𑐳𑐶𑐎𑑂𑐎𑐶𑐩𑐫𑑂 𑐳𑑂𑐠𑐵𑐥𑐶𑐟 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐧𑑂𑐫𑐵𑐴𑐵𑑄𑐔𑐸𑐮𑐶

𑐣𑐾𑐥𑐵𑐮 𑐩𑐞𑑂𑐜𑐮𑐫𑐵 𑐖𑐣𑐥𑐡 𑐣𑐾𑐰𑐵𑑅𑐟 𑐠𑑅𑐐𑐸 𑐠𑐵𑐟𑑄 𑐰𑐶𑐳𑑂𑐠𑐵𑐥𑐶𑐟 𑐖𑐸𑐫𑐵𑐰𑐣𑐾 𑐩𑐵𑑅𑐐𑐸 𑐣𑐶𑐫𑐟𑐶 𑐣𑐾𑐥𑐵𑐮 𑐥𑐸𑐣𑑅𑐊𑐎𑐷𑐎𑐬𑐞𑐫𑐵 𑐡𑐸𑐲𑑂𑐥𑐬𑐶𑐞𑐵𑐩 𑐏𑑅 𑐢𑐎𑐵𑑅 𑐠𑑁𑑄 𑐗𑐷𑐳𑑄 𑐢𑐵𑐫𑐾𑐩𑐵𑐮 𑑋 𑐥𑐬𑐣𑑂𑐟𑐸 𑐠𑑂𑐰 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐩𑐏𑐸 𑐠𑐣𑐫𑐵 𑐖𑐣𑐖𑐵𑐟𑐶𑐟𑐫𑑂𑐐𑐸 𑐣𑑄 𑐣𑐶𑐫𑐟𑐶 𑐠𑑂𑐰 𑐴𑐾 𑐏𑑅 𑑋 𑐀𑐗 𑐣𑐾𑐥𑐵𑐮𑐫𑐵 𑐩𑐢𑑂𑐫𑐎𑐵𑐮𑐶𑐎 𑐁𑐬𑑂𑐠𑐶𑐎 𑐂𑐟𑐶𑐴𑐵𑐳 𑐥𑑂𑐰𑐮𑐵 𑐳𑑂𑐰𑐫𑐾𑐧𑐮𑐫𑑂 𑐠𑑂𑐰𑐫𑐵𑐟 𑐏𑐳 𑐖𑐵𑐟𑐶𑐫𑐵 𑐥𑐹𑐬𑑂𑐰𑐾𑐮𑐶 𑐰𑐶𑐳𑑂𑐟𑐵𑐬𑐫𑐵 𑐮𑐶𑐔𑑂𑐰𑑅 𑐎𑐠𑑄 𑐰𑑂𑐫𑐵𑐏𑑂𑐫𑐵 𑐫𑐵𑐫𑐾𑐦𑐸 𑑋

𑐠𑐸𑐎𑐷 𑐁𑐥𑑂𑐬𑐰𑐵𑐳𑐷 𑐧𑑂𑐬𑐩𑑂𑐴𑐸𑐟𑐫𑑂𑐐𑐸 𑐏𑐳𑐵𑐣𑐷𑐎𑐬𑐞𑐫𑐵 𑐟𑐟𑑂𑐰 𑐣𑑄 𑐮𑑂𑐰𑐵𑐎𑐖𑑂𑐫𑐵𑐣𑐵 𑐰𑑅𑐐𑐸 𑐏𑐣𑐾𑐡𑐸 𑑋 𑐣𑐾𑐥𑐵𑐮𑐫𑐵 𑐂𑐟𑐶𑐴𑐵𑐳𑐫𑑂 𑐣𑐾𑐰𑐵𑑅𑐟 𑐣𑑂𑐴𑐵𑐥𑐵𑑄 𑐰𑐶𑐳𑑂𑐠𑐵𑐥𑐶𑐟 𑐖𑐸𑐫𑐵 𑐰𑐣𑐾𑐩𑐵𑑅𑐐𑐸 𑐖𑑅𑐮𑐵𑐏𑑅𑐮𑐵 𑐡𑐾𑐱 𑐏𑑅– 𑐳𑐶𑐎𑑂𑐎𑐶𑐩 𑑋 𑐣𑐾𑐰𑐵𑑅𑐟 𑐳𑑂𑐰𑐫𑐵𑑄 𑐣𑑄 𑐣𑑂𑐴𑐵𑐥𑐵 𑐀𑐣 𑐰𑑄𑐥𑐶𑑄 𑐖𑐣𑐖𑐵𑐟𑐶 𑐢𑐵𑑅𑐳𑐵 𑐮𑑀𑐥𑐔𑐵 𑐏𑑅 𑑋 𑐮𑐶𑐥𑐵 𑐬𑐵𑐞𑐵 𑐱𑐵𑐳𑐣𑐫𑐵 𑐴𑐾 𑐕𑐐𑐹 𑐮𑐶𑐔𑑂𑐰𑑅 𑐎𑐠𑑄 𑐁𑐬𑑂𑐠𑐶𑐎 𑐰𑐶𑐔𑐮𑐣𑐫𑑂 𑐣𑐾𑐰𑐵𑑅𑐟 𑐮𑐵𑑅𑐐𑐸 𑐏𑐣𑐾𑐡𑐸 𑑋

𑐄𑐎𑐶𑐳𑐣𑑄 𑐐𑐸𑐐𑐸 𑐏𑑂𑐰𑐥 𑐬𑐵𑐖𑑂𑐫𑑄 𑐐𑑀𑐬𑑂𑐏𑐵𑐫𑐵𑐟 𑐣𑐾𑐥𑐵𑐮 𑐩𑐞𑑂𑐜𑐮𑐫𑑂 𑐡𑐸𑐠𑑂𑐫𑐵𑐎𑐮, 𑐰 𑐴𑐾 𑐏𑑂𑐰𑐥𑐫𑐵 𑐣𑐾𑐰𑐵𑑅𑐟 𑐣𑑂𑐴𑐵𑐥𑐵𑐮𑐵𑐎 𑐠𑑅𑐐𑐸 𑐠𑐵𑐳𑑄 𑐰𑐶𑐳𑑂𑐠𑐵𑐥𑐶𑐟 𑐖𑐸𑐫𑐵 𑐰𑐣𑐾𑐩𑐵𑐮 𑑋
𑐠𑐸𑐎𑐠𑑄 𑐏𑑂𑐰𑐥𑑄 𑐣𑑂𑐴𑐵𑐥𑐵𑐮𑐵𑐎 𑐳𑐶𑐎𑑂𑐎𑐶𑐩𑐫𑐵 𑐥𑑂𑐬𑐰𑐵𑐳𑐫𑑂 𑐰𑑄𑐥𑐶𑑄 𑐎𑐳𑐖𑐸𑐟𑐫𑑂 𑐨𑐶𑐣𑐵𑐩𑐔𑐵 𑐎𑐠𑑄 𑐠𑑅 𑐳𑐶𑐎𑑂𑐎𑐶𑐩𑐫𑑂 𑐧𑑂𑐰𑐮𑑄𑐐𑐸 𑐧𑐵𑐏𑑄 𑐔𑐎𑑂𑐬𑐬𑐵𑐖 𑐟𑐶𑐩𑐶𑐮𑐵𑐖𑐸𑑄 𑐠𑑅𑐐𑐸 𑐔𑐫𑑂𑐴𑐵𑑅𑐐𑐸 𑐰𑐿𑑄𑐱𑐫𑑂 𑐖𑐶𑐟𑑅 𑐎𑐣𑐵𑐡𑐶𑐮 𑑋

𑐟𑐬 𑐰𑐫𑑂𑐎𑑅𑐫𑐵𑐎𑐾 𑐠𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐢𑐵𑑅𑐳𑐵 𑐡𑐸𑐐𑐸 𑐩𑐏𑐸 𑑋 𑐄𑐎𑐶𑑄 𑐰𑐫𑑂𑐎𑑅𑐫𑐵 𑐠𑑂𑐰 𑐮𑐸𑐩𑑄𑐟𑐶 𑐖𑐶𑑄 𑐔𑑂𑐰𑐫𑐵𑐧𑐷 𑐢𑐵𑐢𑐵𑑄 𑐴𑐾 𑐠𑐐𑐸𑐣𑐾 𑐰𑐫𑑂𑐎𑑅𑐫𑐵 𑐡𑐾𑐴𑐵𑐣𑑂𑐟 𑐖𑐸𑐮 𑑋 𑐠𑐸𑐎𑐶𑑄 𑐖𑐶𑐐𑐸 𑐣𑐸𑐐𑐮𑐫𑑂 𑐣𑑄 𑐨𑐟𑐶𑐔𑐵 𑐠𑐸𑑄𑐡𑐶𑐟 𑑋 𑐖𑑄𑐐𑐧𑐴𑐵𑐡𑐸𑐬𑑄 𑐎𑑀𑐟𑐥𑐬𑑂𑐰 𑐫𑐵𑑅𑐐𑐸 𑐖𑑅𑐏𑑅 𑐏𑑂𑐰𑐥𑑄 𑐠𑑅𑐐𑐸 𑐧𑐣𑐾𑐖𑑂𑐫𑐵 𑐳𑐣𑐾 𑐢𑐎𑐵𑑅 𑐂𑐣𑐵𑐫𑑂𑐔𑑂𑐰𑐫𑐵 𑐕𑐩𑑂𑐴 𑐎𑐳𑐖𑐸 𑐮𑐎𑑂𑐲𑑂𑐩𑐷𑐡𑐵𑐳 𑐫𑐾𑑃𑐫𑑂 𑐰𑑅𑐐𑐸 𑐏𑑅, 𑐟𑐬 𑐫𑐾𑑃 𑐮𑐵 𑐔𑑂𑐰𑐣𑐾 𑐴𑐾 𑐦𑐂𑐩𑐏𑐸𑐐𑐸 𑐀𑐰𑐳𑑂𑐠𑐵 𑐏𑐣𑐵𑑅 𑐰𑐫𑑂𑐎𑑅 𑐰 𑐰𑐫𑑂𑐎𑑅𑐫𑐵 𑐖𑐴𑐵𑐣 𑐣𑐶𑐩𑑂𑐴𑐟𑐶𑐥𑐸𑐮𑐶𑑄 𑐥𑐹𑐬𑑂𑐰𑐥𑐵𑐏𑐾 𑐳𑑂𑐰𑐫𑐵𑑅 𑐰𑐣 𑑋

𑐰𑐫𑑂𑐎𑑅𑐥𑐶𑑄 𑐥𑐹𑐬𑑂𑐰𑐷 𑐣𑐾𑐥𑐵𑐮𑐫𑐵 𑐂𑐮𑐵𑐩𑐫𑑂 𑐠𑑂𑐫𑐣 𑑋 𑐂𑐮𑐵𑐩𑑄 𑐳𑐟𑐶𑐎 𑐮𑐵𑑅𑐐𑐸 𑐠𑐵𑐫𑑂 𑐡𑐵𑐬𑑂𑐖𑐶𑐮𑐶𑐒𑐫𑑂 𑐀𑑄𑐐𑑂𑐬𑐾𑐖𑐟𑐫𑑂𑐳𑑄 𑐣𑑂𑐴𑐹𑐧𑐳𑑂𑐟𑐷 𑐰𑐶𑐳𑑂𑐟𑐵𑐬 𑐫𑐵𑐫𑐾𑐟 𑐳𑑂𑐰𑐫𑐵𑐔𑑂𑐰𑑄𑐐𑐸 𑐰𑐫𑑂𑐎𑐮𑑄 𑐏𑐣 𑑋 𑐡𑐵𑐬𑑂𑐖𑐶𑐮𑐶𑐒 𑐢𑐫𑐵𑐐𑐸 𑐠𑐵𑐫𑑂 𑐣𑑂𑐴𑐵𑐥𑐵 𑐳𑐶𑐎𑑂𑐎𑐶𑐩𑐫𑐵 𑐴𑐾 𑐕𑐐𑐹 𑐧𑑂𑐰 𑐏𑑅 𑑋 𑐠𑐣𑑄 𑐥𑐹𑐬𑑂𑐰 𑐚𑐶𑐳𑑂𑐚𑐵 𑐏𑐸𑐳𑐶 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐴𑐾 𑐚𑐶𑐳𑑂𑐚𑐵 𑐣𑐾𑐥𑐵𑐮𑐫𑐵 𑐥𑐹𑐬𑑂𑐰𑐷 𑐳𑐷𑐩𑐵𑐣𑐵 𑐖𑐸𑐫𑐵𑐔𑑂𑐰𑑄𑐧𑐮𑐫𑑂 𑐣𑐾𑐥𑐵𑐮–𑐀𑑄𑐐𑑂𑐬𑐾𑐖 𑐫𑐸𑐡𑑂𑐢 𑐖𑐸𑐫𑐵𑑅 𑐳𑐸𑐐𑑁𑐮𑐷 𑐳𑐣𑑂𑐢𑐶 𑐖𑐸𑐳𑐾𑐮𑐶𑑄 𑐚𑐶𑐳𑑂𑐚𑐵𑑄 𑐣𑐶𑐳𑐾𑑄 𑐥𑐱𑑂𑐔𑐶𑐩 𑐩𑐾𑐔𑐷 𑐏𑐸𑐳𑐶 𑐟𑐎𑐫𑐵 𑐥𑐴𑐵𑐜𑐷 𑐨𑐹𑐨𑐵𑐐 𑐣𑐾𑐥𑐵𑐮𑑄 𑐟𑑂𑐰𑑅𑐟𑐾𑐩𑐵𑐮 𑑋

𑐀𑐮𑐾 𑐀𑑄𑐐𑑂𑐬𑐾𑐖𑐟𑐳𑐾𑑄 𑐳𑐶𑐎𑑂𑐎𑐶𑐩𑐮𑐶𑐳𑐾 𑐳𑐣𑑂𑐢𑐶 𑐫𑐵𑐣𑐵𑑅 𑐰 𑐠𑐵𑐫𑑂 𑐧𑑂𑐬𑐶𑐚𑐶𑐳 𑐳𑐵𑐩𑑂𑐬𑐵𑐖𑑂𑐫𑐮𑐶𑐳𑐾 𑐳𑑂𑐰𑐵𑐎𑐮 𑑋 𑐠𑐸𑐎𑐠𑑄 𑐡𑐵𑐬𑑂𑐖𑐶𑐮𑐶𑐒𑐫𑐵 𑐣𑐎𑐟𑐶𑐣𑐶 𑐰𑐶𑐎𑐵𑐳 𑐀𑑄𑐐𑑂𑐬𑐾𑐖 𑐱𑐵𑐳𑐣𑑄 𑐫𑐵𑐣𑐵𑐔𑑂𑐰𑑄𑐧𑐮𑐫𑑂 𑐗𑐷 𑐮𑐎𑑂𑐲𑑂𑐩𑐷𑐡𑐵𑐳 𑐎𑐳𑐖𑐸 𑐠𑐣 𑐠𑑂𑐫𑑄𑐎𑑅𑐰𑐮 𑑋 𑐁𑑅 𑐮𑐎𑑂𑐲𑑂𑐩𑐷𑐡𑐵𑐳 𑐎𑐳𑐖𑐸𑑄 𑐠𑐣 𑐔𑑂𑐰𑐣𑐵𑑅 𑐕𑐸 𑐖𑑂𑐫𑐵 𑐳𑐣𑐾𑐐𑐸 𑐢𑐎𑐵𑑅 𑐧𑐶𑐔𑐵𑑅 𑐫𑐵𑐟 𑑋 𑐰𑐫𑑂𑐎𑐮𑑄 𑐐𑐸𑐣𑑂𑐡𑐸𑑂𑐬𑐫𑐵 𑐨𑐵𑐬𑐷 𑐠𑑀𑐎𑑄 𑐣𑑂𑐫𑐵𑐣𑐵𑑅 𑐢𑑂𑐫𑐧𑐵 𑐕𑐐𑑅 𑐕𑐐𑑅𑐫𑐵 𑐧𑑂𑐰 𑐟𑐫𑐵𑑅 𑐩𑐶𑐂𑐐𑐸 𑐫𑐵𑐣𑐵𑐡𑐶𑐮 𑑋

𑐠𑑂𑐰 𑐐𑐸𑐣𑑂𑐡𑐸 𑐮𑐵 𑐕𑐣𑑂𑐴𑐸𑑄 𑐴𑐾 𑐦𑐸𑐟 𑑋 𑐎𑐣𑑂𑐴𑐫𑑂𑐎𑐸𑐣𑑂𑐴𑐸 𑐣𑑄 𑐮𑐎𑑂𑐲𑑂𑐩𑐷𑐡𑐵𑐳 𑐎𑐳𑐖𑐸𑑄 𑐠𑐠𑐾 𑐴𑐾 𑐐𑐸𑐣𑑂𑐡𑐸𑑂𑐬𑐫𑐵 𑐖𑑂𑐫𑐵 𑐫𑐵𑐟 𑑋 𑐠𑐸𑐐𑐸 𑐴𑐾 𑐧𑐣𑐾𑐖𑑂𑐫𑐵𑑄 𑐮𑐎𑑂𑐲𑑂𑐩𑐷𑐡𑐵𑐳 𑐎𑐳𑐖𑐸𑐫𑐵 𑐰𑑂𑐫𑐵𑐥𑐵𑐬 𑐡𑐵𑐬𑑂𑐖𑐶𑐮𑐶𑐒 𑐢𑐫𑐵𑐐𑐸 𑐠𑐵𑐳𑐫𑑂 𑐳𑑂𑐠𑐵𑐥𑐶𑐟 𑐖𑐸𑐂𑐦𑐟 𑑋 𑐗𑐷 𑐎𑐳𑐖𑐸𑑄 𑐣𑑂𑐴𑐵𑐥𑐵 𑐐𑐸𑐣𑑂𑐡𑐸𑑂𑐬 𑐩𑐷𑐐𑐸 𑐠𑐵𑐟𑐠𑐮𑑀 𑐮𑐶𑐥𑐵 ‘𑐐𑐸𑐣𑑂𑐡𑑂𑐬𑐷 𑐧𑐖𑐵𑐬’ 𑐫𑐵 𑐣𑐵𑐩𑑄 𑐴𑐾 𑐣𑐵𑑄𑐖𑐵𑐮 𑑋𑐠𑐸𑐐𑐸 𑐴𑐾 𑐂𑐮𑐫𑑂 𑐳𑐶𑐎𑑂𑐎𑐶𑐩𑐫𑐵 𑐕𑐩𑑂𑐴 𑐖𑐶𑐩𑐶𑐡𑐵𑐬 𑐮𑐵𑐩𑐵 𑐡𑑀𑐖𑑂𑐬𑑂𑐫𑐾 𑐢𑐫𑐵𑐩𑑂𑐴 𑐡𑐵𑐬𑑂𑐖𑐶𑐮𑐶𑐒 𑐰𑐫𑐵𑑅 𑐔𑑂𑐰𑐣𑐷𑐧𑐮𑐫𑑂 𑐮𑐎𑑂𑐲𑑂𑐩𑐷𑐡𑐵𑐳 𑐳𑐵𑐴𑐸𑐫𑐵𑐎𑐾 𑐩𑐵𑐮 𑐠𑐶𑑄𑐎𑐵𑑅 𑐎𑐵𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐰𑑄 𑐠𑑅𑐥𑐶𑐣𑐶 𑐳𑐵𑐴𑐸 𑐥𑐸𑐮𑐾𑐩𑐦𑐸𑐳𑐾𑐮𑐶𑑄 𑐠𑑅𑐐𑐸 𑐖𑐐𑑂𑐐𑐵 𑐴𑐾 𑐧𑐷 𑐢𑐎𑐵𑑅 𑐳𑐶𑐎𑑂𑐎𑐶𑐩𑐫𑐵 𑐟𑐸𑐬𑐸𑐎 𑐢𑐫𑐵𑐠𑐵𑐳𑐫𑑂 𑐧𑑂𑐰𑐣𑐵𑐫𑑄𑐎𑐮 𑑋 𑐳𑐶𑐎𑑂𑐎𑐶𑐩 𑐩𑐴𑐵𑐬𑐵𑐖 𑐐𑐵𑐣𑑂𑐟𑑀𑐎𑐫𑑂 𑐔𑑂𑐰𑐣𑐷𑐐𑐸𑐮𑐶𑑄 𑐠𑑂𑐰 𑐠𑐵𑐫𑑂 𑐬𑐵𑐖𑐢𑐵𑐣𑐷 𑐴𑐾 𑐖𑐸𑐮 𑑋 𑐰𑑄 𑐠𑑅𑐐𑐸 𑐬𑐵𑐖𑑂𑐫𑐫𑑂 𑐖𑐶𑐩𑐶𑐡𑐵𑐬𑐷 𑐥𑑂𑐬𑐠𑐵 𑐣𑑂𑐴𑑂𑐫𑐵𑐎𑐵𑑅 𑐖𑐶𑐩𑐶𑐡𑐵𑐬𑐥𑐵𑐏𑐾𑑄 𑐥𑑀𑐟 𑐀𑐳𑐹𑐮 𑐫𑐵𑐎𑐵𑑅 𑐠𑑅𑐠𑐵𑐫𑑂 𑐩𑐵𑐮𑐥𑑀𑐟 𑐡𑐸𑐎𑐵𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐡𑑀𑐖𑑂𑐬𑑂𑐫𑐾 𑐮𑐵𑐩𑐵𑑄 𑐟𑐸𑐬𑐸𑐎 𑐖𑐶𑐩𑐶𑐡𑐵𑐬𑐷𑐫𑐵 𑐩𑐵𑐮𑐥𑑀𑐟 𑐀𑐳𑐸𑐮 𑐫𑐵𑐣𑐵𑑅 𑐐𑐵𑐣𑑂𑐟𑑀𑐎𑐫𑐵 𑐥𑐸𑐮𑐾 𑐩𑐦𑐫𑐵𑐔𑑂𑐰𑑄𑐧𑐮𑐫𑑂 𑐳𑐵𑐴𑐸 𑐮𑐎𑑂𑐲𑑂𑐩𑐷𑐡𑐵𑐳𑐫𑐵 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐎𑐬 𑐥𑐸𑐮𑐾𑐟 𑐳𑐶𑐎𑑂𑐎𑐶𑐩 𑐩𑐴𑐵𑐬𑐵𑐖𑐵𑐫𑐵𑐠𑐫𑑂 𑐩𑑂𑐴𑐳𑐷𑐎𑐵 𑐧𑐶𑐮 𑑋 𑐀𑐮𑐾 𑐕𑐸 𑐩𑐵𑐮, 𑐳𑐶𑐎𑑂𑐎𑐶𑐩 𑐩𑐴𑐵𑐬𑐵𑐖𑑄 𑐟𑐸𑐬𑐸𑐎𑐫𑐵 𑐖𑐶𑐩𑐶𑐡𑐵𑐬𑐷 𑐴𑐾 𑐮𑐎𑑂𑐲𑑂𑐩𑐷𑐡𑐵𑐳 𑐳𑐵𑐴𑐸𑐫𑐵𑐟 𑐮𑑅𑐮𑑂𑐴𑐵𑐣𑐵𑐧𑐶𑐮 𑑋
𑐠𑐸𑐮𑐶 𑐡𑐳𑐾𑐮𑐶𑑄 𑐖𑐶𑐩𑐶𑐡𑐵𑐬𑐷 𑐰 𑐰𑑂𑐫𑐵𑐥𑐵𑐬 𑐣𑐵𑐥𑑄 𑐳𑐩𑑂𑐴𑐵𑐮𑐾 𑐫𑐵𑐫𑐾𑐟 𑐮𑐎𑑂𑐲𑑂𑐩𑐷𑐡𑐵𑐳𑑄 𑐏𑑂𑐰𑐥𑐫𑑂 𑐰𑐣𑐵𑑅 𑐠𑑅 𑐎𑐶𑐖𑐵 𑐔𑐣𑑂𑐡𑑂𑐬𑐰𑐷𑐬 𑐣𑐵𑐥𑑄 𑐩𑐾𑐥𑐶𑑄 𑐣𑐾𑐰𑐵𑑅𑐟 𑐳𑐶𑐎𑑂𑐎𑐶𑐩𑐫𑑂 𑐧𑑂𑐰𑐣𑐵 𑐫𑑄𑐎𑐮 𑑋

𑐔𑐣𑑂𑐡𑑂𑐬𑐰𑐷𑐬 𑐎𑐳𑐖𑐸 𑐱𑐵𑐬𑐷𑐬𑐶𑐎 𑐧𑐮𑑄 𑐔𑑂𑐰𑐣𑑂𑐴𑑂𑐫𑐵𑑅𑐩𑑂𑐴 𑐣𑑄 𑐖𑐸𑐫𑐵𑐔𑑂𑐰𑐣 𑑋 𑐠𑑂𑐰𑐫𑑂𑐎𑑅𑐫𑐵 𑐎𑐸𑐟𑐮𑑄 𑐀𑐣 𑐮𑐎𑑂𑐲𑑂𑐩𑐷𑐡𑐵𑐳𑐫𑐵 𑐖𑐶𑐩𑐶𑐡𑐵𑐬𑐷 𑐖𑑂𑐫𑐵 𑐟𑐵𑑅𑐮𑐵𑐎𑐾 𑐦𑐟 𑑋 𑐴𑐵𑐎𑐣𑑄 𑐬𑑀𑐮𑑀 𑐏𑑀𑐮𑐵 𑐢𑐫𑐵𑐠𑐵𑐫𑑂 𑐳𑐶𑐖𑑅 𑐏𑐵𑐣𑐷 𑐡𑐸𑐐𑐸 𑐖𑐸𑐫𑐵𑑅 𑐀𑐣𑑄 𑐳𑐶𑐖𑑅 𑐥𑐶𑐎𑐫𑐵𑑅 ‘𑐳𑐶𑐎𑑂𑐎𑐶𑐩 𑐳𑐬𑑂𑐎𑐵𑐬’𑐫𑐵 𑐐𑑂𑐰𑑅𑐢𑑂𑐫𑐧𑐵 𑐣𑑄 𑐔𑐮𑐫𑑂 𑐫𑐵𑐟 𑑋 𑐀𑐮𑐾 𑐮𑐵 𑐮𑐎𑑂𑐲𑑂𑐩𑐷𑐡𑐵𑐳 𑐔𑐣𑑂𑐡𑑂𑐬𑐰𑐷𑐬𑐫𑐵𑐟 ‘𑐚𑐎𑑂𑐳𑐵𑐬𑐷’ 𑐡𑐬𑑂𑐖𑐵 𑐧𑐶𑐫𑐵𑑅 𑐳𑐶𑐎𑑂𑐎𑐶𑐩 𑐳𑐬𑑂𑐎𑐵𑐬𑐫𑐵 𑐀𑐬𑑂𑐠 𑐰𑐶𑐨𑐵𑐐 𑐴𑐾 𑐣𑐾𑐰𑐵𑑅𑐟𑐫𑑂 𑐮𑑂𑐴𑐵𑐟𑐫𑑂 𑐮𑑅𑐮𑑂𑐴𑐵𑐣𑐵𑐧𑐶𑐮 𑑋

𑐠𑐸𑐮𑐶 𑐏𑑃𑐫𑐵 𑐥𑐺𑐲𑑂𑐛𑐨𑐹𑐩𑐶 𑐎𑐣𑐵𑑅𑐮𑐶 𑐔𑐎𑑂𑐬𑐬𑐵𑐖 𑐟𑐶𑐩𑐶𑐮𑐵𑐖𑐸𑑄 𑐠𑑅 𑐥𑐵𑐏𑐾𑐫𑐵 𑐏𑑃 𑐠𑐸𑐎𑐠𑑄 𑐣𑑂𑐴𑑂𑐫𑐠𑐣𑐵𑐡𑐶𑐮— 𑐏𑑂𑐰𑐥 𑐟𑑅𑐩𑐢𑐶 𑐟𑑂𑐰𑐵𑐮𑐫𑑂 𑐖𑐶𑐩𑐶 𑐕𑐾𑑃, 𑐧𑐵𑐖𑑂𑐫𑐵 𑐢𑐬𑑂𑐩𑐬𑐵𑐖 𑐟𑐶𑐩𑐶𑐮𑐵𑐫𑐵 𑐕𑐩𑑂𑐴 𑐑𑐣𑐶𑐲𑑂𑐛 𑐩𑐶𑐟𑑂𑐬 𑐬𑐾𑐰𑐟𑐷𑐬𑐩𑐞 𑐄𑐥𑐵𑐢𑑂𑐫𑐵𑑄 𑐳𑐬𑑂𑐎𑐵𑐬𑐷 𑐰𑐣𑐫𑐵 𑐛𑐾𑐎𑑂𑐎𑐵 𑐳𑐎𑐵𑐬𑐾 𑐫𑐵𑐣𑐵𑑅 𑐄𑐎𑐷 𑐢𑐣𑐖𑐩𑐵𑐣𑐷 𑐔𑑂𑐰𑐣𑐾𑐟 𑐖𑐶𑐩𑐶 𑐧𑐵𑐖𑑂𑐫𑐵𑐫𑐵𑐟 𑐧𑑂𑐰𑐣𑐵𑐫𑑄𑐎𑐮 𑑋 𑐠𑑂𑐰 𑐏𑑃 𑐳𑑄𑐰𑐟𑑂 𑑑𑑙𑑖𑑒–𑑖𑑓 𑐥𑐵𑐏𑐾𑐫𑐵 𑐏𑑅 𑑋

𑐱𑑂𑐬𑐷 𑑓 𑐔𑐣𑑂𑐡𑑂𑐬 𑐱𑐩𑑂𑐱𑐾𑐬 𑐬𑐵𑐞𑐵𑐫𑐵 𑐥𑐵𑐮𑐫𑑂 𑐖𑐸𑐫𑐵𑐔𑑂𑐰𑐣 𑑋 𑐰 𑐛𑐾𑐎𑐾𑐡𑐵𑐬 𑐬𑐾𑐰𑐟𑐷𑐬𑐩𑐞 𑐠𑑅𑐐𑐸 𑐛𑐾𑐎𑑂𑐎𑐵𑐫𑑂 𑐑𑐵𑐚𑐵 𑐖𑐸𑐳𑐾𑐮𑐶𑑄 𑐧𑐶𑐳𑐶𑐄𑑃 𑐰𑐣𑐵𑑅 𑐧𑐾𑐥𑐟𑑂𑐟𑐵 𑐖𑐸𑐮 𑑋 𑐀𑐮𑐾 𑐢𑐣𑐖𑐩𑐵𑐣𑐷 𑐖𑐶𑐩𑐶 𑐧𑐵𑐖𑑂𑐫𑐵 𑐢𑐬𑑂𑐩𑐬𑐵𑐖𑐫𑐵𑐟 𑐖𑑂𑐰𑐣𑐵𑐫𑑄𑐎𑐮 𑑋 𑐀𑐮𑐾 𑐕𑐸 𑐩𑐵𑐮, 𑐛𑐾𑐎𑐾𑐡𑐵𑐬 𑐬𑐾𑐰𑐟𑐷𑐬𑐩𑐞𑐫𑐵𑐟 𑐄𑐥𑐳𑑂𑐠𑐶𑐟 𑐫𑐵𑐫𑐾𑐩𑐦𑐸𑐟 𑐢𑐵𑑅𑐳𑐵 𑐧𑐵𑐖𑑂𑐫𑐵𑐫𑐵 𑐱𑑂𑐬𑐷𑐳𑐩𑑂𑐥𑐟𑑂𑐟𑐶 𑐴𑐾 𑐮𑐶𑐮𑐵𑐩 𑐖𑐸𑐂𑐐𑐸 𑐳𑐬𑑂𑐎𑐵𑐬𑐷 𑐥𑐹𑐬𑑂𑐖𑐷 𑐰𑐫𑑂𑐎𑑅𑐫𑐵𑐟 𑐖𑑂𑐰𑑄𑐎𑐮 𑑋

𑐀𑐮𑐾 𑐖𑐶𑐩𑐶 𑐕𑐾𑑃𑐫𑑂 𑐮𑐵 𑐟𑑅𑐢𑑄𑐐𑐸 𑐴𑐾 𑐧𑐰𑐞𑑂𑐜𑐬 𑐩𑐔𑐫𑑂 𑐖𑐸𑐮 𑑋 𑐖𑐶𑐩𑐶 𑐀𑐧𑐸 𑐔𑐣𑑂𑐡𑑂𑐬𑐬𑐵𑐖 𑐟𑐶𑐩𑐶𑐮𑐵𑑄 𑐱𑑂𑐬𑐷 𑑓 𑐩𑐴𑐵𑐬𑐵𑐖𑐵 𑐔𑐣𑑂𑐡𑑂𑐬𑐱𑐩𑑂𑐱𑐾𑐬𑐫𑐵𑐟 𑐧𑐶𑐣𑑂𑐟𑐶 𑐫𑐵𑐣𑐵𑑅 𑐩𑑂𑐫𑐵𑐡 𑐎𑐫𑐵𑑅 𑐛𑐾𑐎𑐾𑐡𑐵𑐬 𑐬𑐾𑐰𑐟𑐷𑐬𑐩𑐞𑐫𑐵 𑐏𑑀𑐖 𑐏𑐧𑐬𑐾 𑐥𑐹𑐬𑑂𑐰𑐷 𑐟𑐬𑐵𑐂𑐥𑐵𑐏𑐾 𑐰𑐣𑐵𑑅 𑐳𑐥𑑂𑐟𑐬𑐷 𑐴𑐣𑐸𑐩𑐵𑐣𑐣𑐐𑐬 𑐢𑐫𑐵𑐠𑐵𑐫𑑂 𑐰𑐫𑐵𑐟 𑐮𑐸𑐂𑐎𑐵𑑅 𑐳𑐬𑐎𑐵𑐬𑐫𑑂 𑐧𑐶𑐣𑑂𑐟𑐶𑐥𑐟𑑂𑐬 𑐟𑐫𑐵𑑅 𑐀𑐣𑑄𑐣𑐶𑐳𑐾𑑄 𑐀𑐜𑑂𑐜𑐵𑐳𑐵𑐬 𑐫𑐵𑐣𑐵𑑅 𑐖𑑂𑐰𑐣𑐵𑐴𑐮 𑑋

𑐀𑐮𑐾 𑐰𑐫𑐵𑐥𑐵𑐏𑐾𑑄 𑐴𑐾 𑐛𑐎𑑂𑐎𑐵𑐫𑐵 𑐦𑐬𑐦𑐵𑐬𑐾𑐏 𑐖𑐸𑐳𑐾𑑄𑐮𑐶 𑐖𑐶𑐩𑐶𑐐𑐸 𑐱𑑂𑐬𑐷𑐳𑐩𑑂𑐥𑐟𑑂𑐟𑐶 𑐦𑐸𑐎𑐸𑐰𑐵 𑐖𑐸𑐮 𑑋 𑐠𑐸𑐎𑐠𑑄 𑐖𑐶𑐩𑐶 𑐧𑐵𑐖𑑂𑐫𑐵 𑐰 𑐀𑐧𑐸𑑄 𑐟𑑅𑐢𑑄𑐐𑐸 𑐴𑐞𑑂𑐜𑐬 𑐣𑐳𑐾𑐮𑐶𑑄 𑐰𑐶𑐬𑐎𑑂𑐟 𑐖𑐸𑐫𑐵𑑅 𑐧𑐵𑐖𑑂𑐫𑐵𑑄 𑐠𑑅 𑐎𑐵𑐫 𑐔𑐣𑑂𑐡𑑂𑐬𑐬𑐵𑐖 𑐖𑑂𑐰𑐣𑐵𑑅 𑐡𑐵𑐬𑑂𑐖𑐶𑐮𑐶𑐒𑐥𑐵𑐏𑐾 𑐰𑐣𑐵𑑅 𑐠𑑅𑐟 𑐕𑐸𑑄 𑐰𑑂𑐫𑐰𑐳𑐵𑐫 𑐩𑐵𑑅 𑐖𑐸𑐮 𑑋 𑐄𑐠𑐵𑐫𑑂 𑐳𑑄. 𑑑𑑙𑑗𑑐 𑐳𑐵𑐮 𑐥𑐵𑐏𑐾 𑐳𑐶𑐮𑐶𑐐𑐸𑐝𑐷 𑐣𑐶𑐳𑐾𑑄 𑐡𑐵𑐬𑑂𑐖𑐶𑐮𑐶𑐒 𑐠𑑂𑐫𑑄𑐎 𑐬𑐾𑐮𑐰𑐾𑐫𑐵 𑐖𑑂𑐫𑐵 𑐔𑐵𑐮𑐸 𑐖𑐸𑐫𑐵𑐔𑑂𑐰𑐣 𑑋

𑐄𑐎𑐶𑐫𑐵 𑐛𑐾𑐎𑐾𑐡𑐵𑐬 𑐖𑑄𑐐𑐰𑐷𑐬 𑐳𑐬𑑂𑐡𑐵𑐬𑑄 𑐀𑐣 𑐖𑑂𑐫𑐵𑐩𑐶𑐟𑐫𑑂𑐟 𑐩𑐵𑑅𑐐𑐸 𑐬𑐵𑐳𑐣 𑐥𑐳𑑅 𑐟𑐫𑐾𑐟 𑐧𑐵𑐖𑑂𑐫𑐵 𑐢𑐬𑑂𑐩𑐬𑐵𑐖𑐫𑐵𑐟 𑐐𑑂𑐰𑐵𑐎𑐮 𑑋 𑐀𑐮𑐾 𑐧𑐵𑐖𑑂𑐫𑐵𑑄 𑐠𑑅 𑐎𑐵𑐫𑐥𑐶𑑄 𑐔𑐣𑑂𑐡𑑂𑐬𑐬𑐵𑐖, 𑐨𑐷𑐩𑐬𑐵𑐖 𑐳𑐩𑐾𑐟 𑐖𑑂𑐰𑐣𑐵𑑅 𑐀𑐣 𑐰𑑂𑐫𑐵𑐥𑐵𑐬 𑐫𑐵𑐣𑐵𑐡𑐶𑐮 𑑋 𑐮𑐶𑐥𑐵 𑐴𑐵𑐎𑐣𑑄 𑐚𑐶𑐳𑑂𑐚𑐵 𑐏𑐸𑐳𑐶 𑐟𑐎 𑐮𑑃 𑐡𑐫𑐾𑐎𑐾𑐟 ‘𑐐𑐾𑐮𑐸 𑐏𑑀𑐮𑐵’ 𑐢𑐫𑐵𑐠𑐵𑐫𑑂 𑐧𑐖𑐵𑐬 𑐳𑑂𑐠𑐵𑐥𑐶𑐟 𑐖𑐸𑐮 𑑋 𑐀𑐣𑐫𑐵 𑐛𑐾𑐎𑑂𑐎𑐵 𑐣𑑄 𑐖𑑄𑐐𑐰𑐷𑐬 𑐳𑐬𑑂𑐡𑐵𑐬𑑄 𑐴𑐾 𑐎𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐠𑐣 𑐣𑑄 𑐩𑐖𑐡𑐸𑐬𑐟𑐫𑑂𑐟 𑐬𑐵𑐳𑐣 𑐥𑐳𑑅 𑐩𑐵𑑅𑐐𑐸𑐮𑐶𑑄 𑐖𑐶𑐩𑐶 𑐀𑐧𑐸, 𑐎𑐎𑐵, 𑐔𑐣𑑂𑐡𑑂𑐬𑐬𑐵𑐖–𑐨𑐷𑐩𑐬𑐵𑐖𑐥𑐶𑑄𑐳𑑄 𑐴𑐾 𑐠𑑂𑐰 𑐰𑑂𑐫𑐰𑐳𑐵𑐫 𑐔𑐵𑐮𑐸 𑐫𑐵𑐣𑐵𑐡𑐶𑐮 𑑋 𑐠𑐠𑐾 𑐀𑐬𑑂𑐠𑑀𑐥𑐵𑐬𑑂𑐖𑐣 𑐖𑑂𑐫𑐵𑐫𑑂 𑐰𑑄𑐥𑐶𑑄 𑐔𑐣𑑂𑐡𑑂𑐬𑐬𑐵𑐖 𑐟𑐶𑐩𑐶𑐮𑐵𑐫𑐵 𑐂𑐴𑐶𑐥𑐵 𑐳𑑄. 𑑑𑑙𑑗𑑒 𑐳𑐵𑐮 𑐥𑐵𑐏𑐾 𑐳𑐶𑐎𑑂𑐎𑐶𑐩 𑐟𑐸𑐬𑐸𑐎 𑐣𑐶𑐰𑐵𑐳𑐷 𑐮𑐩𑑂𑐧𑑀𑐡𑐬 𑐎𑐳𑐖𑐸𑐫𑐵 𑐩𑑂𑐴𑑂𑐫𑐵𑐫𑑂 𑐄𑐩𑐵𑐡𑐾𑐰𑐷𑐮𑐶𑐳𑐾 𑐖𑐸𑐮 𑑋 𑐀𑐣 𑐴𑐾 𑐳𑑄. 𑑑𑑙𑑘𑑓 𑐳𑐵𑐮𑐫𑑂 𑐖𑐶𑐐𑐸 𑐖𑐣𑑂𑐩 𑐖𑐸𑐮 𑑋 𑐖𑐶𑑄 𑐡𑐵𑐖𑐸𑐥𑐶𑑄 𑐨𑐰𑐵𑐣𑐷𑐬𑐵𑐖 𑐰 𑐥𑐰𑐣𑐬𑐵𑐖 𑐟𑐶𑐩𑐶𑐮𑐵 𑐣𑐶𑐩𑑂𑐴 𑐡𑐣𑐶 𑑋

𑐁𑑅 𑐖𑐶𑐩𑐶 𑐥𑐵𑐖𑐸𑐥𑐶𑐣𑐶𑐐𑐸 𑐰𑑄𑐱𑐰𑐺𑐟𑑂𑐟 𑐕𑐎𑑂𑐰𑑅 𑐣𑑄 𑐳𑑂𑐰𑐫𑐾 –
𑐮𑐎𑑂𑐲𑑂𑐩𑐷𑐡𑐵𑐳 𑐰 𑐔𑐣𑑂𑐡𑑂𑐬𑐰𑐷𑐬 𑐎𑐳𑐖𑐸𑐟𑐫𑑂 𑐳𑐶𑐎𑑂𑐎𑐶𑐩 𑐫𑐵𑐟𑑂𑐬𑐵𑐫𑐵 𑐏𑑃 𑐔𑑂𑐰𑐫𑑂 𑐔𑐬𑑂𑐔𑐵 𑐫𑐵𑐫𑐾 𑐢𑐸𑐣 𑑋 𑐠𑐸𑐩𑐶 𑐴𑐾 𑐀𑐧𑐸 𑐨𑐵𑐖𑐸 𑐣𑐵𑐬𑐵𑐫𑐞 𑐢𑐫𑐵𑐩𑑂𑐴 𑐏𑑂𑐰𑐥 𑐂𑐣𑐵𑐫𑐔𑑂𑐰𑐫𑐵 𑐎𑐳𑐖𑐸 𑐏𑑅 𑑋 𑐳𑐶𑐎𑑂𑐎𑐶𑐩 𑐰𑐣𑐵𑑅 𑐠𑑂𑐰𑐫𑐵 𑐎𑐵𑐫𑐥𑐶𑑄𑐳𑑄 𑐀𑐣 𑐰𑑄𑐱𑐰𑐺𑐡𑑂𑐢𑐶 𑐠𑐸𑐎𑐠𑑄 𑐫𑐵𑑅𑐐𑐸 𑐖𑐸𑐮 𑑋

𑐨𑐵𑐖𑐸𑐣𑐵𑐬𑐵𑐫𑐞 𑐎𑐳𑐖𑐸

𑐮𑐎𑑂𑐲𑑂𑐩𑐷𑐡𑐵𑐳 𑐔𑐣𑑂𑐡𑑂𑐬𑐰𑐷𑐬

𑐴𑐬𑐶𑐡𑐵𑐳 𑐥𑑂𑐬𑐢𑐵𑐣 𑐬𑐵𑐩𑐎𑐺𑐲𑑂𑐞 𑐥𑑂𑐬𑐢𑐵𑐣 𑐮𑐩𑑂𑐧𑑀𑐡𑐬 𑐥𑑂𑐬𑐢𑐵𑐣
(𑐣𑐵𑐩𑐠𑐵𑐒) (𑐳𑐸𑐩𑑂𑐧𑐸𑐎) (𑐟𑐸𑐬𑐸𑐎)

𑐴𑐶𑐬𑐵𑐮𑐵𑐮 𑐥𑑂𑐬𑐢𑐵𑐣 𑐴𑐬𑐶𑐥𑑂𑐬𑐳𑐵𑐡 𑐥𑑂𑐬𑐢𑐵𑐣 𑐩𑑀𑐟𑐷𑐔𑐣𑑂𑐡𑑂𑐬 𑐥𑑂𑐬𑐢𑐵𑐣

𑐀𑐬𑐸𑐞 𑐔𑐣𑑂𑐡𑑂𑐬 𑐥𑑂𑐬𑐢𑐵𑐣

𑐳𑐶𑐎𑑂𑐎𑐶𑐩 𑐬𑐵𑐖𑑂𑐫𑐫𑐵 𑐳𑐩𑑂𑐨𑑂𑐬𑐵𑐣𑑂𑐟 𑐥𑐬𑐶𑐰𑐵𑐬 𑐖𑐸𑐳𑐾𑐮𑐶𑑄 𑐀𑑄𑐐𑑂𑐬𑐾𑐖 𑐳𑐬𑐎𑐵𑐬𑐫𑐵 𑐩𑐶𑐏𑐵 𑐄𑐩𑐶𑐥𑐵𑐏𑐾𑐬 𑐮𑐵𑐣𑐵𑐔𑑂𑐰𑐣 𑑋 𑐀𑐮𑐾 𑐮𑐎𑑂𑐲𑑂𑐩𑐷𑐡𑐵𑐳𑐫𑐵 𑐟𑑅𑐢𑐶𑐎𑑅𑐩𑑂𑐴 𑐎𑐵𑐫 𑐴𑐬𑐶𑐡𑐵𑐳 𑐥𑑂𑐬𑐢𑐵𑐣𑐫𑐵𑐟 𑐀𑑄𑐐𑑂𑐬𑐾𑐖 𑐳𑐬𑐎𑐵𑐬𑑄 ‘𑐬𑐵𑐫 𑐳𑐵𑐴𑐾𑐧’ 𑐥𑐡𑐰𑐷 𑐧𑐶𑐮 𑐣𑑂𑐴𑐵𑐥𑐵𑑄 𑑋 𑐀𑐣𑑄𑐮𑐶 𑐰𑐫𑐵 𑐴𑐾 𑐔𑐶𑐢𑐶𑐎𑑅𑐩𑑂𑐴 𑐎𑐵𑐫 𑐮𑐩𑑂𑐧𑑀𑐡𑐬 𑐥𑑂𑐬𑐢𑐵𑐣𑐫𑐵𑐟 𑐣𑑄 ‘𑐬𑐵𑐫𑐳𑐵𑐴𑐾𑐧’ 𑐥𑐡𑐰𑐷 𑐧𑐶𑐮 𑑋 𑐠𑑂𑐰𑐫𑑂𑐎𑑅 𑐖𑐶𑐩𑐶 𑐩𑐵𑑄𑐫𑐵 𑐀𑐧𑐸 𑐖𑐸𑐫𑐵𑑅 𑐖𑐶𑑄 𑐥𑐵𑐖𑐸𑐧𑐵𑐖𑑂𑐫𑐵 𑐢𑐵𑐫𑐾𑐩𑐵𑐮 𑑋

𑐠𑑂𑐰𑐫𑐵 𑐎𑐵𑐫 𑐩𑑀𑐟𑐷𑐔𑐣𑑂𑐡𑑂𑐬 𑐥𑑂𑐬𑐢𑐵𑐣𑐫𑐵𑐟 𑐖𑐶𑑄 𑐳𑐡𑑂𑐡𑐾 𑐥𑐵𑐖𑐸 𑐢𑐵𑐫𑐾𑐩𑐵𑐮 𑑋 𑐰𑐫𑑂𑐎𑑅𑐫𑐵 𑐀𑑄𑐐𑑂𑐬𑐾𑐖𑐷 𑐱𑐿𑐎𑑂𑐲𑐶𑐎 𑐫𑑀𑐐𑑂𑐫𑐟𑐵𑐫𑐵𑐟 𑐎𑐡𑐬 𑐫𑐵𑐣𑐵𑑅 𑐀𑑄𑐐𑑂𑐬𑐾𑐖 𑐳𑐬𑐎𑐵𑐬𑑄 𑐡𑐵𑐬𑑂𑐖𑐶𑐮𑐶𑐒𑐫𑐵 𑐳𑐧𑐜𑐶𑐳𑑂𑐚𑑂𑐬𑐶𑐎𑑂𑐚 𑐎𑐮𑐾𑐎𑑂𑐚𑐬 𑐥𑐡𑐫𑑂 𑐣𑐶𑐫𑐸𑐎𑑂𑐟 𑐫𑐵𑑅𑐐𑐸 𑐖𑐸𑐮 𑑋‘𑐀𑐠𑐾 𑐴𑐾 𑐮𑐎𑑂𑐲𑑂𑐩𑐷𑐡𑐵𑐳𑐫𑐵 𑐩𑐵𑐴𑐶𑐮𑐵𑐩𑑂𑐴 𑐎𑐵𑐫 𑐬𑐵𑐩𑐎𑐺𑐲𑑂𑐞 𑐥𑑂𑐬𑐢𑐵𑐣 𑐳𑐶𑐎𑑂𑐎𑐶𑐩𑐫𑐵 𑐳𑐸𑐩𑑂𑐧𑐸𑐎 𑐢𑐫𑐵𑐠𑐵𑐫𑑂 𑐔𑑂𑐰𑐣𑐵𑑅 𑐰𑑄 𑐠𑑅 𑐎𑐵𑐫𑐥𑐶𑑄 𑐴𑐶𑐬𑐵𑐮𑐵𑐮 𑐰 𑐴𑐬𑐶𑐥𑑂𑐬𑐳𑐵𑐡 𑐩𑐢𑑂𑐫𑐾 𑐎𑐵𑐣𑑂𑐕𑐵𑐩𑑂𑐴 𑐴𑐬𑐶𑐥𑑂𑐬𑐳𑐵𑐡𑐫𑐵𑐟 𑐡𑐵𑐬𑑂𑐖𑐶𑐮𑐶𑐒𑐫𑑂 𑐟𑐫𑐵𑑅 𑐁𑐏𑑅 𑐧𑑂𑐰𑑄𑐎𑐮 𑑋

𑐰𑐫𑑂𑐎𑐮𑑄 𑐊𑐩𑐊, 𑐧𑐷𑐊𑐮 𑐥𑐵𑐳 𑐫𑐵𑐣𑐵𑑅 𑐀𑐣 𑐴𑐾 𑐰𑐎𑐵𑐮𑐟𑐫𑐵 𑐖𑑂𑐫𑐵 𑐣𑑄 𑐣𑑂𑐴𑑂𑐫𑐵𑐎𑐵𑐡𑐶𑐮 𑑋 𑐰𑐫𑑂𑐎𑑅𑐫𑐵𑐟 𑐣𑑄 𑐀𑑄𑐐𑑂𑐬𑐾𑐖 𑐳𑐬𑐎𑐵𑐬𑐥𑐵𑐏𑐾𑑄 ‘𑐬𑐵𑐫𑐳𑐵𑐴𑐾𑐧’ 𑐥𑐡𑐰𑐷 𑐧𑐶𑐫𑐵𑐟𑑅𑐐𑐸 𑐡𑐸 𑑋
𑐄𑐐𑐸 𑐧𑐏𑐟𑐫𑑂 𑐣𑐾𑐥𑐵𑐮𑐫𑑂 𑐬𑐵𑐞𑐵𑐰𑐶𑐬𑐸𑐡𑑂𑐢 𑐁𑐣𑑂𑐡𑑀𑐮𑐣 𑐳𑐸𑐬𑐸 𑐖𑐸𑐫𑐵𑐔𑑂𑐰𑐣 𑑋 𑐠𑐸𑐎𑐶𑐫𑐵 𑐣𑐾𑐥𑐵𑐮𑑄 𑐥𑐶𑐣𑐾 𑐬𑐵𑐖𑐣𑐷𑐟𑐶𑐎 𑐣𑐾𑐟𑐵 𑐰𑐶𑐱𑑂𑐰𑐾𑐱𑑂𑐰𑐬 𑐥𑑂𑐬𑐳𑐵𑐡 𑐎𑑀𑐂𑐬𑐵𑐮𑐵, 𑐐𑐞𑐾𑐱𑐩𑐵𑐣 𑐳𑐶𑑄𑐴 𑐁𑐡𑐶𑐥𑐶𑐣𑐶𑐐𑐸 𑐳𑐩𑑂𑐥𑐬𑑂𑐎 𑐡𑐵𑐬𑑂𑐖𑐶𑐮𑐶𑐒𑐫 𑐴𑐬𑐶𑐥𑑂𑐬𑐳𑐵𑐡 𑐥𑑂𑐬𑐢𑐵𑐣 𑐰𑐎𑐶𑐮𑐮𑐶𑐳𑐾 𑐣𑑄 𑐖𑐹𑐰𑐣 𑑋

𑐳𑐶𑐎𑑂𑐎𑐶𑐩𑐫𑐵 𑐣𑐾𑐰𑐵𑑅𑐟𑐳𑐾𑑄 𑐣𑑄 𑐣𑐾𑐥𑐵𑐮𑐫𑐵 𑐖𑐣𑐁𑐣𑑂𑐡𑑀𑐮𑐣𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐠𑑂𑐰 𑐁𑐣𑑂𑐡𑑀𑐮𑐣 𑐡𑐶𑐎𑐵𑑅𑐮𑐶 𑐣𑐾𑐥𑐵𑐮𑐫𑑂 𑐬𑐵𑐖𑐣𑐷𑐟𑐶𑐎 𑐥𑐬𑐶𑐰𑐬𑑂𑐟𑐣 𑐖𑐸𑐮 𑑋 𑐀𑐮𑐾 𑐳𑑄. 𑑒𑑐𑑐𑑗 𑐳𑐵𑐮𑑄 𑐣𑑂𑐴𑐹𑐐𑐸 𑐳𑐬𑑂𑐎𑐵𑐬𑐫𑐵 𑐳𑐶𑐦𑐵𑐬𑐶𑐳𑑄 𑐡𑐵𑐬𑑂𑐖𑐶𑐮𑐶𑐒𑐫𑐵 𑐰𑐎𑐶𑐮 𑐴𑐬𑐶𑐥𑑂𑐬𑐳𑐵𑐡 𑐥𑑂𑐬𑐢𑐵𑐣𑐫𑐵𑐟 𑐣𑐾𑐥𑐵𑐮𑐫𑐵 𑐥𑑂𑐬𑐢𑐵𑐣 𑐣𑑂𑐫𑐵𑐫𑐵𑐢𑐶𑐱 𑐥𑐡𑐫𑑂 𑐣𑐶𑐫𑐸𑐎𑑂𑐟 𑐫𑐵𑐟 – 𑐱𑑂𑐬𑐷 𑑕 𑐟𑑂𑐬𑐶𑐨𑐸𑐰𑐣 𑐳𑐬𑐎𑐵𑐬𑑄 𑑋

𑐰𑐫𑑂𑐎𑐮𑑄 𑐣𑐾𑐥𑐵𑐮𑐫𑐵 𑐥𑑂𑐬𑐱𑐵𑐳𑐣𑐶𑐎 𑐔𑐎𑑂𑐬𑐫𑐵𑐟 𑐥𑑂𑐬𑐖𑐵𑐟𑐵𑐣𑑂𑐟𑑂𑐬𑐶𑐎𑐬𑐞 𑐫𑐵𑐫𑐾𑐐𑐸 𑐥𑐮𑐵𑐏𑐫𑑂 𑐣𑑂𑐫𑐵𑐫𑐶𑐎 𑐫𑑀𑐐𑐡𑐵𑐣 𑐧𑐷𑐎𑐠𑑄 𑐖𑑂𑐫𑐵 𑐫𑐵𑐣𑐵𑐡𑐶𑐮 𑑋 𑐠𑐖𑑂𑐫𑐵𑑅𑐐𑐸 𑐣𑑂𑐴𑐹𑐐𑐸 𑐥𑐮𑐵𑑅 𑐣𑑂𑐴𑐹𑐩𑑂𑐴 𑐖𑐸𑐖𑐸 𑐩𑐴𑐾𑐣𑑂𑐡𑑂𑐬 𑐳𑐬𑐎𑐵𑐬𑐫𑐵𑐟 𑐩𑐫𑐮 𑑋 𑐄𑐎𑐶𑑄 𑐳𑑄. 𑑒𑑐𑑑𑑒 𑐳𑐵𑐮𑐫𑑂 𑐬𑐵𑐞𑐵𑐎𑐵𑐮𑐶𑐎 𑐥𑑂𑐬𑐢𑐵𑐣 𑐣𑑂𑐫𑐵𑐫𑐵𑐮𑐫 𑐴𑐾 𑐏𑐵𑐬𑐾𑐖 𑐫𑐵𑐣𑐵𑑅 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑐵 𑐣𑐵𑐩𑑄 𑐡𑐬𑐧𑐵𑐬𑐷 𑐨𑐹𑐩𑐶𑐎𑐵 𑐳𑐴𑐶𑐟 𑐣𑑂𑐫𑐵𑐫 𑐥𑐡𑑂𑐢𑐟𑐶 𑐣𑐷𑐳𑑂𑐰𑐣 𑑋

𑐥𑐬𑐶𑐞𑐵𑐩𑐟𑑅 𑐥𑑂𑐬𑐢𑐵𑐣 𑐣𑑂𑐫𑐵𑐫𑐵𑐢𑐶𑐱 𑐴𑐬𑐶𑐥𑑂𑐬𑐳𑐵𑐡 𑐣𑐾𑐥𑐵𑐮𑑄 𑐮𑐶𑐴𑐵𑑄 𑐰𑐣𑐾𑐩𑐵𑐮 𑑋 𑐮𑐶𑐥𑐵 𑐳𑑄. 𑑒𑑐𑑑𑑗 𑐳𑐵𑐮 𑐥𑐸𑐳𑑄𑐣𑐶𑐳𑐾𑑄 𑐣𑐾𑐥𑐵𑐮𑐫𑑂 𑐡𑐮𑐷𑐫 𑐬𑐵𑐖𑐣𑐷𑐟𑐶 𑐴𑐾 𑐩𑐟𑐫𑐾 𑐢𑑃𑐸𑐳𑐾𑑄𑐮𑐶 𑐥𑐘𑑂𑐔𑐵𑐫𑐟 𑐥𑐡𑑂𑐢𑐟𑐶𑐫𑐵 𑐳𑑄𑐰𑐶𑐢𑐵𑐣 𑐮𑐵𑐐𑐹 𑐫𑐵𑐟 𑑋 𑐠𑐸𑐐𑐸 𑐧𑐏𑐟𑐫𑑂 𑐳𑐶𑐎𑑂𑐎𑐶𑐩𑑄 𑐴𑐬𑐶𑐥𑑂𑐬𑐳𑐵𑐡 𑐥𑑂𑐬𑐢𑐵𑐣 𑐠𑑅𑐥𑐶𑐣𑐶 𑐴𑐾 𑐕𑐐𑐹 𑐥𑐵𑐬𑐶𑐰𑐵𑐬𑐶𑐎 𑐂𑐴𑐶𑐥𑐵𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑑅 𑐠𑑂𑐫𑑄𑐎𑐵𑐡𑐶𑐮 𑑋

𑐄𑐧𑐮𑐫𑑂 𑐖𑐸𑐖𑐸 𑐩𑐴𑐾𑐣𑑂𑐡𑑂𑐬 𑐰𑐫𑑂𑐎𑑅𑐫𑐵𑐟 𑐴𑐵𑐎𑐣𑑄 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑐵 𑐥𑑂𑐬𑐢𑐵𑐣 𑐣𑑂𑐫𑐵𑐫𑐵𑐢𑐶𑐱 𑐣𑐶𑐫𑐸𑐎𑑂𑐟𑐶 𑐫𑐵𑐣𑐵𑐧𑐶𑐮 𑑋 𑐠𑐸𑐐𑐸 𑐣𑐶𑐎𑑂𑐰𑑅𑐏𑐸𑐳𑐶𑐫𑐵 𑐣𑐶𑐫𑐸𑐎𑑂𑐟𑐶𑑄 𑐰𑐫𑑂𑐎𑑅𑐫𑐵𑐟 𑐖𑐹𑐐𑐸 𑐥𑐸𑐮𑐵𑑄 𑐑𑐵𑑅𑐫𑐵𑐟 𑐩𑐮𑐩𑐥𑐟𑑂𑐟𑐶 𑐠𑐾𑑄 𑐖𑐹𑐰𑐣 𑑋 𑐥𑐬𑐣𑑂𑐟𑐸 𑐰𑐫𑑂𑐎𑑅𑐫𑐵 𑐮𑐶𑐔𑑂𑐰𑑅𑐐𑐸 𑐎𑐵𑐬𑑂𑐫𑐎𑐵𑐮𑐫𑐵𑐟 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐶𑐱 𑐴𑐬𑐶𑐥𑑂𑐬𑐳𑐵𑐡 𑐥𑑂𑐬𑐢𑐵𑐣𑐖𑐸𑑄 𑐣𑑂𑐴𑐵𑐥𑐵 𑐠𑐾𑑄 𑐔𑐸𑐮𑐾 𑐢𑐵𑑅𑐳𑐵 𑐩𑐦𑐸𑐐𑐸 𑐫𑐟𑑂𑐠𑐾𑑄 𑐳𑐷𑐡𑐸 𑑋 𑐠𑑂𑐰𑐥𑐵𑐮𑐫𑑂 𑐱𑐵𑐫𑐡 𑐰𑐫𑑂𑐎𑐮𑑄 𑐣𑐾𑐥𑐵𑐮 𑐩𑑂𑐴𑐳𑐷𑐎𑐮 𑑋

𑐀𑐮𑐾 𑐥𑑂𑐬𑐢𑐵𑐣 𑐣𑑂𑐫𑐵𑐫𑐵𑐢𑐶𑐱 𑐖𑐸𑐫𑐵𑐔𑑂𑐰𑑄𑐧𑐮𑐫𑑂 𑐴𑐾 𑐰𑐫𑑂𑐎𑑅𑐫𑐵 𑐡𑐾𑐴𑐵𑐰𑐳𑐵𑐣 𑐣𑐾𑐥𑐵𑐮𑐫𑑂 𑐴𑐾 𑐖𑐸𑐮 𑑋 𑐰𑐫𑑂𑐎𑑅𑐫𑐵 𑐂𑐴𑐶𑐥𑐵 𑐢𑐵𑑅𑐳𑐵 𑐏𑑂𑐰𑐥𑐫𑐵 𑐱𑐶𑐎𑑂𑐲𑐵𑐰𑐶𑐡𑑂 𑐖𑐐𑐟𑐳𑐸𑐣𑑂𑐡𑐬 𑐩𑐮𑑂𑐮𑐫𑐵 𑐎𑐾𑐴𑐾𑑃 𑐀𑐩𑐺𑐟𑐮𑐎𑑂𑐲𑑂𑐩𑐷 𑐩𑐮𑑂𑐮𑐮𑐶𑐳𑐾 𑐖𑐹𑐐𑐸 𑐏𑑅 𑑋 𑐰𑐫𑑂𑐎𑑅𑐥𑐶𑐣𑐶 𑐎𑐵𑐫𑐨𑐵𑐖𑐸 𑐀𑐬𑐸𑐞𑐔𑐣𑑂𑐡𑑂𑐬 𑐥𑑂𑐬𑐢𑐵𑐣 𑐣𑐾𑐥𑐵𑐮 𑐳𑐬𑑂𑐎𑐵𑐬𑐫𑐵 𑐥𑑂𑐬𑐱𑐵𑐳𑐣 𑐳𑐾𑐰𑐵𑐫𑑂 𑐄𑐔𑑂𑐔 𑐥𑐡𑐵𑐢𑐶𑐎𑐵𑐬𑐷 𑐖𑐸𑐫𑐵𑑅 𑐀𑐰𑐎𑐵𑐱 𑐥𑑂𑐬𑐵𑐥𑑂𑐟 𑐖𑐸𑐮 𑑋

𑐠𑐸𑐮𑐶𑐩𑐕𑐶 𑐣𑐾𑐥𑐵𑐮𑐫𑐵 𑐋𑐟𑐶𑐴𑐵𑐳𑐶𑐎 𑐥𑐬𑐶𑐥𑑂𑐬𑐾𑐎𑑂𑐲𑑂𑐫𑐫𑐵𑐟 𑐁𑐟𑑂𑐩𑐳𑐵𑐟𑑂 𑐫𑐵𑐣𑐵𑐔𑑂𑐰𑑄𑐩𑑂𑐴 𑐔𑐎𑑂𑐬𑐬𑐵𑐖 𑐟𑐶𑐩𑐶𑐮𑐵𑐖𑐸𑐫𑐵 𑐊𑐎𑐡𑐩 𑐳𑐶𑐢𑐵𑐳𑐵𑐡𑐵 𑐖𑐷𑐰𑐣 𑐏𑐣𑐵𑑅 𑐖𑐶𑑄 𑐠𑐸𑐂𑐎𑐾 𑐩𑐦𑐸𑐐𑐸 𑐏𑑃 𑐫𑐎𑑂𑐰𑑄 𑐏𑐣 𑑋 𑐠𑐣 𑐣𑐾𑐰𑐵𑑅𑐟𑐫𑑂 𑐳𑐩𑐳𑑂𑐫𑐵𑐫𑐵 𑐥𑐬𑑂𑐰𑐟 𑐴𑐾 𑐖𑐶𑑄 𑐏𑐣𑐵𑐔𑑂𑐰𑐣𑐵 𑑋 𑐀𑐮𑐾 𑐟𑐶𑐩𑐶𑐮𑐵𑐖𑐸𑑄 𑐠𑑅𑐐𑐸 𑐮𑐶𑐔𑑂𑐰𑑅𑐫𑐵 𑐏𑑃 𑐖𑐎 𑐠𑐸𑐎𑐠𑑄 𑐥𑑂𑐰𑑄𑐎𑐵𑐡𑐶𑐮— 𑐖𑐶𑐩𑐶 𑐀𑐧𑐸 𑐔𑐣𑑂𑐡𑑂𑐬𑐬𑐵𑐖𑐫𑐵 𑐡𑐾𑐴𑐵𑐣𑑂𑐟 𑐳𑐶𑐎𑑂𑐎𑐶𑐩𑐫𑑂 𑐖𑐸𑐮 𑑋

𑐖𑐶 𑐢𑐵𑑅𑐳𑐵 𑐀𑐣𑑄 𑑒𑑙 𑐡𑑃𑐫𑐵 𑐰𑐿𑑄𑐱𑐫𑑂 𑐳𑑄. 𑑒𑑐𑑑𑑒 𑐳𑐵𑐮𑑄 𑐏𑑂𑐰𑐥 𑐮𑐶𑐴𑐵𑑄 𑐰𑐫𑐵, 𑐠𑑅𑐐𑐸 𑐎𑐸𑐮𑐕𑐾𑑃 𑐠𑐵𑐩𑐫𑑂 𑐫𑐵𑐫𑐾𑐟 𑑋 𑐄𑐠𑐵𑐫𑑂𑐮𑐵𑐎 𑐴𑐾 𑐥𑐵𑐖𑐸 𑐥𑑂𑐬𑐢𑐵𑐣 𑐣𑑂𑐫𑐵𑐫𑐵𑐢𑐶𑐱 𑐴𑐬𑐶𑐥𑑂𑐬𑐳𑐵𑐡 𑐣𑐾𑐥𑐵𑐮𑑄 𑐮𑐶𑐴𑐵𑑄 𑐰𑐣𑐾𑐩𑐵𑐮 𑑋 𑐖𑐶 𑐢𑐵𑑅𑐳𑐵 𑐠𑐣 𑐐𑑂𑐎𑑂𑐂𑑅 𑐫𑐵 𑐳𑐾𑐰𑐵𑐫𑑂 𑐔𑑂𑐰𑐣𑐵𑑅 𑐜𑐸𑐧𑐾 𑐖𑐸𑐂𑐟𑑂𑐫𑑄𑐐𑐸 𑐟𑐶𑐩𑐶𑐮𑐵 𑐣𑐶𑐰𑐵𑐳𑐫𑐵 𑐥𑐸𑐏𑑂𑐬𑑂𑐫𑑁𑐮𑐷 𑐱𑑂𑐬𑐷𑐳𑐩𑑂𑐥𑐟𑑂𑐟𑐶 𑐖𑑀𑐐𑐫𑑂 𑐫𑐵𑐫𑐾𑐟 𑑓𑑒 𑐡𑑃 𑐟𑐎 𑐩𑐸𑐡𑑂𑐡𑐵 𑐩𑑂𑐴𑐶𑐟𑐵 𑐔𑑂𑐰𑐣𑐾𑐩𑐵𑐮 𑑋 𑐠𑐸𑐎𑐶𑑄 𑐴𑐾 𑐖𑐶𑐐𑐸 𑐖𑐷𑐰𑐣𑐫𑐵 𑐅𑐬𑑂𑐖𑐵 𑐡𑐎𑑂𑐰 𑐦𑐸𑐂𑐐𑐸 𑐖𑐸𑐮 𑑋 ’