𑐡𑑂𑐰𑐵𑐮𑑂𑐏𑐵 𑐨𑐵𑐫𑑂𑐫𑐵𑐟 𑐎𑐫𑐵𑑅 𑐀𑐣𑑂𑐟𑐎𑑂𑐬𑑂𑐬𑐶𑐫𑐵

𑐠𑑅𑐐𑐸 𑐴𑐾 𑐥𑐴𑐫𑐵 𑐧𑐶𑐳𑑂𑐎𑑄 𑐩𑑂𑐴𑐳𑐷𑐎𑐵 𑐡𑐸𑐐𑐸 𑐡𑑂𑐰𑐵𑐮𑑂𑐏𑐵 𑐨𑐵𑐫𑑂𑐫𑐵 𑐩𑐴𑐟𑑂𑐰 𑐰 𑐠𑐸𑐎𑐶𑐫𑐵 𑐳𑑄𑐬𑐎𑑂𑐲𑐞𑐫𑐵 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐕𑐐𑐹 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑑅 𑐖𑐸𑐮 𑑋 𑐨𑐷𑐩𑐾𑐱𑑂𑐰𑐬 𑐣𑐐𑐬𑐥𑐵𑐮𑐶𑐎𑐵 𑐡𑑀𑐮𑐏𑐵 𑐰 𑐧𑐵𑑃𑐥𑐶𑐗𑑂𑐫𑐵𑐮𑐵 𑐩𑐶𑐜𑐶𑐫𑐵𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 ‘𑐡𑑂𑐰𑐵𑐮𑑂𑐏𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐠𑐸𑐎𑐶𑐫𑐵 𑐩𑐴𑐟𑑂𑐰’ 𑐰𑐶𑐲𑐫𑐫𑑂 𑐄𑐐𑐸 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐏𑑅 𑑋

𑐀𑐣𑑂𑐟𑐬𑐎𑑂𑐬𑑂𑐬𑐶𑐫𑐵𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐨𑐷𑐩𑐾𑐱𑑂𑐰𑐬 𑐣𑐐𑐬𑐥𑐵𑐎𑐶𑐵𑐫𑐵 𑐥𑑂𑐬𑐩𑐸𑐏 𑐃𑐱𑑂𑐰𑐬𑐣𑐵𑐬𑐵𑐫𑐞 𑐩𑐵𑐣𑐣𑑂𑐢𑐬𑑄 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐀𑐣𑑂𑐟𑐎𑑂𑐬𑑂𑐬𑐶𑐫𑐵𑐫𑑂 𑐡𑑂𑐰𑐵𑐮𑑂𑐏𑐵𑑄 𑐠𑐣 𑐰𑐫𑐵𑑅 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐡𑑂𑐰𑐵𑐮𑑂𑐏𑐵𑐩𑐶 𑐣𑐾𑐰𑐵𑑅𑐟𑐫𑑂 𑐰𑐶𑐱𑐾𑐲 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐨𑐷𑐩𑐾𑐱𑑂𑐰𑐬 𑐣𑐐𑐬𑐥𑐵𑐮𑐶𑐎𑐵 𑑒 𑐰𑐜𑐵𑐀𑐢𑑂𑐫𑐎𑑂𑐲 𑐳𑑂𑐚𑐵𑐮𑐶𑐣 𑐱𑑂𑐬𑐾𑐲𑑂𑐛, 𑐰𑐬𑐶𑐲𑑂𑐛 𑐂𑐣𑑂𑐖𑐶𑐣𑐶𑐫𑐬𑐮𑐶𑐳𑐾𑑄 𑐳𑐩𑐵𑐖𑐳𑐾𑐰𑐷 𑐁𑐟𑑂𑐩𑐵𑐎𑐺𑐲𑑂𑐞 𑐱𑑂𑐬𑐾𑐲𑑂𑐛, 𑐡𑑂𑐰𑐵𑐮𑑂𑐏𑐵𑐥𑐵𑐏𑐾𑑄 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑐣𑐵𑐡𑐷𑐩𑑂𑐴 𑐥𑑂𑐬𑐟𑐶𑐣𑐶𑐢𑐶𑐳𑐨𑐵𑐫𑐵 𑐥𑐸𑐮𑐵𑑄𑐩𑑂𑐴 𑐳𑐵𑑄𑐳𑐡 𑐡𑐶𑐰𑑂𑐫𑐩𑐞𑐶 𑐬𑐵𑐖𑐨𑐞𑑂𑐜𑐵𑐬𑐷 𑐰𑐶𑐱𑐾𑐲 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑄𑐫𑐵 𑐠𑐵𑐳𑑄 𑐨𑐷𑐩𑐾𑐱𑑂𑐰𑐬 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐩𑐵𑐣𑐣𑑂𑐢𑐬𑑄 𑐩𑐵𑑄𑐨𑐵𑐫𑑂 𑐰 𑐄𑐎𑐶𑐫𑐵 𑐩𑐴𑐟𑑂𑐰𑐫𑐵𑐟 𑐎𑐫𑐵𑑅 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐶𑐳𑐾𑑄 𑐠𑑅 𑐩𑐳𑑂𑐟𑐫𑑂𑐟 𑐩𑐵𑑄𑐨𑐵𑐫𑑂 𑐳𑑂𑐫𑐣𑐾𑐐𑐸 𑐂𑐮𑐫𑑂 𑐀𑐧𑐸 𑐳𑑂𑐰𑐫𑐵𑑄 𑐣𑑄 𑐩𑐵𑑄𑐫𑐵 𑐩𑐸𑐮𑐫𑑂 𑐔𑑂𑐰𑐣𑐵𑑅 𑐫𑐵𑐎𑐣𑑄 𑐳𑐫𑐾𑐎𑐷𑐐𑐸𑐮𑐶𑑄 𑐠𑐸𑐏𑐾𑐥𑐵𑐏𑐾 𑐢𑑂𑐫𑐵𑐣 𑐧𑐷𑐩𑐵𑑅𑐐𑐸 𑐁𑐰𑐱𑑂𑐫𑐎 𑐖𑐹 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐡𑑂𑐰𑐵𑐮𑑂𑐏𑐵𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐮𑑂𑐴𑐵𑐂𑐐𑐸 𑐣𑐾𑐰𑐵𑑅 𑐨𑐵𑐫𑑂 𑐩𑐾𑐩𑐾𑐐𑐸 𑐠𑐵𑐳𑐫𑑂 𑐔𑑂𑐰𑑄𑐥𑐶𑑄𑐳𑑄 𑐮𑑂𑐴𑐵𑐂𑐐𑐸 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐰𑐫𑐵𑑄 𑐧𑐶𑐳𑑂𑐎𑑄 𑐥𑐴𑑅𑐫𑐵 𑐖𑐹𑐐𑐸 𑐰 𑐠𑑅𑐐𑐸 𑐴𑐾 𑐩𑑁𑐮𑐶𑐎𑐟𑐵 𑐣𑑄 𑐡𑐸𑐐𑐸𑐮𑐶𑑄 𑐠𑑂𑐰 𑐨𑐵𑐫𑑂𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐩𑐵𑑅𑐐𑐸 𑐀𑐟𑐶 𑐁𑐰𑐱𑑂𑐫𑐎 𑐖𑐹 𑐢𑐵𑐳𑐾𑑄 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐣𑐸𑐐𑑅 𑐔𑐎𑑄𑐎𑐵𑑅 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐣𑑄 𑐥𑑂𑐰𑑄𑐎𑐵𑐡𑐶𑐮 𑑋

𑐳𑐩𑐎𑐵𑐮𑐷𑐣 𑐊𑐎𑐟𑐵 𑐳𑐩𑐵𑐖𑐫𑐵 𑐣𑐵𑐫𑑅 𑐳𑐎𑐸𑐣𑐵 𑐱𑑂𑐬𑐾𑐲𑑂𑐛 𑐩𑐮𑐾𑐎𑐸𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑑂𑐰𑐵𑐮𑑂𑐏𑐵 𑐣𑐾𑐥𑐵𑐮𑐨𑐵𑐲𑐵 𑐏𑐮𑐎𑐫𑐵 𑐀𑐢𑑂𑐫𑐎𑑂𑐲 𑐣𑐴𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑑄 𑐡𑑂𑐰𑐵𑐮𑑂𑐏𑐵 𑐣𑐾𑐥𑐵𑐮𑐨𑐵𑐲𑐵 𑐣𑐰𑐵𑐂𑐐𑐸 𑐥𑑂𑐬𑐵𑐬𑐩𑑂𑐨𑐶𑐎 𑐠𑐵𑐫𑑂, 𑐨𑑁𑐐𑑀𑐮𑐶𑐎 𑐰𑐶𑐰𑐶𑐢𑐟𑐵 𑐰 𑐎𑑂𑐲𑐾𑐟𑑂𑐬𑐫𑐵 𑐥𑐬𑐶𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐥𑐸𑐮𑐵𑑄𑐩𑑂𑐴 𑐩𑐴𑐵𑐣𑑂𑐫𑐵𑐫𑐵𑐢𑐶𑐰𑐎𑑂𑐟𑐵𑐮𑐶𑐳𑐾𑑄 𑐰𑐬𑐶𑐲𑑂𑐛 𑐀𑐢𑐶𑐰𑐎𑑂𑐟𑐵 𑐩𑐸𑐎𑑂𑐟𑐶 𑐥𑑂𑐬𑐢𑐵𑐣𑑄 𑐡𑑂𑐰𑐵𑐮𑑂𑐏𑐵 𑐨𑐵𑐫𑑂𑐫𑐵 𑐄𑐡𑑂𑐐𑐩 𑐰𑐶𑐣𑑂𑐡𑐸 𑐰 𑐡𑑂𑐰𑐵𑐮𑑂𑐏𑐵 𑐨𑐵𑐫𑑂𑐫𑐵 𑐢𑐵𑐬𑑂𑐩𑐶𑐎 𑐎𑐠𑐣, 𑐋𑐟𑐶𑐴𑐵𑐳𑐶𑐎 𑐳𑐴𑐶𑐲𑑂𑐞𑐸𑐟𑐵 𑐰 𑐡𑑂𑐰𑐵𑐮𑑂𑐏𑐵 𑐨𑐵𑐫𑑂𑐫𑐵 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐫𑐵𑐫𑐾𑐩𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐰 𑐎𑑂𑐬𑐶𑐫𑐵𑐎𑐮𑐵𑐥 𑐧𑐵𑐬𑐾 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐥𑑂𑐬𑐵𑐢𑑂𑐫𑐵𑐥𑐎 𑐀𑐩𑐣 𑐱𑑂𑐬𑐾𑐲𑑂𑐛𑑄 𑐡𑑂𑐰𑐵𑐮𑑂𑐏𑐵 𑐣𑐾𑐰𑐵𑑅 𑐨𑐵𑐫𑑂𑐫𑐵 𑐩𑑁𑐮𑐶𑐎𑐟𑐵𑐫𑐵𑐟 𑐮𑑂𑐫𑑄𑐎𑐵 𑐟𑐫𑐾𑐐𑐸 𑐏𑑅𑐳𑐵 𑐩𑐾𑐩𑐾𑐐𑐸 𑐨𑐵𑐫𑑂 𑐮𑑂𑐰𑐵𑐎𑐕𑑂𑐫𑐵𑐣𑐵𑑅 𑐳𑑄𑐧𑑀𑐢𑐣 𑐫𑐵𑐫𑐾𑐐𑐸, 𑐀𑐨𑐶𑐰𑐵𑐡𑐣 𑐫𑐵𑐫𑐾𑐐𑐸 𑐰 𑐥𑐬𑐶𑐨𑐵𑐲𑐵 𑐧𑐷𑐐𑐸 𑐖𑑂𑐫𑐵 𑐫𑐵𑐫𑐾 𑐩𑐖𑐶𑐄𑐐𑐸 𑐰 𑐠𑐸𑐎𑐶𑐫𑐵𑐟 𑐟𑐟𑑂𑐎𑐵𑐮 𑐡𑐶𑐎𑐾𑐐𑐸𑐥𑐵𑐏𑐾𑑄 𑐳𑐔𑐾𑐟 𑐖𑐸𑐂𑐩𑐵𑑅 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑐸𑐨𑐵𑐫𑑂 𑐡𑐾𑐕𑐵𑐫𑐾𑐐𑐸 𑐗𑑂𑐰𑐮𑐫𑑂 𑐡𑑂𑐰𑐵𑐮𑑂𑐏𑐵 𑐨𑐵𑐳𑑄 𑐴𑐾 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐶𑐳𑐾𑑄 𑐥𑐸𑐮𑐵𑑄𑐩𑑂𑐴 𑐳𑐵𑑄𑐳𑐡 𑐬𑐵𑐖𑐨𑐞𑑂𑐜𑐵𑐬𑐷𑑄 𑐡𑑂𑐰𑐵𑐮𑑂𑐏𑐵 𑐨𑐵𑐫𑑂𑐫𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐧𑐵𑑃𑐥𑐶𑐗𑑂𑐫𑐵𑐮𑐵 𑐩𑐶𑐜𑐶𑐫𑐵𑑄 𑐫𑐵𑐣𑐵𑐔𑑂𑐰𑑄𑐐𑐸 𑐎𑐸𑐟𑑅𑐫𑐵𑐟 𑐔𑑂𑐰𑐕𑐵𑐫𑐵𑐡𑐷𑐐𑐸 𑐏𑑅 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐡𑑂𑐰𑐵𑐮𑑂𑐏𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐶𑐬𑐣𑑂𑐟𑐬𑐟𑐵𑐫𑐵 𑐣𑐶𑑄𑐟𑐶𑑄 𑐣𑐶𑐫𑐩𑐶𑐟 𑐬𑐸𑐥𑑄 𑐀𑐨𑑂𑐫𑐵𑐳 𑐫𑐵𑐣𑐵 𑐰𑐣𑐵 𑐔𑑂𑐰𑐣𑐾𑐩𑐵𑑅𑐐𑐸 𑐀𑐣𑐶𑐰𑐵𑐬𑑂𑐫 𑐖𑐹𑐐𑐸 𑐏𑑃𑐫𑑂 𑐣𑑄 𑐧𑑅 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐳𑐨𑐵𑐥𑐟𑐶𑐫𑐵 𑐠𑐵𑐳𑑄 𑐧𑐵𑑃𑐥𑐶𑐗𑑂𑐫𑐵𑐮𑐵 𑐩𑐶𑐜𑐶𑐫𑐵𑐫𑐵 𑐀𑐢𑑂𑐫𑐎𑑂𑐲𑐣𑐵𑐥𑑄 𑐧𑐵𑑃𑐥𑐶𑐗𑑂𑐫𑐵𑐮𑐵 𑐜𑐚𑐎𑐩𑐫𑐵 𑐳𑐩𑑂𑐥𑐵𑐡𑐎 𑐄𑐥𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑑄 𑐖𑑂𑐫𑐵𑐗𑑂𑐰𑑅𑐫𑐵 𑐄𑐡𑑂𑐡𑐾𑐱𑑂𑐫𑐫𑐵𑐟 𑐎𑐫𑐵𑑅 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑑂𑐰𑐵𑐮𑑂𑐏𑐵 𑐣𑐾𑐥𑐵𑐮𑐨𑐵𑐲𑐵, 𑐐𑐸𑐎𑐶𑐫𑐵 𑐰𑐶𑐎𑐵𑐳𑐎𑑂𑐬𑐩 𑐰 𑐩𑐴𑐟𑑂𑐰𑐫𑐵𑐟 𑐎𑐫𑐵𑑅 𑐖𑑂𑐫𑐵𑐥𑑁 𑐣𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐀𑐣𑑂𑐟𑐎𑑂𑐬𑑂𑐬𑐶𑐫𑐵𑐫𑑂 𑐡𑐾𑐫𑑂 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑑂𑐰𑐎𑐸 𑐱𑐵𑐣𑑂𑐟 𑐱𑑂𑐬𑐾𑐲𑑂𑐛, 𑐡𑐾𑐫𑑂 𑐡𑐧𑐹 𑐡𑑂𑐰𑐵𑐮𑑂𑐏𑐵 𑐖𑐶𑐮𑑂𑐮𑐵𑐫𑐵 𑐣𑐵𑐫𑑅 𑐡𑐾𑐰𑐾𑐣𑑂𑐡𑑂𑐬𑐣𑐵𑐬𑐵𑐫𑐞 𑐥𑑂𑐬𑐢𑐵𑐣, 𑐎𑐵𑐮𑐶𑐘𑑂𑐔𑑀𑐎 𑐫𑐸𑐰𑐵 𑐎𑑂𑐮𑐧𑐫𑐵 𑐀𑐢𑑂𑐫𑐎𑑂𑐲 𑐣𑐶𑐬𑐾𑐣𑑂𑐡𑑂𑐬 𑐩𑐵𑐳𑑂𑐎𑐾𑐮𑐶𑐳𑐾𑑄 𑐡𑑂𑐰𑐵𑐮𑑂𑐏𑐵𑐫𑐵 𑐣𑐾𑐰𑐵𑑅 𑐨𑐵𑐫𑑂 𑐳𑐬𑐴 𑐊𑐎𑐬𑐸𑐥𑐟𑐵 𑐰𑐂𑐎𑐠𑑄 𑐣𑐰𑐵𑐂𑐐𑐸 𑐳𑐶𑐣𑑂𑐢𑐸𑐥𑐵𑐮𑑂𑐔𑑀𑐎 𑐟𑑁𑐠𑐮𑐷𑐥𑐵𑐏𑐾𑑄 𑐀𑐩𑐺𑐟𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛, 𑐬𑐵𑐩𑐎𑐸𑐩𑐵𑐬 𑐱𑑂𑐬𑐾𑐲𑑂𑐛, 𑐨𑐾𑐲𑐎𑐸𑐩𑐵𑐬 𑐱𑑂𑐬𑐾𑐲𑑂𑐛, 𑐳𑐶𑐣𑑂𑐢𑐸𑐥𑐵𑐮𑑂𑐔𑑀𑐎𑐫𑐵 𑐴𑐾 𑐮𑐶𑐳𑑂𑐟𑐶𑐥𑐵𑐏𑐾𑑄 𑐔𑐩𑐾𑐮𑐷 𑐥𑑂𑐬𑐢𑐵𑐣, 𑐱𑑄𑐎𑐬 𑐥𑑂𑐬𑐢𑐵𑐣 𑐮𑐐𑐵𑐫𑐟𑐫𑐵 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋