𑐊𑐳𑐃𑐃 𑐮𑐶𑐳𑐾𑑄 𑑑𑑑 𑐰 𑑑𑑒 𑐫𑐵 𑐥𑐬𑐷𑐎𑑂𑐲𑐵 𑐮𑐶𑐕𑑂𑐫𑐵𑐂𑐐𑐸 𑐏𑐣𑐾𑐡𑐟 !

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑕 𑐦𑐵𑐮𑑂𑐐𑐸𑐞 𑑑𑑙, 𑐁𑐂𑐟𑐧𑐵𑐬 𑑑𑑘:𑑑𑑘:𑑑𑑖

𑐬𑐵𑐲𑑂𑐚𑑂𑐬𑐶𑐫 𑐥𑐬𑐷𑐎𑑂𑐲𑐵 𑐧𑑀𑐬𑑂‍𑐜𑑄 𑐰𑐂𑐐𑐸 𑐔𑐿𑐟𑑂𑐬 𑑑𑑐 𑐐𑐟𑐾𑐣𑐶𑐳𑐾𑑄 𑐤𑑂𑐫𑐵𑐫𑐾𑐟𑑂𑐫𑑄𑐐𑐸 𑐊𑐳𑐃𑐃 𑐥𑐬𑐷𑐎𑑂𑐲𑐵 𑐮𑐶𑐕𑑂𑐫𑐵𑐂𑐐𑐸 𑐳𑐩𑑂𑐨𑐵𑐰𑐣𑐵 𑐏𑐣𑐾𑐡𑐹𑐐𑐸 𑐡𑐸 𑑋

𑐣𑐾𑐥𑐵𑑅𑐫𑐵 𑑗 𑐐𑐸𑐮𑐶𑑄 𑐥𑑂𑐬𑐡𑐾𑐱𑐮𑐶𑐳𑐾𑑄 𑑑𑑒 𑐐𑐸𑐮𑐶𑑄 𑐖𑑂𑐫𑐵𑐎𑐸𑐠𑐶𑐂 𑐔𑑂𑐰𑑄𑐐𑐸 𑐥𑑂𑐬𑐩𑐸𑐏 𑐳𑐩𑐵𑐫𑑀𑐖𑐣𑐫𑑂 𑐮𑐵𑐫𑐾𑐢𑐸𑑄𑐎𑐵𑑅 𑐊𑐳𑐃𑐃 𑐮𑐶𑐳𑐾𑑄 𑐎𑐎𑑂𑐲𑐵 𑑑𑑑 𑐰 𑑑𑑒 𑐫𑐵 𑐥𑐬𑐷𑐎𑑂𑐲𑐵 𑐮𑐶𑐔𑑂𑐰𑑅 𑐮𑐵𑐂𑐐𑐸 𑐏𑐣𑐾𑐡𑐹𑐐𑐸 𑐏𑑅 𑑋

𑐮𑐶𑐎𑑂𑐎 𑐰𑐫𑐵𑐔𑑂𑐰𑑄𑐐𑐸 𑐊𑐳𑐃𑐃 𑐥𑐬𑐷𑐎𑑂𑐲𑐵𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐟 𑐳𑐩𑐳𑑂𑐫𑐵 𑐏𑐣𑐾𑐡𑐫𑐾𑐢𑐸𑑄𑐎𑐵𑑅 𑐧𑑀𑐬𑑂‍𑐜𑑄 𑐱𑐶𑐎𑑂𑐲𑐵, 𑐰𑐶𑐖𑑂𑐘𑐵𑐣 𑐰 𑐥𑑂𑐬𑐰𑐶𑐢𑐶𑐩𑐣𑑂𑐟𑑂𑐬𑐷 𑐐𑐶𑐬𑐶𑐬𑐵𑐖𑐩𑐞𑐶 𑐥𑑀𑐏𑐬𑐾𑐮𑐫𑐵𑐟 𑐮𑐶𑐏𑐶𑐟 𑐥𑑁 𑐕𑑂𑐰𑑅𑐐𑐸 𑐢𑐵𑑅𑐐𑐸 𑐡𑐸 𑑋

𑐥𑐬𑐷𑐎𑑂𑐲𑐵 𑐳𑑄𑐔𑐵𑐮𑐣 𑐰 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑐳𑐩𑐳𑑂𑐫𑐵 𑐰𑐂𑐐𑐸 𑐏𑐣𑐾𑐡𑐫𑐾𑐢𑐸𑑄𑐎𑐵𑑅 𑐧𑑀𑐬𑑂‍𑐜𑑄 𑐥𑐬𑐷𑐎𑑂𑐲𑐵 𑐃 𑐖𑑂𑐰𑑅𑐕𑐶 𑐎𑐬𑑂‍𑐩𑐔𑐵𑐬𑐷𑐥𑐶𑐣𑑂𑐟 𑐳𑐩𑐵𑐫𑑀𑐖𑐣 𑐩𑐫𑐵𑐫𑐾𑐟 𑐂𑐣𑐵𑐥 𑐫𑐵𑐳𑐾𑑄 𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮𑐫𑐵𑐟 𑐥𑑁 𑐕𑑂𑐰𑑅𑐐𑐸 𑐧𑑀𑐬𑑂‍𑐜𑐫𑐵 𑐣𑐵𑐫𑑅 𑐥𑑂𑐬𑐵.𑐜𑐵. 𑐔𑐣𑑂𑐡𑑂𑐬𑐩𑐞𑐶 𑐥𑑀𑐏𑐬𑐾𑐮𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐠𑐸𑐐𑐸 𑐡𑑃 𑐊𑐳𑐃𑐃 𑐥𑐬𑐷𑐎𑑂𑐲𑑂𑐵𑑃𑐫𑑂 𑐳𑐴𑐨𑐵𑐐𑐷 𑐖𑐸𑐂𑐥𑐶𑑄 𑐠𑑂𑐫𑑄𑐩𑐠𑑂𑐫𑑄 𑐳𑐵𑐝𑐾 𑑕 𑐮𑐏, 𑐎𑐎𑑂𑐲𑐵 𑑑𑑑 𑐰 𑑑𑑒 𑐫𑑂 𑐠𑑂𑐫𑑄𑐩𑐠𑑂𑐫𑑄 𑑑𑑐 𑐮𑐏 𑐰𑐶𑐡𑑂𑐫𑐵𑐬𑑂‍𑐠𑐷𑐥𑐶𑐣𑐶𑐐𑐸 𑐥𑐬𑐷𑐎𑑂𑐲𑐵 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑐠𑐵𑐎𑐸𑐂𑐐𑐸 𑐳𑑄𑐎𑐾𑐟 𑐏𑐣𑐾𑐡𑐫𑐾𑐢𑐸𑑄𑐎𑐵𑑅 𑐧𑑀𑐬𑑂‍𑐜𑑄 𑐰𑑄𑐐𑐸 𑐳𑑀𑐩𑐰𑐵𑑅 𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮𑐫𑐵𑐟 𑐥𑑁 𑐕𑑂𑐰𑑅𑐐𑐸 𑐳𑐷𑐡𑐹𑐐𑐸 𑐡𑐸 𑑋 𑐳𑐩𑐵𑐫𑑀𑐖𑐣𑐫𑑂 𑐮𑐵𑑅𑐥𑐶𑑄 𑐎𑐬𑑂‍𑐩𑐔𑐵𑐬𑐷 𑐰𑐣𑐾𑐢𑐸𑑄𑐎𑐵𑑅 𑐁𑐥𑐵𑐮𑑄 𑐖𑑂𑐫𑐵𑐎𑐸𑐠𑐶 𑐥𑑂𑐬𑐩𑐸𑐏 𑐧𑐶𑐴𑐶𑐣 𑐖𑐸𑐂𑐐𑐸 𑐖𑐹𑐐𑐸𑐮𑐶𑑄 𑐥𑐬𑐷𑐎𑑂𑐲𑐵 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑐳𑐩𑐳𑑂𑐫𑐵 𑐰𑐂𑐐𑐸 𑐧𑑀𑐬𑑂‍𑐜𑐫𑐵 𑐢𑐵𑐥𑐹 𑐡𑐸 𑑋

𑐠𑐸𑐐𑐸 𑐡𑑃𑐫𑐵 𑐊𑐳𑐃𑐃𑐫𑐵 𑐥𑐬𑐷𑐎𑑂𑐲𑐵 𑐰𑐂𑐐𑐸 𑐔𑐿𑐟𑑂𑐬 𑑑𑑐 𑐐𑐟𑐾𑐣𑐶𑐳𑐾𑑄 𑐖𑐸𑐂𑐐𑐸 𑐎𑐠𑑄 𑐟𑐵𑐮𑐶𑐎𑐵 𑐳𑐵𑐬𑑂‍𑐰𑐖𑐣𑐶𑐎 𑐫𑐵𑑅𑐐𑐸 𑐏𑑅𑐳𑐵 𑐧𑑀𑐬𑑂‍𑐜𑑄 𑐄𑐎𑐶𑐫𑐵 𑐣𑐶𑐟𑐶𑑄 𑐥𑐬𑐷𑐎𑑂𑐲𑐵 𑐎𑐾𑐣𑑂𑐡𑑂𑐬 𑐟𑐎𑑄 𑐣𑐶𑐬𑑂‍𑐢𑐵𑐬𑐞 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐬𑐵𑐲𑑂𑐚𑑂𑐬𑐶𑐫 𑐥𑐬𑐷𑐎𑑂𑐲𑐵 𑐧𑑀𑐬𑑂‍𑐜𑑄 𑐳𑐵𑐬𑑂‍𑐰𑐖𑐣𑐶𑐎 𑐫𑐵𑑅𑐐𑐸 𑐳𑐸𑐔𑑄𑐫𑐵 𑐎𑐠𑑄 𑐎𑐎𑑂𑐲𑐵 𑑑𑑒 𑐫𑐵 𑐥𑐬𑐷𑐎𑑂𑐲 𑑒𑑐𑑗𑑖 𑐧𑐿𑐱𑐵𑐏 𑑑𑑕 𑐐𑐟𑐾𑐣𑐶𑐳𑐾𑑄 𑐤𑑂𑐫𑐵𑐂𑐐𑐸 𑐰 𑐎𑐎𑑂𑐲𑐵 𑑑𑑑 𑐫𑐵 𑐥𑐬𑐷𑐎𑑂𑐲𑐵 𑑒𑑐𑑗𑑖 𑐧𑐿𑐱𑐵𑐏 𑑒𑑙 𑐐𑐟𑐾𑐣𑐶𑐳𑐾𑑄 𑐤𑑂𑐫𑐵𑐂𑐐𑐸 𑐤𑑂𑐫𑐠𑐣𑐵𑐟𑑅𑐐𑐸 𑐏𑑅 𑑋