𑐩𑐾𑐚𑑂𑐬𑑀𑐫𑐵 𑐬𑐘𑑂𑐖𑐣𑐵 𑐮𑐶𑐥𑐶 𑐔𑑂𑐰𑐖𑑂𑐫𑐵 𑐎𑐵𑐳𑐵

𑐫𑐾𑑃 – 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐩𑐾𑐚𑑂𑐬𑑀 𑐊𑐦𑐊𑐩 𑑙𑑔.𑑖 𑐩𑐾𑐐𑐵𑐴𑐬𑑂𑐖𑐫𑐵 𑑒𑑐 𑐎𑑂𑐰𑑅𑐐𑐸 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐖𑐹𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶 𑐔𑑂𑐰𑐖𑑂𑐫𑐵 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵 𑐎𑑂𑐰𑐔𑐵𑐮 𑑋 𑐠𑐣𑐫𑐵 𑐧𑐳𑐣𑑂𑐟𑐥𑐸𑐮𑐷 𑐔𑑂𑐰𑑄𑐐𑐸 𑐣𑐰 𑐁𑐡𑐬𑑂𑐱 𑐩𑐵.𑐰𑐶.𑐂 𑐖𑐹𑐐𑐸 𑐮𑐶𑐥𑐶 𑐔𑑂𑐰𑐖𑑂𑐫𑐵 𑐎𑐵𑐳𑐵𑐫𑑂 𑐔𑐫𑑂𑐣𑑂𑐴𑐫𑑂𑐩𑑂𑐴𑐾𑐳𑐶𑐣𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋 𑐄𑐐𑐸 𑐮𑐶𑐥𑐶 𑐔𑑂𑐰𑐖𑑂𑐫𑐵 𑐎𑐵𑐳𑐵𑐫𑑂 𑐫𑐾𑑃, 𑐫𑐮, 𑐏𑑂𑐰𑐥, 𑐟𑑀𑐏𑐵, 𑐩𑐣𑐩𑐫𑑂𑐖𑐸, 𑐠𑐳𑐶, 𑐠𑐾𑐔𑑂𑐰, 𑐳𑐎𑑂𑐰, 𑐠𑐶𑐩𑐶, 𑐣𑐿𑐎𑐵𑐥 𑐁𑐡𑐶 𑐠𑐵𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐳𑐹𑐔𑐣𑐵 𑐥𑑂𑐬𑐰𑐶𑐢𑐶 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐬𑐵𑐖𑑂𑐫𑐥𑑂𑐬𑐎𑐵𑐱 𑐥𑑂𑐬𑐢𑐵𑐣𑐵𑑄𑐐 𑐮𑐶𑐥𑐶 𑐔𑑂𑐰𑐖𑑂𑐫𑐵 𑐎𑐵𑐳𑐵𑐫𑐵 𑐣𑑂𑐴𑑂𑐫𑐳𑑅𑐥𑑁 𑐳𑐵𑐬𑑂𑐰𑐖𑐣𑐶𑐎 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅𑑋 𑐮𑐶𑐥𑐶 𑐔𑑂𑐰𑐖𑑂𑐫𑐵 𑐎𑐵𑐳𑐵𑐫𑐵 𑐄𑐮𑐾𑐖𑑂𑐫𑐵 𑐫𑐵𑐳𑐾𑑄 𑐰𑐫𑑂𑐎𑐮𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐔𑐵𑐮𑐸 𑐁𑐬𑑂𑐠𑐶𑐎 𑐡𑑃𑐫𑑂 𑐎𑐵𑑅𑐐𑐸 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐣𑐷𑐟𑐶𑐎𑐠𑑄 𑐴𑐾 𑐠𑐸𑐎𑐠𑑄𑐫𑐵 𑐮𑐶𑐥𑐶 𑐔𑑂𑐰𑐖𑑂𑐫𑐵 𑐎𑐵𑐳𑐵 𑐖𑐸𑐫𑐵𑐔𑑂𑐰𑑄𑐐𑐸 𑐰 𑐊𑐦𑐊𑐩𑐫𑐵 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐠𑐸𑐎𑐠𑑄 𑐣𑐾𑐥𑐵𑑅𑐫𑐵 𑐩𑑂𑐴𑐳𑐷𑐎𑐵 𑐖𑐸𑐫𑐵𑐔𑑂𑐰𑑄𑐐𑐸 𑐮𑐶𑐥𑐶 𑐔𑑂𑐰𑐖𑑂𑐫𑐵 𑐎𑐵𑐳𑐵 𑐫𑐵𑐫𑐾 𑐏𑑄𑐐𑐸𑐮𑐶𑑄 𑐠𑑅 𑐟𑐳𑐎𑑄 𑐮𑐫𑑂𑐟𑐵𑑅𑐐𑐸 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐠𑑅𑐥𑐶𑑄𑐳𑑄 𑐧𑐶𑐔𑐵𑑅 𑐫𑐵𑐣𑐵𑐐𑐸 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐎𑐵𑐳𑐵𑐩𑐶𑐥𑐶𑑄𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸𑐮𑐶𑑄 𑐠𑑂𑐰 𑐖𑑂𑐫𑐵𑐗𑑂𑐰𑑅 𑐳𑐦𑐮 𑐖𑐹𑐐𑐸 𑐖𑐎 𑐩𑐏𑐸𑐳𑐾𑑄 𑐮𑐶𑐥𑐶𑐫𑐵 𑐩𑐴𑐟𑑂𑐰 𑐐𑐸𑐮𑐶 𑐡𑐸 𑐢𑐂𑐐𑐸 𑐧𑐵𑐬𑐾 𑐣𑑄 𑐳𑑂𑐥𑐲𑑂𑐚 𑐖𑐹 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐮𑐶𑐥𑐶 𑐎𑐵𑐳𑐵𑐫𑐵 𑐣𑐶𑑄𑐟𑐶𑑄 𑐥𑑂𑐬𑐵𑐰𑐶𑐢𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐣𑑂𑐰𑐎𑐸 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐮𑐶𑐥𑐶𑐫𑐵 𑐩𑐴𑐟𑑂𑐰 𑐰 𑐮𑐶𑐥𑐶 𑐔𑑂𑐰𑐫𑐾𑐧𑐮𑐫𑑂 𑐢𑑂𑐫𑐵𑐣 𑐧𑐷𑐩𑐵𑑅𑐐𑐸 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐢𑑂𑐰𑐵𑐠𑐸𑐂𑐎𑐵𑐡𑐷𑐐𑐸 𑐏𑑅 𑑋
𑐮𑐶𑐥𑐶 𑐔𑑂𑐰𑐖𑑂𑐫𑐵 𑐎𑐵𑐳𑐵𑐫𑐵 𑐣𑐶𑐬𑑂𑐞𑐵𑐫𑐎 𑐩𑐞𑑂𑐜𑐮𑐫𑑂 𑐐𑐸𑐠𑐶𑐫𑐵 𑐥𑑂𑐬𑐵𑐖𑑂𑐘𑐥𑐶𑑄 𑐬𑐵𑐖𑐾𑐣𑑂𑐡𑑂𑐬 𑐱𑐵𑐎𑑂𑐫, 𑐩𑐡𑐣𑐩𑐸𑐣𑐶 𑑄𑑄𑐰𑐖𑑂𑐬𑐵𑐔𑐵𑐬𑑂𑐫 𑐰 𑐐𑐸𑐠𑐶𑐫𑐵 𑐣𑑂𑐰𑐎𑐸 𑐀𑐣𑐶𑐮 𑐳𑑂𑐠𑐵𑐥𑐶𑐟 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋 𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚 𑐖𑐹𑐥𑐶𑑄𑐟 𑐀𑐳𑑀𑐖 𑑑 𑐐𑐟𑐾 𑐖𑐸𑐂𑐐𑐸 𑐩𑐾𑐚𑑂𑐬𑑀 𑐊𑐩𑐊𑐩𑐫𑐵 𑐧𑐸𑐣𑑂𑐴𑐶 𑐎𑐸𑐣𑑂𑐴𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐂 𑑋

𑐎𑐵𑐳𑐵𑐫𑑂 𑐣𑑂𑐴𑐵𑐥 𑐖𑐹𑐩𑑂𑐴𑐾𑐳𑐶𑐟 𑐣𑐷𑐣𑑂𑐫𑐵𑐡𑑂𑐰𑑅, 𑐮𑐶𑐄𑐫𑐵𑐟 𑐗𑐶𑑄𑐣𑑂𑐫𑐵𑐡𑑂𑐰𑑅, 𑐮𑐶𑐫𑐵𑑄𑐮𑐶𑐄𑐫𑐵𑐟 𑐗𑐶𑐡𑑂𑐰𑑅 𑐰 𑐗𑐶𑐩𑑂𑐴𑐾𑐳𑐶𑐟 𑐴𑑅𑐥𑐵𑑅𑐎𑐠𑑄 𑐩𑑂𑐴𑐟𑐶𑑄 𑐡𑑂𑐰𑑅𑐕𑐶 𑐡𑑂𑐰𑑅𑐕𑐶 𑐟𑐎𑐵 𑐰 𑐡𑐳𑐶𑐥𑑁 𑐮𑑅𑐮𑑂𑐴𑐵𑐂 𑑋