𑐎𑑂𑐰𑐵𑑅𑐑𑐵𑐳𑐵

𑐮𑐎𑑂𑐲𑑂𑐩𑐞 𑐬𑐵𑐖𑐰𑑄𑐱𑐷 

𑐣𑐾𑐰𑐵𑑅𑐟𑐫𑑂𑐟 𑐎𑑂𑐰𑐵𑑅𑐑𑐵𑐳𑐵𑐫𑐵 𑐳𑐰𑐵𑑅 𑐠𑐸𑐂𑐎𑐵 𑐔𑑂𑐰𑐣𑐾𑐩𑑂𑐰𑐵𑑅 𑑋 𑐣𑐾𑐰𑐵𑑅𑐟𑐫𑑂 𑐎𑑂𑐰𑐵𑑅𑐑𑐵𑐳𑐵 𑐳𑐵𑐥 𑐫𑑅 𑑋 𑐎𑑂𑐰𑐵𑑅𑐑𑐵𑐳𑐵𑐫𑑂 𑐠𑑅𑐫𑐵𑐟 𑐫𑑅𑐐𑐸 𑐳𑐰𑐵𑑅 𑐎𑐵𑐫𑐾𑐖𑑂𑐫𑐹 𑑋 𑐩𑐫𑑅𑐐𑐸 𑐳𑐰𑐵𑑅 𑐩𑐾𑐫𑑂 𑐟𑑅𑐮𑐫𑑂 𑐮𑑂𑐴𑐵𑐎𑐾𑐖𑑂𑐫𑐹 𑑋 𑐣𑐵𑑄 𑐴𑐾 𑐎𑑂𑐰𑐵𑑅𑐑𑐵𑐳𑐵 𑐣𑑂𑐴𑑂𑐫𑐵𑐐𑐸 𑐎𑐵𑑅𑐳𑐵𑑄 𑐡𑐸𑐠𑑂𑐫𑐵𑐎𑐾𑐖𑑂𑐫𑐹 𑑋 𑐩𑑀𑐴𑐣𑐷 𑐰𑐵 𑐳𑑂𑐰𑐣𑑂𑐟𑐶 𑐣𑐏𑑅𑐧𑐮𑐫𑑂𑐫𑐵𑐐𑐸 𑐡𑑂𑐫𑑅𑐧𑑂𑐰𑑅, 𑐳𑑂𑐰𑐵𑑄 𑐎𑑂𑐰𑐎𑐵𑐫𑑂 𑐢𑐸𑐣𑐾𑐰𑑄 𑐧𑐵𑐳𑐶𑐐𑐸 𑐏𑑂𑐫𑐾𑑄, 𑐌, 𑐣𑑂𑐫𑐵, 𑐮𑐵, 𑐑𑐵𑐳𑐵𑐑𑐸𑐳𑐸 𑐳𑐎𑐟𑐵𑑄 𑐎𑑂𑐰𑐵𑑅𑐑𑐵𑐳𑐵𑐫𑑂 𑐡𑐸𑐠𑑂𑐫𑐵𑑅 𑑋 𑐎𑑂𑐰𑐵𑑅𑐑𑐵𑐳𑐵𑐫𑐵 𑐣𑐵𑑄 𑐩𑐡𑐸 𑑋 𑐎𑑂𑐰𑐵𑑅𑐐𑐸 𑐑𑐵𑐳𑐵 𑑋 𑐩𑐾𑐐𑐸 𑐑𑐵𑐳𑐵 𑐣𑑂𑐴𑑂𑐫𑐵𑐎𑑂𑐰 𑐎𑑂𑐰𑐵𑑅𑐳𑐵𑑄 𑐎𑑂𑐰𑐵𑑅𑐑𑐵𑐳𑐵 𑐢𑐵𑐂𑐩𑐏𑐸 𑑋 𑐠𑑂𑐰 𑐕𑐸𑑄 𑐕𑐟𑐵 𑐑𑐵𑐳𑐵𑐫𑐵𑐐𑐸 𑐣𑐵𑑄 𑐩𑐏𑐸 † 𑐧𑐵𑐳𑐶𑐐𑐸 𑐟𑑅𑐟𑐵 𑐧𑐹𑐧𑑅 𑐑𑐵𑐳𑐵𑐑𑐸𑐳𑐸 𑐮𑑂𑐰𑐵𑐎𑐖𑑂𑐫𑐵𑐂𑐐𑐸𑐮𑐶𑑄 𑐠𑐸𑐎𑐶𑐫𑐵 𑐳𑐰𑐵𑑅 𑐠𑐠𑐾 𑐏𑑅 𑐢𑐵𑐫𑐾𑐦𑐿𑐩𑐏𑐸 𑑋 𑐫𑑅𑐩𑑂𑐴𑐾𑐳𑐶𑐫𑐵𑑄 𑐫𑑅𑐐𑐸 𑐳𑐰𑐵𑑅 𑐠𑑂𑐰𑐷𑐎𑐷 𑑋

 

𑐣𑐾𑐰𑐵𑑅𑐟𑐫𑑂 𑐫𑑅𑐐𑐸 𑐰 𑐄𑐩𑐶𑐟 𑐖𑐎 𑐮𑑂𑐰𑑅𑐐𑐸 𑐑𑐵𑐳𑐵 𑐣𑐾𑐰𑐵𑑅 𑐔𑐬𑐶𑐟𑑂𑐬𑐮𑐶𑐳𑐾 𑐖𑑂𑐰𑑅𑐮𑐵𑑅 𑑋 𑐄𑐩𑐶𑐟 𑐣𑑂𑐴𑑂𑐫𑐵𑐐𑐸 𑐑𑐵𑐳𑐵𑑄 𑐥𑐵𑐫𑑂𑐕𑐶 ‘𑐣𑐾𑐰𑐵𑐟𑑅 𑐕𑐐𑐹 𑐳𑐩𑐵𑐖, 𑐖𑐵𑐟, 𑐳𑑄𑐥𑑂𑐬𑐡𑐵𑐫, 𑐳𑐩𑐸𑐡𑐵𑐫 ….’ 𑐣𑑂𑐴𑑂𑐫𑐵𑐩𑐳𑐶𑐣𑑄 𑐣𑑂𑐴𑑂𑐫𑐵𑐐𑐸 𑐢𑐵𑑅𑐳𑐵𑑄 𑐣𑐾𑐰𑐵𑑅𑐟𑐳𑐾𑑄 𑐠𑐠𑐾𑐩𑐏𑐸 𑐠𑐠𑐾𑐏𑑅 𑐢𑐵𑐂𑐩𑐏𑐸 𑑋 𑐧𑐬𑐸 𑐰𑐵𑐳𑑂𑐫𑐵𑐎 𑐣𑑂𑐴𑐶𑐮𑐵𑑅 𑐕𑑂𑐫𑑄 𑐎𑑂𑐰𑐵𑐂 𑑋 𑐏𑑅𑐩𑐏𑐸, 𑐖𑑂𑐫𑐹𑐩𑐖𑑂𑐫𑐹 𑐎𑑂𑐰𑑅𑐕𑐷𑐐𑐸 𑐣𑑂𑐴𑑂𑐫𑐥𑐸 𑐣𑐾𑐰𑐵𑑅𑐟𑐫𑑂𑐎𑐾 𑐡𑐸 𑐟𑐬 𑐩𑑂𑐴𑐸𑐟𑐸 𑐩𑐡𑐸 𑑋 ‘𑐣𑐾𑐰𑐵𑑅 𑐴𑐶𑐣𑑂𑐡𑐸 𑑋 𑐣𑐾𑐰𑐵𑑅 𑐧𑑁𑐡𑑂𑐢 𑑋 𑐣𑐾𑐰𑐵𑑅 𑐣𑐶𑐟𑐵𑑄 𑐏𑑅 𑑋 𑐣𑐾𑐰𑐵𑑅𑐟𑐫𑑂𑐟 𑐐𑐸𑐐𑐸 𑐢𑐬𑑂𑐬𑑂𑐩𑐫𑑂 𑐦𑐳𑑂𑐰𑐎𑐮 𑐄𑐏𑐾 𑐴𑐾 𑐦𑐴𑐶𑐮𑐷, 𑐩𑐫𑑅 𑐩𑑂𑐴𑐵𑑄 𑐢𑐵𑐫𑐾𑐩𑐳𑑅 𑑋

𑐴𑐶𑐣𑑂𑐡𑐸 𑐢𑐵𑑅𑐩𑑂𑐴 𑐣𑐾𑐰𑐵𑑅 𑐮𑐕𑐶𑐫𑑄𑐎 𑐐𑐸𑑄𑐮𑐵𑐫𑑂 𑐳𑑂𑐰𑐫𑑄𑐨𑐹 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐕𑐶 𑐖𑐵 𑐴𑐶𑐣𑑂𑐡𑐹 𑑅 𑐕𑐶 𑐕𑐵𑐫𑑂 𑐠𑐣 ? 𑐳𑐸𑐣𑐵𑑄 𑐣𑑄 𑐩𑐣𑑂𑐫𑑄 𑑋 𑐀𑐠𑐾𑐴𑐾 𑐧𑑁𑐡𑑂𑐢 𑐢𑐵𑑅𑐩𑑂𑐴 𑐣𑐾𑐰𑐵𑑅 𑐥𑐱𑐸𑐥𑐟𑐶 𑐩𑐵𑐴𑐵𑐡𑑂𑐫𑑅𑐫𑐵 𑐮𑐸𑐏𑐵 𑐣𑑂𑐴𑑂𑐫𑑅𑐣𑐾 𑐗𑑂𑐰𑑅𑐕𑐸𑐣𑐵𑐔𑑂𑐰𑑄𑐐𑐸 𑐏𑐣𑐷 𑑋 𑐊𑐎𑐵𑐡𑐱𑐷 𑐰 𑐟𑐷𑐖𑐫𑐵 𑐀𑐥𑐳𑑄 𑐔𑑂𑐰𑐣𑐾𑐰𑐵 𑐢𑐵𑑅𑐳𑐵𑑄 𑐩𑑂𑐴𑐵𑑅 𑐢𑐵𑐫𑐾𑐐𑐸 𑐔𑐮𑐣 𑐩𑐡𑐸 𑑋 𑐴𑐶𑐣𑑂𑐡𑐹 𑐖𑐸𑐖𑐸𑐫𑐵𑐐𑐸 𑐮𑐏𑑄 𑐟𑐸𑐟𑐶 𑐳𑐶𑐎𑐵𑑅 𑐧𑑁𑐡𑑂𑐢 𑐢𑐵𑑅𑐥𑐶𑐣𑑂𑐳𑑄 𑐳𑐩𑑂𑐫𑐎 (𑐩𑐴𑐵𑐥𑐬𑐶𑐟𑑂𑐬𑐵𑐞) 𑐣𑑄 𑐣𑑂𑐫𑐵𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋
𑐴𑐶𑐣𑑂𑐡𑐹 𑐖𑐸𑐂𑐟 𑐐𑐵𑐫𑐟𑑂𑐬𑐷 𑐩𑐣𑑂𑐟𑑂𑐬 𑐧𑑂𑐰𑐣𑐾𑐩𑑂𑐰𑐵𑑅 𑑋 𑐩𑑂𑐴𑑂𑐫𑐵𑐫𑑂𑐫𑐵𑐐𑐸 𑐣𑐵𑑄 ‘𑐐𑑀𑐩𑐵’ 𑐕𑐸𑐣𑐵𑐧𑐶𑐮 𑐎𑐶 𑐔𑐵𑑅 𑑋 𑐳𑐷 𑐣𑑂𑐴𑑂𑐫𑐰𑑄𑑅 ‘𑐊 𑐧𑐵𑐧𑐸 𑐬𑐵𑐩 𑑋 𑐊 𑐴𑐬𑐶 𑑋’ 𑐢𑐎𑐵𑑅 𑐳𑑅𑐟𑐾𑐰𑑄 𑐳𑑂𑐰𑐬𑑂𑐐𑐫𑑂 𑐠𑑂𑐫𑐣𑐷 𑑋 𑐐𑐸𑐥𑐵𑐫𑑂𑐳𑐎𑑄 𑐫𑐵𑐄“𑐐𑐸 𑐢𑐬𑑂𑐩 ? 𑐧𑑁𑐡𑑂𑐢 𑐖𑐸𑐂𑐟 𑐟𑑂𑐬𑐶𑐥𑐶𑐚𑐎 𑐰𑐵 𑐕𑐸𑑄 𑐣𑑄 𑐧𑑁𑐡𑑂𑐢 𑐳𑐦𑐹𑐟 𑐧𑑂𑐰𑐣𑐾𑐩𑐵𑑅 𑐢𑐫𑐵

𑐐𑐸 𑐩𑐡𑐸 𑑋 𑐣𑑂𑐴𑑂𑐫𑐵𑑅𑐳𑐵𑑄 𑐥𑐸𑐣𑑂𑐴𑐷 𑐰 𑐀𑐲𑑂𑐚𑐩𑐷 𑐎𑐸𑐣𑑂𑐴𑐸 𑐩𑐮𑐵𑑅𑐳𑐵 𑐳𑑂𑐰𑐵𑑄𑐫𑐵𑐥𑐸𑐣𑑂𑐴𑐷 𑐕𑐣𑑂𑐴𑐸𑐖𑐎 𑐰𑐶𑐴𑐵𑐬𑐫𑑂 𑐰𑐣𑐵𑑅 𑐨𑐶𑐎𑑂𑐲𑐸 𑐰 𑐀𑐣𑐵𑐐𑐵𑐬𑐶𑐎𑐵𑐥𑐶𑐣𑐶𑐟 𑐐𑐸𑐮𑑂𑐥𑐵𑑅 𑐮𑑅𑐮𑑂𑐴𑐵𑐫𑐾𑐰𑑄 𑐨𑐐𑐰𑐵𑐣 𑐧𑐸𑐡𑑂𑐢 𑐮𑐫𑑂𑐟𑐵𑐂 𑑋 𑐩𑑂𑐴𑐵𑑅 𑐳𑐵, 𑐩𑐮𑐵𑑅𑐳𑐵 𑐕𑐸𑑄 𑐫𑐵𑐫𑐾𑐩𑑂𑐰𑐵𑑅 𑑋 𑐐𑐣𑑄 𑐰𑐣𑐾 𑐣𑑄 𑐩𑑂𑐰𑐵𑑅 𑑋 𑐟𑐬 𑐴“𑐫𑑂 𑐏𑑂𑐫𑐾𑑄 𑐧𑐮𑐶𑐧𑐶𑐫𑐵𑑅 𑐳𑐩𑐫𑐧𑐖𑐶 𑐨𑑂𑐰𑐵𑑅𑐟𑐶𑐣𑐵𑑅 𑐋𑐮𑐵𑐏𑑄 𑐎𑑂𑐰𑐔𑐷𑐩𑐵𑑅 𑑋 𑐥𑐣𑑂𑐡𑑂𑐬𑐵𑑄 (𑐥𑑄𑐔𑐡𑐵𑐣) 𑐦𑑂𑐰𑑄𑐰𑑅𑐥𑐶𑑄 𑐐𑐸𑐬𑐸𑐖𑐸𑐥𑐶𑐣𑐶𑐟 𑐕𑑂𑐫𑐮𑐷 𑐡𑐸𑐣𑐾𑐟𑐫𑐵𑑅 𑐔𑐶𑐥𑐵𑐮𑐸 𑐮𑑂𑐰𑐳𑐵 𑐮𑑅𑐮𑑂𑐴𑐵𑐣𑐵𑑅 𑐳𑐮𑐶𑑄 𑐰𑐵 𑐏𑑀𑐮𑑂𑐔𑐵𑐫𑑂 𑐋𑐮𑐵𑑅 𑐮𑐸𑐣𑐵𑐧𑐷𑐩𑐵𑑅 𑑋

𑐴𑐶𑐣𑑂𑐡𑐹 𑐣𑐾𑐰𑐵𑑅 𑐰 𑐧𑑁𑐡𑑂𑐢 𑐣𑐾𑐰𑐵𑑅𑐟𑐫𑑂 𑐳𑑄𑐳𑑂𑐎𑐺𑐟𑐶 𑐰 𑐁𑐔𑐬𑐞 𑐕𑐐𑐹 𑐴𑐾 𑐏𑑅𑐳𑐵𑑄 𑐄𑐩𑐶 𑐡𑐠𑑂𑐰𑐷 𑐥𑐵𑑅𑐐𑐸 𑐁𑑄𑐐𑐳𑐵 𑐡𑐸𑐩𑑂𑐴 𑐰 𑐩𑐡𑐸𑐩𑑂𑐴 𑐩𑐶𑐖𑑄 𑑋 𑐟𑐬 𑐣𑐶𑐏𑐮𑑅 𑐩𑐶𑐳𑐵𑐟𑐫𑑂 𑐕𑐸𑑄 𑐩𑐥𑐵𑑅 𑑋 𑐳𑐬𑐰𑐟 𑐰𑐵 𑐳𑐥𑑂𑐰𑑅 𑐣𑐶𑐏𑐮𑑅 𑐩𑐶𑐳𑐵𑐟𑐫𑑂𑐎𑐾 𑐡𑐸 𑑋 𑐠𑐷𑐩𑐖𑑂𑐫𑐹 𑐧𑐮𑐫𑑂 𑐧𑑁𑐡𑑂𑐢 𑐩𑐶𑐳𑐵 𑐩𑑀𑐮𑑂𑐴𑐸𑐫𑐵𑑅 𑐣𑑂𑐴𑑂𑐫𑐵𑐐𑐸𑑄 𑐫𑐵𑐫𑐾 𑐖𑑂𑐫𑐹 𑑋 𑐣𑑂𑐴𑑂𑐫𑐵𑐠𑐵𑐳𑑄 𑐰𑐣𑐾 𑐣𑑄 𑐖𑑂𑐫𑐹 𑑋 𑐟𑐬 𑐴𑐶𑐣𑑂𑐡𑐹 𑐣𑐾𑐰𑐵𑑅𑐣𑐷 𑐥𑑂𑐫𑐣𑑂𑐴𑐸𑐟𑐎 𑐨𑐸𑐟𑐹𑐮𑐷 𑐡𑐸𑐴𑐵𑑄 𑐰𑐣𑐾 𑐩𑐖𑑂𑐫𑐹 𑑋 𑐩𑐾𑐥𑐶𑑄𑐮𑐶𑐳𑐾 𑐗𑑂𑐰𑑅𑐕𑐸𑐣𑐵𑑅 𑐣𑐫𑐾𑐩𑐖𑑂𑐫𑐹 𑑋 𑐕𑐎𑐹 𑐴𑐾 𑐎𑑂𑐰𑐠𑐵𑐫𑑂 𑐡𑑂𑐫𑑅𑐳𑐵𑑄 𑐨𑐵𑑅𑐟𑐮𑐶𑐳𑐾 𑐴𑑂𑐰𑐣𑐾 𑐩𑐖𑑂𑐫𑐹 𑑋 𑐄𑐩𑐶 𑐡𑐠𑑂𑐰𑐷 𑐥𑐵𑑅𑐐𑐸 𑐢𑐵𑑅𑐳𑐵𑑄 𑐧𑐵𑑅𑐐𑐸 𑐢𑐵𑑅𑐳𑐵𑑄 𑐠𑐸𑐮𑐶 𑐴𑐾 𑑋
𑐧𑑁𑐡𑑂𑐢 𑐰𑐶𑐡𑑂𑐰𑐵𑐣𑐟 𑐬𑐵𑐩𑐣𑐰𑐩𑐶 𑐰 𑐎𑐺𑐲𑑂𑐞𑐵𑐲𑑂𑐚𑐩𑐷 𑐳𑐵𑑄𑐳𑑂𑐎𑐺𑐟𑐶𑐎 𑐥𑐬𑑂𑐰𑐫𑑂 ‘𑐴𑐬𑐾 𑐬𑐵𑐩, 𑐴𑐬𑐾 𑐎𑐺𑐲𑑂𑐞’ 𑐴𑐵𑐴𑐵𑑄 𑐏𑑅 𑐮𑑂𑐫𑐹𑐮𑑂𑐫𑐹 𑐰𑐣𑐵𑐔𑑂𑐰𑑄𑐐𑐸 𑐏𑐣𑐵𑑅 𑐕𑐣𑑂𑐴𑐸 𑐕𑐩𑑂𑐴 𑐧𑑁𑐡𑑂𑐢𑐫𑐵𑐎𑐾 𑐣𑑂𑐫𑐣 – ‘𑐕𑐶 𑐮𑐵 𑐕𑐩𑑂𑐴 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣, 𑐕𑐶 𑐠𑐣 𑐕𑐵𑐫𑑂 ?’ 𑐰𑐳𑐥𑑀𑐮𑑄 𑐡𑐵𑐬𑑂𑐱𑐣𑐶𑐎 𑐮𑐶𑐳𑑅 𑐧𑐶𑐫𑐵𑐧𑐶𑐖𑑂𑐫𑐵𑐟 – ‘𑐗𑐷 𑐀𑐠𑐾 𑐎𑐚𑑂𑐚𑐬 𑐖𑐸𑐂𑐩𑐖𑑂𑐫𑐹 𑑋 𑐢𑐵𑐬𑑂𑐩𑐶𑐎 𑐳𑐩𑐣𑑂𑐰𑐫𑐰𑐵𑐡 𑐢𑐫𑐵𑐐𑐸 𑐕𑐶𑑄 𑐣𑑂𑐫𑐣𑐵𑐟𑑅𑐐𑐸 𑐡𑐫𑐾𑐩𑐵𑑅 𑑋 𑐗𑐷𑐳𑑄 𑐣𑐸𑐐𑑅 𑐎𑐫𑑂𑐎𑐸𑑄𑐎𑐾 𑐩𑐖𑑂𑐫𑐹 𑑋 𑐄𑐡𑐵𑐬 𑐖𑐸𑐂 𑐳𑐫𑐾𑐎𑐾𑐩𑐵𑑅 𑑋’ 𑐩𑐏𑐸 𑐐𑐫𑑂 𑐢𑐵𑐫𑑂 ? 𑐣𑐾𑐰𑐵𑑅𑐟 𑐴𑐮𑐹 𑑋 𑐣𑑂𑐴𑑂𑐫𑐵𑐠𑐵𑐫𑑂 𑐣𑑄 𑐥𑐵𑐫𑑂𑐕𑐶 𑑋 𑐣𑑂𑐴𑑂𑐫𑐵𑐩𑑂𑐴𑑄 𑐠𑑅𑐴𑐾 𑐖𑐶𑐔𑐵𑐨𑐵𑐖𑐸 𑐠𑐾𑑄 𑑋
𑐧𑑁𑐡𑑂𑐢𑐟𑐳𑐾𑑄 𑐴𑐬𑐾𑐬𑐵𑐩, 𑐴𑐬𑐾𑐎𑐺𑐲𑑂𑐞 † 𑐎𑐺𑐲𑑂𑐞 𑐎𑐺𑐲𑑂𑐞, 𑐴𑐬𑐾 𑐴𑐬𑐾 † 𑐨𑐖𑐣 𑐫𑐵𑐫𑐾𑐐𑐸 𑐳𑐩𑐣𑑂𑐰𑐫𑐰𑐵𑐡 𑐏𑑅 𑐧𑐵𑐫𑑂 𑐀𑐧𑐸 𑐡𑐵𑐮𑐵𑐫𑑂 𑐩𑐡𑐸𑐐𑐸 𑐏𑑅 𑑋 𑐢𑐵𑐫𑐾 𑐠𑐵𑐎𑐸 𑑋 𑐧𑐸𑐂𑐰𑑄 𑐴𑐶𑐣𑑂𑐡𑐹 𑐧𑑁𑐡𑑂𑐢 𑐖𑐸𑐂𑐥𑐶𑑄 𑐣𑐾𑐰𑐵𑑅𑐟 𑐳𑐩𑐣𑑂𑐰𑐫𑐰𑐵𑐡𑐷 𑐰 𑐄𑐡𑐵𑐬𑐰𑐵𑐡𑐷 𑐩𑐖𑐹𑐳𑐵 𑐕𑐸 𑐖𑐸𑐂 ? 𑐴𑐶𑐣𑑂𑐡𑐹 𑐣𑐾𑐰𑐵𑑅𑐫𑐵𑐟 ‘𑐖𑑂𑐘𑐵𑐣𑐩𑐸𑐣𑐷 𑐥𑑂𑐬𑐢𑐵𑐣, 𑐰 𑐧𑑁𑐡𑑂𑐢 𑐢𑐵𑑅𑐩𑑂𑐴 𑐣𑐾𑐰𑐵𑑅𑐫𑐵𑐟 𑐱𑐶𑐧𑐰𑐣𑑂𑐢𑐹 𑐰𑐖𑑂𑐬𑐵𑐔𑐵𑐬𑑂𑐫 𑐣𑐵𑑄 𑐣𑑄 𑐥𑐵𑐫𑑂𑐕𑐶 𑑋 𑐔𑐵𑐄 𑐊𑐣 𑐮𑐵𑐂 𑐱𑐵𑐎𑑂𑐫, 𑐜𑐵𑐬𑑂𑐧𑐶𑐣 𑐱𑑂𑐬𑐾𑐲𑑂𑐛𑐣𑑄 𑐄𑐮𑐶 𑐴𑐾 𑐮𑑂𑐰𑑅 𑑋 𑐳𑑂𑐚𑐵𑐮𑐷𑐣 𑐳𑐵𑐫𑑂𑐩𑐶 𑐮𑐵 𑐀𑐔𑐵𑐬𑐫𑑂 𑐩𑐷 𑐎𑑂𑐰𑐫𑑂𑐎𑐾𑐠𑐾𑑄 𑐳𑐵𑐥 𑐖𑑂𑐰𑑄 𑑋 𑐟𑐬 𑐠𑑁𑑄𑐟𑐎 𑐩𑑀𑐴𑐩𑑂𑐩𑐡𑐩𑐵𑐣 𑐳𑐶𑑄𑐴, 𑐀𑐰𑐡𑐹𑐮 𑐬𑐴𑐩𑐵𑐣 𑐖𑑀𑐱𑐷, 𑐩𑐎𑐧𑐸𑐮 𑐧𑐖𑑂𑐬𑐵𑐔𑐵𑐬𑑂𑐫, 𑐂𑐧𑑂𑐬𑐵𑐴𑐷𑐩 𑐖𑑂𑐫𑐵𑐥𑐸, 𑐀𑐮𑐶 𑐳𑐸𑐰𑐵𑐮 𑐢𑑂𑐰𑐩𑐡𑐹𑐣𑐶 𑑋 𑐔𑐿𑐟𑑂𑐫𑐡𑐾𑐰𑐷 𑐀𑐩𑐵𑐟𑑂𑐫, 𑐳𑐸𑐖𑐵𑐟𑐵 𑐩𑐮𑑂𑐮, 𑐥𑑂𑐬𑐾𑐩𑐮𑐟𑐵 𑐟𑐸𑐮𑐵𑐢𑐬 𑐁𑐡𑐶 𑐣𑐵𑑄𑐫𑐵𑐥𑐶𑑄 𑐩𑐫𑑂𑐖𑐸𑐥𑐶𑑄 𑐕𑐩𑑂𑐴 𑐣𑐶𑐩𑑂𑐴𑐳𑐵𑑄 𑐖𑐶𑑄 𑐩𑑂𑐴𑐳𑑂𑐫𑐹 𑑋 𑐣𑐾𑐰𑐵𑑅𑐣𑐷𑐟𑐫𑑂 𑐏𑐵𑐟𑐸𑐣 𑐔𑐶𑐬𑐶𑐩𑐵𑐫𑐵 𑐰𑐵 𑐣𑑅𑐮𑐶 𑐧𑐶𑐧𑐷 𑐣𑐵𑑄 𑐣𑑂𑐫𑐣𑐾𑐩𑐡𑐸 𑑋 𑐳𑐩𑐣𑑂𑐰𑐫𑐰𑐵𑐡 𑐴𑐶𑐣𑑂𑐡𑐹 𑐰 𑐧𑑁𑐡𑑂𑐢𑐟𑐫𑑂 𑐡𑐠𑑂𑐰𑐷 𑐖𑐎 𑐧𑑂𑐫𑐵𑑅𑐐𑐸 𑐏𑑅𑐳𑐵 𑐩𑐳𑑂𑐫𑐸 𑐩𑐏𑐸𑐳𑐵 𑐠𑐸𑐮𑐶𑐨𑐣𑑄 𑐎𑐫𑑂𑐎𑐸𑐣𑐾 𑐩𑑂𑐰𑐵𑑅𑐐𑐸 𑐏𑑅 𑑋
‘𑐣𑐶𑐐𑐹 𑐢𑐬𑑂𑐩 𑐧𑐵𑐫𑑂 𑐡𑐬𑑂𑐱𑐣, 𑐧𑐵𑐡’ 𑐐𑐠𑐾 𑐏𑑅 𑐀𑐠𑐾𑐴𑐾 𑐕𑐠𑐵𑐳𑑄 𑐟𑐫𑐵𑑅 𑐣𑑂𑐴𑐵𑐮𑐎𑐶 𑐕𑐸𑐔𑐸𑑄 𑐠𑐾𑑄 𑐰 𑐏𑑂𑐰𑐵𑑅 𑐠𑑂𑐰 𑐏𑑂𑐰𑐵𑑅 𑐡𑐿𑐩𑐏𑐸 𑑋 𑐕𑐐𑐹 𑐢𑐬𑑂𑐩𑑄 𑐩𑐾𑐐𑐸 𑐢𑐬𑑂𑐩𑐫𑐵𑐟 𑐥𑐵𑐕𑐵𑐫𑐵𑑅 𑐖𑑂𑐰𑐷𑐩𑐏𑐸 𑑋 𑐥𑐵𑐔𑐶𑐣𑐵𑐣𑑄 𑐖𑐸𑐂𑐩𑐏𑐸 𑑋 𑐎𑐸𑐮𑐾𑐔𑐶𑐣𑐾𑐐𑐸 𑐳𑐩𑐣𑑂𑐰𑐫𑐰𑐵𑐡 𑐖𑐸𑐂 𑐦𑐸 𑐟𑐬 𑐟𑑂𑐰𑐵𑐫𑑂𑐔𑐶𑐣𑐷 𑐩𑐏𑐸 𑑋 𑐳𑐾𑐟𑐷 𑐰 𑐐𑐞𑑂𑐜𑐎𑐷 𑐮𑑂𑐰𑐵𑐎𑐖𑑂𑐫𑐵𑑅𑐐𑐸 𑐡𑑀𑐨𑐵𑐣𑐫𑐵 𑐮𑑅 𑐣 𑐳𑐾𑐟𑐷 𑐠𑐾𑑄 𑐟𑐸𑐃 𑐣 𑐎𑐵𑐮𑐷𑐠𑐾𑑄 𑐴𑐵𑐎𑐸𑐂 𑑋 𑐮𑑅 𑐧𑐸𑐮𑐸𑐂 𑑋 𑐕𑐩𑑂𑐴𑐳𑐶𑐐𑐸 𑐢𑐬𑑂𑐩𑐾𑐫𑑂 𑐩𑐾𑐩𑑂𑐴𑐾𑐳𑐶𑐐𑐸 𑐢𑐬𑑂𑐩 𑐥𑑄𑐐𑑅 𑐩𑐖𑑂𑐰𑐷𑐐𑐸 𑐖𑐎 𑐏𑑅 𑐳𑐩𑐣𑑂𑐰𑐫 𑐫𑐵𑐫𑐾𑐐𑐸 𑐩𑐏𑐸 𑐠𑐾𑑄 𑐔𑑂𑐰𑑄 𑑋 𑐖𑐶 𑐠𑑅𑐐𑐸 𑐮“𑐫𑑂 𑐰𑐣𑐾 𑑋 𑐕 𑐠𑑅𑐐𑐸 𑐮“𑐫𑑂 𑐴𑐸“ 𑑋 𑐖𑐶𑑄 𑐧𑐸𑐡𑑂𑐢𑐩𑑂 𑐱𑐬𑐞𑐩𑑂 𑐐𑐔𑑂𑐕𑐵𑐩𑐶 𑐢𑐵𑐫𑐾 𑐕 𑐖𑐫 𑐨𑑀𑐮𑐾𑐣𑐵𑐠 𑐢𑐎𑐵𑑅 𑐩𑐴𑐵𑐡𑐾𑐰𑐫𑐵𑐟 𑐳𑑅𑐟𑐶 𑑋 𑐖𑐶 𑐳𑑄𑐑𑐫𑐵 𑐱𑐬𑐞𑐫𑑂 𑐰𑐣𑐾 𑐕 𑐐𑑀𑐬𑐏𑐣𑐵𑐠𑐫𑐵𑐐𑐸 𑐐𑐸𑐦𑐵𑐫𑑂 𑐡𑐸𑐴𑐵𑑄 𑐴𑐸“ 𑑋 𑐖𑐶 𑐢𑐬𑑂𑐩𑐫𑐵𑐐𑐸 𑐱𑐬𑐞𑐫𑑂 𑐰𑐣𑐾 𑐕 𑐏𑐬𑐵𑐣𑐷 𑐧𑐸𑐫𑐵𑑅 𑐳𑑂𑐰𑐬𑑂𑐐𑐫𑑂 𑐠𑑂𑐫𑑄𑐎𑑅 𑐴𑐸“ 𑑋 𑐣𑐶𑐐𑐹 𑐢𑐬𑑂𑐩𑐫𑐵 𑐮“ 𑐣𑐶𑐏𑐾 𑐳𑑂𑐰𑑅 𑑋 𑐮𑐶𑐳𑐾𑑄 𑐥𑐵𑐔𑐶𑐣𑐵 𑐰𑐣𑐾𑐐𑐸 𑐢𑐫𑐵𑐐𑐸 𑐕𑐐𑐹 𑐢𑐬𑑂𑐩 𑐁𑐖𑐸𑐂 𑐠𑑂𑐫𑑄𑐎𑑅 𑐰𑐣𑐾𑐐𑐸 𑐏𑑅 𑑋

𑐣𑐾𑐰𑐵𑑅𑐟 𑐣𑑂𑐫𑐾𑐣𑐵 𑐣𑑂𑐫𑐾𑐣𑐵 𑐎𑐸𑐟𑐶 𑐳𑑅 𑑋 𑐠𑐠𑐾 𑐖𑐹𑐐𑐸 𑐴𑐸𑐣𑐶𑑄 𑐰𑑄 𑐠𑑅𑐫𑐵𑐟 𑐩𑑂𑐴𑐳𑐷𑐎𑐾𑐐𑐸 𑐎𑐸𑐟𑑅 𑐩𑐫𑐵𑐟 𑐰𑐵𑐫𑑂 𑐩𑑂𑐴𑐳𑐶𑐫𑐵𑑅 𑐣𑑄 𑐩𑐳𑑂𑐫𑐹 𑐥𑐴𑑅 𑐫𑐵𑐟 𑑋 𑐴𑐶𑐣𑑂𑐡𑐹 𑐢𑐬𑑂𑐩 𑐰 𑐧𑑁𑐡𑑂𑐢 𑐢𑐬𑑂𑐩 𑐰𑐫𑐾 𑐣𑑂𑐴𑑂𑐫𑐰𑑅 𑐣𑐾𑐥𑐵𑑅 𑐐𑐵𑐮𑐫𑑂 𑐣𑐾𑐰𑐵𑑅𑐟 𑐩𑐡𑐸𑐮𑐵 ? 𑐳𑑂𑐰𑐣𑐶𑐐𑑅𑐫𑐵 𑐨𑐹𑐩𑐶𑐥𑐸𑐟𑑂𑐬 𑐀𑐣𑐫𑐵𑐐𑐸 𑐴𑐾 𑐔𑐵𑑄 𑐠𑐵𑐴𑐵𑑄 𑐰𑑅𑐥𑐶𑑄 𑐣𑐾𑐰𑐵𑑅𑐟𑐫𑑂 𑐴𑐶𑐣𑑂𑐡𑐹 𑐰 𑐧𑑁𑐡𑑂𑐢 𑐢𑐬𑑂𑐩 𑐡𑐸𑐴𑐵𑑄𑐰𑐫𑑂 𑐣𑑂𑐴𑑂𑐫𑐰𑑅 𑐠𑑅𑐐𑐸 𑐢𑐬𑑂𑐩 𑐩𑐡𑐸𑐮𑐵 ? 𑐦𑐸𑐎 𑐣𑐾𑐰𑐵𑑅 𑐩𑐾𑐥𑐶𑑄 𑐠𑐾𑑄 𑐕𑐐𑐹 𑐥𑐶𑐣𑐾𑐫𑐵𑐐𑐸 𑐢𑐬𑑂𑐩 𑐖𑑂𑐰𑐣𑐵𑑅 𑐰𑑅𑐥𑐶𑑄 𑐢𑐵𑐫𑐾 𑐦𑐫𑐾𑐎𑐾 𑐩𑐵𑐮 𑐩𑐏𑐸𑐳𑐵 𑐣𑐾𑐰𑐵𑑅𑐟𑐫𑑂 𑐣𑑂𑐴𑐵𑐥𑐵𑑄𑐐𑐸 𑐢𑐬𑑂𑐩 𑐴𑐾 𑐴𑐶𑐣𑑂𑐡𑐹 𑐰 𑐧𑑁𑐡𑑂𑐢 𑐢𑐵𑐫𑐾𑐩𑐵𑐮 𑑋 𑐧𑑁𑐡𑑂𑐢 𑐢𑐬𑑂𑐩 𑐣𑐾𑐰𑐵𑑅𑐟𑐫𑑂 𑐣𑑂𑐴𑑂𑐫𑑅𑐣𑐾 𑐩𑐔𑐵𑐴𑐾 𑐟𑐶𑐣𑐶 𑑋 𑐧𑑁𑐡𑑂𑐢 𑐳𑑂𑐰𑐫𑐵𑑅 𑐠𑐎𑐵𑐮𑐶𑐐𑐸 ‘‘𑐴𑐶𑐣𑑂𑐡𑐹 𑐰𑐬𑑂𑐞𑐵𑐱𑑂𑐬𑐩𑐫𑑂 𑐖𑐶𑐥𑐶𑑄 𑐩𑐮𑐵𑑅’’ 𑐢𑐎𑐵𑑅 𑐖𑐣𑐖𑐵𑐟𑐶 𑐢𑐮𑑅 𑐡𑐸𑐣𑐾 𑐡𑐸𑐴𑐵𑑄𑐰𑑄𑐥𑐶𑑄 𑐣𑐾𑐰𑐵𑑅𑐟 𑐐𑐠𑐾 𑐴𑐶𑐣𑑂𑐡𑐹 𑐖𑐸𑐮 ? 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐖𑐸 𑐬𑐵𑐲𑑂𑐚𑑂𑐬𑐶𑐫 𑐰𑐶𑐨𑐹𑐟𑐶 𑐟𑐬 𑐣𑐾𑐥𑐵𑐮 𑐳𑑄𑐰𑐟 𑐣𑐵𑐮𑐾𑐩𑐫𑑀 𑐢𑐫𑐵𑐠𑐾𑑄 𑐴𑐶𑐣𑑂𑐡𑐹 𑐢𑐵𑐫𑑂𑐎𑐾𑐫𑑅 𑐄𑐫𑐵𑐐𑐸 𑐰𑐬𑑂𑐞𑐵𑐱𑑂𑐬𑐩𑐫𑑂 𑐔𑑂𑐰𑐣𑐾𑐩𑐫𑑅 𑑋

𑐴𑐶𑐣𑑂𑐡𑐹 𑐰𑐬𑑂𑐞𑐵𑐱𑑂𑐬𑐩 𑐎𑐠𑑄 𑐣𑑂𑐴𑐵𑐥𑐵𑑄𑐐𑐸 𑐣𑐶𑐐𑐹 𑐰𑐬𑑂𑐞 𑐧𑑂𑐬𑐵𑐩𑑂𑐴𑐞 𑐰 𑐎𑑂𑐲𑐾𑐟𑑂𑐬𑐷𑐫𑐵𑐟 𑐮𑐶𑐥𑐵𑑄𑐐𑐸 𑐣𑐶𑐐𑐹 𑐰𑐬𑑂𑐞 𑐰𑐿𑐱𑑂𑐫 𑐰 𑐱𑐸𑐡𑑂𑐬 𑐣𑐾𑐰𑐵𑑅𑐟𑐫𑑂𑐟 † 𑐧𑑂𑐬𑐵𑐩𑑂𑐴𑐞 𑐳𑑂𑐰𑐬𑑂𑐐𑐫𑐵 𑐛𑐾𑐎𑐾𑐡𑐵𑐬 † 𑐎𑑂𑐲𑐾𑐟𑑂𑐬𑐷 𑐳𑐶𑑄𑐴𑐵𑐳𑐣𑐫𑐵 𑐴𑐎𑐡𑐵𑐬 𑑋 𑐣𑐾𑐰𑐵𑑅 𑐄𑐩𑐶 𑐔𑑂𑐫𑑅 𑐨𑑂𑐰𑐵𑐟𑐶𑑄 𑑋 𑐧𑑂𑐬𑐵𑐩𑑂𑐴𑐞𑐟𑐫𑑂𑐟 𑐢𑐶𑐧𑐵 𑐕𑐵𑐣𑐵𑑅 𑐮𑑂𑐴𑐵𑑅 𑐨𑐵𑐐𑐶 𑐫𑐵𑐫𑐾𑐐𑐸 𑐰 𑐎𑑂𑐲𑐾𑐟𑑂𑐬𑐷𑐟𑐫𑑂𑐐𑐸 𑐟𑐸𑐟𑐶 𑐟𑐶𑐂𑐎𑐾 𑐏𑑄𑐐𑐸𑐮𑐷 𑐣𑐾𑐰𑐵𑑅𑐟 𑐟𑑅𑐢𑑄 𑐖𑐹𑐐𑐸 𑐟𑐵𑐫𑑂𑐎𑐵 𑐔𑑂𑐰𑐣𑐷 𑑋 𑐕𑐵𑐫𑑂𑐎𑐶 𑐣𑐾𑐰𑐵𑑅 𑐢𑐫𑐵𑐥𑐶𑑄 𑐮𑐫𑑂𑐟𑐵𑑅 𑐔𑑂𑐫𑑅 𑑋 𑐣𑑂𑐴𑐵𑐫𑑂 𑐢𑑂𑐫𑑄 𑐣𑑄 𑐩𑐳𑑂𑐫𑐹 𑐣𑑂𑐴𑐶𑐎𑐵𑑅𑐐𑐸 𑐣𑑄 𑐩𑐳𑑂𑐫𑐹𑐥𑐶𑑄 𑑋 𑐎𑐬𑐎𑐶𑐐𑐸 𑐟𑐵𑐮𑐫𑑂 𑐩𑐵𑐎𑑅 𑐥𑑂𑐫𑐵𑐏𑑄 𑐴𑐸𑐮𑐷𑐥𑐶𑑄 𑑋
𑐣𑑂𑐴𑑂𑐫𑐵𑐩𑑂𑐴𑐾𑐳𑐶𑐣𑑄 𑐣𑑂𑐴𑑂𑐫𑐵𑐐𑐸 𑐢𑐵𑑅𑐳𑐵𑑄 𑐳𑑄𑐳𑑂𑐎𑐺𑐟𑐶𑐂 𑐡𑐸𑐰𑐵𑐮𑐵𑑅 𑐳𑑂𑐰𑐮 𑐎𑐶 𑐣𑐾𑐰𑐵𑑅 𑐴𑐶𑐣𑑂𑐡𑐹 𑐏𑑅 𑐧𑐵𑐫𑑂 𑐧𑑁𑐡𑑂𑐢 ? 𑐣𑐾𑐰𑐵𑑅 𑐣𑑄 𑐠𑑅𑐐𑐸 𑐏𑑂𑐰𑐵𑑅 𑐀𑐣 𑐏𑐣𑐷 𑑋 𑐴𑐶𑐣𑑂𑐡𑐹 𑐰 𑐧𑑁𑐡𑑂𑐢 𑐢𑐬𑑂𑐩𑐫𑐵𑐐𑐸 𑐕𑐸𑑄 𑐏“ 𑐩𑐳𑐷𑐎𑑄 𑐴𑐾 𑐧𑐸𑐂𑐰𑑄 𑐢𑐬𑑂𑐩𑐫𑐵 𑐎𑐸 𑐎𑐸𑐧𑐷𑐎𑐵 𑐧𑑂𑐫𑐹𑐐𑐸𑐮𑐶𑑄 𑐦𑐵𑐐𑐸𑐧𑐮𑐫𑑂 𑐧𑐵𑑄𑐮𑐵𑐎 𑐨𑑂𑐰“𑐟𑑄 𑐨𑐸𑐣𑐵𑐟𑑅𑐐𑐸 𑐡𑑂𑐫𑑅𑐣𑐾 𑐀𑐰𑐶𑐬 𑐴𑑀𑐮𑐵𑑅 𑐡𑐸𑐣𑐾 𑐳𑑁𑐏𑐶𑑄 𑐖𑐵𑑅𑐐𑐸 𑐩𑐬𑐶𑐎𑐳𑐶 𑐎𑐸𑐧𑐶𑐫𑐵 𑐰𑐣𑐵𑐔𑑂𑐰𑑄𑐩𑑂𑐴 𑐨𑐮𑑂𑐫𑐵 𑐠𑐾𑑄 𑐏𑑅 𑐣𑐾𑐰𑐵𑑅𑐟 𑑋 𑐮𑑂𑐫𑐹𑐣𑐾 𑐀𑐥𑐵𑑄 𑐕𑑂𑐫𑐵𑐣𑐵𑑅 𑐩𑐬𑐶𑐎𑐳𑐶 𑐟𑐕𑑂𑐫𑐵𑐳𑐶𑐣𑐶 𑐨𑐮𑐶𑐫𑐵𑑄 𑐠𑑅𑐟 𑐢𑑂𑐰𑑄𑐮𑐵𑑅𑐐𑐸 𑐖𑐎 𑐩𑐏𑐸 𑐩𑑂𑐴 𑐕𑐩𑑂𑐴𑑄 𑐣𑐰𑐫𑑂𑐎𑑅 𑐳𑑁𑐏𑐶𑑄 𑐮𑐸𑐣𑐵𑐧𑑂𑐫𑐹𑐐𑐸 𑐏𑐣𑐷 𑑋
𑐩𑐣𑐹𑐫𑐵𑐐𑐸 𑐩𑑂𑐴𑐳𑐷𑐎𑐵 𑐢𑐫𑐵𑐐𑐸 𑐴𑐾 𑐰𑐫𑐵𑐐𑐸 𑐳𑑄𑐳𑑂𑐎𑐺𑐟𑐶 𑐐𑐸𑐎𑐶𑐫𑐵𑐟 𑐖𑐷𑐰𑐣 𑐥𑐡𑑂𑐢𑐟𑐶 𑐢𑐵𑐂 𑑋 𑐳𑑄𑐳𑑂𑐎𑐺𑐟𑐶 𑐢𑐫𑐵𑐐𑐸 𑐖𑐷𑐰𑐣 𑐴𑐣𑐾𑐐𑐸 𑐕𑐐𑐹 𑐥𑐴𑑅𑐔𑐴𑑅 𑑋 𑐡𑐬𑑂𑐱𑐣𑐫𑐵 𑐕𑑂𑐫𑐮𑐵𑐧𑐸𑐮𑐵 𑐢𑐫𑐵𑐐𑐸 𑐴𑐾 𑐳𑑄𑐳𑑂𑐎𑐺𑐟𑐶 𑑋 𑐳𑑄𑐳𑑂𑐎𑐺𑐟𑐶 𑐩𑐡𑐸𑐩𑑂𑐴 𑐩𑐣𑐹𑐫𑐵𑐎𑐾 𑐕𑐸𑑄 𑐡𑐿𑐩𑐏𑐸 𑑋 𑐣𑐫𑐾𑐟𑑂𑐰𑐣𑐾𑐟 𑐎𑐩𑐫𑑂 𑐫𑐵𑐫𑐾𑐐𑐸 𑑋 𑐟𑑂𑐫𑐵𑐣𑐸 𑐮𑑄𑐎𑐾𑐟 𑐡𑑂𑐫𑐣𑐾𑐐𑐸 𑑋 𑐴𑐣𑐵𑐰𑐣𑐵 𑐟𑐫𑐾𑐩𑑂𑐰𑐵𑑅 𑑋 𑐣𑐏𑑅𑐔𑐏𑑅 𑐣𑑄 𑐴𑐣𑐾𑐩𑑂𑐰𑐵𑑅 𑑋 𑐦𑐵𑑄 𑐣𑑅 𑐠𑐾𑑄 𑐣𑐫𑐾𑐐𑐸 𑑋 𑐨𑐮𑑂𑐫𑐵𑐟 𑐠𑐾𑑄 𑐡𑑂𑐫𑐣𑐾𑐐𑐸 𑑋 𑐳𑑄𑐳𑑂𑐎𑐺𑐟𑐶𑐫𑐵𑐐𑐸 𑐏𑐸𑐳𑐶𑐂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐢𑐬𑑂𑐩 𑐩𑐡𑐸𑐩𑑂𑐴𑐾𑐳𑐶𑐫𑐵 𑐳𑑄𑐳𑑂𑐎𑐺𑐟𑐶 𑐡𑐿𑐩𑐏𑐸 𑑋 𑐣𑐾𑐰𑐵𑑅 𑐢𑐬𑑂𑐩 𑐡𑐸𑐐𑐸𑐮𑐶𑑄 𑐴𑐾 𑐳𑐩𑐫, 𑐩𑑀𑐴𑐣𑐷–𑐳𑐶𑐣𑑂𑐴𑑅 𑐩𑐣𑑂𑐡𑑅, 𑐳𑐐𑑄𑐫𑐵𑐐𑐸 𑐳𑑄𑐳𑑂𑐎𑐺𑐟𑐶 𑐡𑐸𑐐𑐸 𑐏𑑅 𑑋 𑐠𑐵𑐫𑑂𑐨𑐹, 𑐡“𑐫𑑂 𑐥𑑁, 𑐡𑐹𑐦𑐵𑐒𑑂𑐐𑐵, 𑐟𑐸𑐟𑐶 𑐰𑐐𑐷𑑅 𑐥𑐸𑐟𑐸 𑐐𑑂𑐰𑐫𑑂, 𑐩𑐵𑑅𑐐𑐸 𑐏𑑅 𑑋 𑐀𑐠𑐾𑐴𑐾 𑐟𑑂𑐰𑐵𑑅𑐡𑐾𑐧𑐵𑑅, 𑐳𑐸𑐎𑐸𑐣𑑂𑐡𑐵, 𑐎𑐮𑑅, 𑐮𑐵𑐏𑐵 𑐧𑐵𑐚𑐵, 𑐐𑑂𑐰𑐫𑑂𑐧𑐵𑐚𑐵, 𑐠𑐵𑐫𑑂𑐨𑐹, 𑐥𑐶𑐔𑐵, 𑐢𑐵𑐮𑑂𑐔𑐵, 𑐩𑐵𑐎𑑅𑐳𑐶, 𑐳𑐶𑐣𑑂𑐴𑑅𑐩𑐹, 𑐖𑑂𑐰𑐮𑐵𑐣𑑂𑐴𑐵𑐫𑑂𑐎𑑄, 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐰𑐮𑑄 𑑋 𑐩𑐔𑐵𑐧𑐸𑐫𑐵𑑅 𑐥𑐶 𑐢𑑂𑐫𑐣𑐾𑐐𑐸 𑐣𑐶𑐳𑐾𑑄 𑐖𑑂𑐫𑐵𑑅𑐖𑑄𑐎𑑂𑐰𑐟𑐎𑑄 𑐴𑐵𑐣𑑄 𑐳𑐷𑐢𑐸𑑄𑐎𑐵𑑅 𑐟𑐎𑑄 𑐣𑐾𑐰𑐵𑑅 𑐎𑐬𑑂𑐩𑐎𑐵𑐞𑑂𑐜 𑐰 𑐬𑐶𑐟𑐶𑐠𑐶𑐟𑐶 𑐴𑐣𑐵𑐰𑐣𑐵 𑐕𑐸𑑄 𑐕𑐐𑐹𑐣𑑄 𑐳𑐸𑑄𑐮𑐶𑐳𑐾 𑐖𑑂𑐰𑑅𑐩𑐮𑐵𑑅 𑑋 𑐣𑐾𑐰𑐵𑑅𑐟 𑐴𑐶𑐣𑑂𑐡𑐹 𑐰𑐵 𑐧𑑁𑐡𑑂𑐢 𑐢𑐵𑐫𑐾𑐟 𑐨𑐔𑐵 𑐩𑐕𑐵𑐮𑐾 𑐩𑐵𑑅𑐐𑐸 𑐏𑑅 𑑋 𑐣𑐾𑐰𑐵𑑅𑐟 𑐳𑐶𑐣𑑂𑐴𑐵𑐫𑑂 𑐎𑐬𑐎𑐶𑐳𑑄 𑐕𑐸𑐣𑐵𑐧𑑂𑐫𑐹𑐐𑐸 𑐣𑑂𑐴𑐵𑐫𑑂 𑐧𑑂𑐰𑐫𑐵𑐖𑑂𑐰𑐷𑐥𑐶𑑄 𑐢𑐵𑐫𑐾𑐐𑐸 𑐥𑐵𑐫𑑂𑐕𑐶 𑐖𑑂𑐰𑐷 𑑋 𑐣𑐾𑐰𑐵𑑅𑐟𑐫𑑂 𑐦𑐸𑐎 𑐳𑑄𑐳𑑂𑐎𑐵𑐬 𑐎𑐟𑐵𑑄𑐩𑐬𑐶 𑐩𑑂𑐴𑐶𑐟𑐾 𑐠𑐾𑑄 𑐩𑐫𑐮𑐎𑐶 𑐩𑑂𑐴𑐵𑐮𑑄𑐡𑑂𑐫𑑅 𑐢𑐵𑐫𑐾𑐩𑐡𑐸 𑑋 𑐳𑑄𑐳𑑂𑐎𑐺𑐟𑐶 𑐡𑐸𑐣𑐾 𑐔𑑂𑐰𑑄𑐔𑑂𑐰𑑄𑐐𑐸 𑐡𑐵𑐬𑑂𑐱𑐣𑐶𑐎𑐟𑐵 𑐠𑐸𑐮𑐎𑐶 𑐩𑐣𑐹𑐏𑑄 𑐠𑑅𑐫𑐵𑐟 𑐩𑑂𑐴𑐳𑐷𑐎𑐷 𑑋
𑐡𑐳𑐸𑐫𑐵 𑐮𑐵𑐐𑐶 – 𑐁𑐐𑑄𑐥𑐸𑐖𑐵 𑐰 𑐩𑑂𑐴𑐥𑐸𑐖𑐵 𑐣𑐾𑐰𑐵𑑅𑐟𑐫𑑂𑐐𑐸 𑐟𑑅𑐢𑑄𑐐𑐸 𑐡𑐵𑐬𑑂𑐱𑐣𑐶𑐎 𑐀𑐣𑐸𑐳𑑂𑐠𑐵𑐣 𑐏𑑅 𑑋 𑐠𑑂𑐰 𑐣𑐶𑐐𑐹 𑐖𑑂𑐰𑑅𑐐𑐸 𑐩𑐾𑐐𑐸 𑐟𑑅𑐢𑑄𑐐𑐸 𑐣𑐾𑐰𑐵𑑅 𑐢𑐵𑐬𑑂𑐩𑐶𑐎 𑐀𑐣𑐸𑐳𑑂𑐠𑐵𑐣 𑐩𑐡𑐸 𑑋 𑐡𑐾𑐏𑐵 𑐡𑐸𑐥𑐶𑑄 𑐖𑐎 𑐕𑐠𑐵𑐳𑑄 𑐔𑑂𑐰𑐣𑐵𑑅 (𑐁𑐐𑑄 𑐎𑑀𑐠𑐵𑐫𑑂) 𑐠𑑅 𑐢𑐫𑐵𑐩𑑂𑐴 𑐳𑐸 𑐩𑑂𑐴𑐳𑐷𑐎𑐾𑐐𑐸 𑐰𑐶𑐢𑐶𑐴𑐾 𑐡𑐾𑐏𑐵 𑐢𑐵𑐂 𑑋 𑐁𑐟𑑂𑐩 𑐀𑐣𑐸𑐳𑑄𑐢𑐵𑐣𑐫𑐵 𑐠𑑂𑐰 𑐰𑐶𑐢𑐶 𑐣𑑂𑐴𑐶𑑄𑐣𑑂𑐴𑐶𑑄 𑐀𑐨𑑂𑐫𑐵𑐳𑑄 𑐳𑐶𑐡𑑂𑐢𑐶 𑐥𑑂𑐬𑐵𑐥𑑂𑐟 𑐫𑐵𑐣𑐵𑑅 𑐠𑑅 𑐴𑐾 𑐡𑑂𑐫𑑅 𑐖𑐸𑐂𑐥𑐶𑑄 𑐳𑐸𑐫𑐵𑐐𑐸𑑄 𑐱𑐬𑐞𑐫𑑂 𑐰𑐣𑐾𑐩𑑂𑐰𑐵𑑅 𑑋 𑐁𑐐𑐩𑐫𑑂 𑐕𑐎𑐹 𑐎𑐵𑐥𑑅 𑐳𑐶𑐰𑐵𑐫𑑂 𑐡𑑂𑐫𑑅𑐫𑐵𑐐𑐸 𑐩𑐹𑐬𑑂𑐟𑐶 𑐩𑐡𑐸 𑐢𑐵𑐂 𑑋
𑐣𑐾𑐰𑐵𑑅𑐟 𑐳𑐎𑐳𑐶𑐣𑑄 𑐡𑐾𑐏𑐵 𑐎𑐵𑐫𑐾𑐩𑐵𑑅 𑐢𑐫𑐵𑐐𑐸 𑐩𑐡𑐸 𑑋 𑐦𑐸𑐩𑑂𑐴𑐳𑐶𑐣𑑄 𑐖𑐎 𑐎𑐵𑐫𑐾𑐐𑐸 𑐰 𑐦𑐸𑐩𑑂𑐴𑐾𑐳𑐶𑐟 𑐖𑐎 𑐧𑐷𑐐𑐸 𑐡𑐾𑐏𑐵 𑐣𑐵𑐳𑑀 𑐖𑐎 (𑐳𑐸𑐫𑐵𑐐𑐸𑑄 𑐳𑐬𑑂𑐰𑐾 𑐩𑐏𑐸) 𑐏𑑅 𑑋 𑐡𑐾𑐏𑐵 𑐎𑐫𑐵𑑅𑐣𑑄 𑐮𑐶𑐟𑐧𑐷 𑐖𑑂𑐫𑐹 𑐟𑐬 𑐡𑐾𑐏𑐵 𑐮𑐶𑐟 𑐩𑐧𑐷𑐎𑑄 𑐩𑐣𑑂𑐟 𑐢𑐵𑑅𑐳𑐵𑑄 𑐳𑐷𑐢𑐸𑑄𑐎𑐵𑑅𑐳𑐵𑑄 𑐮𑐶𑐟 𑐧𑐷𑐩𑐵𑑅 𑑋 𑐢𑐬𑑂𑐩, 𑐡𑐬𑑂𑐱𑐣, 𑐖𑑂𑐘𑐵𑐣 𑐩𑐣𑐹𑐟𑐫𑑂𑐐𑐸 𑐰𑑂𑐫𑐎𑑂𑐟𑐶𑐐𑐟 𑐳𑑄𑐥𑐟𑑂𑐟𑐶 𑐩𑐏𑐸 𑐢𑐫𑐵𑐐𑐸 𑐠𑐸𑐎𑐾𑑄 𑐎𑑂𑐫𑑄 𑑋 𑐠𑑂𑐰 𑐠𑑅 𑐰 𑐎𑐟𑑅𑐫𑐵 𑐨𑐶𑑄𑐫𑐵 𑐮𑐵𑐐𑐶 𑐕𑑂𑐫𑐮𑐾𑐐𑐸 𑐏𑑅 𑑋 𑐠𑑂𑐰 𑐢𑐬𑑂𑐩𑐫𑐵𑐐𑐸 𑐁𑐡𑐬𑑂𑐱 𑐩𑐠𑐸𑐫𑐵𑑅 𑐴𑐾 𑐖𑐸𑐂𑐩𑐵𑑅 𑐩𑑄𑐟𑑂𑐬𑐫𑐵𑐟 𑐏𑐸𑐫𑐵𑐴𑑅𑐐𑐸 𑐢𑐣𑐠𑐾𑑄 𑐳𑐸𑐔𑐸𑐎𑐵 𑐟𑐮 𑑋
𑐡𑐾𑐏𑐵 (𑐩𑑄𑐟𑑂𑐬) 𑐳𑐸𑐫𑐵𑐟𑑄 𑐎𑐣𑐎𑐶 𑐥𑐵𑐥𑐮𑐵𑐂 𑐢𑐎𑐵𑑅 𑐏𑑂𑐫𑐵𑐔𑑂𑐰𑑅 𑐧𑐶𑐫𑐵𑐟𑑅𑐐𑐸𑐮𑐶𑑄 𑐎𑐬𑐥𑐶𑑄𑐳𑑄 𑐟𑐵𑐫𑑂 𑐩𑐡𑐾𑐫𑑂𑐎, 𑐏𑐣𑐾𑐩𑐡𑐾𑐫𑑂𑐎 𑐔𑑂𑐰𑐣𑐵𑑅 𑐀𑐨𑑂𑐫𑐵𑐳 𑐫𑐵𑐂𑐐𑐸 𑐖𑑂𑐰𑐷𑐩𑐵𑑅 𑑋 𑐰𑐵𑐫𑑂 𑐔𑐶𑐟𑑂𑐟 𑐊𑐎𑐵𑐐𑑂𑐬𑐫𑐵 𑐮𑐵𑐐𑐶 𑐣𑑄 𑐠𑐠𑐾 𑐫𑐵𑑅𑐐𑐸 𑐖𑑂𑐰𑐷𑐦𑐸 𑑋 𑐎𑐬𑐎𑐶𑐐𑐸 𑐢𑐬𑑂𑐩 𑐎𑐫𑑂𑐔𑑂𑐫𑐵𑐣𑐵 𑐔𑑂𑐰“𑐟𑐮𑐾 𑐰 𑐢𑐬𑑂𑐩𑐫𑐵𑐩𑑂𑐴 𑐐𑐸𑐬𑐸 𑐥𑐸𑐬𑑀𑐴𑐶𑐟𑐣𑑄 𑐩𑐵𑐮𑐵𑐴𑐾 𑐔𑑂𑐰𑐣𑐷 𑑋 𑐣𑐾𑐰𑐵𑑅 𑐢𑐬𑑂𑐩𑐫𑑂 𑐐𑐸𑐬𑐸 𑐥𑐸𑐬𑑀𑐴𑐶𑐟𑐫𑐵𑐐𑐸 𑐠𑐵𑐫𑑂𑐩𑐡𑐸 𑐢𑐫𑐵𑐐𑐸 𑐡𑐳𑐸 – 𑐩𑑀𑐴𑐣𑐷, 𑐩𑑂𑐴𑐥𑐸𑐖𑐵, 𑐩𑐵𑑄 𑐰 𑐀𑐧𑐸𑐫𑐵𑐐𑐸 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸 𑐠𑐖𑑅𑐐𑐸 𑐟𑑅𑐢𑑄𑐐𑐸 𑐣𑐏𑐮𑐫𑑂 𑐐𑐸𑐬𑐸 𑐥𑐸𑐬𑑀𑐴𑐶𑐟 𑐩𑑂𑐰𑐵𑑅 𑑋

𑐩𑑂𑐴𑐥𑐸𑐖𑐵 𑐣𑐾𑐰𑐵𑑅𑐟𑐫𑑂𑐐𑐸 𑐡𑐎𑐳𑐶𑐰𑐾𑐫𑑂 𑐟𑑅𑐢𑑄𑐐𑐸 𑐣𑐏𑑅 𑐏𑑅 𑑋 𑐄𑐎𑐸𑐣𑑂𑐴𑐸 𑐳𑐸𑐠𑐫𑑂 𑐣𑐷𑐳𑐷 𑐫𑐵𑐣𑐵𑑅 𑐩𑐣𑑂𑐡𑑅 𑐣𑑂𑐴𑑂𑐫𑑅𑐣𑐾 𑐦𑑂𑐫𑐟𑐸𑐣𑐵𑑅 𑐩𑑂𑐴𑑄 𑐁𑐟𑑂𑐩𑐫𑐵𑐟 𑐀𑐮𑐐 𑐩𑐣𑑂𑐡𑐮𑐫𑑂 𑐥𑐮𑐶𑐳𑑂𑐠𑐵 𑐫𑐵𑐣𑐵𑑅 𑐠𑑅𑐟 𑐩𑑂𑐴𑐳𑐷𑐎𑐾𑐐𑐸 𑐎𑐸𑐟𑑅𑐫𑐵𑐂 𑑋 𑐖𑐶 𑐢𑐵𑑅𑐩𑑂𑐴 𑐳𑐸 ? 𑐖𑐶𑐐𑐸 𑐎𑐬𑑂𑐟𑐰𑑂𑐫 (𑐩𑐹𑐖𑑂𑐫𑐵) 𑐕𑐸 𑐖𑑂𑐰𑐷𑐩𑐵𑑅 ? 𑐖𑐶𑐐𑐸 𑐁𑐖𑐸 𑐐𑐣 ? 𑐠𑑅 𑐡𑐸𑐣𑐾 𑐴𑐾 𑐣𑑂𑐴𑑂𑐫𑐳𑑅 𑐮𑑂𑐰𑐷𑐎𑐾𑐐𑐸 𑐀𑐨𑑂𑐫𑐵𑐳 𑐴𑐾 𑐩𑑂𑐴𑐥𑐸𑐖𑐵 𑐏𑑅 𑐮𑐵 ? 𑐀𑐠𑐾𑐴𑐾 𑐰𑑄𑐐𑐸 𑐡“𑐫𑑂 𑐠𑑅𑐩𑑂𑐴 𑐎𑑂𑐰𑑅𑐕𑐶𑐣𑐵𑐐𑐸 𑐖𑑂𑐫𑐵 𑐥𑐹𑐰𑑄 𑐩𑐰𑑄 𑐩𑐹𑐮𑑂𑐫𑐵𑑄𑐎𑐣 𑐫𑐵𑐣𑐵𑑅 𑐰𑐿𑐐𑐸 𑐡“𑐫𑑂 𑐫𑐵𑐫𑐾𑐩𑐵𑑅𑐐𑐸 𑐖𑑂𑐫𑐵 𑐎𑑂𑐰𑑅𑐕𑐷𑐐𑐸 𑐏𑑅𑐮𑐵 ? 𑐠𑐸𑐖𑑂𑐰𑑅𑐐𑐸 𑐴𑐾 𑐁𑐢𑑂𑐫𑐵𑐟𑑂𑐩𑐶𑐎 𑐀𑐨𑑂𑐫𑐵𑐳 𑐢𑐸𑐣𑐾𑐰𑑄 𑐩𑐣𑑂𑐡𑐮𑐫𑑂 𑐥𑐮𑐶𑐳𑑂𑐠𑐵 𑐫𑐵𑐣𑐵𑐟𑑅𑐩𑑂𑐴 𑐁𑐟𑑂𑐩𑐟𑐟𑑂𑐰𑐫𑐵𑐟 𑐳𑐐𑑄 𑐧𑐶𑐫𑐵𑑅 𑐣𑑂𑐴𑐵𑐥𑐵𑑄𑐐𑐸 𑐠𑐵𑐳𑐫𑑂 𑐟𑐫𑐾 𑐢𑐸𑐣𑐎𑐶 𑐩𑑂𑐴𑐥𑐸𑐖𑐵𑐫𑐵 𑐰𑐶𑐢𑐶 𑐎𑑂𑐰𑐔𑐵𑐂 𑐢𑐵𑑅𑐐𑐸 𑐣𑑄 𑐣𑑂𑐫𑐣𑐵 𑑋 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐱𑑂𑐬𑑀𑐟 𑐩𑐾𑐐𑐸 𑐩𑐏𑐸 𑐣𑐾𑐰𑐵𑑅 𑐢𑐬𑑂𑐩 𑐴𑐾 𑐏𑑅 𑐢𑐵𑐫𑐾𑐟 𑐠𑐵𑐎𑐸𑐂 𑐩𑑂𑐰𑐵𑑅 𑑋
𑐠𑑅𑐐𑐸 𑐴𑐾 𑐢𑐬𑑂𑐩 (𑐡𑐬𑑂𑐱𑐣), 𑐳𑑄𑐳𑑂𑐎𑐺𑐟𑐶 (𑐖𑐷𑐰𑐣 𑐴𑐣𑐾𑐐𑐸 𑐥𑐡𑑂𑐢𑐟𑐶 𑐰𑐵 𑐁𑐢𑑂𑐫𑐵𑐟𑑂𑐩𑐶𑐎 𑐳𑐶𑐡𑑂𑐢𑐵𑐣𑑂𑐟𑐫𑐵 𑐕𑐾𑐮𑐵𑐧𑐸𑐮𑐵), 𑐨𑐵𑐫𑑂 (𑐣𑐸𑐐𑐮𑐫𑑂 𑐧𑐵𑐮𑐷𑐐𑐸 𑐏“ 𑐥𑑂𑐰𑑄𑐎𑐾𑐐𑐸 𑐩𑐵𑐢𑑂𑐫𑐩), 𑐮𑐶𑐥𑐶
(𑐨𑐵𑐫𑑂𑐫𑐵𑐐𑐸 𑐳𑐵𑑄𑐎𑐾𑐟𑐶𑐎 𑐔𑐶𑑄) 𑐣𑐸𑐐𑑅 𑐏“ 𑐁𑐏𑐮𑑄 𑐣𑐰𑐵𑐎𑐾𑐐𑐸 (𑐳𑐵𑐴𑐶𑐟𑑂𑐫) 𑐎𑐶𑐥𑐵 𑐔𑑂𑐰𑐫𑐵𑑅 𑐰𑐵 𑐎𑐶𑐥𑐵 𑐧𑑂𑐰𑐫𑐾𑐐𑐸 𑐎𑐮𑐵, 𑐣𑐸𑐐𑑅 𑐡𑐸𑐣𑐾 𑐠𑑂𑐰𑐫𑐵𑐔𑑂𑐰𑑄𑐐𑐸 𑐳𑑅𑐫𑐵𑐟 𑐨𑐵𑐰𑑄 𑐧𑑂𑐫𑐎𑑂𑐟 𑐫𑐵𑐫𑐾𑐐𑐸 𑐣𑐺𑐟𑑂𑐫, 𑐳𑑄𑐐𑐷𑐟, 𑐄𑐎𑐾𑐫𑐵𑐟 𑐖𑑂𑐰𑑅𑐮𑐵𑑅𑐐𑐸 𑐧𑐵𑐖𑑄 𑐖𑑂𑐰𑐮𑑄𑐫𑐵 𑐮𑐶𑐳𑐾𑑄 𑐠𑑅𑐟 𑐩𑐵𑑅𑐐𑐸 𑐳𑐷𑐥 𑐰 𑐖𑐣𑐱𑐎𑑂𑐟𑐶 𑐡𑐸𑐥𑐶𑑄 𑐣𑐾𑐰𑐵𑑅𑐟 𑐐𑐸𑐐𑐸𑑄 𑐂𑐮𑐫𑑂 𑐬𑐵𑐲𑑂𑐚𑑂𑐬, 𑐬𑐵𑐖𑑂𑐫 𑐏𑑅 𑑋 𑐬𑐵𑐖𑑂𑐫 𑐩𑐡𑐸𑐳𑐵𑑄 𑐣𑐾𑐰𑐵𑑅 𑐬𑐵𑐲𑑂𑐚𑑂𑐬 𑐏𑑅 𑐢𑐎𑐵𑑅 𑐣𑐾𑐰𑐵𑑅𑐟𑐳𑐾𑑄 𑐠𑑅𑐫𑐵𑐟 𑐩𑑂𑐴𑐳𑐷𑐎𑐾 𑐩𑐦𑐸𑐳𑐵𑑄 𑐣𑐵𑑄𑐖𑐵𑑅𑐩𑑂𑐴 𑐳𑐩𑐵𑐖𑐱𑐵𑐳𑑂𑐟𑑂𑐬𑐷 𑐰 𑐩𑐵𑐣𑐰𑐱𑐵𑐳𑑂𑐟𑑂𑐬𑐷 𑐜𑑀𑐬𑐧𑐴𑐵𑐡𑐸𑐬 𑐰𑐶𑐲𑑂𑐚, 𑐂𑐟𑐶𑐴𑐵𑐳𑐎𑐵𑐬 𑐡𑐶𑐮𑑂𑐮𑐷𑐬𑐩𑐞 𑐬𑐾𑐐𑑂𑐩𑐷𑑄 𑐣𑐾𑐰𑐵𑑅 𑐬𑐵𑐲𑑂𑐚𑑂𑐬 𑐢𑐎𑐵𑑅 𑐣𑐾𑐰𑐵𑑅𑐟𑐫𑑂𑐟 𑐩𑑂𑐴𑐳𑐷𑐎𑐵 𑐧𑐶𑐮 𑑋 𑐣𑐾𑐰𑐵𑑅𑐟𑐳𑐾𑑄 𑐐𑐸𑐧𑐮𑐫𑑂𑐟𑐎 𑐠𑑅𑐟 𑐩𑑂𑐴𑐳𑐷𑐎𑐾𑐐𑐸 𑐎𑐸𑐟𑑅 𑐫𑐵𑐂𑐩𑐏𑐸 𑐄𑐧𑐮𑐫𑑂𑐟𑐎 𑐱𑐿𑐰𑐷, 𑐰𑐿𑐲𑑂𑐞𑐰𑐷, 𑐖𑐿𑐣, 𑐩𑐴𑐵𑐫𑐵𑐣𑐷, 𑐰𑐖𑑂𑐬𑐫𑐵𑐣𑐷, 𑐟𑑄𑐟𑑂𑐬𑐫𑐵𑐣𑐷, 𑐠𑐾𑐬𑐰𑐵𑐡𑐷, 𑐠𑐷 𑐠𑐷 𑐢𑐬𑑂𑐩 𑐮𑑂𑐰𑐵𑐎𑐖𑑂𑐫𑐵𑑅𑐐𑐸 𑐎𑑂𑐰𑐵𑑅𑐑𑐵𑐳𑐵 𑐠𑐾𑑄 𑐖𑐸𑐫𑐵𑐔𑑂𑐰𑐣𑐷 𑑋 𑐠𑑅𑐐𑐸 𑐑𑐵𑐳𑐵𑐫𑐵𑐐𑐸 𑐧𑐶𑐳𑑂𑐎𑑄𑐐𑐸 𑐳𑐰𑐵𑑅 𑐎𑐵𑐫𑐾 𑐳𑐂𑐩𑐏𑐸 𑑋