𑐜𑐵. 𑐧𑐵𑐮𑐐𑑀𑐥𑐵𑐮𑐫𑐵 𑐳𑐦𑐹𑐫𑐵𑐟 𑐎𑐫𑐵𑑅 𑐥𑐬𑐶𑐔𑐬𑑂𑐔𑐵

𑐨𑐵𑐲𑐵𑐴𑑂𑐫𑐩𑐶𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐔𑑂𑐰𑐩𑐶 𑐜𑐵. 𑐧𑐵𑐮𑐐𑑀𑐥𑐵𑐮 𑐱𑑂𑐬𑐾𑐲𑑂𑐛𑐫𑐵 𑐳𑐦𑐹 ‘𑐣𑐾𑐥𑐵𑐮𑐫𑑂 𑐖𑐵𑐟𑐷𑐫 𑐥𑐴𑐶𑐔𑐵𑐣 𑐰 𑐨𑐵𑐲𑐶𑐎 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐣𑑂𑐴𑑂𑐫𑐳𑑅’𑐫𑐵𑐟 𑐎𑐫𑐵𑑅 𑐥𑐬𑐶𑐔𑐬𑑂𑐔𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅 𑐬𑐵𑐖𑐣𑐷𑐟𑐶𑐎 𑐀𑐨𑐶𑐫𑐵𑐣𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑐠𑐷 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄𑐳𑑄 𑐄𑐐𑐸 𑐳𑐦𑐹𑐫𑐵𑐟 𑐎𑐫𑐵𑑅 𑐥𑐬𑐶𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐣𑐵𑐥𑑄 𑐣𑐾𑐥𑐵𑐮𑐨𑐵𑐲𑐵 𑐋𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑑒𑑐𑑔𑑓÷𑑔𑑔 𑐳𑐵𑐮𑐥𑐵𑐏𑐾 𑐜𑐵. 𑐧𑐵𑐮𑐐𑑀𑐥𑐵𑐮 𑐱𑑂𑐬𑐾𑐲𑑂𑐛𑑄 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐥𑐴𑐶𑐔𑐵𑐣 𑐰 𑐨𑐵𑐲𑐶𑐎 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐳𑐰𑐵𑐮𑐫𑐵𑐟 𑐎𑐫𑐵𑑅 𑐖𑐣𑐔𑐾𑐟𑐣𑐵 𑐠𑐣𑐾𑐐𑐸 𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐰𑐫𑑂𑐎𑑅𑐫𑐵 𑐄𑐐𑐸 𑐖𑑂𑐫𑐵 𑐢𑐵𑐠𑐾𑑄 𑐔𑑂𑐰𑐕𑐵𑐫𑐾𑐧𑐴𑐐𑐸 𑐖𑑂𑐫𑐵 𑐖𑐹𑐐𑐸 𑐰𑐶𑐔𑐵𑑅 𑐟𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐣𑐾𑐰𑐵𑑅 𑐏𑑂𑐫𑑅𑐫𑐵 𑐱𑐷𑐬𑑂𑐲𑐳𑑂𑐠 𑐰𑑂𑐫𑐎𑑂𑐟𑐶𑐥𑐶𑑄𑐳𑑄 𑐴𑐾 𑐰𑐶𑐔𑐵𑐮𑐣 𑐴𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐰𑐫𑑂𑐎𑐮𑑄 𑐎𑐜𑐵𑐬𑐸𑐥𑑄 𑐄𑐎𑐶𑐫𑐵 𑐥𑑂𑐬𑐟𑐶𑐰𑐵𑐡 𑐫𑐵𑐣𑐵𑐡𑐷𑐐𑐸 𑐣𑐵𑐥𑑄 𑐠𑑅𑐐𑐸 𑐳𑐴𑐷 𑐏𑑃 𑐟𑐫𑐵𑑅 𑐖𑐣𑐟𑐵𑐫𑐵𑐟 𑐳𑐔𑐾𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐢𑐫𑐵𑐡𑐶𑐮 𑑋 𑐄𑐐𑐸 𑐂𑐮𑐫𑑂 𑐴𑐾 𑐰𑐫𑑂𑐎𑐮𑑄 𑐨𑐵𑐲𑐶𑐎 𑐳𑐩𑐵𑐣𑐟𑐵𑐫𑐵 𑐏𑑃 𑐥𑐶𑐟 𑐴𑐫𑐵𑑅 𑐣𑐾𑐰𑐵𑑅 𑐏𑑂𑐫𑑅𑐫𑐵𑐟 𑐟𑐬𑑄𑐐𑐶𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐐𑐸𑐐𑐸 𑐫𑐵𑐣𑐵𑐡𑐷𑐐𑐸 𑐏𑑅, 𑐰 𑐰𑐵𑐳𑑂𑐟𑐰𑐫𑑂 𑐳𑐴𑐷 𑐖𑐹𑐐𑐸 𑐰𑐶𑐔𑐵𑑅 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐩𑐾𑐩𑑂𑐴 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐣𑐵𑐥𑑄 𑐳𑐵𑐴𑐶𑐟𑑂𑐫𑐎𑐵𑐬 𑐰 𑐳𑐩𑐵𑐮𑑀𑐔𑐎 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐣𑐾𑐰𑐵𑑅𑐟𑐫𑑂𑐳𑑄 𑐕𑐐𑐹 𑐥𑐴𑐶𑐔𑐵𑐣, 𑐨𑐵𑐲𑐶𑐎 𑐳𑐩𑐵𑐣𑐟𑐵 𑐰 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐠𑑁𑑄𑐫𑐵 𑐂𑐮𑐫𑑂 𑐕𑐸𑑄 𑐫𑐵𑐣𑐵𑐔𑑂𑐰𑑄𑐐𑐸 𑐩𑐡𑐸 𑐢𑐎𑐵𑑅 𑐢𑐵𑐫𑐾 𑐩𑐕𑐶𑑄 𑐢𑐵𑐳𑐾𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣 𑐄𑐏𑐾𑐮𑐵𑑅 𑐠𑐸𑐏𑐾𑐮𑐵𑑅 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐩𑐡𑐸 𑐢𑐫𑐵𑐡𑐶𑐮 𑑋 𑐜𑐵. 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐠𑑁𑑄 𑐗𑐷 𑐡𑐠𑐸𑐂 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬 𑐩𑐡𑐸𑐳𑐵𑑄 𑐣𑐾𑐰𑐵𑑅 𑐖𑐵𑐟𑐶 𑐰 𑐥𑐴𑐶𑐔𑐵𑐣𑐫𑐵 𑐁𑐣𑑂𑐡𑑀𑐮𑐣 𑐣𑑂𑐴𑑂𑐫𑐵𑐣𑐵 𑐴𑐾 𑐔𑑂𑐰𑑄𑐐𑐸 𑐡𑐸 𑐢𑐵𑐳𑐾𑑄 𑐥𑐴𑐶𑐔𑐵𑐣 𑐰 𑐨𑐵𑐲𑐶𑐎 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐳𑐰𑐵𑐮𑐫𑑂 𑐣𑑂𑐴𑐹 𑐣𑑂𑐴𑐹𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐟 𑐳𑐩𑐬𑑂𑐥𑐶𑐟 𑐫𑐵𑐣𑐵 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵𑐟 𑐀𑐗 𑐔𑑂𑐰𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋

𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑑄 𑐨𑐵𑐲𑐶𑐎 𑐳𑐩𑐵𑐣𑐟𑐵𑐫𑐵 𑐣𑐶𑑄𑐟𑐶𑑄 𑐁𑐥𑐵𑐮𑑄 𑐰𑐶𑐲𑐫 𑐄𑐟𑑂𑐠𑐵𑐣 𑐫𑐵𑐣𑐵𑐡𑐷𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐠𑑁𑑄𑐫𑐵 𑐂𑐮𑐫𑑂 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐣𑐾𑐟𑐺𑐟𑑂𑐰 𑐴𑐾 𑐫𑐵𑐂𑐥𑐶𑑄 𑐩𑐡𑐸 𑐢𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐩𑐡𑐸𑐣𑐶 𑐢𑐫𑐵𑐡𑐶𑐮 𑑋 𑐐𑐿𑐬 𑐣𑐾𑐰𑐵𑑅𑐟𑐫𑑂𑐳𑑄 𑐣𑐾𑐰𑐵𑑅𑐟𑐫𑑂𑐟 𑐎𑑂𑐰𑐟𑑂𑐫𑐮𑐾𑐟 𑐀𑐣𑐾𑐎𑐠𑑄𑐫𑐵 𑐬𑐞𑐣𑐷𑐟𑐶 𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐣𑐾𑐰𑐵𑑅𑐟 𑐰𑐶𑐔𑐮𑐶𑐟 𑐩𑐖𑐸𑐳𑐾 𑐳𑐔𑐾𑐟 𑐖𑐸𑐫𑐵𑑅 𑐀𑐗 𑐣𑑂𑐴𑑂𑐫𑐵𑑅 𑐰𑐣𑐾𑐩𑐵𑑅𑐐𑐸 𑐡𑐸 𑐢𑐫𑐵𑐡𑐶𑐮 𑑋

𑐬𑐵𑐖𑐣𑐷𑐟𑐶𑐎 𑐰𑐶𑐱𑑂𑐮𑐾𑐲𑐎 𑐣𑐵𑐥𑑄 𑐔𑑂𑐰𑐩𑐶 𑐬𑐵𑐖𑐾𑐣𑑂𑐡𑑂𑐬 𑐩𑐴𑐬𑑂𑐖𑐣𑑄 𑐳𑐦𑐹 𑐀𑐟𑐶𑐎𑑄 𑐩𑐴𑐟𑑂𑐰𑑄 𑐖𑐵𑑅𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐠𑐸𑐎𑐠𑑄𑐫𑐵 𑐳𑐦𑐹𑐫𑐵𑐟 𑐎𑑂𑐰𑐫𑑂𑐫𑐵 𑐟𑐴𑐟𑐎 𑐠𑑂𑐫𑑄𑐎𑐵𑑅 𑐳𑐎𑐮 𑐣𑐾𑐰𑐵𑑅𑐟𑐫𑑂𑐟 𑐧𑑂𑐰𑑄𑐎𑐾𑐐𑐸 𑐰𑐵𑐟𑐵𑐰𑐬𑐞 𑐡𑐫𑐾𑐎𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐬𑐵𑐖𑑂𑐫 𑐨𑐵𑐲𑐶𑐎 𑐀𑐢𑐶𑐎𑐵𑐬𑐫𑐵 𑐳𑐰𑐵𑐮𑐫𑑂 𑐐𑐸𑐎𑐠𑑄 𑐧𑐾𑐎𑑂𑐰 𑐩𑐶𑐏𑐵𑑄 𑐳𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑐢𑐂𑐐𑐸 𑐧𑐵𑐬𑐾 𑐣𑑄 𑐰𑐫𑑂𑐎𑐮𑑄 𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐗𑐷𑐳𑑄 𑐠𑑅𑐐𑐸 𑐨𑐵𑐲𑐶𑐎 𑐀𑐢𑐶𑐎𑐵𑐬, 𑐖𑐵𑐟𑐷𑐫 𑐥𑐴𑐶𑐔𑐵𑐣𑐫𑐵 𑐏𑑃 𑐮𑑂𑐴𑐵𑐣𑐵 𑐔𑑂𑐰𑐣𑐵𑐐𑐸 𑐠𑑁𑑄𑐫𑐵 𑐂𑐮𑐫𑑂 𑐣𑑄 𑐕𑐠𑑂𑐰𑑅 𑐣𑐾𑐰𑐵𑑅𑐟 𑐣𑐾𑐰𑐵𑑅𑐟𑐫𑑂𑐐𑐸 𑐴𑐾 𑐰𑐶𑐬𑑀𑐢𑐫𑑂 𑐎𑐸𑐴𑐵𑑄 𑐰𑐣𑐵𑐔𑑂𑐰𑑄𑐐𑐸 𑐡𑐸 𑐢𑐵𑐳𑐾𑑄 𑐠𑐸𑐎𑐶𑑄 𑐣𑐾𑐰𑐵𑑅 𑐊𑐎𑐟𑐵𑐫𑐵 𑐳𑐰𑐵𑐮𑐫𑑂 𑐣𑑂𑐴𑑂𑐫𑐳𑑅 𑐔𑐶𑑄 𑐠𑐣𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋

‘𑐨𑐵𑐲𑐶𑐎 𑐰 𑐖𑐵𑐟𑐷𑐫 𑐥𑐴𑐶𑐔𑐵𑐣𑐫𑐵 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐗𑐷 𑐳𑐎𑐮𑐾𑑄 𑐕𑐥𑑂𑐥𑑃 𑐖𑐸𑐫𑐵𑑅 𑐬𑐵𑐖𑑂𑐫𑐫𑐵𑐎𑐾 𑐀𑐢𑐶𑐎𑐵𑐬 𑐎𑐵𑐫𑐾𑐟 𑐳𑑄𑐑𑐬𑑂𑐲 𑐫𑐵𑐫𑐾𑐩𑐵𑑅𑐐𑐸 𑐂𑐮𑐫𑑂 𑐠𑑁𑑄 𑐗𑐷 𑐕𑐏𑐾 𑐐𑐿𑐬 𑐣𑐾𑐰𑐵𑑅𑐟 𑐣𑐵𑐥 𑐖𑐎 𑐩𑐏𑐸 𑐳𑑂𑐰𑐫𑑄 𑐣𑐾𑐰𑐵𑑅 𑐣𑐾𑐰𑐵𑑅 𑐡𑐠𑐸𑐂 𑐴𑐾 𑐳𑑄𑐑𑐬𑑂𑐲 𑐫𑐵𑐣𑐵𑐔𑑂𑐰𑐣𑐾 𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑐫𑐾𑐐𑐸 𑐠𑑁𑑄 𑐗𑐷𑐐𑐸 𑐣𑐶𑑄𑐟𑐶𑑄 𑐴𑐾 𑐰𑐶𑐜𑐩𑑂𑐧𑐣𑐵𑐫𑐵 𑐏𑑃 𑐏𑑅’ 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐳𑐥𑐹m𑐫𑐵 𑐔𑑂𑐰𑐩𑐶 𑐜𑐵. 𑐱𑑂𑐬𑐾𑐲𑑂𑐛𑑄 𑐣𑐾𑐥𑐵𑐮𑐫𑑂 𑐁𑐥𑐵𑐮𑑄 𑐖𑐵𑐟𑐖𑐵𑐟𑐶𑐟 𑐡𑐸𑐐𑐸 𑐰 𑐀𑐥𑑂𑐰𑑅𑐳𑐶𑐫𑐵 𑐠𑑅𑐐𑐸 𑐴𑐾 𑐨𑐵𑐲𑐵, 𑐮𑐶𑐥𑐶, 𑐳𑑄𑐳𑑂𑐎𑐵𑐬, 𑐳𑑄𑐳𑑂𑐎𑐺𑐟𑐶 𑐡𑐸 𑑋 𑐬𑐵𑐖𑑂𑐫𑑄 𑐂𑐩𑐶𑐟 𑐣𑑄 𑐳𑐩𑐵𑐣 𑐀𑐢𑐶𑐎𑐵𑐬 𑐧𑐷𑐩𑐵𑑅 𑐢𑐂𑐐𑐸 𑐏𑑃𑐫𑑂 𑐰𑑂𑐫𑐵𑐥𑐎 𑐧𑐴𑐳, 𑐔𑐬𑑂𑐔𑐵, 𑐥𑐬𑐶𑐔𑐬𑑂𑐔𑐵 𑐖𑐹𑐳𑐵𑑄 𑐠𑑂𑐰𑐥𑐵𑐏𑐾 𑐢𑑂𑐫𑐵𑐣 𑐧𑐶𑐫𑐵 𑐩𑐔𑑂𑐰𑑄𑐐𑐸𑐮𑐶𑑄 𑐠𑐸𑐎𑐠𑑄𑐫𑐵 𑐏𑑃𑐫𑑂 𑐢𑑂𑐰𑐵𑐠𑐸𑐂𑐎𑐵 𑐰𑐣𑐾𑐟 𑐠𑑅𑐐𑐸 𑐳𑐦𑐹 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐳 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐰𑐶𑐱𑑂𑐰𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐱𑐵𑐳𑐣𑐫𑐵 𑐰𑑂𑐫𑐰𑐳𑑂𑐠𑐵 𑐡𑐸𑐐𑐸 𑐁𑐥𑐵𑐮𑑄 𑐡𑐾𑐫𑑂𑐫𑐵 𑐡𑐳𑐸 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐳𑐾𑑄 𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐥𑐵𑐫𑑂𑐕𑐶 𑐩𑐖𑐹𑐐𑐸 𑐰 𑐳𑐩𑐵𑐣𑐸𑐥𑐵𑐟𑐶𑐎 𑐔𑐸𑐣𑐵𑐰 𑐥𑑂𑐬𑐞𑐵𑐮𑐷 𑐣𑐵𑐮𑐾𑐩𑐵𑑅𑐐𑐸 𑐁𑐰𑐱𑑂𑐫𑐎 𑐖𑐹𑐐𑐸 𑐏𑑃 𑐎𑐸𑐮𑐵𑐡𑐶𑐮 𑑋

𑐀𑐨𑐶𑐫𑐵𑐣𑐫𑐵 𑐣𑐵𑐫𑑅 𑐱𑑂𑐬𑐷𑐎𑐺𑐲𑑂𑐞 𑐩𑐵𑐣𑐣𑑂𑐢𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐜𑐵. 𑐩𑐴𑐾𑐱𑐩𑐵𑐣 𑐱𑑂𑐬𑐾𑐲𑑂𑐛𑑄 𑐮𑐳𑐎𑐸𑐳 𑐫𑐵𑐳𑐾𑑄 𑐜𑐵. 𑐱𑑂𑐬𑐾𑐲𑑂𑐛𑐫𑐵 𑐳𑐦𑐹𑐫𑐵𑐟 𑐎𑐫𑐵𑑅 𑐕𑐵𑐫𑑂 𑐥𑐬𑐶𑐔𑐬𑑂𑐔𑐵 𑐫𑐵𑐫𑐾𑐩𑐵𑑅𑐐𑐸 𑐢𑐂𑐐𑐸 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋