𑐖𑐾𑐥𑐷𑐫𑐵 𑐱𑐚𑐬 𑐣𑑄 𑐧𑐣𑑂𑐡 𑐫𑐵𑐎𑐮

𑐠𑐣𑐫𑐵 𑐎𑑂𑐲𑐾𑐟𑑂𑐬𑐥𑐵𑐚𑐷𑐂 𑐔𑑂𑐰𑑄𑐐𑐸 𑐖𑐾𑐥𑐷 𑐳𑑂𑐎𑐸𑐮𑐫𑑂 𑐔𑐵𑐫𑐾𑐎𑐵𑐟𑑅𑐐𑐸 𑐱𑐚𑐬 𑐥𑐳𑑅 𑐦𑐸𑐎𑑂𑐎 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐧𑐣𑑂𑐡 𑐫𑐵𑐣𑐵 𑐧𑐶𑐄𑐐𑐸 𑐡𑐸 𑑋 𑐩𑐣𑐥𑐵𑑄 𑐫𑐾𑑃𑐫𑐵 𑐦𑐸𑐎𑑂𑐎 𑐳𑑂𑐎𑐸𑐮𑐫𑑂 𑐔𑐵𑐫𑐾𑐎𑐵𑐟𑑅𑐐𑐸 𑐱𑐚𑐬 𑐧𑐣𑑂𑐡 𑐫𑐵𑐫𑐾𑐟 𑐣𑐶𑐬𑑂𑐡𑐾𑐱𑐣 𑐧𑐶𑐄𑐐𑐸 𑐏𑑅𑐳𑐵 𑐳𑑂𑐎𑐸𑐮𑐟𑐫𑑂𑐳𑑄 𑐄𑐐𑐸 𑐣𑐶𑐬𑑂𑐡𑐾𑐱𑐣 𑐥𑐵𑐮𑐣𑐵 𑐩𑐫𑐵𑐫𑐾𑐰𑑄 𑐣𑐐𑐬 𑐥𑑂𑐬𑐴𑐬𑐷 𑐕𑑂𑐰𑐫𑐵𑑅 𑐱𑐚𑐬 𑐧𑐣𑑂𑐡 𑐫𑐵𑐎𑐹𑐐𑐸 𑐏𑑅 𑑋 𑐠𑑂𑐰 𑐗𑑂𑐰𑐮𑐫𑑂 𑐩𑑂𑐴𑐶𑐐𑑅 𑐣𑐵𑑄𑐖𑐵𑑅𑐐𑐸 𑐖𑐾𑐥𑐷 𑐳𑑂𑐎𑐸𑐮𑐫𑐵 𑐱𑐚𑐬 𑐣𑑄 𑐧𑐣𑑂𑐡 𑐫𑐵𑐣𑐵 𑐧𑐶𑐄𑐐𑐸 𑐏𑑅 𑑋

𑐖𑐾𑐥𑐷 𑐳𑑂𑐎𑐸𑐮𑑄 𑐠𑑅𑐐𑐸 𑐔𑑁𑐬 𑐴𑐾 𑐳𑑂𑐫𑑄𑐎𑐵𑑅 𑐀𑐣 𑐧𑐶𑐖𑐣𑐾𑐳 𑐎𑐩𑑂𑐥𑑂𑐮𑐾𑐎𑑂𑐳 𑐱𑐿𑐮𑐷𑐫𑐵 𑐨𑐰𑐣 𑐡𑐫𑐾𑐎𑐵𑑅 𑐥𑐳𑑅 𑐧𑐵𑐮𑑄 𑐧𑐷𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐖𑐾𑐥𑐷 𑐳𑑂𑐎𑐸𑐮𑐫𑐵 𑐄𑐐𑐸 𑐖𑑂𑐫𑐵 𑐥𑐵𑐫𑑂𑐕𑐶 𑐩𑐖𑐸𑐮 𑐢𑐎𑐵𑑅 𑐁𑐥𑐵𑑅𑐳𑐶𑐣𑑄 𑐴𑐾 𑐁𑐮𑑀𑐔𑐣𑐵 𑐫𑐵𑑅𑐐𑐸 𑐏𑑅𑐳𑐵𑑄 𑐄𑐎𑐶𑐫𑐵𑐟 𑐖𑐾𑐥𑐷 𑐳𑑂𑐎𑐸𑐮𑐫𑐵 𑐰𑑂𑐫𑐰𑐳𑑂𑐠𑐵𑐥𑐣𑑄 𑐢𑐵𑑅𑐳𑐵 𑐰𑐵𑐳𑑂𑐟𑐵 𑐩𑐫𑐵𑑅𑐐𑐸 𑐏𑑅 𑑋 𑐖𑐵𑐣𑐎𑐵𑐬 𑐳𑐹𑐟𑑂𑐬𑐟𑐫𑑂𑐳𑑄 𑐢𑐵𑑅𑐎𑐠𑑄 𑐖𑐾𑐥𑐷 𑐳𑑂𑐎𑐸𑐮𑑄 𑐔𑐵𑐫𑐾𑐎𑐹𑐐𑐸 𑐄𑐐𑐸 𑐱𑐚𑐬 𑐥𑐳𑑅𑐫𑐵 𑐧𑐵𑑅 𑐎𑐵𑐫𑐾𑐐𑐸 𑐖𑑂𑐫𑐵𑐫𑑂 𑐁𑐥𑐵𑐮𑑄 𑐀𑐣𑐶𑐫𑐩𑐶𑐟 𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑐕𑐐𑐹 𑐂𑐮𑐫𑑂 𑐳𑐸𑐣𑐳𑐵𑐣 𑐠𑐵𑐳𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐏𑑅𑐳𑐵𑑄 𑐠𑑁𑑄𑐎𑐣𑑂𑐴𑐫𑑂 𑐛𑐩𑐾𑐮 𑐮𑐵𑐐𑐵 𑐰𑑂𑐫𑐵𑐥𑐵𑐬𑐶𑐎 𑐎𑐾𑐣𑑂𑐡𑑂𑐬 𑐖𑐸𑐂𑐰𑑄 𑐖𑐾𑐥𑐷 𑐳𑑂𑐎𑐸𑐮𑑄 𑐣𑑄 𑐠𑑅𑐐𑐸 𑐎𑐩𑑂𑐥𑐵𑐄𑐞𑑂𑐜 𑐳𑑂𑐫𑑄𑐎𑐵𑑅 𑐥𑐳𑑅 𑐎𑐰𑑅 𑐥𑐶𑐎𑐵𑑅𑐐𑐸 𑐏𑑅 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐫𑐾𑑃 𑐩𑐣𑐥𑐵𑑄 𑐫𑐾𑑃𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐟𑐫𑑂𑐟 𑐠𑑅𑐥𑐶𑑄𑐳𑑄 𑐟𑐫𑐵𑐟𑑅𑐐𑐸 𑐱𑐚𑐬 𑐧𑐣𑑂𑐡 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐩𑐾𑐐𑐸 𑐣𑑂𑐴𑐫𑑂𑐣𑑂𑐴𑐸𑐫𑐵 𑐃 𑐧𑐶𑐄𑐐𑐸 𑐡𑐸 𑑋 𑐫𑐡𑐶 𑐣𑑂𑐴𑐫𑑂𑐣𑑂𑐴𑐸𑐫𑐵 𑐡𑐸𑐣𑐾 𑐱𑐚𑐬 𑐏𑐵𑐮𑐷 𑐩𑐫𑐵𑐟 𑐢𑐵𑑅𑐳𑐵 𑐎𑐵𑐬𑐧𑐵𑐴𑐷 𑐫𑐵𑐫𑐾𑐐𑐸 𑐏𑑂𑐫𑐵𑐔𑑂𑐰𑑅 𑐣𑑄 𑐧𑐶𑐄𑐐𑐸 𑐡𑐸 𑑋 𑐩𑐣𑐥𑐵𑑄 𑐩𑑂𑐴𑐷𑐐𑑄𑐣𑐶𑐳𑐾𑑄 𑐫𑐾𑑃𑐫𑐵 𑐠𑐷𑐠𑐷 𑐳𑑂𑐎𑐸𑐮𑐫𑑂 𑐔𑐵𑐫𑐾𑐎𑐵𑐟𑑅𑐐𑐸 𑐱𑐚𑐬 𑐧𑐣𑑂𑐡 𑐫𑐵𑑅𑐐𑐸 𑐏𑑅𑐳𑐵 𑐩𑑂𑐴𑐶𑐐𑑅 𑐧𑐵𑐣𑐾𑐱𑑂𑐰𑐬𑐫𑑂 𑐔𑑂𑐰𑑄𑐐𑐸 𑐬𑐟𑑂𑐣𑐬𑐵𑐖𑑂𑐫 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐱𑐚𑐬 𑐣𑑄 𑐧𑐣𑑂𑐡 𑐫𑐵𑐎𑐹𑐐𑐸 𑐏𑑅 𑑋
𑐩𑐣𑐥𑐵𑐫𑐵 𑐱𑐶𑐎𑑂𑐲𑐵 𑐀𑐢𑐶𑐎𑐺𑐟 𑐎𑐾𑐱𑐰 𑐖𑑂𑐘𑐰𑐵𑐮𑐷𑑄 𑐣𑑂𑐴𑐫𑑂𑐣𑑂𑐴𑐸𑐫𑐵 𑐡𑐸𑐣𑐾 𑐱𑐚𑐬 𑐏𑐵𑐮𑐷 𑐩𑐫𑐵𑐟 𑐢𑐵𑑅𑐳𑐵 𑐎𑐵𑐬𑐧𑐵𑐴𑐷 𑐥𑑂𑐬𑐎𑑂𑐬𑐶𑐫𑐵 𑐣𑑂𑐴𑑂𑐫𑐵𑐎𑐾𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐀𑐣𑐸𑐐𑐩𑐣𑐫𑐵 𑐗𑑂𑐰𑐮𑐫𑑂 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐠𑐷𑐠𑐷 𑐎𑐠𑑄𑐫𑐵 𑐚𑐴𑐬𑐵 𑐰 𑐱𑐚𑐬 𑐡𑐫𑐾𑐎𑐵𑑅 𑐧𑐵𑐮𑑄 𑐧𑐶𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑐐𑐸 𑐢𑐵𑐳𑐾𑑄 𑐀𑐖𑑂𑐫𑐵𑑅𑐐𑐸 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫 𑑓𑑗 𑐐𑐹 𑐡𑐸𑐐𑐸 𑐏𑑃 𑐣𑑄 𑐎𑐣𑐵𑐡𑐷𑐐𑐸 𑐡𑐸 𑑋

𑐠𑑁𑑄𑐎𑐣𑑂𑐴𑐫𑑂 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐨𑐬𑑂𑐣𑐵 𑐖𑐸𑐂𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐀𑐥𑑂𑐰𑐫𑐵 𑐰𑑅𑐐𑐸 𑐏𑑅𑐳𑐵𑑄 𑐰𑐶𑐡𑑂𑐫𑐵𑐮𑐫𑐟𑐫𑑂𑐳𑑄 𑐢𑐵𑑅𑐳𑐵 𑐎𑐎𑑂𑐲𑐵 𑐎𑑂𑐰𑐠𑐵 𑐩𑐐𑐵𑑅 𑐢𑐎𑐵𑑅 𑐨𑐬𑑂𑐣𑐵 𑐩𑐎𑐵𑐫𑐾𑐐𑐸 𑐫𑐵𑐣𑐵 𑐴𑑅𑐐𑐸 𑐏𑑅 𑑋 𑐮𑐶𑐳𑐾𑑄 𑐐𑐣𑑄 𑐐𑐣𑑄 𑐳𑑂𑐎𑐸𑐮𑐫𑑂 𑐡𑐸𑐐𑐸 𑐎𑐎𑑂𑐲𑐵 𑐎𑑂𑐰𑐠𑐵𑐫𑐵𑐟 𑐥𑐳𑑅 𑐎𑐰𑑅 𑐡𑐫𑐾𑐎𑐵𑑅 𑐧𑐵𑐮𑑄 𑐧𑐷𑐐𑐸 𑐰 𑐩𑐾𑐏𑐾 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐢𑐵𑑅𑐳𑐵 𑐎𑑀𑐔𑐵𑐎𑑀𑐔 𑐫𑐵𑐣𑐵𑑅 𑐎𑐎𑑂𑐲𑐵𑐫𑑂 𑐟𑐫𑐵𑐟𑑅𑐐𑐸 𑐖𑐹𑐐𑐸𑐮𑐶𑑄 𑐣𑑄 𑐱𑐚𑐬 𑐧𑐣𑑂𑐡 𑐫𑐵𑐎𑐵𑑅 𑐄𑐎𑐶𑐫𑐵𑐟 𑐎𑐎𑑂𑐲𑐵 𑐎𑑂𑐰𑐠𑐵 𑐎𑐠𑑄 𑐴𑐾 𑐕𑑂𑐫𑐮𑐾 𑐧𑐷𑐎𑐾𑐐𑐸 𑐏𑑃 𑐩𑐣𑐥𑐵𑑄 𑐢𑐵𑑅𑐐𑐸 𑐡𑐸 𑑋

𑐳𑑂𑐎𑐸𑐮𑐫𑑂 𑐔𑐵𑐫𑐾𑐎𑐵𑐟𑑅𑐐𑐸 𑐠𑐖𑑂𑐫𑐵𑑅𑐐𑐸 𑐱𑐚𑐬 𑐥𑐳𑐮𑑄 𑐫𑐵𑐣𑐵𑑅 𑐳𑑂𑐎𑐸𑐮𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑐂 𑐡𑐸𑐴𑐵𑑄 𑐰𑐣𑐾𑐟 𑐠𑐷𑐠𑐷 𑐎𑐠𑑄𑐫𑐵 𑐬𑐵𑐖𑐣𑐷𑐟𑐶 𑐖𑐸𑐂𑐐𑐸 𑐏𑑃 𑐢𑐵𑐫𑐾𑐐𑐸 𑐫𑐵𑑅 𑑋 𑐳𑑂𑐎𑐸𑐮𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑐫𑐵 𑐡𑐸𑐖𑑅𑐟𑐫𑑂𑐳𑑄 𑐥𑐳𑑅𑐫𑐵 𑐧𑐵𑑅 𑐫𑐎𑑂𑐰 𑐰𑑅𑐳𑐵𑑄 𑐮𑐾𑐏𑐵𑐫𑑂 𑐢𑐵𑑅𑐳𑐵 𑐩𑑂𑐴𑑀 𑐖𑐎 𑐎𑑂𑐫𑐣𑐵𑑅 𑐀𑐥𑑂𑐰𑑅 𑐰𑑅𑐐𑐸 𑐡𑐵𑑄 𑐠𑑅𑐥𑐶𑑄𑐳𑑄 𑐨𑐵𑐐 𑐠𑐫𑐵𑑅 𑐣𑐫𑐾𑐐𑐸 𑐫𑐵𑐣𑐵𑐔𑑂𑐰𑐣 𑐢𑐎𑐵𑑅 𑐣𑑄 𑐡𑑂𑐰𑐥𑑄 𑐰𑐫𑐾𑐐𑐸 𑐫𑐵𑑅 𑑋