‘𑐨𑐵𑐲𑐵 𑐎𑐵𑐣𑐸𑐣 𑐠𑐵𑐎𑐸𑐳𑐵𑑄 𑐮𑐵𑐐𑐹 𑐖𑐸𑐂’

𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑑄𑐳𑑂𑐎𑐺𑐟𑐶 𑐩𑐣𑑂𑐟𑑂𑐬𑐷 𑐱𑐿𑐮𑐾𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱 𑐳𑐬𑐎𑐵𑐬𑑄 𑐨𑐵𑐲𑐵 𑐳𑐩𑑂𑐧𑐣𑑂𑐢𑐷 𑐎𑐵𑐣𑐸𑐣 𑐥𑐵𑐬𑐶𑐟 𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐳𑐬𑐎𑐵𑐬𑐷 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵 𑐎𑐠𑑄 𑐩𑐵𑐣𑑂𑐫𑐟𑐵 𑐧𑐶𑐄𑐳𑐵𑑄 𑐣𑑄 𑐄𑐐𑐸 𑐎𑐵𑐣𑐸𑐣 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸 𑐳𑐰𑐵𑐮𑐫𑑂 𑐢𑐵𑑅𑐳𑐵 𑐁𑐥𑐵𑐮𑑄 𑐳𑐩𑐳𑑂𑐫𑐵𑐟 𑐡𑐣𑐶𑐐𑐸 𑐖𑐸𑐫𑐵𑑅 𑐁𑑅 𑐳𑐎𑐮𑐾𑑄 𑐕𑐥𑑂𑐥𑑃 𑐖𑐸𑐫𑐵𑑅 𑐣𑑂𑐴𑑂𑐫𑐵𑐫𑐾 𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸 𑐢𑐫𑐵𑐡𑐷𑐐𑐸 𑐡𑐸 𑑋

𑐩𑑂𑐴𑐶𑐐𑑅 𑐨𑐵𑐲𑐵 𑐁𑐫𑑀𑐐𑐫𑐵 𑐖𑑂𑐫𑐵𑐎𑐸𑐠𑐶𑐂 𑐰𑐫𑑂𑐎𑑅𑐫𑐵𑐟 𑐫𑐵𑑅𑐐𑐸 𑐴𑐣𑐵 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐰𑐫𑑂𑐎𑐮𑑄 𑐄𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐏𑑅 𑑋 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑑂 𑐄𑐐𑐸 𑐎𑐵𑐣𑐸𑐣 𑐥𑐵𑐬𑐶𑐟 𑐫𑐵𑐎𑐾𑐟 𑐨𑐵𑐲𑐵 𑐁𑐫𑑀𑐐𑑄 𑐫𑐵𑑅𑐐𑐸 𑐳𑐶𑐦𑐵𑐬𑐶𑐳𑐫𑐵 𑐮𑐵𑐐𑐶𑑄 𑐳𑐸𑐨𑐵𑐫𑑂 𑐡𑐾𑐕𑐵𑐳𑐾𑑄 𑐰𑐫𑑂𑐎𑐮𑑄 𑐁𑑅 𑐎𑐵𑐣𑐸𑐣 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐎𑐾𑐟 𑐣𑑄 𑐁𑐫𑑀𑐐𑐥𑐵𑐏𑐾𑑄 𑐄𑐟𑐶𑐎𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾 𑐩𑐵𑐣𑐶𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑑅𑐫𑐵𑐟 𑐴𑐣𑐵𑐥𑑁 𑐮𑑅𑐮𑑂𑐴𑐵𑐳𑐾𑑄 𑐨𑐵𑐲𑐵 𑐁𑐫𑑀𑐐𑐫𑐵 𑐣𑐵𑐫𑑅 𑐜𑐵. 𑐐𑑀𑐥𑐵𑐮 𑐛𑐵𑐎𑐸𑐬𑑄 𑐁𑐫𑑀𑐐𑐫𑐵 𑐳𑐶𑐦𑐵𑐬𑐶𑐳𑐫𑐵𑐟 𑐣𑑂𑐴𑐵𑐥𑐵𑑄𑐏𑐸𑐳𑐷 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑑅𑐐𑐸𑐮𑐶𑑄 𑐩𑐣𑑂𑐟𑑂𑐬𑐷 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐁𑑅 𑐰𑐫𑑂𑐎𑑅𑐫𑐵 𑐴𑐾 𑐎𑐵𑐬𑑂𑐫𑐎𑐵𑐮𑐫𑑂 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑑂 𑐣𑑄 𑐨𑐵𑐲𑐵 𑐁𑐫𑑀𑐐𑐫𑐵 𑐱𑐵𑐏𑐵 𑐔𑐵𑐫𑐾𑐎𑐾𑐐𑐸 𑐖𑑂𑐫𑐵 𑐖𑐹𑐳𑐵 𑐧𑐵𑑄𑐮𑐵𑐂 𑐢𑐎𑐵𑑅 𑐳𑐸𑐗𑐵𑐰 𑐣𑑄 𑐧𑐶𑐫𑐵𑐡𑐶𑐮 𑑋

𑐀𑐠𑐾 𑐴𑐾 𑐁𑐫𑑀𑐐𑐫𑐵 𑐡𑐸𑐖𑑅 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬𑑄 𑐩𑐣𑑂𑐟𑑂𑐬𑐷 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐁𑐫𑑀𑐐𑐫𑐵 𑐖𑑂𑐫𑐵𑐎𑐸𑐠𑐶𑐂 𑐮𑐳𑐎𑐸𑐳 𑐫𑐵𑐳𑐾𑑄 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑑄 𑐨𑐵𑐲𑐵𑐫𑐵 𑐎𑐵𑐣𑐸𑐣 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑑅𑐐𑐸𑐮𑐶𑑄 𑐡𑐾𑐱𑐫𑑂 𑐰𑑅𑐐𑐸 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵𑐫𑐵 𑐄𑐥𑐮𑐧𑑂𑐢𑐷 𑐏𑐣𑐾𑐡𑐸𑐐𑐸 𑐔𑐬𑑂𑐔𑐵 𑐫𑐵𑐣𑐵𑐡𑐶𑐮 𑑋

𑐁𑐫𑑀𑐐𑐫𑐵 𑐎𑐵𑐩𑐸 𑐳𑐔𑐶𑐰 𑐜𑐵. 𑐮𑑀𑐎 𑐧𑐴𑐵𑐡𑐸𑐬 𑐮𑑀𑐥𑑂𑐔𑐣𑑄 𑐨𑐵𑐲𑐵 𑐎𑐵𑐣𑐸𑐣 𑐟𑐫𑐵𑐬 𑐫𑐵𑐫𑐾𑐟 𑐁𑐫𑑀𑐐𑐥𑐵𑐏𑐾𑑄 𑐫𑐵𑑅𑐐𑐸 𑐖𑑂𑐫𑐵𑐏𑑃𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐫𑐵𑐳𑐾𑑄 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑑂 𑐨𑐵𑐲𑐵 𑐁𑐫𑑀𑐐𑐫𑐵 𑐱𑐵𑐏𑐵 𑐔𑐵𑐫𑐾𑐎𑐵𑑅 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐖𑑂𑐫𑐵 𑐳𑐩𑐾𑐟 𑐠𑑂𑐰𑐴𑐾 𑐖𑑂𑐫𑐵𑐎𑐸𑐠𑐶𑑄 𑐫𑐵𑑅𑐳𑐵 𑐧𑐵𑑄𑐮𑐵𑐂𑐐𑐸 𑐳𑐸𑐗𑐵𑐰 𑐧𑐶𑐫𑐵𑐡𑐶𑐮 𑑋

𑐁𑐫𑑀𑐐𑐫𑐵 𑐖𑑂𑐫𑐵𑐎𑐸𑐠𑐶𑑄 𑐢𑐵𑑅𑐎𑐠𑑄 𑐩𑐣𑑂𑐟𑑂𑐬𑐷 𑐰𑐖𑑂𑐬𑐵𑐔𑐵𑐬𑑂𑐫 𑐁𑐫𑑀𑐐𑐫𑐵 𑐖𑑂𑐫𑐵𑐎𑐸𑐠𑐶𑐂 𑐥𑑂𑐬𑐰𑐾𑐱 𑐫𑐵𑐣𑐵𑐡𑐷𑐩𑑂𑐴 𑐣𑑂𑐴𑐵𑐥𑐵𑑄𑐩𑑂𑐴 𑐩𑐣𑑂𑐟𑑂𑐬𑐷 𑐏𑑅 𑑋 𑐨𑐵𑐲𑐵 𑐁𑐫𑑀𑐐 𑐐𑐛𑐣 𑐖𑐹𑐐𑐸 𑐣𑑂𑐴𑐫𑑂𑐡𑑃 𑐦𑐸𑐣𑐵𑑅 𑐔𑑂𑐫𑐵𑐡𑑃𑐫𑑂 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋