𑐥𑐵𑐚𑐣 𑐴𑐵𑐃𑐳𑑂𑐎𑐸𑐮𑐫𑐵 𑐳𑐕𑐶𑐡𑑃𑐫𑐵 𑐖𑑂𑐫𑐵𑐗𑑂𑐰𑑅

𑐠𑐣𑐫𑐵 𑐫𑐮𑐢𑑂𑐰𑐵𑐏𑐵𑐫𑑂 𑐔𑑂𑐰𑑄𑐐𑐸 𑐥𑐵𑐚𑐣 𑐴𑐵𑐃𑐳𑑂𑐎𑐸𑐮𑑄 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐱𑐟 𑐰𑐵𑐬𑑂𑐲𑐶𑐎 𑐖𑑂𑐫𑐵𑐗𑑂𑐰𑑅 𑐴𑑄𑐐𑐸 𑐡𑐸 𑑋 𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐀𑐱𑑀𑐎 𑐴𑐮𑐫𑑂 𑐳𑑂𑐎𑐸𑐮 𑐳𑐕𑐶𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵 𑐖𑑂𑐫𑐵𑐗𑑂𑐰𑑅 𑐴𑑄𑐐𑐸 𑐏𑑅 𑑋

𑐰𑐶𑐡𑑂𑐫𑐵𑐮𑐫 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲𑐮𑐶𑐳𑐾𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑑𑑑 𑐰𑐜𑐵𑐀𑐢𑑂𑐫𑐎𑑂𑐲 𑐀𑐬𑑀𑐖𑐎𑐸𑐩𑐵𑐬 𑐏𑐜𑑂𑐐𑐷𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐩𑐹𑐥𑐵𑐴𑐵𑑄 𑐫𑐮 𑐩𑐴𑐵𑐣𑐐𑐬 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐫𑐮 𑐩𑐣𑐥𑐵 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐰𑐶𑐡𑑂𑐫𑐵𑐮𑐫𑑄 𑐱𑐟 𑐰𑐵𑐬𑑂𑐲𑐶𑐎𑐷 𑐖𑑂𑐫𑐵𑐗𑑂𑐰𑑅 𑐴𑑄𑐐𑐸 𑐰 𑐠𑑅 𑐣𑑄 𑐧𑑂𑐰𑐟𑐶 𑐎𑐵𑐫𑐾 𑐏𑑄𑐐𑐸𑐮𑐶𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐳𑐾𑑄 𑐨𑐸𑐏𑐵𑐔𑑄 𑐎𑑂𑐲𑐟𑐶 𑐖𑐹𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵 𑐨𑐰𑐣 𑐣𑐶𑐬𑑂𑐩𑐵𑐞𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐢𑐵𑐳𑐾𑑄 𑐖𑐵𑐥𑐵𑐣 𑐳𑐬𑐎𑐵𑐬𑐫𑐵𑐟 𑐳𑐸𑐨𑐵𑐫𑑂 𑐣𑑄 𑐡𑐾𑐕𑐵𑐣𑐵𑐡𑐶𑐮 𑑋

𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐖𑐵𑐥𑐵𑐣𑐷 𑐬𑐵𑐖𑐡𑐹𑐟 𑐎𑐶𑐎𑐸𑐟𑐵 𑐫𑐸𑐟𑐵𑐎𑐵𑑄 𑐖𑐵𑐥𑐵𑐣 𑐳𑐬𑐎𑐵𑐬𑑄 𑐣𑐾𑐥𑐵𑐮𑐫𑑂 𑐨𑐸𑐏𑐵𑐔𑑄 𑐎𑑂𑐲𑐟𑐶 𑐖𑐹𑐐𑐸 𑐣𑐶𑐳𑑅 𑐰 𑐥𑐷𑐐𑐹 𑐧𑑂𑐰𑐣𑐾𑐎𑐸𑐠𑐶 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑑅𑐐𑐸𑐮𑐶𑐂 𑐄𑐎𑐷 𑐕𑐐𑐹 𑐥𑐵𑐚𑐣 𑐴𑐵𑐃𑐳𑑂𑐎𑐸𑐮 𑐣𑑄 𑐖𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐰𑐶𑐡𑑂𑐫𑐵𑐮𑐫𑐫𑐵 𑐧𑑂𑐰𑑃𑐩𑐶𑐥𑐶𑑄𑐳𑑄 𑐧𑐵𑑄𑐮𑐵𑐎 𑐁𑐏𑑅 𑐧𑑂𑐰𑐣𑐵𑑅 𑐣𑐾𑐥𑐵𑑅𑐫𑐵 𑐥𑑂𑐬𑐾𑐬𑐎 𑐰𑑂𑐫𑐎𑑂𑐟𑐶 𑐖𑐸𑐂𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋
𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐴𑐬𑐶𑐱𑑂𑐔𑐣𑑂𑐡𑑂𑐬 𑐐𑑁𑐮𑐷𑑄 𑐰𑐶𑐡𑑂𑐫𑐵𑐮𑐫 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐳𑐎𑐳𑐶𑐟𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅𑐳𑐵 𑐧𑑂𑐰𑑃𑐩𑐶𑐥𑐶𑑄𑐳𑑄 𑐠𑐷𑐠𑐷 𑐳𑐵𑑄𑐳𑑂𑐎𑐺𑐟𑐶𑐎 𑐰 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐰𑐶.𑐳𑑄. 𑑑𑑙𑑘𑑑 𑐳𑐵𑐮𑐫𑑂 𑐟𑐟𑑂𑐎𑐵𑐮𑐷𑐣 𑐬𑐵𑐞𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐔𑐣𑑂𑐡𑑂𑐬 𑐱𑐩𑑂𑐱𑐾𑐬𑐫𑐵 𑐥𑐵𑐮𑐫𑑂 𑐳𑑂𑐠𑐵𑐥𑐣𑐵 𑐖𑐹𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐟𑐐𑐶𑑄 𑑑𑑒 𑐐𑐹 𑐟𑐎 𑐀𑐢𑑂𑐫𑐫𑐣 𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐰𑑂𑐫𑐰𑐳𑑂𑐠𑐵𑐥𑐣, 𑐱𑐶𑐎𑑂𑐲𑐵, 𑐩𑐵𑐣𑐰𑐶𑐎𑐷 𑐰 𑐎𑐵𑐣𑐹𑐣 𑐳𑑄𑐎𑐵𑐫𑐫𑑂 𑐣𑑄 𑐀𑐢𑑂𑐫𑐵𑐥𑐣 𑐫𑐵𑐎𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋