑑂 𑐎𑐸𑐱𑐮 𑐥𑑂𑐬𑐱𑐵𑐳𑐎, 𑐎𑐵𑐣𑐸𑐣 𑐰𑑂𑐫𑐰𑐳𑐵𑐫𑐷 𑐰𑐵 𑐣𑑂𑐫𑐵𑐫𑐵𑐢𑐷𑐱, 𑐀𑐣𑐸𑐳𑐣𑑂𑐢𑐵𑐣 𑐀𑐢𑐶𑐎𑐺𑐟, 𑐂𑐟𑐶𑐴𑐵𑐳𑐎𑐵𑐬, 𑐥𑐟𑑂𑐬𑐎𑐵𑐬, 𑐨𑐵𑐲𑐵𑐰𑐶𑐖𑑂𑐘, 𑐀𑐬𑑂𑐠𑐱𑐵𑐳𑑂𑐟𑑂𑐬𑐷, 𑐳𑐩𑐵𑐖𑐱𑐵𑐳𑑂𑐟𑑂𑐬𑐷, 𑐐𑐨𑐬𑑂𑐣𑐬, 𑐳𑐵𑐂𑐎𑑀𑐮𑑀𑐖𑐶𑐳𑑂𑐚, 𑐄𑐡𑑂𑐑𑑀𑐲𑐎, 𑐎𑐮𑐵𑐎𑐵𑐬, 𑐳𑑄𑐐𑐟𑐶𑐎𑐵𑐬, 𑐣𑐺𑐟𑑂𑐫𑐎𑐵𑐬 𑐣𑐵𑑄𑐫𑐵 𑐕𑐾𑑃 𑐡𑐣𑐾𑐐𑐸 𑐏𑑅𑐳𑐵 𑐁𑐬𑑂𑐚 𑐣𑐵𑑄𑐫𑐵 𑐕𑐾𑑃 𑐡𑐣𑐾𑐩𑐵𑐮 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐂𑐟𑐶𑐴𑐵𑐳, 𑐣𑐾𑐥𑐵𑐮𑐷, 𑐀𑑄𑐐𑑂𑐬𑐾𑐖𑐷, 𑐖𑐶𑐫𑑀𑐐𑑂𑐬𑐵𑐦𑐶, 𑐂𑐎𑑀𑐣𑑀𑐩𑐶𑐎𑑂𑐳, 𑐳𑑀𑐳𑐶𑐫𑑀𑐮𑑀𑐖𑐷, 𑐮𑐮𑐶𑐟𑐎𑐮𑐵, 𑐴𑐳𑑂𑐥𑐶𑐚𑐵𑐮𑐶𑐚𑐷𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾𑐩𑐵𑐮 𑑋

𑐊𑐳𑐂𑐂𑐫𑐵 𑐖𑐐𑐫𑑂 𑐎𑐸𑐱𑐮 𑐰𑑂𑐫𑐰𑐳𑑂𑐠𑐵𑐥𑐎, 𑐳𑐶𑐊, 𑐎𑐩𑑂𑐥𑐣𑐷 𑐳𑐔𑐶𑐰, 𑐧𑐿𑑄𑐎, 𑐠𑑅𑐐𑐸 𑐖𑑂𑐫𑐵 𑐳𑑂𑐚𑐵𑐬𑑂𑐚𑐀𑐥, 𑐐𑐨𑐬𑑂𑐣𑐬, 𑐱𑐾𑐫𑐬 𑐎𑐵𑐬𑑀𑐧𑐵𑐬𑐷, 𑐄𑐡𑑂𑐫𑑀𑐐𑐥𑐟𑐶, 𑐴𑑀𑐚𑐮 𑐰𑑂𑐫𑐰𑐳𑐵𑐫𑐷, 𑐁𑐂𑐚𑐷 𑐊𑐎𑑂𑐳𑑂𑐥𑐬𑑂𑐚, 𑐳𑐦𑑂𑐚𑐰𑐾𑐫𑐬 𑐊𑐎𑑂𑐳𑑂𑐥𑐬𑑂𑐚 𑐣𑐵𑑄𑐫𑐵 𑐕𑐾𑑃 𑐡𑐣𑐾𑐐𑐸 𑐏𑑅𑐳𑐵 𑐎𑐩𑐬𑑂𑐳 𑐣𑐵𑑄𑐫𑐵 𑐕𑐾𑑃 𑐡𑐣𑐾𑐩𑐵𑐮, 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐂𑐎𑑀𑐣𑑀𑐩𑐶𑐎𑑂𑐳, 𑐂𑑄𑐐𑑂𑐮𑐶𑐳, 𑐩𑑂𑐫𑐵𑐠𑐩𑑂𑐫𑐵𑐚𑐶𑐎𑑂𑐳, 𑐰𑐶𑐖𑐣𑐾𑐱 𑐳𑑂𑐚𑐜𑐶𑐖, 𑐩𑐵𑐬𑑂𑐎𑐾𑐚𑐶𑐒𑑂𑐐, 𑐊𑐎𑐵𑐄𑐣𑑂𑐚𑐶𑐒𑑂𑐐𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾𑐩𑐵𑐮 𑑋

𑐊𑐳𑐂𑐂 𑐢𑐸𑑄𑐎𑐵𑑅 𑐕𑐸 𑐧𑑂𑐰𑐣𑐾𑐐𑐸 𑐢𑐎𑐵𑑅 𑐎𑑂𑐰𑐫𑑂 𑐣𑑂𑐴𑑂𑐫𑐠𑐣𑐵𑐎𑐠𑑄 𑐣𑐶𑐬𑑂𑐞𑐫 𑐫𑐵𑐣𑐵𑐡𑐷𑐩𑐟𑐾

𑑑) 𑐖𑐶𑐥𑐶𑑄 𑐥𑐵𑐳𑐵𑐥𑐶𑑄 𑐡𑐎𑑂𑐰 𑐳𑐵𑐂𑐣𑑂𑐳 𑐧𑑂𑐰𑑄 𑐰𑐣𑐾 𑐢𑐵𑑅𑐐𑐸𑐮𑐶𑑄 𑐖𑐶 𑐣𑑄 𑐳𑐵𑐂𑐣𑑂𑐳 𑐴𑐾 𑐧𑑂𑐰𑐣𑐾𑐐𑐸

𑑒) 𑐖𑐶𑐥𑐶𑑄 𑐣𑐵𑐥𑐣𑐵𑐥𑑄 𑐖𑐸𑐫𑐵𑐔𑑂𑐰𑑄𑐥𑐶𑑄 𑐥𑐵𑐳𑐵𑐥𑐶𑑄 𑐟𑑂𑐰𑑅𑐦𑐷 𑐢𑐎𑐵𑑅 𑐖𑐶 𑐐𑑂𑐫𑐵𑑅, 𑐀𑐠𑐾 𑐖𑐹𑐐𑐸𑐮𑐶𑑄 𑐥𑐵𑐳𑐵𑐥𑐶𑑄𑐳𑑄 𑐕𑐸 𑐧𑑂𑐰𑐣𑐾 𑐢𑐵𑐮, 𑐖𑐶 𑐣𑑄 𑐰 𑐴𑐾 𑐧𑑂𑐰𑐣𑐾 𑑋 (𑐰𑐵𑐳𑑂𑐟𑐰𑐫𑑂 𑐩𑐾𑐐𑐸 𑐴𑐾 𑐧𑑂𑐰𑐣𑐾𑐐𑐸 𑐂𑐔𑑂𑐕𑐵 𑐡𑐸)

𑑓) 𑐖𑐶𑐩𑐶 𑐩𑐵𑑄 𑐰 𑐧𑐵𑑅𑐥𑐵𑐏𑐾𑑄 𑐳𑐵𑐂𑐣𑑂𑐳 𑐧𑑂𑐰𑐣𑐵𑑅 𑐜𑐵𑐎𑑂𑐚𑐬 𑐰𑐵 𑐂𑐣𑑂𑐖𑐶𑐣𑐶𑐫𑐬 𑐴𑐾 𑐖𑐸𑐂𑐩𑐵𑑅 𑐢𑐵𑑅𑐐𑐸𑐮𑐶𑑄 𑐖𑐶 𑐳𑐵𑐂𑐣𑑂𑐳 𑐧𑑂𑐰𑐣𑐾 (𑐰𑐵𑐳𑑂𑐟𑐰𑐶𑐎𑐟𑐵 𑐰 𑐩𑐔𑐵 𑐳𑐵𑐂𑐣𑑂𑐳 𑐧𑑂𑐰𑐣𑐾𑐟 𑐦𑐶𑐚 𑐴𑐾 𑐩𑐖𑐹) 𑑋

𑑔) 𑐖𑐶𑑄 𑐖𑐶𑐐𑐸 𑐣𑐶𑑄𑐟𑐶𑑄 𑐩𑐏𑐸, 𑐖𑐶𑐐𑐸 𑐂𑐔𑑂𑐕𑐵 𑐎𑐠𑑄 𑐩𑐏𑐸, 𑐩𑐵𑑄𑐧𑐵𑑅 𑐰𑐵 𑐟𑐟𑐵÷𑐡𑐵𑐖𑐸𑐥𑐶𑐣𑐶𑐐𑐸 𑐂𑐔𑑂𑐕𑐵 𑐥𑐹𑐰𑑄𑐎𑐾𑐟 𑐄𑐩𑐶𑐳𑑄 𑐕𑐸 𑐢𑐵𑐮 𑐰 𑐴𑐾 𑐧𑑂𑐰𑐣𑐾 𑑋 (𑐰𑐵𑐳𑑂𑐟𑐰𑐶𑐎𑐟𑐵 𑐰 𑐩𑐔𑐵𑐫𑐵 𑐰 𑐰𑐶𑐲𑐫𑐥𑑂𑐬𑐟𑐶 𑐂𑐔𑑂𑐕𑐵 𑐴𑐾 𑐩𑐡𑐸 𑑋)

𑑕) 𑐠𑑂𑐰 𑐎𑐮𑐾𑐖𑑄 𑐖𑐶𑐟𑑅 𑐳𑑂𑐎𑐮𑐬𑐱𑐷𑐥 𑐧𑐷 𑐢𑐵𑑅𑐐𑐸𑐮𑐶𑑄 𑐖𑐶 𑐰 𑐴𑐾 𑐎𑐮𑐾𑐖𑐫𑑂 𑐄𑐩𑐶𑐳𑑄 𑐢𑐵𑑅𑐐𑐸 𑐴𑐾 𑐧𑑂𑐰𑐣𑐾 𑑋 (𑐰𑐵𑐳𑑂𑐟𑐰𑐶𑐎𑐟𑐵– 𑐰 𑐩𑐔𑐵𑐫𑐵 𑐧𑑂𑐰𑐣𑐾 𑐩𑐵𑐳𑑂𑐟𑐶 𑐰𑑅𑐐𑐸 𑐎𑐮𑐾𑐖 𑐩𑐾𑐐𑐸 𑐴𑐾 𑐡𑐸)

𑑖) 𑐖𑐶𑐩𑐶 𑐀𑐧𑐸𑑄 𑐖𑐶𑐟𑑅 𑐧𑐵𑑄𑐮𑐵𑑅𑐐𑐸 𑐁𑐂𑐦𑑀𑐣 𑐣𑑂𑐫𑐵𑐣𑐵𑐧𑐷 𑐢𑐵𑑅𑐐𑐸𑐮𑐶𑑄 𑐳𑐵𑐂𑐣𑑂𑐳 𑐴𑐾 𑐧𑑂𑐰𑐣𑐾 𑑋 (𑐰𑐵𑐳𑑂𑐟𑐰𑐶𑐎𑐟𑐵 – 𑐰 𑐩𑐔𑐵𑐫𑐵 𑐳𑐩𑐵𑐖𑐳𑐾𑐰𑐷 𑐖𑐸𑐂𑐩𑐵𑐳𑑂𑐟𑐶 𑐰𑑅 𑑋)

𑑗) 𑐥𑑂𑐮𑐳 𑐚𑐸 𑐥𑐵𑐳 𑐖𑐸𑐂 𑐢𑐸𑑄𑐎𑐵𑑅 𑐩𑑀𑐚𑐬𑐳𑐵𑐂𑐎𑐮 𑐳𑑂𑐎𑐸𑐚𑐬 𑐣𑑂𑐫𑐵𑐣𑐵𑐧𑐷 𑐢𑐵𑑅𑐐𑐸𑐮𑐶𑑄 𑐳𑐵𑐂𑐣𑑂𑐳 𑐴𑐾 𑐧𑑂𑐰𑐣𑐾 𑑋 (𑐰𑐵𑐳𑑂𑐟𑐰𑐶𑐎𑐟𑐵 – 𑐰 𑐩𑐔𑐵𑐫𑐵 𑐮𑐫𑐬 𑐖𑐸𑐂𑐩𑐵𑐳𑑂𑐟𑐶 𑐰𑑅 𑑋)

𑑘) 𑐦𑐮𑐵𑐣𑐵𑐫𑐵 𑐎𑐵𑐫𑑄 𑐳𑐵𑐂𑐣𑑂𑐳 𑐧𑑂𑐰𑐣𑐵𑑅 𑐐𑐸𑐮𑐶 𑐢𑑂𑐫𑐧𑐵 𑐎𑐩𑐾 𑐫𑐵𑐟, 𑐕𑑄 𑐣𑑄 𑐳𑐵𑐂𑐣𑑂𑐳 𑐧𑑂𑐰𑐣𑐵𑑅 𑐄𑐮𑐶 𑐴𑐾 𑐎𑐩𑐾 𑐫𑐵𑐫𑐾𑐦𑐂 𑐢𑐵𑑅𑐐𑐸𑐮𑐶𑑄 𑐖𑐶 𑐳𑐵𑐂𑐣𑑂𑐳 𑐴𑐾 𑐧𑑂𑐰𑐣𑐾 𑑋 (𑐰𑐵𑐳𑑂𑐟𑐰𑐶𑐎𑐟𑐵– 𑐰 𑐩𑐔𑐵𑐫𑐵 𑐎𑐮𑐵𑐎𑐵𑐬 𑐖𑐸𑐂𑐩𑐵𑐳𑑂𑐟𑐶 𑐰𑑅 𑑋)

𑑙) 𑐦𑐮𑐵𑐣𑐵𑐫𑐵 𑐩𑑂𑐴𑑂𑐫𑐵𑐫𑑂 𑐎𑐩𑐬𑑂𑐳 𑐧𑑂𑐰𑐣𑐵𑑅 𑐠𑑅𑐐𑐸 𑐴𑐾 𑐀𑐦𑐶𑐳 𑐔𑐵𑐫𑐾𑐎𑐵𑑅 𑐎𑐸𑐳𑑂𑐟 𑐡𑐵𑑄 𑐎𑐩𑐾 𑐫𑐵𑑅𑐐𑐸𑐮𑐶𑑄 𑐕𑑄 𑐣𑑄 𑐎𑐩𑐬𑑂𑐱 𑐴𑐾 𑐧𑑂𑐰𑑃 𑐢𑐵𑑅𑐐𑐸𑐮𑐶𑑄 𑐖𑐶 𑐎𑐩𑐬𑑂𑐳 𑐴𑐾 𑐧𑑂𑐰𑐣𑐾 𑑋 (𑐰𑐵𑐳𑑂𑐟𑐰𑐶𑐎𑐟𑐵 – 𑐰 𑐩𑐔𑐵𑐫𑐵 𑐰𑐿𑐖𑑂𑐘𑐵𑐣𑐶𑐎 𑐖𑐸𑐂 𑐩𑐵𑐳𑑂𑐟𑐶 𑐰𑑅)

𑐠𑐸𑐎𑐠𑑄 𑐣𑐶𑐬𑑂𑐞𑐫 𑐫𑐵𑐣𑐵𑐡𑐶𑐮 𑐢𑐵𑑅𑐳𑐵 𑐕𑐶𑐐𑐸 𑐱𑐿𑐎𑑂𑐲𑐶𑐎 𑐖𑐷𑐰𑐣 𑐰 𑐎𑐬𑐶𑐀𑐬 𑐣𑐶𑐟𑐵𑑄 𑐧𑐬𑑂𑐧𑐵𑐡 𑐣𑑄 𑐖𑐸𑐂𑐦𑐸 𑑋 𑐄𑐮𑐶 𑐖𑐎 𑐩𑐏𑐸 𑐦𑑂𑐬𑐳𑑂𑐚𑑂𑐬𑐾𑐚 𑐖𑐸𑐫𑐵𑑅 𑐩𑐵𑐣𑐳𑐶𑐎 𑐳𑐩𑐳𑑂𑐫𑐵 𑐣𑑄 𑐖𑐸𑐂𑐦𑐸 𑑋