𑐔𑑂𑐰𑐏𑑃 – 𑐣𑐵𑐫𑐐𑑂𑐬𑐵 𑐣𑐵𑐥𑐮𑐵𑐣𑐵𑐧𑐮𑐫𑑂

𑐀𑐩𑐾𑐬𑐶𑐎𑐵 𑐠𑑂𑐫𑐐𑐸 𑐕𑐰𑐵𑑅 𑐮𑐶𑐥𑐵 𑐴𑐾 𑐩𑑂𑐴𑑂𑐫𑐵𑐫𑑂 𑐣𑑄 𑐣𑐵𑐫𑐐𑑂𑐬𑐵𑐦𑐮𑑂𑐳 𑐰𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐎𑑂𑐰𑑅𑐕𑐶𑐟 𑑋 𑐀𑐣 𑐰𑐣𑐾𑐐𑐸 𑐢𑐵𑑅𑐐𑐸𑐮𑐶 𑐖𑐶 𑐣𑑄 𑐄𑐟𑑂𑐳𑐵𑐴𑐶𑐟 𑐖𑐸𑐫𑐵 𑑋 𑐔𑐵𑐴𑑂𑐫𑐹 𑐰𑐣𑐾𑐐𑐸 𑐢𑐵𑐮𑐎𑐶 𑐴𑐸𑐬𑐸𑐎𑑂𑐎 𑐖𑐸𑐂𑐩𑑂𑐴 𑐖𑐶 𑑋 𑐀𑐩𑐾𑐬𑐶𑐎𑐵𑐫𑑂 𑐰𑐥𑐶𑑄 𑐀𑐥𑑂𑐰𑑅 𑐴𑐾 𑐩𑐣𑐹𑐟𑐫𑑂𑐳𑑄 𑐰 𑐠𑐵𑐫𑑂𑐫𑐵 𑐎𑐶𑐥𑐵𑐟 𑐦𑐾𑐳𑐧𑐸𑐎𑐫𑑂 𑐟𑐫𑐵𑐟𑑅𑐐𑐸 𑐏𑐣𑐵 𑑋 𑐰 𑐴𑐾 𑐠𑐵𑐳𑐫𑑂 𑐠𑑅𑐥𑐶 𑐣𑑄 𑐰𑐣𑐾 𑐏𑐣𑐶𑐣 𑐢𑐂 𑐠𑐾𑑄 𑐮𑐫𑑂𑐟𑐵𑐫𑐵 𑑋

𑐠𑑁𑐎𑐣𑑂𑐴𑐾 𑐀𑐥𑑂𑐰𑑅𑐳𑐶𑐫𑐵 𑐩𑐳𑑂𑐟 𑐥𑐶𑐣𑐾 𑐡𑐾𑐱𑐫𑑂 𑐧𑑂𑐰𑑄𑐧𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐳𑑂𑐟 𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐩𑐵𑑄 𑐧𑑁𑐥𑐶𑑄 𑐣 𑐰𑐣𑐾𑐏𑐣 𑑋 𑐖𑐶𑐥𑐶𑑄 𑐖𑑂𑐫𑐵𑐠𑐖𑐶𑐠𑐶 𑐣𑑄 𑐩𑑂𑐴𑑂𑐫𑐵𑐫𑑂 𑐮𑐳𑐟𑐵𑑄 𑐳𑑅𑐟𑐵𑑅𑐴𑑅𑐐𑐸𑐮𑐶𑑄 𑐣𑑂𑐫𑐹𑐫𑑀𑐬𑑂𑐎 𑐠𑑂𑐫𑐐𑐸 𑐏𑑅 𑑋

𑐣𑐶𑐣𑑂𑐴𑐸𑐫𑐵 𑐖𑐶𑐩𑐶𑐐𑐸 𑐫𑐵𑐟𑑂𑐬𑐵𑐫𑐵 𑐮𑐵𑐐𑐶 𑐩𑐵𑑅𑐩𑐵𑑅𑐐𑐸 𑐳𑐵𑐩𑐵𑐣𑐟 𑐟𑐫𑐵 𑑋 𑐳𑐣𑑂 𑑒𑑐𑑑𑑒 𑐳𑐾𑐥𑑂𑐚𑐾𑐩𑑂𑐧𑐬 𑑑𑑕 𑐱𑐣𑐶𑐰𑐵𑑅 𑐳𑐸𑐠 𑐣𑑂𑐴𑐵𑐥𑐵𑑄 𑐖𑐶𑐥𑐶𑑄 𑐔𑑂𑐰𑐣𑐵𑐐𑐸 𑐄𑐜𑐳𑐵𑐂𑐡𑐫𑐵 𑐕𑐾𑑄𑐣 𑐦𑑂𑐮𑐳𑐶𑐒𑑂𑐐 𑐢𑐵𑑅𑐐𑐸 𑐠𑐵𑐳𑐫𑑂 𑐧𑐳𑐫𑑂 𑐔𑑂𑐰𑐣𑐾𑐟 𑐰𑐣𑐵 𑑋 𑐮𑑃𑐫𑑂 𑐖𑐹𑐥𑐶𑑄 𑐄𑐮𑐶 𑐏𑐣𑐾𑐩𑐡𑐸 𑑋 𑐨𑐔𑐵 𑐖𑐵𑐫𑐎𑐵𑑅 𑐐𑐵𑐜𑐷𑐫𑐵 𑐗𑑂𑐫𑐵𑐮 𑐩𑐣𑐹𑐫𑐵 𑐗𑑂𑐰𑑅 𑐏𑐣𑐵 𑐕𑐸𑐎𑐶𑐫𑐵 𑐗𑑂𑐰𑑅 𑐠𑑂𑐰 𑐢𑐎𑐵𑑅 𑐩𑑂𑐴𑑂𑐫𑐵𑐫𑑂𑐫𑐵𑐎𑐾 𑐣𑑂𑐫𑐣𑐵 𑑋

“𑐢𑐸𑐥𑐶 𑐩𑐣𑐹𑐟 𑐖𑑂𑐫𑐵𑐩𑐶 𑐖𑑂𑐫𑐵 𑐫𑐵𑐂𑐥𑐶𑑄 𑑋 𑐳𑐸𑐠𑐧𑑅𑐕𑐶 𑐀𑐣 𑐔𑑂𑐰𑐣𑐵𑐔𑑂𑐰𑐣𑐷 𑑋 𑐳𑐸𑐫𑐵𑑄 𑐖𑑂𑐫𑐵𑐩𑐶 𑐩𑐵𑑅𑐳𑐵 𑐠𑐣 𑐳𑑂𑐰𑑅𑐰𑐂 𑐴𑑃 𑑋 𑐀𑐠𑐾 𑐴𑐾 𑐳𑐸𑑄 𑐡𑑂𑐫𑐵𑑄 𑐩𑐮𑐵𑐫𑑂𑐩𑐵 𑐢𑐎𑐵𑑅 𑐊𑐣. 𑐖𑐶. 𑐌𑐟𑐫𑑂𑐳𑑄 𑐧𑐾𑐎𑐬𑐶 𑐩𑐬𑐶𑐫𑐵 𑐥𑐵𑐎𑐾𑐚 𑐂𑐣𑐵𑑅 𑐧𑐶𑐫𑐵𑐔𑑂𑐰𑑄𑐐𑐸 𑐎𑐵 𑑋 𑐠𑐣 𑐀𑐩𑐾𑐬𑐶𑐎𑐵𑐫𑑂

𑐎𑐶 𑐟𑐳𑐎𑑄 𑐐𑐬𑐶𑐧 𑐖𑐸𑐂𑐐𑐸 𑐖𑑂𑐫𑐹 𑐩𑐏𑐸𑐳𑐵 𑐢𑐣𑐷𑐟𑐫𑑂𑐟 𑐖𑑂𑐫𑐹 𑐎𑐵 𑑋 𑐐𑐬𑐶𑐰𑐟𑐫𑑂𑐟 𑐳𑐬𑐎𑐵𑐬𑑄 𑐳𑐴𑐸𑐮𑐶𑐫𑐟 𑐧𑐷 𑑋 𑐐𑐬𑐶𑐧, 𑐖𑑂𑐫𑐵 𑐩𑐡𑐸𑐥𑐶𑐣𑐶 𑐚𑑂𑐫𑐵𑐎𑑂𑐳 𑐣𑑄 𑐥𑐸𑐮𑐾𑐩𑑂𑐰𑐵𑑅, 𑐧𑐷𑐩𑐵 𑐣 𑐥𑐸𑐮𑐾𑐩𑑂𑐰𑐵𑑅 𑐰𑐵𑐳𑑅 𑐏𑐬𑑂𑐔 𑐴𑐿 𑐥𑐸𑐮𑐾𑐩𑑂𑐰𑐵𑑅 𑑋 𑐩𑐢𑑂𑐫𑐩𑐰𑐬𑑂𑐐 𑐗𑐷 𑐠𑐾𑑄 𑐖𑐵𑑅𑐥𑐶𑐣𑑂𑐟 𑐖𑐎 𑐩𑐖𑑂𑐫𑐹𑐎𑐵 𑑋 𑐡𑐎𑑂𑐰𑑄 𑐥𑐸𑐮𑐾𑐩𑐵𑑅 𑑋” 𑐴𑐶𑐴𑐶 𑐫𑐵𑐣𑐵𑑅 𑐩𑑂𑐴𑑂𑐫𑐵𑐫𑑂 𑐣𑑂𑐴𑐶𑐮 𑑋

“𑐐𑐖𑐵𑑅𑐐𑐸 𑐧𑐵𑑄𑐮𑐵𑑅𑐐𑐸 𑐰𑑂𑐫𑐰𑐳𑑂𑐠𑐵” 𑐧𑑁𑐩𑑂𑐴𑐾𑐳𑑂𑐫𑐵 𑐩𑑂𑐴𑐸𑐟𑐸 𑐥𑐶𑐖𑑂𑐰𑐮 𑑋

“𑐟𑐸𑐟𑐶𑑄 𑐩𑐔𑐸𑐟𑐮𑐾 𑐳𑑂𑐰𑐫𑐵𑐧𑐶𑐮 𑑋 𑐟𑐸𑐟𑐶𑑄 𑐔𑐸𑐮𑐎𑐶 𑐴𑐬𑐾𑐎 𑐴𑐶𑐳𑐵𑐰𑐎𑐶𑐟𑐵𑐰 𑐎𑑂𑐫𑐣𑐾𑐩𑐵𑐮 𑐎𑐵 𑑋 𑐳𑐾𑐎𑑂𑐫𑐹𑐬𑐶𑐚𑐷 𑐎𑐵𑐬𑑂𑐜𑐥𑐵𑐏𑐾𑑄 𑐴𑐬𑐾𑐎 𑐩𑐣𑐸𑐫𑐵 𑐐𑐮𑐶 𑐎𑐩𑐵𑐂 𑐡𑐸 ? 𑐁𑐣𑑂𑐡𑑂𑐬𑐵𑐨𑐸𑐜𑐷 𑐳𑐬𑐎𑐵𑐬𑑄 𑐳𑐶𑐫𑐵𑐔𑑂𑐰𑐣𑐷 𑑋 𑐳𑐸𑐣𑐵𑑄 𑐕𑐸𑑄 𑐳𑐸𑐔𑐸𑐎𑐾 𑐦𑐂𑐩𑐏𑐸 𑑋” 𑐮𑐳𑐟𑐵𑑄 𑐀𑐣𑐫𑐵 𑐣𑐶𑐫𑐩 𑐎𑐵𑐣𑐸𑐣𑐟 𑐎𑐣𑐵𑐔𑑂𑐰𑐣 𑑋 𑐖𑐶𑑄 𑐣𑑄 𑐰𑐫𑐵𑐐𑐸 𑐏𑑄 𑐣𑑂𑐫𑐣𑐵 𑐕𑐫𑑄 𑐎𑑂𑐰𑐵𑐣𑐵𑐔𑑂𑐰𑐣𑐵 𑑋

𑐖𑐶𑐥𑐶𑑄 𑐫𑐵𑐎𑐣𑑄 𑐴𑐾 𑐦𑑂𑐮𑐳𑐶𑐒𑑂𑐐𑐫 𑐠𑑂𑐫𑐣 𑑋 𑐰𑐣𑐷𑐥𑐶𑑄 𑐩𑐾𑐥𑐶𑑄 𑐳𑐸𑑄 𑐩𑐠𑑂𑐫𑐣𑐶 𑑋 “𑐗𑐷 𑐰𑐣𑐾𑐐𑐸 𑐧𑐳 𑐠𑑂𑐰 𑐴𑐾 𑐎𑐵 𑑋” 𑐔𑐵𑐂𑐣𑐷𑐖 𑐚𑐹𑐬 𑐧𑐳𑐫𑐵𑐟 𑐎𑑂𑐫𑐣𑐵𑑅 𑐢𑐵𑐮 𑑋 𑐠𑑂𑐰 𑐠𑐵𑐳𑐫𑑂 𑐀𑐥𑑂𑐰𑑅 𑐴𑐾 𑐔𑐵𑐂𑐣𑐷𑐖 𑐡𑐸 𑑋 𑐄𑐎𑐶𑑄 𑐴𑐾 𑐔𑐵𑐂𑐣𑐵 𑐚𑐵𑐄𑐣 𑐢𑐵𑑅𑐐𑐸 𑐖𑐸𑐃 𑑋 𑐔𑐵𑐂𑐣𑐷𑐖 𑐥𑐳𑑅𑐟 𑐔𑐵𑐂𑐣𑐷𑐖 𑐬𑐾𑐲𑑂𑐚𑐸𑐬𑐾𑐞𑑂𑐚𑐟 𑐫𑐎𑑂𑐰 𑐡𑐸 𑑋 𑐠𑑂𑐰 𑐠𑐵𑐫𑑂 𑐴𑐾 𑐔𑐵𑐂𑐣𑐵 𑐏𑑅𑐮𑐵 𑐢𑐂𑐠𑐾 𑐔𑑂𑐰 𑑋 𑐄𑐎𑐶𑑄 𑐠𑑅𑐥𑐶𑑄 𑐣 𑐔𑐵𑐂𑐣𑐵 𑐠𑑂𑐫𑐐𑐸 𑐠𑐾𑑄 𑐀𑐣𑐸𑐨𑐰 𑐖𑐸𑐮 𑑋

𑐠𑑂𑐰𑐫𑐵 𑐥𑑂𑐫𑐣𑑂𑐴𑐸 𑐣𑑂𑐴𑑂𑐫𑑅 𑐖𑐶𑐥𑐶𑑄 𑐦𑑂𑐮𑐳𑐶𑐒𑑂𑐐𑐫 𑐔𑑂𑐰𑑄𑐐𑐸 𑐨𑐵𑐬𑐟𑐷𑐫𑐟𑐫𑐳𑑄 𑐡𑐫𑑂𑐎𑐵𑐟𑑅𑐐𑐸 𑐐𑐞𑐾𑐡𑑂𑐫𑑅𑐫𑐵 𑐠𑐵𑐫𑑂 𑐰𑐫𑐵𑐐𑐸 𑐏𑑅 𑑋 𑐀𑐣𑑄 𑐮𑐶𑐴𑐵𑑄 𑐰𑐫𑐵𑐰𑐮𑐫𑑂 𑐮𑐶𑐧𑐵𑐟 𑑋 𑐮𑐶𑐴𑐵𑑄 𑐰𑐰𑑄 𑐖𑐶𑐩𑐶 𑐧𑐸𑐬𑐵𑐫𑐵 𑐔𑑂𑐰𑐦𑐵𑐫𑑂 𑐟𑐔𑑂𑐰𑐫𑑂𑐎𑐮 𑑋 𑐥𑑂𑐬𑑀𑐳𑑂𑐚𑐾𑐚 𑐮𑑂𑐰𑐫𑑂 𑐡𑐸𑐩𑑂𑐴 𑐗𑐵𑑅 𑐗𑐵 𑐚𑑂𑐰𑐵𑐂𑐮𑐾𑐟 𑐰𑐣𑐾𑐩𑐵𑑅 𑑋 “𑐁𑐳𑐾𑐣𑑂𑐴𑐶 𑐜𑑂𑐫𑐵𑐜𑐷, 𑐖𑐶𑑄 𑐬𑐾𑐲𑑂𑐚𑐬𑐸𑐩 𑐩𑐵𑐮𑐵𑐰𑐫𑑂 𑑋 “𑐩𑑂𑐴𑑂𑐫𑐵𑐫𑑂𑐫𑐵 𑐄𑐏𑐾𑐠𑐸𑐏𑐾 𑐳𑑂𑐰𑐫𑐵𑐰𑐮 𑑋 𑐐𑐣𑑄 𑐩𑐮𑐹 𑑋 𑐥𑐳𑐮𑐫𑑂 𑐬𑐾𑐲𑑂𑐚𑐸𑐬𑐵𑑃𑐮𑐫 𑐐𑐣𑑄 𑐴𑐾 𑐬𑐾𑐲𑑂𑐚𑐬𑐸𑐩𑐫𑑂 𑐩𑐕𑑂𑐰𑑅 𑑋 𑐣𑑂𑐴𑑂𑐫𑑅𑐮𑐵𑑅𑐠𑐵𑐫𑑂 𑐫𑐵𑐫𑑂 𑐖𑑂𑐫𑐹𑐐𑐸 𑐩𑐏𑐸𑐟 𑑋 𑐥𑐷 𑐩𑐦𑐫𑐵 𑐰𑐫𑑂𑐢𑐸𑑄𑐎𑐮 𑐠𑐾𑑄 𑑋 𑐳𑐵𑐬𑑂𑐰𑐖𑐣𑐶𑐎 𑐚𑑂𑐰𑐵𑐂𑐮𑐾𑐚 𑐮𑐵 𑐡𑐫𑐩𑐵𑑅𑐐𑐸 𑐏𑑅𑐣𑐶 𑐴𑐵𑐴𑐵𑑄 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵𑐔𑑂𑐰𑐣𑐵 𑑋 𑐧𑐮𑑂𑐮𑑄 𑐕𑐐𑐹 𑐬𑐾𑐲𑑂𑐚𑐸𑐬𑐵𑑃𑐮𑐫 𑐣𑐫𑐐𑐸 𑐎𑐠𑑄 𑐡𑐸𑐴𑐵𑑄𑐰𑐣𑐵𑐰𑐮𑐫𑑂 𑐟𑐶𑐣𑐶 𑐬𑐾𑐲𑑂𑐚𑐬𑐸𑐩𑐫𑑂 𑐰𑐣𑐾𑐏𑐣 𑑋 𑐔𑐵𑑅 𑐴𑐶𑐮𑐵𑐫𑐵 𑐕𑐸𑑄 𑐁𑐣𑐣𑑂𑐡 𑐎𑐵𑐮 𑐖𑐸𑐂 𑐰𑑄 𑑋 𑐬𑐾𑐲𑑂𑐚𑐬𑐸𑐩 𑐰𑐣𑐵𑐰𑑅𑐧𑐮𑐫 𑐎𑐸𑐡𑐶𑐎𑐵𑐰𑑅 𑐠𑐾𑑄 𑐏𑑂𑐰𑐵 𑐴𑐾 𑐔𑐎 𑑋 𑐰 𑐮𑐎𑐳 𑐮𑐸𑐩𑐎𑐵𑑅 𑐣𑑂𑐴𑐶𑐮𑐵𑐔𑑂𑐰𑐣𑐵 𑑋

𑐣𑐵𑐫𑐐𑑂𑐬𑐵 𑐰𑐣𑐾𑐐𑐸 𑐧𑐳𑐫𑐵 𑐃 𑐩𑐟𑑂𑐫𑑅𑐟𑐮𑐾 𑐖𑐶𑐥𑐶 𑐄𑐏𑐾𑐠𑐸𑐏𑐾 𑐔𑐵𑑅𑐴𑐶𑐮𑐵𑐔𑑂𑐰𑐣𑐵 𑑋 𑐃 𑐖𑐸𑐂𑐰𑑄 𑐖𑐶𑐥𑐶 𑐔𑑂𑐰𑐣𑐾𑐐𑐸 𑐧𑐳𑐫𑐵 𑐣𑐩𑑂𑐧𑐬 𑐩𑐵𑐩𑐵𑑄 𑐠𑐥𑐶 𑐔𑑂𑐰𑐣𑐾𑐐𑐸 𑐧𑐳 𑐏𑐣 𑑋 𑐀𑐣 𑐄𑐠𑐾𑑄 𑐖𑐵𑑅𑐐𑐸 𑐧𑐳𑐟 𑐫𑐎𑑂𑐰 𑐴𑐾 𑐗𑑂𑐰𑑅𑐕𑐸𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐧𑐳𑐫𑐵 𑐐𑐵𑐂𑐜𑑄 𑐩𑐸𑐳𑐸𑐩𑐸𑐳𑐸 𑐣𑑂𑐴𑐶𑐮𑐵 “𑐩𑐬𑑂𑐣𑐶𑐒𑑂𑐐” 𑐢𑐎𑐵𑑅 𑐮𑐳𑐎𑐸𑐳 𑐫𑐵𑐟 𑑋 𑐧𑐳𑐮𑐵 𑐖𑐵𑐫𑐵𑐔𑑂𑐰𑐣𑐾 𑐢𑐸𑑄𑐎𑐮 𑑋 𑐖𑐶𑐩𑐶𑐐𑐸 𑐳𑑂𑐰𑑄𑐐𑐹 𑐳𑐷𑐚𑑄 𑐖𑐶𑐩𑐶𑐟 𑐴𑐾 𑐥𑐶𑐫𑐵𑐔𑑂𑐰𑐣 𑑋 𑐧𑐳𑐫𑐵 𑐜𑑂𑐬𑐵𑐂𑐨𑐬 𑐣 𑐔𑐵𑐂𑐣𑐷𑐖, 𑐧𑐳𑐫𑐵 𑐐𑐵𑐂𑐡 𑐔𑐵𑐂𑐣𑐷𑐖, 𑐀𑐮𑐫𑑂 𑐧𑐳𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶 𑐣 𑐀𑐥𑑂𑐰𑑅 𑐔𑐵𑐂𑐣𑐷𑐖𑐟, 𑐩𑐾𑐥𑐶𑑄 𑑑𑑐÷𑑑𑑕 𑐩𑑂𑐴 𑐟𑐶 𑐖𑐎 𑐏𑐣𑐵 𑑋 𑐂𑐩𑐶 𑐠𑑅𑐐𑐸 𑐴𑐾 𑐨𑐵𑐲 𑐔𑑂𑐫𑐵𑐄𑑃𑐔𑑂𑐫𑐵𑐄𑑃 𑐏𑑃𑐮𑑂𑐴𑐵𑐣𑐵𑐔𑑂𑐰𑐣 𑑋 𑐐𑐵𑐜𑐷 𑐣𑑂𑐴𑑂𑐫𑐵𑐣𑐵𑐔𑑂𑐰𑐣 𑑋 𑐐𑐧𑐮𑐾 𑐣𑑂𑐴𑐫𑑅𑐣𑐾 𑐦𑐫𑑂𑐟𑐸𑐣𑐵𑐔𑑂𑐰𑐥𑐶𑑄 𑐩𑐶𑐳𑑂𑐟𑐳𑐾𑑄 𑐮𑑂𑐫𑐹𑐣𑐾 𑐖𑐶𑐩𑐶𑐟 𑐨𑑂𑐰𑐵𑑄𑐫𑑂𑐎 𑐳𑑂𑐰𑐂 𑑋 𑐩𑐸𑐳𑐸𑐎𑑂𑐎 𑐕𑐎𑑅 𑐣𑑂𑐴𑐶𑐮𑐷 𑑋 𑐡𑐸𑐬𑐸𑑄 𑐩𑑂𑐰𑑅𑐮𑑂𑐴𑐸𑐫𑐵 𑐰𑑅𑐥𑐶 𑐠𑐾 𑐫𑐔𑐸𑐥𑐶𑐔𑐸𑐳𑐾𑑄 𑐏𑐣𑐾𑐡𑐸 𑑋 𑐰 𑐐𑐵𑐂𑐜 𑐣 𑐂𑐥𑐶𑑄 𑐧𑐵𑐮𑐵𑑅𑐥𑐶𑑄 𑐩𑐶𑐳𑐵𑐥𑐶𑑄𑐣𑐵𑐥 𑐐𑐦𑐫𑑂 𑐩𑐳𑑂𑐟 𑑋 𑐳𑐎𑐳𑐶𑐟𑑄 𑐢𑐵𑐫𑐩𑐵𑑅𑐐𑐸 𑐖𑐸𑐮𑐎𑐶 𑐖𑐎 𑐰 𑐐𑐵𑐂𑐜𑑄 𑐀𑐐𑑂𑐬𑐾𑐖𑐷𑑄 𑐣𑑂𑐰𑐰𑐵𑐂 𑑋 𑐐𑐵𑐂𑐜 𑐣𑑄 𑐩𑐸𑐳𑐸𑐎𑐵𑑅 𑐏𑑂𑐰𑐵𑑅, 𑐣𑑂𑐴𑐫𑐵𑐂𑐥𑐸𑐳𑐾 𑐔𑑂𑐰𑑄 𑑋 𑐠𑐵𑐫𑑂 𑐠𑐵𑐫𑑂 𑐥𑐟𑐶𑐎𑑄 𑐠𑐣 𑐠𑑂𑐫𑐣 𑐢𑐎𑐵𑑅 𑐖𑐵𑐣𑐎𑐵𑐬𑐷 𑐧𑐶𑐫𑐵𑐔𑑂𑐰𑐣𑐷 𑑋 𑐣𑑂𑐫𑐹𑐖𑐬𑑂𑐳𑐶 𑐰 𑐥𑐾𑐣𑑂𑐳𑐶𑐮𑐨𑐵𑐣𑐶𑐫𑐵 𑐳𑑂𑐚𑐾𑐚 𑐖𑐸𑐫𑐵𑑅 𑐰𑐣𑐾𑐩𑐵𑑅𑐐𑐸 𑐩𑑂𑐴𑑂𑐫𑐵𑐫𑑂𑐣𑑄 𑐎𑐣 𑑋

𑐐𑐧𑐮𑐾𑑄 𑐖𑐰𑐫𑑂𑐫𑐵 𑐣𑑂𑐴𑐵𑐫𑑂𑐎𑐣𑐫 𑐐𑐧𑐮𑐾𑑄 𑐏𑐰𑐫𑑂𑐫𑐵 𑐣𑑂𑐴𑐵𑐫𑑂𑐎𑐣𑑄 𑐥𑐶𑐣𑐾𑐫𑐵 𑐮𑐹 𑐳𑑂𑐰𑐳𑑂𑐰𑑄 𑐩𑐶𑐏𑐵𑑄 𑐁𑐣𑐣𑑂𑐡 𑐎𑐫𑐵𑐔𑑂𑐰𑐣 𑑋 𑐟𑐟𑑅𑐖𑐵𑑅𑐐𑐸 𑐕𑐾𑑄𑐟, 𑐏𑐸𑐳𑐶𑐟 𑐮𑑂𑐫𑐹𑐣𑐾 𑐮𑐵𑐎𑐵𑑅 𑐐𑐵𑐜𑐷 𑐧𑑂𑐰ॉ𑐫 𑐰𑐣𑐵𑐔𑑂𑐰𑐣 𑑋 𑐧𑐳𑐫𑑂 𑐴𑐾 𑐬𑐾𑐲𑑂𑐚𑐬𑐸𑐩 𑐣 𑐡𑐹𑐐𑐸 𑐏𑐣𑐷 𑑋 𑐟𑐵𑑅𑐴𑐵𑐎𑑅𑐐𑐸 𑐫𑐵𑐟𑑂𑐬𑐵𑐫𑑂 𑐰𑐣𑐾𑐧𑐮𑐫 𑐠𑑂𑐰 𑐮𑐵 𑐀𑐟𑐶𑐎𑑄 𑐩𑐵𑑅𑐐𑐸 𑐏𑐎𑐵 𑑋 𑐗𑐷𑐠𑐵𑐫𑑂 𑐣𑐾𑐥𑐵𑐮𑐫𑑂 𑐥𑐶𑐣𑐾 𑐟𑐵𑐥𑐵𑐎𑑂𑐎 𑐰𑐣𑐾𑐧𑐮𑐫𑑂 𑐮𑑃 𑐳𑐶𑐠𑐫𑑂 𑐧𑐳 𑐡𑐶𑐎𑐵𑐧𑐷 𑑋 𑐄𑐏𑐾𑐠𑐸𑐏𑐾 𑐳𑑂𑐰𑐫𑐵𑑅 𑐳𑐸𑑄𑐩𑐡𑐸𑐠𑐵𑐫𑑂 𑐮𑑃𑐫 𑐟𑐸 𑐰𑐶𑐳𑐬𑑂𑐖𑐣 𑐫𑐵𑐂 𑑋 𑐫𑐵𑐎𑐣𑑄 𑐩𑐰𑐮 𑐎𑐶 𑐜𑑂𑐬𑐵𑐂𑐨𑐬 𑐟𑐶 𑐟𑐶 𑐴𑐬𑑂𑐣 𑐣𑑂𑐫𑐵𑐫𑑂𑐎𑐷 𑑋 𑐠𑑁𑐎𑐣𑑂𑐴𑐾𑑄 𑐟𑐶𑐣𑐶 𑐕𑐠𑐵𑐫𑑂𑐣𑐶𑐠𑐵𑐫𑑂 𑐚𑑂𑐰𑐵𑐂𑐮𑐾𑐚 𑐡𑐸𑐐𑐸 𑐠𑐵𑐳𑐫𑑂 𑐧𑐳 𑐡𑐶𑐎𑐵𑐧𑐷 𑑋

𑐧𑐳 𑐣 𑐠𑑅𑐐𑐸 𑐴𑐾 𑐥𑑂𑐬𑐵𑐂𑐨𑐾𑐚 𑐎𑐵𑐬 𑐠𑐾𑑄 𑐐𑐸𑐮𑐶 𑐫𑐵𑐄𑑄𑐳𑐾 𑐔𑑂𑐰 𑑋 𑐕𑐸 𑐴𑐾 𑐟𑐎𑐮𑐶𑐦 𑐩𑐡𑐸 𑑋 𑐳𑐸𑐠𑐫𑐵 𑑘 𑐟𑐵 𑐃 𑐥𑐵𑐏𑐾 𑐧𑐳 𑐢𑑂𑐫𑐵𑐎𑑂𑐎 𑐡𑐶𑐟 𑑋 𑐳𑐎𑐮𑐾𑑄 𑐎𑐸𑐴𑐵𑑄𑐰𑐮 𑑋 𑐖𑐶𑐥𑐶𑑄 𑐖 𑐂𑐩𑐶 𑐮𑑂𑐫𑐹𑐮𑑂𑐫𑐹 𑐰𑐣𑐵 𑑋 𑐀𑐩𑐾𑐬𑐶𑐎𑐵𑐫𑑂 𑐡𑐎𑐮𑐾 𑐣𑑂𑐴𑐵𑐥𑐵𑑄 𑐧𑐶𑐖𑐸𑐮𑐷 𑐥𑐶𑐎𑐵𑑅𑐐𑐸 𑐥𑐵𑐰𑐬𑐴𑐵𑐄𑐳𑐫𑑂 𑐫𑑄𑐎𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐡𑐎𑑂𑐰𑑄 𑐕𑐎𑑅 𑐳𑐬𑐬𑐬 𑐳𑑂𑐰𑐫𑐵 𑑋 𑐥𑑂𑐬𑐵𑐰𑐶𑐢𑐶𑐎 𑐥𑐎𑑂𑐲𑐫 𑐳𑑂𑐫𑐹𑐥𑐶𑐳 𑐣𑑂𑐴𑑂𑐫𑐳𑑅 𑐟𑐫𑐵𑐔𑑂𑐰𑐣 𑑋 𑐖𑐶𑐥𑐶𑑄 𑐴𑐵𑐎𑐣𑑄 𑐧𑐳𑐫𑑂 𑐟𑐸𑑄 𑐔𑑂𑐰𑑄𑐰𑐫𑐵 𑑋

PC: www.newmarketholidays.co.uk

𑐣𑑂𑐴𑐶𑐣𑐾𑐳𑐶𑐫𑐵 𑑒 𑐟𑐵 𑐃𑐥𑐵𑐏𑐾 𑐩𑐾𑐐𑐸 𑐠𑐵𑐳𑐫𑑂 𑐧𑐳 𑐡𑐶𑐟 𑑋 “𑐎𑐣𑐶𑑄𑐒𑑂𑐐 𑐩𑑂𑐫𑐹𑐖𑐶𑐫𑐩 𑐀𑐦 𑐐𑑂𑐮𑐵𑐳” 𑐢𑐂𑐐𑐸 𑐩𑑂𑐫𑐹𑐖𑐶𑐫𑐩 𑐏𑐣𑐶 𑑋 𑐥𑐶𑐣𑐾 𑐧𑑀𑐬𑑂𑐜𑐫𑑂 𑐔𑑂𑐰𑐫𑐵𑐟𑑅𑐐𑐸𑐮𑐶𑑄 𑐳𑐶𑐮 𑑋 𑐌𑐴𑑀 ! 𑐀𑐣𑐮𑐵 𑐩𑐾𑐱𑐶𑐣𑑄 𑐠𑐷𑐠𑐷 𑐳𑐵𑐩𑐵𑐣𑐟 𑐡𑐫𑐎𑐵𑐔𑑂𑐰𑐐𑐸 𑐏𑐣𑐶 𑑋 𑐀𑐮𑐫𑑂 𑐀𑐣 𑐴𑐾 𑐡𑐫𑑂𑐎𑐵𑐟𑑅𑐐𑐸 𑐦𑐸𑐮𑐡𑐵𑐣, 𑐮𑐩𑑂𑐦𑐵𑐟, 𑐠𑐷𑐠𑐷 𑐎𑐠𑑄𑐫𑐵 𑐳𑑀𑐥𑐶𑐳𑐟 𑐫𑐎𑑂𑐰 𑐴𑐾 𑐧𑐵𑐧𑐵𑑄𑐮𑐵𑑅𑐐𑐸 𑐔𑐷𑐖𑐰𑐷𑐖𑐟 𑐧𑑂𑐰𑐫𑐵𑐟𑐮 𑑋 𑐩𑐶𑐫𑐵 𑐣𑑄 𑐟𑐮 𑑋 𑐣𑑂𑐫𑐵𑐫𑑂 𑐩𑐵𑐳𑑂𑐟𑐶 𑐰𑑅𑐳𑐵𑑄 𑐴𑐵𑑄𑐎𑐣 𑐐𑐣𑑂𑐟𑐧𑑂𑐫𑐫𑑂 𑐠𑑂𑐫𑑄𑐎𑐾 𑐩𑐵𑐣𑐷𑐐𑐸 𑐳𑐩𑑂𑐴𑐵𑐮𑐾 𑐫𑐵𑐣𑐵𑑅 𑐴𑐫𑑂 𑐦𑐂𑐐𑐸 𑐩𑐏𑐣𑐵 𑑋 𑐎𑐶𑐥𑐵𑑅𑐟 𑐎𑐫𑐵 𑑋 𑐀𑐣 𑐴𑐾 𑐐𑐵𑐂𑐜𑑄 𑐔𑑂𑐰𑐫𑑂𑐎𑑅 𑐰𑐮, “𑐎𑐵 𑐎𑐵 𑐫𑐵𑐎𑐣 𑐗𑐵𑐳𑑄 𑑋 𑐧𑐳 𑐣𑑂𑐴𑐫𑐵𑐂𑐣 𑑋” 𑐖𑐶𑐩𑐶𑐐𑐸 𑐥𑐮𑐵𑑅 𑐧𑐫𑐵 𑐮𑑂𑐫𑐹𑐮𑑂𑐫𑐹 𑐧𑑂𑐰𑐵𑐟 𑑋 𑐴𑐵𑐎𑐣𑑄 𑐧𑐳𑐫𑑂 𑐔𑑂𑐰𑐣𑐵 𑑋 𑐕𑐎𑑅 𑐣𑐶𑐎𑑅 𑐧𑐳𑑄 𑐥𑐶𑐴𑐵𑑄𑐰𑐫𑑂𑐐𑐸 𑐩𑑂𑐴𑐫𑐵𑐟 𑐣 𑐫𑐵𑐄𑑃𑐳𑐾𑑄 𑐔𑑂𑐰 𑑋

𑐠𑐸𑐐𑐸 𑐚𑐶𑐥𑐫𑑂 𑐣𑐵𑐫𑐐𑑂𑐬𑐵𑐦𑐮𑑂𑐳 𑐰𑐣𑐾𑐧𑐮𑐫𑑂 𑐮𑑃𑐫𑑂 𑐡𑐠𑐸𑐂 𑐮𑐵𑑅𑐐𑐸 𑐩𑐾𑐩𑐾𑐐𑐸 𑐠𑐵𑐳𑐫𑑂 𑐣𑑄 𑐫𑑄𑐎𑐷𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐮𑐘𑑂𑐔 𑐢𑐸𑑄𑐎𑐵𑑅 𑐴𑐶𑐣𑐳𑐶𑐫𑐵 𑑔𑑅𑑒𑑐 𑐟𑐵 𑐂𑐮𑐫𑑂 𑐧𑐳 𑐡𑐶𑐎𑐮 𑑋 𑐰 𑐠𑐵𑐫𑑂 𑐰𑐵𑐮𑑂𑐚𑐎𑐶𑐣𑑂𑐳 𑐐𑑂𑐮𑐶𑐣 (𑐐𑐬𑑂𑐖) (Waltkins Glen) 𑐢𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐠𑐣𑑄 𑐖𑐶𑐥𑐶𑑄 𑐣𑑂𑐫𑐵𑐳𑐶 𑐰𑐣𑐵 𑑋 𑐌𑐴𑑀 ! 𑐠𑐣𑐮𑐵 𑐐𑐖𑐵𑑅𑐐𑐸 𑐥𑐬𑑂𑐰𑐫𑐵 𑐡𑐠𑐸𑑄 𑐰𑐫𑐵𑐐𑐸 𑐠𑐾𑑄 𑐳𑐸𑐣𑐳𑐵𑐣 𑑋 𑐠𑐵𑐫𑑂 𑐠𑐵𑐳𑐫𑑂 𑐗𑑂𑐰𑐵𑐮𑐵𑐟, 𑐏𑐸𑐳𑐶 𑐐𑐸𑐮𑐶 𑐧𑐵𑑄𑐮𑐵𑑅𑐐𑐸 𑐥𑑂𑐬𑐵𑐎𑐶𑐟𑐶𑐎 𑐡𑐺𑐲𑑂𑐫 𑑋 𑐐𑐣𑑄 𑐔𑑂𑐰 𑐟𑐖𑐵𑑅𑐐𑐸 𑐐𑐸𑑄 𑐮𑑅 𑐴𑐵𑐫𑐵𑐔𑑂𑐰𑐣 𑑋 𑐀𑐣 𑐎𑑂𑐰 𑐴𑐾 𑐔𑐷𑐧𑐵𑐮𑐵𑐐𑐸 𑐮𑑄 𑐰𑐣𑐾𑐩𑐵𑑅𑐐𑐸 𑑋 𑐳𑐶𑐠𑐫𑑂 𑐔𑐶𑐖𑐵𑑅𑐐𑐸 𑐥𑐏𑐵𑑅 𑐮𑑄 𑐳𑑂𑐰𑐫𑐵 𑑋 𑐎𑑂𑐰𑐫𑑂 𑐐𑑂𑐫𑐵𑐣𑐵𑐥𑐸𑐳𑐾 𑐨𑐷𑐬 𑐠𑐾𑑄 𑑋 𑐀𑐣𑑄 𑐟𑐷𑐖𑐎 𑐥𑐮𑐵𑑅 𑐕𑐶𑐣𑐵𑐰𑐫𑐵 𑑋 𑐐𑐣𑑄 𑐟𑐟𑑅𑐖𑐵𑑅𑐐𑐸 𑐥𑐬𑑂𑐰, 𑐮𑑂𑐰𑑄𑐴𑑄𑐫𑐵 𑐎𑐵𑐥𑐶𑑄 𑐎𑐵𑐥𑐶𑑄 𑐩𑐣𑑂𑐴𑑂𑐫 𑐩𑐣𑑂𑐴𑑂𑐫𑑄 𑐰𑐫𑑂 𑐠𑐾𑑄 𑐮𑑅 𑐥𑐶𑐴𑐵𑑄 𑐰𑐫𑐵𑐔𑑂𑐰𑐣 𑑋 “𑐖𑐶𑐩𑐶𑐟 𑐕𑐎𑑅 𑐣𑑄 𑐳𑑂𑐰𑑅 𑐢𑐫𑐵𑐔𑑂𑐰𑑄 𑐠𑐾𑑄 𑐟𑐵𑐮 𑑋 𑐎𑐶𑐥𑐵𑑅𑐟 𑐎𑐫𑐵 𑑋 𑐐𑐣𑑄 𑐎𑐵𑐥𑐫𑐵 𑐔𑑂𑐰𑐫𑑂 𑐥𑐵𑐏𑐾𑑄 𑐳𑐶𑐩𑐵𑐟 𑐗𑑂𑐫𑐵𑐩𑑂𑐩 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐳𑐎 𑐣𑑂𑐴𑑂𑐫𑐵𑐂𑐥𑐸𑐳𑐾 𑐔𑑂𑐰𑑄 𑐄𑐐𑐸 𑐠𑐵𑐫𑑂 𑑋 𑐩𑐾𑐩𑐾𑐥𑐶𑑄 𑐥𑐬𑑂𑐫𑐚𑐎𑐟 𑐣𑑄 𑐄𑐮𑐶 𑐴𑐾 𑐣𑑂𑐫𑐵𑐂𑐥𑐸𑐎 𑐎𑐶𑐥𑐵𑑅 𑐎𑐵𑐎𑐵 𑐄𑐏𑐾𑐠𑐸𑐏𑐾 𑐳𑑂𑐰𑐫𑐵𑐔𑑂𑐰𑐣 𑑋 𑐗𑐷𑐠𑐵𑐫𑑂 𑐧𑐸𑑃𑐂 𑐟𑑄𑐐𑐶𑐟𑐐𑐶 𑐠𑐾𑑄 𑐮𑑂𑐰𑐴𑑄𑐫𑐵 𑐡𑑂𑐫𑐵𑑄𑐡𑑂𑐫𑐵𑑄 𑐏𑐣𑐾𑐡𑐸𑐐𑐸 𑐄𑐐𑐸 𑐮𑐹 𑐳𑑂𑐰𑐳𑑂𑐰 𑐩𑐐𑐵𑑅 𑑋 𑐐𑐣𑑄 𑐔𑑂𑐰𑑄 𑐴𑐵𑐫𑐵𑐔𑑂𑐰𑑄𑐐𑐸 𑐗𑑂𑐰𑐵𑐮𑐵 𑐳𑐶𑐔𑐸𑐎 𑐥𑐵𑐔𑑂𑐫𑐸𑐰𑐂 𑑋 𑐩𑐣𑑄 𑐁𑐣𑐣𑑂𑐡 𑐎𑐫𑐵𑐔𑑂𑐰𑐣𑐷 𑑋 𑐐𑐣𑑄 𑐠𑐣𑑄 𑐎𑐸𑐟𑐸𑐰𑑄𑐳𑐵 𑐕𑐸𑐫𑐵𑐫𑑂 𑐢𑐎𑐵𑑅 𑐐𑑂𑐫𑐵𑐣𑐵 𑐴𑐾 𑐰𑑅 𑑋 𑐩𑐣 𑐗𑐳𑐒𑑂𑐐 𑐖𑐹 𑑋 𑐩𑑂𑐴𑑂𑐫𑐵𑐫𑑂𑐣𑑄 𑐧𑑁𑐩𑑂𑐴𑐳𑐶𑐐𑐸 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐐𑑂𑐫𑐵𑐣𑐵𑐥𑐸𑐐𑐸 𑐠𑐵𑐳𑑄 𑐰𑐶𑐳𑑂𑐟𑐵𑐬𑑄 𑐴𑐮 𑑋

“𑐜𑑂𑐫𑐵𑐜𑐷 𑑋 𑐰𑐶𑐳𑑂𑐟𑐵𑐬𑑄 𑐣𑐸 𑑋“

𑐣𑑂𑐴𑐵𑐥𑐵 𑐩𑐔𑐵𑐰𑐮𑐫𑑂 𑐠𑑅𑐩𑑂𑐴 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐄𑐏𑐾𑐠𑐸𑐏𑐾 𑐫𑑄𑐎𑐾𑐐𑐸 𑑋 𑐁𑑅 𑐩𑑂𑐴𑑂𑐫𑐵𑐫𑑂𑐣𑑄 𑐫𑑄𑐎𑐷𑐐𑐸 𑐖𑐸𑐮𑐎𑐵 𑑋 𑐐𑐸𑐮𑐶 𑐧𑐵𑑄𑐮𑐵𑐎 𑐧𑐶𑐔𑐵𑑅 𑐫𑐵𑐣𑐵𑐴𑑅𑐐𑐸 𑑋” 𑐢𑐵𑐢𑐵𑑄 𑐧𑑁𑐩𑑂𑐴 𑐨𑐵𑐰𑐸𑐎 𑐖𑐸𑐮 𑑋

“𑐰 𑐴𑐾 𑐮𑐵 𑐁𑑅 𑐗𑐷 𑐳𑑄𑐬𑐎𑑂𑐲𑐎 𑐰 𑐀𑐨𑐶𑐨𑐵𑐰𑐎 𑐩𑑂𑐴𑑂𑐫𑐵𑐫𑑂 𑐎𑐵 𑑋”

“𑐴𑑃 𑐩𑐩𑐶 𑐣𑑄 𑐕𑐸 𑐢𑐵𑐂 𑐕𑐸 𑐢𑐵𑐂 𑑋” 𑐩𑑂𑐴𑑂𑐫𑐵𑐫𑑂 𑐣𑑂𑐴𑐶𑐮 𑑋 𑐔𑑂𑐫𑐵𑐡𑑄 𑐮𑐶𑐥𑐵 𑐣𑐵𑐥𑐮𑐵𑐣𑐵𑐩𑑂𑐴 𑐩𑑂𑐴𑑂𑐫𑐵𑐫𑑂𑐣𑐵𑐥 𑐡𑐸𑐏𑑅𑐳𑐸𑐏𑐫𑐵 𑐏𑑃 𑐧𑑂𑐫𑐵𑐎𑐸𑐧𑑂𑐫𑐵𑐎𑐸𑑄 𑐔𑐵𑑅𑐴𑐶𑐮𑐵𑐫𑐵 𑐩𑐖𑑂𑐖𑐵 𑐴𑐾 𑐕𑐐𑐸 𑑋 𑐠𑑅 𑐩𑐔𑐵𑐣𑐵𑐥 𑐔𑐵𑑅𑐴𑐶𑐮𑐵𑐐𑐸 𑐖𑐶𑐣𑑂𑐡𑐐𑐷𑐫𑐵 𑐟𑑅𑐢𑑄𑐐 𑐣𑑂𑐫𑐵𑐂𑐥𑐸𑐐𑐸 𑐀𑐣𑐸𑐨𑐰 𑐖𑐸𑐫𑐵𑐔𑑂𑐰𑐣 𑑋 𑐑𑑁𑐕𑐶 𑐖𑐵𑑅𑐐𑐸 𑐴𑐾 𑐰𑐵𑑅 𑐩𑐔𑐵𑑅𑑋 𑐔𑐵𑑅𑐴𑐶𑐮𑐾 𑐎𑑂𑐰𑐔𑐵𑐮 𑐏𑐣𑐶 𑑋

𑐳𑐣𑐶𑐮𑐫𑐵 𑑕𑑅𑑒𑑐 𑐖𑐸𑐮 𑑋 𑐖𑐶𑐩𑐶𑐐𑐸 𑐧𑐳 𑐁𑑅 𑐟𑐥𑑂𑐫𑑄𑐎 𑐣𑐵𑐫𑐐𑑂𑐬𑐵𑐦𑐮𑑂𑐳 𑐥𑐵𑐏𑐾 𑐣𑑂𑐴𑑂𑐫𑐵𑐟 𑑋 𑐔𑑂𑐫𑐵𑐬𑐔𑐸𑐬 𑐥𑑂𑐫𑐵𑐎𑐾𑐚𑐟 𑐳𑑂𑐫𑑄𑐎𑐸𑐐𑐸 𑐟𑐵𑐫𑑂 𑐡𑐫𑐵𑐔𑑂𑐰𑐣 𑑋 𑐐𑐸𑐩𑑂𑐴𑑄 𑐖𑐸𑐳 𑐟𑑂𑐰𑐣𑐵𑐔𑑂𑐰𑐣 𑑋 𑐖𑐶𑐥𑐶𑑄 𑐣𑑄 𑐎𑐵𑐔𑐵𑐎𑐸𑐔𑐸 𑐣𑐫𑐵 𑑋 𑐧𑐳𑐫𑑂 𑐔𑑂𑐰𑐔𑑂𑐰𑑄 𑐟𑑂𑐫𑐵𑐣𑐸𑐫𑐵 𑐣𑑄 𑐰𑐮 𑑋

𑐧𑐴𑐣𑐶𑐳𑐶𑐫𑐵 𑑘 𑐟𑐵 𑐃 𑐖𑐸𑐮 𑑋 𑐧𑐳 𑐕𑐐𑐹 𑐬𑐾𑐲𑑂𑐚𑑂𑐬𑐵𑑃𑐫𑐵 𑐣𑑂𑐴𑑂𑐫𑑅𑐣𑐾 𑐡𑐶𑐎𑐮 𑑋 𑑘𑑅𑑓𑑐 𑐫𑐵 𑐡𑐸𑐣𑐾 𑐜𑐶𑐣𑐬 𑐣𑐫𑑂 𑐎𑑂𑐰𑐔𑐵𑐫𑐎𑐾𑐩𑐵𑑅𑐐𑐸 𑐳𑐹𑐔𑑄 𑐣𑑂𑐫𑑄𑐎𑐮 𑑋 𑐣𑐫𑑂 𑐟𑑂𑐰𑐣𑐾𑐐𑐸 𑐠𑑅𑐠𑑅 𑐴𑐾 𑐖𑐸𑐐𑐸𑐮𑐶 𑐖𑐶𑐥𑐶 𑐣 𑐬𑐾𑐲𑑂𑐚𑐸𑐬𑐵𑑄𑐮𑐫𑑂 𑐡𑐸𑐴𑐵𑑄𑐰𑐣𑐵 𑑋 𑐀𑐣 𑐫𑐎𑑂𑐰 𑐴𑐾 𑐩𑐣𑐹𑐟 𑐣𑑅 𑐰𑐫𑐵𑐔𑑂𑐰𑑄𑐥𑐶𑑄 𑐡𑐸 𑑋 𑐧𑐦𑐾 𑐥𑐵𑐬𑑂𑐚𑐷 𑐠𑐾𑑄 𑐠𑐷𑐠𑐷 𑐣𑐫𑑂𑐐𑐸 𑐑𑐵𑐳𑐵𑐟 𑐧𑑂𑐰𑐫𑐵𑐟𑐮 𑑋 𑐠𑑅𑐟 𑐫𑑅𑐫𑑅𑐐𑐸 𑐎𑐵𑐫𑑂𑐐𑐸 𑐏𑐣𑐶 𑑋 𑐖𑐶 𑐣𑑄 𑐧𑑂𑐰𑐫𑐵𑐟𑑅𑐐𑐸 𑐳𑐵𑐂𑐏𑑂𑐰𑐵 𑐰𑑅𑐐𑐸 𑐏𑐵𑐣𑐵𑐟 𑐥𑑂𑐮𑐾𑐚 𑐖𑐵𑐫𑑂𑐎 𑐎𑐫𑐵 𑑋 𑐴𑐵𑐎𑐣𑑄 𑐗𑑂𑐰𑐮𑐫𑑂 𑐡𑑄 𑐰𑐫𑐵 𑑋

“𑐩𑐩𑐶 𑐁𑐩 𑐡𑐎𑑂𑐰𑑄 𑐣𑐫𑑂𑐐𑐸 𑐏𑑅𑐮𑐵 ?”

“𑐣𑐫𑑂𑐮𑐵 𑐦𑐂𑐩𑐏𑐸 𑑋 𑐕𑐎𑐹 𑐕𑐎𑐹 𑐖𑐎 𑐎𑐫𑐵𑐧𑐮𑐫𑑂 𑐥𑑂𑐮𑐾𑐚 𑐖𑐵𑐮𑐎𑐵 𑑋 𑐀𑐥𑑂𑐰𑑅𑐳𑐵 𑐰𑐵𑑄 𑐕𑐰𑐫𑑂𑐎𑐵 𑑋” 𑐫𑐵𑐄𑑃𑐎 𑐢𑐫𑐵 𑑋

“𑐠𑐣 𑐏𑐵𑐣𑐵 𑐮𑐣𑐵𑑅 𑐧𑐷 𑑋“

“𑐊 𑑋 𑐏𑑅𑐮𑐵 ? 𑐖𑐶 𑐀𑐖𑐹𑐔𑐵𑐮 𑑋 𑐐𑐸𑐮𑐶𑐩𑐕𑐶 𑐮𑐵 𑐣𑐫𑑂 𑐦𑐂𑐩𑐏𑐸 𑑋” 𑐀𑐥𑑂𑐰𑑅𑐐𑐸 𑐮𑐶𑐎𑐫𑐵 𑑋 𑐴𑐵𑐎𑐣𑑄 𑐗𑑂𑐰𑑅𑐕𑐸 𑐰𑐫𑐵 𑑋 𑐄𑐮𑐶 𑐎𑐫𑐵𑐐𑐸 𑐣𑑄 𑐣𑐫𑑂𑐩𑐦𑐸 𑑋 𑐩𑑂𑐴𑑂𑐫𑐵𑐫𑑂 𑐣𑑂𑐴𑐶𑐮𑐵𑐔𑑂𑐰𑐣 𑑋 𑐫𑐵𑐎𑐣𑑄 𑐣𑐫𑑂 𑐎𑑂𑐰𑐔𑐵𑐫𑑂𑐎𑐵𑑅 𑐥𑐶𑐣𑐾 𑐰𑐫𑐵 𑑋 𑐩𑐾𑐥𑐶𑑄 𑐳𑐶𑐢𑑅𑐥𑐶 𑐣 𑐀𑐣 𑐰𑐮 𑑋 𑐣𑑂𑐰𑐰𑐵𑐫𑑂 𑐩𑑂𑐰𑐵𑑅𑐳𑐵 𑐣𑐵𑐥 𑐰𑐣𑐵𑐥𑐶 𑐀𑐥𑑂𑐰𑑅 𑐴𑐾 𑐩𑑂𑐴𑐳𑐶𑐮 𑑋 𑐳𑐎𑐮𑐾𑑄 𑐖𑐶𑐥𑐶𑑄 𑐄𑐐𑐸 𑐠𑐵𑐳𑑄 𑑑𑑕 𑐐𑐹 𑐩𑐶𑐣𑐾𑐚 𑐟𑐶 𑐣𑑂𑐫𑐵𑐳𑐶𑐰𑐣𑐵 𑑋

𑐟𑐵𑐥𑐵𑐎𑐣𑐶𑐳𑐾𑑄 𑐬𑐒𑑂𑐐𑐷𑐔𑐒𑑂𑐐𑐷 𑐩𑐟 𑐔𑑂𑐫𑐵𑑅𑐐𑐸 𑐠𑐾𑑄 𑐏𑐣 𑑋 𑐖𑐶𑐩𑐶𑐐𑐸 𑐥𑐮𑐵𑑅 𑐰 𑐬𑐒𑑂𑐐𑐷𑐔𑐒𑑂𑐐𑐷 𑐩𑐟𑐣𑐵𑐥 𑐗𑑅𑐗𑑅 𑐳𑐟𑑂𑐟𑐶𑐣𑐵𑐰𑐮 𑑋 𑐌𑐴𑑀 ! 𑐀𑐣𑐮𑐵 𑐐𑐸𑐮𑐶 𑐩𑐣𑐹𑐟 𑐩𑑂𑐰𑑅𑐩𑑂𑐰𑑅 𑐩𑐸𑐣𑐵𑐔𑑂𑐰𑐣 𑑋 𑐬𑐒𑑂𑐐𑐷𑐔𑐒𑑂𑐐𑐷 𑐩𑐟𑐫𑐵 𑐣𑐵𑐫𑑂𑐐𑑂𑐬𑐵𑐦𑐮𑑂𑐳 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐶 𑑋 𑐖𑐶𑐥𑐶𑑄 𑐣 𑐴𑐮𑐩𑐸𑐮 𑐔𑐷𑐎𑐸𑐔𑐷𑐎 𑐣𑑂𑐴𑑂𑐫𑑅𑐣𑐾 𑐥𑑅𑐏𑐵𑐮𑐫𑑂 𑐠𑑂𑐫𑐣 𑑋 𑐥𑑂𑐬𑐟𑑂𑐫𑐎𑑂𑐲 𑐡𑐬𑑂𑐱𑐣 𑐫𑐵𑐣𑐵 𑐣𑐵𑐫𑐐𑑂𑐬𑐵𑐫𑐵𑐟 𑑋 𑐌𑐴𑑀 𑑋 𑐐𑐸𑐮𑐶 𑐧𑐵𑑄𑐮𑐵 𑐧𑐴𑐣𑐷 𑐏𑑄𑐩𑑂𑐴 𑐣𑐵𑐫𑐐𑑂𑐬𑐵 𑑋 𑐴𑑂𑐫𑐵𑑄𑐐𑐸, 𑐰𑐵𑑄𑐐𑐸, 𑐩𑑂𑐴𑐵𑐳𑐸𑐐𑐸 𑐠𑐷𑐠𑐷 𑐬𑐒𑑂𑐐 𑐳𑐩𑐵𑑅 𑐫𑐵𑐣𑐵𑑅 𑐥𑑂𑐫𑐵𑐏𑑄 𑐎𑑂𑐫𑐣𑐵𑐔𑑂𑐰𑐣 𑑋 𑐩𑐣𑐹𑐟 𑐳𑐎𑐮𑐾 𑐮𑐛𑑂𑐛 𑐖𑐸𑐫𑐵 𑐳𑑂𑐰𑐫𑐵𑐔𑑂𑐰𑐣 𑑋 𑐩𑐣𑐹𑐟𑐫𑑂 𑐩𑑂𑐴𑐸𑐟𑐸 𑐳𑑂𑐰𑐳𑑂𑐦𑐹𑐬𑑂𑐟 𑐥𑐶𑐖𑑂𑐰𑐫𑐵𑐔𑑂𑐰𑐣, “𑐰𑐵𑐄 ! 𑐁𑐴𑐵 ! 𑐩𑑀𑐧𑐵𑐂𑐮 𑐎𑑂𑐫𑐵𑐩𑐾𑐬𑐵, 𑐨𑐶𑐜𑐶𑐫𑑀 𑐎𑑂𑐫𑐵𑐩𑐾𑐬𑐵 𑐣𑑂𑐴𑑂𑐫𑑅𑐣𑐾 𑐡𑐾𑐟𑑄 𑐡𑐾𑐟𑑄 𑐰𑐣𑐾𑐮 𑐳𑑂𑐰𑐫𑐵𑐔𑑂𑐰𑐣 𑑋 𑐩𑐾𑐠𑐵𑐫𑑂 𑐦𑐸𑐎𑐨𑐣𑑄 𑐏𑐶𑐄𑑃𑐳𑐾 𑑋 𑐄𑐐𑐸 𑐠𑐵𑐫𑑂 𑐕𑐐𑐸𑐮𑐶𑑄 𑐗𑑅𑐗𑑅 𑐢𑐵 𑑋 𑐎𑑂𑐰𑐧𑑂𑐰𑐵𑐣𑐵𑐔𑑂𑐰𑑄𑐐𑐸 𑐗𑑂𑐰𑐵𑐮𑐵 𑐠𑐷𑐠𑐷 𑐬𑐒𑑂𑐐 𑐡𑐣𑑂𑐣 𑐔𑑂𑐫𑐵𑐣𑐵𑑅 𑐩𑐣𑐫𑐵𑐟 𑐬𑑀𑐩𑐵𑐘𑑂𑐔𑐶𑐟 𑐫𑐵𑐣𑐵𑐧𑐶𑐮 𑑋 𑐳𑑄𑐳𑐵𑐬𑐫𑐵 𑐔𑑂𑐫𑐵𑐐𑐹𑐐𑐸 𑐁𑐱𑑂𑐔𑐬𑑂𑐫 𑐀𑐫𑐾 𑐢𑐵𑐮 𑐏𑐂𑐮𑐵 ? 𑐣𑐵𑐫𑑂𑐐𑑂𑐬𑐵 𑐣𑐵𑑄𑐫𑐵 𑐔𑑂𑐰 𑐏𑐸𑐳𑐶 𑐎𑑂𑐫𑐵𑐣𑐵𑐜𑐵 𑐰 𑐀𑐩𑐾𑐬𑐶𑐎𑐵𑐫𑐵 𑐳𑐶𑐩𑐵𑐣𑐵 𑐴𑑃 𑑋 𑐎𑐶𑐥𑐵𑑅𑐟 𑐎𑐫𑐵 𑑋 𑐐𑐸𑐮𑐶 𑐣𑑂𑐴𑐫𑐵𑐂𑐥𑐸𑐐𑐸 𑐮𑐹 𑑋 𑐖𑐶𑐣𑑂𑐡𑐐𑐷𑐂 𑐐𑐧𑐮𑐾 𑐳𑑂𑐰𑐫𑑂 𑐩𑐣𑑄𑐐𑐸 𑐏𑐣 𑑋 𑐔𑐶𑐎𑐸𑐳𑐾 𑐠𑐸𑐬𑐠𑐸𑐬 𑐏𑐵𑑅𑐳𑐵𑑄 𑐩𑐶𑐏𑐵𑑄 𑐳𑑂𑐰𑐫𑐐𑐸 𑐩𑐟𑑂𑐰𑑅𑐟𑐹 𑑋 𑐩𑐣𑑄 𑐁𑐣𑐣𑑂𑐡𑐫𑐵 𑐀𑐣𑐸𑐨𑐹𑐟𑐶 𑐫𑐵𑐣𑐵𑐔𑑂𑐰𑐣 𑑋 𑐄𑐜𑐳𑐵𑐂𑐡𑐫𑑂 𑐖𑐶𑐥𑐶 𑐔𑑂𑐰𑐣𑐵𑐠𑐵𑐫𑑂 𑐟𑐵𑐣𑑂𑐰𑑅 𑑋 𑐀𑐠𑐾 𑐖𑐸𑐫𑐵𑑅 𑐏𑑂𑐰𑐵𑐟𑐸𑐐𑐸 𑐰𑐳𑑅 𑐖𑑂𑐰𑐣𑐵𑐩𑐰𑐫𑐵 𑑋

“𑐖𑐶 𑐣𑑄 𑐠𑐣𑐫𑐵 𑐰𑐾𑐡𑐬 𑐳𑑂𑐰𑐫𑑂 𑐩𑐮𑐵𑐟 𑑋”

𑐩𑑂𑐴𑑂𑐫𑐵𑐫𑑂𑐫𑐵 𑐠𑑅𑐩𑑂𑐴 𑐡𑑂𑐰𑑄𑐎𑐵𑐐𑐸 𑐟𑐵𑐫𑑂𑐎𑐮 𑑋

𑐧𑐴𑐵𑐣𑐶𑐳𑐶𑐫𑐵 𑑑𑑐 𑐟𑐵 𑐃 𑐖𑐸𑐮 𑑋 𑐀𑐫𑑂𑐣 𑐩𑐣𑐹𑐟 𑐄𑐮𑐶 𑐴𑐾 𑐳𑑂𑐰𑐫𑐵𑐔𑑂𑐰𑐥𑐶𑑄 𑐡𑐸 𑑋

“𑐎𑐵 𑐣𑐸 𑐣𑐸 𑐣𑐸 𑐮𑐶𑐧𑐵𑐟 𑑋 𑐎𑐣𑑂𑐴𑐾 𑐴𑐵𑐎𑐣𑑄 𑐳𑑂𑐰𑑅𑐰𑐫𑑂 𑐩𑐵𑐣𑐶 𑑋” 𑐢𑐵𑐢𑐵𑑄 𑐰 𑐐𑐵𑐂𑐜 𑐏𑐵𑐔𑐵𑐟𑐫𑑂𑐟 𑐏𑑂𑐫𑐵𑐣𑐵𑐴𑐫𑑂 𑐠𑐾𑑄 𑐖𑐶𑐩𑐶𑐐𑐸 𑐥𑐸𑐔𑑅𑐫𑐵𑐟 𑐩𑐸𑐣𑐵𑐴𑐮 𑑋 𑐖𑐶𑐥𑐶𑑄 𑐳𑐎𑐮𑐾𑑄 𑐐𑐵𑐜𑐷𑐂 𑐔𑑂𑐰𑐣𑐵 𑑋 𑐐𑐖𑐵𑑅𑐐𑐸 𑐧𑐵𑐮𑐵𑑅𑐐𑐸 𑐴 𑐮𑐵 𑐢𑐵𑐢𑐵𑑄, 𑐮𑐫𑑂𑐟𑐵𑐫𑐵 𑐔𑑂𑐰𑐣𑐵 𑑋 𑐩𑐾𑐥𑐶𑑄 𑐣𑑄 𑐀𑐠𑐾 𑐴𑐾 𑐢𑐫𑐵𑐔𑑂𑐰𑑄𑐐𑐸 𑐠𑐾𑑄 𑐏𑐣𑐾𑐡𑐸 𑑋 𑐳𑐎𑐳𑐶𑐫𑐵 𑐏𑑂𑐰𑐵𑐮𑐫𑑂 𑐮𑐫𑑂𑐟𑐵𑑅 𑐥𑐶𑐖𑑂𑐰𑑅 𑑋 𑐨𑐔𑐵 𑐖𑐵𑐫𑑂𑐰𑑄 𑐟𑑂𑐫𑐵𑐣𑐸𑐐𑐸, 𑐔𑐶𑐎𑐸𑐐𑐸 𑐰 𑐮𑐶𑐧𑐵𑑅𑐐𑐸𑐮𑐶𑑄 𑐐𑐧𑐮𑐾 𑐠𑑂𑐫𑐣𑐷 𑐠𑐾 𑐴𑐠𑐵𑐫𑑂 𑐔𑐵𑐮 𑑋 𑐠𑑂𑐫𑑄𑐩𑐠𑑂𑐫𑑄 𑐑𑑁𑐕𑐶 𑐖𑐵𑐫𑑂𑐎𑐵 𑐔𑐵𑐣𑑂𑐴𑐳𑐶𑐫𑐵 𑑑𑑑 𑐟𑐵 𑐂𑐮𑐫𑑂 𑐜𑐾𑐖 𑐂𑐣 (𑐩𑑂𑐧𑐠𑐎 𑐎𑑂𑐲𑑂𑐮𑐮) 𑐢𑐵𑑅𑐐𑐸 𑐴𑑀𑐚𑐮𑐫𑑂 𑐠𑑂𑐫𑐣 𑑋 𑐟𑐵𑐄𑐟 𑐀𑐮𑐩𑐮 𑐩𑐫𑐵𑐳𑐾 𑐣𑑂𑐴𑑂𑐫𑑅 𑐰𑐫𑑂𑐎𑐾𑐟 𑐎𑐸𑐟𑑅 𑐫𑐵𑐣𑐵 𑑋 𑐎𑐣𑑂𑐴𑐾 𑐫𑐵𑐎𑐣 𑐣𑐵𑐫𑐐𑑂𑐬𑐵𑐫𑐵𑐟 𑐣𑐵𑐥𑐮𑐵𑐫𑑂𑐐𑐸 𑐩𑐟𑐷 𑐟𑐫𑐵𑑅 𑑋

𑐎𑐣𑑂𑐴𑐾𑐏𑐸𑐣𑐸 𑐳𑐾𑐥𑑂𑐚𑐾𑐩𑑂𑐧𑐬 𑑑𑑖 𑐁𑐂𑐟𑐧𑐵𑐬 𑑋 𑐳𑐸𑐠 𑐣𑑂𑐴𑐵𑐥𑐵𑑄 𑐴𑐾 𑐩𑐶𑐏𑐵 𑐔𑐵𑐮 𑑋 𑐳𑐸𑐠𑐫𑑂 𑑖𑑅𑑓𑑐 𑐟𑐵 𑐂𑐮𑐫𑑂 𑐴𑐾 𑐴𑑀𑐚𑐮𑐫𑑂 𑐧𑑂𑐬𑐾𑐎𑐦𑐵𑐳𑑂𑐚 𑐫𑐵𑐣𑐵 𑑗𑑅𑑓𑑐 𑐟𑐵 𑐂𑐮𑐫𑑂 𑐴𑑀𑐚𑐮 𑐥𑐶𑐴𑐵𑑄𑐰𑐫𑐵 𑑋 𑐖𑐶 𑐮𑐵 𑐟𑐥𑑂𑐫𑑄𑐎 𑐣𑐵𑐫𑑂𑐐𑑂𑐬𑐵𑐦𑐮𑑂𑐳 𑐫𑑄𑐎𑐷𑐐𑐸 𑐖𑐸𑐂 𑐢𑐎𑐵 𑐔𑑂𑐰𑐣𑐵 𑑋 𑐥𑐸𑐮𑐵𑑄𑐐𑐸 𑐋𑐟𑐶𑐴𑐵𑐳𑐶𑐎 𑐎𑐶𑐮𑑂𑐮𑐵 𑐌𑐮𑑂𑐜 𑐦𑑀𑐬𑑂𑐚 (Old Fort) 𑐫𑐵 𑐣𑐶 𑐀𑐰𑐮𑑀𑐎𑐣 𑐫𑐵𑐎𑐾𑐴𑐮 𑑋 𑐀𑐣 𑐳𑐬𑐬𑐬 𑐱𑐵𑐮𑐶𑐎𑐟, 𑐧𑐣𑑂𑐡𑐸𑐎𑐟, 𑐩𑐾𑐱𑐶𑐣𑐐𑐣𑐟 𑐟𑐫𑐵𑐟𑑅𑐐𑐸 𑐳𑑂𑐰𑐫𑐵 𑑋 𑐀𑐣𑑄 𑐟𑐥𑑂𑐫𑐎 𑐣𑐵𑐫𑑂𑐐𑑂𑐬𑐵𑐦𑐮𑑂𑐳 𑐳𑑂𑐰𑐫𑑂𑐟 𑐰𑐣𑐵𑑅 𑑋

𑐀𑐣 𑐠𑑂𑐫𑐎𑐮𑐫𑑂 𑐟𑐣𑑂𑐣 𑐩𑐣𑐹𑐟 𑐗𑑂𑐰𑑅𑐕𑐸𑐣𑐵 𑐔𑑂𑐰𑐣𑐾 𑐢𑐸𑑄𑐎𑐮 𑑋 𑐔𑑂𑐰𑑄 𑐳𑑂𑐰𑐫𑐵𑐔𑑂𑐰𑐣𑐵 𑑋 𑐎𑑂𑐰𑐫𑑂 𑐰𑐔𑐹𑐐𑐸 𑐬𑐾𑐣𑐎𑑀𑐚 𑐦𑐶𑐣𑐵𑐟𑑅𑐥𑐶 𑐩𑑂𑐰𑑅𑐩𑑂𑐰𑑅 𑐏𑐣𑐾𑐡𑐸 𑑋 𑐖𑐶𑐩𑐶𑐐𑐸 𑐗𑑂𑐰𑑅 𑐣𑑄 𑐧𑐸𑐮𑐸𑐴𑐸 𑐣𑑂𑐴𑑂𑐫𑐵𑐣𑐵𑐔𑑂𑐰𑐣 𑑋 𑐖𑐶𑐩𑐶𑐐𑐸 𑐚𑐶𑐎𑐚 𑐖𑐵𑑄𑐔 𑐫𑐵𑐣𑐵𑑅 𑐖𑐶𑐩𑐶𑐟 𑐣 𑐰𑐔𑐹𑐐 𑐬𑐾𑐣𑐎𑑀𑐚 𑐧𑐶𑐮 𑑋 𑐄𑐐𑐸 𑐮𑑄 𑐦𑐶𑐣𑐵𑑅 𑐴𑐵𑐎𑐣𑑄 𑐣𑐵𑑄𑐔𑐵𑐫𑑂 (𑐖𑐴𑐵𑐖𑐫) 𑐔𑑂𑐰𑐣𑐾𑐟 𑐗𑑂𑐰𑑅 𑐕𑐸𑐣𑐵 𑑋 𑐳𑑂𑐰𑐳𑑂𑐰𑑄 𑐠𑐵𑐫 𑐰𑐔𑐹𑐐𑐸 𑐬𑑄𑐐 𑐳𑐬𑑂𑐐 𑐴𑐾 𑐠𑐣 𑐏𑑅𑐮𑐵 𑐢𑐂 𑐰𑐾 𑐔𑑂𑐰𑑄 𑑋 𑐮𑐎𑐳 𑐣𑑂𑐴𑑂𑐫𑐵𑐂𑐥𑐸𑐳𑐾 𑐔𑑂𑐰𑑄 𑑋 𑐣𑐶𑐨𑐵𑑅 𑐣 𑐠𑐶𑐣𑐵𑐧𑑂𑐫𑐹𑐐𑐸 𑐡𑐸 𑑋 𑐄𑐎𑐶 𑐖𑐶𑐩𑐶𑐐𑐸 𑐩𑑂𑐴 𑐣 𑐮𑐸𑐩𑐸𑐎𑐵𑐧𑑂𑐫𑐹𑐐𑐸 𑐡𑐸 𑑋

“𑐩𑐩𑐶𑐜𑑂𑐫𑐵𑐜𑐷 𑐰𑑅𑐧𑐮𑐫𑑂 𑐩𑑁𑐳𑐩 𑐧𑐵𑑄𑐮𑐵 𑐎𑐵 𑑋 𑐖𑐶𑐥𑐶𑑄 𑐣𑑂𑐴𑐵𑐥𑐵 𑐰𑐫𑐵𑐧𑐮𑐫𑑂 𑐰𑐵 𑐰𑑅 𑑋 𑐕𑐸 𑐴𑐾 𑐣𑑂𑐴𑑂𑐫𑐵𑐂𑐥𑐸𑐳𑐾 𑐩𑐔𑑂𑐰 𑑋” 𑐩𑑂𑐴𑐫𑐵𑐫𑑂 𑐣𑑄 𑐢𑐫𑐵𑐔𑑂𑐰𑐣 𑑋 𑐐𑐣𑑄 𑐖𑐵𑐟𑑂𑐬𑐵 𑐳𑑂𑐰𑑅𑐰𑐫𑐵 𑐔𑑂𑐰𑐣𑐵𑐐𑐸 𑐠𑐾𑑄 𑐖𑐶𑐐𑐸 𑐩𑐣 𑐟𑐳𑐎𑑄 𑐄𑐟𑑂𑐳𑐵𑐴𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐖𑐶𑐐𑐸 𑐣𑐸𑐐𑐮𑐫𑑂 𑐮𑐫𑑂𑐟𑐵𑑅 𑐨𑐫𑑂𑐨𑐫𑑂 𑐧𑐶𑐫𑐵𑐰𑐮 𑑋 𑐧𑐳𑐫𑑂 𑐟𑐫𑑂𑐩𑐦𑐸𑐩𑑂𑐴 𑐰 𑐔𑐘𑑂𑐔𑐮 𑐔𑐶𑐟𑑂𑐟 𑐣𑐵𑐫𑐐𑑂𑐬𑐵 𑐔𑐵𑐴𑑂𑐫𑐹 𑐰𑐣𑐾 𑐢𑐸𑑄𑐎𑐮 𑑋 𑐄𑐎𑐶𑑄 𑐩𑐣𑐫𑐵 𑐣𑑄 𑐴𑐠𑐵𑐫𑑂 𑐔𑐵𑑅 𑐫𑐵𑐎𑐣 𑐳𑑂𑐰𑐫𑑂𑐟 𑑋 𑐣𑐶𑐟𑐖𑐵𑑅𑐐𑐸 𑐣𑐵𑑄𑐔𑐵𑐫𑑂 𑐔𑑂𑐰𑐣𑐵 𑑋 𑐳𑐎𑐮𑐾𑑄 𑐴𑐸𑐬𑐸𑐬𑐸𑐬𑐸 𑐣𑑂𑐴𑐫𑑅𑐣𑐾 𑐧𑐵𑐬𑐫𑑂 𑐔𑑂𑐰𑐣𑐾𑐟 𑐧𑑂𑐫𑐵𑑃𑐫𑑂 𑐖𑐸𑐮 𑑋 𑐖𑐶𑐥𑐶𑑄 𑐀𑐮𑐩𑐮 𑐖𑐸𑐫𑐵𑑅 𑐐𑐸𑐏𑐾 𑐰𑐣𑐾 𑐐𑐸𑐏𑐾 𑐰𑐣𑐾 𑐖𑐸𑐮 𑑋 𑐔𑑂𑐰𑐫𑑂 𑐠𑐵𑐴𑐵 𑐰𑐣𑐵 𑑋

“𑐁𑐴𑐵 ! 𑐗𑑂𑐰𑐵𑐮𑐵 𑐖𑐶𑐐𑐸 𑐣𑑂𑐴𑑂𑐫𑑅𑐣𑐾 𑑋 𑐐𑐸𑐮𑐶 𑐧𑐵𑑄𑐮𑐵𑐐𑐸 𑐐𑐸𑐮𑐶 𑐩𑐣𑐩𑑀𑐴𑐎 𑑋 𑐳𑐎𑐮𑐾 𑐮𑐫𑑂𑐟𑐵𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐖𑐶𑐥𑐶𑑄 𑐗𑐣 𑐗𑐣 𑐗𑑂𑐰𑐵𑐮𑐵 𑐳𑐟𑑂𑐟𑐶𑐎 𑐰𑐣𑐵𑐔𑑂𑐰𑐣𑐵 𑑋 𑑑𑑕𑑕 𑐦𑐶𑐟 𑐔𑑂𑐰𑑄 𑐎𑑂𑐰𑐧𑑂𑐰𑐵𑐣𑐵𑐔𑑂𑐰𑑄𑐐𑐸 𑐗𑑂𑐰𑐵𑐮𑐵 𑐳𑐎𑐮𑐾𑑄 𑐩𑐣𑐸𑐟𑐫𑑂𑐳𑑄 𑐳𑑂𑐰𑐫𑐵𑐔𑑂𑐰𑑄𑐐𑐸𑐮𑐶𑑄 𑐣𑑂𑐫𑐵𑐳𑐶𑑅 𑐔𑐵𑐫𑐵 𑐖𑐶𑐩𑐶𑐟 𑐮𑐏𑑄 𑐕𑑂𑐰𑐵𑐎𑐵𑐴𑐮 𑑋 𑐁𑐴𑐵 ! 𑐣𑐵𑐫𑑂𑐐𑑂𑐬𑐵 𑐳𑐶𑐔𑐸𑐎 𑐩𑑂𑐰𑑅𑐮𑑂𑐴𑐸𑐎𑐮 𑑋 𑐖𑐶𑐥𑐶𑑄 𑐳𑐎𑐳𑐶𑐣𑑄 𑐮𑑂𑐴𑐵 𑐩𑐶𑐮𑐾𑐫𑐵𑐣𑐵 𑑋 𑐳𑐵𑐎𑑂𑐲𑐵𑐟 𑐗𑑂𑐰𑐵𑐮𑐵𑐣𑐵𑐥𑑄 𑐎𑐸𑐮𑐶 𑐔𑐶𑐣𑐵 𑐠𑐾𑑄 𑐟𑐵𑐮 𑑋 𑐠𑐸𑐮𑐶 𑐳𑐟𑑂𑐟𑐶𑐎 𑐳𑑂𑐰𑐫𑑂𑐏𑐣𑐷 𑐢𑐂𑐐𑐸𑐮𑐵 𑐧𑐶𑐔𑐵𑑅 𑐴𑐾 𑐩𑐫𑐵𑐣𑐵𑐐𑐸 𑑋 𑐩𑐣𑐹𑐟𑐫𑑂 𑐀𑐠𑐾𑑄 𑐩𑑂𑐴𑐸𑐟𑐸 𑐳𑑅 𑐥𑐶𑐖𑑂𑐰𑐫𑐵𑐔𑑂𑐰𑐣 𑑋 𑐮𑐫𑑂𑐟𑐵𑐫𑐵 𑐳𑑅 𑐠𑑂𑐰𑐫𑐵𑐔𑑂𑐰𑐣 𑑋 𑐣𑑂𑐴𑑂𑐫𑐂𑐫𑐸𑐎 𑐟𑐵𑐄𑐟 𑐳𑑂𑐰𑐫𑑂 𑐴𑐾 𑐩𑐐𑐵𑐣𑐷 𑑋 𑐣𑐵𑑄𑐔𑐵 𑐀𑐣𑑄 𑐦𑑅𑐴𑐶𑐮 𑑋 𑐄𑐏𑐾 𑐎𑑂𑐫𑐵𑐣𑐵𑐜𑐵𑐥𑐵𑐏𑐾𑑄 𑐰𑑅𑐐 𑐣𑐵𑑄𑐔𑐵𑐫𑑂 𑐴𑑂𑐫𑐵𑑄𑐐𑐸 𑐬𑐾𑐣𑐎𑑀𑐚 𑐦𑑂𑐫𑐹𑐥𑐶 𑐣𑑄 𑐠𑐸𑐏𑐾 𑐣𑑂𑐴𑑂𑐫𑐵𑑅𑐰𑐫𑐵𑐔𑑂𑐰𑑄𑐐𑐸 𑐏𑐣𑐵 𑑋 𑐴𑑂𑐫𑐵𑑄𑐐𑐸 𑐰 𑐰𑐔𑐹𑐐𑐸 𑐣𑐵𑑄𑐔𑐵𑐟 𑐳𑑂𑐰𑐵𑑄 𑐴𑑂𑐰𑐫𑐵𑐔𑑂𑐰𑐠𑐾𑑄 𑐧𑐵𑐮𑐵𑑅 𑐏𑐣𑐾𑐡𑐸 𑑋 𑐐𑐸𑐮𑐶 𑐥𑐬𑑂𑐫𑐚𑐎𑐟𑐫𑐟 𑐳𑐣𑑂𑐟𑐸𑐲𑑂𑐚𑐷 𑐧𑐶𑐫𑐵𑐔𑑂𑐔𑐣 𑐰 𑐣𑐵𑐫𑐐𑑂𑐬𑐵𑑄 𑑋 𑐳𑐎𑐳𑐶𑐫𑐵 𑐣𑐸𑐐𑐮𑐫𑑂 𑐔𑑂𑐰𑐣𑐾𑐦𑐸𑐩𑑂𑐴 𑐰 𑐣𑐵𑐫𑑂𑐐𑑂𑐬𑐵 𑐣𑑂𑐴𑐵𑐥𑐵𑐫𑐵 𑐖𑐣𑑂𑐩𑐫𑑂 𑐫𑐎𑑂𑐰 𑐴𑐾 𑐢𑐬𑑂𑐩 𑐫𑐵𑐣𑐵𑐰𑑅𑐐𑐸 𑐖𑐸𑐂𑐩𑐵𑑅 𑑋 𑐔𑐵𑐣𑑂𑐴𑐫𑑂 𑐩𑐢𑐵 𑐣𑑂𑐴𑐶𑐣𑐫𑑂 𑐩𑐢𑐵𑑅, 𑐔𑐶𑐎𑐸 𑐩𑐢𑐵𑑅, 𑐟𑐵𑐣𑑂𑐰𑑅 𑐩𑐢𑐵𑑅 𑐩𑐡𑐶𑐎𑑂𑐎 𑐣𑑂𑐴𑑂𑐫𑐵𑐣𑐵𑐔𑑂𑐰𑐣𑐷 𑑋 𑐢𑐣𑑂𑐫 𑐣𑐵𑐫𑑂𑐐𑑂𑐬𑐵 𑑋 𑐕𑐣𑐵𑐥 𑐳𑑂𑐥𑐬𑑂𑐱 𑐫𑐵𑐫𑑂𑐏𑐣𑐷 𑐢𑐂𑐐𑐸𑐮𑐵 𑐎𑐮𑑂𑐥𑐣𑐵 𑐴𑐾 𑐩𑐫𑐵𑐣𑐵𑐐𑐸 𑐎𑐵 𑑋 𑐳𑑂𑐰𑐳𑑂𑐰𑑄 𑐳𑑂𑐰𑐫𑑂 𑐴𑐾 𑐩𑐐𑐵𑑅 𑑋 𑐣𑐵𑑄𑐔𑐵𑑄 𑐥𑐶𑐴𑐵𑑄𑐰𑐫𑑂 𑐟𑑂𑐫𑐫𑑂 𑐢𑐸𑑄𑐎𑐮 𑑋

“𑐁𑑅 𑐔𑑂𑐰𑐫𑑂 𑐰𑐣𑐵𑑅 𑐳𑑂𑐰𑐫𑑂𑐐𑐸” 𑐩𑑂𑐴𑑂𑐫𑐵𑐫𑑂 𑐔𑑂𑐰𑐫𑑂 𑐧𑑂𑐰𑐣𑐵𑐴𑐮 𑑋 𑐥𑑅𑐏𑐵𑐮𑐫𑑂 𑐔𑑂𑐰𑐣𑐵𑑅 𑐳𑑂𑐰𑐫𑐵𑐔𑑂𑐰𑐣𑐵 𑑋 𑐠𑑂𑐰 𑐡𑐾𑐫𑑂𑐫𑐵 𑐣 𑐨𑐵𑐐𑑂𑐫 𑐴𑐾 𑐏𑑅 𑐥𑑂𑐬𑐎𑐺𑐟𑐶𑑄 𑐐𑐸𑐮𑐶 𑐧𑐵𑑃𑐮𑐵𑑅𑐐𑐸 𑐰𑐬𑐡𑐵𑐣 𑐧𑐶𑐫𑐵𑐟𑑅𑐐𑐸 𑑋 𑐠𑑅𑐐𑐸 𑐡𑐾𑐱𑐫𑑂 𑐣𑑄 𑐐𑐣𑑄 𑐩𑐡𑐸𑐐𑐸 𑐡𑐎𑐮𑐾 𑐟𑑅𑐖𑐵𑑅𑐐𑐸 𑐴𑐶𑐩𑐵𑐮 𑐳𑐐𑐬𑐩𑐵𑐠𑐵 𑐡𑐸 𑑋 𑐩𑐣𑐩𑐣𑑄 𑐠𑑅𑐐𑐸 𑐕𑐵𑐟𑐶 𑐣𑑄 𑐐𑐬𑑂𑐰 𑐦𑐸𑐮𑐾 𑐖𑐸𑐮 𑑋 𑐠𑑂𑐰 𑐖𑐎 𑐳𑑂𑐰𑐫𑑂𑐟 𑐩𑐣𑐹𑐟 𑐐𑐣𑑄 𑐖𑐎 𑐰𑑅𑐐𑐸 𑐖𑐸𑐂 𑑋 𑐖𑐶𑐐𑐸 𑐩𑐶𑐏𑐵 𑐴𑐵𑐎𑐣𑑄 𑐰 𑐴𑐾 𑐗𑑂𑐰𑐵𑐮𑐵𑐫𑑂 𑐠𑑂𑐫𑐣 𑑋 𑐔𑑂𑐰𑐫𑑂 𑐩𑐵𑐠𑐰𑑄𑐐𑐸 𑐠𑐾𑑄 𑐟𑐧𑑂𑐫𑐵𑐎 𑐏𑐸𑐳𑐶, 𑐰 𑐴𑐾 𑐏𑐸𑐳𑐶 𑐕𑐠𑐸𑑄 𑐎𑑂𑐰𑐫𑑂 𑐎𑑂𑐰𑐧𑑂𑐰𑐵𑑅𑐐𑐸 𑐮𑐹 𑐩𑐡𑐶𑐎𑑂𑐎 𑐳𑑂𑐰𑐫𑐵𑐔𑑂𑐰𑐣𑐵 𑑋 𑐣𑑂𑐴𑑂𑐫𑐵𑐎𑑂𑐰 𑐳𑑂𑐰𑑅𑐳𑐵𑑄 𑐩𑐶𑐏𑐵𑐫𑐵 𑐟𑑂𑐫𑐵𑐣𑐸 𑐩𑐔𑐵𑑅 𑑋 𑐖𑐶 𑐨𑐵𑐰𑐸𑐎 𑐖𑐸𑐫𑐵 𑑋 𑐣𑐵𑐫𑐐𑑂𑐬𑐵𑑄 𑐖𑐶𑐐𑐸 𑐩𑐣𑐫𑐵𑐟 𑐳𑐵𑐮𑐵𑑅 𑐴𑐾 𑐔𑑂𑐰𑐣 𑑋 𑐗𑐸𑐩𑐶𑐫𑐩𑑂𑐴 𑐠𑐾 𑐖𑐶 𑐣𑑄 𑐣𑐵𑐫𑑂𑐐𑑂𑐬𑐵𑐣𑐵𑐥𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑐣𑐵 𑑋

“𑐩𑐩𑐶 𑐣𑐸 𑐮𑐘𑑂𑐔 𑐫𑐵𑐫𑑂𑐟 𑑋” 𑐩𑑂𑐴𑑂𑐫𑐵𑐫𑑂𑐫𑐵 𑐳𑐮𑑄 𑐖𑐶 𑐗𑐳𑐒𑑂𑐐 𑐖𑐸𑐮 𑑋 𑐣𑐵𑐫𑐐𑑂𑐬𑐵𑐣𑐵𑐥𑑄 𑐔𑑂𑐰𑐣𑐵𑑅 𑐎𑐶𑐥𑐵𑑅𑐟 𑐎𑐫𑐵 𑑋 𑐰𑐣𑐾𑐟 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵𑑅 𑑋 𑐣𑐵𑐫𑐐𑑂𑐬𑐵𑑄 𑐰𑐣𑐾 𑐩𑐟𑐾𑐣𑐶 𑐢𑐫𑐵𑐔𑑂𑐰𑐣 𑑋 𑐂𑐮𑑄 𑐫𑐵𑐎𑐣𑑄 𑐰𑐵 𑐢𑐫𑐵𑐔𑑂𑐰𑐣 𑑋 𑐖𑐶𑐐𑐸 𑐣𑐸𑐐𑑅 𑐄𑐐𑐸 𑐠𑐵𑐳𑑄 𑐟𑑂𑐰𑐟𑐾𑐟 𑐠𑐵𑐎𑐸 𑐔𑐵𑐮 𑑋 𑐩𑑄 𑐩𑐡𑐫𑑂𑐎 𑐣𑑄 𑐮𑐶𑐔𑐶𑐮𑐵 𑐰𑐣𑐵𑐔𑑂𑐰𑐣𑐵 𑑋 𑐖𑐶 𑐮𑐶𑐦𑑅 𑐳𑑂𑐰𑐫𑐵 𑑋 𑐰 𑐣𑑄 𑐳𑑂𑐰𑐫𑐵𑐔𑑂𑐰𑐣 𑑋 ’𑐧𑐵𑐂’ 𑐮𑑂𑐴𑐵 𑐳𑑄𑐎𑐵𑐕𑑂𑐰𑐫𑐵 𑑋 𑐖𑐶𑐐𑐸 𑐣𑐸𑐐𑐮𑐫𑑂 𑐣𑐵𑐫𑐐𑑂𑐬𑐵𑐫𑐵𑐟 𑐳𑑂𑐰𑑅𑐔𑐵𑐎𑐵 𑑋 𑐥𑐮𑐵𑑅 𑐧𑐸𑐮𑐸𑐴𑐸 𑐕𑐶𑐣𑐵𑐔𑑂𑐰𑐣𑐵 𑑋

𑐮𑐘𑑂𑐔 𑐫𑐵𑐣𑐵𑑅 𑑑 𑐟𑐵 𑐂𑐮𑐫𑑂 𑐣𑐵𑐫𑐐𑑂𑐬𑐵𑐦𑐮𑑂𑐳 𑐮𑐶𑐴𑐵𑑄 𑐰𑐫𑐵𑐐𑐸 𑐥𑐵𑐫𑑂𑐕𑐶 𑐧𑐴𑐣𑐷 𑑙 𑐟𑐵 𑐂𑐮𑐫𑑂 𑐕𑐾𑑄𑐫 𑐠𑑂𑐫𑐣 𑑋

-𑐰𑐶𑐩𑐮𑐥𑑂𑐬𑐨𑐵 𑐰𑐖𑑂𑐬𑐵𑐔𑐵𑐬𑑂𑐫

𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐳 𑐳𑑂𑐣𑐵𑐟𑐎𑑀𑐟𑑂𑐟𑐬 𑐫𑐵𑐣𑐵𑐡𑐷𑐩𑑂𑐴 𑐰𑐶𑐩𑐮𑐥𑑂𑐬𑐨𑐵 𑐧𑐖𑑂𑐬𑐵𑐔𑐵𑐬𑑂𑐫 𑐮𑑀𑐎𑐳𑐵𑐴𑐶𑐟𑑂𑐫 𑐥𑐬𑐶𑐲𑐡𑑂, 𑐮𑐸𑐩𑐣𑑂𑐟𑐶 𑐡𑐧𑐹 𑐁𑐡𑐶 𑐳𑑄𑐑 𑐳𑐳𑑂𑐠𑐵𑐫𑑂 𑐳𑑄𑐮𑐐𑑂𑐣 𑐖𑐸𑐫𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐏𑑂𑐫𑐮𑐫𑑂 𑐖𑑂𑐫𑐵 𑐫𑐵𑐣𑐵𑐗𑐵.𑐩𑑂𑐴 𑐕𑐩𑑂𑐴 𑐨𑐵𑐲𑐵𑐳𑐾𑐰𑐷 𑐣𑐵𑐥𑑄 𑐔𑑂𑐰𑐏𑑄, 𑐧𑐵𑐏𑑄𑐔𑑂𑐰𑐩𑐶 𑐣 𑐏𑑅 𑑋 𑐠𑑂𑐰𑐫𑑂𑐎𑑅𑐫𑐵 𑐧𑐾𑐮𑐵𑐫𑐟𑐫𑐵 𑐮𑐸𑐩𑐣𑑂𑐟𑐶 (𑐫𑐵𑐟𑑂𑐬𑐵 𑐰𑐺𑐟𑐵𑐣𑑂𑐟) 𑐟𑐸𑐏𑑂𑐫𑑅𑐫𑐵 𑐧𑐖𑑂𑐬𑐰𑐷𑐬 𑐩𑐴𑐵𑐎𑐵𑐮𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐀𑐢𑑂𑐫𑐫𑐣 (𑐀𑐣𑐸𑐳𑐣𑑂𑐢𑐵𑐣) 𑐣𑐵𑑄𑐐𑐸 𑐳𑐦𑐹𑐫𑐵 𑐣𑐵𑐥 𑐠𑐷𑐠𑐷 𑐥𑐟𑑂𑐬𑐥𑐟𑑂𑐬𑐶𑐎𑐵𑐫 𑐁𑐥𑐵𑐮 𑐧𑐵𑐏𑑄, 𑐔𑑂𑐰𑐳𑐸 𑐥𑐶𑐡𑑄𑐐𑐸 𑐡𑐸 𑑋 𑐠𑑂𑐰𑐫𑐎𑑅 𑐔𑐩𑑂𑐥𑐵–𑐚𑐎 𑐰𑐶𑐮𑐵𑐳–𑐰𑐶𑐖𑐸 𑐣𑐾𑐰𑐵𑑅 𑐴.𑐥𑐵. 𑐳𑐶𑐬𑐥𑐵𑑅 𑐁𑐡𑐶 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵.𑐮𑐵𑑅𑐐𑐸 𑐡𑐸 𑑋