𑐣𑐾𑐰𑐵𑑅𑐳𑑄𑐳𑑂𑐎𑐺𑐟𑐶

𑐳𑐵𑐴𑐶𑐟𑑂𑐫:-

𑐳𑐵𑐴𑐶𑐟𑑂𑐫 :- 𑐣𑐾𑐰𑐵𑑅𑐟𑐫 𑐨𑐵𑐲𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫 𑐣𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐕𑐐𑐹 𑐀𑐒𑑂𑐐 𑐏𑑅 𑑋 𑐠𑑂𑐰 𑐣𑑄 𑐕𑐐𑐹 𑐥𑐬𑐩𑑂𑐥𑐬𑐵𑐐𑐟 𑐎𑐺𑐟𑐶 𑐏𑑅 𑑋 𑐏𑐵𑐳𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵 𑐳𑐷𑐡𑐫𑐾𑐎 𑐰𑐶𑐎𑐵𑐳 𑐖𑐸𑐫𑐵𑐰𑑅𑐐𑐸 𑐣𑐾.𑐳𑑄. 𑑔𑑙𑑔 𑐴𑐬𑐩𑐾𑐏𑐮𑐵, 𑐀𑐣𑑄𑐮𑐶 𑐣𑐾.𑐳𑑄. 𑑕𑑐𑑐 𑐫𑐵 𑐣𑑂𑐫𑐵𑐫𑐰𑐶𑐎𑐵𑐳𑐶𑐣𑐷 𑐳𑐦𑐹 (𑐀𑐩𑐵𑐟𑑂𑐫 𑐖𑐫𑐟 𑐰𑐬𑑂𑐩𑐵 𑐰𑑀 𑐮𑐸𑐣𑑂𑐟𑐨𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐎𑐺𑐟𑐶) 𑐣𑐶𑐳𑐾𑑃𑑄 𑐏𑐣𑐾𑐡𑐸 𑑋 𑐏𑐮𑐵 𑐠𑑂𑐰 𑐳𑐦𑐹 𑐣𑑄 𑐀𑐣𑐸𑐰𑐵𑐡 𑐳𑐵𑐴𑐶𑐟𑑂𑐫 𑐏𑑅 𑑋 𑐠𑐸𑐎𑐷 𑐳𑑄𑐳𑑂𑐎𑐺𑐟 𑐨𑐵𑐲𑐵 𑐰𑑀 𑐄𑐎𑐶𑐫𑐵 𑐟𑐟𑑂𑐎𑐵𑐮𑐷𑐣 𑐣𑐾𑐥𑐵𑐮𑐨𑐵𑐲𑐵𑐫𑐵 𑐀𑐣𑐸𑐰𑐵𑐡 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐠𑑂𑐰 𑐳𑐦𑐹 𑐟𑐟𑑂𑐎𑐵𑐮𑐷𑐣 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐰𑐬𑐸𑐥 𑐩𑑂𑐴𑐳𑐷𑐎𑐾𑐟 𑐖𑐎𑐩𑐏𑐸 𑐣𑐾𑐥𑐵𑐮 𑐨𑐵𑐲𑐵 𑐰𑑀 𑐣𑐾𑐥𑐵𑐮 𑐳𑐩𑑂𑐰𑐟 𑐢𑐎𑐵𑑅 𑐣𑑄 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐰𑑀 𑐨𑐸𑐖𑐶𑑄𑐩𑑀𑑅 𑐮𑐶𑐥𑐶𑐫𑐵 𑐣𑑄 𑐖𑐸𑐐𑐸𑐮𑐶𑑄 𑐀𑐥𑑀 𑐩𑐴𑐟𑑂𑐰𑐥𑐹𑐬𑑂𑐞 𑐖𑐸𑐐𑐸 𑐏𑑅 𑑋 𑐰𑐵𑐳𑑂𑐟𑐰𑐫𑑂 𑐳𑑄𑐳𑑂𑐎𑐺𑐟 𑐨𑐵𑐲𑐵𑐫𑐵 𑐳𑐒𑑂𑐐𑐟𑑄 𑐣𑐾𑐰𑐵𑑅 𑐟𑐳𑐾𑑃 𑐠𑑅𑐐𑐸 𑐨𑐵𑐲𑐵𑐫𑑂 𑐳𑐣𑐵𑐟𑐣 𑐢𑐬𑑂𑐩 𑐰𑑀 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐰𑐶𑐨𑐶𑐣𑑂𑐣 𑐳𑐦𑐹 𑐀𑐠𑐾𑐴𑐾 𑐖𑑂𑐫𑑀𑐟𑐶𑐲 𑐱𑐵𑐳𑑂𑐟𑑂𑐬, 𑐰𑐿𑐡𑑂𑐫 𑐱𑐵𑐳𑑂𑐟𑑂𑐬, 𑐣𑐷𑐟𑐶 𑐱𑐵𑐳𑑂𑐟𑑂𑐬, 𑐧𑐵𑐏𑑄, 𑐥𑑂𑐫𑐵𑐏𑑄, 𑐩𑑂𑐫𑐾, 𑐨𑐖𑐣, 𑐏𑑂𑐫𑐵𑐮𑑅 𑐁𑐡𑐶 𑐰𑑀 𑐩𑐾𑑅𑐩𑐾𑑅𑐐𑐸 𑐳𑐵𑐴𑐶𑐟𑑂𑐫𑐶𑐎 𑐳𑐦𑐹𑐟 𑐟𑑅𑐐𑐸 𑐥𑑂𑐬𑐎𑐵𑐬𑐫𑐵 𑐣𑐾𑐥𑐵𑐮 𑐮𑐶𑐥𑐶𑑄 𑐔𑑂𑐰𑐫𑐾𑐐𑐸 𑐫𑐵𑐟 𑑋 𑐟𑐬 𑐩𑐮𑑂𑐮𑐎𑐵𑐮 𑐦𑐸𑐫𑐾𑐰 𑐠𑐸𑐐𑐸 𑐨𑐵𑐲𑐵𑐫𑐵 𑐔𑑂𑐰𑐫𑐾𑐐𑐸 𑐎𑑂𑐬𑐩 𑐕𑑂𑐰𑐵𑐳𑐸𑐫𑐵 𑐰𑐮 𑑋 𑐀𑐗 𑐬𑐵𑐞𑐱𑐵𑐳𑐣𑐫𑑂𑐮𑐵 𑐠𑐸𑐐𑐸 𑐨𑐵𑐲𑐵 𑐰𑑀 𑐳𑐵𑐴𑐶𑐟𑑂𑐫𑐫𑐵 𑐡𑐩𑐣 𑐴𑐾 𑐖𑐸𑐮 𑑋 𑐀𑐠𑐾𑐳𑐵𑑄 𑐴𑐵𑐣𑑄 𑐳𑐶𑐡𑑂𑐢𑐶𑐡𑐵𑐳 𑐀𑐩𑐵𑐟𑑂𑐫, 𑐣𑐶𑐲𑑂𑐛𑐵𑐣𑐣𑑂𑐡 𑐰𑐖𑑂𑐬𑐵𑐔𑐵𑐬𑑂𑐫, 𑐖𑐐𑐟𑐳𑐸𑐣𑑂𑐡𑐬 𑐩𑐮𑑂𑐮, 𑐫𑑀𑐐𑐰𑐷𑐬𑐳𑐶𑑄𑐴 𑐎𑑄𑐳𑐵𑐎𑐵𑐬, 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫, 𑐱𑐸𑐎𑑂𑐬𑐬𑐵𑐖 𑐱𑐵𑐳𑑂𑐟𑑂𑐬𑐷 𑐁𑐡𑐶 𑐥𑐶𑐣𑐶𑐐𑐸 𑐟𑐥𑐳𑑂𑐫𑐵𑑄 𑐠𑐸𑐐𑐸 𑐨𑐵𑐲𑐵𑐫𑐵𑐟 𑐥𑐸𑐣𑐬𑑂𑐖𑐵𑐐𑐬𑐞 𑐫𑐵𑑅𑐐𑐸𑐮𑐶𑑄 𑐀𑐣𑑄𑐮𑐶 𑐥𑐣𑑂𑐣𑐵 𑐥𑑂𑐬𑐳𑐵𑐡 𑐖𑑀𑐱𑐷, 𑐥𑑂𑐬𑐾𑐩𑐰𑐴𑐵𑐡𑐸𑐬 𑐎𑑄𑐳𑐎𑐵𑐬, 𑐔𑐶𑐟𑑂𑐟𑐢𑐬 𑐴𑐺𑐡𑐫, 𑐦𑐟𑑂𑐟𑐾𑐧𑐴𑐵𑐡𑐸𑐬 𑐳𑐶𑑄𑐴, 𑐳𑑂𑐰𑐫𑐩𑑂𑐨𑐹𑐮𑐵𑐮 𑐱𑑂𑐬𑐾𑐲𑑂𑐛 𑐁𑐡𑐶 𑐥𑐶𑐣𑐶𑐐𑐸 𑐀𑐠𑐎 𑐫𑑀𑐐𑐡𑐵𑐣 𑐖𑐹𑐐𑐸𑐮𑐶𑑄 𑐠𑐸𑐐𑐸 𑐨𑐵𑐲𑐵 𑐰𑑀 𑐳𑐵𑐴𑐶𑐟𑑂𑐫𑐫𑐵 𑐗𑐣 𑐖𑐵𑐐𑐺𑐟𑐶 𑐖𑐸𑐫𑐵𑐰𑐮 𑑋 𑐁𑑅 𑐥𑑂𑐬𑐖𑐵𑐟𑐣𑑂𑐟𑑂𑐬 𑐖𑐸𑐫𑐵𑑅 𑐣𑑄 𑐨𑐵𑐲𑐵 𑐳𑐩𑑂𑐧𑐣𑑂𑐢𑐷 𑐳𑐩𑐵𑐣𑐟𑐵𑐫𑐵 𑐴𑐎 𑐎𑐵𑐫𑐾 𑐩𑐦𑐸𑐣𑐶𑐳𑐵𑑄 𑐠𑑅𑐐𑐸 𑐬𑐔𑐣𑐵𑐟𑑂𑐩𑐎 𑐖𑑂𑐫𑐵𑐖𑐎 𑐣𑑂𑐴𑑂𑐫𑐵𑐎𑐵𑑅𑐳𑐵𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵𑐟 𑐐𑐵𑐎𑑄 𑐠𑐎𑐫𑐵 𑐴𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮 𑐨𑐵𑐲𑐵𑐫𑐵 𑐥𑐸𑐮𑐵𑑄𑐐𑐸 𑐳𑐦𑐹 𑐎𑐺𑐟𑐶 𑐳𑐷𑐎𑐾𑐟

𑑑. “𑐁𑐱𑐵 𑐳𑐥𑐹𑐎𑐸𑐠𑐶𑐫𑐵𑑄 𑐀𑐨𑐶𑐮𑐾𑐏 𑐐𑑂𑐬𑐣𑑂𑐠𑐫𑐵 𑐰𑐬𑑂𑐞𑐣𑐵𑐟𑑂𑐩𑐎 𑐢𑐮𑑅” (𑐥𑑂𑐬𑐾𑐩 𑐰𑐴𑐵𑐡𑐸𑐬 𑐎𑐳𑐵𑑅 𑐰𑑀 𑐖𑐣𑐎𑐮𑐵𑐮 𑐰𑐿𑐡𑑂𑐫),
𑑒. “𑐩𑐮𑑂𑐮𑐎𑐵𑐮𑐫𑐵 𑐩𑐸𑐎𑑂𑐎 𑐣𑐾𑐥𑐵𑐮𑐨𑐵𑐲𑐵 𑐣𑐵𑐚𑐎𑐫𑐵 𑐢𑐮𑑅𑐥𑑁” (𑐱𑐵𑐣𑑂𑐟𑐴𑐬𑑂𑐲 𑐰𑐖𑑂𑐬𑐵𑐔𑐵𑐬𑑂𑐫) 𑐁𑐡𑐶,
𑐀𑐠𑐾𑐴𑐾 𑐣𑑂𑐴𑐹𑐐𑐸 𑐎𑐺𑐟𑐶𑐫𑐵 𑐢𑐮𑑅 𑐳𑐷𑐎𑐾𑐟
𑑓. “𑐣𑐾𑐥𑐵𑐮𑐨𑐵𑐲𑐵𑐫𑐵 𑐢𑑂𑐰𑐵𑐣𑐵 𑐳𑐦𑐹𑐫𑐵 𑐢𑐮𑑅” (𑐎𑐩𑐮 𑐥𑑂𑐬𑐎𑐵𑐱 𑐩𑐮𑑂𑐮),
𑑔. “𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑐵𑐒𑑂𑐩𑐫 𑐳𑐹𑐔𑐷” (𑐥𑐹𑐬𑑂𑐞 𑐥𑑂𑐬𑐳𑐵𑐡 𑐀𑐩𑐵𑐟𑑂𑐫),
𑑕. 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐂𑐟𑐶𑐴𑐵𑐳 (𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬) 𑐁𑐡𑐶 𑐰𑑀
𑑖. 𑐥𑐟𑑂𑐬𑐶𑐎𑐵 𑐎𑐺𑐟𑐶𑐫𑐵 𑐢𑐮𑑅 𑐳𑐷𑐎𑐾𑐟 “𑐥𑐟𑑂𑐬𑐥𑐟𑑂𑐬𑐶𑐎𑐵𑐫𑐵 𑐖𑐵𑐟𑑅” (𑐨𑐐𑐰𑐟𑐷 𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛) 𑐁𑐡𑐶𑑄 𑐐𑐸𑐴𑐵𑐮𑐶 𑐫𑐵𑑅 𑑋

𑐥𑑂𑐫𑐵𑐏𑑄:-

𑐥𑑂𑐫𑐵𑐏𑑄 𑐳𑑄𑐳𑑂𑐎𑐺𑐟𑐶 𑐣𑑄 𑐣𑐾𑐰𑐵𑑅𑐖𑐵𑐟𑐶𑑄 𑐰𑐶𑐎𑐵𑐳 𑐫𑐵𑑅𑐐𑐸 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐏𑑃 𑐏𑑅 𑑋 𑐣𑑂𑐴𑐵𑐥𑐵𑑄𑐣𑐶𑐳𑐾𑑃𑑄 𑐥𑑂𑐫𑐵𑐏𑑄𑐫𑐵 𑐎𑐮𑐵 𑐣𑐾𑐰𑐵𑑅𑐟𑐫𑐎𑐾 𑐡𑐸𑐐𑐸 𑐏𑐣𑐾 𑐡𑐸 𑑋 𑐥𑑂𑐫𑐵𑐏𑑄𑐫𑐵 𑐥𑐸𑐮𑐵𑑄 𑐡𑐧𑐹𑐟 𑐟𑑂𑐰𑐵𑑅 𑐟𑑂𑐰𑐵𑐮𑐫𑑂 𑐁𑑅𑐣𑑄 𑐡𑐣𑐶 𑑋 𑐏𑐵𑐳𑐫𑐵𑐣𑐵𑑅 𑐩𑐮𑑂𑐮 𑐖𑐸𑐖𑐥𑐶𑑄 𑐠𑐰𑑄 𑐴𑐾 𑐥𑑂𑐫𑐵𑐏𑑄 𑐔𑑂𑐰𑐫𑐵𑑅 𑐠𑑅𑐴𑐾 𑐥𑑂𑐫𑐵𑐏𑐣𑐫𑑂 𑐔𑑂𑐰𑐣𑐵𑑅 𑐧𑑂𑐰𑐟𑐶 𑐎𑐵𑐫𑐶𑐥𑐶𑑄 𑐖𑐹𑐐𑐸𑐮𑐶𑑄 𑐥𑑂𑐫𑐵𑐏𑑄 𑐳𑑄𑐳𑑂𑐎𑐺𑐟𑐶 𑐧𑑂𑐰𑐮𑑄𑐐𑐸 𑐏𑑅 𑑋 𑐥𑑂𑐫𑐵𑐏𑐣𑐫𑑂 𑐳𑑂𑐰𑐟𑐵𑐖𑐶 𑐏𑐣𑐾𑐡𑐸 :-
𑑑. 𑐩𑐸𑐡𑑂𑐬𑐵 (𑐨𑐵𑐰) 𑐥𑑂𑐫𑐵𑐏𑑄,
𑑒. 𑐏𑑃𑐮𑑂𑐴𑐵𑐫𑐾 𑐥𑑂𑐫𑐵𑐏𑑃, 𑐰𑑀
𑑓. 𑐩𑑂𑐫𑐾𑐴𑐵𑐮𑐾 𑐥𑑂𑐫𑐵𑐏𑑄
𑐩𑐸𑐡𑑂𑐬𑐵 𑐥𑑂𑐫𑐵𑐏𑐣𑐫𑑂 𑐀𑐥𑑀𑑅 𑐫𑐵𑐣𑐵𑑅𑐡𑑂𑐫𑑅𑐡𑐾𑐰𑐷𑐫𑐵 𑐐𑐞 𑐥𑑂𑐫𑐵𑐏𑑄 𑐁𑐡𑐶 𑐡𑐸 𑑋 𑐠𑐸𑐎𑐷 𑐡𑑂𑐫𑑅𑐖𑐸𑐫𑐶𑐥𑐶𑑄 𑐩𑐣𑐹𑐟 𑐏𑑂𑐰𑐵𑑅𑐥𑐵 𑐥𑐸𑐣𑐵𑑅 𑐥𑐸𑐖𑐵 𑐦𑐫𑐵𑑅 𑐮𑑂𑐴𑐵𑑅𑐟𑐸𑐟𑐶 𑐰𑑀 𑐥𑐟𑐶𑑄𑐫𑐵 𑐩𑐸𑐡𑑂𑐬𑐵𑐫𑐵 𑐨𑐵𑐰𑑄 𑐣𑐺𑐟𑑂𑐫 𑐫𑐵𑐂𑐐𑐸 𑐏𑑅 𑑋 𑐩𑐸𑐡𑑂𑐬𑐵 𑐥𑑂𑐫𑐵𑐏𑐣𑑂𑐫 𑐔𑐬𑑂𑐫𑐵 𑐥𑑂𑐫𑐵𑐏𑑄 𑐣𑑂𑐴𑐵𑐥𑐵 𑐐𑑀𑐥𑑂𑐫𑐐𑐸 𑐠𑑁𑑄𑐎𑐣𑑂𑐴𑐾 𑐳𑐵𑐬𑑂𑐰𑐖𑐣𑐶𑐎 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐥𑑂𑐫𑐵𑐏𑑄 𑐟𑐸𑐟𑑅𑐫𑐵 𑐧𑑀𑐮𑐫𑑂 𑐨𑐵𑐰 𑐣𑐺𑐟𑑂𑐫 𑐫𑐵𑐂𑐐𑐸 𑐏𑑅 𑑋 𑐀𑐠𑐾𑐴𑐾 𑐩𑑂𑐫𑐾𑐴𑐵𑑅 𑐥𑑂𑐫𑐵𑐏𑐣𑐫𑑂 𑐮𑑂𑐴𑐵𑑅𑐟𑐸𑐟𑐶 𑐩𑑂𑐴 𑐕𑑂𑐫𑑄 𑐁𑐡𑐶 𑐳𑑄𑐎𑐵𑑅 𑐩𑑂𑐫𑐾𑐴𑐵𑐮𑐵𑑅 𑐥𑑂𑐫𑐵𑐏𑑄 𑐴𑐸𑐮𑐷𑐐𑐸 𑐏𑑅 𑑋 𑐐𑐠𑐾 𑐢𑐶𑐣𑑂𑐟𑐵𑐩𑑀𑐣𑐶 𑐥𑑂𑐫𑐵𑐏𑑄 𑐁𑐡𑐶 𑑋 𑐰𑐶𑐱𑐾𑐲𑐫𑐵𑐣𑐵𑑅 𑐥𑑃𑐫𑑂𑐟𑐵𑑅,𑐥𑑀𑑄𑐐𑐵, 𑐏𑐶𑑄, 𑐟𑐵𑑅, 𑐗𑑂𑐫𑐵𑐮𑐶, 𑐨𑐸𑐳𑑂𑐫𑐵𑑅 𑐁𑐡𑐶 𑐕𑐸𑑄 𑐠𑐵𑐣𑐵𑑅 𑐥𑑂𑐫𑐵𑐏𑑄 𑐴𑐸𑐮𑐷𑐐𑐸 𑐡𑑂𑐫𑑅𑐥𑑂𑐫𑐵𑐏𑑄𑐫𑐵 𑐥𑐬𑐩𑑂𑐥𑐬𑐵 𑐁𑑅𑐣𑑄 𑐡𑐣𑐶 𑐐𑐠𑐾 𑐣𑐾𑐟𑐫𑐵 𑐱𑑂𑐰𑐾𑐎𑐵𑐮𑐷 𑐥𑑂𑐫𑐵𑐏𑑄 (𑐥𑐵𑐴𑐵𑑃 𑐔𑑅𑐬𑑂𑐴𑐾𑑅 𑐧𑐮𑐫𑑂 𑐴𑐸𑐂𑐎𑐷𑐐𑐸), 𑐏𑑀𑐣𑐵𑐫𑐵 𑐳𑐶𑐎𑐵𑐮𑐷 𑐥𑑂𑐫𑐵𑐏𑑄 (𑐩𑑀𑐴𑐣𑐷 𑐧𑐮𑐫𑑂 𑐴𑐸𑐂𑐎𑐷𑐐𑐸), 𑐠𑐾𑐔𑑀 𑐫𑐵 𑐥𑑂𑐫𑐵𑐏𑑄 (𑐩𑑀𑐴𑐣𑐷 𑐧𑐮𑐫𑑂), 𑐖𑐮𑐫𑐵 𑐴𑐬𑐳𑐶𑐡𑑂𑐢𑐶 𑐥𑑂𑐫𑐵𑐏𑑄 (𑐫𑑅 𑐩𑐬𑐶𑐥𑐸𑐣𑑂𑐴𑐶 𑐧𑐾𑐮𑐫𑑂), 𑐏𑑀𑐥𑐫𑐵 𑐣𑐰𑐡𑐸𑐬𑑂𑐐𑐵 𑐥𑑂𑐫𑐵𑐏𑑄, 𑐴𑑀𑐮𑐔𑑀𑐫𑐵 𑐳𑐰𑑅 𑐨𑐎𑑂𑐎𑐸 𑐥𑑂𑐫𑐵𑐏𑑄 (𑐫𑑄𑐡𑑂𑐫𑐵𑑅𑐧𑐾𑐮𑐫𑑂 𑐴𑐂𑐐𑐸), 𑐐𑐠𑐸𑐟𑐫 𑐥𑐔𑐮𑐶 𑐨𑐿𑐬𑐰 𑐥𑑂𑐫𑐵𑐏𑑄 𑐁𑐡𑐶 𑐠𑐸𑐥𑐶𑑄 𑐗𑐶𑑄𑐣𑐶𑐡𑑃𑐫𑑂 𑐕𑐎𑑀 𑐩𑐾𑑅𑐩𑐾𑑅 𑐠𑐵𑐫𑑂 𑐣𑑄 𑐴𑐸𑐂𑐎𑐹 𑑋 𑐫𑐣𑑂𑐡𑑂𑐫𑐵𑑅 𑐧𑐾𑐮𑐫𑑂 𑐴𑐂𑐐𑐸 𑐏𑑀𑐥𑐫𑐵 𑐩𑐴𑐵𑐎𑐵𑐮𑐷 𑐥𑑂𑐫𑐵𑐏𑑃, 𑐟𑑂𑐬𑐶𑐥𑐸𑐬𑐵𑐳𑐸𑐬 𑐥𑑂𑐫𑐵𑐏𑑄, 𑐎𑐶𑐮𑐵𑐐𑑅 𑐫𑐵 𑐡𑐾𑐰𑐷 𑐥𑑂𑐫𑐵𑐏𑑄 𑐀𑐠𑐾𑐴𑐾 𑐫𑐮𑐫𑐵 𑐎𑐵𑐬𑑂𑐟𑐶𑐎 𑐥𑑂𑐫𑐵𑐏𑑄, 𑐟𑐮𑐾𑐖𑐂 𑐴𑐸𑐂𑐎𑐷𑐐𑐸 𑐠𑑅𑐣𑐾𑐫𑐵 𑐄𑐬𑐵𑐫𑑂 𑐰𑑀 𑐎𑑂𑐰𑑅 𑐣𑐾𑐫𑐵 𑐧𑐬𑐾𑐟𑐫𑐐𑐸 𑐎𑐸𑐩𑑅 (𑐎𑐸𑐩𑐵𑐬) 𑐥𑑂𑐫𑐵𑐏𑑄 𑐁𑐡𑐶 𑐣𑑄 𑐩𑐸𑐡𑑂𑐬𑐵 𑐥𑑂𑐫𑐵𑐏𑑄 𑐴𑐾 𑐏𑑅 𑐟𑐬 𑐠𑐸𑐎𑐷 𑐥𑑀𑐲𑑅 (𑐨𑑀𑐐) 𑐎𑐵𑐫𑐾𑐐𑐸 𑐰𑐶𑐱𑐾𑐲𑐟𑐵 𑐩𑐡𑐸 𑑋 𑐮𑐵𑐏𑐫𑑂 𑐥𑑂𑐫𑐵𑐏𑑄, 𑐥𑐸𑐮𑐸𑐎𑐶𑐳𑐶 𑐥𑑂𑐫𑐵𑐏𑑄, 𑐏𑑀𑐥𑐵𑐫 𑐩𑐵𑐎𑑅 𑐥𑑂𑐫𑐵𑐏𑑄 𑐁𑐡𑐶 𑐣𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐩𑐾𑑅𑐐𑐸 𑐰𑐶𑐱𑐾𑐲𑐟𑐵 𑐏𑑅 𑑋

𑐏𑑃𑐮𑑂𑐴𑐵𑑅 𑐥𑑂𑐫𑐵𑐏𑑄𑐣𑐫𑑂 𑐏𑑃 𑐴𑐾 𑐮𑑂𑐴𑐵𑐣𑐵𑑅 𑐀𑐨𑐶𑐣𑐫 𑐫𑐵𑐫𑐶𑐐𑐸 𑐏𑑅 𑑋 𑐠𑐖𑑀𑐐𑐸 𑐥𑑂𑐫𑐵𑐏𑑃 𑐩𑐮𑑂𑐮𑐎𑐵𑐮𑐫𑑂 𑐀𑐥𑑀 𑐔𑐮𑐾𑐖𑐹𑐐𑐸 𑐣𑑂𑐫𑐣𑐾𑐡𑐸 𑑋 𑐏𑐵𑐳𑐫𑐵𑐣𑐵𑑅 𑐖𑐫 𑐳𑑂𑐠𑐶𑐟𑐶 𑐩𑐮𑑂𑐮𑐫𑐵 𑐬𑐵𑐩𑐵𑐫𑐞 𑐰𑑀 𑐨𑐿𑐬𑐰𑐵𑐣𑐣𑑂𑐡 𑐖𑐐 𑐖𑑂𑐫𑑀𑐟𑐶 𑐩𑐮𑑂𑐮𑐫𑐵 𑐴𑐬𑐐𑑁𑐬𑐷 𑐰𑐶𑐰𑐵𑐴, 𑐬𑐞𑐖𑐷𑐟 𑐩𑐮𑑂𑐮𑐫𑐵 𑐩𑐴𑐵𑐨𑐵𑐬𑐟, 𑐎𑐺𑐲𑑂𑐞 𑐔𑐬𑐶𑐟𑑂𑐬 𑐰𑑀 𑐩𑐡𑐣 𑐔𑐬𑐷𑐟𑑂𑐬, 𑐨𑐹𑐥𑐟𑐷𑐣𑑂𑐡𑑂𑐬 𑐩𑐮𑑂𑐮𑐫𑐵 𑐰𑐶𑐎𑑂𑐬𑐩 𑐔𑐬𑐷𑐟𑑂𑐬, 𑐖𑐫 𑐥𑑂𑐬𑐎𑐵𑐱 𑐩𑐮𑑂𑐮𑐫𑐵 𑐰𑐷𑐬𑐢𑑂𑐰𑐖𑑀𑐥𑐵𑐏𑑂𑐫𑐵𑐣𑐩 𑐰𑑀 𑐬𑐟𑑂𑐣𑐾𑐱𑑂𑐰𑐬 𑐥𑑂𑐬𑐵𑐡𑐸𑐬𑑂𑐨𑐵𑐰, 𑐳𑑂𑐰𑐳𑑂𑐠𑐵𑐣𑐷 𑐰𑑂𑐬𑐟𑐎𑐠𑐵 𑐁𑐡𑐶 𑐀𑐠𑐾𑐴𑐾 𑐬𑐵𑐖𑐾𑐣𑑂𑐡𑑂𑐬 𑐰𑐶𑐎𑑂𑐬𑐩 𑐱𑐵𑐴𑐫𑐵 𑐩𑐴𑐵𑐳𑐟𑑂𑐰𑑀𑐥𑐵𑐏𑑂𑐫𑐵𑐣 𑐁𑐡𑐶 𑐣𑑄 𑐣𑐵𑑄𑐖𑐵𑑅 𑐐𑐸 𑐏𑑅 𑑋 𑐮𑐶𑐥𑐵 𑐮𑐶𑐥𑐵 𑐣𑑄 𑐬𑐵𑐩𑐵𑐫𑐞, 𑐩𑐴𑐵𑐨𑐵𑐬𑐟, 𑐰𑐾𑐳𑐣𑑂𑐟𑐬 𑐁𑐡𑐶 𑐳𑐩𑑂𑐧𑐣𑑂𑐢𑐷 𑐥𑑂𑐫𑐵𑐏𑑄𑐫𑐵 𑐥𑑂𑐬𑐔𑐵𑐬 𑐖𑐸𑐫𑐵 𑐔𑑂𑐰𑑄𑐐𑐸 𑐏𑑅 𑑋 𑐟𑐬 𑐏𑑃𑐮𑑂𑐴𑐵𑑅 𑐥𑑂𑐫𑐵𑐏𑑄 𑐢𑐵𑑅𑐳𑐵𑑅 𑐐𑐸𑐣𑑂𑐥𑐸𑐣𑑂𑐴𑐷 𑐧𑐾𑐮𑐫𑑂 𑐔𑑂𑐫𑐵𑐣𑑂𑐴𑐸 𑐫𑑃𑐡𑑂𑐫𑐵𑑅 𑐧𑐾𑐮𑐫𑑂 𑐔𑑂𑐫𑐵𑐣𑑂𑐴𑐸 𑐖𑐎 𑐥𑑂𑐫𑐵𑐏𑑄 𑐴𑐸𑐂𑐎𑐾 𑐡𑐂𑐐𑐸 𑐬𑐵𑐞𑐱𑐵𑐳𑐣𑐫𑑂 𑐣𑑄 𑐩𑐡𑑂𑐫𑐹𑐐𑐸 𑐀𑐠𑐾𑐴𑐾 𑐖𑑂𑐫𑐵𑐥𑐸 𑐥𑑂𑐫𑐵𑐏𑑄 𑐢𑐎𑐵𑑅 𑐩𑑂𑐰𑐵𑐣𑐵 𑐔𑑂𑐰𑑄𑐐𑐸 𑐣𑑄 𑐳𑐶𑐣𑐾𑐩𑐵𑐫𑐵 𑐥𑑂𑐬𑐨𑐵𑐰𑑄 𑐩𑑂𑐴𑐶𑐐𑑅 𑐠𑑁𑑄 𑐡𑐶𑐣𑐵𑐰𑐣 𑑋 𑐠𑑁𑑄𑐎𑐣𑑂𑐴𑐾 𑐕𑐢𑐵𑑅 𑐥𑑂𑐫𑐵𑐏𑑄 𑐰𑑀 𑐥𑐹𑐢𑐵𑑅 𑐥𑑂𑐫𑐵𑐏𑑄 𑐢𑐎𑐵𑑅 𑐐𑐸𑐧𑐮𑐾𑑄 𑐐𑐧𑐮𑐾𑑄 𑐎𑑂𑐫𑐣𑐾𑐐𑐸 𑐫𑐵𑑅 𑑋 𑐟𑐬 𑐠𑐸𑐎𑐶𑐫𑐵 𑐧𑐮𑑂𑐮𑐵𑐐𑐸 𑐰𑑂𑐫𑐰𑐵𑐳𑑂𑐠𑐵 𑐩𑐡𑐸𑐐𑐸𑐮𑐶𑑄 𑐠𑐖𑑀𑐐𑐸 𑐥𑑂𑐫𑐵𑐏𑑄𑐫𑐵 𑐀𑐰𑐳𑑂𑐠𑐵 𑐎𑐩𑐖𑑀𑐬 𑐴𑐾 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐮𑑀𑐎 𑐥𑑂𑐫𑐵𑐏𑑄 𑐎𑐠𑑄 𑐢𑐶𑐩𑐾𑑅 𑐥𑑂𑐫𑐵𑐏𑑄 𑐰𑑀 𑐑𑐶𑐣𑑂𑐟𑐵𑑄𑐩𑑂𑐰𑐣𑐶 𑐥𑑂𑐫𑐵𑐏𑑄 𑐁𑐡𑐶 𑐕𑐸𑑄 𑐮𑑂𑐫𑐣𑐵 𑐔𑑂𑐰𑑄𑐐𑐸 𑐡𑐣𑐶 𑑋

𑐧𑐵𑐖𑑄 :-

𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐕𑐐𑐹 𑐥𑑂𑐬𑐩𑐸𑐏 𑐰𑐶𑐲𑐫 𑐣𑐾𑐰𑐵𑑅 𑐧𑐵𑐖𑑄 𑐣𑑄 𑐏𑑅 𑑋 𑐏𑐵𑐳𑐫𑐵𑐣𑐵: 𑐧𑐵𑐖𑑄 𑐳𑑂𑐰𑑄𑐐𑐸 𑐥𑑂𑐬𑐎𑐵𑐬𑐫𑐵 𑐡𑐸 𑑑) 𑐠𑐵𑐫𑐾𑐐𑐸, 𑑒) 𑐥𑐸𑐂𑐐𑐸 𑐰𑑀 𑑓) 𑐎𑐷𑐐𑐸 |

𑑑.𑐠𑐵𑐫𑐾𑐐𑐸 :- 𑐠𑐵𑐫𑐾𑐐𑐸 𑐧𑐵𑐖𑑄𑐣𑐫𑑂 𑐣𑑄
(𑑑). 𑐮𑑂𑐴𑐵: 𑐳𑑄𑐎𑐵: 𑐠𑐵𑐫𑐾𑐐𑐸 𑐐𑐠𑐾 𑐡𑐧𑐡𑐧
(𑑒). 𑐎𑐛𑐶𑑄 𑐠𑐵𑐫𑐾𑐐𑐸 𑐐𑐠𑐾 (𑐎) 𑐖𑐰𑐥𑐵𑐏𑐾𑑄 𑐔𑐵:𑐟𑐹 𑐧𑐾𑐟𑑂 𑐫𑐵 𑐎𑐠𑐶𑑄 𑐏𑐰 𑐥𑐵𑐏𑐾 𑐮𑑂𑐴𑐵:𑐥𑐵𑑃 𑐠𑐵𑐫𑐾𑐐𑐸 𑐢𑐶𑐩𑐾:,
(𑐏) 𑐖𑐰𑐥𑐵𑐏𑐾𑑄 𑐎𑐠𑐶𑑄 𑐏𑐰𑐫𑑂 𑐮𑑂𑐴𑐵𑐟𑑄 𑐠𑐵𑐫𑐾𑐐𑐸 𑐣𑐵𑐫𑑂 𑐏𑐶𑑄 ,
(𑐐) 𑐏𑐰𑐫𑑂 𑐎𑐠𑐶𑑄 𑐖𑐰𑐫𑑂 𑐮𑑂𑐴𑐵𑐟𑑄 𑐠𑐵𑐫𑐾𑐐𑐸 𑐢𑐵: 𑐁𑐡𑐶 ,
(𑐑) 𑐣𑐶𑐥𑐵 𑐮𑑂𑐴𑐵𑐟𑑄 𑐎𑐠𑐶𑑄 𑐔𑑂𑐰𑐫𑑂 𑐥𑐵𑐏𑐾 𑐠𑐵𑐫𑐾𑐐𑐸 𑐣𑐐𑐬𑐵,

(𑑓). 𑐮𑑂𑐴𑐵𑐟𑑄 𑐖𑐎 𑐠𑐵𑐫𑐾𑐐𑐸 (𑐎) 𑐖𑐰𑐫𑑂 𑐣𑑄 𑐏𑐰𑐫𑑂 𑐣𑑄 𑐮𑑂𑐴𑐵:𑐥𑐵𑑃 𑐠𑐵𑐫𑐾𑐐𑐸 𑐏𑐶𑑄 , 𑐩𑐐:𑐏𑐶𑑄 , 𑐡𑐒𑑂𑐐:𑐏𑐶𑑄 𑐁𑐡𑐶 ,
(𑐏) 𑐔𑑂𑐰𑐫𑑂 𑐥𑐵𑐏𑐾 𑐖𑐎 𑐠𑐵𑐫𑐾𑐐𑐸 𑐎𑑀𑑄𑐔𑐵𑐏𑐶𑑄 𑐁𑐡𑐶 ,
(𑐐) 𑐖𑐰𑐮𑑂𑐴𑐵𑐟𑑄 𑐟𑐧𑐮 𑐡𑐾:𑐥𑐵 𑐮𑑂𑐴𑐵𑐟𑑄 𑐧𑐵𑐩 𑐠𑐵𑐫𑐾𑐐𑐸 𑐟𑐧𑐮𑐵 ,

(𑑔) 𑐖𑑀:𑐮𑑂𑐰𑐵𑐎𑐵: 𑐠𑐵𑐫𑐾𑐐𑐸 𑐨𑐸𑐳𑑂𑐫𑐵: 𑐕𑐸𑐳𑑂𑐫𑐵: , 𑐗𑑂𑐫𑐵𑐮𑐶 , 𑐧𑐨𑐹 (𑐏𑑂𑐰𑐵𑐮𑐶𑐩𑐵𑐮𑐶) , 𑐟𑐵: (𑐟𑐶𑐣𑑂𑐕𑐸) 𑐁𑐡𑐶 𑐡𑐸 |

𑑒. 𑐥𑐸𑐂𑐐𑐸 :-
𑐩𑑂𑐴𑐸𑐟𑐸𑑄 𑐥𑐸𑐫𑐾𑐐𑐸 𑐧𑐵𑐖𑐣𑐫𑑂 (𑐎) 𑐥𑑃𑐫𑐟𑐵: (𑐏) 𑐥𑑀𑑄𑐐𑐵 (𑐐) 𑐎𑐵𑐴𑐵: (𑐑) 𑐣𑐾𑐎𑐹 (𑐒) 𑐩𑐸𑐴𑐵𑐮𑐷 (𑐔) 𑐐𑐸𑐖𑐬𑐟𑐶 (𑐕) 𑐎𑐣𑐵𑐛 (𑐖) 𑐧𑐵𑐳𑐸𑐬𑐷 (𑐘) 𑐧𑐫𑑂 𑐁𑐡𑐶 𑐡𑐸 |

𑑓. 𑐎𑐷𑐐𑐸 :-
𑐎𑐶𑐫𑐵: 𑐠𑐵𑐫𑐾𑐐𑐸 𑐧𑐵𑐖𑐣𑐫𑑂 (𑐎) 𑐥𑐶𑐰𑐵𑑄𑐔𑐵 (𑐏) 𑐳𑐵𑐬𑐒𑑂𑐐𑐷 (𑐐) 𑐧𑐾𑐮𑐵 𑐁𑐡𑐶 𑐡𑐸 | 𑐠𑐸𑐐𑐸 𑐳𑑂𑐰𑐟𑐵𑐖𑐷 𑐧𑐵𑐖𑑄𑐫𑐵 𑐣𑐵𑐥𑑄 𑐟𑐵𑐬 𑐧𑐵𑐖𑐵𑐫𑑂 𑐳𑐶𑐟𑐵𑐬 𑐰𑑀 𑐢𑐶𑐩𑐾:𑐣𑐵𑐥 𑐠𑐵𑐫𑐾𑐐𑐸 𑐎𑐾𑑄𑐫𑑂𑐥𑐵 (𑐟𑐵𑑃𑐂𑐣𑐵𑐂𑑃) 𑐁𑐡𑐶 𑐣𑑄 𑐡𑐸 |

𑐩𑑂𑐫𑐾:-
𑐣𑐾𑐰𑐵𑑅𑐩𑑂𑐫𑐾𑐫𑐵 𑐱𑐵𑐳𑑂𑐟𑑂𑐬𑐷𑐫 𑐩𑑂𑐫𑐾 , 𑐮𑑀𑐎 𑐩𑑂𑐫𑐾 ,𑐁𑐢𑐸𑐣𑐶𑐎 𑐩𑑂𑐫𑐾 , 𑐎𑐠𑑄 𑐰𑑀 ॠ𑐟𑐸 𑐩𑑂𑐫𑐾 , 𑐧𑐵𑐴𑑂𑐬𑐩𑐵𑐳𑐾 𑐩𑑂𑐫𑐾 𑐁𑐡𑐶 𑐎𑐠𑑄 𑐣𑑄 𑐧𑑂𑐰𑐠𑐮𑐵 𑐟:𑐐𑐸 𑐡𑐸 |

𑐎𑐵𑐳𑐵:-
𑐣𑐾𑐰𑐵𑑅𑐳𑑄𑐳𑑂𑐎𑐺𑐟𑐶𑐫𑐵 𑐡𑐸𑐣𑐾 𑐎𑐵𑐳𑐵 𑐣𑑄 𑐩𑐡𑐸𑐐𑐸 𑐩𑐏𑐸 |

𑐰𑐳: :-
𑐰𑐳:

𑐟𑐶𑐳𑐵:-
𑐣𑐾𑐰𑐵𑑅𑐟 𑐟𑐶𑐳𑐵𑐫𑑂 𑐣𑑄 𑐳𑑄𑐳𑑂𑐎𑐺𑐟𑐶 𑐡𑐸𑐥𑐶𑑄 𑐏𑑅 |

𑐎𑐮𑐵:-

𑐎𑐮𑐵 𑐣𑐾𑐰𑐵𑑅𑐟𑐫 𑐳𑑄𑐳𑑂𑐎𑐺𑐟𑐶𑐫𑐵 𑐕𑐐𑐹 𑐧𑐴𑐸𑐩𑐹𑐮𑑂𑐫 𑐏𑑄 𑐏𑑅 𑐎𑐮𑐵 | 𑐏𑐵𑐳𑐫𑐵𑐣𑐵: 𑐡𑐾𑐐: 𑐡𑑂𑐫𑑀: 𑐀𑐮𑐾 𑐎𑐮𑐵𑐟𑑂𑐩𑐎 𑐟𑑂𑐰𑐵𑐣𑐵:𑐳𑐶𑑄 , 𑐰𑐶𑐨𑐶𑐣𑑂𑐣 𑐧𑐸𑐚𑑂𑐚𑐵𑐫𑐵 𑐳𑑄𑐗𑑂𑐫𑐵: ,𑐟𑐶𑐎𑐶𑐗𑑂𑐫𑐵: ,𑐗𑑂𑐫𑐵: ,𑐁𑐡𑐶 𑐣𑑄 𑐣𑐾𑐰𑐵𑑅 𑐎𑐮𑐵𑐫𑐵 𑐧𑐾𑐖𑑀𑐜 𑐣𑐩𑐸𑐣𑐵 𑐏: | 𑐀𑐠𑐾𑐳𑐵𑑄 𑐩𑐸𑐏𑑂𑐫𑐫𑐵𑐣𑐵:-
𑑑.𑐥𑐾𑐐𑑀𑐜𑐵 𑐱𑐿𑐮𑐶- 𑐥𑐱𑐸𑐥𑐟𑐶𑐣𑐵𑐠𑐫𑐵 𑐡𑐾𑐐: 𑐠𑐖𑑀𑐐𑐸 𑐥𑑁𑐡𑐾𑐐:
𑑒.𑐱𑐶𑐏𑐬 𑐱𑐿𑐮𑐶- 𑐫𑐮𑐫𑐵 𑐩𑐴𑐵𑐧𑑁𑐡 𑐠𑐾𑑄 𑐟:𑐴𑐵𑐎:𑐐𑐸 𑐡𑐾𑐐:
𑑓.𑐥𑐬𑑂𑐧𑐟 𑐱𑐿𑐮𑐶 – 𑐫𑐮𑐫𑐵 𑐎𑐺𑐲𑑂𑐞𑐩𑐣𑑂𑐡𑐶𑐬 𑐡𑐾𑐐:𑐠𑐖𑑀𑐐𑐸 𑐟:𑐖𑐵:𑐔𑐷𑐖𑐵: 𑐡𑐸𑐐𑐸 𑐡𑐾𑐐:
𑑔.𑐐𑐸𑐩𑑂𑐧𑐖𑐱𑐿𑐮𑐶 – 𑐔𑑂𑐰𑐫𑑂 𑐨𑑂𑐰𑐥𑐸𑐂𑐎𑐵𑐟:𑐐𑐸 𑐏𑐵𑐳𑐷 𑐧𑐵𑑃 𑐮𑐹𑐐𑐸 𑐟:𑐐𑑀𑐐𑐸 𑐡𑐾:𑐐 𑐐𑐠𑐾 𑐫𑐮 𑐮𑐵𑐫𑐎𑐹𑐫𑐵 𑐥𑐱𑑂𑐔𑐶𑐩𑐥𑐵𑐏𑐾 𑐔𑑂𑐰𑑄𑐐𑐸 𑐩𑐴𑐵𑐡𑑂𑐫𑑀𑐫𑐵 𑐡𑐾𑐐:
𑑕.𑐕𑐟𑑂𑐬 𑐱𑐿𑐮𑐶 – 𑐐𑐸𑐴𑑂𑐫𑐱𑑂𑐰𑐬𑐷𑐫𑐵 , 𑐨𑐡𑑂𑐬𑐎𑐵𑐮𑐷𑐫𑐵 𑐠𑐖𑑀𑐐𑐸 𑐔𑑂𑐰𑐫𑑂 𑐟𑑂𑐰𑐥𑐸𑐐𑐸 𑐕𑐸𑑄 𑐏𑐸𑐮𑑂𑐮𑐵𑐐𑐸 𑐡𑐾𑐐: ,
𑑖.𑐔𑐿𑐟𑑂𑐫 𑐱𑐿𑐮𑐶 – 𑐳𑑂𑐰𑐫𑐩𑑂𑐨𑐹 𑐨𑐐𑐰𑐵𑐣𑐫𑐵 𑐔𑐿𑐟𑑂𑐫 𑐠𑐖𑑀𑐐𑐸 𑐡𑐾:𑐐:

𑐠𑐖𑑀𑐐𑐸 𑐎𑐮𑐵 𑐡𑐾:𑐐𑐮𑐫𑑂 𑐖𑐎 𑐩𑐏𑐸 𑐩𑐾𑐩𑐾:𑐐𑐸 𑐕𑐾𑑄 , 𑐳𑐟: 𑐁𑐡𑐶 𑐠𑐵𑐳𑐫𑑂 𑐣𑑄 𑐡𑐸 | 𑐀𑐮𑐾 𑐮𑑀𑐴𑑄 , 𑐳𑐶𑑃 ,𑐔𑐵 ,𑐳𑐶𑐖: , 𑐮𑐷 𑐁𑐡𑐶𑐫𑐵 𑐟𑐟:𑐐𑑀𑐐𑐸 𑐩𑐸𑐬𑑂𑐟𑐶𑐫𑐵 𑐣𑐵𑐥𑑄 𑐮𑐸𑑃 𑐰𑐴𑐮𑑄 𑐳𑐶𑐫𑐵 𑐟:𑐐𑐸 𑐀𑐠𑐰𑐵 𑐮𑐸𑑃 𑐰𑐴𑐫𑐵 𑐴𑐾 𑐔𑐶𑐔𑐶𑐢𑑄𑐐𑐸 𑐩𑐸𑐬𑑂𑐟𑐶 𑐰𑐵 𑐰𑐳𑑂𑐟𑐸 𑐰𑐵 𑐟𑐶𑐳𑐵 𑐁𑐡𑐶 𑐣𑑄 𑐣𑐾𑐰𑐵𑑅 𑐎𑐵𑐮𑐵𑑄 𑐖𑐵𑐫𑐵 𑐔𑑂𑐰𑑄𑐐𑐸 𑐡𑐸 | 𑐀𑐠𑐾𑐴𑐾 𑐥𑑁𑐨𑐵: 𑐔𑐶𑐟𑑂𑐬 𑐁𑐡𑐶 𑐣𑑄 𑐣𑐾𑐰𑐵𑑅𑐟𑐫 𑐣𑐵𑑄𑐖𑐵:𑐐𑐸 𑐐𑑁𑐬𑐰𑐩𑐫 𑐎𑐮𑐵 𑐏: |

𑐣𑐾𑐰𑐵𑑅
𑐬𑐾𑐰𑐟𑐷𑐬𑐩𑐞𑐵𑐣𑐣𑑂𑐡 𑐱𑑂𑐬𑐾𑐲𑑂𑐛 𑐧𑐿𑐡𑑂𑐫

source:// jheeguinformation.com