𑐬𑐘𑑂𑐖𑐣𑐵 𑐮𑐶𑐥𑐶 𑐎𑐵𑐬𑑂𑐫𑐱𑐵𑐮𑐵 𑐐𑑀𑐲𑑂𑐛𑐶

𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐬𑐘𑑂𑐖𑐣𑐵 𑐮𑐶𑐥𑐶 𑐎𑐵𑐬𑑂𑐫𑐱𑐵𑐮𑐵 𑐐𑑀𑐲𑑂𑐛𑐶 𑐖𑐸𑐮 𑑋 𑐥𑐵𑐚𑐣 𑐎𑑂𑐫𑐵𑐩𑑂𑐥𑐳𑐫𑐵 𑐳𑐨𑐵𑐎𑐎𑑂𑐲𑐫𑑂 𑐖𑐹𑐐𑐸 𑐐𑑀𑐲𑑂𑐛𑐶𑐂 𑐠𑐷𑐠𑐷 𑐥𑑂𑐫𑑄𑐐𑐹 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐐𑑀𑐲𑑂𑐛𑐶𑐂 𑐥𑑂𑐬𑐵𑐢𑑂𑐫𑐵𑐥𑐎 𑐣𑐵𑐥𑑄 𑐀𑐣𑑂𑐰𑐾𑐲𑐎 𑐎𑐵𑐱𑐷𑐣𑐵𑐠 𑐟𑐩𑑀𑐚𑑄 ‘𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐋𑐟𑐶𑐴𑐵𑐳𑐶𑐎 𑐥𑐎𑑂𑐲’ 𑐳𑐩𑑂𑐧𑐣𑑂𑐢𑐷 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅𑐳𑐵 𑐄𑐎𑐶𑐫𑐵𑐟 𑐎𑐫𑐵𑑅 𑐂𑐟𑐶𑐴𑐵𑐳𑐎𑐵𑐬 𑐣𑐵𑐥𑑄 𑐮𑐶𑐥𑐶 𑐀𑐣𑑂𑐰𑐾𑐲𑐎 𑐜𑐵. 𑐣𑐫𑐣𑐵𑐠 𑐥𑑁𑐜𑐾𑐮𑑄 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐮𑐶𑐳𑐾𑑄 𑐰𑐫𑑂𑐎𑐮𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐄𑐡𑑂𑐨𑐵𑐰 𑐣𑐾𑐥𑐵𑑅𑐫𑐵 𑐨𑐹𑐩𑐶𑐂 𑐖𑐸𑐂𑐩𑐵𑑅𑐐𑐸 𑐟𑐠𑑂𑐫 𑐣𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐁𑐱𑐵 𑐳𑐥𑐹m𑐎𑐸𑐠𑐶𑐫𑐵 𑐥𑐸𑐳𑑂𑐟𑐎𑐵𑐮𑐫𑐢𑑂𑐫𑐎𑑂𑐲 𑐣𑐵𑐥𑑄 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐥𑑂𑐬𑐵𑐖𑑂𑐘 𑐱𑐬𑐡 𑐎𑐳𑐵𑑅𑐣𑑄 ‘𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐁𑐎𑐵𑐬’𑐫𑐵 𑐧𑐵𑐬𑐾 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅𑐳𑐵 𑐄𑐐𑐸 𑐖𑑂𑐫𑐵𑐥𑑁𑐫𑐵𑐟 𑐎𑐫𑐵𑑅 𑐳𑐴 𑐥𑑂𑐬𑐵𑐢𑑂𑐫𑐵𑐥𑐎 𑐣𑐵𑐥𑑄 𑐎𑑂𑐫𑐵𑐮𑐶𑐐𑑂𑐬𑐵𑐦𑐬 𑐜𑐵. 𑐩𑐶𑐮𑐣𑐬𑐟𑑂𑐣 𑐱𑐵𑐎𑑂𑐫𑑄 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐱𑐶𑐎𑑂𑐲𑐞 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐳𑐴 𑐥𑑂𑐬𑐵𑐢𑑂𑐫𑐵𑐥𑐎 𑐜𑐵. 𑐌𑐩𑐎𑐵𑐬𑐾𑐱𑑂𑐰𑐬 𑐱𑑂𑐬𑐾𑐲𑑂𑐛𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 ‘𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑐬𑐶𑐔𑐫’ 𑐳𑐩𑑂𑐧𑐣𑑂𑐢𑐷 𑐖𑑂𑐫𑐵𑐥𑑁𑐫𑐵𑐟 𑐎𑐫𑐵𑑅 𑐥𑑂𑐬𑐵. 𑐜𑐵. 𑐣𑐶𑐬𑑂𑐩𑐮𑐩𑐵𑐣 𑐟𑐸𑐮𑐵𑐢𑐬𑑄 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐰𑐶𑐨𑐵𑐐𑐫𑐵 𑐴𑐾 𑐄𑐥𑐥𑑂𑐬𑐵𑐢𑑂𑐫𑐵𑐥𑐎 𑐬𑐵𑐖𑐣𑐮𑐵𑐮 𑐖𑑀𑐱𑐷𑑄 ‘𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐖𑑂𑐫𑐵𑐥𑑁𑐫𑐵𑐟 𑐥𑑂𑐬𑐵. 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫𑑄 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐥𑑂𑐬𑐡𑐾𑐱 𑐣𑑄. 𑑓 𑐫𑐵 𑐳𑐵𑑄𑐳𑐡 𑐬𑐵𑐖𑐾𑐱 𑐱𑐵𑐎𑑂𑐫𑑄 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐐𑑀𑐲𑑂𑐛𑐶𑐂 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐾𑐐𑐸 𑐗𑑂𑐰𑐮𑐫𑑂 𑐨𑐵𑐲𑐶𑐎 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐠𑑅 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑐫𑑂 𑐰𑐣𑐵𑐐𑐸 𑐂𑐮𑐫𑑂 𑐣𑐾𑐥𑐵𑐮𑑄 𑐳𑑂𑐰𑐟𑐣𑑂𑐟𑑂𑐬 𑐬𑐵𑐲𑑂𑐚𑑂𑐬𑐫𑐵 𑐬𑐸𑐥𑐫𑑂 𑐡𑐬𑑂𑐟𑐵 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐬𑐘𑑂𑐖𑐣𑐵 𑐮𑐶𑐥𑐶 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐳𑑂𑐟𑐵𑐰𑐾𑐖𑐫𑐵 𑐥𑑂𑐬𑐟𑐶𑐮𑐶𑐥𑐶 𑐖𑑂𑐰𑐣𑐵 𑐰𑐫𑐵𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐷𑐐𑐸 𑐏𑑅 𑑋

𑐐𑐸𑐠𑐶𑐫𑐵 𑐡𑐸𑐖𑑅 𑐣𑐶𑐬𑑂𑐩𑐮 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑑄𑐫𑑀𑐖𑐣𑐫𑑂 𑐐𑑀𑐲𑑂𑐛𑐶𑐂 𑐣𑐵𑐫𑑅 𑐣𑐶𑐬𑐘𑑂𑐖𑐣𑐬𑐟𑑂𑐣 𑐟𑐵𑐩𑑂𑐬𑐵𑐎𑐵𑐬 𑐰 𑐣𑑂𑐰𑐎𑐸 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐳𑐴𑐖𑐎𑐬𑑂𑐟𑐵𑐫𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐷𑐐𑐸 𑐕𑑂𑐫𑐵𑑄𑐖𑐾 𑐥𑐰𑐶𑐟𑑂𑐬 𑐎𑐳𑐵𑑅𑐣𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐐𑑀𑐲𑑂𑐛𑐶𑐥𑐵𑐏𑐾𑑄 𑐥𑐶𑐴𑐵𑑄 𑐰𑑅𑐐𑐸 𑐣𑐶𑐲𑑂𑐎𑐬𑑂𑐲𑐫𑐵𑐟 𑐮𑐶𑐥𑐶 𑐐𑐸𑐠𑐶𑑄 𑐫𑐵𑐎𑐣𑑄 𑐥𑐶𑐠𑐣𑐾𑐟𑑂𑐫𑑄𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐰𑐬𑑂𑐞𑐩𑐵𑐮𑐵𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐖𑐵𑐣𑐎𑐵𑐬𑐷 𑐐𑐸𑐠𑐶𑑄 𑐧𑐶𑐄𑐐𑐸 𑐡𑐸 𑑋