𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶 𑐩𑑂𑐴𑐶𑐐𑑅 𑐰 𑐠𑑁𑑄

𑑒𑑐𑑔𑑖 𑐳𑐵𑐮𑐫𑐵 𑐬𑐵𑐖𑐣𑐷𑐟𑐶𑐎 𑐴𑐶𑐄𑐥𑐵𑑅 𑐮𑐶𑐥𑐵 𑐖𑐵𑐬𑐷 𑐖𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵 𑐎𑐵𑐫𑐾 𑐡𑐂𑐐𑐸 𑐰𑑂𑐫𑐰𑐳𑑂𑐠𑐵 𑐰 𑐄𑐐𑐸 𑐀𑐢𑐶𑐎𑐵𑐬𑐫𑐵 𑐳𑐡𑐸𑐥𑐫𑑀𑐐 𑐫𑐵𑐫𑐾𑐎𑐠𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵 𑐧𑐷𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵 𑐬𑐸𑐥𑐫𑑂 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶 𑐢𑐳𑑂𑐰𑐵𑐎𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑑒𑑐𑑔𑑗 𑐳𑐵𑐮 𑐦𑐵𑐐𑐸𑐣 𑑑𑑒 𑐐𑐟𑐾 𑐱𑐶𑐎𑑂𑐲𑐵 𑐡𑐶𑐰𑐳 𑐀𑐬𑑂𑐠𑐵𑐟 𑐠𑑁𑑄𑐫𑐵 𑐡𑐶𑑄 𑐮𑐵𑐎𑐵𑑅 𑐥𑐮𑐶𑐳𑑂𑐠𑐵 𑐖𑐹𑐐𑐸 𑐧𑑂𑐰𑐣𑐾𑐎𑐸𑐠𑐶𑑄 𑐠𑑁𑑄 𑑓𑑓 𑐡𑑃 𑐧𑐸𑐣𑑂𑐴𑐶 𑐴𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐰𑑄𑐐𑐸 𑐦𑐾𑐧𑑂𑐬𑐸𑐀𑐬𑐷 𑑒𑑑 𑐩𑑄𑐐𑐮𑐰𑐵𑑅 𑐖𑐎 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐳𑐩𑐳𑑂𑐟 𑐩𑐵𑑄𑐨𑐵𑐫𑑂 𑐥𑐾𑑂𑐬𑐩𑐷𑐥𑐶𑑄𑐳𑑄 𑑒𑑓 𑐎𑑂𑐰𑑅𑐐𑐸 𑐰𑐶𑐱𑑂𑐰 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐴𑐣 𑑋 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑑄 𑐣𑑄 𑐠𑐸𑐐𑐸𑐳𑐷𑐫𑐵 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳𑐫𑐵 𑐣𑐶𑑄𑐟𑐶𑑄 ‘𑐱𑐿𑐎𑑂𑐲𑐶𑐎 𑐬𑐸𑐥𑐵𑐣𑑂𑐟𑐬𑐞𑐫𑐵 𑐣𑐶𑑄𑐟𑐶𑑄 𑐧𑐴𑐸𑐨𑐵𑐲𑐶𑐎 𑐱𑐶𑐎𑑂𑐲𑐵’ 𑐣𑐵𑐬𑐵 𑐥𑐶𑐟 𑐧𑐶𑐄𑐐𑐸 𑐏𑑅 𑑋 𑐬𑐵𑐲𑑂𑐚𑑂𑐬 𑐳𑑄𑐑𑑄 𑐠𑐸𑐐𑐸𑐳𑐷 𑐠𑐸𑐎𑐠𑑄𑐫𑐵 𑐣𑐵𑐬𑐵 𑐥𑐶𑐟 𑐧𑐶𑐄𑐐𑐸 𑐀𑐰𑐳𑑂𑐠𑐵𑐫𑑂 𑐗𑐷 𑐣𑐾𑐰𑐵𑑅𑐟𑐫𑑂𑐳𑑄 𑐠𑑁𑑄 𑐳𑑂𑐰𑐫𑐵𑑄 𑑓𑑓 𑐡𑑃 𑐣𑑂𑐴𑑂𑐫𑑅 𑐴𑐾 𑐠𑐸𑐐𑐸 𑐣𑐵𑐬𑐵𑐫𑐵𑐟 𑐳𑐵𑐬𑑂𑐠𑐎 𑐫𑐵𑐫𑐾𑐎𑐠𑑄 𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵 𑐧𑐷𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐢𑐸𑑄𑐎𑐹𑐐𑐸 𑐡𑐸 𑑋

𑑒𑑐𑑔𑑗 𑐳𑐵𑐮𑐫𑐵 𑐳𑑄𑐰𑐶𑐢𑐵𑐣𑐫𑑂 𑐴𑐬𑐾𑐎 𑐳𑐩𑐸𑐡𑐵𑐫𑑄 𑐠𑑅𑐠𑑅𑐐𑐸 𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵 𑐧𑐷𑐐𑐸 𑐧𑑂𑐰𑐣𑐾𑐎𑐸𑐠𑐶 𑐔𑐵𑐫𑐾𑐎𑐾𑐡𑐂 𑐢𑐂𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐎𑐠𑑄 𑐄𑐐𑐸 𑐂𑐮𑐫𑑂 𑐕𑐠𑑂𑐰𑑅 𑐨𑐵𑐲𑐵𑐳𑐾𑐰𑐷𑐥𑐶𑑄 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬, 𑐬𑐵𑐖𑐨𑐵𑐃 𑐖𑐎𑑅𑐩𑐶, 𑐀𑐣𑐵𑐬𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐀𑐩𑐾𑐱 𑐰𑐖𑑂𑐬𑐵𑐔𑐵𑐬𑑂𑐫, 𑐩𑐣𑐸𑐡𑐵𑐳 𑐱𑑂𑐬𑐾𑐲𑑂𑐛 𑐰 𑐱𑐬𑐡 𑐎𑐳𑐵𑑅 ‘𑐎𑐳𑐵𑑅𑐕𑐾𑑃’ (𑐡𑐶𑐰𑑄𑐐𑐟)𑐥𑐶𑑄 𑐖𑐵𑐣𑐵𑑅 𑐠𑐸𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵 𑐥𑐮𑐶𑐳𑑂𑐠𑐵 𑐫𑐵𑑅𑐐𑐸 𑐏𑑅 𑑋 𑐱𑐸𑐬𑐸𑐰𑐵𑐟𑐫𑐵 𑐂𑐮𑐫𑑂 𑐬𑐵𑐖𑐨𑐵𑐃 𑐖𑐎𑑅𑐩𑐶𑐫𑐵 𑐩𑐵𑐮𑑂𑐔𑐵𑐚𑐵𑐬𑐫𑑂 𑐔𑑂𑐰𑑄𑐐𑐸 𑐕𑐾𑑃𑐫𑑂 𑐳𑑂𑐰𑐎𑐹 𑐥𑑂𑐫𑐎𑐹 𑐎𑑂𑐰𑐠𑐵 𑐡𑐸𑐐𑐸 𑐕𑐐𑐹 𑐟𑐮𑑂𑐮𑐵𑐫𑑂 𑐁𑐏𑑅 𑐧𑑂𑐰𑑄𑐎𑐵𑑅 𑐧𑑂𑐰𑐣𑐾𑐎𑐸𑐠𑐶𑐫𑐵 𑐥𑐮𑐵𑑅 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋

𑐩𑐶𑐖𑑄𑐥𑐶𑑄 𑐨𑐵𑐲𑐵𑐳𑐾𑐰𑐷𑐥𑐶𑑄 𑐖𑐎 𑐖𑐵𑐣𑐵𑑅 𑐔𑐵𑐫𑐾𑐎𑐹𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵 𑐱𑐸𑐬𑐸𑐰𑐵𑐟𑐫𑐵 𑐂𑐮𑐫𑑂 𑐬𑐟𑑂𑐣𑐡𑐾𑐰𑐷 𑐎𑐳𑐵𑑅 (𑐳𑑄𑐳𑑂𑐠𑐵𑐥𑐎 𑐥𑑂𑐬𑐶𑐣𑑂𑐳𑐶𑐥𑐮), 𑐩𑐵𑐫𑐵 𑐩𑐵𑐣𑐣𑑂𑐢𑐬, 𑐨𑐐𑐰𑐟𑐷 𑐩𑐴𑐬𑑂𑐖𑐣, 𑐥𑑂𑐬𑐵. 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐱𑐵𑐣𑑂𑐟𑐶 𑐩𑐵𑐣𑐣𑑂𑐢𑐬 (𑐡𑐶𑐰𑑄𑐐𑐟) 𑐩𑐫𑑂𑐖𑐸𑐥𑐶𑑄𑐳𑑄 𑐁𑐏𑑅 𑐧𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋 𑐀𑐣𑑄𑐮𑐶 𑐕𑐸𑑄 𑐃 𑐮𑐶𑐥𑐵 𑐨𑐵𑐲𑐵𑐳𑐾𑐰𑐷, 𑐄𑐡𑑂𑐫𑑀𑐐𑐷, 𑐳𑐩𑐵𑐖𑐳𑐾𑐰𑐷𑐎𑐠𑑄 𑐩𑑂𑐴𑐳𑐶𑐄𑐩𑑂𑐴 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬 (𑐡𑐶𑐰𑑄𑐐𑐟)𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐕𑐐𑐹 𑐳𑑄𑐔𑐵𑐮𑐎 𑐳𑐩𑐶𑐟𑐶 𑐣𑐷𑐳𑑂𑐰𑐣𑐵𑑅 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵 𑐖𑐸𑐮 𑑋

𑐠𑑂𑐰𑐫𑐵𑑄 𑐮𑐶𑐥𑐵 𑐴𑐶𑐎𑐶𑐨𑐵 𑐖𑐵𑐥𑐵𑐣𑐮𑐶𑐳𑐾 𑐳𑑂𑐰𑐵𑐥𑐹 𑐡𑐫𑐾𑐰𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐶𑑄𑐟𑐶𑑄 𑐖𑐐𑑂𑐐𑐵 𑐎𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐟𑐟𑑂𑐎𑐵𑐮𑐷𑐣 𑐱𑐶𑐎𑑂𑐲𑐶𑐎𑐵𑐥𑐶𑑄 𑐥𑑂𑐬𑐶. 𑐬𑐟𑑂𑐣𑐡𑐾𑐰𑐷 𑐰 𑐩𑐵𑐫𑐵 𑐩𑐵𑐣𑐣𑑂𑐢𑐬𑐫𑐵 𑐥𑐸𑐔𑐮𑑄 𑐮𑐏𑐸𑐟𑐷𑐬𑑂𑐠 𑐮𑐶𑐎𑑂𑐎𑑄 𑐖𑐐𑑂𑐐𑐵 𑐮𑐸𑐂𑐎𑐵𑑅 𑐣𑑂𑐫𑐵𑐫𑐾𑐢𑐸𑑄𑐎𑐵𑑅 𑐴𑐶𑐎𑐶𑐨𑐵 𑐖𑐵𑐥𑐵𑐣 𑐰 𑐨𑐵𑐲𑐵𑐴𑑂𑐫𑐩𑐶 𑐣𑐾𑐰𑐵𑑅𑐟𑐫𑑂 𑐎𑐸𑐟𑐮𑑄 𑐣𑑂𑐴𑐵𑐥𑐵𑑄 𑐕𑐐𑐹 𑐟𑐮𑑂𑐮𑐵 𑐡𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐠𑑅𑐐𑐸 𑐴𑐾 𑐳𑑂𑐰𑐵𑐩𑐶𑐟𑑂𑐰𑐫𑐵 𑐖𑐐𑑂𑐐𑐵𑐫𑑂 𑐕𑐟𑑃𑐫𑐵 𑐨𑑁𑐟𑐶𑐎 𑐳𑑄𑐬𑐔𑐣𑐵 𑐣𑐶𑐬𑑂𑐩𑐵𑐞 𑐖𑐸𑐂𑐰𑑄 𑐩𑐵𑐮𑑂𑐔𑐵𑐚𑐵𑐬𑐫𑑂 𑐟𑐫𑐵𑐟𑑅𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐠𑐸𑐏𑐾 𑐴𑐫𑐵𑑅 𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐀𑐣𑑄𑐮𑐶𑑄 𑐡𑑃𑐫𑑂𑐡𑐳𑑄 𑐕𑐟𑑃 𑐕𑐟𑑃 𑐫𑐵𑐣𑐵𑑅 𑐟𑑃 𑐕𑐵𑐕𑐵𑑄 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐠𑑁𑑄𑐫𑐵 𑐀𑐰𑐳𑑂𑐠𑐵𑐫𑑂 𑐟𑐎 𑐠𑑂𑐫𑑄𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐱𑐸𑐬𑐸𑐰𑐵𑐟𑐫𑐵 𑐂𑐮𑐫𑑂 𑐕𑐾𑑃𑐫𑑂 𑐕𑐾𑑃𑐫𑑂 𑐰𑐣𑐵𑑅 𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵 𑐧𑐷𑐐𑐸 𑐧𑑂𑐰𑐣𑐾𑐎𑐸𑐠𑐶 𑐔𑐵𑐫𑐾𑐎𑐵𑐐𑐸 𑐰 𑐠𑑅 𑐩𑐳𑑂𑐟𑐫𑑂𑐟 𑐁𑐏𑑅 𑐧𑑂𑐰𑑄𑐎𑐵𑐡𑐷𑐟 𑐂𑐣𑐵𑐥 𑐫𑐵𑐫𑐾𑐟 𑐰𑑄𑐐𑐸 𑐂𑐮𑐫𑑂 𑐁𑐥𑐵𑑅𑐠𑐾𑑄 𑐀𑐨𑐶𑐨𑐵𑐰𑐎𑐥𑐶𑑄𑐳𑑄 𑐰𑐶𑐱𑑂𑐰𑐵𑐳 𑐴𑐾 𑐩𑐫𑐵𑑅𑐐𑐸 𑐰 𑐣𑐾𑐰𑐵𑑅 𑐨𑐵𑐳𑑄 𑐁𑐏𑑅 𑐧𑑂𑐰𑐣𑐵𑑅, 𑐧𑑂𑐰𑑄𑐎𑐵𑑄 𑐕𑐸 𑐫𑐵𑐫𑐾𑐐𑐸 𑐢𑐫𑐵𑐡𑐷𑐐𑐸 𑐳𑑄𑐳𑑂𑐠𑐵𑐥𑐎 𑐥𑑂𑐬𑐶. 𑐬𑐟𑑂𑐣𑐡𑐾𑐰𑐷, 𑐥𑐸𑐮𑐵𑑄𑐩𑑂𑐴 𑐥𑑂𑐬𑐶𑐣𑑂𑐳𑐶𑐥𑐮 𑐩𑐵𑐫𑐵 𑐩𑐵𑐣𑐣𑑂𑐢𑐬, 𑐱𑐶𑐎𑑂𑐲𑐶𑐎𑐵 𑐨𑐐𑐰𑐟𑐷 𑐩𑐴𑐬𑑂𑐖𑐣 𑐰 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐫𑐥𑐶𑑄𑐳𑑄 𑐎𑐣𑐵𑐡𑐷𑐐𑐸 𑐖𑐶𑐟𑑅 𑐮𑐸𑐩𑑄 𑑋 𑐰 𑐂𑐮𑐫𑑂 𑐩𑐵𑐮𑑂𑐔𑐵𑐚𑐵𑐬 𑐁𑑅 𑐠𑐾𑑄 𑐀𑐥𑐵𑐫𑑂𑐳𑐎𑑄 𑐰𑐶𑐎𑐳𑐶𑐟 𑐩𑐖𑐹𑐐𑐸𑐮𑐶𑑄 𑐀𑐠𑐾 𑐢𑐵𑑅𑐐𑐸 𑐏𑐫𑐾𑐩𑐵𑑅 𑑋 𑐀𑐠𑐾 𑐏𑑅𑐳𑐵𑑄 𑐀𑐧𑐮𑐫𑑂 𑐁𑐏𑑅 𑐴𑐾 𑐩𑐧𑑂𑐰𑑃𑐳𑐾 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐩𑐳𑑂𑐟𑐫𑑂𑐟 𑐢𑑂𑐫𑐧𑐵 𑐥𑐸𑐮𑐾 𑐩𑑂𑐰𑐵𑐫𑐾𑐎 𑐳𑐶𑐟𑐶𑐎𑑄 𑐁𑐏𑑅 𑐧𑑂𑐰𑑄𑐎𑐵 𑐧𑐷 𑐢𑐎𑐵𑑅 𑐩𑐳𑑂𑐟 𑐴𑐫𑐵𑑅 𑐁𑐏𑑅 𑐧𑑂𑐰𑑄𑐎𑐵𑐐𑐸 𑐰𑐫𑑂𑐎𑑅𑐥𑐶𑑄𑐳𑑄 𑐎𑐣𑐵𑐡𑐷 𑑋 𑐰𑐫𑑂𑐎𑑅𑐥𑐶𑑄𑐳𑑄 𑐎𑐣𑐵𑐡𑐷𑐎𑐠𑑄 𑐀𑐧𑐮𑐫𑑂 𑑓,𑑔 𑐡𑑃 𑐣𑐶𑐳𑐾𑑄 𑑑𑑐 𑐡𑑃𑐟𑐎𑐫𑐵 𑐁𑐏𑑅 𑐕𑐐𑑅 𑐧𑑂𑐰𑐣𑐵 𑐩𑐟𑑅𑐥𑐶𑑄 𑐳𑑂𑐰𑐷𑐩𑑂𑐴, 𑐥𑐷𑐥𑑂𑐫𑐩𑑂𑐴 𑐟𑐶 𑐩𑐳𑑂𑐟 𑐴𑐫𑐵𑑅 𑐁𑐏𑑅 𑐧𑑂𑐰𑑄𑐎𑐵𑑅 𑐧𑑂𑐰𑐣𑐾𑐎𑐸𑐠𑐶 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋

𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐣𑐬𑑂𑐳𑐬𑐷, 𑐊𑐮𑐎𑐾𑐖𑐷 𑐰 𑐫𑐸𑐎𑐾𑐖𑐷 𑐟𑐐𑐶𑐩𑑄 𑐧𑑂𑐰𑑄𑐎𑐾𑐐𑐸 𑐱𑐸𑐬𑐸 𑐫𑐵𑑅𑐐𑐸 𑐧𑑂𑐰𑐣𑐾𑐎𑐸𑐠𑐶𑑄 𑐟𑐳𑐎𑑄 𑐔𑐶𑐢𑐶𑐎𑑅𑐥𑐶𑑄𑐟 𑐣𑐬𑑂𑐳𑐬𑐷𑐂 𑐰 𑐁𑐏𑑅 𑐕𑐐𑑅 𑐴𑐾 𑐧𑑂𑐰𑐣𑐵 𑐩𑐟𑑅𑐳𑐵𑑄 𑐫𑐵𑐎𑐣𑑄 𑐳𑐫𑐾𑐎𑐾 𑐦𑐂 𑐢𑐂𑐐𑐸 𑐟𑐵𑐫𑐾𑐎𑐵𑑅 𑐨𑐔𑐵 𑐟𑑅𑐢𑐶𑐎𑑅𑐥𑐶𑑄𑐟 𑐊𑐮𑐎𑐾𑐖𑐷, 𑐫𑐸𑐎𑐾𑐖𑐷𑐂 𑐟𑐫𑐵𑑅 𑐧𑑂𑐰𑑄𑐎𑐾𑐐𑐸 𑐱𑐸𑐬𑐸 𑐫𑐵𑐣𑐵𑐐𑐸 𑐏𑑃 𑐰𑐫𑑂𑐎𑑅𑐥𑐶𑑄𑐳𑑄 𑐎𑐣𑐾𑐐𑐸 𑐫𑐵𑐣𑐵𑐡𑐷 𑑋 𑐡𑐫𑑂𑐡𑐳𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐟𑐮𑑂𑐮𑐵 𑐟𑐣𑐵 𑐫𑑄𑐎𑐾𑐐𑐸 𑐣𑐵𑐥𑐣𑐵𑐥𑑄 𑐧𑑂𑐰𑐣𑐾𑐎𑐸𑐠𑐶𑐂 𑐧𑑂𑐰𑑃𑐩𑐶𑐥𑐶𑐣𑐶𑐐𑐸 𑐮𑑂𑐫𑐵𑑅 𑐣𑑄 𑐄𑐎𑐠𑑄 𑐴𑐾 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑐣 𑑋 𑐠𑑅𑐐𑐸 𑐴𑐾 𑐨𑐰𑐣𑐫𑑂 𑐧𑑂𑐰𑑄𑐎𑐾𑐐𑐸 𑐱𑐸𑐬𑐸 𑐫𑐵𑐫𑐾𑐰𑑄 𑐧𑑂𑐰𑐣𑐵𑐩𑐶𑐥𑐶𑑄 𑐗𑐣𑑂 𑐴𑐾 𑐀𑐥𑑂𑐰𑐫𑐵 𑐳𑑂𑐰𑐳𑑅 𑐟𑑂𑐫𑐵 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐣𑑄 𑐠𑑂𑐫𑑄𑐐𑐸 𑐡𑐸 𑑋

𑐰𑐶𑐜𑐩𑑂𑐧𑐣𑐵 𑐢𑐵𑐫𑐾𑐩𑐵𑐮𑐷 𑐎𑐶 𑑒𑑐𑑗𑑒 𑐳𑐵𑐮𑐫𑐵 𑐨𑐸𑐏𑐵𑐫𑑂 𑐮𑐶𑐥𑐵 𑐧𑑂𑐰𑐣𑐵𑐩𑐶𑐥𑐶𑐣𑐶𑐐𑐸 𑐮𑑂𑐫𑐵𑑅 𑐕𑐎𑑂𑐰𑐮𑑄 𑐩𑑂𑐴𑑀 𑐖𑐸𑐮 𑑋 𑐠𑐸𑐎𑐶𑐫𑐵 𑐮𑐶𑐄𑐣𑐾 𑐕𑐟𑐵 𑐴𑐾 𑐖𑐎 𑐎𑐵𑐬𑐞 𑐠𑐣 𑐧𑑂𑐰𑑄 𑐰𑐂𑐥𑐶𑑄 𑐁𑐥𑐵𑐮𑑄 𑐧𑑂𑐰𑐣𑐵𑐩𑐶 𑐧𑐵𑐮𑑄 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐏𑑅 𑑋 𑐥𑐸𑐮𑐵𑑄 𑐥𑐸𑐮𑐵𑑄𑐐𑐸 𑐕𑐾𑑃𑐫𑑂 𑐧𑐵𑐮𑑄 𑐔𑑂𑐰𑐣𑐵𑐔𑑂𑐰𑐥𑐶𑑄 𑐕𑐾𑑃 𑐟𑑂𑐰𑑅𑐟𑐵𑑅 𑐰𑐣𑐾𑐩𑐵𑑅𑐐𑐸𑐮𑐶𑑄 𑐨𑐸𑐏𑐵𑐫𑑂 𑐮𑐶𑐥𑐵 𑐧𑑂𑐰𑑃𑐩𑐶𑐥𑐶𑑄 𑐩𑑂𑐴𑑀 𑐖𑐹𑐐𑐸 𑐏𑑅 𑑋 𑐨𑐸𑐏𑐵𑐫𑑂𑐮𑐶𑐥𑐵 𑐩𑑂𑐴𑑀 𑐖𑐹𑐐𑐸 𑐧𑑂𑐰𑑃𑐩𑐶𑐫𑐵 𑐮𑑂𑐫𑐵𑑅 𑐁𑑅 𑐴𑐵𑐎𑐣𑑄 𑐀𑐥𑑂𑐰𑐫𑐵 𑐰𑑅𑐐𑐸 𑐡𑐸 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐎𑑀𑐬𑑀𑐣𑐵 𑐮𑐶𑐥𑐵 𑐗𑐷𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐧𑑂𑐰𑐣𑐵𑐩𑐶𑐫𑐵 𑐮𑑂𑐫𑐵𑑅 𑐀𑐥𑑂𑐰𑐫𑐵 𑐰𑑅𑐐𑐸 𑐡𑐸 𑑋 𑐩𑐾𑐩𑐾𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐰𑐶𑐡𑑂𑐫𑐵𑐬𑑂𑐠𑐷 𑐩𑑂𑐴𑑀 𑐖𑐸𑐮 𑐢𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐧𑑂𑐰𑐣𑐾𑐎𑐸𑐠𑐶𑐂 𑐢𑐵𑑅𑐳𑐵 𑐧𑑂𑐰𑑃𑐩𑐶𑐫𑐵 𑐮𑑂𑐫𑐵𑑅 𑐀𑐥𑑂𑐰𑐫𑐵 𑐰𑑅𑐐𑐸 𑐡𑐸 𑑋

𑐠𑑁𑑄𑐎𑐣𑑂𑐴𑐫𑑂 𑐧𑑂𑐰𑑄𑐎𑐾𑐐𑐸 𑐥𑑂𑐬𑐞𑐵𑐮𑐷 𑐩𑑂𑐴𑐶𑐐𑑅 𑐧𑑂𑐰𑐣𑐾𑐎𑐸𑐠𑐶 𑐣𑐷𑐳𑑂𑐰𑐣𑐵𑐐𑐸 𑐂𑐮𑐫𑑂 𑐠𑐾𑑄 𑐩𑐏𑐫𑐾𑐢𑐸𑑄𑐎𑐮 𑑋 𑐠𑑁𑑄𑐎𑐣𑑂𑐴𑐫𑑂 𑐧𑑂𑐰𑑄𑐎𑐾𑐐𑐸 𑐥𑑂𑐬𑐰𑐶𑐢𑐶 𑐫𑐎𑑂𑐰 𑐴𑐾 𑐥𑐵𑐫𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐑𑑀𑐚𑐾 𑐫𑐵𑐣𑐵𑑅 𑐧𑑂𑐰𑑄𑐎𑐾𑐐𑐸 𑐳𑑂𑐠𑐶𑐟𑐶 𑐰𑐵 𑐱𑐶𑐎𑑂𑐲𑐵 𑐥𑑂𑐬𑐞𑐵𑐮𑐷 𑐏𑑅𑐳𑐵 𑐠𑑁𑑄𑐎𑐣𑑂𑐴𑐫𑑂 𑐧𑐵𑑄𑐮𑐵𑐎 𑐠𑐸𑐂𑐎𑐵𑑅 𑐧𑑂𑐰𑑄𑐎𑐾𑐩𑐵𑑅 𑑋 𑐱𑐶𑐎𑑂𑐲𑐵 𑐣𑐷𑐟𑐶 𑐴𑐾 𑐥𑑂𑐬𑐫𑑀𑐐𑐵𑐟𑑂𑐩𑐎 𑐬𑐸𑐥𑑄 𑐧𑑂𑐰𑑄𑐎𑐾𑐩𑐵𑑅 𑐢𑐂𑐐𑐸 𑐡𑐸𑐳𑐵 𑐰 𑐴𑐾 𑐣𑐷𑐟𑐶 𑐗𑐷𑐳𑑄 𑐣𑑄 𑐮𑐵𑐐𑐹 𑐫𑐵𑐣𑐵𑐔𑑂𑐰𑐣𑐵𑐐𑐸 𑐡𑐸 𑑋 𑐴𑐬𑐾𑐎 𑐖𑑂𑐫𑐵𑐏𑑃 𑐰𑐵 𑐧𑑂𑐰𑑄𑐎𑐾𑐐𑐸𑐫𑐵𑐟 𑐳𑐦𑐸𑐟𑐶𑐂 𑐖𑐎 𑐳𑐷𑐩𑐶𑐟 𑐩𑐫𑐵𑐳𑐾, 𑐳𑐦𑐹𑐫𑐵 𑐖𑐎 𑐮𑐶𑐢𑑄𑐳𑐵𑐫𑑂 𑐩𑐏𑐳𑐾 𑐁𑐥𑐵𑑅𑐠𑐾𑑄 𑐖𑑂𑐫𑐵𑐫𑐵𑐟 𑐥𑑂𑐬𑐫𑑀𑐐𑐵𑐟𑑂𑐩𑐎 𑐬𑐸𑐥𑑄 𑐴𑐾 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑐣𑐵𑐐𑐸 𑐡𑐸 𑑋 𑐐𑐸𑐎𑐶𑑄 𑐫𑐵𑐣𑐵𑑅 𑐴𑐵𑐩𑐵𑐥𑐶𑑄 𑐣𑑄 𑐮𑐫𑑂𑐟𑐵𑑅𑐐𑐸 𑐰 𑐳𑐣𑑂𑐟𑐸𑐲𑑂𑐚 𑐖𑐹𑐐𑐸 𑐖𑐶𑐩𑐶𑐳𑑄 𑐏𑐣𑐵𑐔𑑂𑐰𑐣𑐵 𑑋
𑐧𑑂𑐰𑐣𑐾𑐎𑐸𑐠𑐶 𑐔𑐵𑐫𑐾𑐎𑐵𑑅 𑐧𑑂𑐰𑑄𑐎𑐾𑐐𑐸 𑐱𑐸𑐬𑐸 𑐫𑐵𑑅𑐐𑐸 𑐂𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐸𑑄 𑐣𑑄 𑐥𑐵𑐛𑑂𑐫 𑐳𑐵𑐩𑐐𑑂𑐬𑐷 𑐰 𑐐𑐸𑐐𑐸𑑄 𑐣𑑄 𑐰𑐶𑐲𑐫 𑐩𑐡𑐸 𑑋 𑐀𑐧𑐮𑐫𑑂 𑐕𑐐𑐹 𑐟𑐐𑐶𑐣𑐶𑐳𑐾𑑄 𑐣𑑂𑐫𑐵𑐐𑐹 𑐟𑐐𑐶𑑄𑐟𑐎 𑐧𑑂𑐰𑐣𑐾𑐎𑐸𑐠𑐶𑐫𑐵 𑐴𑐾 𑐥𑐴𑐮𑐫𑑂 ‘𑐥𑐮𑐾𑐳𑑂𑐰𑐵𑑄’ 𑐣𑐵𑑄𑐫𑐵 𑐳𑐦𑐹 𑐥𑐶𑐠𑐣𑐵𑑅 𑐧𑑂𑐰𑑄𑐎𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑑖, 𑑗 𑐰 𑑘 𑐐𑐹 𑐟𑐐𑐶𑑄𑐫𑐵𑐟 𑐮𑐵 𑐳𑐦𑐹 𑐴𑐾 𑐩𑐡𑐸 𑑋 𑐐𑐸𑑄𑐐𑐹 𑐰 𑐗𑐶𑑄𑐐𑐹 𑐟𑐐𑐶𑑄𑐫𑐵𑐟 ‘𑐮𑐸𑑃𑐴𑐶𑐟𑐶’ 𑐳𑐦𑐹 𑐡𑐸𑐐𑐸 𑐖𑐸𑐮 𑑋 𑑖, 𑑗 𑐰 𑑘 𑐐𑐹 𑐟𑐐𑐶𑑄𑐫𑐵 𑐣𑐶𑑄𑐟𑐶𑑄 𑐀𑐧𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐵𑐡𑐷𑐩𑑂𑐴 𑐱𑐵𑐣𑑂𑐟𑐶 𑐩𑐵𑐣𑐣𑑂𑐢𑐬𑑄 𑐠𑐷𑐠𑐷 𑐥𑐟𑑂𑐬𑐥𑐟𑑂𑐬𑐶𑐎𑐵 𑐰 𑐳𑐦𑐸𑐟𑐶𑐂 𑐥𑐶𑐴𑐵𑑄 𑐰𑐂𑐐𑐸 𑐧𑐵𑐏𑑄, 𑐔𑑂𑐰𑐏𑑃, 𑐔𑐶𑐣𑐵𑐏𑑃 𑐁𑐡𑐶 𑐩𑐵𑑅𑐐𑐸 𑐳𑐵𑐩𑐐𑑂𑐬𑐷𑐟 𑐮𑑂𑐴𑑂𑐫𑐫𑐵𑑅 𑐠𑐩𑑂𑐴𑑄 𑐴𑐾 𑐳𑐦𑐹𑐫𑐵 𑐁𑐎𑐵𑐬 𑐧𑐶𑐫𑐵𑑅 𑐧𑑂𑐰𑑄𑐎𑐵𑐡𑐷 𑑋 𑐀𑐧𑐮𑐫𑑂 𑐳𑐦𑐹 𑐀𑐨𑐵𑐰𑐫𑐵 𑐎𑐵𑐬𑐞𑑄 𑐧𑑂𑐰𑑄𑐎𑐾𑐟 𑐟𑐳𑐎𑑄 𑐠𑐵𑐎𑐸 𑑋

𑐁𑑅 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐔𑑂𑐫𑐵𑐐𑐹 𑐟𑐐𑐶𑑄𑐟𑐎 𑐧𑑂𑐰𑑄𑐎𑐾 𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑑅 𑐳𑐦𑐹 𑐟𑐫𑐵𑐬 𑐫𑐵𑐫𑐾𑐰𑑄 𑐖𑐶𑐩𑐶𑐳𑑄 𑐣𑑄 𑐥𑐮𑐾𑐳𑑂𑐰𑐵𑑄, 𑐮𑐸𑑃𑐴𑐶𑐟𑐶 𑐳𑐦𑐹 𑐩𑐧𑑂𑐰𑑄𑐎𑐸𑐳𑐾 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐴𑐾 𑐟𑐫𑐵𑐬 𑐫𑐵𑑅𑐐𑐸 ‘𑐫𑐾𑑃 𑐡𑐾𑐫𑑂 𑐩𑑂𑐴𑐳𑐷𑐎𑐾’ 𑐳𑐦𑐹 𑐧𑑂𑐰𑑄𑐎𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐡𑐸 𑑋 𑐠𑐸𑐎𑐶𑑄 𑐣𑑂𑐴𑐵𑐥𑐵 𑐏𑐣𑐾 𑐡𑐸𑐐𑐸 𑐳𑐦𑐹𑐫𑐵 𑐀𑐨𑐵𑐰 𑐩𑑂𑐴𑑀 𑐖𑐹𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵𑐫𑐵 𑐟𑐸𑐮𑐣𑐵𑐫𑑂 𑐁𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐦𑐹𑐫𑐵 𑐏𑐵𑐳 𑐴𑐾 𑐳𑐩𑐳𑑂𑐫𑐵 𑐩𑐡𑐸 𑑋 𑐄𑐐𑐸 𑐂𑐮𑐫𑑂 𑐳𑐦𑐹 𑐕𑐵𑐥𑐾 𑐫𑐵𑐫𑐾𑐩𑐵𑑅𑐧𑐮𑐫𑑂 𑐂𑐣𑑂𑐡𑑂𑐬𑐾𑐞𑐷 𑐀𑐦𑐳𑐾𑐚 𑐥𑐾𑑂𑐬𑐳𑐫𑐵 𑐠𑐸𑐰𑐵𑑅 𑐨𑐵𑐖𑐸 𑐖𑑂𑐘𑐵𑐣𑐾𑐣𑑂𑐡𑑂𑐬 𑐩𑐵𑐣𑐣𑑂𑐢𑐬𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐩𑐳𑑂𑐟𑐫𑑂𑐟 𑐀𑑅𑐥𑐸𑐂𑐩𑐵 𑐢𑐂𑐐𑐸 𑐨𑐵𑐰𑐣𑐵𑑄 𑐟𑐐𑐶𑑄 𑐣𑑂𑐫𑐵𑐐𑐹𑐫𑐵 𑐡𑐎𑑂𑐰 𑐳𑐦𑐹 𑐰𑐫𑑂𑐎𑐮𑑄 𑐐𑑂𑐰𑐵𑐴𑐵𑐮𑐶𑐎𑐠𑑄 𑐕𑐵𑐥𑐾 𑐫𑐵𑐣𑐵 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐧𑑂𑐰𑐣𑐾𑐎𑐸𑐠𑐶𑐂 𑐣𑑂𑐴𑐵𑐥𑐵 𑐣𑐾𑐰𑐵𑑅 𑐩𑐳𑑂𑐟 𑐴𑐾 𑐁𑐥𑐵𑑅 𑑋 𑐀𑐧𑐮𑐫𑑂 𑐐𑐿𑐬 𑐣𑐾𑐰𑐵𑑅𑐟𑐫𑑂 𑐩𑐳𑑂𑐟 𑐣𑑄 𑐩𑐡𑐸𑐐𑐸 𑐩𑐏𑐸 𑑋 𑐕𑐐𑐹 𑐟𑐐𑐶𑐩𑐫𑑂 𑐣𑑂𑐫𑐵𑐩𑑂𑐴, 𑐏𑐸𑐩𑑂𑐴, 𑐔𑑂𑐫𑐵𑐩𑑂𑐴 𑐗𑐶𑐩𑑂𑐴 𑐐𑐿𑐬 𑐣𑐾𑐰𑐵𑑅𑐟𑐫𑑂 𑐩𑐳𑑂𑐟 𑐡𑐂𑐐𑐸 𑐏𑑅 𑑋 𑐟𑐬 𑐁𑑅𑐫𑐵 𑐳𑑂𑐠𑐶𑐟𑐶 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐣𑐾𑐰𑐵𑑅 𑐳𑑂𑐰𑐫𑐵𑑄 𑐣𑑄 𑐐𑐿𑐬 𑐣𑐾𑐰𑐵𑑅𑐟𑐫𑑂 𑐩𑐳𑑂𑐟 𑐴𑐾 𑐀𑐥𑑂𑐰𑑅 𑑋 𑐄𑐎𑐶𑐳𑐣𑑄 𑐟𑐵𑐩𑐵𑐒 𑐳𑐩𑐸𑐡𑐵𑐫𑐫𑐵 𑐩𑐳𑑂𑐟 𑐴𑐾 𑐀𑐥𑑂𑐰𑑅 𑐡𑐸 𑑋 𑐗𑐷 𑐣𑐾𑐰𑐵𑑅𑐟𑐫𑑂𑐳𑑄 𑐧𑐳 𑐡𑐸𑐐𑐸 𑐰𑐵 𑐳𑑂𑐎𑐸𑐮 𑐧𑐳𑐫𑑂 𑐔𑑂𑐰𑐣𑐵𑑅 𑐰𑐣 𑐎𑐶 𑐟𑑅𑐢𑑄𑐐𑐸 𑐳𑑂𑐎𑐸𑐮𑐫𑑂 𑐧𑑂𑐰𑑄𑐎𑐹𑐐𑐸 𑐟𑐵𑐫𑐾𑐎𑐷𑐐𑐸 𑐄𑐎𑐶𑑄 𑐟𑐵𑐟𑐵𑐥𑐵𑑅 𑐠𑐵𑐫𑑂𑐔𑑂𑐰𑑄𑐐𑐸 𑐳𑑂𑐎𑐸𑐮𑐫𑑂 𑐧𑑂𑐰𑑄𑐎𑐾𑐐𑐸 𑐥𑑂𑐬𑐰𑐺𑐟𑑂𑐟𑐶 𑐡𑐸 𑑋 𑐩𑐾𑐐𑐸 𑐏𑑃 𑐧𑑂𑐰𑐣𑐾𑐎𑐸𑐠𑐶𑐫𑐵 𑐖𑑅𑐏𑑅 𑐟𑐵𑐩𑐵𑐒 𑐳𑐩𑐸𑐡𑐵𑐫𑐫𑐵𑐥𑐶𑑄 𑐫𑐎𑑂𑐰 𑐔𑑂𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐎𑑀𑐬𑑀𑐣𑐵 𑐮𑐶𑐥𑐵 𑐟𑐵𑐩𑐵𑐒 𑐳𑐩𑐸𑐡𑐵𑐫𑐫𑐵 𑐧𑑂𑐰𑑃𑐩𑐶𑐥𑐶𑑄 𑑙𑑐 𑐥𑑂𑐬𑐟𑐶𑐱𑐟 𑐢𑐂𑐠𑐾𑑄 𑐡𑐸 𑑋

𑐩𑐔𑐵𑑄𑐣𑐶𑐳𑐾𑑄 𑐰𑐵 𑐣𑐬𑑂𑐳𑐬𑐷, 𑐫𑐸𑐎𑐾𑐖𑐷 𑐠𑐾𑑄𑐖𑑂𑐫𑐵𑑅𑐐𑐸 𑐎𑑂𑐰𑐫𑑂𑐫𑐵 𑐟𑐐𑐶𑑄𑐣𑐶𑐳𑐾𑑄 𑐧𑑂𑐰𑑄 𑐰𑐮 𑐢𑐵𑑅𑐳𑐵 𑐂𑐩𑐶𑐟 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐟𑐳𑐎𑑄 𑐀𑑅𑐥𑐸 𑐀𑐮𑐾 𑐣𑐶𑐐𑐹 𑐳𑑂𑐰𑑄𑐐𑐹 𑐟𑐐𑐶𑑄𑐟𑐎 𑐠𑑂𑐫𑐣𑐷𑐧𑐮𑐫𑑂 𑐫𑐵𑐄𑑃𑐎 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐳𑐫𑐾𑐎𑐹 𑑋 𑐀𑐣𑑄 𑐔𑑂𑐰𑐫𑑂 𑐥𑑂𑐫𑑄𑐐𑐹 𑐣𑑂𑐫𑐵𑐐𑐹 𑐟𑐐𑐶𑐩𑐫𑑂 𑐨𑐬𑑂𑐣𑐵 𑐖𑐹𑐰𑐮 𑐢𑐵𑑅𑐳𑐵 𑐨𑐔𑐵 𑐠𑐵𑐎𑐸 𑑋 𑐀𑐫𑑂𑐣𑑄 𑐂𑐥𑐶𑑄 𑐣𑑄 𑐔𑑂𑐰𑐫𑑂𑐫𑐵 𑐟𑐐𑐶𑐩𑐫𑑂 𑐠𑐴𑐵𑑄 𑐰𑑄𑐮𑐶𑐳𑐾 𑐂𑐩𑐶𑐳𑑄 𑐣𑑄 𑐧𑐵𑑄𑐮𑐵𑐎 𑐴𑐾 𑐳𑐫𑐾𑐎𑐹 𑑋 𑐐𑐸𑐮𑐶 𑐠𑐸𑐂𑐎𑐾𑐩𑐵𑑅𑐐𑐸 𑐏𑑅 𑐄𑐮𑐶 𑐠𑐸𑐂𑐎𑐵𑐔𑑂𑐰𑑄𑐐𑐸 𑐣𑑄 𑐡𑐸 𑑋

𑐗𑐷𑐳𑑄 𑐣𑐬𑑂𑐳𑐬𑐷𑐣𑐶𑐳𑐾𑑄 𑑑𑑐 𑐐𑐹 𑐟𑐐𑐶𑑄𑐟𑐎 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐵 𑐰𑐫𑐵𑐔𑑂𑐰𑐣𑐵𑐐𑐸 𑐡𑐸 𑑋 𑑙 𑐰 𑑑𑑐 𑐐𑐹 𑐟𑐐𑐶𑐩𑐫𑑂 𑐣𑐾𑐥𑐵𑐮𑐨𑐵𑐲𑐵 𑐋𑐔𑑂𑐕𑐶𑐎 𑐰𑐶𑐲𑐫 𑐖𑐹𑐐𑐸𑐮𑐶𑑄 𑐕𑐸 𑐰𑐶𑐲𑐫 𑐎𑐵𑐫𑐾𑐐𑐸 𑐢𑐎𑐵𑑅 𑐣𑑂𑐫𑐣𑐾𑐧𑐮𑐫𑑂 𑐐𑐸𑐮𑐶𑐏𑐾 𑐣𑐾𑐰𑐵𑑅 𑐩𑐳𑑂𑐟 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐎𑐵𑑅𑐥𑐶𑑄 𑐡𑐸𑐳𑐵 𑐀𑐥𑑂𑐰𑑅𑐠𑐾𑑄 𑐧𑑂𑐰𑐣𑐾, 𑐔𑑂𑐰𑐫𑐾 𑐀𑑅𑐥𑐸 𑐢𑐎𑐵𑑅 𑐣𑐾𑐥𑐵𑐮𑐨𑐵𑐲𑐵 𑐴𑐾 𑐎𑐵𑑅𑐥𑐶𑑄 𑐐𑐿𑐬 𑐣𑐾𑐰𑐵𑑅 𑐩𑐳𑑂𑐟 𑐣𑑄 𑐁𑑅𑐥𑐵𑑅 𑐴𑐾 𑐡𑐸 𑑋 𑐂𑐩𑐶𑐳𑑄 𑐩𑐔𑐵𑑄𑐣𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐧𑑂𑐰𑐣𑐵 𑐰𑐫𑐵𑐔𑑂𑐰𑑄𑐐𑐸𑐮𑐶𑑄 𑐀𑐠𑐾 𑐖𑐹𑐐𑐸 𑐏𑑅 𑑋 𑐀𑐠𑐾 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐎𑐫𑐵𑑅 𑐊𑐳𑐂𑐂 𑐥𑐬𑐷𑐎𑑂𑐲𑐵𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐮𑑂𑐫𑐵𑑅 𑐴𑑅𑐥𑐶𑑄 𑐐𑐿𑐬𑐣𑐾𑐰𑐵𑑅𑐟𑐫𑑂 𑐩𑐳𑑂𑐟𑐫𑑂 𑐮𑑂𑐫𑐵𑑅 𑐣𑑄 𑐩𑑂𑐴𑑀 𑐩𑐖𑐹 𑑋 𑐠𑑂𑐰 𑐗𑐷𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵 𑐄𑐥𑐮𑐧𑑂𑐢𑐶 𑐏𑑅 𑑋 𑐐𑐸𑐩𑑂𑐴 𑐩𑐔𑐵 𑐐𑐿𑐬 𑐣𑐾𑐰𑐵𑑅 𑐖𑐸𑐫𑐵𑑅 𑐣𑑄 𑐗𑐷𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐎 𑐎𑐫𑐵𑑅 𑐊𑐳𑐂𑐂 𑐡𑐎𑐮𑐫𑑂 𑐀𑐥𑑂𑐰𑑅 𑐮𑑂𑐫𑐵𑑅 𑐴𑐫𑐾𑐐𑐸 𑐢𑐂𑐐𑐸 𑐗𑐷𑐐𑐸 𑐣𑐶𑑄𑐟𑐶𑑄 𑐴𑐾 𑐐𑐬𑑂𑐰𑐫𑐵 𑐏𑑃 𑐏𑑅 𑑋 𑐊𑐳𑐂𑐂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐫𑑂 𑐀𑐥𑑂𑐰𑑅 𑐮𑑂𑐫𑐵𑑅 𑐴𑑅𑐥𑐶𑑄𑐟 𑐧𑑂𑐰𑐣𑐾𑐎𑐸𑐠𑐶𑑄 𑐧𑐷𑐐𑐸 𑐳𑐶𑐬𑐥𑐵𑑅 𑐟𑐎𑑄 𑐟𑑂𑐫𑐵𑐎𑐾𑐟 𑐂𑐥𑐶𑑄 𑐟𑐵𑑅𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐣𑑂𑐴𑐵𑐥𑐵 𑑗𑐐𑐹 𑐟𑐐𑐶𑑄 𑐟𑐎 𑐖𑐎 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑑘 𑐐𑐹 𑐟𑐐𑐶𑐩𑐫𑑂 𑐩𑐾𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐧𑑂𑐰𑑄 𑐰𑑄𑐥𑐶𑐣𑐶𑐐𑐸 𑐧𑐵𑐬𑐾 𑐣𑑄 𑐖𑐶𑐩𑐶𑐳𑑄 𑐂𑐮𑐫𑑂 𑐧𑑂𑐫𑐮𑐫𑑂 𑐖𑐵𑐣𑐎𑐵𑐬𑐷 𑐎𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑐣𑐵𑐳𑐵 𑐫𑐎𑑂𑐰 𑐳𑑂𑐎𑐸𑐮𑑄 𑐧𑑂𑐰𑐣𑐾𑐎𑐸𑐠𑐶𑑄 𑐰𑑅𑐥𑐶𑑄 𑐩𑐳𑑂𑐟 𑐧𑐵𑑄𑐮𑐵𑑅 𑐢𑐂𑐐𑐸 𑐥𑑂𑐬𑐟𑐶𑐎𑑂𑐬𑐶𑐫𑐵 𑐧𑐷𑐐𑐸 𑐫𑐵𑑅 𑑋 𑐠𑑂𑐰 𑐗𑑂𑐰𑐮𑐫𑑂 𑐠𑐣 𑐴𑐾 𑐮𑐶𑐎𑑂𑐎 𑐕𑐐𑐹 𑐧𑑂𑐰𑐣𑐾𑐎𑐸𑐠𑐶𑑄 𑑘 𑐐𑐹 𑐟𑐐𑐶𑐩𑐫𑑂 𑐨𑐬𑑂𑐣𑐵 𑐖𑐸𑐂𑐟 𑐠𑐣𑑄 𑐰𑑅𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐧𑐵𑑄𑐮𑐵𑐂 𑐩𑐏𑐸, 𑐕𑐸𑑄 𑐣𑑄 𑐳𑐂𑐩𑐏𑐸, 𑐎𑐩𑐖𑑀𑐬 𑐖𑐸𑐂𑐢𑐎𑐵𑑅 𑐨𑐬𑑂𑐣𑐵 𑐎𑐵𑐫𑐾𑐩𑐏𑐸 𑐢𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐮𑐶𑐥𑐵 𑐰𑐫𑐵 𑐀𑐨𑐶𑐨𑐵𑐰𑐎𑑄 𑐄𑐩𑑂𑐴 𑐩𑐔𑐵𑐫𑐵𑐟 𑐂𑐣𑑂𑐚𑑂𑐬𑐵𑐣𑑂𑐳 𑐧𑐷𑐎𑐵 𑐳𑑂𑐰, 𑐛𑐷𑐎 𑐩𑐖𑐹𑐳𑐵 𑐨𑐬𑑂𑐣𑐵 𑐫𑐵𑐫𑐾 𑐩𑑂𑐰𑐵𑑅 𑐟𑐬 𑐂𑐣𑑂𑐚𑑂𑐬𑐵𑐣𑑂𑐳 𑐧𑐷𑐐𑐸 𑐰𑐫𑐵𑐐𑐸 𑐀𑐢𑐶𑐎𑐵𑐬 𑐏𑑅 𑐢𑐵𑐮 𑑋 𑐩𑐔𑐵𑐫𑐵𑐟 𑐂𑐣𑑂𑐚𑑂𑐬𑐵𑐣𑑂𑐳 𑐧𑐷𑐎𑐹𑐐𑐸 𑐂𑐮𑐫𑑂 𑐧𑐵𑑄𑐮𑐵𑐎 𑐴𑐾 𑐥𑐵𑐳 𑐫𑐵𑐟 𑑋 𑐮𑐶𑐥𑐵 𑐄𑐐𑐸 𑐳𑑂𑐎𑐸𑐮𑐫𑐵 𑐥𑑂𑐬𑐶𑐣𑑂𑐳𑐶𑐥𑐮𑑄 𑐣𑐾𑐰𑐵𑑅𑐨𑐵𑐳𑑄 𑐧𑑂𑐰𑑄𑐎𑐷𑐐𑐸 𑐳𑑂𑐎𑐸𑐮𑐫𑐵 𑐩𑐳𑑂𑐟 𑐴𑐶𑐳𑐵𑐧, 𑐀𑑄𑐐𑐾𑑂𑐬𑐖𑐷 𑐰𑐶𑐲𑐫𑐫𑑂 𑐟𑐳𑐎𑑄 𑐎𑐩𑐖𑑀𑐬 𑐖𑐸𑐂 𑐢𑐂𑐐𑐸 𑐟𑐵𑐫𑐾𑐎𑐵𑐐𑐸 𑐀𑐠𑐾 𑐩𑐏𑐸 𑐏𑐣𑐷 𑐢𑐎𑐵𑑅 𑐀𑐧𑐮𑐫𑑂𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐩𑐵𑐫𑐵 𑐩𑐵𑐣𑐣𑑂𑐢𑐬𑐫𑐵𑐟 𑐦𑑀𑐣 𑐟𑐎𑑄 𑐫𑐵𑐣𑐵𑑅 𑐴𑑅𑐐𑐸 𑐏𑑅 𑑋

𑐖𑐧 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑑘 𑐐𑐹 𑐟𑐐𑐶𑐩𑐫𑑂 𑐧𑑂𑐰𑑄𑐎𑐾𑐐𑐸 𑐀𑐣𑐸𑐩𑐟𑐶 𑐧𑐶𑐮 𑐀𑐧𑐮𑐫𑑂 𑐖𑐶𑐥𑐶𑑄 𑐟𑐳𑐎𑑄 𑐮𑐫𑑂𑐟𑐵𑐫𑐵𑑅, 𑐐𑐬𑑂𑐰 𑐫𑐵𑐣𑐵𑑅 𑐩𑐳𑑂𑐟𑐫𑑂 𑐴𑐵𑐩𑐵𑐥𑐶𑑄𑐟 𑐎𑐵 𑐁𑐰𑑄𑐮𑐶𑑄 𑐕𑐶𑐎𑐥𑐶𑑄𑐳𑑄 𑐠𑑅 𑐩𑐳𑑂𑐟𑐫𑑂𑐟 𑐥𑐶𑐣𑐾 𑐧𑑂𑐰𑑄𑐎𑐾 𑐩𑑂𑐰𑐵𑑅𑐮, 𑐠𑐣𑑄 𑐴𑐾 𑐊𑐳𑐊𑐮𑐳𑐷 𑐧𑐷𑐎𑐾 𑐡𑐟 𑐢𑐎𑐵𑑅 𑐰𑐫𑑂𑐎𑑅𑐥𑐶𑑄𑐟 𑐢𑐫𑐵, 𑐟𑐬 𑐴𑐵𑐩𑐵𑐥𑐶𑑄 𑐩𑐵𑐣𑐾 𑐩𑐖𑐹 𑑋 𑐣𑐾𑐰𑐵𑑅 𑐳𑑂𑐎𑐸𑐮𑐫𑑂 𑐧𑑂𑐰𑑄𑐎𑐵𑑄 𑐣𑑄 𑐊𑐳𑐊𑐮𑐳𑐷𑐂 𑐧𑐵𑑄𑐮𑐵𑑅𑐐𑐸 𑐮𑑂𑐫𑐵𑑅 𑐴𑐂𑐮𑐵 𑐢𑐎𑐵𑑅 𑐀𑐧𑐮𑐫𑑂 𑐧𑐕𑐶 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐩𑐳𑑂𑐟 𑐮𑐶𑐎𑐫𑐵 𑐫𑑄𑐎𑐮 𑑋 𑐳𑑂𑐰𑐷𑐩𑑂𑐴 𑐢𑐂𑐠𑐾 𑐩𑐳𑑂𑐟 𑐡𑐸𑐐𑐸𑐮𑐶𑐂 𑐮𑐶𑐥𑐵 𑐗𑐶𑑄𑐣𑐶𑐩𑑂𑐴 𑐖𑐎 𑐮𑑂𑐫𑐣 𑑋 𑐖𑐶𑐥𑐶𑑄 𑐣𑑄 𑐴𑐵𑐩𑐵𑐥𑐶𑑄𑐳𑑄 𑐢𑐵𑑅𑐠𑐾𑑄 𑐖𑐎𑑄 𑐖𑐸𑐂𑐐𑐸 𑐏𑑅𑐮𑐵 𑐢𑐎𑐵𑑅 𑐟𑐳𑐎𑑄 𑐐𑑂𑐫𑐵 𑐣𑑄 𑐐𑑂𑐫𑐵𑐟 𑑋 𑐠𑐣𑑄 𑐮𑐶𑐎𑐫𑐵 𑐫𑑄𑐎𑐹𑐥𑐶𑑄 𑐩𑐳𑑂𑐟𑐫𑑂𑐟 𑐴𑑀𑐳𑑂𑐚𑐾𑐮𑐫𑑂 𑐧𑑀𑐬𑑂𑐜𑐬𑑂𑐳𑐫𑑂 𑐟𑐫𑐵𑑅 𑐧𑑂𑐰𑑄𑐎𑐮 𑐢𑐵𑑅𑐐𑐸 𑐣𑑂𑐫𑐣𑐵 𑑋 𑐖𑐶𑐩𑐶𑐳𑑄 𑐀𑐠𑐾 𑐩𑐫𑐵𑐳𑐾 𑐜𑐾 𑐧𑑀𑐜𑐬𑑂𑐳 𑐠𑐾𑑄 𑐟𑐫𑐵𑑅 𑐳𑐸𑐠𑐫𑑂 𑐣𑑄 𑐫𑐵𑐎𑐣𑑄 𑐰 𑐧𑐴𑐣𑐶 𑐣𑑄 𑐮𑐶𑐧𑐵𑐎 𑐟𑐫𑐵𑑅 𑐧𑑂𑐰𑑄𑐎𑐵 𑑋 𑐠𑐸𑐎𑐠𑑄 𑐩𑐾𑐴𑐣𑐟 𑐫𑐵𑐣𑐵𑑅 𑐧𑑂𑐰𑑄𑐎𑐵𑐧𑐮𑐫𑑂 𑐗𑐶𑑄𑐣𑐶𑐩𑑂𑐴𑐩𑐢𑑂𑐫𑐾 𑐧𑐕𑐶 ‘𑐜𑐶𑐳𑑂𑐚𑐶𑑄𑐐𑑂𑐳𑐣’ 𑐰 𑐧𑐕𑐶 ‘𑐦𑐳𑑂𑐬𑑂𑐚 𑐜𑐶𑐨𑐶𑐖𑐣’𑐫𑑂 𑐥𑐵𑐳 𑐖𑐸𑐮 𑑋 𑐠𑐣𑑄 𑐮𑐶𑐎𑐫𑐵 𑐫𑑄𑐎𑐹𑐥𑐶𑑄 𑐩𑐳𑑂𑐟𑐫𑑂𑐳𑑄 𑐁𑐱𑐵 𑐫𑐵𑑅𑐠𑐾𑑄 𑐜𑐶𑐳𑑂𑐚𑐶𑑄𑐐𑐳𑐣 𑐴𑐫𑐾 𑐩𑐦𑐸𑐟 𑑋 𑐂𑐥𑐶𑑄 𑐳𑑂𑐰𑐫𑐵𑑄 𑐎𑐩𑐖𑑀𑐬𑐥𑐶𑑄 𑐠𑐣 𑐴𑐾 𑐧𑑂𑐰𑑄𑐥𑐶𑑄 𑐜𑐶𑐳𑑂𑐚𑐶𑑄𑐐𑐳𑐣𑐫𑑂 𑐥𑐵𑐳 𑐖𑐸𑐮 𑑋 𑐀𑐣𑑄 𑐮𑐶𑐥𑐵 𑐳𑐸𑐣𑐵𑐣𑑄 𑐩𑐳𑑂𑐟 𑐮𑐶𑐎𑐫𑐵 𑐫𑑄𑐎𑐾𑐐𑐸 𑐖𑑂𑐫𑐵 𑐩𑐖𑐸𑐮 𑑋 𑐠𑐣𑑄 𑐊𑐳𑐊𑐳𑐮𑐳𑐷 𑐧𑐶𑐄𑐥𑐶𑑄 𑐴𑐬𑐾𑐎 𑐧𑑂𑐫𑐵𑐔𑐫𑐵 𑐩𑐳𑑂𑐟𑐫𑑂𑐳𑑄 𑐄𑐟𑑂𑐎𑐺𑐲𑑂𑐚 𑐮𑑂𑐫𑐵𑑅 𑐴𑐫𑐵𑑅 𑐄𑐟𑑂𑐟𑐷𑐬𑑂𑐞 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐊𑐳𑐊𑐮𑐳𑐷 𑐳𑐶𑐢𑐫𑐾𑐎𑐵𑑅 𑐎𑐮𑐾𑐖𑐫𑑂 𑐧𑑂𑐰𑑄 𑐰𑑄𑐥𑐶𑐣𑐶𑐐𑐸 𑐧𑐵𑐬𑐾 𑐣𑑄 𑐗𑐷𑐳𑑄 𑐣𑑂𑐫𑐣𑐾𑐎𑐣𑐾 𑐫𑐵𑐣𑐵𑐐𑐸 𑐂𑐮𑐫𑑂 𑐖𑐐𑐟𑐳𑐸𑐣𑑂𑐡𑐬𑑄 𑐰𑑅𑐥𑐶𑑄 𑐧𑐵𑑄𑐮𑐵𑑅 𑐢𑐂𑐐𑐸 𑐖𑐵𑐣𑐎𑐵𑐬𑐷 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐠𑐣 𑐧𑑂𑐰𑐣𑐵 𑐰𑑄𑐥𑐶𑑄 𑐣𑑄 𑐩𑐾𑐥𑐶𑑄 𑐳𑑂𑐰𑐫𑐵𑑄 𑐩𑑂𑐴𑑀 𑐩𑐖𑐹 𑐢𑐂𑐐𑐸 𑐖𑐶𑐩𑐶𑐳𑑄 𑐟𑐵𑐫𑐾𑐎𑐵 𑑋

𑐠𑑁𑑄𑐫𑐵 𑐂𑐮𑐫𑑂 𑐣𑑄 𑐧𑑂𑐰𑐣𑐾𑐎𑐸𑐠𑐶𑐂 𑐔𑐸𑐣𑑁𑐟𑐶 𑐫𑐎𑑂𑐰 𑐴𑐾 𑐡𑐸 𑑋 𑐠𑐣 𑐨𑐬𑑂𑐣𑐵 𑐫𑐵𑐫𑐾𑐟 𑐰𑐂𑐥𑐶𑑄𑐳𑑄 ‘𑐊 𑐣𑐾𑐰𑐵𑑅 𑐨𑐵𑐫𑑂𑐫𑐵 𑐳𑑂𑐎𑐸𑐮 𑐮𑐵 𑐠𑑂𑐰 ?’ 𑐢𑐎𑐵𑑅 𑐫𑐎𑑂𑐰𑐳𑐶𑐣𑑄 𑐢𑐵𑐫𑐾𑐐𑐸 𑐫𑐵𑑅 𑑋 𑐀𑐠𑐾 𑐏𑑅𑐳𑐵𑑄 𑐕𑐐𑐹 𑐄𑐥𑐮𑐧𑑂𑐢𑐶 𑐕𑐸 𑐢𑐵𑑅𑐳𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐧𑑂𑐰𑑄𑐎𑐷𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐎𑐫𑐵𑑅 𑐧𑑂𑐰𑐣𑐵𑑅 𑐣𑑄 𑐩𑐾𑐥𑐶𑑄 𑐳𑑂𑐰𑐫𑐵𑑄 𑐩𑑂𑐴𑑀 𑐩𑐖𑐹 𑐢𑐂𑐐𑐸 𑐥𑑂𑐬𑐩𑐵𑐞 𑐮𑐵 𑐠𑐣 𑐴𑐾 𑐧𑑂𑐰𑐣𑐵 𑐰𑑄𑐥𑐶𑑄 𑐥𑐸𑐮𑐵𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐵𑐏𑐾𑑄 𑐥𑑂𑐬𑐩𑐵𑐞𑐶𑐟 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐣 𑐧𑑂𑐰𑐣𑐵 𑐰𑑄𑐥𑐶𑑄 𑐀𑐥𑑂𑐰𑑅 𑐠𑐾𑑄 𑐩𑐶𑐳𑐵𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐣𑐬𑑂𑐳𑐶𑐒 𑐥𑐾𑐳𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐮𑑂𑐫𑐵𑐧 𑐚𑐾𑐎𑑂𑐣𑐶𑐳𑐶𑐫𑐣, 𑐂𑐣𑑂𑐖𑐶𑐣𑐶𑐫𑐬𑐶𑐒, 𑐧𑐿𑑄𑐎 𑐰𑐶𑐟𑑂𑐟𑐷𑐫 𑐮𑐶𑐳𑐾𑑄 𑐴𑐬𑐾𑐎 𑐎𑑂𑐲𑐾𑐟𑑂𑐬𑐫𑑂 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐣 𑐨𑐬𑑂𑐣𑐵 𑐫𑐵𑐫𑐾𑐟 𑐰𑐂𑐥𑐶𑑄𑐳𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐧𑐵𑐬𑐾 𑐐𑐮𑐟 𑐢𑑄𑐐𑑄 𑐠𑐸𑐂𑐎𑐵𑐔𑑂𑐰𑑄𑐐𑐸𑐫𑐵𑐟 𑐀𑐠𑐾 𑐩𑐏𑐸 𑐢𑐎𑐵𑑅 𑐠𑐸𑐂𑐎𑐵 𑐔𑑂𑐰𑐣𑐾𑐩𑐵𑑅𑐐𑐸 𑐴𑐾 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐰𑐶𑐜𑐩𑑂𑐧𑐵𑐣𑐵 𑐠𑐾𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐩𑐾𑐐𑐸 𑐏𑑃 𑐧𑐵𑑄𑐮𑐵𑑅𑐐𑐸 𑐏𑑃 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐡𑐎𑑂𑐰 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐀𑐣𑐶𑐰𑐵𑐬𑑂𑐫 𑐧𑑂𑐰𑑄𑐎𑐾𑐩𑐵𑑅 𑐢𑐂𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐰𑑄 𑐴𑐵𑐩𑐵𑐥𑐶𑑄𑐳𑑄 𑐩𑐾𑐠𑐵𑐫𑑂 𑐧𑑂𑐰𑑄𑐎𑐹𑐳𑐵𑑄 𑐧𑑂𑐰𑑄𑐎𑐾 𑐴𑐾 𑐩𑐵𑑅, 𑐠𑐣 𑐧𑑂𑐰𑑄𑐎𑐹𑐳𑐵𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐷𑐐𑐸 𑐴𑐾 𑐏𑑅 𑑋 𑐩𑐾𑐠𑐵𑐫𑑂 𑐳𑑂𑐰𑐫𑐵𑑄 𑐠𑐣 𑐡𑑃 𑐣𑑄 𑐡𑑄, 𑐩𑐳𑑂𑐟𑐫𑑂𑐟 𑐢𑑂𑐫𑐵𑐣 𑐣𑑄 𑐧𑐶𑐄, 𑐩𑐵𑑅𑐐𑐸 𑐴𑐮𑑄𑐖𑑂𑐰𑐮𑑄 𑐣𑑄 𑐡𑐸𑐐𑐸𑐮𑐶𑑄 𑐠𑐐𑐸𑐣𑐾𑐣𑐶𑐳𑐾𑑄 𑐁𑐥𑐵𑑅 𑐴𑐾 𑐩𑐳𑑂𑐟 𑐡𑐸𑐴𑐵𑑄 𑐰𑑅𑐐𑐸 𑐡𑐸 𑑋

(𑐥𑑂𑐬𑐶𑐣𑑂𑐳𑐶𑐥𑐮 𑐳𑐸𑐣𑐶𑐟𑐵 𑐩𑐵𑐣𑐣𑑂𑐢𑐬𑐮𑐶𑐳𑐾 𑐖𑐹𑐐𑐸 𑐏𑑃𑐮𑑂𑐴𑐵𑐧𑐮𑑂𑐴𑐵𑐫𑐵 𑐮𑐶𑐢𑑄𑐳𑐵𑐫𑑂)