𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐣𑐾𑐰𑐵𑑅 𑐖𑑂𑐘𑐵𑐣𑐎𑑀𑐲 𑐜𑐶𑐖𑐶𑐚𑐮𑐵𑐂𑐖𑐾𑐱𑐣 𑐫𑐵𑐫𑐾𑐟 𑐟𑐫𑐵𑐬

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑑄 𑐟𑐫𑐵𑐬 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐲𑐫𑐵𑐟 𑐜𑐶𑐖𑐶𑐚𑐮𑐵𑐂𑐖𑐾𑐱𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐟𑐫𑐵𑐬 𑐡𑐸𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐲 𑐟𑐫𑐵𑐬𑐷𑐫𑐵 𑐥𑑂𑐬𑐐𑐟𑐶 𑐰𑐶𑐰𑐬𑐞 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐣𑐶𑑄𑐟𑐶𑑄 𑐖𑐹𑐐𑐸 𑐳𑐴𑐮𑐴 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐄𑐥𑐩𑐾𑐫𑐬 𑐜𑑄𑐐𑑀𑐮𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶, 𑐣𑐾𑐰𑐵𑑅 𑐳𑐨𑑂𑐫𑐟𑐵, 𑐣𑐾𑐰𑐵𑑅 𑐧𑐵𑐬𑐾 𑐣𑑂𑐴𑐹 𑐥𑐸𑐳𑑂𑐟𑐵𑑄 𑐕𑐸𑑄 𑐴𑐾 𑐩𑐳𑐶𑐫𑐵 𑐰𑐣𑐾𑐢𑐸𑑄𑐎𑐹𑐐𑐸𑐮𑐶𑑄 𑐠𑐸𑐎𑐶𑐫𑐵𑐟 𑐜𑐶𑐖𑐶𑐚𑐮𑐵𑐂𑐖𑐾𑐱𑐣 𑐫𑐵𑐫𑐾 𑐴𑐠𑐵𑐫𑑂 𑐖𑐸𑐂𑐢𑐸𑑄𑐎𑐹𑐐𑐸 𑐏𑑃 𑐢𑐵𑐳𑐾𑑄 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐲𑐫𑐵𑐟 𑐠𑐷𑐠𑐷 𑐨𑐵𑐳𑑄 𑐀𑐣𑐸𑐰𑐵𑐡 𑐫𑐵𑐣𑐵𑑅 𑐜𑐶𑐖𑐶𑐚𑐮𑐵𑐂𑐖𑐾𑐱𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐧𑐔𑑄 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐵𑐴𑐵𑐮𑐶 𑐡𑐫𑐾𑐎𑐵𑐔𑑂𑐰𑑄𑐐𑐸 𑐖𑑂𑐘𑐵𑐣𑐎𑑀𑐲 𑐥𑑂𑐬𑐐𑐟𑐶 𑐰𑐶𑐰𑐬𑐞 𑐣𑑂𑐴𑑂𑐫𑐧𑑂𑐰𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐰 𑐥𑐬𑐶𑐫𑑀𑐖𑐣𑐵 𑐳𑑄𑐫𑑀𑐖𑐎 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐣𑐾𑐰𑐵𑑅 𑐀𑐩𑐹𑐬𑑂𑐟 𑐳𑐵𑑄𑐳𑑂𑐎𑐺𑐟𑐶𑐎 𑐳𑐩𑑂𑐥𑐡𑐵; 𑐣𑐾𑐰𑐵𑑅 𑐣𑐵𑐚𑑂𑐫, 𑐳𑑄𑐐𑐷𑐟 𑐰 𑐔𑐮𑐔𑐶𑐟𑑂𑐬𑐩𑐹𑐬𑑂𑐟; 𑐳𑐵𑑄𑐳𑑂𑐎𑐺𑐟𑐶𑐎 𑐳𑐩𑑂𑐥𑐡𑐵 𑐨𑐵𑐲𑐵, 𑐳𑐵𑐴𑐶𑐟𑑂𑐫, 𑐏𑑃𑐐𑑂𑐰𑑅𑐢𑐸𑐎𑐹, 𑐧𑑂𑐫𑐵𑐎𑐬𑐞, 𑐮𑐶𑐥𑐶; 𑐱𑐶𑐮𑑂𑐥 𑐰 𑐖𑑂𑐘𑐵𑐣; 𑐣𑐾𑐰𑐵𑑅 𑐩𑑂𑐴𑐳𑐷𑐎𑐵, 𑐁𑐣𑑂𑐡𑑀𑐮𑐣 𑐰 𑐣𑐐𑐬𑐷𑐫 𑐳𑐨𑑂𑐫𑐟𑐵 𑐫𑐵𑐣𑐵𑑅 𑐣𑑂𑐫𑐵𑐐𑐹 𑐠𑐷𑐠𑐷 𑐰𑐶𑐲𑐫𑐫𑑂 𑐳𑑂𑐰𑐡𑑂𑐰 𑐥𑐺𑐲𑑂𑐛𑐫𑐵 𑐳𑐦𑐹 𑐥𑐶𑐠𑐣𑐷𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐠𑑂𑐰 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐠𑑂𑐰 𑐖𑑂𑐘𑐵𑐣𑐎𑑀𑐲 𑐗𑐶𑐡𑑂𑐰𑑅 𑐏𑑃𑐐𑑂𑐰𑑅𑐫𑐵 𑐰𑐶𑐳𑑂𑐟𑐺𑐟 𑐰𑐶𑐰𑐬𑐞 𑐡𑐂𑐐𑐸 𑐰 𑐣𑑂𑐫𑐵𑐡𑑂𑐰𑑅 𑐎𑐶𑐥𑐵 𑐡𑐂𑐐𑐸 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐖𑑂𑐘𑐵𑐣𑐎𑑀𑐲𑐫𑐵 𑐣𑐶𑑄𑐟𑐶𑑄 𑐁𑑅𑐟𑐎 𑐣𑑂𑐴𑐫𑑂𑐡𑑂𑐰𑐮𑑄 𑐩𑐮𑑂𑐫𑐵𑐎 𑐏𑑃𑐐𑑂𑐰𑑅 𑐳𑑄𑐎𑐮𑐣 𑐖𑐸𑐫𑐵𑑅 𑐰𑐶𑐰𑐬𑐞 𑐔𑑂𑐰𑐫𑐾𑐳𑐶𑐢𑑅𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐧𑐶𑐄𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐨𑐵𑐖𑐸 𑐩𑐮𑑂𑐮𑑄 𑐁𑑅𑐟𑐎 𑐣𑐾𑐥𑐵𑐮 𑐳𑐬𑐎𑐵𑐬𑑄 𑐎𑐬𑑀𑐜𑑁𑑄 𑐡𑐵𑑄 𑐧𑐶𑐫𑐵𑑅 𑐣𑑂𑐴𑑂𑐫𑐵𑐎𑐵𑐟𑑅𑐐𑐸 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵𑐥𑑂𑐬𑐟𑐶𑐲𑑂𑐛𑐵𑐣𑑄 𑐟𑐎𑑄 𑐖𑑂𑐘𑐵𑐣𑐎𑑀𑐲 𑐡𑐫𑐾𑐎𑐾𑐐𑐸 𑐁𑑃𑐚 𑐫𑐵𑐫𑐾𑐩𑐦𑐸𑐣𑐶𑐐𑐸 𑐀𑐰𑐳𑑂𑐠𑐵𑐫𑑂 𑐣𑐾𑐰𑐵𑑅𑐟𑐫𑑂𑐳𑑄 𑐁𑑃𑐚 𑐫𑐵𑐣𑐵𑑅 𑐠𑑂𑐰 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑐢𑐵𑐳𑐾𑑄 𑐠𑑂𑐰 𑐖𑑂𑐘𑐵𑐣𑐎𑑀𑐲𑑄 𑐨𑐵𑐰𑐷 𑐥𑐸𑐳𑑂𑐟𑐵𑐫𑐵𑐟 𑐣𑐾𑐰𑐵𑑅 𑐳𑐨𑑂𑐫𑐟𑐵, 𑐣𑐾𑐰𑐵𑑅 𑐟𑐖𑐶𑐮𑐖𑐶, 𑐣𑐾𑐰𑐵𑑅 𑐳𑐵𑐴𑐶𑐟𑑂𑐫, 𑐠𑐣𑐫𑐵 𑐣𑐐𑐬, 𑐖𑐵𑐟𑑂𑐬𑐵𑐥𑐬𑑂𑐰𑐧𑐵𑐬𑐾 𑐥𑐹𑐰𑑄𑐎 𑐖𑐵𑐣𑐎𑐵𑐬𑐷 𑐎𑐵𑐫𑐾𑐦𑐂𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐖𑑂𑐘𑐵𑐣𑐎𑑀𑐲𑐫𑐵𑐟 𑐀𑐗 𑐰𑐺𑐴𑐡𑑂 𑐬𑐸𑐥𑑄 𑐣𑑂𑐫𑑄𑐎𑐵𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐠𑐸𑐎𑐶𑐫𑐵 𑐀𑐣𑐸𑐰𑐵𑐡 𑐫𑐵𑐫𑐾𑐩𑐵𑑅𑐐𑐸, 𑐜𑐶𑐖𑐶𑐚𑐮𑐵𑐂𑐖𑐾𑐱𑐣 𑐫𑐵𑐫𑐾𑐩𑐵𑑅𑐐𑐸 𑐥𑑂𑐬𑐳𑑂𑐟𑐵𑐰 𑐰𑐫𑑂𑐎𑐮𑑄 𑐟𑐫𑐵𑐡𑐷𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐥𑐬𑐶𑐫𑑀𑐖𑐣𑐵 𑐰𑑂𑐫𑐰𑐳𑑂𑐠𑐵𑐥𑐎 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐥𑐬𑐶𑐫𑑀𑐖𑐣𑐵 𑐐𑐸𑐎𑐠𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐢𑐫𑐵𑐐𑐸 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐳𑐩𑑂𑐥𑐡𑐵 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐀𑐬𑑂𑐔𑐣𑐵 𑐱𑐵𑐎𑑂𑐫𑑄 𑐮𑐳𑐎𑐸𑐳 𑐫𑐵𑐣𑐵𑑅 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐰𑐎𑑂𑐟𑐵 𑐣𑐰𑐷𑐣 𑐩𑐵𑐣𑐣𑑂𑐢𑐬𑑄 𑐐𑐸𑐮𑐶 𑐦𑐸 𑐄𑐮𑐶 𑐫𑐵𑐎𑐣𑑄 𑐖𑑂𑐘𑐵𑐣𑐎𑑀𑐲 𑐟𑐫𑐵𑐬 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐳𑐾𑑄 𑐠𑐸𑐎𑐶𑐫𑐵𑐟 𑐀𑐜𑐶𑐫𑑀 𑐨𑐶𑐜𑐶𑐫𑑀𑐳𑐴𑐶𑐟 𑐜𑐶𑐖𑐶𑐚𑐮𑐵𑐂𑐖 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐰𑐂𑐐𑐸 𑐧𑐖𑐾𑐚𑐫𑑂 𑐴𑐾 𑐠𑑂𑐰 𑐥𑐬𑐶𑐫𑑀𑐖𑐣𑐵𑐫𑐵𑐟 𑐡𑐸𑐠𑑂𑐫𑐵𑐎𑐾𑐦𑐂𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋