𑐱𑐶𑐎𑑂𑐲𑐵 𑐰𑐶𑐢𑐾𑐫𑐎𑐫𑑂 𑐩𑐵𑑄𑐨𑐵𑐫𑑂 𑐱𑐶𑐎𑑂𑐲𑐵

𑐳𑑄𑐳𑐡𑐫𑑂 𑐰𑐶𑐔𑐵𑐬𑐵𑐢𑐷𑐣 𑐖𑐸𑐫𑐵𑐔𑑂𑐰𑑄𑐐𑐸 𑐱𑐶𑐎𑑂𑐲𑐵 𑐰𑐶𑐢𑐾𑐫𑐎𑐫𑑂 𑐩𑐵𑐟𑐺𑐨𑐵𑐲𑐵 𑐱𑐶𑐎𑑂𑐲𑐵𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐣𑑄 𑐳𑑄𑐱𑑀𑐢𑐣 𑐥𑑂𑐬𑐳𑑂𑐟𑐵𑐰 𑐡𑐬𑑂𑐟𑐵 𑐖𑐹𑐐𑐸 𑐡𑐸 𑑋 𑐬𑐵𑐲𑑂𑐚𑑂𑐬𑐶𑐫 𑐳𑑂𑐰𑐟𑐣𑑂𑐟𑑂𑐬 𑐥𑐵𑐬𑑂𑐚𑐷𑐫𑐵 𑐳𑐵𑑄𑐳𑐡 𑐰𑐶𑐬𑐵𑐖𑐨𑐎𑑂𑐟 𑐱𑑂𑐬𑐾𑐲𑑂𑐛𑑄 𑐩𑑂𑐴𑐶𑐐𑑅 𑐳𑑄𑐳𑐡𑐷𑐫 𑐳𑐩𑐶𑐟𑐶𑐫𑐵 𑐧𑐿𑐛𑐎𑐫𑑂 𑐠𑑂𑐰 𑐳𑑄𑐱𑑀𑐢𑐣 𑐥𑑂𑐬𑐳𑑂𑐟𑐵𑐰 𑐡𑐬𑑂𑐟𑐵 𑐫𑐵𑐳𑐾𑑄 𑐩𑐵𑐟𑐺𑐨𑐵𑐲𑐵 𑐱𑐶𑐎𑑂𑐲𑐵𑐫𑐵 𑐩𑐴𑐟𑑂𑐰 𑐧𑐵𑐬𑐾 𑐣𑑄 𑐎𑐣𑐵𑐡𑐷𑐐𑐸 𑐏𑑅 𑑋 𑐥𑑂𑐬𑐳𑑂𑐟𑐵𑐰𑐶𑐟 𑐰𑐶𑐢𑐾𑐫𑐎𑐫𑐵 𑐥𑐬𑐶𑐔𑑂𑐕𑐾𑐡 𑑒 𑐡𑐦𑐵 𑑗 𑐫𑑂 𑐩𑐵𑐟𑐺𑐨𑐵𑐲𑐵𑑄 𑐱𑐶𑐎𑑂𑐲𑐵 𑐳𑐸𑐣𑐶𑐱𑑂𑐔𑐶𑐟 𑐫𑐵𑐫𑐾𑐐𑐸 𑐮𑐵𑐐𑐶𑑄 ‘𑐩𑐵𑐟𑐺𑐨𑐵𑐲𑐵 𑐱𑐶𑐎𑑂𑐲𑐵’ 𑐢𑐂𑐐𑐸 𑐧𑐸𑑃𑐡𑐵 𑐣𑑄 𑐠𑐥𑐾 𑐫𑐵𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐩𑐵𑐟𑐺𑐨𑐵𑐲𑐵𑑄 𑐱𑐶𑐎𑑂𑐲𑐵𑐫𑐵 𑐳𑑄𑐱𑑀𑐢𑐣 𑐧𑐸𑑃𑐡𑐵 𑐠𑐥𑐾 𑐫𑐵𑐎𑐸𑐳𑐾𑑄 𑐳𑐵𑑄𑐳𑐡 𑐱𑑂𑐬𑐾𑐲𑑂𑐛𑑄 𑐡𑐾𑐱𑐫𑑂 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵 𑐰𑐫𑐾𑐢𑐸𑑄𑐎𑐵𑑅 𑐨𑐵𑐲𑐵𑐫𑐵 𑐀𑐢𑐶𑐎𑐵𑐬 𑐩𑐧𑐶𑐮 𑐢𑐵𑑅𑐳𑐵 𑐴𑐵𑐣𑑄 𑐣𑑄 𑐡𑑂𑐰𑐣𑑂𑐡𑑂𑐰 𑐧𑑂𑐰𑐮𑐣𑐷𑐐𑐸 𑐏𑐟𑐬𑐵 𑐡𑐸 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐠𑑂𑐰 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐣𑑄 𑐩𑐵𑐟𑐺𑐨𑐵𑐲𑐵𑑄 𑐱𑐶𑐎𑑂𑐲𑐵 𑐀𑐣𑐶𑐰𑐵𑐬𑑂𑐫 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐩𑐵𑐟𑐺𑐨𑐵𑐲𑐵𑐫𑐵 𑐀𑐢𑐶𑐎𑐵𑐬 𑐧𑐷𑐐𑐸 𑐗𑑂𑐰𑐮𑐫𑑂 𑐁𑑅 𑐣𑐎𑐟𑐶𑐣𑐶 𑐴𑐾 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱 𑐳𑐬𑐎𑐵𑐬𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐳𑐬𑐎𑐵𑐬𑐷 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵 𑐢𑐎𑐵𑑅 𑐩𑐵𑐣𑑂𑐫𑐟𑐵 𑐧𑐷𑐐𑐸 𑐎𑐵𑐣𑐸𑐣 𑐥𑐵𑐬𑐶𑐟 𑐫𑐵𑑅𑐐𑐸 𑐥𑑂𑐬𑐱𑑄𑐐 𑐣𑑂𑐴𑑂𑐫𑐠𑑃𑐳𑐾𑑄 𑐰𑐫𑑂𑐎𑐮𑑄 𑐁𑑅 𑐳𑐬𑐎𑐵𑐬𑑄 𑐴𑐾 𑐩𑐵𑐟𑐺𑐨𑐵𑐲𑐵𑐫𑐵𑐟 𑐎𑐵𑐣𑐸𑐣𑐷 𑐩𑐵𑐣𑑂𑐫𑐟𑐵 𑐥𑑂𑐬𑐡𑐵𑐣 𑐫𑐵𑐫𑐾𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐰 𑐨𑐵𑐳𑑄 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐣𑑄 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐰𑐫𑑂𑐎𑐮𑑄 𑐧𑑅 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐮𑐸𑐩𑑄𑐎𑐾𑐧𑐴𑑅 𑐖𑐹, 𑐳𑐬𑐎𑐵𑐬𑑄 𑐟𑐫𑐵𑐬 𑐫𑐵𑑅𑐐𑐸 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐱𑐶𑐎𑑂𑐲𑐵 𑐳𑐩𑑂𑐧𑐣𑑂𑐢𑐷 𑐎𑐵𑐣𑐸𑐣𑐫𑑂 𑐣𑑄 𑐩𑐵𑐟𑐺𑐨𑐵𑐲𑐵𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐥𑐸𑐮𑐵𑑄𑐩𑑂𑐴 𑐩𑐣𑑂𑐟𑑂𑐬𑐷 𑐬𑐵𑐖𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛𑑄 𑐳𑑄𑐱𑑀𑐢𑐣 𑐥𑑂𑐬𑐳𑑂𑐟𑐵𑐰 𑐟𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐫𑐵𑐣𑐵𑐡𑐷𑐐𑐸 𑐳𑑄𑐱𑑀𑐢𑐣𑐫𑐵 𑐮𑐶𑐔𑑂𑐰𑑅 𑐎𑐠𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐩𑐵𑑄𑐨𑐵𑐳𑑄 𑐧𑑂𑐰𑑄𑐎𑐾𑐐𑐸 𑐣𑐶𑐬𑑂𑐞𑐫 𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐁𑑅 𑐩𑐾𑐩𑐾𑐐𑐸 𑐳𑑂𑐠𑐵𑐣𑐷𑐫 𑐟𑐴𑐟𑐫𑑂𑐳𑑄 𑐣𑑄 𑐠𑑂𑐰 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐡𑐸 𑑋

‘𑐴𑐶𑐫𑐵𑐟 𑐢𑑂𑐫𑐧𑐵𑐮𑐶𑐳𑐾 𑐴𑐶𑐮𑐾 𑐩𑐖𑐶𑐮’

𑐠𑑁𑑄 𑐬𑐵𑐲𑑂𑐚𑑂𑐬𑐶𑐫 𑐬𑐎𑑂𑐟 𑐳𑐘𑑂𑐔𑐵𑐬 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐣𑐾𑐥𑐵𑐮 𑐳𑑂𑐰𑐫𑑄𑐳𑐾𑐰𑐷 𑐬𑐎𑑂𑐟𑐡𑐵𑐟𑐵 𑐳𑐩𑐵𑐖𑑄 𑐡𑐾𑐳𑐫𑑂 𑐁𑐥𑐵𑐮𑑄 𑐴𑐶𑐡𑐵𑐟𑐵𑐟𑐫𑑂𑐳𑑄 𑐣𑐶𑑅𑐱𑐸𑐮𑑂𑐎 𑐬𑐸𑐥𑑄 𑐡𑐵𑐣 𑐫𑐵𑐂𑐐𑐸 𑐴𑐶 𑐁𑐰𑐱𑑂𑐫𑐎𑐥𑐶𑑄 𑐩𑐣𑐹𑐟𑐫𑑂𑐟 𑐣𑑄 𑐣𑐶𑑅𑐱𑐸𑐮𑑂𑐎 𑐴𑐾 𑐄𑐥𑐮𑐧𑑂𑐢 𑐫𑐵𑐎𑐾𑐩𑐵𑑅𑐐𑐸 𑐩𑐵𑐐 𑐫𑐵𑑅𑐐𑐸 𑐡𑐸 𑑋 𑐳𑐩𑐵𑐖𑐫𑐵 𑐀𑐢𑑂𑐫𑐎𑑂𑐲 𑐥𑑂𑐬𑐾𑐩𑐳𑐵𑐐𑐬 𑐎𑐬𑑂𑐩𑐵𑐔𑐵𑐬𑑂𑐫𑑄 𑐩𑑂𑐴𑐶𑐐𑑅 𑐕𑐐𑐹 𑐰𑐎𑑂𑐟𑐰𑑂𑐫 𑐖𑐵𑐬𑐷 𑐫𑐵𑐳𑐾𑑄 𑐴𑐶𑐡𑐵𑐟𑐵𑐟𑐫𑑂𑐳𑑄 𑐣𑐶𑑅𑐱𑐸𑐮𑑂𑐎 𑐡𑐵𑐣 𑐫𑐵𑐣𑐵𑐟𑑅𑐐𑐸 𑐴𑐶 𑐠𑐷𑐠𑐷 𑐎𑐠𑑄𑐫𑐵 𑐣𑐵𑑄 𑐧𑐶𑐫𑐵𑑅 𑐱𑐸𑐮𑑂𑐎 𑐎𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐠𑑂𑐰 𑐖𑑂𑐫𑐵 𑐧𑐣𑑂𑐡 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐩𑐵𑐐 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐠𑑁𑑄𑐎𑐣𑑂𑐴𑐫𑑂 𑐴𑐶𑐡𑐵𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐥𑐾𑐱𑐾𑐰𑐵𑐬 𑐴𑐶𑐡𑐵𑐟𑐵𑐟𑐫𑑂𑐐𑐸 𑐰𑐬𑑂𑐔𑐱𑑂𑐰𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐏𑑃 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐴𑐶 𑐄𑐥𑐮𑐧𑑂𑐢 𑐫𑐵𑐎𑐾𑐐𑐸 𑐖𑑂𑐫𑐵𑐫𑐵 𑐐𑐸𑐞𑐳𑑂𑐟𑐬 𑐧𑐝𑐾 𑐫𑐵𑐣𑐵 𑐫𑑄𑐎𑐾𑐩𑐵𑑅𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋 𑐗𑐷𑐐𑐸 𑐡𑐾𑐱𑐫𑑂 𑐴𑐶𑐡𑐵𑐣 𑐖𑑂𑐫𑐵𑐗𑑂𑐰𑑅𑐫𑐵 𑐂𑐟𑐶𑐴𑐵𑐳 𑐟𑐳𑐎𑑄 𑐥𑐸𑐮𑐵𑑄 𑐖𑐹 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐴𑐶𑐡𑐵𑐣𑐫𑐵 𑐂𑐟𑐶𑐴𑐵𑐳𑐫𑑂 𑐣𑐵𑑄 𑐡𑐸𑐥𑐶𑑄 𑐳𑐎𑐳𑐶𑐟 𑐳𑐸𑐨𑐵𑐫𑑂𑑂 𑐡𑐾𑐕𑐵𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐴𑐶𑐫𑐵𑐟 𑐢𑑂𑐫𑐧𑐵𑐮𑐶𑐳𑐾 𑐴𑐶𑐮𑐾𑐐𑐸 𑐥𑑂𑐬𑐰𑐺𑐟𑑂𑐟𑐶 𑐧𑐣𑑂𑐡 𑐫𑐵𑐫𑐾𑐩𑐵𑑅𑐐𑐸 𑐳𑐸𑐗𑐵𑐰 𑐣𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋