𑐗𑐷𑐐𑐸 𑐧𑐸𑑃 – 𑐡𑐶𑐰𑑂𑐫𑐵 𑐟𑐵𑐩𑑂𑐬𑐵𑐎𑐵𑐬

𑐢𑐬𑑂𑐩𑐩𑐵𑐣 𑐕𑐾𑑃𑐣𑑄 𑐖𑑂𑐫𑐵𑐎𑐸𑐠𑐶, 𑐖𑑂𑐫𑐵𑐎𑐸𑐠𑐶𑑄 𑐕𑐾𑑃𑐫𑑂 𑐰𑐫𑐾 𑐰𑐣𑐾𑐟 𑐀𑐳𑑄 𑐖𑐸𑐫𑐵𑑅 𑐩𑐰𑑄𑐳𑐾 𑐩𑐐𑐵𑑅 𑑋 𑐖𑑂𑐫𑐵𑐎𑐸𑐠𑐶𑑄 𑐮𑐶𑐴𑐵𑑄𑐰𑐫𑐵𑐔𑑂𑐰𑑄𑐩𑑂𑐴 𑐢𑐬𑑂𑐩𑐩𑐵𑐣𑐫𑐵 𑐟𑐬𑐎𑐵𑐬𑐷 𑐣𑑂𑐫𑐵𑐣𑐵𑐫𑑄𑐎𑐾 𑐩𑐵𑐣𑐶𑐐𑐸 𑐮𑐸𑐩𑐣 𑑋 𑐀𑐳𑐣𑐫𑑂 𑐠𑑂𑐫𑑄𑐎𑐵𑑅 𑐟𑐬𑐎𑐵𑐬𑐷 𑐣𑑂𑐫𑐵𑐫𑐾𑐟 𑐰𑐫𑐵 𑐥𑐮𑐵𑑅 𑐡𑐶𑐟 𑑋 𑐀𑐳𑑄𑐫𑐵 𑐡𑐠𑐸𑐂𑐔𑑂𑐰𑑄𑐐𑐸 𑐣𑐵𑐬𑐵𑑄𑐡𑑂𑐫𑑅𑐫𑐵 𑐡𑐾𑐐𑑅𑐫𑐵 𑐕𑐔𑐵𑑅𑐮𑐶𑑄 𑐰 𑐰𑐫𑐵 𑐖𑑅𑐏𑑅 𑐠𑐷 𑐠𑐷 𑐟𑐬𑐎𑐵𑐬𑐷𑐫𑐵 𑐧𑑃𑐥𑐳𑑅 𑐟𑐫𑐵𑐟𑑅𑐐𑐸 𑐡𑐸 𑑋 𑐣𑑂𑐫𑐵𑑅𑐰𑐫𑐵𑐔𑑂𑐰𑑄𑐥𑐶𑑄 𑐩𑐣𑐹𑐟 𑐣𑑄 𑐩𑑂𑐰𑑅 𑐩𑑂𑐰𑑅 𑑋 𑐩𑑁𑐳𑐩𑐷 𑐧𑐾𑐩𑑁𑐳𑐩𑐷 𑐦𑐸𑐎𑑂𑐎𑐎𑐠𑑄𑐫𑐵 𑐟𑐬𑐎𑐵𑐬𑐷 𑐡𑐸 𑐀𑐣 𑑋 𑐢𑐬𑑂𑐩𑐩𑐵𑐣𑐫𑐵 𑐩𑐶𑐏𑐵 𑐟𑐬𑐎𑐵𑐬𑐷 𑐩𑐶𑐫𑐵𑐔𑑂𑐰𑑄𑐥𑐶𑑄𑐎𑐾 𑐖𑐸𑐟 𑑋 𑐩𑐶𑐳𑐵𑐥𑐶𑑄 𑐩𑐶𑐖𑑄𑐥𑐶𑑄 𑐟𑐬𑐎𑐵𑐬𑐷 𑐧𑐣𑑂𑐖𑐵𑑅𑐟 𑐟𑐬𑐎𑐵𑐬𑐷𑐫𑐵 𑐣𑐵𑑄 𑐎𑐵𑐎𑐵𑑄, 𑐨𑐵𑑅 𑐢𑐵𑐢𑐵𑑄 𑐟𑐟𑑅𑐳𑐮𑑄 𑐴𑐵𑐮𑐵𑑅 𑐐𑐵𑐴𑐵𑐎𑐶𑐟 𑐳𑐵𑐮𑐾𑐐𑐸 𑐎𑐸𑐟𑑅 𑐫𑐵𑐣𑐵𑐔𑑂𑐰𑐣 𑑋 𑐢𑐵𑐫𑐾𑐎𑐶 𑐀𑐣 𑐐𑐵𑐴𑐵𑐎𑐶 𑐳𑐵𑐮𑐾𑐐𑐸 𑐢𑐾𑑄 𑐢𑐾𑑄 𑐧𑐮𑑂𑐮𑐵 𑐴𑐾 𑐖𑐸𑐫𑐵𑐔𑑂𑐰𑐣 𑑋 𑐰𑑄 𑐏𑐣𑐵𑐔𑑂𑐰𑐣 𑐀𑐣 𑐀𑐠𑐾 𑐴𑐵𑐮𑐵𑑅 𑐟𑐬𑐎𑐵𑐬𑐷 𑐩𑐶𑐫𑐵𑐔𑑂𑐰𑑄𑐥𑐶𑑄 𑐕𑐩𑑂𑐴 𑐴𑐾 𑐳𑑂𑐰𑐣𑐶𑐐𑑅𑐫𑐵 𑐁𑐡𑐶𑐰𑐵𑐳𑐷 𑐩𑐏𑐸 𑑋 𑐳𑐎𑐮𑐾𑑄 𑐥𑐶𑐣𑐾𑐫𑐵 𑐖𑐶𑐮𑑂𑐮𑐵𑑄 𑐰𑐫𑐵𑐔𑑂𑐰𑑄𑐥𑐶𑑄 𑑋

𑐗𑐶𑐡𑑃 𑐟𑐎 𑐣𑑂𑐴𑑂𑐫𑐵𑑅𑐐𑐸 𑐖𑐣𑐫𑐸𑐡𑑂𑐢𑐫𑐵 𑐎𑐵𑐬𑐞𑑄 𑐰𑐶𑐳𑑂𑐠𑐵𑐥𑐶𑐟 𑐖𑐸𑐫𑐵𑑅 𑐫𑐾𑑃𑐫𑑂 𑐰𑑅𑐥𑐶𑑄 𑐫𑐾𑑃𑐫𑑂 𑐴𑐾 𑐠𑐵𑐟 𑑋 𑐐𑐸𑐩𑑂𑐴𑑄 𑐁𑐏𑑅 𑐧𑑂𑐰𑐣𑐾𑐐𑐸 𑐟𑑂𑐰𑐴 𑐟𑐫𑐵𑑅 𑐳𑐵 𑐐𑐸𑐩𑑂𑐴𑑄 𑐖𑐵𑐐𑐶𑐬 𑐣𑐫𑐾𑐐𑐸 𑐟𑑂𑐰𑐴 𑐟𑐫𑐵𑑅 𑐫𑐾𑑃𑐫𑑂 𑐰𑑅𑐥𑐶𑑄 𑐣𑑄 𑐫𑐾𑑃𑐫𑑂 𑐴𑐾 𑐠𑐵𑐟 𑑋 𑐠𑐣 𑐴𑐾 𑐮𑐖𑐐𑐵𑑅 𑐣𑑂𑐴𑑂𑐫𑐵𑐎𑐮 𑑋 𑐠𑐣 𑐴𑐾 𑐖𑐐𑑂𑐐𑐵 𑐣𑑂𑐫𑐵𑐟, 𑐣𑑂𑐫𑐵𑐣𑐵𑐐𑐸 𑐖𑐐𑑂𑐐𑐵𑐫𑑂 𑐕𑐾𑑃 𑐡𑐣 𑑋 𑐮𑐶𑐔𑑂𑐰𑑅 𑐠𑑂𑐰 𑐖𑐸𑐮 𑐎𑐶 𑐠𑑁𑑄 𑐫𑐾𑑃 𑐕𑐐𑐹 𑐀𑐧𑑂𑐫𑐰𑐳𑑂𑐠𑐶𑐟𑐐𑐸 𑐱𑐴𑐬, 𑐦𑑀𑐴𑐬𑐐𑐸 𑐱𑐴𑐬𑐫𑐵 𑐣𑐵𑐩𑑄 𑐩𑑂𑐴𑐳𑐶𑐎𑐵 𑐧𑐶𑐫𑐵𑐔𑑂𑐰𑐣 𑑋 𑐢𑐬𑑂𑐩𑐩𑐵𑐣𑑄 𑐳𑑂𑐰𑐳𑑂𑐰 𑐏𑑄𑐎 𑐏𑑄𑐎 𑐴𑐾 𑐫𑐾𑑃𑐫𑐵 𑐕𑐔𑐵𑐏𑐾𑐬𑑄 𑐔𑑂𑐰𑑄𑐐𑐸 𑐰𑐵𑐄𑑃𑐳𑐾 𑐔𑑂𑐰𑑄𑐐𑐸 𑐧𑐸𑑃 𑐡𑐎𑑂𑐰 𑐠𑑁𑑄 𑐎𑑄𑐎𑑂𑐬𑐶𑐚𑐫𑐵 𑐖𑑄𑐐𑐮𑐫𑑂 𑐴𑐶𑐮𑐾 𑐢𑐸𑑄𑐎𑐮 𑑋 𑐀𑐣𑑂𑐣, 𑐟𑐬𑐎𑐵𑐬𑐷, 𑐧𑐹𑐧 𑐁𑐡𑐶 𑐣𑐳𑐵𑐖𑑂𑐰𑐮𑑄𑐫𑐵 𑐣𑐶𑑄𑐟𑐶𑑄 𑐩𑐾𑐩𑐾𑐐𑐸 𑐖𑐶𑐮𑑂𑐮𑐵𑐫𑐵 𑐀𑐗 𑐢𑐵𑐫𑐾 𑐰𑐶𑐡𑐾𑐱𑐫𑐵 𑐮𑐶𑐢𑑄𑐳𑐵 𑐎𑐵𑐫𑐾𑐩𑐵𑐮𑐾 𑐢𑐸𑑄𑐎𑐮 𑐫𑐾𑑃𑐩𑐶𑐟𑐫𑑂𑐳𑑄 𑑋 𑐢𑐸𑐔𑑂𑐔𑐵 𑐥𑐟𑐶𑐎𑑄 𑐳𑐬𑐎𑐵𑐬 𑐴𑐶𑐮𑐷𑐐𑐸 𑐣𑐾𑐥𑐵𑐮𑐫𑑂 𑐬𑐵𑐖𑑂𑐫 𑐧𑑂𑐫𑐰𑐳𑑂𑐠𑐵 𑐕𑐐𑐹 𑐴𑐾 𑐟𑐵𑑅𑐮𑐵𑐎𑐾 𑐩𑐦𑐸𑐐𑐸 𑐳𑐬𑐎𑐵𑐬𑑄 𑐱𑐴𑐬𑐷𑐎𑐬𑐞𑐫𑐵𑐟 𑐧𑑂𑐫𑐰𑐳𑑂𑐠𑐶𑐟 𑐫𑐵𑐂𑐐𑐸 𑐐𑐧𑐮𑐾 ?

“𑐎𑐵𑐄𑐮𑐷 𑐎𑐶𑐮𑑀𑐫𑐵 𑐐𑐸𑐮𑐶 ?” 𑐕𑐩𑑂𑐴 𑐩𑐶𑐳𑐵𑐩𑑂𑐴 𑐧𑐣𑑂𑐖𑐵𑑅𑐫𑐵𑐎𑐾 𑐢𑐬𑑂𑐩𑐩𑐵𑐣𑑄 𑐣𑑂𑐫𑐣 𑑋 “𑐏𑐸𑐂𑐟𑐎𑐵” 𑐢𑐎𑐵𑑅 𑐮𑐶𑐳𑑅 𑐧𑐶𑐫𑐵𑐏𑐟𑑄 𑐎𑐵𑐄𑐮𑐷 𑐮𑐣𑐾𑐟 𑐢𑑅 𑐰 𑐟𑐵𑐮𑑂𑐖𑐸 𑐟𑐵𑑅𑐮𑐵𑐎𑐮 𑑋 “𑐨𑐔𑐵 𑐥𑐵𑑅𑐫𑐵𑐮𑐾 𑑋 𑐣𑑂𑐫𑐫𑑂𑐟𑐎𑐵𑑄 𑐧𑑂𑐫𑐸𑐮𑐾 𑐩𑐖𑑂𑐫𑐹𑐮𑐵 ?” 𑐢𑐬𑑂𑐩𑐩𑐵𑐣𑑄 𑐠𑐸𑐮𑐶 𑐕𑐸 𑐢𑐵𑐫𑐾𑐮𑐵𑐟 𑐰 𑐩𑐶𑐳𑐵𑐩𑑂𑐴 𑐧𑐣𑑂𑐖𑐵𑑅𑐣𑑄 𑐩𑐶𑐏𑐵 𑐟𑐟𑑅𑐐𑑂𑐰𑑅 𑐫𑐵𑐣𑐵𑑅 𑐖𑑂𑐰𑐫𑑂𑐥𑐶𑐫𑐵𑑅 𑐳𑑂𑐰𑐮 𑐀𑐮𑐾 𑐟𑐳𑑂𑐳𑐮𑑄 “𑐧𑑀𑐣𑐳 𑐩𑐵𑐮 𑐮𑐵 ? 𑐢𑐶𑐧𑑂𑐕𑑅 𑐣𑑄 𑐥𑐵𑑅𑐖𑐸𑐂𑐩𑐏𑐸” 𑐢𑐎𑐵𑑅 𑐟𑐵𑐮𑑂𑐖𑐸 𑐨𑑂𑐰𑐵𑐎𑑂𑐎 𑐧𑑃𑐫𑑂 𑐡𑐶𑐎𑐮 𑑋 𑐰𑐫𑐵𑐐𑐸 𑐎𑑂𑐰𑐵𑐮𑑅𑐠𑐾𑑄 𑐐𑑂𑐰𑐵𑐬𑐵𑐐𑑂𑐰𑐵𑐬𑐵 𑐡𑐵𑑅𑐐𑐸 𑐰𑐔𑐣𑑄 𑐢𑐬𑑂𑐩𑐩𑐵𑐣𑐫𑐵 𑐣𑐸𑐐𑐮𑐫𑑂 𑐳𑐾𑐟𑑂𑐠𑐵𑐎 𑐥𑐸𑐟 𑑋 𑐰𑑄 𑐣𑑄 𑐥𑐳𑐮𑑂𑐫𑐵𑐫𑐵𑐐𑐸 𑐏𑑂𑐰𑐵𑐮𑐫𑑂 𑐣𑐫𑐾𑐠𑐾𑑄 𑐕𑐎𑑅 𑐳𑑂𑐰𑐮 𑑋 𑐰 𑐀𑐣𑑄 𑐦𑐚𑑂𑐚 𑐦𑐴𑐶𑐮 𑑋 𑐰𑐫𑐵 𑐟𑐬𑐎𑐵𑐬𑐷 𑐣𑑂𑐫𑐵𑐫𑐾𑐐𑐸 𑐩𑐹𑐜 𑐴𑐾 𑐟𑐣𑐵𑐰𑐣 𑑋 𑐨𑐵𑐟𑐵𑐨𑐵𑐟𑐵 𑐥𑐮𑐵𑑅 𑐔𑑂𑐰𑐫𑐾𑐎𑐮 𑑋 𑐴𑐵𑐎𑐣𑑄 𑐳𑐸𑐠𑐫𑑂 𑐎𑐮𑐵𑐟𑑄 “𑐀𑐦𑐶𑐳𑑄 𑐮𑐶𑐴𑐵𑑃𑐗𑐵𑐫𑐾𑐧𑐮𑐫𑑂 𑐟𑐬𑐎𑐵𑐬𑐷 𑐖𑑂𑐰𑐣𑐵𑐗𑐵𑐳𑑃 𑐣𑑂𑐴𑐵𑑄 𑑋 𑐎𑐣𑑂𑐴𑐫𑑂 𑐧𑐵𑐫𑐵 𑐖𑐣𑑂𑐩𑐡𑐶𑑄, 𑐩𑑂𑐴𑑂𑐫𑐵𑐫𑑂𑐩𑐳𑑂𑐟 𑐣𑑄 𑐳𑑅𑐟𑐾𑐩𑐵𑐣𑐶 𑑋 𑐐𑐵𑐎𑑂𑐎 𑐖𑑂𑐰𑐣𑐵𑐗𑐵𑐳𑑃” 𑐢𑐵𑑅𑐐𑐸 𑐮𑐸𑐩𑐣 𑐰𑐫𑐵 𑑋