𑐨𑐵𑐲𑐵 𑐰 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐥𑐬𑐶𑐔𑐫

𑐜𑐵.𑐟𑐸𑐫𑐹𑐧𑐴𑐵𑐡𑐸𑐬 𑐩𑐴𑐬𑑂𑐖𑐣
𑐄𑐥-𑐥𑑂𑐬𑐵𑐢𑑂𑐫𑐵𑐥𑐎 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐧𑐶𑐨𑐵𑐐

𑑑.𑑑 𑐨𑐵𑐲𑐵

𑐩𑐣𑐸𑐏𑑄 𑐠𑑅𑐐𑐸 𑐧𑐶𑐔𑐵𑑅, 𑐨𑐵𑐰 𑐰𑐵 𑐥𑑂𑐬𑐟𑐶𑐎𑑂𑐬𑐶𑐫𑐵 𑐰𑐵 𑐑𑐚𑐣𑐵 𑐩𑐾𑐩𑑂𑐴 𑐩𑐣𑐹 𑐰𑐵 𑐩𑐣𑐹𑐟𑐫𑐾𑐟 𑐰𑐵 𑐥𑑂𑐬𑐵𑐞𑐷 𑐰𑐵 𑐥𑑂𑐬𑐵𑐞𑐷𑐟𑐫𑐾𑐟 𑐎𑐣𑐾𑐟 𑐀𑐣𑐾𑐎 𑐄𑐥𑐵𑐫 𑐕𑑂𑐫𑐮𑐷 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐩𑑂𑐴𑐸𑐟𑐸𑑄 𑐰𑐶𑐨𑐶𑐣𑑂𑐣 𑐱𑐧𑑂𑐡 𑐥𑐶𑐎𑐫𑐵: 𑐖𑑂𑐫𑐹 𑐮𑐵 𑐰𑐵 𑐄𑐎𑐶𑐫𑐵 𑐣𑐵𑐥𑑄 𑐮𑑂𑐴𑐵𑑅𑐟𑐸𑐟𑐶 𑐳𑑄𑐎𑐵: 𑐰𑐵 𑐕𑑂𑐫𑑄, 𑐩𑐶𑐏𑐵 𑐳𑑄𑐎𑐵: 𑐖𑑂𑐫𑐹 𑐮𑐵 𑐰 𑐣𑑄 𑐎𑐸𑐟𑑅 𑐫𑐵𑐂 𑑋 𑐩𑑂𑐴𑐸𑐟𑐸𑑄 𑐏𑑃 𑐥𑐶𑐎𑐫𑐵𑑅 𑐎𑐣𑐾𑐟 𑐳𑑄𑐐𑐸 𑐖𑑂𑐫𑐵𑐫𑐵𑐟 𑐨𑐵𑐫𑑂‌ 𑐢𑐵𑐂 𑐳𑐵 𑐮𑑂𑐴𑐵: 𑐳𑑄𑐎𑐵: 𑐎𑑂𑐫𑑄𑐐𑐸 𑐨𑐵𑐫𑐫𑐵𑐟 𑐮𑑂𑐴𑐵𑑅𑐨𑐵𑐫𑑂‌, 𑐩𑐶𑐏𑐵 𑐳𑑄𑐎𑐵: 𑐎𑑂𑐫𑑄𑐐𑐸 𑐨𑐵𑐫𑑂‌𑐫𑐵𑐟 𑐩𑐶𑐏𑐵𑐨𑐵𑐫𑑂‌ 𑐢𑐵𑐂 𑑋 𑐟𑐵𑐥𑐵𑐎 𑐔𑑂𑐰𑑄𑐩𑑂𑐴 𑐩𑐣𑐹𑐫𑐵𑐟 ‘𑐠𑐣 𑐰𑐵’ 𑐢𑐵𑐫𑐾𑐟 𑐳𑐮𑑄 𑐣𑑂𑐴𑑂𑐫𑐵𑐫𑐾𑐩𑐣𑑂𑐟 𑐢𑐵𑐫𑐾𑐰𑑄 𑐮𑑂𑐴𑐵𑑅 𑐳𑑄𑐎𑐵: ‘𑐠𑐣 𑐰𑐵’ 𑐢𑐵𑐂 𑐰 𑐮𑑂𑐴𑐵:𑐨𑐵𑐫𑑂‌ 𑐏: 𑑋 𑐳𑐸𑐣𑐵𑐣𑑄 𑐢𑐵𑑅𑐐𑐸 𑐏𑑃 ‘𑐏:’ 𑐢𑐎𑐵𑑅 𑐳𑐩𑐬𑑂𑐠𑐣 𑐫𑐵𑐫𑐾𑐟 𑐩𑑂𑐴𑐸𑐟𑐸𑑄 𑐢𑐵𑐫𑐾𑐩𑑂𑐰𑐵𑐫𑐾𑐎 𑐕𑑂𑐫𑐣𑑄 𑐎𑑂𑐰𑐵𑐫𑐾𑐐𑐸 𑐣𑑄 ‘𑐏𑑅’ 𑐴𑐾 𑐢𑐵𑑅𑐐𑐸 𑐏𑑅 𑑋 𑐳𑐸𑐣𑐵𑐣𑑄 𑐢𑐵𑑅𑐐𑐸 𑐏𑑃 ‘𑐩𑐏𑐸’ 𑐢𑐵𑐫𑐾𑐩𑐵𑐮 𑐢𑐵𑑅𑐳𑐵 𑐰𑐵 ‘𑐩𑑂𑐴𑐵𑑄’ 𑐢𑐵𑐫𑐾𑐩𑐵𑐮 𑐢𑐵𑑅𑐳𑐵 𑐖:𑐏𑑅 𑐕𑑂𑐫𑑄 𑐴𑐷𑐎𑐵: 𑐩𑐏𑐸 𑐰𑐵 𑐩𑑂𑐴𑐵𑑄 𑐢𑐫𑐵𑐐𑐸 𑐮𑐶𑐳𑑅 𑐧𑐷 𑑋 𑐠𑑂𑐰 𑐕𑑂𑐫𑑄𑐨𑐵𑐫𑑂‌ 𑐏: 𑑋 𑐏𑑃 𑐮𑑂𑐴𑐵𑐣𑐵𑐔𑑂𑐰𑑄𑐠𑐵𑐫 𑐳𑐸𑑄 𑐕𑐩𑑂𑐴 𑐴𑐣𑐾𑐩𑐵:𑐩𑑂𑐴 𑐩𑐣𑐹 𑐰𑐮 𑐀𑐠𑐰𑐵 𑐰𑐫𑐵𑐠𑐵𑐫𑑂‌ 𑐣𑑂𑐴𑑂𑐫𑑅𑐣𑐾 𑐏𑑃 𑐮𑑂𑐴𑐵𑐫𑐾𑐩𑐖𑑂𑐫𑐹𑐩𑑂𑐴 𑐩𑐣𑐹 𑐰𑐮𑐢𑐵:𑐳𑐵 𑐏𑑃 𑐮𑑂𑐴𑐵𑐣𑐵𑐔𑑂𑐰𑑄𑐩𑑂𑐴 𑐩𑐣𑐹𑐫𑐵𑐟 𑐮𑑂𑐴𑐵𑐟𑑄 𑐠𑐶𑐫𑐵: 𑐏𑑃 𑐮𑑂𑐴𑐵𑐫𑐾𑐩𑐟𑐾 𑐢𑐫𑐵𑐐𑐸 𑐂𑐱𑐵𑐬𑐵 𑐫𑐵𑐂 𑑋 𑐀𑐠𑐾 𑐴𑐾 𑐴𑐵𑐮𑐾𑐩𑐟𑐾 𑐢𑐎𑐵𑑅 𑐂𑐱𑐵𑐬𑐵 𑐫𑐵𑐫𑐾𑐩𑐵𑐮 𑐢𑐵𑑅𑐳𑐵 𑐩𑑂𑐴𑐸𑐟𑐸𑐂 𑐔𑑂𑐰𑐮𑐵𑐥𑐔𑐶𑐣𑑄 𑐠𑐶𑐫𑐵: ‘𑐴𑐵𑐮𑐾𑐩𑐟𑐾’ 𑐢𑐫𑐵𑐐𑐸 𑐂𑐱𑐵𑐬𑐵 𑐫𑐵𑐂 𑑋 𑐠𑑂𑐰 𑐮𑑂𑐴𑐵𑑅𑐨𑐵𑐫𑑂‌ 𑐏: 𑑋 𑐠𑐸𑐮𑐶 𑐖𑐎 𑐩𑐏𑐸 𑐕𑐩𑑂𑐴 𑐔𑐶𑐟𑑂𑐬𑐎𑐵𑐬𑑄 𑐔𑐶𑐟𑑂𑐬 𑐔𑑂𑐰𑐫𑐵𑑅 𑐎𑑂𑐫𑐣𑐷𑐐𑐸 𑐔𑐶𑐟𑑂𑐬 𑐣𑑄 𑐨𑐵𑐲𑐵 𑐴𑐾 𑐏: 𑑋 𑐰𑐫𑐎𑐮𑑄 𑐣𑑄 𑐠:𑐐𑐸 𑐨𑐵𑐰 𑐰𑐵 𑐰𑐶𑐔𑐵𑐬 𑐎𑐣𑐾𑐟 𑐴𑐾 𑐔𑐶𑐟𑑂𑐬 𑐔𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐠𑑂𑐰 𑐔𑐶𑐟𑑂𑐬𑐨𑐵𑐲𑐵 𑐏: 𑑋 𑐕𑐥𑐵: 𑐔𑐶𑐟𑑂𑐬-𑐨𑐵𑐲𑐵𑑄 𑐣𑑄 𑐫𑐎𑑂𑐰 𑐫𑐎𑑂𑐰 𑐏𑑃 𑐎𑐣𑐾𑐦𑐸 𑑋 𑐀𑐠𑐾 𑐴𑐾 𑐕𑐩𑑂𑐴 𑐥𑑂𑐫𑐵𑐏𑑄 𑐴𑐸𑐂𑐩𑑂𑐴 𑐎𑐮𑐵𑐎𑐵𑐬 𑐰𑐵 𑐕𑐩𑑂𑐴 𑐀𑐨𑐶𑐣𑐫 𑐫𑐵𑐂𑐩𑑂𑐴 𑐎𑐮𑐵𑐎𑐵𑐬𑑄 𑐀𑐰𑑂𑐫𑐎𑑂𑐟 𑐨𑐵𑐲𑐵 𑐀𑐣𑐾𑐎 𑐏𑑄 𑐎𑐣𑐵𑐔𑑂𑐰𑐣𑐷 𑑋

𑐨𑐵𑐲𑐵 𑐢𑐵𑐫𑐾𑐰𑐮𑐫𑑂 𑐩𑐣𑐹𑐟𑐫𑑂‌ 𑐖𑐎 𑐩𑐏𑐸 𑐥𑐱𑐸𑐥𑑄𑐎𑑂𑐲𑐷𑐟𑐫𑑂‌ 𑐣𑑄 𑐨𑐵𑐲𑐵 𑐡𑐂 𑑋 𑐂𑐥𑐶𑑄 𑐰𑐶𑐨𑐶𑐣𑑂𑐣 𑐥𑐬𑐶𑐳𑑂𑐠𑐶𑐟𑐶𑐂 𑐰𑐶𑐨𑐶𑐣𑑂𑐣 𑐳𑑅 𑐥𑐶𑐎𑐫𑐵: 𑐰𑐶𑐨𑐶𑐣𑑂𑐣 𑐎𑐠𑑄 𑐴𑐵𑐮𑐷 𑑋 𑐱𑐟𑑂𑐬𑐸 𑐰𑐵 𑐠𑑅𑐟 𑐩𑐫𑑅𑐩𑑂𑐴 𑐥𑑂𑐬𑐵𑐞𑐷 𑐰𑐮 𑐢𑐵𑐫𑐾𑐰𑑄 𑐕𑐐𑐹𑐎𑐠𑑄𑐫𑐵 𑐳𑑅 𑐥𑐶𑐎𑐫𑐵: 𑐴𑐵𑐮𑐷 𑐳𑐵 𑐣𑐫𑐾 𑐥𑐶𑐟𑑂𑐫𑐵𑐟 𑐢𑐵𑐫𑐾𑐰𑑄 𑐰𑐵 𑐠:𑐟 𑐳𑑂𑐫𑐵𑐟 𑐰𑐵 𑐡𑐸𑑅𑐏 𑐖𑐸𑐮 𑐢𑐵𑐫𑐾𑐰𑑄 𑐩𑐾𑐎𑐠𑑄 𑐴𑐵𑐮𑐷 𑑋 𑐠𑑂𑐰 𑐄𑐩𑑂𑐴 𑐥𑑂𑐬𑐵𑐞𑐷𑐫𑐵 𑐨𑐵𑐲𑐵 𑐏: 𑑋 𑐰𑑂𑐫𑐵𑐥𑐎 𑐬𑐹𑐥𑐫𑑂‌ 𑐢𑐵𑐫𑐾𑐧𑐮𑐫𑑂‌ 𑐠𑑂𑐰 𑐣𑑄 𑐨𑐵𑐲𑐵 𑐴𑐾 𑐏: 𑑋 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑑂‌ 𑐨𑐵𑐲𑐵 𑐢𑐵𑐫𑐾𑐧𑐮𑐫𑑂‌ 𑐠𑑂𑐰 𑐡𑐎𑑂𑐰 𑐨𑐵𑐲𑐵𑐫𑐵𑐟 𑐩𑐎𑐵𑐳𑐾𑑄 𑐩𑐵𑐣𑐰𑐨𑐵𑐲𑐵𑐫𑑂‌ 𑐖𑐎 𑐳𑐷𑐩𑐶𑐟 𑐖𑐸𑐂 𑑋 𑐩𑐵𑐣𑐰𑐨𑐵𑐲𑐵 𑐢𑐵𑐫𑐾𑐧𑐮𑐫𑑂‌ 𑐩𑐣𑐹𑐫𑐵 𑐩𑑂𑐴𑐸𑐟𑐸𑑄 𑐥𑐶𑐖𑑂𑐰:𑐐𑐸 𑐴𑐾 𑐖𑐸𑐂𑐩𑐵𑑅, 𑐩𑐾𑐩𑐾𑐐𑐸 𑐀𑑄𑐐 𑐥𑐶𑐖𑑂𑐰𑑅𑐐𑐸 𑐎𑐵𑐂𑐩𑐏𑐸 𑑋 𑐐𑐠𑐾 𑐎𑐶 𑐮𑑂𑐴𑐵𑐟𑑄 𑐡𑐵𑐫𑐵: 𑐥𑐶𑐖𑑂𑐰𑑅𑐐𑐸 𑐰𑐵 𑐮𑐵𑐥𑐵 𑐠𑐵𑐣𑐵: 𑐥𑐶𑐖𑑂𑐰𑑅𑐐𑐸 𑐳: 𑐀𑐠𑐰𑐵 𑐥𑐔𑐶𑑄 𑐣𑑂𑐫𑐵𑐫𑐾𑐎𑐵𑑅 𑐰𑑅𑐐𑐸, 𑐀𑐗 𑐩𑐣𑐹𑐫𑐵 𑐩𑑂𑐴𑐸𑐟𑐸𑑄 𑐴𑐾 𑐥𑐶𑐖𑑂𑐰𑑅𑐐𑐸 𑐴𑐵𑐕𑐶𑐎𑐵: 𑐟𑑅𑐐𑐸 𑐰𑐵 𑐰𑐵𑐎𑑂𑐎𑐵: 𑐟𑑅𑐐𑐸, 𑐳𑐸𑐮𑐶 𑐥𑐹𑐐𑐸 𑐢𑑂𑐰𑐣𑐶 𑐩𑐵𑐣𑐰𑐨𑐵𑐲𑐵𑐫𑐵 𑐬𑐹𑐥𑐫𑑂‌ 𑐎𑐵𑐂𑐩𑐏𑐸 𑑋 𑐨𑐵𑐲𑐵 𑐢𑐵𑐫𑐾𑐧𑐮𑐫𑑂‌ 𑐩𑐣𑐹𑐫𑐵 𑐩𑑂𑐴𑐸𑐟𑐸𑑄 𑐴𑐾 𑐥𑐶𑐖𑑂𑐰𑑅𑐐𑐸 𑐀𑐬𑑂𑐠𑐫𑐸𑐎𑑂𑐟𑐐𑐸 𑐢𑑂𑐰𑐣𑐶 𑐴𑐾 𑐖𑐸𑐂𑐩𑐵: 𑑋 𑐄𑐩𑑂𑐴 𑐩𑐣𑐹𑐫𑐵 𑐩𑑂𑐴𑐸𑐟𑐸 𑐥𑐶𑐖𑑂𑐰𑑅𑐐𑐸 𑐥𑑂𑐬𑐟𑑂𑐫𑐾𑐎 𑐢𑑂𑐰𑐣𑐶𑐫𑐵𑐟 𑐎𑐸𑐔𑐵 𑐎𑐸𑐔𑐵 𑐫𑐵𑐣𑐵: 𑐀𑐢𑑂𑐫𑐫𑐣 𑐫𑐵𑐫𑐾𑐖𑑂𑐫𑐹𑐐𑐸 𑐖𑐸𑐂𑐩𑐵: 𑑋 𑐰𑑄 𑐣𑑂𑐰𑐰𑐵𑑅𑐐𑐸 𑐥𑑂𑐬𑐟𑑂𑐫𑐾𑐎 𑐱𑐧𑑂𑐡𑐫𑑂‌ 𑐀𑐬𑑂𑐠 𑐡𑐫𑐾𑐩𑐵: 𑑋 𑐰𑑄 𑐣𑑂𑐰𑐰𑐵𑑅𑐐𑐸 𑐥𑑂𑐬𑐟𑑂𑐫𑐾𑐎 𑐏𑑃𑐥𑐸𑐂 𑐕𑐸𑑄 𑐰𑐶𑐔𑐵𑐬 𑐰𑐵 𑐨𑐵𑐰 𑐰𑐵 𑐑𑐚𑐣𑐵 𑐰𑐵 𑐳𑐣𑑂𑐡𑐾𑐱 𑐰𑐵 𑐳𑐸𑐔𑑄 𑐰𑐵 𑐕𑐸𑑄 𑐣 𑐕𑐸𑑄 𑐢𑐵𑐫𑐾𑐟𑑂𑐫𑑄𑐐𑐸 𑐏𑑃 𑐡𑐫𑐾𑐩𑐵: 𑑋 𑐑𑐞𑑂𑐚𑐵𑐿𑑄 𑐑𑐞𑑂𑐚𑐵 𑐣𑑂𑐰𑐰𑐵𑐣𑐵: 𑐣𑑄 𑐢𑐵𑐫𑐾𑐟𑑂𑐫𑑄𑐐𑐸 𑐏𑑃 𑐩𑐣𑑂𑐟 𑐢𑐵𑐫𑐾𑐰𑑄 𑐄𑐐𑐸 𑐣𑑂𑐰𑐔𑐸 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐡𑐺𑐲𑑂𑐚𑐶 𑐀𑐢𑑂𑐫𑐫𑐣 𑐫𑐵𑐫𑐾 𑐫𑑀𑐐𑑂𑐫 𑐩𑐖𑐸𑐂𑐫𑑅 𑑋 𑐄𑐎𑐶𑑄 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐡𑐺𑐲𑑂𑐚𑐶 𑐢𑑂𑐰𑐣𑐶, 𑐰𑐬𑑂𑐞, 𑐱𑐧𑑂𑐡, 𑐀𑐬𑑂𑐠, 𑐰𑐵𑐎𑑂𑐫 𑐐𑐛𑐣𑐫𑐵 𑐮𑑂𑐫𑐵𑐏𑑄 𑐣𑑄 𑐀𑐢𑑂𑐫𑐫𑐣 𑐫𑑀𑐐𑑂𑐫 𑐖𑐸𑐂𑐩𑐵: 𑑋 𑐨𑐵𑐲𑐵 𑐢𑐵𑐫𑐾𑐧𑐮𑐫𑑂‌ 𑐎𑐩𑐳𑐾𑐎𑐩 𑐕𑐩𑑂𑐴 𑐩𑐣𑐸𑐏𑑄 𑐖𑐎 𑐳𑐵𑑄 𑐠𑐹𑐐𑐸 𑐖𑐸𑐂𑐩𑐵: 𑑋 𑐳𑐸 𑐕𑐩𑑂𑐴 𑐳𑐵𑐩𑐵𑐣𑑂𑐫 𑐣𑐶𑐬𑐎𑑂𑐲𑐬 𑐣𑐾𑐥𑐵𑐮𑐷 𑐩𑐣𑐹𑐫𑐵 𑐣𑑂𑐴𑑂𑐫:𑐣𑐾 𑐩𑐾𑐩𑑂𑐴 𑐕𑐩𑑂𑐴 𑐩𑐣𑐸𑐏𑑄 𑐴𑐶𑐧𑑂𑐬𑐸 𑐨𑐵𑐲𑐵𑑄 𑐣𑑂𑐰𑐰𑐵𑐟 𑐢𑐵𑑅𑐳𑐵 𑐱𑐵𑐫𑐡 𑐰𑑄 𑐰 𑐕𑐸 𑐨𑐵𑐲𑐵𑑄 𑐣𑑂𑐰𑐰𑐵:𑐐𑐸 𑐢𑐎𑐵: 𑐀𑐣𑑂𑐡𑐵𑐖 𑐫𑐵𑐫𑐾𑐐𑐸 𑐮𑐵 𑐕𑐸 𑐰𑐫𑐵𑐐𑐸 𑐣𑐶𑐟𑐶 𑐨𑐵𑐲𑐵 𑐴𑐾 𑐩𑐏𑐫𑐾𑐦𑐹 𑑋 𑐄𑐎𑐶𑑄 𑐨𑐵𑐲𑐵 𑐖𑐸𑐂𑐟 𑐕𑐸𑑄 𑐕𑐐𑐹 𑐨𑐵𑐲𑐶𑐎 𑐳𑐩𑐹𑐴 𑐣𑑄 𑐳𑑂𑐰𑐷𑐎𑐵𑐬 𑐫𑐵𑑅𑐐𑐸 𑐖𑐸𑐂𑐩𑐵: 𑑋 𑐨𑐵𑐲𑐵 𑐖𑐸𑐂𑐟 𑐡𑑀𑐳𑑂𑐬𑐵𑐾 𑐰𑑂𑐫𑐎𑑂𑐟𑐶𑐫𑐵 𑐣𑑂𑐴𑐵𑐫𑐾𑐥𑐣𑑄 𑐣𑑂𑐫𑐣𑐵: 𑐣𑐵𑐮𑐵𑐎𑐵𑐫𑐾𑐦𑐸𑐐𑐸 𑐴𑐾 𑐖𑐸𑐂𑐩𑐵: 𑑋 𑐏𑐟𑐸 𑐔𑑂𑐰𑐫𑑂‌ 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐰𑐶𑐨𑐶𑐣𑑂𑐣 𑐨𑐵𑐲𑐵𑐫𑐵 𑐐𑑂𑐬𑐴𑐞 𑐩𑐣𑐸𑐏𑑄 𑐰𑐶𑐨𑐶𑐣𑑂𑐣 𑐩𑐵𑐣𑐰-𑐀𑑄𑐐𑑄 𑐠𑐸𑐂𑐎𑐵 𑐎𑐵𑐫𑐾𑐦𑐸 𑑋 𑐢𑐵𑐫𑐾 𑐎𑐶 𑐮𑑂𑐴𑐵𑑅𑐨𑐵𑐫𑑂‌, 𑐕𑑂𑐫𑑄𑐨𑐵𑐫, 𑐩𑐶𑐏𑐵𑐨𑐵𑐫𑑂‌ 𑐂𑐟𑑂𑐫𑐵𑐡𑐶 𑐩𑐶𑐏𑐵𑑄 𑐳𑑂𑐰𑐫𑐵: 𑐣𑐵𑐮𑐵𑐎𑐵𑐂 𑑋 𑐮𑑂𑐴𑐵𑐟𑑄 𑐠𑐶𑐫𑐵: 𑐰𑐵 𑐔𑐸𑐮𑑂𑐫𑐵𑑄 𑐑𑑂𑐰𑐵𑐣𑐵𑑅 𑐫𑐵𑐂𑐐𑐸 𑐂𑐱𑐵𑐬𑐵 𑐳𑑂𑐥𑐬𑑂𑐱𑑄 𑐳𑐷𑐎𑐵𑐎𑐵𑐂, 𑐀𑐮𑐾 𑐳𑐸𑐣𑐵𑐣𑑄 𑐮𑑂𑐴𑐵:𑐐𑐸 𑐰𑐵 𑐢𑐵𑑅𑐐𑐸 𑐏𑑃 𑐣𑑂𑐴𑐵𑐫𑐹𑐥𑐣𑑄 𑐣𑑂𑐫𑐣𑐵𑑅 𑐳𑐷𑐎𑐵𑐎𑐵𑐂 𑑋 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑑂‌ 𑐨𑐵𑐲𑐵 𑐢𑐵𑐫𑐾𑐧𑐮𑐫𑑂‌ 𑐣𑑂𑐴𑐵𑐫𑑂‌𑐥𑐣𑑄 𑐣𑑂𑐫𑐣𑐵: 𑐳𑐷𑐎𑐵𑐎𑐵𑐂𑐐𑐸 𑐢𑑂𑐰𑐣𑐶𑐫𑐵 𑐨𑐵𑐲𑐵 𑐖𑐸𑐂 𑑋

𑑑.𑑒 𑐨𑐵𑐲𑐵𑐫𑐵 𑐥𑐬𑐶𑐨𑐵𑐲𑐵

𑐨𑐵𑐲𑐵 𑐕𑐸 𑐏𑑅 𑐢𑐎𑐵𑑅 𑐰𑐶𑐨𑐶𑐣𑑂𑐣 𑐨𑐵𑐲𑐵𑐰𑐿𑐖𑑂𑐘𑐵𑐣𑐶𑐎𑐟𑐳𑐾𑑄 𑐰𑐶𑐨𑐶𑐣𑑂𑐣 𑐥𑐬𑐶𑐨𑐵𑐲𑐵 𑐧𑐶𑐫𑐵𑐡𑐷𑐐𑐸 𑐡𑐸 𑑋 𑐀𑐠𑐾 𑐣𑑄 𑐠𑐣 𑐄𑐎𑐶𑐫𑐵 𑐕𑐸𑑄 𑐥𑐬𑐶𑐨𑐵𑐲𑐵 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐨𑐵𑐲𑐵𑐰𑐿𑐖𑑂𑐘𑐵𑐣𑐶𑐎 𑐨𑑀𑐮𑐵𑐣𑐵𑐠 𑐟𑐶𑐰𑐵𑐬𑐷 (𑑒𑑐𑑐𑑐 : 𑑑) 𑐎𑐠𑑄 ‘𑐨𑐵𑐲𑐵 𑐰𑐴 𑐳𑐵𑐢𑐣 𑐴𑐿 𑐖𑐶𑐫𑐎𑐾 𑐩𑐵𑐢𑑂𑐫𑐩 𑐳𑐾 𑐴𑐩 𑐳𑐵𑐾𑐔𑐟𑐾 𑐴𑐿 𑐟𑐠𑐵 𑐀𑐥𑐣𑐾 𑐰𑐶𑐔𑐵𑐬𑑀𑑄 𑐎𑑀 𑐰𑑂𑐫𑐎𑑂𑐟 𑐎𑐬𑐟𑐾 𑐴𑐿 𑑋’

𑐠𑐸𑐐𑐸 𑐥𑐬𑐶𑐨𑐵𑐲𑐵 𑐳𑑂𑐰𑐫𑐾𑐧𑐮𑐫𑑂‌ 𑐨𑐵𑐲𑐵 𑐢𑐫𑐵𑐐𑐸 𑐕𑐟𑐵 𑐩𑐵𑐢𑑂𑐫𑐩 𑐏: 𑑋 𑐀𑐮𑐾 𑐨𑐵𑐲𑐵 𑐕𑐩𑑂𑐴𑐾𑐳𑑂𑐫𑐵𑑄 𑐣𑑂𑐰𑐰𑐵𑐂, 𑐩𑐾𑐩𑑂𑐴𑐾𑐳𑑂𑐫𑐵𑑄 𑐣𑑂𑐫𑐣𑐷 𑑋 𑐀𑐠𑐾 𑐳𑐵𑑄 𑐣𑑄 𑐰 𑐨𑐵𑐲𑐵 𑐩𑐖𑐸𑐂𑐦𑐸, 𑐎𑐵𑐬𑐞 𑐣𑑂𑐰𑑄 𑐖𑐎 𑐰𑐵𑐫𑐾𑐟 𑐮𑐵 𑐥𑐱𑐸𑐥𑑄𑐎𑑂𑐲𑐷 𑐰 𑐮𑐵𑐟𑐵𑐩𑑂𑐴 𑐩𑐣𑐸𑐏𑑄 𑐣𑑄 𑐣𑑂𑐰𑐰𑐵𑐫𑐾𑐦𑐸, 𑐟𑐬 𑐄𑐎𑐷 𑐧𑑀𑐮𑐷 𑐳𑑂𑐥𑐲𑑂𑐚 𑐖𑐸𑐂𑐩𑐏𑐸, 𑐣𑑂𑐫𑐣𑐷𑐩𑑂𑐴𑐳𑐾𑑄 𑐣𑑂𑐫𑐣𑐵: 𑐠𑐸𑐂𑐎𑐾 𑐠𑐵𑐎𑐸𑐂𑐦𑐸 𑑋 𑐣𑑂𑐰𑑄𑐰𑐵𑑅𑐐𑐸 𑐄𑐐𑐸 𑐧𑑀𑐮𑐷𑐂 𑐰𑐶𑐔𑐵𑐬 𑐰𑐵 𑐨𑐵𑐰 𑐣𑑄 𑐡𑐫𑐾𑐩𑐵𑑅 𑑋

𑐳𑑄𑐳𑑂𑐎𑐺𑐟𑐨𑐵𑐲𑐵𑐫𑑂‌ ‘𑐨𑐵𑐲𑐵 𑐰 𑐏𑑅 𑐐𑐸𑐐𑐸 𑐣𑑂𑐰𑐰𑐵𑐂 𑑋” 𑐠𑐸𑐐𑐸 𑐥𑐬𑐶𑐨𑐵𑐲𑐵 𑐟𑐳𑑂𑐳𑐎𑑄 𑐳𑐬𑐮 𑐰 𑐰𑑂𑐫𑐵𑐥𑐎 𑐖𑐹 𑑋 𑐣𑑂𑐴𑑂𑐫𑐵𑐐𑐸 𑐳𑐵𑑄 𑐳𑐸𑐣𑐵𑐣𑑄 𑐣𑑂𑐰𑐰𑐵𑐫𑐾𑐰𑑄 𑐴𑐾 𑐰 𑐨𑐵𑐲𑐵 𑐖𑐸𑐂, 𑐔𑐵𑐴𑐾 𑐰 𑐩𑐣𑐸𑐏𑑄 𑐣𑑂𑐰𑐰𑐵𑑅𑐐𑐸 𑐰𑐶𑐔𑐵𑐬 𑐰𑐵 𑐨𑐵𑐰 𑐡𑐸𑐐𑐸 𑐨𑐵𑐲𑐵 𑐖𑐸𑐂𑐩𑐵 𑐰𑐵 𑐥𑐱𑐸𑐥𑐎𑑂𑐲𑐷𑑄 𑐣𑑂𑐰𑐰𑐵𑑅𑐐𑐸 𑐧𑑀𑐮𑐷 𑐰𑐵 𑐳: 𑐖𑐎 𑐡𑐸𑐐𑐸 𑐢𑑂𑐰𑐣𑐶 𑐖𑐸𑐂𑐩𑐵 𑑋

A language is a system of arbitrary vocal symbols by means of which asocial group cooperates.(Bloch and trager,1942:5) 𑐠𑐸𑐐𑐸 𑐥𑐬𑐶𑐨𑐵𑐲𑐵𑐎𑐠𑑄 𑐨𑐵𑐲𑐵 𑐕𑐐𑐹 𑐰𑐵𑐎𑑂 𑐥𑑂𑐬𑐟𑐷𑐎𑐫𑐵 𑐰𑑂𑐫𑐰𑐳𑑂𑐠𑐵 𑐏:, 𑐀𑐬𑑂𑐠𑐵𑐟𑑂‌ 𑐰𑐵𑐎𑑂‌ 𑐢𑐫𑐵𑐐𑐸 𑐣𑑂𑐰𑑄𑐰𑐵𑐫𑐾𑐐𑐸 𑐏: 𑑋 𑐣𑑂𑐰𑑄𑐰𑐵𑐫𑐾𑐐𑐸 𑐣𑑄 𑐕𑐟𑐵 𑐰𑑂𑐫𑐰𑐳𑑂𑐠𑐵 𑐡𑐂 𑑋 𑐰𑑂𑐫𑐰𑐳𑑂𑐠𑐶𑐟 𑐩𑐖𑐸𑐂𑐎 𑐣𑑂𑐰𑐰𑐵𑐟 𑐢𑐵𑐫𑐾𑐰𑑄 𑐰 𑐐𑐠𑐾 𑐖𑐸𑐫𑐵𑑅 𑐨𑐵𑐲𑐵 𑐖𑐸𑐂 ? 𑐣𑑂𑐰𑐰𑐵𑐫𑐾𑐧𑐮𑐫𑑂‌ 𑐐𑐸𑐐𑐸 𑐣𑑂𑐰𑐰𑐵𑐣𑐵𑐫𑐵 𑐥𑑂𑐬𑐟𑐷𑐎 𑐖𑐸𑐂 𑐰 𑐨𑐵𑐲𑐵 𑐖𑐸𑐂 𑑋 𑐨𑐵𑐲𑐵 𑐕𑐟𑐵 𑐫𑐵𑐡𑐺𑐔𑑂𑐕𑐶𑐎 𑐣𑑄 𑐖𑐸𑐂 𑐀𑐬𑑂𑐠𑐵𑐟𑑂‌ 𑐕𑐾𑑃 (House) 𑐢𑐵𑐫𑐾𑐧𑐮𑐫𑑂‌ 𑐔𑑂𑐰𑐣𑐾𑐐𑐸 𑐠𑐵𑐫𑑂‌ 𑐴𑐾 𑐢𑐎𑐵𑑅 𑐕𑐵𑐫𑑂‌ 𑐠𑐸𑐂𑐎𑐷 ? 𑐄𑐎𑐶𑐫𑐵 𑐥𑐮𑐶𑐳𑐵 𑐎𑐶𑐟𑐵𑐧 𑐰𑐵 𑐎𑐸𑐳𑐵 𑐕𑐵𑐫𑑂‌ 𑐩𑐠𑐸𑐂𑐎𑐮 ? 𑐠𑐸𑐎𑐶𑐫𑐵 𑐳𑑂𑐥𑐲𑑂𑐚 𑐮𑐶𑐳: 𑐰𑐵 𑐟𑐬𑑂𑐎 𑐕𑐸𑑄 𑐩𑐡𑐸 𑑋 𑐥𑐬𑐩𑑂𑐥𑐬𑐵𑐐𑐟 𑐬𑐹𑐥𑑄 𑐠𑐸𑐂𑐎𑐵𑐰𑐫𑐵𑐔𑑂𑐰𑑄𑐐𑐸 𑐖𑐎 𑐏: 𑑋 𑐀𑐮𑐾 𑐰 𑐨𑐵𑐲𑐵 𑐄𑐐𑐸 𑐳𑐩𑐵𑐖 𑐰𑐶𑐔𑐵𑐬 𑐴𑐶𑐮𑐵𑐧𑐸𑐮𑐵𑐫𑐵 𑐣𑐶𑑄𑐟𑐶𑑄 𑐕𑑂𑐫𑐮𑐵𑐔𑑂𑐰𑑄𑐐𑐸 𑐖𑐸𑐂 𑑋 𑐀𑐠𑐾 𑐴𑐾 𑐩𑐾𑐐𑐸 𑐕𑐐𑐹 𑐥𑐬𑐶𑐨𑐵𑐲𑐵 𑐳𑑂𑐰𑐫𑐾- Language is a purely human non-instinctive method of communicating ideas,emotions and desires by means of a system of voluntarily produced symbols. 𑐠𑑂𑐰 𑐥𑐬𑐶𑐨𑐵𑐲𑐵𑑄 𑐕𑐸 𑐏𑑃 𑐠𑐸𑐂𑐎𑐹 𑐢𑐵𑑅𑐳𑐵 𑐨𑐵𑐲𑐵 𑐕𑐟𑐵 𑐱𑐸𑐡𑑂𑐢 𑐩𑐵𑐣𑐰𑐷𑐫 𑐐𑐟𑐶𑐰𑐶𑐢𑐶 𑐏𑑅 𑑋

𑐀𑐠𑐾 𑐣𑑄 𑐐𑐸𑐧𑑂𑐮𑐾𑑄 𑐐𑐸𑐧𑑂𑐮𑐾𑑄 𑐩𑐵𑐣𑐰𑐾𑐟𑑂𑐟𑐬 𑐥𑑂𑐬𑐵𑐞𑐷 𑐣𑑄 𑐩𑐵𑐣𑐰𑐨𑐵𑐲𑐵 𑐀𑐣𑐸𑐎𑐬𑐞 𑐫𑐵: 𑑋 𑐀𑐠𑐾 𑐳𑐵𑑄 𑐄𑐎𑐶𑐫𑐵𑐟 𑐨𑐵𑐲𑐵 𑐢𑐵𑐂𑐩𑐏𑐸 𑑋 𑐳𑐎𑐮 𑐩𑐣𑐹𑐟𑐳𑐾𑑄 𑐠: 𑐰 𑐠𑑅𑐠𑐾𑑄 𑐖𑑂𑐰𑑅𑐐𑐸 𑐨𑐵𑐲𑐶𑐎 𑐳𑐩𑐹𑐴𑐣𑐵𑐥 𑐨𑐵𑐲𑐶𑐎 𑐀𑐣𑑂𑐟𑐎𑑂𑐬𑐶𑐫𑐵 𑐫𑐵𑐂 𑑋 𑐨𑐵𑐲𑐵 𑐕𑐟𑐵 𑐰𑐶𑐔𑐵𑐬 𑐎𑐵𑐮𑐧𑐶𑐮𑐫𑐵 𑐩𑐵𑐢𑑂𑐫𑐩 𑐰 𑐳𑐵𑐢𑐣 𑐣𑑄 𑐏: 𑑋 𑐨𑐵𑐲𑐵 𑐕𑐟𑐵 𑐫𑐵𑐣𑑂𑐟𑑂𑐬𑐶𑐎 𑐬𑐹𑐥𑑄 𑐰𑐂𑐐𑐸 𑐳𑐵𑐢𑐣 𑐩𑐏𑐸 𑑋 𑐨𑐵𑐲𑐵 𑐳𑐂𑐐𑐸 𑐖𑐣𑑂𑐩𑐖𑐵𑐟 𑐐𑐸𑐞 𑐩𑐏𑐸 𑑋 𑐳𑐸𑑄 𑐕𑐩𑑂𑐴 𑐩𑐔𑐵𑐫𑐵𑐟 𑐰𑐫𑐵𑐐𑐸 𑐄𑐩𑐾𑐬𑐫𑐵 𑐥𑑂𑐫𑐡𑑃 𑐏𑐸𑐡𑑃𑐟𑐎 𑐰𑐵 𑐰𑐳𑐶𑐎𑑄 𑐀𑐥𑑂𑐰: 𑐩𑐵𑐣𑐰- 𑐨𑐵𑐲𑐶𑐎 𑐳𑐩𑐹𑐴𑑄 𑐟𑐵𑐥𑐵𑐎 𑐟𑐫𑐵𑐧𑐶𑐮 𑐢𑐵𑑅𑐳𑐵 𑐰 𑐧𑐶𑐮𑐎𑐸𑐮 𑐕𑐸𑑄 𑐣𑑄 𑐨𑐵𑐲𑐵 𑐳𑐂𑐩𑐏𑐸 𑐟𑐬 𑐳𑐴𑐖 𑐬𑐹𑐥𑑄 𑐰𑐂𑐐𑐸 𑐢𑑂𑐰𑐣𑐶 𑐢𑐵𑑅𑐳𑐵 𑐰𑐂 𑑋 𑐰 𑐢𑑂𑐰𑐣𑐶 𑐨𑐵𑐲𑐵 𑐩𑐏𑐸 𑑋 𑐄𑐎𑐶𑑄 𑐨𑐵𑐲𑐵 𑐰 𑐢𑑂𑐰𑐣𑐶 𑐢𑐫𑐵𑐐𑐸 𑐦𑐬𑐎 𑐦𑐬𑐎 𑐏𑑃 𑐏: 𑑋 𑐢𑑂𑐰𑐣𑐶 𑐥𑐶𑐖𑑂𑐰𑐂𑐐𑐸 𑐳𑐴𑐖 𑐱𑐵𑐬𑐷𑐬𑐶𑐎 𑐐𑐸𑐞 𑐏:, 𑐨𑐵𑐲𑐵 𑐩𑐵𑐣𑐳𑐶𑐎 𑐐𑐸𑐞 𑐏𑑅, 𑐐𑐸𑐐𑐸 𑐰𑑄 𑐄𑐐𑐸 𑐨𑐵𑐲𑐶𑐎 𑐳𑐩𑐹𑐴𑐳 𑐔𑑂𑐰𑐣𑐵𑑅 𑐳𑐫𑐾𑐎𑐷 𑑋 𑐰𑑄 𑐄𑐐𑐸 𑐨𑐵𑐲𑐵 𑐳𑐫𑐾𑐎𑐾𑐟 𑐡𑐶𑐩𑐵𑐐 𑐩𑐵𑑅, 𑐳𑐩𑐹𑐴𑐫𑐵 𑐳𑑄𑐐𑐟 𑐩𑐵:, 𑐀𑐣𑑂𑐟𑐎𑑂𑐬𑐶𑐫𑐵 𑐖𑐸𑐂𑐩𑐵: 𑑋 𑐐𑑂𑐫𑐵𑐂𑐧𑐮𑐫𑑂‌ 𑐰𑐂𑑂𑐐𑐸 𑐳𑐴𑐖 𑐁𑐰𑐵𑐖 𑐰𑐵 𑐏𑐸𑐳𑐶 𑐖𑐸𑐂𑐧𑐮𑐫𑑂‌ 𑐰𑐂𑐐𑐸 𑐁𑐰𑐵𑐖 𑐳𑐴𑐖 𑐐𑐸𑐞 𑐏𑑅 𑑋 𑐰 𑐁𑐰𑐵𑐖 𑐥𑐶𑐎𑐵𑐫𑐾𑐟 𑐳𑐸𑐣𑐵𑐣𑑄 𑐳𑑂𑐫𑐣𑐾𑐩𑑂𑐰𑐵:, 𑐟𑐬 𑐨𑐵𑐲𑐵 𑐳𑐫𑐾𑐎𑐾𑐟 𑐳𑐩𑐵𑐖𑐫𑐵 𑐳𑐸𑑄 𑐳𑐡𑐳𑑂𑐫𑑄 𑐰𑐵 𑐳𑐡𑐳𑑂𑐫𑐟𑐳𑐾𑑄 𑐳𑑂𑐫𑐣𑐾𑐩𑐵: 𑑋 𑐠: 𑐔𑑂𑐰𑐣𑐾𑐐𑐸 𑐠𑐵𑐫𑐾𑐫𑐵𑐟 𑐕𑐾𑑃 𑐢𑐵𑐫𑐾𑐩𑐵: 𑐢𑐫𑐵𑐐𑐸 𑐫𑐵𑐡𑐺𑐔𑑂𑐕𑐶𑐎𑐫𑐵 𑐖𑑂𑐘𑐵𑐣 𑐣𑑄 𑐡𑐫𑐾𑐩𑐵: 𑑋 𑐀𑐮𑐾 𑐰𑑄 𑐨𑐵𑐲𑐵 𑐳𑐫𑐾𑐰𑑄 𑐠𑑅𑐐𑐸 𑐰𑐶𑐔𑐵𑐬, 𑐄𑐟𑑂𑐟𑐾𑐖𑐣𑐵 𑐰𑐵 𑐂𑐔𑑂𑐕𑐵 𑐂𑐟𑑂𑐫𑐵𑐡𑐶 𑐠𑑅 𑐫𑐳𑑂𑐳𑐾𑑄 𑐥𑑂𑐰𑑄𑐎𑐾𑐐𑐸 𑐖𑑂𑐫𑐵 𑐫𑐵𑐫𑐾𑐳𑐂 𑑋 𑐄𑐎𑐶𑑄 𑐨𑐵𑐲𑐵 𑐢𑐫𑐵𑐐𑐸 𑐠𑑅𑐐𑐸 𑐳𑐩𑐹𑐴𑐳 𑐔𑑂𑐰𑐣𑐵𑑅 𑐳𑐫𑐾𑐎𑐷𑐐𑐸 𑐳𑐵𑐢𑐣 𑐣 𑐏: 𑑋

𑑑.𑑓 𑐨𑐵𑐲𑐵𑐫𑐵 𑐰𑐶𑐱𑐾𑐲𑐟𑐵

𑐎) 𑐰𑑂𑐫𑐰𑐳𑑂𑐠𑐶𑐟 𑐳𑐵𑐢𑐣𑐫𑐵 𑐬𑐹𑐥𑐫𑑂‌ 𑐨𑐵𑐲𑐵

𑐨𑐵𑐲𑐵 𑐕𑐟𑐵 𑐠:𑐠𑐩𑑂𑐴𑑄 𑐰𑑂𑐫𑐰𑐳𑑂𑐠𑐶𑐟 𑐳𑐵𑐢𑐣 𑐏: 𑑋 𑐠𑐸𑐎𑐷 𑐢𑑂𑐰𑐣𑐶𑐫𑐵 𑐰𑑂𑐫𑐰𑐳𑑂𑐠𑐵, 𑐰𑐬𑑂𑐞-𑐰𑑂𑐫𑐰𑐳𑑂𑐠𑐵, 𑐬𑐹𑐥-𑐰𑑂𑐫𑐰𑐳𑑂𑐠𑐵, 𑐰𑐵𑐎𑑂𑐫-𑐰𑑂𑐫𑐰𑐳𑑂𑐠𑐵, 𑐀𑐬𑑂𑐠-𑐰𑑂𑐫𑐰𑐳𑑂𑐠𑐵 𑐂𑐟𑑂𑐫𑐵𑐡𑐶 𑐡𑐸 𑑋 𑐢𑑂𑐰𑐣𑐶 𑐰𑑂𑐫𑐰𑐳𑑂𑐠𑐵 𑐠:𑐠:𑐐𑐸 𑐨𑐵𑐲𑐵𑐫𑐵 𑐰𑐶𑐱𑐾𑐲𑐟𑐵 𑐳𑑂𑐰𑐫𑐵𑐰𑐣𑐷 𑑋 𑐣𑐾𑐥𑐵𑐮𑐨𑐵𑐲𑐵𑐫𑑂‌ /𑐳/,/𑐲/,/𑐱/ 𑐢𑑂𑐰𑐣𑐶 𑐩𑐢𑑂𑐫𑐾 /𑐳/ 𑐢𑑂𑐰𑐣𑐶 𑐖𑐎 𑐡𑐸, 𑐩𑐾𑐐𑐸 𑐩𑐡𑐸 𑑋 𑐀𑐠𑐾 𑐴𑐾 /𑐒/, /𑐘/,/𑐞/, /𑐣/, /𑐩/ 𑐩𑐢𑑂𑐫𑐾 /𑐣/, /𑐩/ 𑐰𑑂𑐫𑐵𑐥𑐎 𑐬𑐹𑐥𑑄 𑐡𑐸, 𑐟𑐬 /𑐒/ 𑐐𑐸𑐮𑐶𑑄 𑐨𑐵𑐲𑐶𑐎𑐵𑐫𑑂‌ 𑐡𑐸, 𑐐𑐸𑐮𑐶𑑄 𑐨𑐵𑐲𑐶𑐎𑐵𑐫𑑂‌ 𑐩𑐡𑐸 𑑋 /𑐚/,/𑐛/, /𑐜/, /𑐝/,/𑐟/,/𑐠/,/𑐡/,/𑐢/ 𑐔𑑂𑐫𑐵𑐐𑐮𑐫𑑂 𑐥𑐵𑐫𑐾𑐕𑐶𑐐𑐸 𑐢𑑂𑐰𑐣𑐶 𑐮𑐵 𑐩𑐡𑐸 𑐀𑐠𑐾 𑐣𑑄 /𑐟/,/𑐠/,/𑐡/, /𑐢/ 𑐣𑐵𑐥 𑐮𑐶𑐎𑑂𑐎 𑐮𑐵: 𑐢𑐎𑐵: 𑐕𑑂𑐫𑐮𑐵𑐔𑑂𑐰𑐣 𑑋 𑐩𑐾𑐩𑐾𑐐𑐸 𑐨𑐵𑐲𑐵𑐫𑐵 𑐏𑑃 𑐟𑑂𑐰𑑅𑐟𑐵: 𑐣𑐾𑐰𑐵𑑅𑐟𑐫𑑂‌ 𑐳𑑂𑐰𑐟𑐣𑑂𑐟𑑂𑐬 𑐬𑐹𑐥𑑄 𑐣𑑂𑐰𑐰𑐵𑐂𑐧𑐮𑐫𑑂‌ /𑐬/𑐫𑐵 𑐠𑐵𑐳𑐫𑑂 /𑐮/ 𑐢𑑂𑐰𑐣𑐶 𑐖𑐎 𑐣𑑂𑐰𑐰𑐵𑐂 𑑋 𑐠𑑂𑐰 𑐣𑐾𑐰𑐵𑑅𑐟𑐫𑑂‌𑐐𑐸 𑐠:𑐐𑐸𑐎𑐠𑑄𑐫𑐵 𑐢𑑂𑐰𑐣𑐶-𑐰𑑂𑐫𑐰𑐳𑑂𑐠𑐵 𑐏: 𑑋

𑐐𑐸𑐐𑐸𑑄 𑐨𑐵𑐲𑐵𑐫𑑂‌ 𑐢𑑂𑐰𑐣𑐶 𑐀𑐣𑐸𑐳𑐵𑐬 𑐮𑐶𑐥𑐶 𑐰𑑂𑐫𑐰𑐳𑑂𑐠𑐵 𑐩𑐡𑐫𑐾𑐦𑐸 𑑋 𑐀𑐮𑐾 𑐄𑐐𑐸 𑐂𑐮𑐫𑑂‌ 𑐎𑐶 𑐣𑑂𑐴𑐹𑐐𑐸 𑐮𑐶𑐥𑐶 𑐣𑐶𑐬𑑂𑐩𑐵𑐞 𑐫𑐵𑐫𑐾𑐩𑐵𑐮𑐷 𑐎𑐶 𑐡𑐸𑐡𑐸𑐐𑐸 𑐮𑐶𑐥𑐶𑑄 𑐖𑑂𑐫𑐵 𑐎𑐵𑐫𑐾𑐩𑐵𑐮𑐷 𑑋 𑐢𑐵𑐫𑐾 𑐎𑐶 Nepal 𑐫𑐵𑐟 𑐣𑑂𑐴𑑂𑐫𑐵𑐩𑑂𑐴 𑐣𑐾𑐥𑐵𑐮𑐷 𑐣𑑄 𑐣𑐾-𑐥𑐵-𑐮 𑐫𑐵𑐣𑐵𑑅 𑐖𑑂𑐫𑐵 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐾𑐥𑐶𑐣𑐶𑐐𑐸 𑐏𑑃 𑐟𑑂𑐰:𑐟𑐵: 𑐣𑐾𑐰𑐵:𑐟𑐫𑑂‌𑐐𑐸 𑐄𑐔𑑂𑐔𑐵𑐬𑐞 𑐢𑑂𑐰𑐣𑐶 𑐳𑑂𑐰𑐫𑐾𑐧𑐮𑐫𑑂‌ 𑐣𑐾𑐰𑐵𑑅𑐟𑐳𑐾𑑄 𑐣𑐾- 𑐥𑐵-𑐮 𑐢𑑂𑐰𑐣𑐶 𑐩𑐏𑐸 𑐒𑐾-𑐥𑐵-𑐮 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐴𑐾 𑐣𑑂𑐴𑐵𑐳𑑄 𑐥𑐶𑐴𑐵𑑄𑐰𑐂𑐐𑐸 𑐟𑐵𑐎𑐸𑐐𑐸 𑐰𑐳𑑂𑐟𑐸 /𑐣𑑂𑐴𑐶/ 𑐔𑑂𑐰𑐫𑐵𑐔𑑂𑐰𑐣 𑐟𑐬 𑐄𑐔𑑂𑐔𑐵𑐬𑐞 𑐒𑐶𑑂𑐴 𑐑𑐫𑐵𑐔𑑂𑐰𑐣 𑑋 𑐠𑐸𑐎𑐠𑑄 𑐄𑐔𑑂𑐔𑐵𑐬𑐞 (𑐒𑐶𑑂𑐴) 𑐖𑐹𑐳𑐵𑑄 𑐰𑐬𑑂𑐞 /𑐣𑑂𑐴𑐶/ 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐬𑐹𑐥 𑐰𑑂𑐫𑐰𑐳𑑂𑐠𑐵 𑐣𑑄 𑐠𑑅𑐐𑐸 𑐴𑐾 𑐎𑐠𑑄 𑐡𑐸𑑋 𑐁𑐥𑐵𑑅 𑐫𑐵𑐣𑐵: 𑐣𑐾𑐥𑐵𑐮𑐨𑐵𑐲𑐵𑐫𑐵 𑐏𑑃𑐐𑑂𑐰: 𑐣𑐶𑐬𑑂𑐩𑐵𑐞 𑐳𑑂𑐰𑐟𑐣𑑂𑐟𑑂𑐬 𑐬𑐹𑐥𑑄 𑐳𑐩𑐵𑐳 𑐥𑑂𑐬𑐎𑑂𑐬𑐶𑐫𑐵𑑄 𑐡𑐫𑐾𑐎𑐾𑐐𑐸 𑐔𑐮𑐣 𑐡𑐸 𑑋 𑐰𑑂𑐫𑐵𑐎𑐬𑐞𑐶𑐎 𑐎𑑀𑐚𑐶 𑐠𑐸𑐂𑐎𑐷𑐐𑐸 𑐬𑐹𑐥 𑐖𑐎 𑐧𑐡𑑂𑐢-𑐬𑐹𑐥 𑐫𑐵𑐣𑐵: 𑐡𑐫𑐾𑐎𑐷 𑑋 𑐢𑐵𑐫𑐾 𑐎𑐶 𑐰𑐶𑐨𑐶𑐣𑑂𑐣 𑐢𑐵𑐟𑐸𑐂 -𑐳𑐵 𑐥𑑂𑐬𑐟𑑂𑐫𑐫 𑐟𑐫𑐵: 𑐳𑐵𑐩𑐵𑐣𑑂𑐫 𑐣𑐵𑐩 𑐰𑐵 𑐨𑐵𑐰𑐰𑐵𑐔𑐎 𑐣𑐵𑐩 𑐡𑐫𑐾𑐎𑐷 𑑋 𑐐𑐠𑐾 𑐣 𑐢𑐵𑐟𑐸𑐂 𑐳𑐵 𑐥𑑂𑐬𑐟𑑂𑐫𑐫 𑐟𑐫𑐵: 𑐣𑐳𑐵, 𑐟𑑂𑐰𑑃 𑐢𑐵𑐟𑐸𑐂 𑐳𑐵 𑐟𑐫𑐵: 𑐟𑑂𑐰𑑃𑐳𑐵, 𑐀𑐠𑐾 𑐴𑐾 𑐎𑐸, 𑐮𑐵, 𑐴𑐵, 𑐟𑐶, 𑐔𑑂𑐰 𑐂𑐟𑑂𑐫𑐵𑐡𑐶 𑐢𑐵𑐟𑐸𑐂 𑐳𑐵 𑐥𑑂𑐬𑐟𑑂𑐫𑐫 𑐟𑐫𑐵𑑅 𑐎𑐸𑐳𑐵, 𑐮𑐵𑐳𑐵, 𑐴𑐵𑐳𑐵, 𑐟𑐶𑐳𑐵, 𑐔𑑂𑐰𑐳𑐵 𑐡𑐫𑐾𑐎𑐷 𑐟𑐬 𑐦𑐵, 𑐡𑐵, 𑐳𑑂𑐰, 𑐎𑐶 𑐂𑐟𑑂𑐫𑐵𑐡𑐶𑐂 𑐳𑐵 𑐥𑑂𑐬𑐟𑑂𑐫𑐫 𑐟𑐫𑐵: 𑐦𑐵𑐳𑐵 (𑐏𑐶, 𑐔𑑂𑐰, 𑐣𑑂𑐴𑐶, 𑐏𑐿, 𑐂𑐔𑐵), 𑐡𑐵𑐳𑐵 (𑐎𑐠𑐶, 𑐎𑑀𑐬𑑂𑐡𑐵), 𑐳𑑂𑐰𑐳𑐵 (𑐔𑐳𑑂𑐩𑐵, 𑐡𑐸𑐬𑑂𑐧𑐶𑐣), 𑐎𑐶𑐳𑐵 (𑐕𑐾𑐎𑐧𑐵𑐬) 𑐂𑐟𑑂𑐫𑐵𑐡𑐶 𑐢𑐵𑐫𑐾𑐐𑐸 𑐔𑐮𑐣 𑐩𑐡𑐸 𑑋 𑐠𑑂𑐰 𑐣𑑄 𑐠𑑅𑐐𑐸 𑐨𑐵𑐲𑐵𑐫𑐵 𑐰𑑂𑐫𑐰𑐳𑑂𑐠𑐵 𑐏: 𑑋 𑐰𑐵𑐎𑑂𑐫𑐫𑐵 𑐳𑐰𑐵𑐮𑐫𑑂‌ 𑐣𑐾𑐥𑐵𑐮𑐨𑐵𑐲𑐵𑐫𑑂‌ 𑐣𑑂𑐴𑐵𑐥𑐵𑑄 𑐎𑐬𑑂𑐟𑐵, 𑐎𑐬𑑂𑐩 𑐰 𑐎𑑂𑐬𑐶𑐫𑐵 𑐖𑐸𑐂 𑐳𑐵 𑐀𑑄𑐐𑑂𑐬𑐾𑐖𑐷𑐨𑐵𑐲𑐵𑐫 𑐎𑐬𑑂𑐟𑐵, 𑐎𑑂𑐬𑐶𑐫𑐵 𑐰 𑐎𑐬𑑂𑐩 𑐖𑐸𑐂 𑑋 𑐠𑑂𑐰 𑐣𑑄 𑐠𑑅𑐠:𑐐𑐸 𑐨𑐵𑐲𑐵𑐫𑐵 𑐰𑑂𑐫𑐰𑐳𑑂𑐠𑐵 𑐏𑑅 𑑋

𑐏) 𑐩𑐵𑐣𑐰𑐷𑐫 𑐳𑐵𑐢𑐣𑐫𑐵 𑐬𑐹𑐥𑐫𑑂‌ 𑐨𑐵𑐲𑐵

𑐨𑐵𑐲𑐵 𑐩𑐵𑐣𑐰𑐷𑐫 𑐳𑐵𑐢𑐣 𑐏: 𑑋 𑐩𑐣𑐸𑐏𑑄 𑐖𑐎 𑐨𑐵𑐲𑐵 𑐕𑐫𑐮𑐵𑐧𑐸𑐮𑐵𑐫𑑂‌ 𑐴𑐂, 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐣𑐹 𑐧𑐶𑐳𑑂𑐎 𑐩𑐾𑐥𑐶𑑄 𑐳𑐸𑑄 𑐥𑑂𑐬𑐵𑐞𑐷 𑐨𑐵𑐲𑐵𑐫𑐵 𑐥𑑂𑐬𑐫𑑀𑐐 𑐫𑐵𑐫𑐿𑐩𑐦𑐸 𑑋 𑐠𑐸𑐎𑐶𑐫𑐵 𑐥𑑂𑐬𑐩𑐸𑐏 𑐎𑐵𑐬𑐞 𑐩𑐣𑐹𑐫𑐵𑐎𑐾 𑐫𑐎𑑂𑐰 𑐢𑑂𑐰𑐣𑐶 𑐀𑐰𑐫𑐰 𑐡𑐸 𑑋 𑐳𑑂𑐰𑐬𑐫𑐣𑑂𑐟𑑂𑐬, 𑐩𑐾, 𑐔𑐐𑐿 𑐂𑐟𑑂𑐫𑐵𑐡𑐶 𑐏𑑅 𑑋 𑐠𑐸𑐖𑑂𑐰𑑅𑐐𑐸 𑐀𑐰𑐫𑐰 𑐩𑐾𑐩𑐾𑐥𑐶𑑄 𑐥𑑂𑐬𑐵𑐞𑐷𑐟𑐫𑐹𑐎𑐾 𑐩𑐡𑐸 𑑋 𑐄𑐐𑐸 𑐢𑑂𑐰𑐣𑐶 𑐀𑐰𑐫𑐰𑐫𑐵 𑐐𑐰𑐵𑐴𑐵𑐮𑐶𑑄 𑐴𑐾 𑐩𑐣𑐸𑐏𑑄 𑐀𑐣𑐐𑐶𑐣𑑂𑐟𑐷 𑐢𑑂𑐰𑐣𑐶 𑐄𑐔𑑂𑐔𑐵𑐬𑐞 𑐫𑐵𑐫𑐾𑐦𑐟 𑑋 𑐀𑐮𑐾 𑐡𑐶𑐩𑐵𑐐𑐫𑐵 𑐄𑐔𑐶𑐟 𑐥𑑂𑐬𑐫𑑀𑐐 𑐫𑐵𑐫𑐾𑐦𑐸𑐐𑐸 𑐎𑐵𑐬𑐞𑑄 𑐀𑐣𑐾𑐎 𑐏𑑃𑐐𑑂𑐰:, 𑐰𑐵𑐎𑑂𑐫 𑐕𑑂𑐫𑐮𑐾𑐦𑐟 𑑋 𑐄𑐎𑐶𑑄 𑐩𑐣𑐸𑐏𑑄 𑐠𑐩𑑂𑐴𑑄 𑐐𑐸𑐧𑑂𑐮𑐾𑑄 𑐩𑐣𑑂𑐫𑐣𑐵𑐐𑐸 𑐰𑐵 𑐠𑑅𑐩𑑂𑐴𑐾𑐳𑑂𑐫𑐵𑑄 𑐐𑐸𑐧𑑂𑐮𑐾𑑄 𑐣𑑂𑐰𑐩𑐰𑐵𑐣𑐵𑐐𑐸 𑐏𑑃𑐥𑐸 𑐣𑑄 𑐣𑑂𑐰𑐰𑐵𑐫𑐾𑐦𑐸 𑑋 𑐠𑑂𑐰 𑐩𑐣𑐹𑐫𑐵 𑐎𑑂𑐲𑐩𑐟𑐵𑐫𑐵 𑐰𑐶𑐲𑐫 𑐏: 𑑋 𑐄𑐎𑐶𑑄 𑐮𑐵 𑐢𑑂𑐰𑐣𑐶 𑐀𑐰𑐫𑐰 𑐥𑐹𑐬𑑂𑐞𑐬𑐹𑐥𑑄 𑐳𑐎𑑂𑐬𑐶𑐫 𑐫𑐵𑐫𑐾𑐩𑐦𑐸𑐥𑐶𑑄 𑐰 𑐡𑐶𑐩𑐵𑐐 𑐳𑐎𑑂𑐬𑐶𑐫 𑐫𑐵𑐫𑐾𑐩𑐦𑐸𑐥𑐶𑑄 𑐩𑐣𑐹𑐟 𑐐𑑂𑐰𑐵𑐖𑑂𑐫: 𑐰 𑐥𑐹𑐬𑑂𑐞𑐬𑐹𑐥𑑄 𑐢𑑂𑐰𑐣𑐶 𑐀𑐰𑐫𑐰 𑐣𑐶𑐲𑑂𑐎𑑂𑐬𑐶𑐫 𑐖𑐹𑐥𑐶𑑄 𑐩𑐣𑐹𑐟 𑐡𑐶𑐩𑐵𑐐 𑐡𑐸𑐳𑐵𑑄 𑐮𑐵𑐟𑐵 𑐰𑐵 𑐥𑐵𑐎: 𑐢𑐵𑐮 𑑋 𑐡𑐶𑐩𑐵𑐐 𑐡𑐫𑐵: 𑐣𑑄 𑐢𑑂𑐰𑐣𑐶 𑐀𑐰𑐫𑐰 𑐳𑐎𑑂𑐬𑐶𑐫 𑐫𑐵𑐫𑐾𑐩𑐦𑐸𑐥𑐶𑑄 𑐩𑐣𑐹𑐟𑐳𑐾𑑃 𑐠𑐶𑐎-𑐠𑐶𑐎 𑐮𑑂𑐴𑐵𑑅𑐨𑐵𑐫𑑂‌, 𑐕𑑂𑐫𑑄𑐨𑐵𑐫𑑂‌ 𑐫𑐵𑐫𑐾𑐳:𑐳𑐵𑑄 𑐩𑑂𑐴𑐸𑐟𑐸𑑄 𑐳𑑂𑐥𑐲𑑂𑐚 𑐧𑑀𑐮𑐶 𑐥𑐶𑐎𑐵𑐫𑐾𑐩𑐦𑐸 𑑋 𑐰𑐫𑐵𑐣𑐶𑐟𑐶𑑄 𑐰 𑐨𑐵𑐲𑐵 𑐰𑐫𑐵𑐐𑐸 𑐳𑑄𑐔𑐵𑐬𑐫𑐵 𑐩𑐵𑐢𑑂𑐫𑐩 𑐖𑐸𑐂𑐩𑐦𑐸𑐟 𑑋 𑐩𑐾𑐏𑐾 𑐳𑐎𑑂𑐬𑐶𑐫 𑐢𑑂𑐰𑐣𑐶 𑐀𑐰𑐫𑐰 𑐡𑐫𑐵: 𑐣𑑄 𑐳𑐎𑑂𑐬𑐶𑐫 𑐡𑐶𑐩𑐵𑐐 𑐩𑐡𑐸𑐥𑐶𑐣𑐶 𑐣𑐶𑑄𑐟𑐶𑑄 𑐨𑐵𑐲𑐵 𑐡𑐫𑐵: 𑐣𑑄 𑐰 𑐨𑐵𑐲𑐵 𑐳𑐎𑑂𑐬𑐶𑐫 𑐖𑐸𑐂𑐩𑐏𑐸 𑑋 𑐰𑑄 𑐨𑐵𑐲𑐵 𑐩𑑂𑐴𑑀 𑐖𑐎 𑐕𑑂𑐫𑐮𑐷 𑑋

𑐄𑐎𑐶𑑄 𑐰𑐫𑐵 𑐣𑐶𑑄𑐟𑐶𑑄 𑐨𑐵𑐲𑐵 𑐩𑐵𑐣𑐰𑐷𑐫 𑐳𑐵𑐢𑐣 𑐏𑑅𑐳𑐵𑑄 𑐰𑐫𑐵 𑐣𑐶𑑄𑐟𑐶𑑄 𑐄𑐮𑐶 𑐕𑑂𑐫𑐮𑐾𑐩𑑂𑐰𑐵𑑅𑐐𑐸 𑐳𑐵𑐢𑐣 𑐖𑐸𑐫𑐵𑐧𑐷 𑑋 𑐣𑑂𑐴𑑂𑐫𑐵𑐐𑐸 𑐠𑐖𑐸 𑐳𑐎𑑂𑐬𑐶𑐫 𑐢𑑂𑐰𑐣𑐶 𑐀𑐰𑐫𑐰 𑐰 𑐳𑐎𑑂𑐬𑐶𑐫 𑐡𑐶𑐩𑐵𑐐 𑐩𑐡𑐸𑐥𑐶𑐣𑐶 𑐣𑐶𑑄𑐟𑐶𑑄 𑐨𑐵𑐲𑐵 𑐄𑐮𑐶 𑐫𑐎𑑂𑐰 𑐕𑑂𑐫𑐮𑐾𑐩𑑂𑐰𑐵𑑅𑐐𑐸 𑐳𑐵𑐢𑐣 𑐖𑐹𑐳𑐵 𑐳𑐵𑐩𑐵𑐣𑑂𑐫 𑐣𑐵𑐐𑐬𑐶𑐎 𑐰 𑐀𑐥𑑂𑐰: 𑐣𑑂𑐰𑑄𑐰𑐵𑐫𑐾𑐩𑐵𑑅𑐐𑐸 𑐥𑐾𑐱𑐵 𑐫𑐵𑐂𑐥𑐶𑐣𑐶 𑐐𑐠𑐾 𑐰𑐎𑐶𑐮, 𑐱𑐶𑐎𑑂𑐲𑐎, 𑐣𑐾𑐟𑐵𑐟𑐫𑑂‌ 𑐣𑐶𑐟𑐶 𑐨𑐵𑐲𑐵 𑐕𑐟𑐵 𑐀𑐟𑐶 𑐁𑐰𑐱𑑂𑐫𑐎 𑐳𑐵𑐢𑐣 𑐏:𑑋 𑐳𑐵𑐩𑐵𑐣𑑂𑐫𑐎𑐠𑑄 𑐢𑐵𑐫𑐾𑐧𑐮𑐫𑑂‌ 𑐨𑐵𑐲𑐵 𑐕𑐟𑐵 𑐩𑐵𑐣𑐰𑐷𑐫 𑐰𑐶𑐔𑐵𑐬, 𑐨𑐵𑐰, 𑐑𑐚𑐣𑐵, 𑐳𑐵𑐩𑐵𑐣𑑂𑐫 𑐰𑐬𑑂𑐞𑐣 𑐫𑐵𑐫𑐾𑐐𑐸 𑐣𑐶𑐟𑐶 𑐩𑐡𑐫𑐾𑐎 𑐩𑐐𑐵:𑐐𑐸 𑐩𑐵𑐣𑐰𑐷𑐫 𑐳𑐵𑐢𑐣 𑐏: 𑑋

𑐐) 𑐳𑐵𑐩𑐵𑐖𑐶𑐎 𑐳𑐵𑐢𑐣𑐫𑐵 𑐬𑐹𑐥𑐫𑑂‌ 𑐨𑐵𑐲𑐵

𑐳𑐩𑐵𑐖𑐫𑑂‌ 𑐳𑐩𑐹𑐴𑐫𑐵 𑐰𑐶𑐨𑐵𑐖𑐣 𑐰𑐶𑐨𑐶𑐣𑑂𑐟𑐎𑐠𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐬𑐵𑐖𑐣𑐷𑐟𑐶𑐎 𑐰𑐶𑐨𑐵𑐖𑐣𑐎𑐠𑑄 𑐣𑐾𑐥𑐵:𑐫𑐵 𑐣𑐾𑐥𑐵𑐮𑐷𑐟 𑐡𑐎𑑂𑐰 𑐣𑐾𑐥𑐵𑐮𑐷 𑐳𑐩𑐵𑐖, 𑐨𑐵𑐬𑐟𑐫𑑂‌ 𑐔𑑂𑐰𑑄𑐥𑐶𑑄 𑐨𑐵𑐬𑐟𑐷𑐫 𑐣𑐵𑐐𑐬𑐶𑐎 𑐳𑐩𑐵𑐖 𑑋 𑐠𑐸𑐎𑐠𑑄 𑐳𑑄𑐳𑐵𑐬𑐫𑐵 𑐥𑑂𑐬𑐟𑑂𑐫𑐾𑐎 𑐡𑐾𑐫𑑂‌𑐫𑐵 𑐣𑐵𑐐𑐬𑐶𑐎𑐟 𑐄𑐐𑐸 𑐡𑐾𑐫𑐫𑐵 𑐣𑐵𑐩𑑄 𑐄𑐐𑐸 𑐳𑐩𑐵𑐖 𑐢𑐵𑐫𑐾𑐖𑑂𑐫𑐹 𑑋 𑐀𑐮𑐾 𑐕𑐐𑐹 𑐴𑐾 𑐡𑐾𑐱𑐫𑑂‌ 𑐣𑑄 𑐡𑐎𑑂𑐰 𑐣𑐵𑐐𑐬𑐶𑐎𑐟𑐫𑐾𑐟 𑐨𑐹𑐐𑑀𑐮𑐫𑐵 𑐁𑐢𑐵𑐬𑐫𑑂‌ 𑐣𑑄 𑐳𑐩𑐵𑐖 𑐡𑐫𑐾𑐎𑐾 𑐖𑑂𑐫𑐹 𑑋 𑐣𑐾𑐥𑐵𑐮𑐫𑑂‌ 𑐟𑐬𑐵𑐃𑐮𑐫𑑂‌ 𑐔𑑂𑐰𑑄𑐥𑐶𑑄 𑐩𑐢𑐾𑐱𑐷 𑐳𑐩𑐵𑐖, 𑐴𑐶𑐩𑐵𑐮𑐷 𑐨𑐾𑐐𑐫𑑂‌ 𑐔𑑂𑐰𑑄𑐥𑐶𑑄 𑐨𑑀𑐚𑐾 𑐳𑐩𑐵𑐖, 𑐥𑐴𑐵𑐜𑐫𑑂 𑐔𑑂𑐰𑑄𑐥𑐶𑑄 𑐥𑐬𑑂𑐰𑐟𑐾 𑐳𑐩𑐵𑐖 𑐢𑐵𑐫𑐾𑐖𑑂𑐫𑐹 𑑋 𑐥𑐵𑐫𑐾𑐕𑐶 𑐠𑑂𑐰 𑐠𑐾𑑃 𑐴𑐾 𑐨𑐵𑐲𑐵𑐫𑐵 𑐁𑐢𑐵𑐬𑐫𑑂‌ 𑐳𑐩𑐵𑐖 𑐣𑐶𑐬𑑂𑐢𑐵𑐬𑐞 𑐫𑐵𑐫𑐾𑐖𑑂𑐫𑐹 𑑋 𑐟𑐬𑐵𑐃𑐫𑐵 𑐖𑐣𑐎𑐥𑐸𑐬𑐫𑐵 𑐩𑐣𑐹𑐟 𑐩𑐿𑐠𑐶𑐮𑐷 𑐰𑐵 𑐨𑑀𑐖𑐥𑐸𑐬𑐳𑐩𑐵𑐖, 𑐀𑐠𑐾 𑐴𑐾 𑐎𑐵𑐛𑐩𑐵𑐜𑑁𑑄𑐫𑐵 𑐩𑐣𑐹𑐟 𑐣𑐾𑐰𑐵:𑐳𑐩𑐵𑐖 𑐢𑐵𑐫𑐾𑐖𑑂𑐫𑐹 𑑋 𑐠𑑂𑐰 𑐦𑐸𑐎𑑂𑐎 𑐨𑐵𑐲𑐵𑐫𑐵 𑐁𑐢𑐵𑐬 𑐏: 𑑋 𑐩𑐾𑐏𑐾 𑐣𑐾𑐰𑐵𑑅𑐟 𑐢𑐫𑐵𑐥𑐶𑑄 𑐎𑐵𑐛𑐩𑐵𑐜𑑁𑑄 𑐄𑐥𑐟𑑂𑐫𑐎𑐵𑐫𑑂‌ 𑐖𑐎 𑐳𑐷𑐩𑐶𑐟 𑐩𑐏𑐸 𑑋 𑐣𑐾𑐰𑐵𑑅𑐟 𑐄𑐥𑐟𑑂𑐫𑐎𑐵𑐧𑐶𑐳𑑂𑐎𑑄 𑐣𑐾𑐥𑐵:𑐫𑐵 𑐥𑑂𑐬𑐟𑑂𑐫𑐾𑐎 𑐖𑐶𑐮𑑂𑐮𑐵𑐫𑑂‌ 𑐡𑐸 𑑋 𑐀𑐠𑐾 𑐣𑑄 𑑖𑑕 𑐖𑐶𑐮𑑂𑐮𑐵𑐫𑑂‌ 𑐣𑐾𑐥𑐵𑐮𑐨𑐵𑐲𑐵 𑐮𑑂𑐴𑐵𑐂𑐥𑐶𑑄 𑐰 𑐮𑑂𑐴𑐵𑐣𑐵𑐔𑑂𑐰𑐥𑐶 𑐴𑐾 𑐡𑐸 𑑋 𑐀𑐠𑐾 𑐴𑐾 𑐨𑐵𑐬𑐟𑐫𑐵 𑐳𑐶𑐎𑑂𑐎𑐶𑐩 𑐥𑑂𑐬𑐵𑐣𑑂𑐟𑐫𑑂‌ 𑐣𑑄 𑐳𑑂𑐠𑐵𑐫𑐷 𑐧𑐳𑑀𑐧𑐵𑐳 𑐫𑐵𑐣𑐵𑐔𑑂𑐰𑐥𑐶𑑄 𑐣𑐾𑐰𑐵𑑅𑐟 𑐡𑐸 𑑋 𑐂𑐩𑐶𑐳𑑄 𑐠:𑐠:𑐐𑐸 𑐥𑐬𑐶𑐔𑐫 𑐧𑐷𑐧𑐮𑐫𑑂‌ 𑐠𑑅𑐟 𑐣𑐾𑐰𑐵: 𑐢𑐵𑐂 𑑋 𑐠𑑂𑐰 𑐰𑑂𑐫𑐰𑐳𑑂𑐠𑐵 𑐣𑐾𑐰𑐵𑑅𑐟𑐫𑑂‌ 𑐖𑐎 𑐩𑐏𑐸 𑐏𑐳𑐨𑐵𑐲𑐵 𑐮𑑂𑐴𑐵𑐂𑐥𑐶𑑄 𑐏𑐫𑑂‌𑐟 𑐣𑑄 𑐣𑐾𑐥𑐵𑐮𑐫𑑂 𑐖𑐎 𑐩𑐏𑐸 𑐨𑐵𑐬𑐟 𑐰 𑐨𑐹𑐚𑐵𑐣𑐫𑑂‌ 𑐟𑐎 𑐣𑑄 𑐰𑑂𑐫𑐵𑐥𑐎 𑐬𑐹𑐥 𑐣𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐠𑑄 𑐳𑑂𑐰𑐫𑐾𑐧𑐮𑐫𑑂 𑐣𑑄 𑐨𑐵𑐲𑐵 𑐢𑐫𑐵𑐐𑐸 𑐳𑐩𑐵𑐖𑐫𑐵 𑐳𑐵𑐢𑐣 𑐏: 𑑋 𑐎𑐵𑐬𑐞 𑐀𑐣 𑐔𑑂𑐰𑑄𑐥𑐶𑑄 𑐩𑐣𑐹𑐟𑐳𑐾𑑃 𑐠: 𑐀𑐣 𑐔𑑂𑐰𑐣𑐵𑐠𑐵𑐳𑐫𑑂‌ 𑐄𑐐𑐸 𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐖𑐷𑐰𑐣 𑐴𑐣𑐵𑐔𑑂𑐰𑐣𑐷 𑑋

𑐑) 𑐖𑑂𑐘𑐵𑐣 𑐎𑐵𑐫𑐾𑐐𑐸 𑐩𑐵𑐢𑑂𑐫𑐩𑐫𑐵 𑐬𑐹𑐥𑐫𑑂‌ 𑐨𑐵𑐲𑐵

𑐕𑐸𑑄 𑐖𑑂𑐘𑐵𑐣 𑐎𑐵𑐫𑐾𑐧𑐮𑐫𑑂‌ 𑐰𑐶𑐨𑐶𑐣𑑂𑐣 𑐩𑐵𑐢𑑂𑐫𑐩𑑄 𑐎𑐵𑐫𑐾𑐖𑑂𑐫𑐹 –

𑐎) 𑐕𑐸𑑄 𑐰𑐳𑑂𑐟𑐸 𑐰𑐵 𑐑𑐚𑐣𑐵 𑐳𑑂𑐰𑐫𑐵𑑅 𑐧𑐵𑐫𑑂‌ 𑐣𑑂𑐫𑐣𑐵:, 𑐠𑐩𑑂𑐴𑐳𑐾𑑃 𑐀𑐣𑐸𑐨𑐹𑐟𑐶 𑐫𑐵𑐣𑐵:,

𑐏) 𑐰𑐶𑐨𑐶𑐣𑑂𑐣 𑐐𑐸𑐬𑐸𑐥𑐶𑐣𑐶𑐥𑐵𑐏𑐾𑑃 𑐥𑑂𑐬𑐰𑐔𑐣 𑐣𑑂𑐫𑐣𑐵𑑅, 𑐀𑐨𑑂𑐫𑐵𑐳 𑐫𑐵𑐣𑐵𑑅

𑐐) 𑐠𑑅𑐩𑑂𑐴𑐾𑐳𑑂𑐫𑐵𑑄 𑐴𑐾 𑐧𑑂𑐰𑐣𑐵: 𑐂𑐟𑑂𑐫𑐵𑐡𑐶 𑑋

𑐳𑐸𑑄 𑐐𑐸𑐬𑐸𑐥𑐶𑐣𑐶𑐥𑐵𑐏𑐾𑑃 𑐥𑑂𑐬𑐰𑐔𑐣 𑐣𑑂𑐫𑐣𑐵𑑅 𑐰𑐵 𑐕𑐸 𑐳𑐦𑐹 𑐧𑑂𑐰𑐣𑐵𑑅 𑐖𑑂𑐘𑐵𑐣 𑐎𑐵𑐫𑐾𑐐𑐸 𑐫𑐵𑑅𑐳𑐵𑑄 𑐁𑐏𑐶𑐬 𑐰 𑐕𑐐𑐹 𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐫𑐵𑐂 𑑋 𑐀𑐰𑐱𑑂𑐫 𑐣𑑄 𑐐𑐸𑐬𑐸𑑄 𑐕𑐸𑑄 𑐕𑐐𑐹 𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐥𑑂𑐬𑐰𑐔𑐣 𑐫𑐵𑐂 𑐰𑐵 𑐠𑑅𑐩𑑂𑐴𑐾𑐳𑑂𑐫𑐵𑑄 𑐧𑑂𑐰𑐣𑐵𑐐𑐸 𑐳𑐦𑐹 𑐣𑑄 𑐕𑐸𑑄 𑐕𑐐𑐹 𑐨𑐵𑐲𑐵𑑄 𑐔𑑂𑐰𑐫𑐵𑐟𑐂 𑑋 𑐄𑐎𑐶 𑐕𑐸𑑄 𑐖𑑂𑐘𑐵𑐣 𑐎𑐵𑐫𑐾𑐟 𑐣𑑄 𑐨𑐵𑐲𑐵 𑐕𑐐𑐹 𑐩𑐵𑐢𑑂𑐫𑐩 𑐖𑐸𑐫𑐵𑐧𑐷, 𑐐𑐸𑐐𑐸 𑐨𑐵𑐲𑐵 𑐩𑐳𑐫𑐾𑐎 𑐰𑑄 𑐳𑐦𑐹𑐥𑐵𑐏𑐾𑑃 𑐰𑐵 𑐐𑐸𑐬𑐸𑐥𑐵𑐏𑐾𑑃 𑐖𑑂𑐘𑐵𑐣 𑐎𑐵𑐫𑐾𑐐𑐸 𑐳𑐩𑑂𑐨𑐰 𑐖𑐸𑐂𑐩𑐏𑐸 𑑋 𑐄𑐎𑐶𑑄 𑐖𑑂𑐘𑐵𑐣 𑐎𑐵𑐫𑐾𑐐𑐸 𑐩𑐹𑐮 𑐩𑐵𑐢𑑂𑐫𑐩 𑐨𑐵𑐲𑐵 𑐏𑑅 𑑋

𑐒) 𑐫𑐵𑐡𑐺𑐔𑑂𑐕𑐶𑐎𑐟𑐵𑐫𑐵 𑐬𑐹𑐥𑐫𑑂‌ 𑐨𑐵𑐲𑐵

𑐨𑐵𑐲𑐵 𑐕𑐟𑐵 𑐩𑐵𑐣𑐰𑐷𑐫 𑐐𑐟𑐶𑐰𑐶𑐢𑐶 𑐏:𑑋 𑐩𑐾𑐏𑐾 𑐳𑑄𑐳𑐵𑐬𑐫𑑂‌ 𑐡𑐸𑐐𑐸 𑐨𑑁𑐟𑐶𑐎 𑐰𑐳𑑂𑐟𑐸 𑐰𑐵 𑐩𑐣𑐸𑐏𑑄 𑐫𑐵𑐂𑐐𑐸 𑐀𑐣𑐾𑐎𑐎𑐠𑑄𑐫𑐵 𑐐𑐟𑐶𑐰𑐶𑐢𑐶𑐫𑐵 𑐡𑐠𑐸𑐂 𑐕𑐸 𑐳𑑂𑐰𑐵𑐥𑐹 𑐡𑐸, 𑐕𑐸 𑐳𑑂𑐰𑐵𑐥𑐹 𑐩𑐡𑐸 𑑋 𑐢𑐵𑐫𑐾 𑐎𑐶 𑐩𑐣𑐸𑐏𑑄 𑐖𑐵𑐎𑐶 𑐖𑐵𑐳𑐶𑐠𑐮𑐫𑑂‌ 𑐟𑐫𑐵: 𑐩𑐶 𑐔𑑂𑐫𑐵𑐎𑐵𑑅 𑐧𑐸𑐎𑐵𑐟:𑐐𑐸 𑐣𑐳𑐵𑐫𑐵𑐟 𑐖𑐵 𑐢𑐵𑐂 𑑋 𑐀𑐮𑐾 𑐰 𑐖𑐵 𑐩𑑂𑐴𑐸𑐟𑐸𑐂 𑐟𑐫𑐵: 𑐣𑑂𑐴𑑂𑐫𑐫𑐵: 𑐑𑐸𑐟𑐸𑐎𑐵𑐕𑑂𑐰𑐫𑐾𑐐𑐸 𑐖𑑂𑐫𑐵𑐫𑐵𑐟 𑐣𑐫𑐾𑐐𑐸 𑐢𑐵𑐂 𑑋 𑐰𑐴𑐾 𑐖𑐵-𑐫𑐵𑐟 𑐣𑐾𑐥𑐵𑐮𑐷 𑐨𑐵𑐲𑐵 𑐰 𑐀𑐐𑑂𑐬𑐾𑐖𑐷 𑐨𑐵𑐲𑐵 𑐕𑐳𑐶𑐎𑐠𑑄 𑐨𑐵𑐟 𑐰 (Cooked Rice) 𑐰 𑐣𑐫𑐾𑐐𑐸 𑐖𑑂𑐫𑐵-𑐫𑐵𑐟 𑐏𑐵𑐣𑐸 𑐰 To eat 𑐢𑐵𑐂 𑑋 𑐡𑐎𑐮𑐫𑑂‌ 𑐣𑑂𑐴𑐵𑐥𑐵𑑄𑐐𑐸 𑐣𑑂𑐴𑑂𑐫𑐳𑑅 𑐄𑐎𑐶𑐫𑐵𑐟 𑐕𑐵𑐫𑑂‌ 𑐖𑐵 𑐢𑐵𑐮 ? 𑐀𑐮𑐾 𑐩𑑂𑐴𑐸𑐟𑐸𑐂 𑐟𑐫𑐵: 𑐣𑑂𑐴𑑂𑐫𑐫𑐵: 𑐑𑐸𑐟𑐎𑐾𑐐𑐸 𑐖𑑂𑐫𑐵𑐫𑐵𑐟 𑐕𑐵𑐫𑑂‌ 𑐣𑐫𑐾 𑐢𑐵𑐮 𑑋 𑐠𑐸𑐎𑐶𑐫𑐵 𑐕𑐸𑑄 𑐟𑐬𑑂𑐎 𑐩𑐡𑐸, 𑐎𑐵𑐬𑐞 𑐣𑑄 𑐩𑐡𑐸𑑋 𑐀𑐠𑐾 𑐴𑐾 𑐕𑐐𑐹 𑐨𑐵𑐲𑐵𑐫𑐵𑐟 𑐨𑐵𑐟 𑐰 𑐩𑐾𑐐𑐸 𑐨𑐵𑐲𑐵𑐫𑑂‌ (Cooked Rice) 𑐢𑐎𑐵: 𑐕𑐵𑐫𑑂‌ 𑐢𑐵𑐮, 𑐄𑐎𑐶𑐫𑐵 𑐣𑑄 𑐕𑐸𑑄 𑐮𑐶𑐳𑑅 𑐩𑐡𑐸 𑑋 𑐏𑑃 𑐠𑐸𑐮𑐶 𑐖𑐎 𑐏𑑅 𑐎𑐶 𑐄𑐎𑐶𑐫𑐵𑐟 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐖𑐵, 𑐨𑐵𑐟, (Cooked Rice) 𑐢𑐵𑐮 𑑋 𑐁: 𑐣𑑄 𑐰 𑐴𑐾 𑐢𑐫𑐵𑐔𑑂𑐰𑐣 𑑋 𑐄𑐩𑑂𑐴 𑐩𑐣𑐹𑐫𑐵𑐟 𑐀𑑄𑐐𑑂𑐬𑐾𑐖𑐟𑐳𑐾𑑄 𑐳𑑂𑐫𑐣𑐵𑐟𑐮, 𑐄𑐎𑐶𑑄 𑐰𑑄 𑐣𑑄 𑐰 𑐴𑐾 𑐢𑐫𑐵𑐔𑑂𑐰𑐣 𑑋 𑐠𑑂𑐰 𑐰𑐶𑐱𑐾𑐲𑐟𑐵 𑐣𑑂𑐴𑑂𑐫𑐵𑐐𑐸 𑐨𑐵𑐲𑐵𑐫𑑂‌ 𑐣𑑄 𑐏: 𑑋 𑐀𑐠𑐾 𑐢𑐫𑐵𑐐𑐸 𑐩𑐟𑐮𑐧 𑐣𑑂𑐴𑐵𑐥𑐵 𑐐𑐸𑐎𑐬𑑂𑐠𑑄 𑐣𑑂𑐴𑑂𑐫𑐵𑐣𑐵𑐰𑐫𑐵𑐔𑑂𑐔𑐣 𑐁: 𑐣𑑄 𑐀𑐠𑐾 𑐴𑐾 𑐣𑑂𑐴𑑂𑐫𑐵𑐣𑐵𑐔𑑂𑐰𑐣 𑑋 𑐳𑐸𑐣𑐵𑐣𑑄 𑐠𑐣𑐶𑐣𑐶𑐳𑐾𑑄 𑐁𑐰𑑄𑐮𑐶 𑐖𑐵 𑐢𑐵𑐫𑐾𑐐𑐸 𑐩𑐏𑐸 𑐮𑐵 𑐢𑐵𑐫𑐾𑐐𑐸 𑐢𑐎𑐵: 𑐥𑐬𑐶𑐰𑐬𑑂𑐟𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐩𑐖𑐹 𑑋

𑐫𑐵𑐡𑐸𑐔𑑂𑐕𑐶𑐎𑐫𑐵 𑐩𑐾𑐐𑐸 𑐰𑐶𑐱𑐾𑐲𑐟𑐵 𑐕𑐸𑑃 𑐕𑐐𑐹 𑐠𑐵𑐳𑑄 𑐰𑐵 𑐐𑐬𑑂𑐣 𑐣𑑄 𑐕𑐸𑑃 𑐕𑐐𑐹 𑐁𑐰𑐵𑐖 𑐰𑐮 𑐢𑐵:𑑅𑐳𑐵 𑐰 𑐁𑐰𑐵𑐖 𑐐𑐠𑐾 𑐢𑐎𑐵: 𑐣𑑂𑐫𑑄𑐳𑐵 𑐰𑐶𑐨𑐶𑐣𑑂𑐣 𑐩𑐣𑐹𑐟𑐳𑐾𑑃 𑐰𑐶𑐨𑐶𑐣𑑂𑐣𑐎𑐠𑑄 𑐢𑐵𑐫𑐾𑐐𑐸 𑐫𑐵𑐂 𑑋 𑐁𑐎𑐵𑐱𑐫𑑂‌ 𑐴𑐰𑐵𑐂𑐖𑐴𑐵𑐖 𑐐𑐠𑐾 𑐰𑐮 𑐢𑐵:𑐳𑐵 𑐑𑐸𑐣𑐸𑐣𑐸𑐣𑐸𑑃 𑐰𑐮, 𑐴𑐸𑐣𑐸𑐣𑐸𑐣𑐸𑑃 𑐰𑐮, 𑐑𑐸𑐂𑑃𑐂𑑃𑐂𑑃 𑐳: 𑐰𑐫𑐾𑐎𑐵: 𑐰𑐮, 𑐡𑐶𑐣𑐶𑐣𑐶𑐣𑐶𑑄 𑐳: 𑐰𑐫𑐾𑐎𑐵:𑑅 𑐰𑐮 𑑋 𑐀𑐠𑐾 𑐴𑐾 𑐳𑐸𑑃 𑐩𑐔𑐵 𑐕𑐩𑑂𑐴 𑐏𑑂𑐰𑐮 𑐢𑐵𑑅𑐳𑐵 𑐣𑐾𑐰𑐵𑑅𑐟𑐳𑐾𑑃 𑐴𑑂𑐰𑐵𑑃𑐫𑑂‌-𑐴𑑂𑐰𑐵𑑃𑐫𑑂‌ 𑐏𑑂𑐰𑐮 𑐢𑐵𑐂, 𑐰 𑐴𑐾 𑐣𑑂𑐴𑑂𑐫𑐳: 𑐏𑐫𑑂‌𑐟𑐫𑐎𑐾 𑐣𑑂𑐫𑐣 𑐢𑐵:𑐳𑐵 𑐎𑑂𑐰𑐵𑑃𑐎𑑂𑐰𑐵𑑃 𑐬𑑀𑐫𑑀 𑐢𑐵𑐂 𑑋 𑐁𑐏𑐶𑐬 𑐩𑐔𑐵𑐫𑐵 𑐩𑑂𑐴𑐸𑐟𑐸𑑄 𑐥𑐶𑐖𑑂𑐰𑐫𑐵𑐔𑑂𑐰𑑃𑐐𑐸 𑐳: 𑐮𑐵 𑐕𑐟𑐵 𑐴𑐾 𑐏:, 𑐀𑐠𑐿 𑐣𑑄 𑐄𑐎𑐶𑐫𑐵 𑐀𑐣𑐸𑐎𑐬𑐞 𑐕𑐵𑐫𑑂‌ 𑐦𑐬𑐎 𑐖𑐸𑐮 ? 𑐄𑐎𑐶𑐫𑐵 𑐣𑑄 𑐮𑐶𑐳𑑅 𑐩𑐡𑐸 𑑋 𑐠𑐸𑐎𑐶𑐫𑐵𑐟 𑐴𑐾 𑐨𑐵𑐲𑐵𑐫𑑋 𑐫𑐵𑐡𑐺𑐔𑑂𑐕𑐶𑐎 𑐢𑐵𑐂 𑑋

𑐔) 𑐳𑐫𑐾𑐎𑐾𑐩𑐵𑑅𑐐𑐸 𑐖𑑂𑐫𑐵𑐫𑐵 𑐬𑐹𑐥𑐫𑑂 𑐨𑐵𑐲𑐵

𑐳𑑅 𑐥𑐶𑐎𑐵𑐫𑐾𑐐𑐸 𑐎𑑂𑐲𑐩𑐟𑐵𑐫𑐵 𑐁𑐢𑐵𑐬𑐫 𑐥𑑂𑐬𑐵𑐞𑐷 𑐣𑐶𑐠𑐶𑐎𑑄 𑐡𑐸- 𑐩𑑂𑐴𑐸𑐟𑐸𑑄 𑐳: 𑐥𑐶𑐎𑐵𑐫𑐾𑐦𑐸𑐥𑐶 𑐰 𑐩𑐦𑐸𑐥𑐶𑑄 𑑋 𑐗𑑄𑐐:𑐥𑑄𑐕𑐷 𑐖𑐣𑐵𑐰𑐬𑐟𑐳𑐾𑑄 𑐣𑑄 𑐩𑑂𑐴𑐸𑐟𑐸 𑐳𑑅 𑐥𑐶𑐎𑐵𑐫𑐾𑐦𑐸 𑑋 𑐄𑐎𑐶𑑄 𑐰𑐫𑐵𑐟 𑐳𑑂𑐫𑐵𑐎𑑂𑐎 𑐡𑐵𑐫𑐾𑐧𑐮𑐫 𑐰𑐵 𑐰 𑐐𑑂𑐫𑐵𑐂𑐧𑐮𑐫𑑂‌ 𑐀𑐔𑐵𑐣𑐎 𑐴𑐾 𑐠:𑐐𑐸 𑐎𑑂𑐲𑐩𑐟𑐵𑐎𑐠𑑄 𑐳𑑅 𑐥𑐶𑐎𑐵𑐂 𑑋 𑐀𑐠𑐾 𑐳𑑅 𑐥𑐶𑐎𑐵𑐫𑐾𑐐𑐸 𑐖𑑂𑐫𑐵 𑐩𑐣𑐸𑐏𑑄 𑐣𑑄 𑐫𑐵𑐫𑐾𑐦𑐸 𑑋 𑐳𑐸𑑄 𑐩𑐣𑐹 𑐮𑐫𑑂‌𑐟𑐵𑐫𑐵: 𑐕𑐎𑑂𑐰𑐮𑑄 𑐣𑑂𑐴𑐶𑐮𑐷𑐧𑐮𑐫𑑂‌ 𑐩𑑂𑐴𑐸𑐟𑐸 𑐰𑐵𑑄𑐏𑐵𑐫𑐵: 𑐟𑐟:𑐳𑐮𑑄 𑐀𑐣𑑁𑐠𑑀𑐐𑐸 𑐳: 𑐥𑐶𑐎𑐫𑐵: 𑐴𑐵𑐮𑐷, 𑐄𑐎𑐶𑐫𑐵𑐟 𑐩𑐣𑐸𑐏𑑄 𑐣𑑂𑐴𑑂𑐫𑐹𑐐𑐸 𑐢𑐵𑐂 𑑋 𑐀𑐠𑐾 𑐳𑑅 𑐥𑐶𑐎𑐵𑐫𑐾𑐟 𑐳𑐸𑐣𑐵𑐣𑑄 𑐳𑑂𑐫𑐣𑐾𑐩𑑂𑐰𑐵: 𑑋 𑐀𑐠𑐾 𑐴𑐾 𑐟𑐳𑑂𑐳𑐎 𑐡𑐸𑑅𑐏 𑐖𑐸𑐮 𑐢𑐵𑐫𑐾𑐰𑑄 𑐰𑐵 𑐑𑐵𑑅 𑐖𑐸𑐫𑐵: 𑐟𑐳𑑂𑐳𑐎 𑐳𑑂𑐫𑐵𑐟 𑐢𑐵𑐫𑐾𑐰𑑄 𑐏𑑂𑐰𑐂 𑑋 𑐀𑐠𑐾 𑐏𑑂𑐰𑐂𑐧𑐮𑐫𑑂‌ 𑐣𑑂𑐴𑑂𑐫𑐹𑐐𑐸𑐳𑐶𑐎𑑄 𑐦𑐬𑐎 𑐖𑐸𑐂𑐎 𑐳𑑅 𑐥𑐶𑐎𑐵𑐂 𑑋 𑐄𑐖𑑂𑐰𑑅𑐐𑐸 𑐳𑑅 𑐐𑐠𑐾 𑐫𑐵𑐣𑐵: 𑐥𑐶𑐎𑐫𑐵 ?

𑐀𑐮𑐾 𑐠𑐠𑐾 𑐫𑐵𑐣𑐵: 𑐥𑐶𑐎𑐵𑐫𑐾𑐐𑐸 𑐢𑐎𑐵𑑅 𑐰𑐫𑐵𑐟 𑐳𑐸𑐣𑐵𑐣𑑄 𑐳𑑂𑐫𑑄𑐐𑐸 𑐣𑑄 𑐩𑐏𑐸 𑑋 𑐀𑐠𑐾 𑐣𑑄 𑐳𑑂𑐰𑐔𑐵𑐮𑐶𑐟 𑐬𑐹𑐥𑑄 𑐫𑐵𑐂 𑑋 𑐕𑐶 𑐐𑐠𑐾 𑐖𑐸𑐫𑐵: 𑐣𑑂𑐴𑐶𑐮𑐾 𑐳𑐫𑐾𑐎𑐵 𑐰𑐵 𑐏𑑂𑐰𑐫𑐾 𑐳𑐫𑐾𑐎𑐵 𑐢𑐎𑐵: 𑐣𑑂𑐫𑑄𑐳𑐵 𑐄𑐎𑐶𑐫𑐵 𑐮𑐶𑐳𑑅 𑐀𑐠𑐾𑑄 𑐴𑐾 𑐳𑑅𑐐𑐸 𑐢𑐵𑐂 𑑋 𑐠𑐸𑐎𑐶𑐫𑐵𑐟 𑐳𑑂𑐰𑐟𑑅𑐳𑑂𑐦𑐹𑐬𑑂𑐟 (Instincitive) 𑐢𑐵𑐂, 𑐟𑐬 𑐨𑐵𑐲𑐵 𑐢𑐫𑐵𑐐𑐸 𑐀𑐠𑐾 𑐳𑑂𑐰𑐟𑑅𑐳𑑂𑐦𑐹𑐬𑑂𑐟 𑐩𑐏𑐸 𑑋 𑐣𑑂𑐴𑑂𑐫𑐵𑐩𑑂𑐴 𑐩𑐔𑐵 𑐰𑐵 𑐩𑐣𑐸𑐏𑑄 𑐣𑑄 𑐳𑐫𑐾𑐎𑐾𑐩𑐵: 𑑋 𑐨𑐵𑐲𑐵 𑐳𑐂𑐐𑐸 𑐖𑐣𑑂𑐩𑐖𑐵𑐟 𑐐𑐸𑐞 𑐩𑐏𑐸 𑑋 𑐨𑐵𑐲𑐵 𑐳𑐫𑐾𑐎𑐾 𑐢𑐎𑐵: 𑐎𑐸𑐟: 𑐫𑐵:𑐳𑐵𑑄 𑐳𑐫𑐾𑐎𑐾𑐐𑐸 𑐎𑑂𑐲𑐩𑐟𑐵 𑐔𑐵𑐴𑐶𑑄 𑐳𑐵𑐩𑐵𑐣𑑂𑐫𑐟𑐫𑐵: 𑐣𑑂𑐴𑑂𑐫𑐵𑐩𑑂𑐴 𑐩𑐣𑐹𑐫𑐵𑐎𑐾 𑐣𑑄 𑐡𑐂, 𑐟𑐬 𑐀𑐠𑐾𑑄 𑐟𑐸𑑄 𑐳𑐂𑐩𑐏𑐸 𑑋 𑐖𑐶 𑐣𑐾𑐰𑐵𑑅𑐫𑐵 𑐩𑐔𑐵, 𑐖𑐶 𑐣𑐾𑐰𑐵𑑅𑐨𑐵𑐫𑑂‌ 𑐀𑐠𑐾𑑄 𑐴𑐾 𑐳:𑐐𑐸 𑐢𑐎𑐵𑑅 𑐢𑐵𑐫𑐾𑐦𑐸 𑑋 𑐏𑑃 𑐀𑐠𑐾 𑐩𑐏𑐸 𑑋 𑐣𑑂𑐴𑑂𑐫𑐵𑐩𑑂𑐴 𑐩𑐔𑐵𑐫𑐵𑐟 𑐣𑑄 𑐧𑐸𑐳𑐵𑑄𑐣𑐶𑐳𑐾𑑄 𑐩𑐵𑐣𑐰𑐷𑐫 𑐨𑐵𑐲𑐶𑐎 𑐐𑐟𑐶𑐰𑐶𑐢𑐶𑐥𑐵𑐏𑐾𑑄 𑐨𑐵𑐲𑐵 𑐳𑐫𑐾𑐎𑐾𑐐𑐸 𑐄𑐩𑐾𑐬𑐫𑑂‌ 𑐥𑑂𑐫𑐡𑑃- 𑐏𑐸𑐡𑑃 𑐟𑐵𑐥𑐵𑐎 𑐟𑐫𑐵𑐧𑐶𑐮 𑐢𑐵:𑐳𑐵 𑐰 𑐩𑐔𑐵𑑄 𑐣𑐾𑐰𑐵𑑅𑐨𑐵𑐫𑑂‌ 𑐖𑐎 𑐮𑐵 𑐕𑐸 𑐳𑑄𑐳𑐵𑐬𑐫𑐵 𑐕𑐸𑑄 𑐣𑑄 𑐨𑐵𑐲𑐵 𑐳𑐂𑐩𑐏𑐸 𑑋 𑐎𑐾𑐰𑐮 𑐰𑑄 𑐀𑐬𑑂𑐠 𑐳𑐏𑐸𑐐𑐸 𑐣𑑂𑐴𑐶𑐮𑐾𑐐𑐸, 𑐏𑑂𑐰𑐫𑐾𑐐𑐸, 𑐐𑑂𑐫𑐵𑐂𑐐𑐸, 𑐳𑑂𑐫𑐵𑑅𑐐𑐸𑐫𑐵 𑐳𑑅 𑐖𑐎 𑐥𑐶𑐎𑐵𑐫𑐾𑐦𑐂 𑑋 𑐄𑐎𑐶𑑄 𑐕𑐩𑑂𑐴 𑐩𑐔𑐵𑐫𑐵𑐟 𑐰𑑄 𑐰𑐶𑐳𑑂𑐟𑐵𑐬𑑄 𑐳: 𑐥𑐶𑐎𑐵𑐫𑐾 𑐳𑐳𑐾𑐣𑐶𑐳𑐾𑑄 𑐩𑐵𑐩 𑐰 𑐩𑐾𑐥𑐶𑑄𑐳𑑄 𑐰𑐶𑐨𑐶𑐣𑑂𑐣 𑐱𑐧𑑂𑐡𑐖𑑂𑐘𑐵𑐣 𑐧𑐷 𑑋 𑐎𑑂𑐬𑐩𑐱𑑅 𑐰𑑄 𑐰𑐶𑐳𑑂𑐟𑐵𑐬𑑄 𑐳𑐫𑐾𑐎𑐷 𑑋 𑐄𑐎𑐶𑑄 𑐨𑐵𑐲𑐵 𑐳𑐫𑐾𑐎𑐾𑐩𑐵:𑐐𑐸 𑐖𑑂𑐫𑐵 𑐏𑑅, 𑐖𑐣𑑂𑐩𑐖𑐵𑐟 𑐐𑐸𑐞 𑐩𑐏𑐸, 𑐳𑑂𑐰𑐟𑑅𑐳𑑂𑐦𑐹𑐬𑑂𑐟 𑐳𑐂𑐐𑐸 𑐐𑐸𑐞 𑐩𑐏𑐸 𑑋 𑐠𑑂𑐰 𑐀𑐳𑑂𑐰𑐟:𑐳𑑂𑐦𑐹𑐬𑑂𑐟 (Non-Instincitive) 𑐢𑐵𑐂 𑑋

𑐕) 𑐨𑐵𑐲𑐵 𑐥𑐬𑐩𑑂𑐥𑐬𑐶𑐟 𑐰𑐵 𑐎𑑂𑐰𑐳𑑅𑐫𑐵 𑐬𑐹𑐥𑐫𑑂‌ 𑐨𑐵𑐲𑐵

𑐨𑐵𑐲𑐵 𑐥𑐬𑐩𑑂𑐥𑐬𑐵𑐣𑐶𑐳𑐾𑑄 𑐣𑑂𑐴𑑂𑐫𑐵𑐣𑐵- 𑐰𑐫𑐵𑐔𑑂𑐰𑐣𑐷𑐐𑐸 𑐰𑐳𑑂𑐟𑐸 𑐏: 𑑋 𑐣𑑂𑐴𑐵𑐥𑐵𑐫𑐵 𑐥𑐸𑐳𑑂𑐟𑐵𑑄 𑐠:𑐩𑑂𑐴𑐾𑐳𑑂𑐫𑐵𑑄 𑐐𑐸𑐎𑐠𑑄 𑐳𑐫𑐾𑐎𑐵𑐰𑐫𑐵 𑐰𑑄 𑐣𑑄 𑐠𑑅𑐫𑐵 𑐮𑐶𑐥𑐵𑐫𑐵 𑐥𑐸𑐳𑑂𑐟𑐵𑐫𑐵𑐟 𑐳𑑂𑐫𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐮𑐶𑐥𑐵𑑄𑐫𑐵 𑐥𑐸𑐳𑑂𑐟𑐵 𑐣𑑄 𑐠:𑐐𑐸 𑐥𑐸𑐬𑑂𑐏𑐵 𑐐𑐸𑐎𑐠𑑄 𑐳𑑂𑐫𑐣𑐵𑐠𑐎𑐮 𑐠𑑅𑐩𑑂𑐴𑐾𑐳𑑂𑐫𑐵𑑄 𑐣𑑄 𑐄𑐎𑐠𑑄 𑐳𑐫𑐾𑐎𑐵𑑅 𑐰𑑂𑐫𑐰𑐴𑐵𑐬𑐫𑑂‌ 𑐕𑑂𑐫𑐮𑐵𑐰𑐮 𑑋 𑐫𑐡𑐶 𑐠𑐸𑐎𑐠𑑄 𑐠:𑐐𑐸 𑐣𑑂𑐴𑐵𑐥𑐵𑐫𑐵 𑐥𑐸𑐬𑑂𑐏𑐵 𑐳𑑂𑐫𑐣𑐵𑐠𑐎𑐸 𑐠𑐾𑑄 𑐠𑑅𑐩𑑂𑐴𑐾𑐳𑑂𑐫𑐵𑑄 𑐮𑐶𑐥𑐵𑐫𑐵 𑐳𑐣𑑂𑐟𑐟𑐶𑐫𑐵𑐟 𑐩𑐳𑑂𑐫𑑄𑐐𑐸 𑐖𑐹𑐳𑐵 𑐨𑐵𑐲𑐵𑐫𑐵 𑐣𑐶𑐬𑐣𑑂𑐟𑐬𑐟𑐵 𑐡𑐷 𑑋 𑐧𑐬𑐸 𑐕𑐟𑐵 𑐏𑑃 𑐕𑐸 𑐣𑐶𑐱𑑂𑐔𑐶𑐟 𑐏: 𑐢𑐵:𑐳𑐵 𑐨𑐵𑐲𑐵 𑐥𑐸𑐬𑑂𑐏𑐵 𑐴𑐶𑐮𑐵𑐰𑑄 𑐠𑐾𑑄 𑐨𑐵𑐲𑐵𑐫𑑂‌ 𑐣𑑄 𑐕𑐸𑑄 𑐨𑐟𑐶 𑐥𑐬𑐶𑐰𑐬𑑂𑐟𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐄𑐎𑐶 𑐣𑑂𑐴𑐵𑐥𑐵𑐫𑐵 𑐥𑐸𑐬𑑂𑐏𑐵𑑄 𑐟𑐾𑑄𑐏𑐸 𑐢𑐵𑑅𑐐𑐸𑐫𑐵𑐟 𑐠𑑁𑑄 𑐰𑐫𑐵 𑐴𑐾 𑐳𑐣𑑂𑐟𑐵𑐣 𑐟𑐾𑐏𑐸-𑐚𑐾𑐎𑐸 𑐟𑐎 𑐢𑐵𑐫𑐾𑐐𑐸 𑐫𑐵𑐟 𑑋

𑐖) 𑐳𑐘𑑂𑐔𑐵𑐬 𑐳𑐵𑐢𑐣𑐫𑐵 𑐬𑐹𑐥𑐫𑑂‌ 𑐨𑐵𑐲𑐵

𑐨𑐵𑐲𑐵 𑐳𑐘𑑂𑐔𑐵𑐬𑐫𑐵 𑐩𑐸𑐏𑑂𑐫𑐐𑐸 𑐳𑐵𑐢𑐣 𑐏𑑅 𑑋 𑐩𑐣𑐹𑐫𑐵 𑐠𑑅𑐐𑐸 𑐩𑐣𑐫𑑂‌ 𑐡𑐸𑐐𑐸 𑐀𑐣𑐾𑐎𑑁𑑄 𑐰𑐶𑐔𑐵𑐬, 𑐨𑐵𑐰, 𑐥𑑂𑐬𑐟𑐶𑐎𑑂𑐬𑐶𑐫𑐵, 𑐑𑐚𑐣𑐵 𑐂𑐟𑑂𑐫𑐵𑐡𑐶 𑐕𑐩𑑂𑐴𑐾𑐳𑑂𑐫𑐵𑑄 𑐩𑐾𑐩𑑂𑐴𑐟𑐎 𑐳𑐘𑑂𑐔𑐵𑐬 𑐫𑐵𑐫𑐾𑐟 𑐡𑐎𑐮𑐫𑑂‌ 𑐀𑑅𑐥𑐸𑐐𑐸, 𑐡𑑄𑐐𑐸, 𑐫𑐵𑐎𑐣𑑄 𑐫𑐵𑐫𑐾𑐦𑐸𑐐𑐸 𑐳𑐵𑐢𑐣 𑐴𑐾 𑐨𑐵𑐲𑐵 𑐏𑑅 𑑋 𑐏𑐮𑐵 𑐩𑐣𑐸𑐏𑑄 𑐳𑐵𑑄𑐎𑐾𑐟𑐶𑐎 𑐔𑐶𑑄 𑐰𑐵 𑐨𑐵𑐰𑐣𑐺𑐟𑑂𑐫 𑐰𑐵 𑐔𑐶𑐟𑑂𑐬 𑐣𑑄 𑐫𑐵𑐫𑐾𑐦𑐸 𑑋 𑐀𑐠𑐾 𑐣𑑄 𑐠𑐸𑐐𑐸 𑐩𑐵𑐣𑐰𑐷𑐫 𑐨𑐵𑐲𑐵 𑐫𑐎𑑂𑐰 𑐫𑐵𑐎𑐣𑑄 𑐫𑐵𑐫𑐾𑐦𑐸 𑑋

𑐗) 𑐨𑐵𑐲𑐵𑐫𑑂‌ 𑐄𑐟𑑂𑐥𑐵𑐡𑐣𑐱𑐷𑐮𑐟𑐵

𑐨𑐵𑐲𑐵𑐫𑑂‌ 𑐄𑐟𑑂𑐥𑐵𑐡𑐣𑐱𑐷𑐮𑐟𑐵 𑐢𑐫𑐵𑐐𑐸 𑐳𑐸𑑄 𑐕𑐩𑑂𑐴 𑐩𑐣𑐸𑐏𑑄 𑐕𑐸𑑄 𑐕𑐐𑐹 𑐨𑐵𑐲𑐵 𑐳𑐫𑐾𑐎𑐾𑐢𑐸𑐣𑐾𑐰𑑄 𑐰𑑄 𑐣𑑂𑐴𑐵𑐥𑐵-𑐮𑐶𑐥𑐵 𑐐𑐸𑐧𑑂𑐮𑐾𑑄 𑐩𑐢𑐵:𑐣𑐶𑐐𑐸 𑐏𑑃𑐥𑐸 𑐢𑐵𑐫𑐾𑐳𑐂 𑑋 𑐫𑐡𑐶 𑐨𑐵𑐲𑐵𑐫𑑂‌ 𑐄𑐟𑑂𑐥𑐵𑐡𑐣𑐱𑐷𑐮𑐟𑐵 𑐩𑐡𑐸𑐐𑐸 𑐖𑐹𑐳𑐵 𑐰𑑄 𑐕𑐸 𑐕𑐸 𑐏𑑃𑐐𑑂𑐰𑑅 𑐰𑐵 𑐏𑑃𑐥𑐸 𑐳𑐫𑐾𑐎𑐵𑐐𑐸 𑐏𑑅, 𑐣𑑂𑐴𑑂𑐫𑐵𑐧𑑂𑐮𑐾𑑄 𑐄𑐮𑐶 𑐖𑐎 𑐳𑐂 𑑋 𑐄𑐮𑐶𑑄 𑐀𑐥𑑂𑐰: 𑐢𑐵𑐫𑐾 𑐣𑑄 𑐳𑐂𑐩𑐏𑐸, 𑐢𑐵𑐫𑐾𑐐𑐸 𑐰𑑂𑐫𑐰𑐳𑑂𑐠𑐵 𑐣𑑄 𑐡𑐂𑐩𑐏𑐸 𑑋

𑐘) 𑐀𑐬𑑂𑐠𑐥𑐹𑐬𑑂𑐞 𑐰𑐵𑐎𑑂 𑐥𑑂𑐬𑐟𑐷𑐎𑐫𑐵 𑐬𑐹𑐥𑐫𑑂‌ 𑐨𑐵𑐲𑐵

𑐩𑐣𑐹 𑐩𑐔𑐵𑐫𑐵 𑐬𑐹𑐥𑐫𑑂‌ 𑐖𑐣𑑂𑐩𑐫𑐵 𑐣𑐵𑐥𑑄 𑐰𑑄 𑐕𑐸𑑄 𑐳𑑅 𑐥𑐶𑐎𑐵𑐫𑐾𑐐𑐸 𑐎𑑂𑐲𑐩𑐟𑐵 𑐣𑑄 𑐖𑑂𑐰𑐣𑐵𑐰𑐂 𑑋 𑐏𑐟𑐸𑑄 𑐰𑑄 𑐥𑐶𑐎𑐵𑑅𑐐𑐸 𑐳: 𑐴𑐾 𑐨𑐵𑐲𑐵 𑐩𑐏𑐫𑐾𑐦𑐸 𑑋 𑐕𑐵𑐫𑐢𑐵:𑐳𑐵 𑐨𑐵𑐲𑐵 𑐢𑐫𑐵𑐐𑐸 𑐳𑐩𑐵𑐖𑐫𑑂‌ 𑐔𑑂𑐰𑐣𑐵: 𑐟𑐶𑐣𑐶 𑐳𑐫𑐾𑐎𑐷𑐐𑐸 𑐖𑑂𑐫𑐵 𑐏: 𑑋 𑐀𑐠𑐾 𑐣𑑄 𑐰𑑄 𑐥𑐶𑐎𑐵:𑐐𑐸 𑐳: 𑐰𑐵 𑐱𑐧𑑂𑐡 𑐴𑐾 𑐨𑐵𑐲𑐵 𑐩𑐏𑐸 𑑋 𑐨𑐵𑐲𑐵 𑐢𑐫𑐵𑐐𑐸 𑐰𑐶𑐱𑑂𑐰 𑐧𑑂𑐬𑐴𑑂𑐩𑐵𑐞𑑂𑐜𑐫𑑂‌ 𑐡𑐸𑐐𑐸 𑐥𑑂𑐬𑐟𑑂𑐫𑐾𑐎 𑐰𑐳𑑂𑐟𑐸, 𑐄𑐐𑐸 𑐰𑐳𑑂𑐟𑐸𑐫𑐵 𑐳𑑂𑐠𑐶𑐟𑐶/𑐀𑐰𑐳𑑂𑐠𑐵, 𑐳𑐖𑐷𑐰 𑐥𑑂𑐬𑐵𑐞𑐷𑐫𑐵 𑐳𑑂𑐰𑐨𑐵𑐰, 𑐐𑐣𑑄 𑐕𑐸𑑄 𑐖𑐹𑐐𑐸 𑐑𑐚𑐣𑐵, 𑐩𑐣𑐹𑐫𑐵 𑐰𑐶𑐔𑐵𑐬, 𑐨𑐵𑐰, 𑐎𑐮𑑂𑐥𑐣𑐵 𑐥𑑂𑐬𑐟𑐶𑐎𑑂𑐬𑐶𑐫𑐵 𑐂𑐟𑑂𑐫𑐵𑐡𑐶 𑐠𑐸𑐂𑐎𑐾𑐟 𑐥𑑂𑐬𑐟𑐷𑐎𑐫𑐵 𑐬𑐹𑐥𑐫𑑂‌ 𑐕𑑂𑐫𑐮𑐷𑐐𑐸 𑐏: 𑑋 𑐢𑐵𑐫𑐾 𑐎𑐶 𑐳𑐦𑐹 𑐀𑐠𑐰𑐵 𑐎𑐶𑐟𑐵𑐧 𑐢𑐵𑐫𑐾𑐰𑑄 𑐨𑑂𑐰𑑃𑐟𑐫𑑂‌ 𑐁𑐏: 𑐔𑑂𑐰𑐫𑐵: 𑐕𑐠𑐵𑐫𑑂‌ 𑐥𑑄𑐔𑐶𑐣𑐵𑐟𑑅𑐐𑐸 𑐰𑐳𑑂𑐟𑐸 𑐢𑐎𑐵𑑅 𑐠𑐸𑐂𑐎𑐷 𑑋 𑐀𑐠𑐾 𑐴𑐾 𑐥𑐵𑐄𑑃 𑐢𑐵𑐫𑐾𑐰𑑄 𑐁𑐩𑐮𑐶𑐫𑐵𑐐𑐸 𑐀𑐔𑐵𑐬 𑐡𑐫𑐾𑐎𑐵𑐟𑑅𑐐𑐸 𑐰𑐳𑑂𑐟𑐸 𑐐𑐸𑐐𑐸 𑐣𑐵𑑄 𑐎𑐵𑐫𑐾𑐰𑑄 𑐩𑑂𑐴𑐸𑐟𑐸𑐂 𑐃 𑐧𑐸𑐫𑐵𑐰𑐂 𑑋 𑐢𑐫𑐵𑐐𑐸 𑐩𑐟𑐮𑐧 𑐥𑐵𑐄𑑃 𑐢𑐵𑐫𑐾𑐰𑑄 𑐳𑐩𑐸𑐣𑑂𑐡𑑂𑐬 𑐰𑐵 𑐥𑐴𑐵𑐜 𑐰𑐵 𑐔𑐣𑑂𑐡𑑂𑐬𑐩𑐵 𑐕𑐵𑐫𑑂‌ 𑐮𑐸𑐩𑐣𑐵 𑐩𑐰𑐮 ? 𑐔𑑂𑐰𑐫𑐾𑐧𑐮𑐫𑑂‌ 𑐣𑑄 /𑐥𑐵-/ 𑐕𑐐: 𑐰 /-𑐄𑑃/ 𑐕𑐐𑑅 𑐔𑑂𑐰𑐂 𑑋 𑐁𑐩𑐮𑐶𑐫𑐵 𑐥𑐷 𑐴𑐾 𑐕𑐵𑐫𑑂‌ 𑐩𑐔𑑂𑐰𑐮 𑑋 𑐀𑐗 𑐡𑐳𑐸 𑐎𑐵𑐫𑐾, 𑐕𑐾𑑃 𑐢𑐵𑐫𑐾𑐧𑐮𑐫𑑂‌ 𑐕, 𑐊𑐎𑐵𑐬, 𑐔𑐣𑑂𑐡𑑂𑐬𑐰𑐶𑐣𑑂𑐡𑐸 𑐴𑐾 𑐕𑐵𑐫𑑂‌ 𑐔𑑂𑐰𑐮 ? 𑐩𑐣𑐹𑐟 𑐔𑑂𑐰𑐣𑐷𑐐𑐸 𑐟𑐮𑑂𑐮𑐵-𑐟𑐮𑑂𑐮𑐵 𑐡𑐸𑐐𑐸 𑐥𑑁, 𑐗𑑂𑐫𑐵:, 𑐮𑐸𑐏𑐵: 𑐀𑐥𑑂𑐥𑐵𑑄 𑐡𑐣𑐵𑐟𑑅𑐐𑐸 𑐕𑐾𑑃𑐫𑐵 𑐁𑐎𑐵𑐬 𑐴𑐾 𑐕𑐵𑐫𑑂‌ 𑐩𑐔𑑂𑐰𑐮 ? 𑐄𑐎𑐶𑑄 𑐨𑐵𑐲𑐵 𑐢𑐫𑐵𑐐𑐸 𑐀𑐬𑑂𑐠𑐥𑐹𑐬𑑂𑐞 𑐰𑐵𑐎𑑂 𑐥𑑂𑐬𑐟𑐷𑐎 𑐖𑐹𑐐𑐸𑐮𑐶𑑄 𑐀𑐠𑐾 𑐔𑐶𑐟𑑂𑐬 𑐔𑑂𑐰𑐫𑐵𑑅 𑐩𑐏𑐸 𑐮𑐶𑐥𑐶𑑄 𑐨𑐵𑐲𑐵 𑐔𑑂𑐰𑐫𑐾𑐐𑐸 𑐫𑐵𑑅𑐐𑐸 𑐏𑑅 𑑋

𑑒. 𑐨𑐵𑐲𑐵𑐰𑐶𑐖𑑂𑐘𑐵𑐣

𑐀𑐢𑑂𑐫𑐫𑐣𑐫𑐵 𑐰𑐶𑐨𑐶𑐣𑑂𑐣 𑐰𑐶𑐲𑐫 𑐡𑐸 𑑋 𑐱𑐵𑐳𑑂𑐟𑑂𑐬 𑐣𑐵𑑄 𑐰𑐫𑐾𑐎 𑐀𑐬𑑂𑐠𑐱𑐵𑐳𑑂𑐟𑑂𑐬, 𑐟𑐬𑑂𑐎𑐱𑐵𑐳𑑂𑐟𑑂𑐬, 𑐡𑐬𑑂𑐱𑐣𑐱𑐵𑐳𑑂𑐟𑑂𑐬, 𑐬𑐵𑐖𑐣𑐷𑐟𑐶𑐱𑐵𑐳𑑂𑐟𑑂𑐬, 𑐳𑐩𑐵𑐖𑐱𑐵𑐳𑑂𑐟𑑂𑐬 𑐂𑐟𑑂𑐫𑐵𑐡𑐶 𑑋 𑐀𑐠𑐾 𑐴𑐾 𑐰𑐶𑐖𑑂𑐘𑐵𑐣 𑐣𑐵𑑄 𑐰𑐫𑐾𑐎 𑐐𑐺𑐴𑐰𑐶𑐖𑑂𑐘𑐵𑐣, 𑐩𑐣𑑀𑐰𑐶𑐖𑑂𑐘𑐵𑐣, 𑐨𑐵𑐲𑐵𑐰𑐶𑐖𑑂𑐘𑐵𑐣 𑐂𑐟𑑂𑐫𑐵𑐡𑐶 𑑋 𑐱𑐵𑐳𑑂𑐟𑑂𑐬 𑐰 𑐰𑐶𑐖𑑂𑐘𑐵𑐣𑐫𑐵 𑐰𑐶𑐲𑐫𑐮𑐫𑑂‌ 𑐏𑐵𑐳𑐿 𑐦𑐬𑐎 𑐩𑐡𑐸 𑑋 𑐄𑐎𑐶𑑄 Medical Science 𑐫𑐵𑐟 𑐔𑐶𑐎𑐶𑐟𑑂𑐳𑐵-𑐱𑐵𑐳𑑂𑐟𑑂𑐬 𑐣𑑄 𑐢𑐵𑑅 𑐔𑐶𑐎𑐶𑐟𑑂𑐳𑐵-𑐰𑐶𑐖𑑂𑐘𑐵𑐣 𑐣𑑄 𑐢𑐵: 𑑋 𑐀𑐠𑐾 𑐴𑐾 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵𑐟 𑐣𑑄 𑐨𑐵𑐲𑐵𑐱𑐵𑐳𑑂𑐟𑑂𑐬 𑐖𑐎 𑐣𑑄 𑐢𑐵𑑅 𑑋 𑐣𑑂𑐴𑑂𑐫𑐵𑐐𑐸 𑐴𑐾 𑐠𑐖𑐸 𑐔𑐮𑐣 𑐔𑐮𑑂𑐟𑐷 𑐥𑑂𑐬𑐫𑑀𑐐𑐵𑐟𑑂𑐩𑐎 𑐰𑐶𑐲𑐫 𑐡𑐸𑐐𑐸 𑐢𑐵𑐫𑐾𑐰 𑐰𑐶𑐖𑑂𑐘𑐵𑐣 𑐰 𑐩𑐡𑐸𑐐𑐸 𑐖𑐸𑐮 𑐢𑐵𑐫𑐾𑐰𑑄 𑐱𑐵𑐳𑑂𑐟𑑂𑐬 𑐢𑐫𑐵𑑅 𑐐𑐵𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐮𑐵 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐧𑐶𑐳𑑂𑐎𑑄 𑐨𑐵𑐲𑐵𑐱𑐵𑐳𑑂𑐟𑑂𑐬 𑐣𑑄 𑐢𑐵𑑅 𑑋 𑐮𑐶𑐥𑐵 𑐱𑐵𑐳𑑂𑐟𑑂𑐬𑐳𑐶𑐎𑑄 𑐰𑐶𑐖𑑂𑐘𑐵𑐣 𑐟𑐫𑐵: 𑐴𑐾 𑐣𑐵𑑄 𑐀𑐥𑑂𑐰𑑅 𑐔𑐮𑐫𑑂‌𑐖𑐸𑐮 𑑋

𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐠𑐵𑐳𑐫𑑂‌ 𑐨𑐵𑐲𑐵𑐖𑑂𑐘𑐵𑐣 𑐰𑐵 𑐨𑐵𑐲𑐵𑐱𑐶𑐎𑑂𑐲𑐵 𑐣𑐵𑑄 𑐔𑐵𑐴𑐶𑑄 𑐥𑑂𑐬𑐫𑑀𑐐𑐫𑑂‌ 𑐩𑐰: 𑐀𑐠𑐰𑐵 𑐠𑐸𑐐𑐸 𑐰𑐶𑐲𑐫𑐫𑐵𑐟 𑐨𑐵𑐲𑐵𑐖𑑂𑐘𑐵𑐣 𑐰𑐵 𑐨𑐵𑐲𑐵𑐱𑐶𑐎𑑂𑐲𑐵 𑐩𑐢𑐵: 𑑋 𑐀𑐠𑐾 𑐕𑐵𑐫𑑂‌ 𑐩𑐢𑐵𑐮 ? 𑐣𑑂𑐴𑑂𑐫𑐳𑑅 𑐡𑐣𑐾𑐦𑐸 𑑋 𑐧𑐬𑐸 𑐨𑐵𑐲𑐵𑐱𑐶𑐎𑑂𑐲𑐞 𑐢𑐫𑐵𑐐𑐸 𑐧𑐶𑐳𑑂𑐎𑑄 𑐴𑐾 𑐰𑐶𑐲𑐫 𑐡𑐸, 𑐟𑐬 𑐰 𑐨𑐵𑐲𑐵𑐰𑐶𑐖𑑂𑐘𑐵𑐣 𑐩𑐏𑐸 𑑋 𑐨𑐵𑐲𑐵𑐱𑐶𑐎𑑂𑐲𑐞 𑐢𑐵𑐫𑐾𑐧𑐮𑐫𑑂‌ 𑐨𑐵𑐲𑐵 𑐩𑐳:𑐩𑑂𑐴𑐾𑐳𑐶𑐟 𑐰𑐵 𑐡𑑀𑐳𑑂𑐬𑑀 𑐨𑐵𑐲𑐵 𑐐𑐠𑐾 𑐳𑑂𑐫𑐣𑐾𑐐𑐸 𑐢𑐫𑐵𑐐𑐸 𑐰𑐶𑐲𑐫 𑐏: 𑑋 𑐢𑐵𑐫𑐾 𑐎𑐶 𑐳𑐸𑑄 𑐕𑐩𑑂𑐴 𑐩𑐣𑐸𑐏𑑄 𑐠: 𑐐𑐸𑐬𑐸 𑐖𑐸𑐫𑐵: 𑐣𑐾𑐥𑐵𑐮𑐨𑐵𑐲𑐵 𑐩𑐳:𑐩𑑂𑐴𑐾𑐳𑐶𑐟 𑐐𑐠𑐾 𑐫𑐵𑐣𑐵: 𑐳𑑂𑐫𑐣𑐾 𑐢𑐫𑐵𑐐𑐸 𑐱𑐷𑐥 𑐰 𑐐𑐸𑐬𑐸 𑐖𑐹𑐩𑑂𑐴𑐾𑐳𑐶𑐎𑐾 𑐡𑐫𑐾𑐩𑐵:𑐐𑐸 𑐏𑐸𑐧𑐷 𑐏: 𑑋 𑐄𑐎𑐶 𑐨𑐵𑐲𑐵𑐱𑐶𑐎𑑂𑐲𑐞 𑐳𑑅𑐩𑑂𑐴𑐾𑐳𑑂𑐫𑐵𑑄 𑐩𑐳𑑅𑐥𑐶𑐣𑑂𑐟 𑐰𑐶𑐨𑐶𑐣𑑂𑐣 𑐨𑐵𑐲𑐵 𑐳𑑂𑐫𑐣𑐾 𑐦𑐫𑐾𑐦𑐸, 𑐟𑐬 𑐰 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐰𑐶𑐲𑐫 𑐩𑐏𑐸 𑑋 𑐀𑐠𑐾 𑐴𑐾 𑐨𑐵𑐲𑐵𑐖𑑂𑐘𑐵𑐣 𑐢𑐫𑐵𑐐𑐸 𑐣𑑄 𑐳𑐸𑑄 𑐕𑐩𑑂𑐴 𑐩𑐣𑐹𑐫𑐵𑐎𑐾 𑐳𑑄𑐐𑐟 𑐐𑐸𑐞𑐫𑐵 𑐩𑐵𑐢𑑂𑐫𑐩 𑐰𑐵 𑐀𑐢𑑂𑐫𑐫𑐣𑐫𑐵 𑐩𑐵𑐢𑑂𑐫𑐩 𑐰𑐶𑐨𑐶𑐣𑑂𑐣 𑐨𑐵𑐲𑐵𑐫𑐵 𑐖𑑂𑐘𑐵𑐣 𑐡𑐫𑐾𑐦𑐸 𑑋 𑐡𑐳𑐸𑐎𑐠𑑄 𑐳𑐵𑐩𑐵𑐣𑑂𑐫 𑐱𑐶𑐎𑑂𑐲𑐶𑐟 𑐣𑐾𑐰𑐵𑑅𑐟𑐫𑑂𑐎𑐾 𑐣𑑂𑐫𑐵𑐐𑐹 𑐨𑐵𑐲𑐵𑐫𑐵 𑐖𑑂𑐘𑐵𑐣 𑐡𑐸- 𑐣𑐾𑐥𑐵𑐮𑐨𑐵𑐲𑐵, 𑐣𑐾𑐥𑐵𑐮𑐷𑐨𑐵𑐲𑐵, 𑐴𑐶𑐣𑑂𑐡𑐷𑐨𑐵𑐲𑐵, 𑐳𑑄𑐳𑑂𑐎𑐺𑐟𑐨𑐵𑐲𑐵 𑐰 𑐀𑐒𑑂𑐐𑑂𑐬𑐾𑐖𑐷𑐨𑐵𑐲𑐵 𑑋 𑐠𑑂𑐰 𑐣𑑂𑐫𑐵𑐟𑐵 𑐨𑐵𑐲𑐵𑐫𑐵 𑐖𑑂𑐘𑐵𑐣 𑐡𑐸𑐳𑐵𑑄 𑐰𑐫𑐵𑐟 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐀𑐢𑑂𑐫𑐫𑐣 𑐡𑐸𑐩𑑂𑐴 𑐩𑐢𑐵𑐫𑐾𑐦𑐸 𑑋

𑐖𑑂𑐘𑐵𑐣
𑐳𑐵𑐩𑐵𑐣𑑂𑐫𑐟𑑅 𑐕𑐸𑑄 𑐀𑐣𑐸𑐨𑐰 𑐫𑐵𑐣𑐵: 𑐰𑐵 𑐧𑑂𑐰𑐣𑐵𑑅 𑐎𑐫𑐵𑐟𑑅𑐐𑐸 𑐳𑐸𑐔𑑄 𑐰𑐵 𑐳𑐷𑐥𑐫𑐵𑐟 𑐖𑑂𑐘𑐵𑐣 𑐢𑐵𑐂 𑑋 𑐠𑑂𑐰𑑃 𑐰𑐵 𑐀𑐫𑐾𑐮𑐵: 𑐟𑑂𑐰𑐣 𑐢𑐵𑐫𑐾𑐰𑑄 𑐂𑐎𑐸𑐂𑐫: 𑐢𑐫𑐵𑐐𑐸 𑐏𑑄 𑐳𑐸𑑄 𑐩𑐣𑐸𑐏𑑄 𑐕𑐸𑑄 𑐳𑐦𑐹 𑐧𑑂𑐰𑐣𑐵: 𑐰𑐵 𑐳𑐸𑐫𑐵𑑄𑐥𑐵𑐏𑐾𑑄 𑐣𑑂𑐫𑐣𑐵𑑅 𑐣𑑄 𑐳𑐷𑐎𑐵𑐎𑐵𑐫𑐾𑐦𑐸 𑑋 𑐠𑑂𑐰 𑐰𑐫𑐵𑐐𑐸 𑐀𑐢𑑂𑐫𑐫𑐣𑐫𑐵 𑐖𑑂𑐘𑐵𑐣 𑐏: 𑑋 𑐳𑐸𑑄 𑐩𑐣𑐸𑐏𑑄 𑐄𑐖𑑂𑐰𑑅𑐐𑐸 𑐰𑐳𑑂𑐟𑐸 𑐠𑑅𑐩𑑂𑐴𑐾𑐳𑑂𑐫𑐵𑑄 𑐟𑑂𑐰𑐣𑐵𑑅 𑐀𑐣𑐸𑐨𑐰 𑐫𑐵𑐣𑐵: 𑐣𑑄 𑐳𑐷𑐎𑐵𑐎𑐵𑐫𑐾𑐦𑐸 𑑋 𑐠𑑂𑐰 𑐰𑑄 𑐁𑐟𑑂𑐩𑐥𑑂𑐬𑐫𑑀𑐐𑐥𑐵𑐏𑐾𑑄 𑐳𑐫𑐾𑐎𑐵𑐎𑐵𑑅𑐐𑐸 𑐳𑐸𑐔𑑄 𑐰𑐵 𑐀𑐣𑐸𑐨𑐰 𑐏: 𑑋 𑐠𑐸𑐎𑐠𑑄 𑐥𑑂𑐬𑐫𑑀𑐐 𑐫𑐵𑐣𑐵: 𑐰𑐵 𑐀𑐢𑑂𑐫𑐫𑐣 𑐫𑐵𑐣𑐵: 𑐣𑑂𑐴𑑂𑐫𑐵𑐏𑐾𑑄 𑐳𑐵𑑄 𑐰𑑄 𑐎𑐵𑑅𑐐𑐸 𑐳𑐸𑐔𑑄 𑐰𑐵 𑐥𑑂𑐬𑐫𑑀𑐐𑐥𑐵𑐏𑐾𑑄 𑐳𑐫𑐾𑐎𑐵𑐟:𑐐𑐸 𑐣𑑄 𑐖𑑂𑐘𑐵𑐣 𑐴𑐾 𑐏𑑅 𑑋 𑐨𑐵𑐲𑐵𑐖𑑂𑐘𑐵𑐣 𑐢𑐫𑐵𑐐𑐸 𑐣𑑄 𑐳𑐸𑑄 𑐩𑐣𑐸𑐏𑑄 𑐐𑐣𑑄 𑐧𑑂𑐰𑐣𑐵𑑅 𑐰𑐵 𑐳𑐸𑐫𑐵𑑄𑐥𑐵𑐏𑐾𑑄 𑐕𑐸𑑄 𑐨𑐵𑐲𑐵𑐫𑐵 𑐰𑐶𑐲𑐫𑐫𑑂‌ 𑐳𑐫𑐾𑐎𑐵𑐟:𑐐𑐸 𑐴𑐾 𑐨𑐵𑐲𑐵𑐖𑑂𑐘𑐵𑐣 𑐏: 𑑋

𑐱𑐶𑐎𑑂𑐲𑐵
𑐱𑐶𑐎𑑂𑐲𑐵 𑐢𑐫𑐵𑐐𑐸 𑐖𑑂𑐘𑐵𑐣𑐳𑐶𑐎𑑄 𑐀𑐗 𑐕𑐥𑐮𑐵𑑅 𑐣𑑂𑐴𑑂𑐫𑑅𑐣𑐾𑐫𑐵 𑐏𑑃 𑐏𑑅 𑑋 𑐀𑐫𑐾𑐮𑐵𑑅 𑐰𑐵 𑐠𑑂𑐰𑑃 𑐟𑑂𑐰𑐣 𑐢𑐵𑐫𑐾𑐰𑑄 𑐩𑐣𑐹𑐫𑐵 𑐧𑐵𑐣𑐶 𑐰 𑐳𑑂𑐰𑐵𑐳𑑂𑐠𑑂𑐫 𑐳𑑂𑐫𑐣𑐾𑐫𑑅 𑑋 𑐠𑑂𑐰 𑐳𑐎𑐳𑐶𑐣𑑄 𑐳𑑂𑐫𑐹𑐐𑐸 𑐏𑑃 𑐏: 𑑋 𑐀𑐠𑐾 𑐣𑑄 𑐠𑑂𑐰𑑃 𑐀𑐫𑐾𑐮𑐵: 𑐟𑑂𑐰𑐣𑐾𑐐𑐸 𑐳𑑄𑐳𑑂𑐎𑐵𑐬 𑐡𑐸𑐥𑐶𑑄𑐳𑑄 𑐠𑐸𑐎𑐶𑐫𑐵𑐟 𑐧𑐴𑐶𑐲𑑂𑐎𑐵𑐬 𑐩𑐫𑐵𑑅𑐥𑐶𑑄 𑐡𑐸 𑑋 𑐂𑐩𑐶𑐎𑐾 𑐄𑐎𑐶𑐫𑐵 𑐠𑑅𑐐𑐸 𑐴𑐾 𑐎𑐠𑑄𑐫𑐵 𑐟𑐬𑑂𑐎 𑐡𑐫𑐾𑐦𑐸 𑑋 𑐩𑐾𑐏𑐾 𑐠𑑂𑐰𑑃 𑐰𑐵 𑐀𑐫𑐾𑐮𑐵: 𑐟𑑂𑐰𑐣𑐾 𑐢𑐫𑐵𑐐𑐸 𑐛𑐶𑐎𑐐𑐸 𑐧𑐵𑐣𑐶 𑐩𑐏𑐸, 𑐠𑑂𑐰 𑐏𑑃 𑐰𑑄 𑐳𑑂𑐫𑐹𑑋 𑐀𑐠𑐾 𑐣𑑄 𑐟𑑂𑐰𑑅𑐟𑐷𑐩𑐏𑐸 𑐰𑐵 𑐟𑑂𑐰𑑅𑐟𑐾𑐩𑐦𑐸 𑑋 𑐟𑑂𑐰𑐣𑐾𑐩𑐖𑑂𑐫𑐹 𑐢𑐫𑐵𑐐𑐸 𑐰𑑄 𑐳𑑂𑐫𑐹 𑑋 𑐄𑐎𑐶𑑄 𑐰 𑐰𑐫𑐵𑐎𑐾 𑐡𑐸𑐐𑐸 𑐖𑑂𑐘𑐵𑐣 𑐏:𑑋 𑐖𑐧 𑐰 𑐩𑐣𑐸𑐏𑑄 𑐀𑐖𑑂𑐫𑐵𑑅𑐐𑐸 𑐣𑐱𑐵𑐮𑐸 𑐥𑐡𑐵𑐬𑑂𑐠 𑐟𑑂𑐰𑐣𑐾𑐩𑐖𑑂𑐫𑐹 𑐢𑐎𑐵𑑅 𑐣𑑄 𑐳𑑂𑐫𑐸, 𑐟𑑂𑐰𑑃 𑐣𑑄 𑐩𑐟𑑂𑐰𑑄 𑐢𑐵𑑅𑐳𑐵 𑐠𑑂𑐰 𑐰𑐫𑐵𑐎𑐾 𑐖𑑂𑐘𑐵𑐣 𑐣𑑄 𑐏𑑅, 𑐱𑐶𑐎𑑂𑐲𑐵 𑐣𑑄 𑐏𑑅 𑑋 𑐨𑐵𑐲𑐵𑐱𑐶𑐎𑑂𑐲𑐵 𑐢𑐫𑐵𑐐𑐸 𑐣𑑄 𑐳𑐸𑑄 𑐰𑑂𑐫𑐎𑑂𑐟𑐶𑐫𑐵𑐎𑐾 𑐨𑐵𑐲𑐵𑐫𑐵 𑐰𑐶𑐲𑐫𑐳 𑐖𑑂𑐘𑐵𑐣 𑐖𑐎 𑐩𑐏𑐸 𑐄𑐎𑐶𑐫𑐵 𑐰𑑂𑐫𑐵𑐰𑐴𑐵𑐬𑐶𑐎𑐟𑐵 𑐡𑐸𑐐𑐸 𑐏𑑃 𑐴𑐾 𑐨𑐵𑐲𑐵𑐱𑐶𑐎𑑂𑐲𑐵 𑐏𑑅𑑋

𑐰𑐶𑐖𑑂𑐘𑐵𑐣
𑐕𑐸𑑄 𑐕𑐐𑐹 𑐰𑐶𑐲𑐫𑐳 𑐰𑐿𑐖𑑂𑐘𑐵𑐣𑐶𑐎 𑐝𑐵𑑃𑐔𑐵𑑄 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐴𑐾 𑐰𑐶𑐖𑑂𑐘𑐵𑐣 𑐏: 𑑋 𑐁: 𑐠𑐣 𑐏𑑃 𑐰𑐂 𑐰𑐿𑐖𑑂𑐘𑐵𑐣𑐶𑐎 𑐝𑐵𑑃𑐔𑐵 𑐢𑐫𑐵𑐐𑐸 𑐕𑐸 𑐰 𑐐𑐠𑐾 𑐀𑐢𑑂𑐫𑐫𑐣 𑐫𑐵𑐂𑐐𑐸 𑐏: ? 𑐡𑐎𑐮𑐫𑑂‌ 𑐣𑑂𑐴𑐵𑐥𑐵𑐮𑐵𑐎 𑐄𑐐𑐸 𑐰𑐶𑐲𑐫𑐳 𑐀𑐢𑑂𑐫𑐫𑐣 𑐫𑐵𑐣𑐵: 𑐄𑐐𑐸 𑐰𑐶𑐲𑐫, 𑐰𑐵 𑐰𑐳𑑂𑐟𑐸𑐫𑐵 𑐳𑑂𑐰𑐬𑐹𑐥 𑐳𑐷𑐎𑐾𑐐𑐸 𑐖𑐸𑐂 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐕𑐐𑐹 𑐳𑐶𑐡𑑂𑐢𑐵𑐣𑑂𑐟 𑐟𑐫𑐵𑐬 𑐫𑐵𑐫𑐾𑐐𑐸 𑐖𑐸𑐂 𑑋 𑐀𑐮𑐾 𑐠𑑅𑐩𑑂𑐴𑐾𑐳𑑂𑐫𑐵𑑄 𑐟𑐫𑐵𑐬 𑐫𑐵𑐣𑐵𑐐𑐸 𑐳𑐶𑐡𑑂𑐢𑐵𑐣𑑂𑐟𑐫𑑂‌ 𑐥𑑂𑐬𑐫𑑀𑐐 𑐫𑐵𑐣𑐵: 𑐳𑑂𑐰𑐫𑐾𑐐𑐸 𑐖𑐸𑐂 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐠𑑅𑐩𑑂𑐴𑐾𑐳𑑂𑐫𑐵𑑄 𑐥𑐬𑐶𑐎𑐮𑑂𑐥𑐣𑐵 𑐟𑐫𑐵𑐬 𑐫𑐵𑐫𑐾𑐩𑐵𑐮𑐾𑐦𑐸 𑑋 𑐕𑐐𑐹 𑐡𑐳𑐸 𑐎𑐵𑐫𑐾- 𑐳𑐸𑑄 𑐕𑐩𑑂𑐴 𑐩𑐣𑐸𑐏𑑄 𑐰𑐵 𑐰𑐿𑐖𑑂𑐘𑐵𑐣𑐶𑐎𑑄 𑐮: (Water) 𑐫𑐵 𑐰𑐶𑐲𑐫𑐳 𑐀𑐢𑑂𑐫𑐫𑐣 𑐫𑐵𑐟 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐡𑐎𑐮𑐫𑑂‌ 𑐣𑑂𑐴𑐵𑐥𑐵𑐮𑐵𑐎 𑐮𑑅𑐫𑐵 𑐳𑑂𑐰𑐬𑐹𑐥 𑐳𑐷𑐎𑐾𑐐𑐸 𑐎𑐸𑐟: 𑐫𑐵𑐂 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐰𑐫𑑂‌𑐎𑐮𑑄 𑐰𑐬𑑂𑐞𑐣𑐵𑐟𑑂𑐩𑐎 𑐀𑐢𑑂𑐫𑐫𑐣 𑐫𑐵𑐂 𑑋 𑐀𑐮𑐾 𑐰𑐫𑑂‌𑐎𑐮𑑄 𑐮𑑅𑐫𑐵 𑐳𑐶𑐡𑑂𑐢𑐵𑐣𑑂𑐟𑐫𑑂‌ 𑐥𑐵𑐫𑑂𑐕𑐶 𑐖𑐹 𑐮𑐵𑐎𑐶 𑐩𑐖𑐹 𑐢𑐎𑐵: 𑐥𑑂𑐬𑐫𑑀𑐐 𑐫𑐵𑐣𑐵𑐳𑑂𑐰𑐂 𑑋 𑐀𑐢𑑂𑐫𑐫𑐣𑐫𑐵 𑐀𑐣𑑂𑐟𑐫𑑂‌ 𑐰𑐫𑑂‌𑐎𑑅𑐫𑐵 𑐥𑐬𑐶𑐎𑐮𑑂𑐥𑐣𑐵 𑐥𑐵𑐫𑑂𑐕𑐶 𑐖𑐸𑐂 𑐣𑑄 𑐦𑐸 𑐩𑐖𑐸𑐂 𑐣𑑄 𑐦𑐸𑑋 𑐫𑐡𑐶 𑐰𑐫𑑂‌𑐎:𑐫𑐵𑐎𑐾 𑐥𑐹𑐬𑑂𑐰 𑐀𑐢𑑂𑐫𑐫𑐣𑐫𑐵 𑐖𑑂𑐘𑐵𑐣 𑐫𑐎𑑂𑐰 𑐡𑐸𑐳𑐵 𑐥𑐬𑐶𑐎𑐮𑑂𑐥𑐣𑐵 𑐣𑑄 𑐥𑐵𑐫𑑂𑐕𑐶 𑐖𑐸𑐂𑐎 𑐟𑐫𑐾𑐦𑐂 𑑋

𑐣𑐶𑐐𑐹𑐐𑐸 𑐏𑑃 𑐟𑐠𑑂𑐫𑐵𑐒𑑂𑐎 𑐩𑐸𑑄𑐎𑐾𑐐𑐸 𑐀𑐢𑑂𑐫𑐫𑐣𑐎𑐬𑑂𑐟𑐵𑑄 𑐐𑐸𑐐𑐸 𑐮:𑐫𑐵 𑐀𑐢𑑂𑐫𑐫𑐣 𑐫𑐵:𑐐𑐸 𑐏𑑅 𑐄𑐐𑐸 𑐮𑑅𑐫𑐵 𑐟𑐠𑑂𑐫𑐵𑐒𑑂𑐎 𑐫𑐎𑑂𑐰 𑐩𑐸𑑄𑐎𑐾𑐐𑐸 𑐁𑐰𑐱𑑂𑐫𑐎 𑐖𑐹 𑑋 𑐟𑐠𑑂𑐫𑐵𑐒𑑂𑐎 𑐩𑐸𑐣𑐾𑐰𑑄 𑐄𑐎𑐶𑐫𑐵 𑐳𑑄𑐱𑑀𑐢𑐣 𑐫𑐵𑐫𑐾𑐐𑐸, 𑐥𑑂𑐬𑐱𑑀𑐢𑐣 𑐫𑐵𑐫𑐾𑐐𑐸 𑐁𑐰𑐱𑑂𑐫𑐎 𑐖𑐸𑐂 𑑋 𑐀𑐣𑑄𑐮𑐶 𑐚𑐾𑐧𑐸𑐮𑐾𑐱𑐣 𑐫𑐵𑐫𑐾𑐐𑐸 𑐁𑐰𑐱𑑂𑐫𑐎 𑐖𑐸𑐂 𑑋 𑐀𑐮𑐾 𑐕𑐐𑐹 𑐣𑐶𑐱𑑂𑐔𑐶𑐟 𑐁𑐎𑐵𑐬 𑐮𑐸𑐂 𑑋 𑐕𑐐𑐹 𑐣𑐶𑐱𑑂𑐔𑐶𑐟 𑐬𑐹𑐥𑐬𑐾𑐏𑐵 𑐟𑐫𑐵𑐬 𑐖𑐸𑐂 𑑋 𑐢𑐵𑐫𑐾 𑐎𑐶 𑐄𑐩𑑂𑐴 𑐰𑐿𑐖𑑂𑐘𑐵𑐣𑐶𑐎 𑐳𑐕𑐶 𑐠𑐵𑐳𑐫𑑂‌𑐫𑐵𑐐𑐸 𑐮𑑅 𑐩𑐸𑑄𑐎𑐮 𑑋 𑐠𑑂𑐰 𑐰𑐫𑐹𑐎𑑅𑐫𑐵𑐐𑐸 𑐟𑐠𑑂𑐫𑐵𑐒𑐎 𑐖𑐸𑐮 𑑋 𑐁: 𑐰𑐫𑑂‌𑐎𑐮𑑄 𑐀𑐢𑑂𑐫𑐫𑐣 𑐫𑐵𑐫𑐾𑐟𑑂𑐫𑐣𑐵𑐐𑐸 𑐕𑐸 ? 𑐮𑑅 𑐴𑐵𑐰𑐵𑑄 𑐣𑐶𑐬𑑂𑐩𑐵𑐞 𑐖𑐸𑐂 𑐢𑐎𑐵: 𑐀𑐢𑑂𑐫𑐫𑐣 𑐫𑐵𑐫𑐾𑐟𑑂𑐫𑐣𑐵𑐐𑐸 𑐮𑐵𑐎𑐶 𑐮𑑅 𑐠𑐸𑐖𑑂𑐰:𑐐𑐸 𑐰𑐳𑑂𑐟𑐸 𑐏:, 𑐐𑐸𑐐𑐸 𑐕𑐸𑑄 𑐰𑐳𑑂𑐟𑐸 𑐣𑑄 𑐣𑐶𑐬𑑂𑐩𑐵𑐞 𑐖𑐸𑐂𑐩𑐏𑐸 𑐢𑐎𑐵: 𑐀𑐢𑑂𑐫𑐫𑐣 𑐫𑐵𑐫𑐾𑐟𑑂𑐫𑐣𑐵𑐐𑐸 ? 𑐠𑑂𑐰 𑐏𑑃𑐫𑑂‌ 𑐰𑐫𑑂‌𑐎: 𑐣𑑂𑐴𑐵𑐥𑐵 𑐴𑐾 𑐳𑑂𑐥𑐲𑑂𑐚 𑐖𑐸𑐂𑐩𑐵: 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐥𑑂𑐬𑐫𑑀𑐐𑐱𑐵𑐮𑐵𑐫𑐵 𑐁𑐰𑐱𑑂𑐫𑐎 𑐖𑐸𑐂 𑑋 𑐥𑑂𑐬𑐫𑑀𑐐𑐱𑐵𑐮𑐵𑑄 𑐰𑑅𑐐𑐸 𑐟𑐠𑑂𑐫𑐵𑐒𑑂𑐎𑐎𑐫𑐵𑐟 𑐚𑐾𑐧𑐸𑐮𑐾𑐱𑐣 𑐫𑐵𑐫𑐾𑐩𑐵𑐮𑐷 𑑋 𑐀𑐮𑐾 𑐰𑑂𑐫𑐵𑐏𑑂𑐫𑐵 𑐰𑐶𑐱𑑂𑐮𑐾𑐲𑐞 𑐫𑐵𑐂 𑑋 𑐳𑐵𑐢𑐵𑐬𑐞𑐷𑐎𑐬𑐞 𑐫𑐵𑐂 𑑋 𑐀𑐣𑑂𑐟𑐶𑐩𑐫𑑂‌ 𑐕𑐐𑐹 𑐮𑐶𑐔𑑂𑐰𑑅 𑐥𑐶𑐎𑐵𑐂 𑑋 𑐰 𑐰𑐫𑐵𑐐𑐸 𑐄𑐥𑐮𑐧𑑂𑐢𑐷 𑐖𑐸𑐂 𑑋 𑐠𑐸𑐎𑐠𑑄 𑐰𑐿𑐖𑑂𑐘𑐵𑐣𑐶𑐎 𑐀𑐢𑑂𑐫𑐫𑐣𑐫𑑂‌ 𑐕𑐐𑐹 𑐢𑐸𑑄𑐎𑐵: 𑐩𑐾𑐐𑐸 𑐠𑐠𑐾 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐐𑐸𑐐𑐸 𑐰𑑂𑐫𑐰𑐳𑑂𑐠𑐵 𑐡𑐸 𑐰 𑐴𑐾 𑐰𑐿𑐖𑑂𑐘𑐵𑐣𑐶𑐎 𑐝𑐵𑑃𑐔𑐵 𑐏: 𑑋 𑐠𑐸𑐐𑐸 𑐐𑐸𑐞 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑑂‌ 𑐡𑐸𑐐𑐸 𑐖𑐸𑐫𑐵: 𑐨𑐵𑐲𑐵 𑐀𑐢𑑂𑐫𑐫𑐣𑐫𑐵𑐟 𑐨𑐵𑐲𑐵𑐰𑐶𑐖𑑂𑐘𑐵𑐣 𑐢𑐵:𑐐𑐸 𑐏𑑅 𑑋

𑐨𑐵𑐲𑐵𑐰𑐶𑐖𑑂𑐘𑐵𑐣 𑐢𑐫𑐵𑐐𑐸 𑐣𑑄 𑐄𑐖𑑂𑐰𑑅𑐐𑐸 𑐰𑐶𑐲𑐫 𑐴𑐾 𑐏:, 𑐐𑐸𑐐𑐸 𑐨𑐵𑐲𑐵𑐫𑐵 𑐰𑐶𑐲𑐫𑐳 𑐰𑐿𑐖𑑂𑐘𑐵𑐣𑐶𑐎 𑐝𑐵𑑃𑐔𑐵 𑐀𑐢𑑂𑐫𑐫𑐣 𑐫𑐵𑐂 𑑋 𑐄𑐎𑐶𑑄 Linguistics is the scientific study of language (Vashney,1994 : 11) 𑐢𑐵𑑅𑐐𑐸 𑐏: 𑑋 𑐩𑐾𑐩𑐾𑐐𑐸 𑐱𑐵𑐳𑑂𑐟𑑂𑐬 𑐰𑐵 𑐰𑐶𑐖𑑂𑐘𑐵𑐣 𑐠𑐾𑑄 𑐟𑐸𑑄 𑐠𑐸𑐐𑐸 𑐨𑐵𑐲𑐵𑐰𑐶𑐖𑑂𑐘𑐵𑐣 𑐧𑐶𑐲𑐫 𑐣𑑄 𑐰𑐶𑐱𑐶𑐲𑑂𑐚 𑐰 𑐥𑐬𑐶𑐨𑐵𑐲𑐶𑐟 𑐖𑐹𑐐𑐸 𑐰𑐶𑐲𑐫 𑐏: 𑑋 𑐠𑑂𑐰 𑐏𑐵𑐳 𑐁𑐎𑐵𑐬 𑐡𑐸𑐐𑐸 𑐰 𑐣𑐶𑐱𑑂𑐔𑐶𑐟 𑐬𑐹𑐥𑐬𑐾𑐏𑐵 𑐡𑐸𑐐𑐸 𑐰𑐶𑐲𑐫 𑐏: 𑑋 𑐄𑐎𑐶𑑄 𑐠𑑂𑐰 𑐱𑐵𑐳𑑂𑐟𑑂𑐬 𑐰𑐵 𑐰𑐶𑐖𑑂𑐘𑐵𑐣𑐀𑐣𑑂𑐟𑐬𑑂𑐐𑐟𑐫𑐵 𑐰𑐶𑐲𑐫𑐎𑐠𑑄 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐰𑐶𑐲𑐫 𑐖𑐸𑐫𑐵: 𑐨𑐵𑐲𑐵𑐰𑐿𑐖𑑂𑐘𑐵𑐣𑐶𑐎 𑐢𑐵𑑅𑐐𑐸 𑐖𑐸𑐮 𑑋 𑐢𑐵𑐫𑐾 𑐎𑐶 𑐣𑐾𑐥𑐵𑐮𑐨𑐵𑐲𑐵 𑐢𑐫𑐵𑐐𑐸 𑐳𑑄𑐳𑑂𑐎𑐺𑐟 𑐨𑐵𑐲𑐵𑑄 𑐰𑐶𑐎𑐵𑐳 𑐖𑐸𑐫𑐵𑐰𑐐𑐸 𑐨𑐵𑐲𑐵 𑐏𑑅𑑋 𑐠𑑂𑐰 𑐨𑐵𑐲𑐵 𑐀𑐢𑑂𑐫𑐫𑐣 𑐫𑐵𑐂𑐩𑑂𑐴𑐾𑐳𑐶𑐫𑐵 𑐎𑐮𑑂𑐥𑐣𑐵 𑐖𑐸𑐂𑐦𑐸 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑐮𑐵𑐎 𑐣𑐾𑐥𑐵𑐮𑐨𑐵𑐲𑐵𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸, 𑐄𑐎𑐶𑐫𑐵 𑐳𑑂𑐰𑐬𑐹𑐥 𑐳𑐷𑐎𑐾𑐐𑐸 𑐎𑐸𑐟: 𑐫𑐵𑐂 𑑋 𑐄𑐐𑐸 𑐨𑐵𑐲𑐵𑐫𑐵 𑐟𑐠𑑂𑐫𑐵𑐒𑑂𑐎 𑐩𑐸𑑄𑐎𑐷 𑑋 𑐟𑐠𑑂𑐫𑐵𑐒𑑂𑐎 𑐩𑐸𑐣𑐾𑐰𑑄 𑐄𑐎𑐶𑐫𑐵 𑐳𑑄𑐱𑑀𑐢𑐣 𑐫𑐵𑐫𑐾𑐐𑐸, 𑐥𑑂𑐬𑐱𑑀𑐢𑐣 𑐫𑐵𑐫𑐾𑐐𑐸 𑐁𑐰𑐱𑑂𑐫𑐎 𑐖𑐸𑐂 𑑋 𑐀𑐣𑑄𑐮𑐶 𑐚𑐾𑐧𑐸𑐮𑐾𑐱𑐣 𑐫𑐵𑐫𑐾𑐐𑐸 𑐁𑐰𑐱𑑂𑐫𑐎 𑐖𑐸𑐂 𑑋 𑐀𑐮𑐾 𑐰𑑂𑐫𑐵𑐏𑑂𑐫𑐵 𑐰𑐶𑐱𑑂𑐮𑐾𑐲𑐞 𑐫𑐵𑐂 𑑋 𑐕𑐐𑐹 𑐳𑐵𑐢𑐵𑐬𑐞𑐷𑐎𑐬𑐞 𑐫𑐵𑐂 𑑋 𑐀𑐣𑑂𑐟𑐶𑐩𑐫𑑂‌ 𑐕𑐐𑐹 𑐮𑐶𑐔𑑂𑐰: 𑐥𑐶𑐎𑐵𑐂 𑑋 𑐰 𑐰𑐫𑐵𑐐𑐸 𑐄𑐥𑐮𑐧𑑂𑐢𑐷 𑐖𑐸𑐂 𑑋 𑐀𑐮𑐾 𑐕𑐐𑐹 𑐣𑐶𑐱𑑂𑐔𑐶𑐟 𑐁𑐎𑐵𑐬 𑐰 𑐣𑐶𑐱𑑂𑐔𑐶𑐟 𑐬𑐹𑐥𑐬𑐾𑐏𑐵 𑐟𑐫𑐵𑐬 𑐖𑐸𑐂 𑑋 𑐀𑐮𑐾 𑐣𑐾𑐥𑐵𑐮𑐨𑐵𑐲𑐵 𑐢𑐫𑐵𑐐𑐸 𑐳𑑄𑐳𑑂𑐎𑐺𑐟𑐨𑐵𑐲𑐵𑑄 𑐰𑐶𑐎𑐵𑐳 𑐖𑐹𑐐𑐸 𑐏𑑅 𑐮𑐵𑐎𑐶 𑐩𑐏𑐸 𑐢𑐎𑐵𑑅 𑐳𑐷𑐡𑐂 𑑋 𑐠𑐸𑐎𑐠𑑄 𑐟𑐠𑑂𑐫𑐵𑐒𑑂𑐎, 𑐰𑐶𑐱𑑂𑐮𑐾𑐲𑐞, 𑐥𑐬𑐷𑐎𑑂𑐲𑐞, 𑐳𑐵𑐢𑐵𑐬𑐞𑐷𑐎𑐬𑐞, 𑐳𑐟𑑂𑐫 𑐏𑑃𑐫𑐵 𑐣𑐶𑐲𑑂𑐎𑐬𑑂𑐲 𑐥𑐶𑐎𑐵𑐂𑐐𑐸, 𑐠𑐸𑐐𑐸 𑐢𑐸𑑄𑐎𑐵𑑅 𑐠𑐸𑐐𑐸 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐰𑑂𑐫𑐰𑐳𑑂𑐠𑐵 𑐡𑐸 𑑋 𑐠𑐸𑐎𑐠𑑄𑐫𑐵 𑐰𑑂𑐫𑐰𑐳𑑂𑐠𑐶𑐟 𑐀𑐢𑑂𑐫𑐫𑐣𑐫𑐵 𑐰𑐶𑐲𑐫 𑐖𑐸𑐫𑐵: 𑐠𑐸𑐐𑐸 𑐰𑐶𑐲𑐫𑐫𑐵𑐟 𑐨𑐵𑐲𑐵𑐰𑐶𑐖𑑂𑐘𑐵𑐣 𑐢𑐵𑑅𑐐𑐸 𑐖𑐸𑐮 𑑋𑐨𑐵𑐲𑐵 𑐰 𑐨𑐵𑐲𑐵𑐰𑐶𑐖𑑂𑐘𑐵𑐣𑐫𑐵 𑐥𑐬𑐶𑐔𑐫