𑐴𑐾𑐚𑑁𑑄𑐜𑐵𑐫𑑂 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐟𑐫𑐵𑑅 𑐥𑐵𑐬𑑂𑐎 𑐡𑐫𑐾𑐎𑐷𑐐𑐸

𑐫𑐾𑑃 – 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐥𑑂𑐬𑐞𑐾𑐟𑐵 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐣𑐵𑐩𑑄 𑐴𑐾𑐚𑑁𑑄𑐜𑐵𑐫𑑂 𑐱𑑄𑐏𑐢𑐬 𑐥𑐵𑐬𑑂𑐎 𑐡𑐫𑐾𑐎𑐷𑐐𑐸 𑐖𑐹𑐐𑐸 𑐡𑐸 𑑋 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐥𑐡𑐵𑐢𑐶𑐎𑐵𑐬𑐷𑐥𑐶𑑄𑐮𑐶𑐳𑐾 𑐏𑑃 𑐮𑑂𑐴𑐵𑐫𑐾𑐐𑐸 𑐗𑑂𑐰𑐮𑐫𑑂 𑑓 𑐣𑐩𑑂𑐧𑐬 𑐥𑑂𑐬𑐡𑐾𑐱𑐫𑐵 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐜𑑀𑐬𑐩𑐞𑐶 𑐥𑑁𑐜𑐾𑐮𑑄 𑐴𑐾𑐚𑑁𑑄𑐜𑐵𑐫𑑂 𑐱𑑄𑐏𑐢𑐬 𑐥𑐵𑐬𑑂𑐎 𑐡𑐫𑐾𑐎𑐾𑐐𑐸 𑐧𑐔𑑄 𑐧𑐶𑐫𑐵𑐡𑐷𑐐𑐸 𑐖𑐵𑐣𑐎𑐵𑐬𑐷 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐣𑐵𑐫𑑅 𑐱𑑂𑐫𑐵𑐩𑐎𑐺𑐲𑑂𑐞 𑐩𑐵𑐣𑐣𑑂𑐢𑐬𑑄 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐫𑐵𑐟 𑐧𑐶𑐫𑐵𑐡𑐶𑐮 𑑋

𑐠𑑅𑐥𑐶𑑄𑐟 𑐣𑐵𑐥𑐮𑐵𑐫𑐾𑐐𑐸 𑐗𑑂𑐰𑐮𑐫𑑂 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐥𑑁𑐜𑐾𑐮𑑄 𑐥𑐵𑐬𑑂𑐎𑐫𑐵 𑐜𑐶𑐖𑐵𑐂𑐣 𑐡𑐫𑐾𑐎𑐵𑑅 𑐠𑑅𑐟 𑐧𑐶𑐫𑐵𑐡𑐶𑐳𑑃 𑐢𑐎𑐵𑑅 𑐂𑐣𑐵𑐥 𑐫𑐵𑑅𑐐𑐸 𑐰 𑐰𑐴𑐾 𑐎𑐠𑑄 𑐜𑐶𑐖𑐵𑐂𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐰𑐫𑑂𑐎𑐮𑑄 𑐧𑐶𑐫𑐵𑐡𑐶𑐮 𑑋 𑐱𑑄𑐏𑐢𑐬𑐥𑐵𑐏𑐾𑑄 𑐠𑑅 𑐥𑑂𑐬𑐨𑐵𑐰𑐶𑐟 𑐖𑐹𑐐𑐸 𑐢𑐵𑐳𑐾𑑄 𑐠𑑂𑐰𑐴𑐾 𑐡𑑃𑐫𑐵 𑐡𑐸𑐣𑐾 𑐴𑐾 𑐴𑐾𑐚𑑁𑑄𑐜𑐵𑐫𑑂 𑐥𑐵𑐬𑑂𑐎 𑐡𑐫𑐾𑐎𑐵𑑅 𑐀𑐣 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵𑑅 𑐳𑐩𑐾𑐟 𑐟𑐫𑐾𑐐𑐸 𑐧𑐔𑑄 𑐣𑑄 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐥𑑁𑐜𑐾𑐮𑑄 𑐧𑐶𑐫𑐵𑐡𑐷𑐐𑐸 𑐏𑑃 𑐩𑐵𑐣𑐣𑑂𑐢𑐬𑑄 𑐎𑐣𑐵𑐡𑐶𑐮 𑑋

𑐀𑐠𑐾𑐴𑐾 𑐠𑑂𑐰𑐴𑐾 𑐰𑐂𑐐𑐸 𑐎𑐕𑐮𑐵𑐠𑑂𑐰 𑐡𑐱𑐩𑐷 𑐎𑐸𑐣𑑂𑐴𑐸 𑐡𑑀𑐮𑐏𑐵𑐫𑐵 𑐔𑐬𑐶𑐎𑑀𑐚𑐫𑑂 𑐣𑑄 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐗𑑂𑐰𑐵𑐟𑐵 𑐥𑐮𑐶𑐳𑑂𑐠𑐵 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐣𑐾𑐰𑐵𑑅 𑐐𑐸𑐠𑐶 𑐔𑐬𑐶𑐎𑑀𑐚𑐫𑐵 𑐐𑑂𑐰𑐳𑐵𑐮𑐫𑑂 𑐀𑐣 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐟𑐫𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐣𑐵𑐫𑑅 𑐩𑐵𑐣𑐣𑑂𑐢𑐬𑑄 𑐎𑐣𑐵𑐡𑐷𑐐𑐸 𑐡𑐸 𑑋 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐢𑐵𑑅𑐳𑐵 𑐥𑑂𑐬𑐟𑐶𑐲𑑂𑐛𑐵𑐣𑑄 𑐰𑑂𑐫𑐰𑐳𑑂𑐠𑐵 𑐫𑐵𑑅𑐐𑐸 𑐏𑑅 𑑋

𑐗𑑂𑐰𑐵𑐟𑐵 𑐟𑐫𑐾𑐐𑐸 𑐣𑐶𑑄𑐟𑐶𑑄 𑐔𑐬𑐶𑐎𑑀𑐚 𑐣𑐐𑐬𑐥𑐵𑐮𑐶𑐎𑐵𑑄 𑐣𑑄 𑐩𑐵𑐎𑑂𑐰 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐐𑐸 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵𑐫𑐵 𑐄𑐮𑐾𑐖𑑂𑐫𑐵 𑐥𑐬𑑂𑐫𑐚𑐣 𑐟𑐠𑐵 𑐳𑑄𑐳𑑂𑐎𑐺𑐟𑐶𑐩𑐣𑑂𑐟𑑂𑐬𑐷 𑐬𑐰𑐷𑐣𑑂𑐡𑑂𑐬 𑐀𑐢𑐶𑐎𑐵𑐬𑐷𑑄 𑐫𑐵𑐣𑐵𑐡𑐷𑐐𑐸 𑐐𑑂𑐰𑐳𑐵𑑅 𑐡𑐸 𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐠𑐶𑐩𑐶 𑐩𑐢𑑂𑐫𑐥𑐸𑐬 𑐣𑐐𑐬𑐥𑐵𑐮𑐶𑐎𑐵𑑄 𑐠𑐶𑐩𑐶𑐂 𑐣𑑄 𑐱𑑄𑐏𑐢𑐬 𑐔𑑀𑐎𑐫𑑂 𑐕𑐐𑐹 𑐧𑐶𑐳𑑂𑐎𑑄 𑐥𑐵𑐬𑑂𑐎 𑐡𑐫𑐾𑐎𑐾𑐐𑐸 𑐑𑑀𑐲𑐞𑐵 𑐫𑐵𑑅𑐐𑐸 𑐡𑐸 𑑋 𑐮𑐶𑐳𑐾𑑄 𑐁𑐰𑑄𑐣𑐶𑐳𑐾𑑄 𑐡𑑃𑐫𑑂𑐡𑐳𑑄 𑐱𑑄𑐏𑐢𑐬 𑐡𑐶𑐰𑐳 𑐎𑐸𑐣𑑂𑐴𑐸 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐴𑐾 𑐐𑑂𑐰𑐳𑐵𑐮𑐫𑑂 𑐨𑐶𑐣𑑂𑐟𑐸𑐣𑐵 𑐎𑐵𑐮𑐶𑐧𑐶𑐮 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐐𑑂𑐰𑐫𑐾𑐐𑐸 𑐣𑑄 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐡𑐸 𑑋 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐩𑐡𑐣𑐳𑐸𑐣𑑂𑐡𑐬 𑐱𑑂𑐬𑐾𑐲𑑂𑐛𑑄 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐀𑐠𑐾𑐴𑐾 𑐣𑐐𑐬 𑐥𑑂𑐬𑐩𑐸𑐏 𑐱𑑂𑐬𑐾𑐲𑑂𑐛𑑄 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅 𑐩𑑄𑐎𑐵𑑅 𑐣𑐾𑐰𑐵𑑅 𑐕𑐾𑑃 𑐡𑐫𑐾𑐎𑐾𑐐𑐸 𑐑𑑀𑐲𑐞𑐵 𑐣𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐱𑑄𑐏𑐢𑐬 𑐔𑑀𑐎𑐫𑑂 𑐄𑐐𑐸 𑐨𑐰𑐣 𑐡𑐫𑐾𑐎𑐾𑐐𑐸 𑐟𑐫𑐵𑐬𑐷 𑐣𑑄 𑐰𑐫𑑂𑐎𑐮𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐠𑐷𑐠𑐷 𑐳𑐵𑐬𑑂𑐰𑐖𑐣𑐶𑐎 𑐖𑑂𑐫𑐵𑐗𑑂𑐰𑑅 𑐳𑐩𑐾𑐟 𑐫𑐵𑐫𑐾 𑐦𑐂𑐐𑐸 𑐄𑐐𑐸 𑐣𑐾𑐰𑐵𑑅𑐕𑐾𑑃 𑐡𑐫𑐾𑐎𑐾𑐐𑐸 𑐮𑐵𑐐𑐶𑑄 𑐎𑐾𑐣𑑂𑐡𑑂𑐬𑐷𑐫 𑐳𑐬𑐎𑐵𑐬𑐫𑐵𑐎𑐾 𑐣𑑄 𑐐𑑂𑐰𑐵𑐴𑐵𑐮𑐶 𑐎𑐵𑐫𑐾𑐐𑐸 𑐏𑑃 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋