𑐮𑐎𑑂𑐲𑑂𑐩𑐷𑐡𑑂𑐫𑑅 𑐥𑐹𑐖𑐵

–𑐜𑐵. 𑐔𑐸𑐣𑑂𑐡𑐵 𑐧𑐖𑑂𑐬𑐵𑐔𑐵𑐬𑑂𑐫

“𑐣𑐾𑐥𑐵𑐮 𑐰𑐬𑑂𑐲 𑐎𑑂𑐬𑐶𑐫𑐵” 𑐳𑐦𑐸𑐟𑐶𑐂 𑐢𑐫𑐵𑐟𑑅𑐠𑐾𑑄 𑐮𑐎𑑂𑐲𑑂𑐩𑐷𑐫𑐵𑐟 𑐥𑐹𑐖𑐵 𑐫𑐵𑐫𑐾𑐐𑐸 𑐩𑑂𑐴𑐥𑐹𑐖𑐵 𑐫𑐵𑐂𑐧𑐮𑐫𑑂𑐠𑐾𑑄 𑐩𑐣𑑂𑐡𑑅 𑐔𑑂𑐰𑐫𑐵 𑐄𑐐𑐸 𑐩𑐣𑑂𑐡𑐮𑐫𑑂 𑐠𑑅𑐠𑑅𑐐𑐸 𑐕𑐾𑑃𑐫𑐵 𑐥𑐬𑐩𑑂𑐥𑐬𑐵𑐫𑐵 𑐕𑐳𑐶𑐎𑐠𑑄 𑐮𑑅 𑐥𑑂𑐰𑐟𑐵𑐫𑑂, 𑐀𑐧𑐷𑐬, 𑐟𑐵𑐫𑑂, 𑐰𑐵, 𑐴𑐵𑐎𑐸𑐩𑐸𑐳𑑂𑐫𑐵, 𑐐𑑂𑐰𑑅𑐩𑐵𑐫𑑂, 𑐁𑐏𑐾, 𑐩𑐣𑑂𑐡𑑅𑐫𑐵 𑐡𑐸𑐣𑐾 𑐔𑐶𑐎𑑄𑐩𑐣𑑂𑐡𑑅 𑐠𑐵𑐣𑐵𑑅 𑐩𑐣𑑂𑐡𑑅 𑐔𑑂𑐰𑐫𑐾𑐐𑐸 𑐫𑐵𑐂 𑑋 𑐮𑑅 𑐩𑐣𑑂𑐡𑑅𑐫𑐵 𑐔𑑂𑐰𑐳𑑄 𑐥𑑂𑐰𑐟𑐵𑐫𑑂 𑐰𑐵 𑐀𑐧𑐷𑐬𑑄 𑐩𑐣𑑂𑐡𑑅 𑐔𑑂𑐰𑐫𑐵𑑅 𑐄𑐎𑐶 𑐡𑑂𑐫𑑅𑐣𑐾 𑐟𑑅𑐳𑐶, 𑐏𑑂𑐰𑑅𑐳𑐶𑑄, 𑐳𑑂𑐫𑑄𑐐𑐸𑐮𑐶, 𑐎𑐾𑐬𑐵, 𑐳𑐸𑐣𑑂𑐟𑐮𑐵𑐳𑐶, 𑐥𑐵𑐳𑐶, 𑐴𑐮𑐸𑐰𑐵𑐰𑐾𑐡, 𑐳𑑂𑐫𑐵𑐄, 𑐔𑐵𑐎𑐸𑐳𑐶 𑐁𑐡𑐶 𑐦𑐮𑐦𑐹𑐮𑐫𑐵 𑐣𑐵𑐥𑐣𑐵𑐥𑑄 𑐏𑐾𑐮𑐸𑐂𑐟𑐵𑑅, 𑐎𑑂𑐰𑐏𑐵, 𑐮𑐎𑑂𑐲𑑂𑐩𑐷𑐳𑑂𑐰𑐵𑑄, 𑐐𑑀𑐡𑐵𑐰𑐬𑐷 𑐳𑑂𑐰𑐵𑑄 𑐁𑐡𑐶 𑐳𑑂𑐰𑐵𑑄 𑐟𑐫𑐵𑑅 𑐟𑑅𑐳𑐶 𑐧𑑂𑐰𑐫𑐵 𑐮𑐎𑑂𑐲𑑂𑐩𑐷𑐡𑑂𑐫𑑅𑐫𑐵𑐟 𑐁𑐬𑐵𑐢𑐣𑐵 𑐫𑐵𑐣𑐵𑑅 𑐥𑐹𑐖𑐵 𑐫𑐵𑐫𑐾𑐐𑐸 𑐫𑐵𑐂 𑑋 𑐮𑐎𑑂𑐲𑑂𑐩𑐷𑐥𑐹𑐖𑐵𑐧𑐮𑐫𑑂 𑐡𑐸𑐩𑑂𑐴 𑐮𑐎𑑂𑐲𑑂𑐩𑐷 𑐡𑑂𑐫𑑅𑐫𑐵𑐟 𑐳𑐦𑐵 𑐫𑐵𑐣𑐵𑑅 𑐮𑐎𑑂𑐲𑑂𑐩𑐷𑐡𑑂𑐫𑑅 𑐡𑐸𑐠𑐵𑐫𑑂 𑐣𑑂𑐴𑐹𑐐𑐸 𑐨𑑂𑐰𑑃𑐫𑐵 𑐮𑐎𑑂𑐲𑑂𑐩𑐷𑐡𑑂𑐫𑑅 𑐟𑐶𑐎𑐵𑑅 𑐥𑐹𑐖𑐵 𑐫𑐵𑐫𑐾𑐐𑐸 𑐫𑐵𑐂 𑑋 𑐥𑐹𑐖𑐵𑐢𑐸𑑄𑐎𑐵𑑅 𑐩𑑂𑐴𑐥𑐹𑐖𑐵 𑐫𑐵𑐫𑐾𑐧𑐮𑐫𑑂𑐠𑐾𑑄 𑐮𑐎𑑂𑐲𑑂𑐩𑐷𑐫𑐵𑐟 𑐣𑑄 𑐏𑑃𑐫𑑂 𑐳𑐐𑑄, 𑐢𑑁 𑐳𑐐𑑄, 𑐩𑐣𑑂𑐡𑐮𑐫𑑂 𑐧𑑂𑐰𑐫𑐵𑐟𑑅𑐐𑐸 𑐟𑑅𑐳𑐶 𑐣𑐵𑐥𑑄𑐫𑐵 𑐦𑐮𑐦𑐹𑐮𑐫𑐵 𑐳𑐶 𑐳𑐐𑑄 𑐕𑐵𑐫𑐾𑐐𑐸 𑐫𑐵𑐂 𑑋

𑐥𑐹𑐖𑐵 𑐳𑐶𑐢𑐮 𑐢𑐵𑐫𑐾𑐰𑑄 “𑐣𑐾𑐥𑐵𑐮 𑐰𑐬𑑂𑐲 𑐎𑑂𑐬𑐶𑐫𑐵” 𑐳𑐦𑐸𑐟𑐶𑐂 𑐣𑑂𑐴𑑂𑐫𑐠𑐣𑐵 𑐟𑑅𑐠𑐾𑑄 𑐟𑐸𑑄 𑐔𑐫𑑂𑐥𑑂𑐫𑐟𑐵 𑐑𑐵𑐳𑐵 𑐟𑐫𑐵𑑅 𑐠𑐵𑐫𑑂𑐨𑐸 𑐟𑐫𑐾𑐐𑐸 𑐫𑐵𑐂 𑑋 𑐠𑐵𑐫𑑂𑐨𑐸𑐂 𑐰𑐶𑐱𑐾𑐲 𑐫𑐵𑐣𑐵𑑅 𑐩𑑀𑐴𑐣𑐷𑐧𑐮𑐫𑑂 𑐳𑑂𑐫𑐵𑐎𑐸𑐟𑑂𑐫𑐵𑐎𑐸𑐎𑐸𑐣𑑂𑐴𑐸 𑐳𑑂𑐰𑐣𑐵𑐟𑑅𑐐𑐸 ‘𑐰𑐵’𑐫𑐵𑐟 𑐧𑐖𑐶 𑐮𑑂𑐴𑐸𑐫𑐵𑑅 𑐧𑐖𑐶, 𑐏𑑄𑐮𑐵𑐫𑐵𑐟 𑐳𑐸𑐎𑐸𑐮𑐵 𑐡𑐫𑐾𑐎𑐵𑑅 𑐠𑐵𑐫𑑂𑐨𑐸𑐂 𑐧𑐖𑐶 𑐰 𑐮𑐵 𑐟𑐫𑐾𑐐𑐸 𑐫𑐵𑐂 𑑋 𑐮𑐎𑑂𑐲𑑂𑐩𑐷𑐥𑐹𑐖𑐵 𑐎𑑁𑐮𑐵𑐎𑐺𑐲𑑂𑐞 𑐀𑐩𑐵𑐂𑐎𑐸𑐣𑑂𑐴𑐸 𑐖𑐹𑐐𑐸𑐮𑐶𑑄 𑐫𑐾𑑃𑐫𑐵 𑐧𑐖𑐵𑐬𑐫𑑂 𑐰𑐶𑐱𑐾𑐲 𑐫𑐵𑐣𑐵𑑅 𑐀𑐩𑐵𑐂𑐎𑐸𑐣𑑂𑐴𑐸 𑐩𑐾𑐫𑑂, 𑐡𑐸𑐐𑐸, 𑐏𑐳𑐶 𑐁𑐡𑐶 𑐳𑑂𑐫𑐵𑐣𑐵𑑅 𑐮𑐵 𑐩𑐷𑐐𑐸 𑐩𑐫𑐵𑑅 𑑋 𑐀𑐠𑐾 𑐖𑐹𑐐𑐸𑐮𑐶𑑄 𑐩𑑀𑐴𑐣𑐷𑐧𑐮𑐫𑑂 𑐴𑐾 𑐩𑐵𑑅𑐐𑐸 𑐮𑐵 𑐰 𑐧𑐖𑐶 𑐡𑐫𑐾𑐎𑐾𑐐𑐸 𑐖𑐹𑐐𑐸 𑐏𑑅 𑑋 𑐐𑐸𑐩𑑂𑐴 𑐐𑐸𑐩𑑂𑐴𑐳𑐶𑐫𑐵 𑐩𑑀𑐴𑐣𑐷𑐧𑐮𑐫𑑂 𑐰𑐵 𑐳𑑂𑐰𑐣𑐾𑐐𑐸 𑐩𑐫𑐵𑐳𑐾 𑐧𑐖𑐶 𑐴𑐾 𑐳𑑂𑐰𑐣𑐾𑐐𑐸 𑐫𑐵𑐂𑐥𑐶𑑄 𑐣𑑄 𑐡𑐸 𑑋 𑐠𑐠𑐾 𑐳𑑂𑐰𑐣𑐵𑐟𑑅𑐐𑐸 𑐧𑐖𑐶 𑐧𑐶𑐱𑐾𑐲 𑐫𑐵𑐣𑐵𑑅 𑐠𑑅 𑐕𑐾𑑃𑐖𑑅 𑐡𑐸𑐣𑐾𑐫𑐵𑐥𑐶𑑄 𑐖𑑅𑐥𑐶𑐣𑐶 𑐴𑐾 𑐖𑐎 𑐣𑐫𑐾𑐐𑐸 𑐫𑐵𑐂, 𑐥𑐶𑐣𑐾𑐫𑐵𑐥𑐶𑐣𑑂𑐟 𑐣𑐎𑐾𑐐𑐸 𑐔𑐮𑐣 𑐩𑐡𑐸 𑑋 𑐮𑐎𑑂𑐲𑑂𑐩𑐷𑐥𑐹𑐖𑐵 𑐫𑐵𑐣𑐵𑑅 𑐕𑐵𑐂𑐐𑐸 𑐠𑐵𑐫𑑂𑐨𑐸𑐂 𑐴𑐮𑐸𑐮𑐥𑑂𑐟𑐾 𑐟𑐫𑐵𑑅 𑐧𑐖𑐶𑑄 𑐟𑑂𑐰𑑅𑐥𑐸𑐂𑐐𑐸 𑐫𑐵𑐂 𑑋 𑐠𑐵𑐫𑑂𑐨𑐸𑐂 𑐩𑑂𑐰𑑅𑐳𑐶𑐥𑑂𑐰𑑅, 𑐩𑐬𑐶𑐔𑐬𑐶 𑐁𑐡𑐶 𑐥𑐬𑐶𑐎𑐵𑐬𑐫𑐵 𑐧𑑂𑐫𑐘𑑂𑐖𑐣 𑐟𑐫𑐾𑐐𑐸 𑐣𑑄 𑐔𑐮𑐣 𑐡𑐸 𑑋

𑐮𑐎𑑂𑐲𑑂𑐩𑐷𑐡𑑂𑐫𑑅𑐫𑐵𑐟 𑐕𑐵𑑅𑐐𑐸 𑐳𑐶 𑐳𑐐𑑄 𑐏𑐾𑑃 𑐳𑐐𑑄 𑐰𑑃𑐄–𑐥𑐵𑐄𑑃, 𑐮𑐵𑐐𑑂𑐰𑑅 𑐮𑐵𑐥𑐶𑐣𑐶𑐳𑐾𑑄 𑐢𑑁, 𑐩𑑂𑐰𑑅𑐳𑐶𑐥𑑂𑐰𑑅, 𑐩𑐬𑐶𑐔𑐬𑐶 𑐥𑑂𑐬𑐫𑐵𑐣𑑂𑐟 𑐡𑐸𑐐𑐸 𑐠𑐵𑐫𑑂𑐨𑐸𑐂 𑐎𑐶𑐖𑐵𑐥𑐹𑐖𑐵𑐫𑐵 𑐎𑐣𑑂𑐴𑐫𑑂𑐎𑐸𑐣𑑂𑐴𑐸 𑐮𑐎𑑂𑐲𑑂𑐩𑐷𑐡𑑂𑐫𑑅 𑐎𑑂𑐰𑐎𑐵𑐫𑐾𑐐𑐸 𑐢𑐎𑐵𑑅 𑐮𑐎𑑂𑐲𑑂𑐩𑐷𑐡𑑂𑐫𑑅 𑐥𑐹𑐖𑐵 𑐫𑐵𑐣𑐵𑑅 𑐩𑑂𑐴𑑂𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵𑐟𑐫𑑂𑐟 𑐳𑑅𑐟𑐵 𑐕𑐾𑑃𑐫𑐵 𑐖𑑅 𑐳𑐎𑐳𑐶𑐟𑑄 𑐥𑑂𑐬𑐳𑐵𑐡 𑐧𑐷𑐐𑐸 𑐔𑐮𑐣 𑐡𑐸 𑑋

𑐮𑐎𑑂𑐲𑑂𑐩𑐷𑐡𑑂𑐫𑑅 𑐥𑐹𑐖𑐵 𑐫𑐵𑐣𑐵𑑅 𑐕𑐾𑑃𑐖𑑅𑐥𑐶𑐣𑐶 𑐮𑐎𑑂𑐲𑑂𑐩𑐷𑐥𑐹𑐖𑐵𑐫𑐵 𑐳𑐶𑐣𑑂𑐴𑑅 𑐟𑐶𑐣𑐵𑑅 𑐐𑐸𑐩𑑂𑐴𑐳𑐶𑐫𑐵 𑐨𑑂𑐰𑐫𑑂 𑐣𑐫𑐾𑐐𑐸 𑐔𑐮𑐣 𑐡𑐸𑐳𑐵 𑐐𑐸𑐩𑑂𑐴𑐳𑐶𑐫𑐵 𑐳𑐩𑐾𑐧𑐖𑐶 𑐣𑐫𑐾𑐐𑐸 𑐔𑐮𑐣 𑐡𑐸 𑑋

𑐮𑐎𑑂𑐲𑑂𑐩𑐷𑐥𑐹𑐖𑐵 𑐫𑐵𑐂𑐧𑐮𑐫𑑂 𑐕𑐾𑑃𑐖𑑅𑐥𑐶𑐣𑐶 𑐠𑑅𑐐𑐸 𑐂𑐔𑑂𑐕𑐵 𑐎𑐠𑑄 𑐮𑐎𑑂𑐲𑑂𑐩𑐷𑐡𑑂𑐫𑑅𑐫𑐵𑐟 𑐢𑑂𑐫𑐧𑐵 𑐕𑐵𑐫𑐾𑐐𑐸 𑐣𑑄 𑐔𑐮𑐣 𑐡𑐸 𑑋 𑐐𑐸𑐩𑑂𑐴 𑐐𑐸𑐩𑑂𑐴𑐳𑐶𑐫𑐵 𑐮𑐎𑑂𑐲𑑂𑐩𑐷𑐥𑐹𑐖𑐵 𑐫𑐵𑐂𑐧𑐮𑐫𑑂 𑐡𑐔𑑂𑐕𑐶𑐫𑐵 𑐡𑐸𑐣𑐾 𑐥𑐶𑐴𑐵𑑃𑐰𑑅𑐐𑐸 𑐮𑐸𑑃𑐩𑑂𑐰𑑅, 𑐰𑐴𑑅𑐩𑑂𑐰𑑅, 𑐡𑐵𑑄 𑐕𑐵𑐣𑐵𑑅 𑐡𑑃𑐫𑑂𑐡𑐳𑑄 𑐥𑐶𑐴𑐵𑑃𑐰𑑅𑐐𑐸 𑐡𑐵𑑄 𑐳𑑄𑐔𑐫 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐮𑐎𑑂𑐲𑑂𑐩𑐷𑐡𑑂𑐫𑑅𑐫𑐵𑐟 𑐕𑐵𑑅𑐐𑐸 𑐡𑐵𑑄 𑐮𑐶𑐎𑐵𑐫𑐾𑐐𑐸 𑐔𑐮𑐣 𑐩𑐡𑐸 𑑋 𑐟𑐳𑐎𑑄 𑐴𑐾 𑐩𑐖𑐶𑐩𑐐𑐵𑑅𑐳𑐵 𑐧𑐵𑐫𑑂 𑐏𑐵𑐔𑑀 𑐖𑐸𑐮𑐳𑐵 𑐖𑐎 𑐮𑐶𑐎𑐫𑐵𑑅 𑐏𑐬𑑂𑐔 𑐫𑐵𑐫𑐾𑐐𑐸 𑐫𑐵𑐂, 𑐩𑐏𑐸𑐳𑐵 𑐴𑐟𑐥𑐟𑑄 𑐏𑐬𑑂𑐔 𑐫𑐵𑐂𑐩𑐏𑐸 𑑋 𑐠𑑂𑐰 𑐕𑐐𑐹 𑐎𑐠𑑄 𑐡𑐵𑑄 𑐩𑐸𑐣𑐾𑐐𑐸 𑐀𑐬𑑂𑐠𑐵𑐟𑑂 𑐕𑐐𑐹 𑐥𑑂𑐬𑐎𑑂𑐬𑐶𑐫𑐵 𑐣𑑄 𑐏𑑅 𑑋

𑐰𑑂𑐫𑐵𑐥𑐵𑐬𑐷𑐟𑐫𑑂 𑐡𑐔𑑂𑐕𑐶𑐫𑐵 𑐁𑐫–𑐰𑑂𑐫𑐫𑐫𑐵 𑐏𑐵𑐟𑐵 𑐎𑑂𑐰𑐔𑐵𑐫𑐾𑐎𑐾𑐐𑐸 𑐰 𑐣𑑂𑐴𑐹𑐐𑐸 𑐏𑐵𑐟𑐵 𑐕𑑂𑐫𑐮𑐾𑐐𑐸 𑐫𑐵𑐂𑐥𑐶𑑄 𑐡𑐸 𑑋 𑐣𑐾𑐥𑐵𑐮 𑐳𑑄𑐰𑐟𑑂 𑐎𑐠𑑄 𑐠𑑅𑐐𑐸 𑐁𑐫–𑐰𑑂𑐫𑐫𑐫𑐵 𑐏𑐵𑐟𑐵 𑐕𑑂𑐫𑐮𑐶𑐥𑐶𑐣𑐶 𑐢𑐵𑑅𑐳𑐵 𑐮𑐎𑑂𑐲𑑂𑐩𑐷𑐥𑐹𑐖𑐵𑐎𑐸𑐣𑑂𑐴𑐸 𑐥𑐸𑐮𑐵𑑄𑐐𑐸 𑐏𑐵𑐟𑐵 𑐎𑑂𑐰𑐔𑐵𑐫𑐾𑐎𑐵 𑐩𑑂𑐴𑐥𑐹𑐖𑐵 𑐀𑐬𑑂𑐠𑐵𑐟𑑂 𑐮𑐎𑑂𑐲𑑂𑐩𑐷𑐥𑐹𑐖𑐵𑐫𑐵 𑐎𑐣𑑂𑐴𑐫𑑂 𑐎𑐸𑐣𑑂𑐴𑐸𑐣𑐶𑐳𑐾𑑄 𑐰𑑂𑐫𑐵𑐥𑐵𑐬𑐫𑐵 𑐁𑐫–𑐰𑑂𑐫𑐫𑐫𑐵 𑐮𑐵𑐐𑐶 𑐣𑑂𑐴𑐹𑐐𑐸 𑐏𑐵𑐟𑐵 𑐕𑑂𑐫𑐮𑐾𑐐𑐸 𑐔𑐮𑐣 𑐡𑐸 𑑋

𑐮𑐎𑑂𑐲𑑂𑐩𑐷𑐫𑐵 𑐥𑑂𑐬𑐟𑐷𑐎𑐎𑐠𑑄 𑐮𑐎𑑂𑐲𑑂𑐩𑐷𑐫𑐵 𑐩𑐹𑐬𑑂𑐟𑐶 𑐰𑐵 𑐡𑐵𑑄, 𑐮𑐸𑑃, 𑐖𑑂𑐰𑐵𑐴𑐵𑐬𑐵𑐟 𑐁𑐡𑐶𑐫𑐵𑐟 𑐣𑑄 𑐥𑐹𑐖𑐵 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐦𑐸𑐎𑑂𑐎 𑐰𑐳𑑂𑐟𑐸 𑐳𑐩𑑂𑐥𑐣𑑂𑐣𑐟𑐵 𑐔𑐶𑑄 𑐏𑑅 𑑋 𑐄𑐮𑐶 𑐖𑐎 𑐩𑐏𑐸 𑐡𑐵𑑄 𑐟𑐿𑐐𑐸, 𑐮𑐸𑑃 𑐰𑐴𑑅 𑐟𑐶𑐳𑐵 𑐟𑐿𑐐𑐸 𑐳𑐾𑐦, 𑐡𑐬𑐵𑐖 𑐎𑐣𑑂𑐟𑐸𑐬 𑐁𑐡𑐶𑐫𑐵𑐟 𑐮𑐎𑑂𑐲𑑂𑐩𑐷𑐫𑐵 𑐰𑐵𑐳𑐳𑑂𑐠𑐵𑐣 𑐢𑐎𑐵𑑅 𑐣𑑄 𑐥𑐹𑐖𑐵 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐟𑑅𑐟𑑅𑐔𑑂𑐰𑑄𑐎 𑐢𑐣𑐷𑐥𑐶𑐣𑑂𑐳𑑄𑐣𑐶𑐳𑐾𑑄 𑐐𑐬𑐶𑐧𑐥𑐶𑐣𑑂𑐳𑑄 𑐟𑐎 𑐣𑑄 𑐠𑑅𑐠𑑅𑐐𑐸 𑐁𑐟𑑂𑐩𑐳𑐣𑑂𑐟𑑀𑐲 𑐎𑐫𑐵𑑅 𑐮𑐎𑑂𑐲𑑂𑐩𑐷𑐫𑐵𑐟 𑐥𑐹𑐖𑐵 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋