𑐏𑑂𑐰𑐥𑐫𑐵 𑐩𑐾𑐢𑐵 𑐩𑐵𑐰𑐶 𑐄𑐟𑑂𑐎𑐺𑐲𑑂𑐚 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫

𑐏𑑂𑐰𑐥 – 𑐱𑐶𑐎𑑂𑐲𑐵 𑐰𑐶𑐖𑑂𑐘𑐵𑐣 𑐟𑐠𑐵 𑐥𑑂𑐬𑐰𑐶𑐢𑐶 𑐩𑐣𑑂𑐟𑑂𑐬𑐵𑐮𑐫𑐫𑐵 𑐰𑐵𑐬𑑂𑐲𑐶𑐎 𑐩𑐹𑐮𑑂𑐫𑐵𑑄𑐎𑐣𑐫𑑂 𑐠𑐣𑐫𑐵 𑐟𑐾𑐏𑐵𑐥𑐸𑐮𑐶𑐂 𑐔𑑂𑐰𑑄𑐐𑐸 𑐩𑐾𑐢𑐵 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫 𑐡𑐾𑐫𑑂𑐫𑐵 𑐴𑐾 𑐄𑐟𑑂𑐎𑐺𑐲𑑂𑐚 𑐰𑐶𑐡𑑂𑐫𑐵𑐮𑐫 𑐖𑐸𑐂𑐟 𑐳𑐦𑐮 𑐖𑐹𑐐𑐸 𑐡𑐸 𑑋 𑐩𑐣𑑂𑐟𑑂𑐬𑐵𑐮𑐫𑑄 𑐫𑐵𑑅𑐐𑐸 𑐰𑐵𑐬𑑂𑐲𑐶𑐎 𑐩𑐹𑐮𑑂𑐫𑐵𑑄𑐎𑐣𑐫𑑂 𑐩𑐾𑐢𑐵 𑐩𑐵𑐰𑐶 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐥𑐵𑐏𑐾 𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑐰𑐶𑐡𑑂𑐫𑐵𑐮𑐫𑐩𑐢𑑂𑐫𑐾 𑐄𑐟𑑂𑐎𑐺𑐲𑑂𑐚 𑐖𑐸𑐂𑐟 𑐳𑐦𑐮 𑐖𑐹𑐐𑐸 𑐏𑑅 𑑋

𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫 𑐀𑐣𑑂𑐟𑐬𑑂𑐐𑐟𑐫𑐵 𑐱𑐶𑐎𑑂𑐲𑐵 𑐟𑐠𑐵 𑐩𑐵𑐣𑐰 𑐱𑑂𑐬𑑀𑐟 𑐰𑐶𑐎𑐵𑐳 𑐎𑐾𑐣𑑂𑐡𑑂𑐬 𑐳𑐵𑐣𑑀 𑐠𑐶𑐩𑐶𑐫𑐵𑐎𑐠𑑄 𑐡𑐾𑐫𑑂𑐫𑐵 𑐴𑐾 𑐄𑐟𑑂𑐎𑐺𑐲𑑂𑐚 𑐰𑐶𑐡𑑂𑐫𑐵𑐮𑐫 𑐖𑐸𑐂𑐟 𑐳𑐦𑐮 𑐩𑐾𑐢𑐵 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑐵𑐟 𑑔𑑐 𑐎𑑂𑐰𑑅𑐐𑐸 𑐬𑐵𑐲𑑂𑐚𑑂𑐬𑐶𑐫 𑐱𑐶𑐎𑑂𑐲𑐵 𑐡𑐶𑐰𑐳 𑐰 𑑕𑑓 𑐎𑑂𑐰𑑅𑐐𑐸 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐵𑐎𑑂𑐲𑐬𑐟𑐵 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐮𑐵𑐎𑐵𑑅 𑐥𑐸𑐬𑐳𑑂𑐎𑐺𑐟 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐩𑐣𑑂𑐟𑑂𑐬𑐵𑐮𑐫𑑄 𑐫𑐵𑑅𑐐𑐸 𑐩𑐹𑐮𑑂𑐫𑐵𑑄𑐎𑐣𑐫𑑂 𑐩𑐾𑐢𑐵 𑐩𑐵𑐰𑐶𑑄 𑐎𑐸𑐮 𑑙𑑐 𑐡𑐱𑐩𑐮𑐰 𑑑 𑐀𑑄𑐎 𑐴𑐫𑐵𑑅 𑐣𑑂𑐴𑐵𑐥𑐵𑑄𑐐𑐸 𑐠𑐵𑐳𑐫𑑂 𑐮𑐵𑐫𑐾𑐟 𑐳𑐦𑐮 𑐖𑐹𑐐𑐸 𑐏𑑅 𑑋

𑐣𑐶𑐐𑐹𑐐𑐸 𑐠𑐵𑐳𑐫𑑂 𑐐𑐸𑐮𑑂𑐩𑐷𑐂 𑐔𑑂𑐰𑑄𑐐𑐸 𑐬𑐾𑐳𑐸𑑄𑐐𑐵 𑐩𑐵𑐰𑐶 𑐮𑐵𑑅𑐐𑐸 𑐡𑐸 𑑋 𑐬𑐾𑐳𑐸𑑄𑐐𑐵𑑄 𑑘𑑖 𑐡𑐱𑐩𑐮𑐰 𑑓𑑔 𑐀𑑄𑐎 𑐴𑑅𑐐𑐸 𑐏𑑅𑐳𑐵 𑐫𑐾𑑃𑐫𑐵 𑐮𑑂𑐴𑐸𑐟𑐶𑐂 𑐔𑑂𑐰𑑄𑐐𑐸 𑐟𑐬𑐸𑐞 𑐩𑐵𑐰𑐶 𑑘𑑖 𑐡𑐱𑐩𑐮𑐰 𑑓𑑒 𑐀𑑄𑐎 𑐴𑐫𑐵𑑅 𑐳𑑂𑐰𑑄𑐐𑐹𑐐𑐸 𑐠𑐵𑐳𑐫𑑂 𑐮𑐵𑐫𑐾𑐟 𑐳𑐦𑐮 𑐖𑐹𑐐𑐸 𑐡𑐸 𑑋 𑐩𑐾𑐏𑐾 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐥𑐵𑐏𑐾 𑐬𑐶𑐮𑐵𑐫𑐣𑑂𑐳 𑐂𑐣𑑂𑐚𑐬𑐣𑐾𑐱𑐣𑐮 𑐊𑐎𑐾𑐡𑐾𑐩𑐶 𑐎𑐥𑐣 𑐣𑑂𑐴𑐵𑐥 𑐮𑐵𑑅𑐐𑐸 𑐡𑐸𑐳𑐵 𑐣𑐶𑐐𑐹𑐐𑐸 𑐠𑐵𑐳𑐫𑑂 𑐣𑐾𑐥𑐵𑐮 𑐥𑑂𑐬𑐴𑐬𑐷 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫 𑐳𑐵𑑄𑐐𑐵 𑐰 𑐳𑑂𑐰𑑄𑐐𑐹𑐐𑐸 𑐠𑐵𑐳𑐫𑑂 𑐨𑑂𑐫𑐵𑐮𑐷 𑐨𑑂𑐫𑐹 𑐂𑑄𑐐𑑂𑐮𑐶𑐱 𑐳𑑂𑐎𑐸𑐮 𑐣𑑂𑐴𑐹 𑐧𑐵𑐣𑐾𑐱𑑂𑐰𑐬 𑐮𑐵𑑅𑐐𑐸 𑐡𑐸 𑑋

𑐩𑐣𑑂𑐟𑑂𑐬𑐵𑐮𑐫𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐥𑐵𑐏𑐾 𑐗𑐶𑐐𑐹 𑐟𑐐𑐶𑑄𑐫𑐵 𑐥𑐬𑐷𑐎𑑂𑐲𑐵𑐦𑐮 𑐰 𑐐𑐸𑑄𑐐𑐹 𑐟𑐐𑐶𑑄𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐬𑐖𑐶𑐲𑑂𑐚𑑂𑐬𑐾𑐱𑐣𑐫𑐵 𑐮𑐶𑐢𑑄𑐳𑐵𑐫𑑂 𑐩𑐹𑐮𑑂𑐫𑐵𑑄𑐎𑐣 𑐫𑐵𑑅𑐐𑐸 𑐏𑑅 𑑋
𑐩𑐵𑐢𑑂𑐫𑐩𑐶𑐎 𑐱𑐶𑐎𑑂𑐲𑐵 𑐄𑐟𑑂𑐟𑐷𑐬𑑂𑐞 𑐥𑐬𑐷𑐎𑑂𑐲𑐵𑐥𑐵𑐏𑐾 𑐗𑐶𑑄𑐣𑐶𑐐𑐹 𑐟𑐐𑐶𑑄 𑐟𑐎 𑐳𑑄𑐔𑐵𑐮𑐣 𑐖𑐹𑐐𑐸 𑐰𑐶𑐡𑑂𑐫𑐵𑐮𑐫𑐫𑑂 𑐥𑑀𑐏𑐬𑐵𑐫𑐵 𑐀𑐩𑐬𑐳𑐶𑑄𑐴 𑐩𑐵𑐰𑐶, 𑐩𑑀𑐬𑑄𑐐𑐫𑐵 𑐳𑐸𑐎𑐸𑐣𑐵 𑐩𑐵𑐰𑐶 𑐰 𑐥𑐬𑑂𑐰𑐟𑐫𑐵 𑐨𑐰𑐵𑐣𑐷 𑐰𑐶𑐡𑑂𑐫𑐵𑐥𑐷𑐛 𑐕𑐳𑐶𑐎𑐠𑑄 𑐣𑑂𑐴𑐵𑐥, 𑐮𑐶𑐄 𑐰 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐡𑐸 𑑋