𑐂𑐴𑐶𑐥𑐵 𑐢𑐸𑑄𑐎𑐵𑑅

𑐳𑑂𑐎𑐹𑐮 𑐳𑐶𑐢𑐫𑐵𑑅 𑐎𑐮𑐾𑐖 𑐠𑑂𑐫𑐣𑐾𑐰𑑄 𑐖𑐶 𑐂𑐴𑐶𑐥𑐵 𑐖𑐹𑐐𑐸 𑐏𑑅 𑑋 𑐀𑐠𑐾 𑐢𑐂𑐐𑐸 𑐠𑑁𑑄 𑐳𑑂𑐰𑐫𑐵𑑅 𑐥𑐷𑐳𑑂𑐰𑐡𑑃 𑐣𑑂𑐴𑑂𑐫𑑅𑐫𑐵𑐐𑐸 𑐏𑑃 𑐏𑑅 𑑋 𑐄𑐧𑐮𑐫𑑂 𑐖𑐶 𑐗𑐶𑑄𑐔𑑂𑐫𑐵𑐡𑑃 𑐰 𑐨𑐩𑑂𑐔𑐵 𑐖𑐸𑐂𑐩𑑂𑐴 𑐩𑐫𑑂𑐖𑐸 𑐗𑐶𑑄𑐥𑑂𑐫𑐡𑑃 𑐖𑐎 𑐎𑑂𑐫𑑄𑐐𑐸 𑐏𑑅 𑑋 𑐄𑐧𑐮𑐫𑑂𑐫𑐵 𑐔𑐮𑐣𑐎𑐠𑑄 𑐕𑐥𑐵𑑅 𑐮𑐥𑑂𑐟𑐾𑑄 𑐔𑐵𑐫𑐾𑐎𑐾 𑐩𑐵𑑅 𑐢𑐎𑐵𑑅 𑐖𑐶 𑐰 𑐖𑐶𑐩𑐶 𑐎𑐾𑐴𑐾𑑃𑐫𑐵𑐟 𑐖𑐶𑐩𑐶 𑐣𑐶𑐩𑑂𑐴 𑐎𑐎𑐵𑐥𑐶𑑄 𑐣𑐵𑐥𑑄 𑐂𑐴𑐶𑐥𑐵 𑐫𑐵𑐣𑐵𑐧𑑂𑐫𑐹𑐐𑐸 𑐏𑑅 𑑋 𑐨𑐩𑐔𑐵 𑐮𑑂𑐴𑐵𑐎𑐾 𑐕𑑂𑐰𑐟 𑑋 𑐖𑐵𑐟𑑅 𑐟𑑂𑐰𑐮 𑑋 𑐐𑑂𑐰𑐫𑑂 𑐎𑐵𑐮 𑑋 𑐮𑐵𑐏𑐵 𑐧𑐷𑐎𑐾 𑐕𑑂𑐰𑐟 𑑋 𑐨𑑂𑐰𑐫𑑂 𑐎𑑂𑐰𑑅𑐖𑐶𑐟 𑑋 𑐧𑐳𑑂 𑐂𑐴𑐶𑐥𑐵 𑐎𑑂𑐰𑐔𑐵𑐮 𑑋 𑐖𑐶𑐩𑐶 𑐣𑐶𑐣𑐶𑐥𑐶𑐣𑐶 𑐩𑐔𑐵𑐧𑐮𑐫𑑂 𑐎𑐟𑐵𑑄𑐩𑐬𑐶 𑐩𑑂𑐴𑐶𑐟𑐷𑐠𑐾𑑄 𑐖𑐶𑐩𑐶 𑐂𑐴𑐶𑐥𑐵 𑐣𑑄 𑐀𑐠𑐾𑐴𑐾 𑐫𑐵𑐄𑑃𑐎 𑐖𑐹𑐐𑐸 𑐏𑑅 𑑋

𑐄𑐧𑐮𑐫𑑂 𑐖𑐶 𑐨𑐔𑐵 𑐨𑐔𑐵 𑐨𑐵𑐫𑑂 𑐳𑐷𑐢𑐸𑑄𑐎𑐮 𑐢𑐵𑐫𑐾𑐩𑐵𑑅 𑑋 𑐂𑐴𑐶𑐥𑐵𑑅, 𑐩𑐟𑐶𑐣𑐵, 𑐳𑐾𑐎𑑂𑐳 𑐁𑐡𑐶𑐧𑐵𑐬𑐾 𑐖𑐶𑑄 𑐨𑐔𑐵 𑐨𑐔𑐵𑐳𑐵𑑄 𑐳𑐫𑐾𑐎𑐾, 𑐳𑐷𑐎𑐾 𑐢𑐸𑑄𑐐𑐸 𑐃 𑐏𑑅 𑐄𑐧𑐮𑐫𑑂 𑑋 𑐠𑑅𑐟 𑐫𑑅𑐥𑐶𑑄 𑐩𑐢𑑂𑐫𑐾 𑐰𑐵 𑐠𑑅 𑐫𑐫𑐾𑐎𑐵𑐟𑐫𑐵𑐥𑐶𑑄 𑐩𑐢𑑂𑐫𑐾 𑐳𑐸𑐫𑐵𑐟𑑄 𑐮𑑂𑐴𑐵𑐎𑐾 𑐕𑑂𑐰𑑅𑐳𑐵 𑐖𑑂𑐫𑐹 𑐢𑐎𑐵𑑅 𑐩𑐟𑐶𑐂 𑐰𑐂 𑐟𑐬 𑐳𑐸𑐫𑐵𑐟𑑄 𑐢𑐵𑐫𑐾 𑐕𑐵𑐮𑐷𑐩𑐏𑐸 𑑋 𑐖𑐶𑐩𑐶 𑐎𑐎𑐵𑐥𑐶𑑄 𑐰 𑐖𑐶𑐩𑐶 𑐡𑐵𑐖𑐸𑐫𑐵 𑐣𑑄 𑐀𑐠𑐾𑐴𑐾 𑐂𑐴𑐶𑐥𑐵 𑐖𑐹𑐐𑐸 𑐏𑑅 𑑋 𑐀𑐠𑐾𑐳𑐵𑑄 𑐩𑐟𑐶𑐂 𑐏𑑃 𑐮𑑂𑐴𑐵𑐣𑐵 𑐴𑐾 𑐔𑑂𑐰𑐣𑐷 – ‘𑐖𑐶𑐩𑐶 𑐣𑑂𑐴𑐵𑐫𑑂𑐎𑑄𑐟𑑂𑐰𑐵𑑅𑐫𑐵 𑐣𑑂𑐴𑐹𑐐𑐸 𑐕𑐾𑑃 𑐎𑑂𑐰𑑄 𑐣𑑂𑐴𑐶𑑄𑐣𑑂𑐴𑐶𑑄 𑐎𑐣𑑂𑐫𑐵𑐩𑐣𑑂𑐡𑐶𑐬𑐫𑑂 𑐁𑐏𑑅 𑐧𑑂𑐰𑑄𑐰𑐣𑐷𑐥𑐶𑑄 𑐩𑐢𑑂𑐫𑐾 𑐕𑐩𑑂𑐴 𑐀𑐬𑑂𑐠𑐵𑐟𑑂 𑐖𑐶 𑐫𑑅𑐥𑐶𑑄 𑐳𑑂𑐰𑐩𑑂𑐴 𑐩𑐢𑑂𑐫𑐾 𑐕𑐩𑑂𑐴 𑐮𑑂𑐴𑐵𑐎𑐾 𑐕𑑂𑐰𑑅𑐳𑐵 𑐖𑑂𑐫𑐹 𑑋’ 𑐟𑐬 𑐀𑐴𑑄, 𑐩𑐵𑑄, 𑐧𑑁, 𑐀𑐖𑐶, 𑐣𑐶𑐣𑐶 𑐳𑐸𑐫𑐵𑐟𑑄 𑐴𑐾 𑐢𑐵𑐫𑐾 𑐕𑐵𑐮𑐷𑐩𑐏𑐸 𑑋 𑐖𑑂𑐘𑐵𑐣𑐷𑐩𑑂𑐴 𑐩𑐔𑐵 𑐖𑐹𑐐𑐸𑐮𑐶𑑄, 𑐳𑑀𑐗𑐵𑐩𑑂𑐴 𑐩𑐔𑐵 𑐖𑐹𑐐𑐸𑐮𑐶𑑄 𑐰𑐵 𑐢𑐂𑐐𑐸 𑐏𑑃 𑐣𑑂𑐫𑐣𑐷𑐩𑑂𑐴 𑐩𑐔𑐵 𑐖𑐹𑐐𑐸𑐮𑐶𑑄 𑐰𑐵 𑐕𑐸 𑐖𑐹𑐐𑐸𑐮𑐶𑑄 𑐕𑐸 𑐖𑐹𑐐𑐸𑐮𑐶𑑄 𑐩𑐵𑑄, 𑐧𑑁, 𑐀𑐖𑐶 𑐰 𑐣𑐶𑐣𑐶𑐥𑐶𑑄𑐳𑑄 𑐖𑑂𑐫𑐹 𑐢𑐵𑑅𑐩𑑂𑐴𑐮𑐶𑐳𑐾 𑐴𑐾 𑐖𑐶 𑐠𑑅𑐐𑐸 𑐂𑐴𑐶𑐥𑐵𑐫𑐵 𑐂𑐮𑐫𑑂 𑐖𑐶 𑐣𑑄 𑐖𑐶𑐩𑐶 𑐣𑐶𑐣𑐶𑐥𑐶𑐣𑐶 𑐎𑐟𑐵𑑄𑐩𑐬𑐶 𑐎𑐵𑐳𑐵𑐫𑐵 𑐕𑐩𑑂𑐴 𑐩𑑂𑐰𑐵𑑅𑐩𑑂𑐴 𑐥𑐵𑐟𑑂𑐬 𑐠𑐾𑑄 𑐴𑐾 𑐖𑐸𑐫𑐵 𑐧𑐶𑐫𑐵𑐐𑐸 𑐏𑑅 𑑋 𑐠𑑁𑑄𑐟𑐎𑑄 𑐧𑐵𑑄𑐮𑐵𑐎 𑐮𑐸𑐩𑑄𑐣𑐶 𑐂𑐴𑐶𑐥𑐵 𑐖𑐸𑐫𑐵𑑅 𑐴𑑂𑐰𑑄𑐎𑐾 𑐢𑐸𑑄𑐎𑐵𑑅 𑐟𑐎𑑄 𑐖𑐶𑑄 𑐠𑑅 𑐨𑐩𑑂𑐔𑐵 𑐩𑐫𑑂𑐖𑐸𑐫𑐵 𑐏𑑂𑐰𑐵𑑅 𑐩𑐏𑑄𑐣𑐶 𑑋 𑐄𑐧𑐮𑐫𑑂 𑐎𑐶𑐥𑐵 𑐳𑑂𑐰𑐫𑐾𑐐𑐸, 𑐩𑑂𑐴 𑐳𑑂𑐰𑐫𑐾𑐐𑐸 𑐔𑐮𑐣 𑐣𑑄 𑐧𑐵𑑄𑐮𑐵𑐎𑑂𑐎 𑐩𑐡𑐸𑐐𑐸 𑐮𑐵 𑐩𑐳𑑂𑐫𑐹, 𑐖𑐶𑐟𑑅 𑐎𑐶𑐥𑐵 𑐣𑑄 𑐩𑐎𑑂𑐫𑑄, 𑐩𑑂𑐴 𑐣𑑄 𑐎𑑂𑐫𑐣𑐾 𑐩𑐫𑑄𑐎𑐹 𑑋

𑐂𑐴𑐶𑐥𑐵𑐫𑐵 𑐥𑐳𑑂𑐟𑐵𑑅𑐨𑑂𑐰𑐫𑑂, 𑐰𑑄𑐖𑐮𑐵, 𑐳𑐳𑐸𑐥𑐹𑐖𑐵, 𑐏𑑂𑐰𑐵𑑅 𑐳𑑂𑐰𑐎𑐾𑐐𑐸 𑐦𑐸𑐎 𑐦𑐸𑐎𑑄 𑐳𑐮𑑂𑐮𑑄𑐦𑐮𑑂𑐮𑑄 𑐎𑑂𑐰𑐔𑐵𑐮 𑑋 𑐳𑐎𑐳𑐶𑐫𑐵𑑄 𑐔𑐮𑐣 𑐏𑑅 – 𑐏𑑂𑐰𑐵𑑅 𑐳𑑂𑐰𑐎𑐾 𑐢𑐸𑐣𑐾𑐰𑑄 𑐧𑐴𑐣𑐷 𑐔𑐵𑐣𑑂𑐴𑐫𑑂 𑐡𑐸𑐔𑐵𑐫𑐾𑐎𑐷 𑐣𑑂𑐴𑐹𑐩𑑂𑐴 𑐖𑐶𑐔𑐵𑐨𑐵𑐖𑐸𑐫𑐵𑐟 𑑋 𑐖𑐶𑐟𑑅 𑐣𑑄 𑐡𑐸𑐔𑐵𑐫𑐾𑐎𑐮 𑑋 𑐳𑐎𑐳𑐶𑐫𑐵𑑄 𑐴𑐾 𑐔𑐮𑐣 𑐏𑑅 𑐡𑐸𑐔𑐵𑐫𑐾𑐎𑐵𑑅 𑐮𑐶𑐴𑐵𑑄 𑐰𑐫𑐾𑐰 𑐔𑐵𑐣𑑂𑐴𑐫𑑂 𑐄𑐏𑐸𑐣𑐸 𑐴𑐾 𑐣𑑂𑐴𑐹 𑐟𑐶𑐥𑐸𑐫𑐵𑐟 𑐎𑑂𑐰𑐠𑐵 𑐧𑐷 𑑋 𑐠𑑂𑐰 𑐔𑐮𑐣𑐧𑐵𑐬𑐾 𑐖𑐶𑑄 𑐧𑐵𑑄𑐮𑐵𑐎 𑐴𑐾 𑐳𑑂𑐫𑐹 𑑋 𑐖𑐶𑐩𑐶 𑐎𑐎𑐵𑐥𑐶𑑄𑐟 𑐄𑐏𑐸𑐣𑐸 𑐴𑐾 𑐎𑑂𑐰𑐠𑐵 𑐧𑑂𑐫𑐹𑐐𑐸 𑐏𑑅 𑑋 𑐖𑐶𑐩𑐶 𑐡𑐵𑐖𑐸𑐫𑐵𑐟 𑐣𑑄 𑐄𑐧𑐮𑐫𑑂 𑐄𑐏𑐸𑐣𑐸 𑐴𑐾 𑐎𑑂𑐰𑐠𑐵 𑐧𑑂𑐫𑐹𑐐𑐸 𑐣𑑄 𑐖𑐶𑑄 𑐧𑐵𑑄𑐮𑐵𑐎 𑐮𑐸𑐩𑑄𑐣𑐶 𑑋 𑐟𑐬, 𑐖𑐶𑐟𑑅 𑐢𑐵𑑅𑐳𑐵 𑐎𑑂𑐰𑐠𑐵 𑐩𑐧𑑂𑐫𑐹 𑑋 𑐕𑐵𑐫𑑂 ? 𑐕𑐵𑐫𑑂𑐢𑐵𑑅𑐳𑐵𑑄 𑐨𑐩𑐔𑐵 𑐔𑐶𑐢𑐶𑐎𑑅𑐣𑐶 𑑋 𑐨𑐩𑐔𑐵 𑐣𑐎𑐟𑐶𑐣𑐶 𑐗𑐶𑑄𑐥𑑂𑐫𑐡𑑃 𑐡𑐟, 𑐎𑑂𑐰𑐠𑐵 𑐧𑐷 𑐩𑐟𑑂𑐫𑑅𑐣𑐶, 𑐎𑑂𑐰𑐠𑐵 𑐧𑐷𑐩𑐖𑑂𑐫𑐹𑐣𑐶 𑑋 𑐎𑑂𑐰𑐠𑐵 𑐧𑐷 𑐩𑐟𑑂𑐫𑑅𑐣𑐶, 𑐎𑑂𑐰𑐠𑐵 𑐧𑐷 𑐩𑐖𑑂𑐫𑐹𑐣𑐶𑐳𑐵 𑐕𑐵𑐫𑑂 𑐂𑐴𑐶𑐥𑐵 𑐫𑐵𑐣𑐵 𑐧𑐶𑐫𑐵𑐐𑐸 𑐮𑐫𑑂 ? 𑐎𑑂𑐰𑐠𑐵 𑐧𑐷 𑐖𑐷𑐎𑐵𑑅 𑐖𑐎 𑐂𑐴𑐶𑐥𑐵 𑐫𑐵𑐣𑐵 𑐧𑑂𑐫𑐹𑐳𑐵 𑐖𑐶 𑐴𑐾 𑐖𑑂𑐫𑐹𑐣𑐶 𑑋 𑐢𑐫𑐵𑑄 𑐕𑐸 𑐫𑐵𑐫𑐾 𑐄𑐧𑐮𑐫𑑂 𑐔𑐮𑐣 𑐴𑐾 𑐄𑐖𑑂𑐰𑑅𑐐𑐸, 𑐕𑐥𑐵𑑅 𑐮𑐥𑑂𑐟𑐾𑑄 𑐟𑐸𑑄 𑐧𑑂𑐫𑐵𑐎𑐾𑐩𑐵𑑅𑐐𑐸 𑑋 𑐐𑐸𑐮𑐶 𑐳𑐸𑐏 𑐩𑐣𑐟 𑐖𑐸𑐂 𑐖𑐶, 𑐖𑐶𑑄 𑐧𑐵𑑄𑐮𑐵𑐎𑑂𑐎 𑐮𑐸𑐩𑑄𑐣𑐶, 𑐖𑐶 𑐟𑐳𑐎𑑄 𑐴𑐾 𑐳𑐸𑐏 𑐩𑐣𑑂𑐟, 𑐩𑑂𑐴𑐵𑐂𑐥𑐸𑐳𑐾 𑐔𑑂𑐰𑐣 𑑋 𑐖𑐶𑑄 𑐄𑐧𑐮𑐫𑑂 𑐧𑐵𑑄𑐮𑐵𑐎 𑐳𑑂𑐫𑐹𑐐𑐸 𑐏𑑃 𑐰𑐵 𑐨𑐔𑐵 𑐨𑐔𑐵 𑐳𑐵𑑄 𑐧𑐵𑑄𑐮𑐵𑐎 𑐳𑑂𑐫𑐹𑐐𑐸 𑐏𑑃 𑐢𑐂𑐐𑐸 𑐂𑐴𑐶𑐥𑐵 𑐢𑐂𑐐𑐸 𑐣𑐶𑐩𑑂𑐴 𑐟𑐶𑐥𑐹𑐫𑐵𑐟 𑐎𑑂𑐰𑐠𑐵 𑐧𑐷𑐟 𑐏𑑅 𑑋 𑐔𑐮𑐣 𑐣𑑄 𑐰𑐴𑐾 𑐏𑑅 𑐡𑐸𑐔𑐵𑐫𑐾𑐎𑐵𑑅 𑐮𑐶𑐴𑐵𑑄 𑐰𑑅𑐐𑐸 𑐧𑐴𑐣𑐷–𑐔𑐵𑐣𑑂𑐴𑐫𑑂 𑐣𑑂𑐴𑐹 𑐂𑐴𑐶𑐥𑐵 𑐖𑐹𑐥𑐶𑑄 𑐣𑐶𑐩𑑂𑐴 𑐟𑐶𑐥𑐹𑐫𑐵𑐟 𑐎𑑂𑐰𑐠𑐵 𑐧𑐷 𑑋 𑐟𑐬 𑐄𑐏𑐸𑐣𑐸 𑐖𑐶𑐟𑑅 𑐎𑑂𑐰𑐠𑐵 𑐩𑐧𑑂𑐫𑐹, 𑐧𑐷 𑐴𑐾 𑐩𑐧𑑂𑐫𑐹 𑑋 𑐐𑐸𑐮𑐶 𑐮𑐫𑑂𑐮𑐫𑑂 𑐟𑐵𑐟𑐵𑑄 𑐂𑐴𑐶𑐥𑐵 𑐫𑐵𑐣𑐵 𑑋 𑐨𑐩𑑂𑐔𑐵 𑐮𑑂𑐴𑐵𑐎𑐾 𑐕𑑂𑐰𑑅𑐳𑐵𑑄𑐣𑐶𑐳𑐾𑑄 𑐀𑐖𑐶𑐥𑐶𑐣𑐶, 𑐩𑐵𑑄𑐥𑐶𑐣𑐶, 𑐣𑐶𑐣𑐶𑐥𑐶𑐣𑐶 𑐏𑑃 𑐮𑑂𑐴𑐵𑐣𑐵𑐔𑑂𑐰𑑄𑐐𑐸 𑐣𑑂𑐫𑐣𑐵𑐔𑑂𑐰𑐣𑐾, 𑐖𑐵𑐟𑑅 𑐟𑑂𑐰𑐮 𑐢𑐵𑐂, 𑐀𑐳𑐣𑐫𑑂 𑐣𑐵𑑄𑐖𑐵𑑅𑐩𑑂𑐴 𑐳𑐵𑐴𑐸𑐫𑐵 𑐩𑑂𑐴𑑂𑐫𑐵𑐫𑑂𑐩𑐔𑐵 𑐢𑐵𑐂 𑑋 𑐣𑑂𑐴𑑂𑐫𑐵𑐐𑐸 𑐢𑐵𑑅𑐳𑐵𑑄 𑐣𑐸𑐐𑑅 𑐧𑐶𑐫𑐵𑑅 𑐣𑑂𑐫𑐣𑐵𑐔𑑂𑐰𑐣𑐾𑐐𑐸 𑑋 𑐕𑐣𑑂𑐴𑐸 𑐖𑐶𑐩𑐶 𑐟𑑅𑐢𑐶𑐎𑑅𑐩𑑂𑐴 𑐣𑐶𑑄𑐣𑐶𑑄 𑐏𑑅 𑐎𑐣𑐵𑐔𑑂𑐰𑑄𑐐𑐸 – “𑐗𑐷 𑐨𑐩𑑂𑐔𑐵 𑐖𑐸𑐂𑐩𑑂𑐴 𑐩𑐔𑐵 𑐀𑐖𑐶𑐩𑑂𑐴𑐮𑐶𑐳𑐾𑑄 𑐖𑐣𑐧𑐴𑐵𑑅 𑐡𑐾𑐎𑐾 𑐰𑐣𑐵𑑅 𑐮𑐶𑐴𑐵𑑄𑐰𑑅𑐐𑐸 𑐏𑐣𑐶𑑄, 𑐗𑐷 𑐕𑐾𑑃𑐫𑑂 𑐖𑐐 𑐟𑐫𑐵𑐔𑑂𑐰𑑄𑐠𑐵𑐫𑑂 𑐮𑐶𑐦𑑅 𑐮𑐶𑐦𑑅 𑐳𑑂𑐰𑐫𑐵 𑐰𑐣, 𑐑𑐵𑑄𑐑𑐬𑐶𑑄 𑐖𑐎 𑐦𑐶𑐣𑐵𑐟𑑅𑐐𑐸, 𑐳𑐸𑐬𑑂𑐰𑐵𑑅 𑐣𑑄 𑐣𑑂𑐴𑑂𑐫𑐵𑐣𑐵 𑐩𑐟𑑅, 𑐀𑐖𑐶𑐩𑑂𑐴𑑄 𑐳𑐵𑐟𑑂𑐟𑐸𑐳𑐵𑐮𑐵𑑅 𑐫𑑄𑐎𑐮, 𑐰 𑐩𑐔𑐵𑑄 𑐕𑐸 𑐳𑑂𑐫𑐹 𑐗𑐷𑐐𑐸 𑐕𑐾𑑃 𑐢𑐎𑐵𑑅, 𑐩𑐔𑐵 𑐴𑐶𑐳𑐶𑐔𑐵 𑐡𑐸 𑐧𑐵𑑄𑐮𑐵𑑅 𑑋” 𑐠𑐸𑐖𑑂𑐰𑑅𑐠𑐸𑐖𑑂𑐰𑑅𑐐𑐸 𑐴𑐾 𑐩𑐶𑐳𑐵 𑐏𑑃 𑐣𑑂𑐫𑑃𑐣𑑂𑐫𑑄 𑐮𑐫𑑂𑐮𑐫𑑂 𑐟𑐵𑐟𑐵𑑄 𑐣𑑂𑐫𑐵𑐳𑐶𑐣𑑂𑐫𑐵𑐳𑐶 𑐔𑐵𑐔𑐵𑑄 𑐂𑐴𑐶𑐥𑐵 𑐮𑐵 𑐫𑐵𑐣𑐵 𑐟𑐬 𑐰 𑐂𑐴𑐶𑐥𑐵𑐫𑐵 𑐡𑐎𑐮𑐫𑑂 𑐩𑐹𑐣𑑂𑐴𑐶 𑐏𑐸𑐣𑐸 𑐴𑐾 𑐖𑐶 𑐁𑐱𑐵𑑄 𑐡𑑂𑐫𑐵𑐎𑐾 𑐩𑐵𑐮, 𑐂𑐴𑐶𑐥𑐵 𑐖𑐹𑐐𑐸 𑐴𑐾 𑐏𑑅 𑐮𑐵 𑐩𑐏𑐸𑐮𑐵 𑐠𑐾𑑄 𑐖𑐸𑐮 𑑋 𑐖𑐶𑐟𑑅 𑐄𑐏𑐸𑐣𑐸 𑐎𑑂𑐰𑐠𑐵 𑐩𑐧𑑂𑐫𑐹, 𑐧𑐷 𑐴𑐾 𑐩𑐧𑑂𑐫𑐹 𑑋

𑐂𑐴𑐶𑐥𑐵 𑐢𑐸𑑄𑐎𑐵𑑅 𑐣𑑄 𑐎𑑂𑐰𑐠𑐵 𑐩𑐧𑑂𑐫𑐹𑐐𑐸 𑐕𑐣𑑂𑐴𑐸 𑐣𑐶𑐣𑑂𑐴𑐸 𑐖𑐎 𑐩𑐏𑐸, 𑐮𑐵𑑄𑐮𑐵𑑄, 𑐡𑑃𑐡𑑄 𑐎𑑂𑐰𑐠𑐵 𑐩𑐧𑑂𑐫𑐹 𑑋 𑐠𑑁𑑄 𑐎𑑂𑐰𑐠𑐵 𑐧𑐷𑐮𑐵 𑐎𑐣𑑂𑐴𑐫𑑂 𑐎𑑂𑐰𑐠𑐵 𑐧𑐷𑐮𑐵 𑐠𑐾𑑄 𑐖𑐸𑐫𑐵𑐔𑑂𑐰𑐣𑐷 𑑋 𑐐𑐸𑐧𑐮𑐾𑑄 𑐎𑑂𑐰𑐠𑐵𑐫𑑂 𑐮𑐸𑐏𑐵 𑐔𑐵𑐫𑐾𑐎𑐵𑑅 𑐡𑑂𑐫𑐣𑐾, 𑐐𑐸𑐧𑐮𑐾𑑄 𑐮𑐸𑐏𑐵𑐫𑑂 𑐔𑐸𑐎𑐹 𑐩𑐟𑐳𑐾 𑐡𑑂𑐫𑐣𑐾 𑑋 𑐟𑐬, 𑐀𑐴𑑄 𑐎𑑂𑐰𑐠𑐵 𑐧𑑂𑐫𑐹𑐐𑐸 𑐴𑐾 𑐩𑐧𑐸 𑑋 𑐀𑐖𑐶𑐫𑐵𑐠𑐵𑐫𑑂 𑐩𑐵𑑄𑐫𑐵𑐠𑐵𑐫𑑂 𑐠𑑅𑐠𑐶𑐟𑐶𑐥𑐶𑑄 𑐧𑐬𑑀𑐧𑐬 𑐰𑐫𑐵𑐔𑑂𑐰𑐣𑐷 𑑋 𑐄𑐩𑐶 𑐡𑐸𑐂𑐩𑐬𑐸 𑐳𑐸𑐂𑐩𑐬𑐸 𑐏𑑃 𑐮𑑂𑐴𑐵𑐮𑑂𑐴𑐵𑑄 𑐕𑐟𑐵 𑐏𑑃 𑐳𑑂𑐰𑐵𑐎𑐾𑐮𑐵𑐎𑐷 – 𑐔𑐶𑐢𑐶𑐎𑑅𑐩𑑂𑐴 𑐨𑐩𑐔𑐶𑐟 𑐣𑑄 𑐎𑑂𑐰𑐠𑐵 𑐧𑐶𑐫𑐵 𑐮𑐵𑐎𑐶 𑐕𑐸 𑐕𑐶𑐩𑐶𑐳𑑄 ? 𑐩𑐟𑑂𑐫𑑅𑐣𑐶 𑐣𑑂𑐴𑐶𑑄, 𑐩𑐟𑑂𑐫𑑅𑐣𑐶 𑑋 𑐩𑐔𑐵 𑐔𑐶𑐢𑐶𑐎𑑅𑐣𑐶, 𑐣𑐎𑐟𑐶𑐣𑐶 𑐗𑐶𑑄𑐥𑑂𑐫𑐡𑑃 𑐖𑐎 𑐡𑐟, 𑐄𑐎𑐶𑑄 𑐎𑑂𑐰𑐠𑐵 𑐧𑐷𑐩𑐟𑑂𑐫𑑅𑐣𑐶 𑐢𑐂𑐐𑐸 𑐳𑐎𑐳𑐶𑐐𑐸𑑄 𑐏𑑃 𑐠𑐸𑐂𑐎𑐾 𑐠𑐵𑐎𑐸 𑐩𑐖𑐹 𑑋 𑐀𑐠𑐾𑐳𑐵𑑄 𑐨𑐔𑐵 𑐨𑐔𑐵 𑐨𑐵𑐳𑑄 𑐳𑐷 𑐢𑐸𑑄𑐎𑐵𑑅 𑐂𑐴𑐶𑐥𑐵 𑐫𑐵𑐫𑐾𑐐𑐸 𑐀𑐮𑐾 𑐎𑑂𑐰𑐠𑐵 𑐩𑐧𑐷𑐎𑐸𑐳𑐾 𑐔𑑂𑐰𑐣𑐾𑐐𑐸 𑐢𑐂𑐐𑐸 𑐟𑐳𑐎𑑄 𑐩𑐕𑐶𑑄𑐐𑐸 𑐏𑑃 𑐏𑑅, 𑐟𑐳𑐎𑑄 𑐩𑑂𑐴𑐵𑐂𑐥𑐸𑐐𑐸 𑐏𑑃 𑐏𑑅 𑑋 𑐩𑐵𑑄𑐥𑐶𑐣𑐶, 𑐀𑐖𑐶𑐥𑐶𑐣𑐶 𑐏𑑃 𑐮𑑂𑐴𑐵𑑅𑐐𑐸 𑐟𑐵𑐫𑐵𑐔𑑂𑐰𑐣𑐷 – “𑐨𑐩𑐔𑐶𑐟 𑐎𑑂𑐰𑐠𑐵 𑐧𑐷 𑐩𑐟𑑂𑐫𑑅𑐟𑐮𑐾 𑐀𑐖𑐶𑐫𑐵𑐠𑐵𑐫𑑂 𑐠𑑂𑐫𑐣𑐾𑐐𑐸 𑑋” 𑐩𑐟𑐶𑐂 𑐕𑐸 𑐕𑐸 𑐮𑐸𑐂𑐎𑐵𑑅, 𑐩𑑂𑐴𑐐𑐳𑐫𑑂 𑐕𑐸 𑐕𑐸 𑐩𑑂𑐴𑑄𑐎𑐵𑑅 𑐣𑑂𑐴𑑂𑐫𑐂𑐥𑐸𑐎𑐵𑐐𑐸 𑐦𑐸𑐎𑑂𑐎𑑄 𑐨𑑄𑐐 𑐖𑐸𑐂, 𑐁𑐳𑑄 𑐡𑑂𑐫𑐵𑐂 𑑋 𑐧𑐵𑑄𑐮𑐵𑐎 𑐴𑐾 𑐮𑐸𑐩𑑄𑐣𑐶 𑐎𑑂𑐰𑐠𑐵 𑐩𑐧𑑂𑐫𑐹𑐐𑐸 𑐄𑐐𑐸 𑐂𑐮𑐫𑑂 𑐮𑐵𑑄 𑐮𑐵𑑄 𑐡𑑃𑐡𑑄 𑐐𑐸𑐮𑐶 𑐩𑑂𑐴𑐐𑐳𑐫𑑂 𑐩𑑂𑐴𑐣𑐷, 𑐐𑐸𑐮𑐶 𑐣𑐸𑐐𑐮𑐫𑑂 𑐏𑑃 𑐡𑐵𑐳𑐶 𑐰𑐂 𑑋 𑐮𑐸𑐩𑑄𑐎𑐾𑐧𑐮𑐫𑑂 𑐠𑑁𑑄𑐟𑐎𑑄 𑐩𑑂𑐴𑐵𑐂𑐥𑐸𑐳𑐾 𑐔𑑂𑐰𑐣𑐷 𑐕𑐏𑐾𑐳𑐵 𑐩𑐾𑐏𑐾𑑄 𑐰𑐴𑐾 𑐏𑑃 𑐮𑐸𑐩𑑄𑐎𑐾𑐧𑐮𑐫𑑂 𑐮𑐸𑐩𑑄𑐮𑐸𑐩𑑄 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋

𑐄𑐧𑐮𑐫𑑂 𑐣𑐾𑐰𑐵𑑅𑐟𑐫𑑂 𑐔𑐮𑐣 𑐏𑑅 𑐰𑐶𑐱𑐾𑐲 𑐫𑐵𑐣𑐵𑑅 𑐖𑐶𑐩𑐶 𑐄𑐬𑐵𑐫𑑂𑐟𑐫𑑂 𑐔𑐮𑐣 𑐏𑑅 𑐣𑑂𑐴𑐹𑐥𑐶𑑄 𑐨𑐩𑑂𑐔𑐵𑐟 𑐧𑐬𑑀𑐧𑐬 𑐠𑑅𑐕𑐾𑑃𑐫𑑂 𑐔𑐵𑐴𑑂𑐫𑐹 𑐰𑐣𑐾𑐩𑐵𑑅 𑑋 𑐎𑑂𑐰𑐠𑐵 𑐧𑐷 𑐢𑐸𑑄𑐎𑐹𑐥𑐶𑑄 𑐮𑐵 𑐀𑐠𑐾 𑐧𑐬𑑀𑐧𑐬 𑐔𑐵𑐴𑑂𑐫𑐹 𑐰𑐣𑐷𑐳𑐵 𑐎𑑂𑐰𑐠𑐵 𑐩𑐧𑑂𑐫𑐹𑐣𑐷𑐩𑑂𑐴 𑐩𑐔𑐵𑐩𑑂𑐴 𑐨𑐩𑐔𑐵 𑐗𑑄 𑐴𑐾 𑐠𑑅𑐕𑐾𑑃𑐫𑑂 𑐔𑐵𑑅𑐴𑑂𑐫𑐹 𑐰𑐣𑐷𑐐𑐸 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐖𑐸𑐮 𑑋 𑐣𑐏𑑅𑐔𑐏𑐟𑑄 𑐳𑑅𑐟𑐎𑐾 𑐕𑑂𑐰𑐂, 𑐰𑐂 𑐴𑐵𑐣𑑄 𑐔𑐵𑐴𑑂𑐫𑐹 𑐰𑐣𑐷 𑑋 𑐐𑐸𑐠𑐶 𑐐𑐴𑐣𑐵𑑄 𑐳𑑅𑐟𑐎𑐾 𑐕𑑂𑐰𑐂, 𑐰𑐂 𑐴𑐵𑐣𑑄 𑐔𑐵𑐴𑐶𑐎𑐾 𑐕𑑂𑐰𑐂, 𑐰𑐣𑐷 𑑋 𑐣𑐏𑑅 𑐢𑐎𑐵𑑅 𑐰𑐂, 𑐰𑐂𑐐𑐸 𑐃 𑐧𑐴𑐣𑐷 𑐴𑐾 𑐏𑑅, 𑐎𑑂𑐰𑐠𑐵 𑐧𑐷𑐮𑐵 𑐠𑐾𑑄 𑐢𑐎𑐵𑑅 𑐁𑐳 𑐰𑐣𑐷, 𑐎𑑂𑐰𑐠𑐵 𑐧𑐷 𑐩𑐏𑐸 𑑋 𑐠𑑅𑐕𑐾𑑃 𑐮𑐶𑐴𑐵𑑄 𑐰𑑅𑐏𑐸𑐣𑐸 𑐀𑑃𑐣𑑂𑐫𑐵𑐎𑐾 𑐩𑐵𑑅 𑐢𑐎𑐵𑑅 𑐕𑐸 𑐕𑐸 𑐢𑐎𑐵𑑅 𑐣𑐵𑐥 𑐮𑐵𑐎𑐾 𑐴𑐂 𑑋 𑐖𑐶𑑄 𑐐𑐸𑐧𑐮𑐾𑑄 𑐀𑑃𑐩𑐣𑑂𑐫𑐵𑐎𑐵, 𑐨𑐵𑐳𑑄 𑐳𑑂𑐫𑐹𑐳𑐵𑑄𑐣𑐶𑐳𑐾𑑄 𑐩𑐶𑐳𑐵 𑐰 𑐩𑐶𑐖𑑄 𑐧𑐬𑑀𑐧𑐬 𑐢𑐂𑐐𑐸 𑐖𑐶𑐐𑐸 𑐩𑐵𑐣𑑂𑐫𑐟𑐵 𑐏𑑅, 𑐖𑐶𑑄 𑐐𑐸𑐧𑐮𑐾𑑄 𑐨𑐵𑐐𑐷 𑐩𑐫𑐵𑐎𑐵 𑑋 𑐀𑐠𑐾𑐳𑐵𑑄 𑐀𑐠𑐾 𑐣𑐵𑐥 𑐮𑐵𑐎𑐾 𑐴𑐂𑐧𑐮𑐫𑑂 𑐏𑑂𑐰𑐵𑑅 𑐔𑐹𑐮𑐵𑐂, 𑐩𑐶𑐏𑐵 𑐔𑐹𑐮𑐵𑐂, 𑐰 𑐩𑐕𑐵𑐮𑐷, 𑐖𑐶 𑐩𑐕𑐶𑐣𑐷 𑑋 𑐠𑑁𑑄𑐮𑐵 𑐎𑑂𑐰𑐠𑐵 𑐧𑐷 𑐮𑐵 𑐎𑐶 𑐢𑐎𑐵𑑅 𑐔𑑂𑐰𑐣𑐷, 𑐰𑐫𑐵 𑐣𑑄 𑐣𑑂𑐴𑑂𑐫𑐵𑐮𑐷 𑐖𑐶 𑐣𑑄 𑐣𑑂𑐴𑑂𑐫𑐵𑐮𑐷 𑐟𑐬 𑐖𑐶𑐩𑐶 𑐖𑐎 𑐣𑑂𑐴𑑂𑐫𑐵𑐮𑐵𑑄 𑐕𑐸 𑐫𑐵𑐫𑐾, 𑐰𑐫𑐵𑐟 𑐴𑐵𑐣𑑄 𑐣𑑄 𑐮𑐶𑐟 𑐧𑑂𑐰𑐣𑐵𑐫𑑄𑐎𑐷 𑐟𑐮𑐫𑑂 𑐀𑐖𑐶𑐫𑐵 𑐎𑑂𑐰𑐠𑐵𑐫𑑂 𑐠𑑂𑐫𑐣𑐾 𑐫𑑄𑐎𑐷 𑑋 𑐖𑐶 𑐠𑑅𑐐𑐸 𑐎𑑂𑐰𑐠𑐵𑐫𑑂 𑐫𑐵𑐎𑑅𑐔𑐵 𑐡𑑂𑐫𑐣𑐾, 𑐐𑐸𑐧𑐮𑐾𑑄 𑐏𑐵𑐥𑐵 𑐔𑐵𑐫𑐾𑐎𑐵𑑅 𑐡𑑂𑐫𑐣𑐾, 𑐐𑐸𑐧𑐮𑐾𑑄 𑐏𑐵𑐥𑐵𑐫𑑂 𑐔𑐸𑐎𑐹 𑐴𑐾 𑐩𑐟𑐳𑐾 𑐡𑑂𑐫𑐣𑐾 𑐰𑐴𑐾 𑐕𑐐𑐹 𑐁𑐳𑑄 𑐎𑐶 ‘𑐠𑑁𑑄 𑐮𑐵 𑐎𑑂𑐰𑐠𑐵 𑐧𑐷 𑐖𑐸𑐂 𑑋’ 𑐕𑐣𑑂𑐴𑐸 𑐩𑐏𑐸, 𑐣𑐶𑐣𑑂𑐴𑐸 𑐩𑐏𑐸 𑐮𑐵𑑄𑐮𑐵𑑄, 𑐡𑑃𑐡𑑄 𑐀𑐠𑐾 𑐖𑐸𑐂𑐎𑐵𑐐𑐸 𑐮𑐸𑐩𑑄𑐮𑐸𑐩𑑄 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋 𑐥𑐷𑐳𑑂𑐰𑐡𑑃 𑐮𑐶𑐥𑐵 𑐠𑑁𑑄 𑐮𑐸𑐩𑑄𑐎𑐠𑑄 𑐖𑐶𑐩𑐶𑐟 𑐂𑐴𑐶𑐥𑐵 𑐢𑐸𑑄𑐎𑐵𑑅 𑐥𑑂𑐫𑐡𑑃 𑐮𑐶𑐥𑐵 𑐟𑐶𑐣𑐶 𑐎𑑂𑐰𑐠𑐵 𑐧𑑂𑐫𑐹𑐐𑐸 𑐏𑑅 𑑋 𑐄𑐧𑐮𑐫𑑂 𑐖𑐶 𑐣𑐷𑐣𑐶𑐡𑑃 𑐰 𑐰 𑐗𑐶𑑄𑐔𑑂𑐫𑐵𑐡𑑃 𑐡𑐟 𑐖𑐸𑐂𑐩𑐵𑑅 𑑋 𑐎𑑂𑐰𑐠𑐵 𑐧𑑂𑐫𑐹 𑐏𑐸𑐣𑑂𑐴𑐸𑐫𑐵 𑐣𑑂𑐴𑐵𑐥𑐵𑑄𑐐𑐸 𑐧𑐴𑐣𑐷, 𑐣𑑂𑐴𑐵𑐥𑐵𑑄𑐐𑐸 𑐔𑐵 ! 𑐀𑐴𑑀 ! 𑐮𑐸𑐩𑑄𑐮𑐸𑐩𑑄 𑐐𑐸𑐮𑐶 𑐣𑑂𑐴𑑂𑐫𑐂𑐥𑐸𑐸𑐳𑐾 𑐔𑑂𑐰𑑄 !?

𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬 𑐮𑐸𑐩𑑄 𑐮𑐸𑐩𑑄 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑐳𑐦𑐹 𑐥𑐵𑐏𑐾𑑄