𑐫𑐮 –  𑐰𑐳𑐸𑐰𑐬𑑂𑐞 𑐧𑐔𑐟 𑐟𑐠𑐵 𑐆𑐞 𑐳𑐎𑐵𑐬𑐷 𑐳𑑄𑐳𑑂𑐠𑐵, 𑐣𑐵𑐐𑐧𑐴𑐵𑑅𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐄𑐡𑑂𑐑𑑀𑐲𑐞 𑐰 𑐰𑑂𑐫𑐎𑑂𑐟𑐶𑐟𑑂𑐰 𑐰𑐶𑐎𑐵𑐳 𑐟𑐵𑐮𑐶𑐩 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐳𑑄𑐳𑑂𑐠𑐵𑐫𑐵 𑐐𑑂𑐰𑐳𑐵𑐮𑐫𑑂 𑐗𑐶𑐣𑑂𑐴𑐸𑐫𑑄𑐎𑑄 𑐖𑐹𑐐𑐸 𑐟𑐵𑐮𑐶𑐩 𑐰𑑄𑐐𑐸 𑐖𑐾𑐛 𑑓𑑐 𑐐𑐟𑐾𑐣𑐶𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋𑐳𑑄𑐳𑑂𑐠𑐵𑐫𑐵 𑐀𑐢𑑂𑐫𑐎𑑂𑐲 𑐳𑐸𑐩𑐣 𑐱𑐵𑐎𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐟𑐵𑐮𑐶𑐩 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑑𑑖𑐫𑐵 𑐰𑐜𑐵𑐀𑐢𑑂𑐫𑐎𑑂𑐲 𑐣𑐶𑐬𑑂𑐩𑐮𑐬𑐟𑑂𑐣 𑐱𑐵𑐎𑑂𑐫𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑐟𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐹𑐥𑐵𑐴𑐵𑑄 𑐱𑐵𑐎𑑂𑐫𑑄 𑐎𑐮𑐵, 𑐣𑑂𑐰𑐔𑐸 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐧𑐵𑑄𑐮𑐵𑑅𑐐𑐸 𑐣𑐵𑐥𑑄 𑐖𑑂𑐫𑐵𑐗𑑂𑐰𑑅𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐥𑐎𑑂𑐲𑑄𑐥𑐵𑐏𑐾𑑄 𑐠𑑅 𑐥𑑂𑐬𑐨𑐵𑐰𑐶𑐟 𑐖𑐹𑐐𑐸 𑐢𑐵𑐳𑐾𑑄 𑐰𑐜𑐵 𑐰 𑐰𑐜𑐵𑐰𑐵𑐳𑐷𑐥𑐶𑐣𑐶𑐐𑐸 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐰𑐜𑐵𑐥𑐵𑐏𑐾𑑄 𑐖𑐸𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐖𑑂𑐫𑐵𑐫𑐵 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑐎𑐠𑑄 𑐣𑐵𑐐𑐧𑐴𑐵𑐮 𑐚𑑀𑐮 𑐳𑐸𑐢𑐵𑐬 𑐳𑐩𑐶𑐟𑐶𑐫𑐵 𑐄𑐥𑐵𑐢𑑂𑐫𑐎𑑂𑐲, 𑐡𑐵𑐦𑐵 𑐨𑐖𑐣 𑐏𑐮𑑅 𑐀𑐢𑑂𑐫𑐎𑑂𑐲 𑐁𑐖𑐸 𑐖𑐸𑐖𑐸𑐬𑐟𑑂𑐣 𑐱𑐵𑐎𑑂𑐫, 𑐰𑐳𑐸𑐰𑐬𑑂𑐞 𑐳𑐵𑐎𑑀𑐳𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐧𑐸𑐡𑑂𑐢𑐬𑐟𑑂𑐣 𑐱𑐵𑐎𑑂𑐫, 𑐟𑐵𑐮𑐶𑐩𑐫𑐵 𑐥𑑂𑐬𑐱𑐶𑐎𑑂𑐲𑐎 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐣𑐐𑐬 𑐳𑐨𑐵 𑐳𑐡𑐳𑑂𑐫 𑐥𑐘𑑂𑐔𑐰𑐖𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

𑐩𑐸𑐎𑑂𑐎𑑄 𑐣𑐷𑐣𑐶𑐩𑑂𑐴𑐾𑐳𑐶𑐣𑑄 𑐥𑑂𑐬𑐱𑐶𑐎𑑂𑐲𑐞 𑐎𑐵𑑅𑐐𑐸 𑐟𑐵𑐮𑐶𑐩𑐫𑐵 𑐥𑑂𑐬𑐱𑐶𑐎𑑂𑐲𑐎 𑐰𑐖𑑂𑐬𑐵𑐔𑐵𑐬𑑂𑐫𑑄 𑐣𑑂𑐰𑐔𑐸 𑐰 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐾𑐐𑐸 𑐣𑐵𑐥𑑄 𑐖𑑂𑐫𑐵𑐗𑑂𑐰𑑅 𑐐𑐸𑐎𑐠𑑄 𑐟𑐵𑑅𑐮𑐵𑐎 𑐴𑐣𑐵 𑐫𑑄𑐎𑐾𑐐𑐸 𑐢𑐂𑐐𑐸 𑐧𑐵𑐬𑐾 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐵𑐏𑐾𑑄 𑐰𑐶𑐞𑐵 𑐱𑐵𑐎𑑂𑐫, 𑐡𑐷𑐎𑑂𑐲𑐵𑐮𑐎𑑂𑐲𑑂𑐩𑐷 𑐱𑐵𑐎𑑂𑐫, 𑐳𑐩𑑂𑐬𑐵𑐚 𑐱𑐵𑐎𑑂𑐫 𑐰 𑐳𑑄𑐳𑑂𑐎𑐺𑐟𑐶 𑐱𑐵𑐎𑑂𑐫𑑄 𑐟𑐵𑐮𑐶𑐩𑐫𑐵 𑐀𑐣𑐸𑐨𑐰 𑐎𑐣𑐵𑐡𑐷𑐐𑐸 𑐏𑑅 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷 𑐄𑐲𑐵 𑐱𑐵𑐎𑑂𑐫𑑄 𑐮𑐳𑐎𑐸𑐳 𑐰 𑐢𑐬𑑂𑐩𑐬𑐵𑐖 𑐱𑐵𑐎𑑂𑐫𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋