𑐖𑐣𑐥𑐠 𑐩𑐵𑐰𑐶𑐂 𑐩𑐵𑑄𑐨𑐵𑐫𑑂 𑐡𑐶𑐰𑐳

𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐫𑐾𑑃 𑐩𑐣𑐥𑐵 𑑑𑑔 𑐰𑐜𑐵𑐫𑑂 𑐔𑑂𑐰𑑄𑐐𑐸 𑐖𑐣𑐥𑐠 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐧𑐴𑐸𑐨𑐵𑐲𑐶𑐎 𑐳𑐵𑐴𑐶𑐟𑑂𑐫 𑐐𑑀𑐲𑑂𑐛𑐷 𑐖𑐸𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐥𑐵𑐴𑐵𑑄 𑐎𑐰𑐶𑐥𑐶𑑄 𑐮𑐶𑐳𑐾𑑄 𑐰𑐶𑐡𑑂𑐫𑐵𑐮𑐫𑐫𑐵 𑐱𑐶𑐎𑑂𑐲𑐎 𑐰 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐠𑐷𑐠𑐷 𑐨𑐵𑐳𑑄 𑐳𑐵𑐴𑐶𑐟𑑂𑐫 𑐰𑐵𑐔𑐣 𑐮𑐶𑐳𑐾𑑄 𑐩𑑂𑐫𑐾 𑐰 𑐴𑐸𑐮𑐵𑐥𑑂𑐫𑐵𑐏𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐥𑐵𑐴𑐵𑑄 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐳𑐣𑑂𑐡𑐶𑐥 𑐎𑐵𑐦𑑂𑐮𑐾𑑄 𑐳𑑄𑐳𑑂𑐎𑐺𑐟 𑐨𑐵𑐳𑑄, 𑐂𑐱𑑂𑐰𑐬 𑐠𑑀𑐎𑐬𑑄 𑐟𑐵𑐩𑐵𑐒 𑐨𑐵𑐳𑑄 𑐰 𑐳𑐸𑐬𑐾𑐱 𑐎𑐶𑐬𑐞 𑐮𑐶𑐳𑐾𑑄 𑐳𑐸𑐖𑐣𑐵 𑐱𑑂𑐬𑐾𑐲𑑂𑐛𑑄 𑐣𑐾𑐥𑐵𑐮𑐨𑐵𑐲𑐵𑑄 𑐎𑐰𑐶𑐟𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐰𑐶𑐡𑑂𑐫𑐵𑐮𑐫𑐫𑐵 𑐱𑐶𑐎𑑂𑐲𑐎𑐥𑐶𑑄 𑐁𑐂𑐟𑐷 𑐑𑐮𑐾, 𑐩𑐶𑐣𑐵𑐩𑐵𑐫𑐵 𑐣𑑂𑐫𑑁𑐥𑐵𑐣𑐾, 𑐳𑐸𑐬𑐾𑐣𑑂𑐡𑑂𑐬 𑐡𑐾𑐰𑐎𑑀𑐚𑐵𑐥𑐶𑑄𑐳𑑄 𑐏𑐳 𑐣𑐾𑐥𑐵𑐮𑐷 𑐨𑐵𑐳𑑄 𑐰 𑐣𑐾𑐰𑐵𑑅 𑐳𑑂𑐫𑐣𑐵𑐩𑐶 𑐬𑐱𑑂𑐩𑐶 𑐣𑐵𑐥𑐶𑐟𑑄 𑐣𑐾𑐥𑐵𑐮𑐨𑐵𑐲𑐵𑑄 𑐎𑐰𑐶𑐟𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐎𑐠𑑄 𑐴𑐾 𑐰𑐶𑐡𑑂𑐫𑐵𑐮𑐫𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐖𑐾𑐣𑐶𑐱𑐵 𑐫𑑀𑐣𑑂𑐖𑐣, 𑐁𑐱𑐶𑐎𑐵 𑐟𑐵𑐩𑐵𑐒, 𑐳𑐡𑑂𑐬𑐧𑑂𑐬𑐶𑐣𑐵 𑐟𑐵𑐩𑐵𑐒, 𑐬𑐵𑐖 𑐧𑐸𑐮𑐸𑐣, 𑐀𑐣𑐶𑐱𑐵 𑐱𑑂𑐬𑐾𑐲𑑂𑐛, 𑐳𑐵𑐴𑐶𑐮 𑐬𑐵𑐖𑐵, 𑐬𑐶𑑄𑐎𑐷 𑐱𑐬𑑂𑐩𑐵𑐥𑐶𑑄𑐳𑑄 𑐣𑐾𑐥𑐵𑐮𑐷, 𑐣𑐾𑐥𑐵𑐮𑐨𑐵𑐲𑐵, 𑐟𑐵𑐩𑐵𑐒, 𑐨𑑀𑐖𑐥𑐸𑐬𑐷, 𑐩𑐿𑐠𑐶𑐮𑐷 𑐰 𑐄𑐬𑑂𑐡𑐹 𑐨𑐵𑐳𑑄 𑐬𑐔𑐣𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐮𑐶𑐳𑐾𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐠𑐷𑐠𑐷 𑐨𑐵𑐫𑑂𑐫𑐵 𑐩𑑂𑐫𑐾𑐫𑑂 𑐴𑐸𑐮𑐵𑐥𑑂𑐫𑐵𑐏𑑄 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐱𑐶𑐎𑑂𑐲𑐵 𑐰𑐶𑐎𑐵𑐳 𑐟𑐠𑐵 𑐳𑐩𑐣𑑂𑐰𑐫 𑐂𑐎𑐵𑐂 𑐎𑐵𑐛𑐩𑐵𑐜𑑁𑑄𑐫𑐵 𑐥𑑂𑐬𑐩𑐸𑐏 𑐰𑐶𑐔𑐵𑐬𑐷 𑐥𑑂𑐬𑐳𑐵𑐡 𑐀𑐢𑐶𑐎𑐵𑐬𑐷 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑑅𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐥𑐟𑐶𑐟𑑂𑐰 𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐖𑐷𑐟𑐧𑐴𑐵𑐡𑐸𑐬 𑐮𑐵𑐩𑐶𑐕𑐵𑐣𑐾𑑄 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐳𑐴𑐵𑐫𑐎 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐎𑐶𑐬𑐞𑐱𑐵𑐮𑐷 𑐑𑐶𑐩𑐶𑐬𑐾𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋