𑐐𑐵𑐩𑐵: 𑐨𑐵𑐫𑑂‌ 𑐳𑐫𑐾𑐎𑐾 𑐩𑐵𑐮

𑐣𑐾𑐰𑐵 𑐨𑐵𑐫𑑂‌𑐫𑐵 𑐎𑐔𑐵 𑐩𑐔𑐵 𑐠𑐸𑐮𑐶 𑐟𑑅𑐩𑐶 𑐢𑐎𑐵: 𑐳𑐎𑐳𑐶𑐣𑑄 𑐩𑐳𑑂𑐫𑐸𑐐𑐮𑐶𑑄 𑐣𑐾𑐰𑐵: 𑐧𑐳𑑂𑐟𑐷 𑐮𑑂𑐴𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐐𑐵𑐩𑐵: 𑐨𑐵𑐫𑑂‌𑐫𑐵 𑐩𑐴𑐟𑑂𑐰 𑐩𑐳𑐶𑐫𑐵: 𑐐𑐵𑑄 𑐐𑐵𑑄 𑐫𑐵𑐥𑐶𑑄 𑐣𑐾𑐰𑐵𑑅𑐟 𑐱𑐴𑐬𑐫𑑂 𑐡𑐸𑐴𑐵 𑐰𑐿𑐧𑐮𑐫𑑂 𑐟𑐥𑑂𑐫𑑄𑐎 𑐴𑐾 𑐨𑐵𑐫𑑂‌ 𑐩𑐳: 𑐕𑐸 𑐫𑐵𑐣𑐵: 𑐏𑑃𑐫 𑐨𑐵𑐫𑑂‌ 𑐮𑑂𑐴𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵 𑐔𑑂𑐰𑐧𑑄𑐐𑐸 𑐟:𑐡𑑄 𑐡𑐫𑐾 𑐢𑐸𑑄𑐎𑐮 𑑋 𑐐𑐵‍𑑄 𑐐𑐵𑑄 𑐫𑐵𑐥𑐶𑑄 𑐩𑐣𑐹𑐟𑐫𑐸𑐳𑑄 𑐮𑑂𑐴𑐵𑐂𑐐𑐸 𑐨𑐵𑐫𑑂‌𑐫𑐵𑐟
𑐴𑐶𑐳𑑂𑐫𑐵𑐫𑐾𑐐𑐸 𑐱𑐴𑐬𑐫𑐵𑐥𑐶𑑄 𑐣𑐾𑐰𑐵: 𑐟𑐫𑑂‌𑐳𑑄 𑐩𑐫𑐵𑑅𑐐𑐸 𑐖𑐹𑐳𑐵 𑐳𑐵𑐫𑐡 𑐴𑐾 𑐐𑐵𑑄 𑐫𑐵𑐥𑐶𑑄𑐳𑑄 𑐠𑑅𑐐𑐸 𑐨𑐵𑐫 𑐮𑑂𑐴𑐵𑐫𑐾𑐐𑐸 𑐩𑐟𑑂𑐰:𑐟𑐸𑐂𑐐𑐸 𑐖𑐸𑐃 𑑋 𑐠𑑂𑐰 𑐏𑑄 𑐳𑐵𑐩𑐵𑐖𑐶𑐎 𑐳𑑄𑐳𑑂𑐎𑐵𑐬𑐫𑑂 𑐖𑐎 𑐮𑐶𑐎𑐸𑐣𑐵 𑐔𑑂𑐰𑑄𑐐𑐸 𑐩𑐏𑐸𑐳𑐾 𑐨𑐵𑐲𑐶𑐎 𑐡𑐩𑐣 𑐰 𑐀𑐳𑐩𑐵𑐣𑐟𑐵 𑐣𑐵𑐥: 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐳𑐩𑐳𑑂𑐫𑐵 𑐏: 𑑋 𑐐𑐵𑑄 𑐐𑐵𑑄𑐫𑐵 𑐨𑐵𑐫𑑂‌𑐫𑐵 𑐩𑐴𑐟𑑂𑐰 𑐠𑐸𑐂𑐎𑐵 𑐰𑐷𑐐𑐸 𑐴𑐿 𑐠𑑂𑐰 𑐔𑑂𑐰𑐬𑐵𑐫𑐵 𑐩𑐹 𑐁𑐖𑑂𑐖𑐸 𑐏: 𑑋

𑐠𑐣 𑐗𑐷 𑐔𑑂𑐰𑐣𑐵 𑐔𑑂𑐰𑐣𑐵𑐐𑐸 𑐡𑐾 𑐀𑐩𑐾𑐬𑐶𑐎𑐵𑐫𑑂 𑐣 𑐐𑐵𑑄 𑐐𑐵𑑄𑐫𑐵 𑐨𑐵𑐫𑑂‌ 𑐮𑑂𑐴𑐵𑐂𑐥𑐶 𑐩𑐡𑐸𑐫𑐸 𑐩𑐏𑐸 𑐟𑐬 𑐂𑐥𑐶𑑄 𑐠: 𑐴𑐾 𑐩𑐕𑐵: 𑐥𑐴: 𑐫𑐵𑐣𑐵 𑐎𑐫𑐣𑐷𑐐𑐸𑐮𑐶𑑄 𑐂𑐩𑐶𑐳𑑄 𑐮𑑂𑐴𑐵𑐂𑐐𑐸 𑐨𑐵𑐫𑑂 𑐟𑑂𑐰𑐦𑑂𑐫𑐹 𑐦𑑂𑐫𑐹𑑄 𑐰𑐣𑐵 𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐴𑐿 𑐟𑐣𑐵 𑐰𑐣𑐵 𑐔𑑂𑐰𑑄𑐐𑐸 𑐐𑐵𑐩𑐵: 𑐨𑐵𑐫𑑂‌𑐫𑐵 𑐩𑐴𑐟𑑂𑐰𑐫𑐵𑐟 𑐎𑐸𑐟𑐸 𑐎𑐸𑐮𑐵: 𑐣𑑂𑐴𑑀𑐧𑑂𑐧𑐫𑐾 𑐑𑐎𑐵: 𑐩𑐣𑑄𑐟𑐸𑐣𑐵: 𑐣𑐾𑐰𑐵: 𑐀𑐬𑑂𑐐𑐣𑐵𑐂𑐖𑐾𑐱𑐣 𑐀𑐦 𑐀𑐩𑐾𑐬𑐶𑐎𑐵𑐫𑐵
𑐐𑐸𑐎𑑅𑐐𑐎𑐸 𑐡𑑄 𑐩𑐸𑐖𑑂𑐫𑐵𑐫 𑐧𑑂𑐰𑐟𑐶 𑐎𑐵𑐫𑐾 𑐢𑐎𑐵: 𑐰𑐣𑐵 𑐰𑐮𑐫𑑂 𑐰𑐴𑐾 𑐩𑐕𑐵:𑐥𑐴𑐫𑐵 𑐳𑐸𑐥𑐵𑐔𑑄 𑐟𑐥𑐸𑐫𑐵 𑐟𑑅𑐥𑐶𑐣𑐶𑐐𑐸 𑐑𑐶𑐟𑐵: 𑐥𑐴𑑅𑐫𑐵 𑐡𑐧𑐵𑐧𑑄 𑐣𑐴𑐫𑑀𑐧𑑂𑐰𑐫𑐾 𑐩𑐏𑐣 𑑋 𑐠𑑂𑐰 𑐂𑐩𑐶𑐐𑐸 𑐟𑐢𑑄𑐐𑐸 𑐎𑐩𑐖𑑀𑐬𑐷 𑐨𑐵𑐥𑐶𑐫𑐵 𑐔𑑂𑐰𑐣𑐵 𑑋 𑐮𑐸 𑐠𑐾𑑄 𑐴𑐶𑐬𑐵 𑐠𑐾𑑄 𑐧𑐴𑐸𑐩𑐸𑐮𑑂𑐫 𑐧𑐳𑑂𑐟𑐸 𑐠𑐐𑐸 𑐨𑐵𑐫𑑂 𑐮𑑂𑐴𑐵𑐫𑐾 𑐡𑐫𑐎𑑄 𑐡𑐫𑐾𑐎𑑄 𑐮𑐸𑑄 𑐰𑐴𑐫𑐵 𑐖𑐮𑐥 𑐫𑐵𑐣𑐵 𑐟:𑐐𑐸 𑐎𑐟 𑐨𑐵𑐫𑑂‌𑐫𑐵𑐟 𑐠: 𑐣𑐵𑐮𑐵 𑐔𑑂𑐰𑑄𑐐𑐸
𑐏𑐣𑐵𑑅 𑐖𑐶 𑐟𑐳𑐎𑑄 𑐣𑐸𑐐: 𑐩𑐕𑐶𑑄 𑑋 𑐠𑐣 𑐀𑐩𑐾𑐬𑐶𑐎𑐵𑐫𑐵 𑐟𑐵𑐮 𑐠𑐠𑐾 𑐴𑐾 𑐏: 𑐡𑐸𑐲𑐶𑐟 𑐰 𑐨𑑂𑐬𑐲𑑂𑐚 𑐖𑐸𑐫𑐵 𑐰𑐣𑐵 𑐔𑑂𑐧𑑄𑐐𑐸 𑐣𑐾𑐰𑐵: 𑐳𑐩𑐵𑐖𑐫𑐵𑐟 𑐨𑐶𑑄𑐎𑐾 𑐣𑑄 𑐧𑐶𑐂 𑐩𑐏𑐸 𑐨𑐶𑑄𑐎𑐵 𑐣 𑐫𑑄𑐎𑐷 𑐩𑐏𑐸 𑑋 𑐕𑐐𑐸 𑐎𑐠𑑄𑐫𑐵 𑐰𑐶𑐜𑐰𑐣𑐵 𑐴𑐾 𑐏: 𑑋

𑐰 𑐖𑑂𑐫𑐵𑐥𑑁 𑐫𑐵 abstract 𑐄𑐐𑐸 𑐂𑐮𑐫 𑐧𑐾𑐮𑐵𑐫𑐟𑐫𑐵 𑐮𑐞𑑂𑐜𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐳 𑐖𑐸𑐂 𑐟𑑂𑐫𑑄𑐐𑐸 𑐴𑐶𑐩𑐵𑐮 𑐨𑐵𑐫𑑂‌𑐫𑐵 𑐗𑐶𑐣𑑂𑐫𑐵𑐎𑑂𑐰:𑐐𑐸 𑐳𑐩𑑂𑐩𑐾𑐮𑐣𑐫 𑐳𑑂𑐰𑐶𑐎𑐺𑐟 𑐖𑐸𑐮 𑑋 𑐀𑐎𑐾𑑄 𑐣𑐾𑐰𑐵𑑅𑐟𑐫𑑂 𑐐𑐵𑐩𑐵: 𑐨𑐵𑐫𑑂 𑐢𑐿𑑄𑐐𑐸 𑐕𑐸 𑐢𑐎𑐵: 𑐧𑐶𑐳𑑂𑐟𑐺𑐟 𑐖𑐵𑐣𑐎𑐵𑐬𑐷 𑐧𑐶𑐫𑐾 𑐏𑐣 𑑋 𑐠𑑂𑐰 𑐖𑐶𑐐𑐸 𑐮𑐵𑐐𑐶 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐰𑐶𑐲𑐫 𑐖𑐸𑐐𑐸𑐮𑐶 𑐠𑑂𑐰 𑐥𑐟𑑂𑐬𑐶𑐎𑐵 𑐥𑐵𑐏𑐾𑑄 𑐣𑑄 𑐐𑐵𑐩𑐵
𑐨𑐵𑐫𑑂‌𑐫𑐵 𑐩𑐴𑐟𑑂𑐰 𑐐𑐸𑐮𑐶 𑐟𑑅𑐢𑑄 𑐢𑐎𑐵: 𑐳𑐷𑐎𑐾 𑐩𑐵𑑅𑐐 𑐥𑐵𑐏𑐾𑑄 𑐕𑐶𑐎𑐥𑐶𑐣𑐶𑐐𑐸 𑐣𑐸𑐐: 𑐎𑑂𑐰𑐳𑐵𑐫𑐾𑐎𑐵 𑐔𑑂𑐰𑐣𑐵 𑑋 𑐁 𑐠𑑂𑐰 𑐐𑐵𑐩𑐵 𑐨𑐵𑐫𑑂 𑐢𑐿𑐐𑐸 𑐕𑐸 𑐏 𑐕𑐎: 𑐰𑐶𑐔𑐵: 𑐫𑐵𑐫𑐾 𑑋 𑐗𑐷𑐐𑐸 𑐨𑐵𑐲𑐵𑐫𑑂‌ ‘𑐩𑐵’ 𑐮𑐶𑐟𑑄𑐳𑐵 𑐑𑐵𑐣𑐵 𑐰𑐂𑐐𑐸 𑐫𑐎𑑀 𑐏𑑃𑐐𑑂𑐰𑑅𑐟 𑐡𑐸𑑋 𑐡𑐳𑐸 𑐎𑐠𑑄 – 𑐳𑑂𑐰𑐵𑑄 𑐩𑐵:, 𑐖𑐩𑐸 𑐩𑐵:, 𑐟𑐶𑐎𑐷 𑐩𑐵: 𑐬𑐸𑐡𑑂𑐬𑐵𑐎𑑂𑐲 𑐩𑐵:, 𑐑: 𑐩𑐵:, 𑐨𑐶𑑄𑐥𑐹 𑐩𑐵: 𑐁𑐡𑐶
𑐁𑐡𑐶 𑑋 𑐟𑐬 𑐠𑑂𑐰 𑐴𑐾 𑐗𑑂𑐰𑐮𑐫 𑐐𑐵𑐩𑐵: 𑐮𑐵:𑐎𑐶 𑐩𑐮𑐵𑑅 𑐰𑐶𑐔𑐵 𑐫𑐵𑐫 𑐩𑐵𑑅𑐐𑐸 𑐡𑐸 𑑋 𑐫𑐡𑐶 𑐠𑑂𑐰 𑐐𑐵𑐩𑐵: 𑐏𑑄𑐐𑑂𑐰 𑐣𑑄 𑐔𑑂𑐰𑐫𑑂 𑐡𑐳𑐸 𑐧𑐶𑐫𑐵 𑐟𑐫𑐵𑐠𑐾 ‘𑐩𑐵’ 𑐮𑐶𑐟𑑄𑐳𑐵 𑐑𑐵𑐣𑐵 𑐰:𑐐𑐸 𑐏:𑐳𑐵 𑐐𑐵𑑄 𑐐𑐵𑑄𑐫𑐵 𑐩𑐵: 𑐴𑐣𑐵 𑐐𑐵𑐩𑐵: 𑐖𑐐𑐸 𑐏𑑃 𑐥𑐵𑐫𑐾𑐕𑐶 𑐖𑐸𑐮 𑐩𑐏𑐸𑐳𑐵 𑐐𑐵𑑄𑐩𑐵𑑄 𑐏𑑄𑐐𑑂𑐰 𑐐𑐣𑑄 𑐰𑑅𑐐𑐸 𑐑𑐎𑐵: 𑐩𑐵𑐮𑐾𑐐𑐸 𑐂𑑄 𑐣𑑂𑐴𑐫𑑀𑐣𑐾 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋
𑐖𑐶𑐐𑐸 𑐠:𑐐𑐸 𑐢𑐵𑐥𑐹 𑐎𑐠𑑄 𑐐𑐵𑐩𑐵: 𑐏𑑄𑐐𑑂𑐰: 𑐧𑐵𑑄𑐩𑐮𑐵𑐐𑐸 𑐩𑐏𑐸 𑐎𑑂𑐰𑐴𑐫𑐾𑐎𑐵: 𑐕𑐮𑐾𑐐𑐸 𑐱𑐧𑑂𑐡 𑐩𑐏𑐸 𑑋 𑐕𑐐𑐸 𑐳𑐩𑑂𑐩𑐵𑐣𑐫𑐵𑐣𑐵𑑅 𑐴𑐣𑐵 𑐟:𑐐𑐸 𑐏: 𑐠𑑂𑐰 𑐱𑐴𑐬𑐫𑐵𑐥𑐶𑑄 𑐩𑐣𑐹𑐟𑐾𑐳𑑄 𑐳𑐩𑑂𑐩𑐵𑐣 𑐫𑐵𑐣𑐵: 𑐐𑐵𑑄 𑐐𑐵𑑄𑐥𑐶 𑐩𑐠𑐸 𑐢𑐎𑐵: 𑐱𑐴𑐬 𑐰 𑐐𑐵𑑄𑐫𑐵 𑐨𑐶𑐣𑑂𑐣𑐟𑐵 𑐎𑑂𑐫𑐣𑐾𑐟 𑐕𑐾𑐮𑐵 𑐟:𑐐𑐸 𑐡𑐸 𑑋 𑐗𑐷𑐐𑐸 𑐨𑐵𑐲𑐵𑐫 𑐟𑑂𑐰𑐵: 𑐧𑐵, 𑐔𑐸𑐎, 𑐮𑐵𑐫𑐎𑐸, 𑐣𑐣𑐶, 𑐡𑐸𑐧𑐵: 𑐥𑐵𑐏𑐵 𑐐𑐸𑑄𑐔𑑂𑐰 𑐁𑐡𑐶 𑐫𑐎𑑂𑐎𑑀
𑐕𑐾𑐮𑐵 𑐔𑑂𑐰𑐣𑐵 𑐟𑐬 𑐱𑐴𑐬𑐫𑐵 𑐣𑐾𑐰𑐵: 𑐏𑑄𑐐𑑂𑐰: 𑐕𑐾𑐮𑐵 𑐰𑐫𑐵 𑐔𑑂𑐰𑑄𑐐𑐸 𑐏𑐣𑐾 𑐩𑐡𑐸 𑐮𑐶𑐥𑐵 𑐟𑐶𑐣𑐶 𑐡𑐺𑐴𑐵𑑄𑐰𑑅𑐐𑐸 𑐖𑐸𑐂𑐦𑐸𑑋 𑐣𑐾𑐰𑐵𑑅 𑐳𑐨𑑂𑐫𑐟𑐵𑐫𑐵𑐟 𑐱𑐴𑐬𑐷𑐎𑐬𑐞 𑐫𑐵𑐣𑐵 𑐫𑑄𑐎𑐸 𑐰𑐮𑐫𑑂‌ 𑐧𑐸𑑄𑐖𑑂𑐫𑐵 𑐫𑐵𑐣𑐵: 𑐐𑐵𑑄 𑐐𑐵𑑄𑐩𑐫 𑐟𑐸 𑐔𑑂𑐰𑐣𑐷𑐥𑐶𑐩 𑐏𑑄 𑐩𑐳: 𑐐𑐵𑑄𑐩𑐵 𑐫𑐵𑐩𑑂𑐴 𑐑𑐎𑐵: 𑐩𑑂𑐴𑐳𑐶𑐎𑐵𑐧𑐷𑐐𑐸 𑐐𑐵𑐩𑐵: 𑐏𑑃𑐐𑑂𑐧: 𑐥𑑂𑐬𑐔𑐵𑐬 𑐰𑑅𑐐𑐸 𑐏𑑄𑐎𑐵 𑐔𑑂𑐰𑐣𑐵 𑑋 𑐐𑐵𑑄𑐩𑐵; ‘𑐨𑐵𑐫𑑂 𑐱𑐴𑐬𑐷 𑐨𑐵𑐫𑑂‌𑐫𑐵 𑐀𑐏𑑅 𑐥𑐴:
𑐎𑐠𑑄 𑐣𑐾𑐰𑐵: 𑐳𑐩𑐵𑐖𑐫 𑐡𑐫𑐵𑐔𑑂𑐰𑑄𑐐𑐸 Rural vs Urban Civilization 𑐕𑐾𑐮𑐾𑐟 𑐐𑐵𑑅𑐩𑐵 𑐥𑑂𑐬𑐔𑐮𑐣𑐫𑑂‌ 𑐰:𑐐𑐸 𑐏: 𑑋 𑐠𑐸𑐏𑐾 𑐥𑐵𑐏𑐾 𑐗𑐷𑐥𑐶 𑐐𑐬𑑂𑐰 𑐟𑐵𑐫𑐾𑐎𑐾𑐩𑐵: 𑐎𑑂𑐰𑐴𑐫𑑄𑐎𑐾𑐐𑐸 𑐩𑐏𑐸 𑑋 𑐱𑐴𑐬𑐫𑐵 𑐥𑐶𑐳𑑄 𑐣 𑐐𑐵𑐩𑐵: 𑐨𑐵𑐫𑑂 𑐮𑑂𑐴𑐵𑐂 𑐧𑐮𑐫𑑂 𑐨𑐵𑐫𑑂‌ 𑐰: 𑐢𑐎𑐵: 𑐴𑐶𑐳𑑂𑐫𑐵𑐫𑐾𑐐𑐸 𑐧𑐵𑐣𑐷 𑐟𑑂𑐰𑐦𑐶𑐎𑐵 𑐕𑑀𑐫𑐾𑐩𑐵:𑐐𑐸 𑐡𑐸 𑑋 𑐫𑐡𑐶 𑐁: 𑐳𑐔𑐾𑐟 𑐖𑐸𑐫𑐵: 𑐩𑐫𑐵𑐟 𑐢𑐵:𑐳𑐵 𑐏𑑄𑐫𑑂‌
𑐨𑐵𑐫 𑐮𑑂𑐴𑐵𑐫𑐾𑐐 𑐏𑐸𑐳𑐷 𑐰𑐵𑐮 𑐣𑐾𑐰𑐵: 𑐨𑐵𑐫𑑂‌𑐫𑐵𑐟 𑐔𑐸𑐂𑐎𑐵 𑐫𑑄𑐎𑐷 𑐀𑐮𑐾 𑐐𑐸𑐧𑐮𑐾 𑐮𑐶𑐴𑐵𑑄 𑐰𑐃 𑐩𑐏𑐸 𑐣𑑂𑐴𑐫𑐵𑐎𑑂𑐰 𑐥𑐳𑑂𑐟𑐵𑐫𑐵 𑐔𑐵𑑅𑐳𑐵𑑄 𑐰𑑄𑐐𑐸 𑐰𑐣𑑄 𑐖𑐸𑐂 𑑋 𑐧𑐶𑐔𑐵𑑅 𑐫𑐵𑐫 𑐩𑐵𑑅𑐐𑐸 𑐰𑐶𑐲𑐫 𑐏: 𑑋 𑐀𑐩𑐾𑐬𑐶𑐎𑐵 𑐣𑐶𑐰𑐵𑐳𑐷 𑐣𑐾𑐰𑐵: 𑐡𑐵𑐖𑐸 𑐎𑐶𑐖𑐵 𑐟𑐟𑐵 𑐎𑐾𑐴𑐾 𑐥𑐶𑐣𑑂𑐳𑑄 𑐠: 𑐩𑐳𑑂𑐟 𑐣𑐵𑐥 𑐠:𑐐𑐸 𑐨𑐵𑐫𑑂 𑐮𑑂𑐴𑐵𑐫𑐾𑐐𑐸 𑐫𑐵𑐣𑐵 𑐔𑑂𑐰𑐣 𑐢𑐵:𑐳𑐵 𑐮𑐶𑐥𑐵 𑐨𑐵𑐫𑑂 𑐮𑑂𑐴𑐵𑐂 𑐥𑐶𑐣𑐶𑐐𑐸 𑐮𑑂𑐫𑐵𑑅 𑐀𑐥𑑂𑐰𑐫𑐵
𑐰𑐃 𑑋 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑑂 𑐥𑐵𑐏𑐾 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐧𑐶𑐎𑐵𑐳 𑐫𑐵𑐣𑐵 𑐫𑐎𑐾𑐐𑐸 𑐮𑐥𑐸 𑐣 𑐡𑐫𑐾𑐎𑐵 𑐫𑑄𑐎𑐾
𑐖𑑂𑐫𑐹 𑑋 𑐐𑐵𑐩𑐵: 𑐨𑐵𑐫 𑐢𑐎𑐵𑑅 𑐠:𑐠𑐩𑑂𑐴 𑐎𑐧𑐴𑐫𑑄𑐎𑐵 𑐩𑐕𑐰𑐳𑐾 𑐨𑐵𑐫𑑂 𑐮𑑂𑐫𑑄𑐎𑐵 𑐟𑐫𑐾𑐐𑐸 𑐥𑐵𑐏𑐾 𑐣𑐸𑐐: 𑐎𑑂𑐰𑐳𑐵𑐮𑐷
𑐢𑐿𑐐𑐸 𑐁𑐳𑐵 𑐰 𑐨𑐮𑐳𑐵 𑐎𑐫𑐵𑐔𑑂𑐰𑐣𑐵 𑑋

𑐳𑐸𑐨𑐵𑐫𑑂‌ 𑑋