𑐔𑑂𑐰𑐩𑐶 𑐩𑐴𑐬𑑂𑐖𑐣𑐫𑐵 𑐣𑐶𑐐𑐹 𑐎𑐺𑐟𑐶 𑐥𑐶𑐡𑐣

𑐫𑐾𑑃 – 𑐧𑐸𑐡𑑂𑐢 𑐢𑐬𑑂𑐩 𑐰 𑐡𑐬𑑂𑐱𑐣𑐫𑐵 𑐏𑑂𑐫𑐮𑐫𑑂 𑐟𑐵𑑅𑐃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐎𑐮𑐩 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐩𑑂𑐴 𑐔𑑂𑐰𑐩𑐶 𑐰𑐳𑐣𑑂𑐟 𑐩𑐴𑐬𑑂𑐖𑐣𑐫𑐵 𑐣𑐶𑐐𑐹 𑐎𑐺𑐟𑐶 𑐧𑐖𑐵𑐬𑐫𑑂 𑐰𑑅𑐐𑐸 𑐡𑐸 𑑋 𑐔𑑂𑐰𑐩𑐶 𑐩𑐴𑐬𑑂𑐖𑐣𑐫𑐵 ‘𑐧𑐸𑐡𑑂𑐢 𑐰 𑐩𑐵𑐣𑐰𑐀𑐢𑐶𑐎𑐵𑐬’ 𑐰 ‘𑐄𑐟𑑂𑐟𑐬𑐷 𑐣𑐾𑐥𑐵𑐮𑐫𑑂 𑐧𑑁𑐡𑑂𑐢 𑐢𑐬𑑂𑐩’ 𑐣𑐵𑑄𑐫𑐵 𑐣𑐶𑐐𑐹 𑐳𑐦𑐹𑐫𑐵 𑐰𑐶𑐩𑑀𑐔𑐣 𑐰𑑄𑐐𑐸 𑐕𑐸𑑄 𑐡𑐶𑑄 𑐣𑑂𑐴𑑂𑐫𑑅 𑐖𑐹𑐐𑐸 𑐏𑑅 𑑋 𑐄𑐐𑐸 𑐳𑐦𑐹 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑐰𑐀𑐢𑐶𑐎𑐵𑐬 𑐁𑐫𑑀𑐐𑐫𑐵 𑐥𑐸𑐮𑐵𑑄𑐩𑑂𑐴 𑐡𑐸𑐰𑑅 𑐐𑑁𑐬𑐷 𑐥𑑂𑐬𑐢𑐵𑐣, 𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐳𑐵𑑄𑐳𑑂𑐎𑐺𑐟𑐶𑐎 𑐰𑐶𑐨𑐵𑐐𑐫𑐵 𑐥𑑂𑐬𑐵. 𑐜𑐵. 𑐥𑑂𑐬𑐾𑐩 𑐏𑐟𑑂𑐬𑐷 𑐰 𑐜𑐵. 𑐳𑐸𑐬𑐾𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐩𑑄𑐎𑐵𑑅𑐎𑐠𑑄 𑐰𑐶𑐩𑑀𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐥𑑂𑐬𑐢𑐵𑐣𑑄 𑐳𑐦𑐸𑐟𑐶𑐂 𑐩𑐵𑐣𑐰 𑐀𑐢𑐶𑐎𑐵𑐬𑐫𑐵 𑐥𑑂𑐫𑑄𑐐𑐹 𑐰𑐶𑐲𑐫𑐫𑐵𑐟 𑐎𑑅𑐑𑐵𑐣𑐵𑐟𑑅𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐧𑐸𑐡𑑂𑐢𑐫𑐵 𑐁𑐡𑐬𑑂𑐱 𑐰 𑐡𑐬𑑂𑐱𑐣𑐥𑐵𑐏𑐾𑑄 𑐴𑐾 𑐩𑐵𑐣𑐰 𑐀𑐢𑐶𑐎𑐵𑐬𑐫𑐵 𑐑𑑀𑐲𑐞𑐵𑐥𑐟𑑂𑐬 𑐟𑐬𑑂𑐖𑐸𑐩𑐵 𑐖𑐹𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐜𑐵. 𑐏𑐟𑑂𑐬𑐷𑑄 𑐳𑑄𑐳𑑂𑐎𑐺𑐟𑐶 𑐰𑐶𑐢𑐵 𑐩𑑂𑐴𑑀 𑐴𑐾 𑐖𑐎 𑐔𑑂𑐰𑐩𑐶𑐥𑐶𑑄𑐳𑑄 𑐔𑑂𑐰𑐂𑐐𑐸 𑐰𑐶𑐢𑐵 𑐖𑐹𑐳𑐵𑑄 𑐣𑑄 𑐰𑐶𑐩𑑀𑐔𑐣 𑐖𑐹𑐐𑐸 𑐳𑐦𑐹 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵 𑐣𑐶𑑄𑐟𑐶𑑄 𑐧𑐸𑐡𑑂𑐢 𑐢𑐬𑑂𑐩𑐫𑐵 𑐧𑐵𑐬𑐾 𑐖𑑂𑐘𑐵𑐣 𑐴𑐳𑑂𑐟𑐵𑐣𑑂𑐟𑐬𑐞 𑐫𑐵𑐫𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋

𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐧𑐸𑐡𑑂𑐢 𑐡𑐬𑑂𑐱𑐣 𑐰 𑐧𑐸𑐡𑑂𑐢𑐫𑐵 𑐰𑐶𑐔𑐵𑑅𑐫𑐵𑐟 𑐳𑐷𑐎𑐾𑐟 𑐂𑐔𑑂𑐕𑐸𑐎𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑐣𑐶𑐐𑐸𑐮𑐶𑑄 𑐳𑐦𑐹 𑐕𑐐𑐹 𑐡𑐳𑑂𑐟𑐵𑐰𑐾𑐖𑐫𑐵 𑐬𑐸𑐥𑐫𑑂 𑐣𑑂𑐴𑑂𑐫𑑅𑐣𑐾 𑐰𑑅𑐐𑐸 𑐔𑐬𑑂𑐔𑐵 𑐫𑐵𑐣𑐵𑐡𑐶𑐮 𑑋 𑐔𑑂𑐰𑐩𑐶 𑐩𑐴𑐬𑑂𑐖𑐣𑑄 𑐧𑐸𑐡𑑂𑐢 𑐰 𑐩𑐵𑐣𑐰𑐀𑐢𑐎𑐶𑐵𑐬 𑐳𑐦𑐹𑐟𑐶𑐂 𑐩𑐵𑐣𑐰 𑐀𑐢𑐶𑐎𑐵𑐬, 𑐧𑐸𑐡𑑂𑐢 𑐰 𑐩𑐵𑐣𑐰𑐀𑐢𑐶𑐎𑐵𑐬𑐫𑐵 𑐰𑑂𑐫𑐰𑐳𑑂𑐠𑐵, 𑐧𑑁𑐡𑑂𑐢 𑐣𑐿𑐟𑐶𑐎𑐟𑐵𑐫𑐵 𑐰𑐶𑐲𑐫𑐫𑑂 𑐏𑑃 𑐮𑑂𑐴𑑂𑐰𑐣𑐵𑐐𑐸 𑐰 𑐄𑐟𑑂𑐟𑐬𑐷 𑐣𑐾𑐥𑐵𑐮𑐫𑑂 𑐧𑑁𑐡𑑂𑐢 𑐢𑐬𑑂𑐩 𑐳𑐦𑐸𑐟𑐶𑐂 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐂𑐟𑐶𑐴𑐵𑐳, 𑐳𑐵𑐩𑐵𑐖𑐶𑐎 𑐖𑐣𑐖𑐷𑐰𑐣, 𑐐𑐸𑐩𑑂𑐧𑐵 𑐰 𑐄𑐎𑐶𑐫𑐵 𑐰𑑂𑐫𑐰𑐳𑑂𑐠𑐵𑐥𑐣, 𑐟𑐶𑐧𑑂𑐧𑐟𑐫𑑂 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐰𑐶𑐎𑐵𑐳 𑐮𑐐𑐵𑐫𑐟𑐫𑐵 𑐰𑐶𑐲𑐫𑐫𑐵𑐟 𑐣𑑂𑐴𑑂𑐫𑐠𑐣𑐵 𑐟𑐫𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋