𑐗𑐷𑐳𑑄 𑐥𑐸𑐞𑑂𑐫𑐵𑐣𑐸𑐩𑑀𑐡𑐣 𑐫𑐵𑐫𑐾𑐩𑐵𑑅

𑐥𑑂𑐬𑐎𑐵𑐱 𑐱𑐵𑐎𑑂𑐫 ‘𑐣𑑅𑐑𑑅’

𑐧𑐸𑐡𑑂𑐢 𑐢𑐬𑑂‍𑐩𑐫𑑂 𑐡𑐷𑐎𑑂𑐲𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐠𑐸𑐐𑐸 𑐖𑐣𑑂𑐩𑐫𑑂 𑐣𑑄 𑐰𑑄𑐐𑐸 𑐖𑐣𑐩𑐫𑑂 𑐣𑑄 𑐳𑐸𑐏 𑐰 𑐱𑐵𑐣𑑂𑐟𑐶 𑐡𑐫𑐾𑐩𑐵𑑅 𑐢𑐎𑐵𑑅 𑐡𑐵𑐣𑐢𑐬𑑂‍𑐩 𑐰 𑐥𑐸𑐖𑐵𑐥𑐵𑐛 𑐫𑐵𑐣𑐵𑑅 𑐥𑐸𑐞𑑂𑐫𑐐𑐸 𑐎𑐬𑑂‍𑐩 𑐫𑐵𑐣𑐵𑐔𑑂𑐰𑐣𑐷 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐠𑐾𑐬𑐧𑐵𑐡𑐫𑐵 𑐧𑐸𑐡𑑂𑐢𑐢𑐬𑑂‍𑐩𑐫𑑂 𑐤𑑂𑐫𑐵𑐐𑐸 𑐢𑐵𑐬𑑂‍𑐩𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐀𑐣𑑂𑐟𑐫𑑂 𑐥𑐵𑐮𑐶𑐨𑐵𑐳𑑄 𑐔𑑂𑐰𑐫𑐵𑐟𑑅𑐐𑐸 𑐥𑐸𑐞𑑂𑐫 𑐧𑐣𑑂𑐡𑐣𑐵 𑐳𑐸𑐟𑑂𑐟 𑐧𑑂𑐰𑐣𑐵𑑅 𑐎𑑂𑐰𑐔𑐵𑐫𑐾𑐎𑐷 𑑋 𑐠𑐸𑐎𑐶𑐫𑐵𑐟 𑐥𑐸𑐞𑑂𑐫𑐵𑐣𑐸𑐩𑑀𑐡𑐣 𑐎𑐬𑑂‍𑐩 𑐢𑐵𑐂 𑑋

𑐥𑐸𑐞𑑂𑐫𑐵𑐣𑐸𑐩𑑀𑐡𑐣 𑐀𑐬𑑂‍𑐠 𑐠𑑂𑐰 𑐳𑐩𑑂𑐥𑐣𑑂𑐣 𑐖𑐹𑐐𑐸 𑐥𑐰𑐶𑐟𑑂𑐬𑐐𑐸 𑐎𑐵𑐬𑑂‍𑐫 𑐮𑐵𑐂𑐐𑐸 𑐥𑐸𑐞𑑂𑐫 𑐗𑐷𑐟 𑐖𑐎 𑐩𑐏𑐸 𑐳𑐎𑐮 𑐥𑑂𑐬𑐵𑐞𑐶𑐥𑐶𑑄𑐟 𑐣𑑄 𑐥𑐸𑐞𑑂𑐫 𑐮𑐵𑐣𑐵𑑅 𑐨𑐶𑑄 𑐖𑐸𑐂𑐩𑐵 𑐢𑐎𑐵𑑅 𑐎𑐵𑐩𑐣𑐵 𑐫𑐵𑐫𑐾𑐐𑐸 𑐏𑑅 𑑋 𑐧𑐸𑐡𑑂𑐢 𑐢𑐬𑑂‍𑐩𑐫𑑂 𑐕𑐐𑐹 𑐩𑐹 𑐟𑐵𑐟𑐸𑐣𑐵 𑐠𑑂𑐰 𑐖𑐎 𑐄𑐡𑑂𑐢𑐵𑐬 𑐖𑐸𑐂𑐐𑐸 𑐩𑐏𑐸𑐳𑐾 𑐳𑐎𑐮 𑐥𑑂𑐬𑐵𑐞𑐷𑐥𑐶𑑄𑐟 𑐣𑑄 𑐄𑐡𑑂𑐢𑐵𑐬 𑐫𑐵𑐫𑐾𑐐𑐸 𑐏𑑅 𑑋 𑐠𑑂𑐰 𑐥𑐸𑐞𑑂𑐫 𑐧𑐣𑑂𑐡𑐣𑐵𑐫𑐵 𑐥𑑂𑐫𑑄𑐐𑐹𑐐𑐸 𑐱𑑂𑐮𑑀𑐎𑐫𑑂 𑐩𑐢𑑂𑐫𑐾𑐫𑑂 𑐤𑐵𑐥𑐵𑑄𑐐𑐸 𑐱𑑂𑐮𑑀𑐎 𑐠𑐠𑐾 𑐏𑑅– 𑐂𑐡𑐩𑐾 𑐣𑐵𑑄 𑐖𑑂𑐘𑐵𑐟𑐶 𑐣𑑄 𑐴𑑀𑐟𑐸 𑐳𑐸𑐏𑐶𑐟𑐵 𑐴𑑀𑐟𑐸 𑐘𑐵𑐟𑐫𑑀 (𑐳𑑂𑐰𑐎𑑅 𑐧𑑂𑐰𑐣𑐾𑐐𑐸) 𑐀𑐬𑑂‍𑐠𑐵𑐟 𑐠𑑂𑐰 𑐥𑐸𑐞𑑂𑐫𑐫𑐵 𑐖𑑂𑐫𑐵𑑄 𑐠𑑅𑐠𑐶𑐟𑐶 𑐣𑐵𑐥𑑄 𑐪𑐳𑑂𑐫𑐹𑐥𑐶𑑄 𑐡𑐎𑑂𑐰 𑐣𑑄 𑐳𑐸𑐏𑐷 𑐖𑐸𑐂𑐩𑐵 𑑋

𑐧𑐸𑐡𑑂𑐢 𑐢𑐬𑑂‍𑐩𑐫𑐵 𑐟𑑂𑐬𑐶𑐥𑐶𑐚𑐎 𑐩𑐢𑑂𑐫𑐾 𑐕𑐐𑐹 𑐀𑐨𑐶𑐢𑐬𑑂‍𑐩 𑐏𑑅 𑑋 𑐀𑐨𑐶𑐢𑐬𑑂‍𑐩𑐫𑑂 𑐰𑐶𑐱𑐾𑐲 𑐫𑐵𑐣𑐵𑑅 𑐩𑐣𑐹𑐟𑐫𑑂𑐐𑐸 𑐔𑐶𑐟𑑂𑐟 𑐳𑐩𑑂𑐧𑐣𑑂𑐢𑐶 𑐏𑑃𑐟 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐐𑑂𑐬𑐣𑑂𑐠 𑐏𑑅 𑑋 𑐱𑐵𑐎𑑂𑐫𑐩𑐸𑐣𑐶 𑐧𑐸𑐡𑑂𑐢𑑄 𑐠𑑅 𑐩𑐵𑑄 𑐣𑑄 𑐩𑐾𑐐𑐸 𑐠𑐵𑐳𑐫𑑂 𑐖𑐣𑑂𑐩 𑐎𑐵𑑅𑐰𑑄𑐠𑐵𑐫𑑂 𑐰𑐣𑐵𑑅 𑐠𑑂𑐰 𑐢𑐬𑑂‍𑐩𑐫𑐵 𑐏𑑃 𑐎𑐣𑐵𑑅 𑐰𑐳𑐥𑑀𑐮𑐫𑐵𑐟 𑐣𑐶𑐬𑑂‍𑐰𑐵𑐞 𑐥𑐡𑐰𑐷 𑐮𑐵𑐎𑐵𑐧𑐶𑐖𑑂𑐫𑐵𑑅𑐐𑐸 𑐏𑑅 𑑋 (𑐧𑑁𑐡𑑂𑐢 𑐳𑐵𑐴𑐶𑐟𑑂𑐫 𑐠𑑂𑐰 𑐠𑐵𑐫𑑂 𑐢𑐫𑐵𑐐𑐸 𑐳𑑂𑐰𑐬𑑂‍𑐐 𑐮𑑀𑐎𑐫𑐵 𑐟𑑂𑐬𑐵𑐥𑐳𑑂𑐟𑑂𑐬𑐶𑑄𑐳 𑐨𑐹𑐩𑐶 𑐢𑐵𑐂 𑑋 𑐰𑐵𑐳𑑂𑐟𑐰𑐫𑑂 𑐠𑑂𑐰 𑐠𑐵𑐫𑑂 𑐣𑐩𑑀𑐧𑐸𑐡𑑂𑐢, 𑐣𑐩𑐬𑐵 𑐏𑑅 𑑋)

𑐀𑐨𑐶𑐢𑐬𑑂‍𑐩 𑐎𑐠 𑐥𑑂𑐬𑐵𑐞𑐷𑐟 𑐠𑑂𑐰 𑐳𑑄𑐳𑐵𑐬𑑄 𑐔𑑂𑐫𑐹𑐟 𑐖𑐸𑐂𑐐𑐸 𑐎𑐵𑐬𑐞 𑐥𑑂𑐫𑐟𑐵 𑐡𑐸– 𑐁𑐫𑐸 𑐎𑑂𑐲𑐫, 𑐎𑐬𑑂‍𑐩 𑐎𑑂𑐲𑐫, 𑐄𑐨𑐫𑐎𑑂𑐲𑐫 𑐰 𑐄𑐥𑐔𑑂𑐕𑐾𑐡 𑐎𑐬𑑂‍𑐩 𑑋 𑐠𑐸𑐐𑐸 𑐖𑐣𑑂𑐩𑐫𑑂 𑐤𑑂𑐫𑐵𑐎𑑂𑐰 𑐴𑐾 𑐥𑐸𑐞𑑂𑐫𑐐𑐸 𑐖𑑂𑐫𑐵 𑐫𑐵𑑅𑐳𑐵𑑄 𑐤𑐵𑐥𑐵𑐫𑐵𑐐𑐸 𑐖𑐣𑑂𑐩𑐫𑑂 𑐫𑐵𑐣𑐵𑐰𑑅𑐐𑐸 𑐀𑐎𑐸𑐱𑐮 𑐎𑐬𑑂‍𑐩 𑐫𑐵𑐎𑐣𑑄 𑐔𑑂𑐫𑐸𑐟 𑐖𑐸𑐂𑐐𑐸𑐫𑐵𑐟 𑐁𑐫𑐸𑐎𑑂𑐲𑐫 𑐢𑐵𑐂 𑑋 𑐠𑐸𑐎𑐶𑐫𑐵 𑐀𑑅𑐏𑑅 𑐎𑐬𑑂‍𑐩𑐎𑑂𑐲𑐫 𑐢𑐫𑐵𑐐𑐸 𑐤𑐵𑐥𑐵𑐫𑐵𑐐𑐸 𑐖𑐣𑑂𑐩𑐫 𑐫𑐎𑑂𑐰 𑐥𑐸𑐞𑑂𑐫 𑐎𑐩𑐾 𑐫𑐵𑐣𑐵𑐟𑑅𑐐𑐸 𑐡𑐸𑐳𑐵𑑄 𑐠𑐸𑐐𑐸 𑐖𑐣𑑂𑐩𑐫𑑂 𑐫𑐵𑑅𑐐𑐸 𑐀𑐎𑐸𑐱𑐮 𑐎𑐬𑑂‍𑐩 𑐔𑑂𑐫𑐸𑐟 𑐖𑐸𑐂𑐐𑐸 𑐏𑑅 𑑋

𑐤𑐵𑐥𑐵𑐫𑐵𑐐𑐸 𑐖𑐣𑑂𑐩𑐫𑑂 𑐣𑑄 𑐁𑑅𑐫𑐵𑐐𑐸 𑐖𑐣𑑂𑐩𑐫𑑂 𑐣𑑄 𑐫𑐵𑑅𑐐𑐸 𑐥𑐸𑐞𑑂𑐫 𑐣𑐵𑐥𑐣𑐵𑐥𑑄 𑐦𑐸𑐣𑐵𑑅 𑐫𑐵𑐎𑐣𑑄 𑐔𑑂𑐫𑐸𑐟 𑐖𑐸𑐂𑐐𑐸𑐫𑐵𑐟 𑐄𑐨𑐫𑐎𑑂𑐲𑐫 𑐢𑐵𑐂 𑑋 𑐤𑐵𑐥𑐵𑐫𑐵𑐐𑐸 𑐖𑐣𑑂𑐩𑐫𑑂 𑐣𑑄 𑐁𑑅𑐫𑐵𑐐𑐸 𑐖𑐣𑑂𑐩𑐫𑑂 𑐣𑑄 𑐫𑐎𑑂𑐰 𑐴𑐾 𑐥𑐸𑐞𑑂𑐫𑐐𑐸 𑐖𑑂𑐫𑐵 𑐫𑐵𑐣𑐵𑑅 𑐁𑐫𑐸 𑐫𑐎𑑂𑐰 𑐟𑐵𑑅𑐴𑐵𑐎𑑅𑐳𑐵𑑄 𑐩𑐾𑐐𑐸 𑐕𑐸𑑄 𑐎𑐵𑐬𑐞𑑄 𑐔𑑂𑐫𑐸𑐟 𑐖𑐸𑐂𑐐𑐸𑐫𑐵𑐟 𑐄𑐥𑐔𑑂𑐕𑐾𑐡 𑐎𑐬𑑂‍𑐩 𑐢𑐵𑐂 𑑋 𑐠𑐸𑐎𑐶𑐫𑐵𑐟 𑐥𑐵𑐮𑑂𑐔𑐵𑑄 𑐡𑐳𑐸 𑐧𑐶𑐫𑐵𑑅 𑐎𑑂𑐫𑐣𑐵𑐟𑑅𑐐𑐸 𑐡𑐸 𑑋

𑐫𑐡𑐶 𑐤𑐵𑐥𑐵𑐫𑐵𑐐𑐸 𑐖𑐣𑑂𑐩𑐫𑐵 𑐎𑐬𑑂‍𑐩𑑄 𑐥𑐵𑐮𑑂𑐔𑐵𑐫𑑂 𑐫𑐎𑑂𑐰 𑐔𑐶𑐎𑑄 𑐡𑐸𑐳𑐵𑑄 𑐠𑐸𑐐𑐸 𑐖𑐣𑑂𑐩𑐫𑑂 𑐩𑐫𑐵𑑅𑐐𑐸 𑐥𑐸𑐞𑑂𑐫𑐫𑐵 𑐔𑐶𑑄 𑐂𑐟𑐵𑑅 𑐔𑐷𑐴𑐵𑐎𑑅 𑐖𑐸𑐫𑐵𑑅 𑐫𑐵𑐎𑐣𑑄 𑐩𑐟 𑐳𑐷𑐐𑐸 𑐢𑐫𑐵𑐐𑐸 𑐁𑐫𑐸𑐎𑑂𑐲𑐫 𑐏𑑅 𑑋 𑐠𑑂𑐰𑐫𑐵 𑐀𑑅𑐏𑑅 𑐠𑐸𑐐𑐸 𑐖𑐣𑑂𑐩𑐫𑑂 𑐫𑐵𑑅𑐐𑐸𑐫𑐵 𑐦𑐮𑑄 𑐂𑐟𑐵𑑅 𑐟𑐵𑑅𑐴𑐵𑐎𑑅 𑐟𑐬 𑐤𑐵𑐥𑐵𑐫𑐵𑐐𑐸 𑐖𑐣𑑂𑐩𑐫𑑂 𑐥𑐸𑐞𑑂𑐫𑐐𑐸 𑐎𑐵𑐬𑑂‍𑐫 𑐩𑐫𑐵𑑅𑐐𑐸 𑐎𑐵𑐬𑐞𑑄 𑐔𑐶𑐎𑑄 𑐪𑑀 𑐖𑐸𑐫𑐵𑑅 𑐥𑐵𑐮𑑂𑐔𑐵 𑐫𑐵𑐎𑐣𑑄 𑐳𑐷𑐐𑐸𑐫𑐵𑐟 𑐎𑐬𑑂‍𑐩𑐎𑑂𑐲𑐫 𑐢𑐵𑐂 𑑋

𑐤𑐵𑐥𑐵 𑐫𑐵𑐣𑐵𑐰𑑅𑐐𑐸 𑐥𑐸𑐞𑑂𑐫 𑐰 𑐁𑑅𑐫𑐵𑐐𑐸 𑐥𑐸𑐞𑑂𑐫 𑐣𑐵𑐥𑐣𑐵𑐥𑑄 𑐦𑐸𑐣𑐵𑑅 𑐩𑐟 𑐳𑐷𑐐𑐸𑐫𑐵𑐟 𑐄𑐨𑐫𑐎𑑂𑐲𑐫 𑐢𑐵𑐂 𑑋 𑐤𑐵𑐥𑐵𑐫𑐵𑐐𑐸 𑐖𑐣𑑂𑐩𑐫𑑂 𑐣𑑄 𑐁𑑅𑐫𑐵𑐐𑐸 𑐖𑐣𑑂𑐩𑐫𑑂 𑐣𑑄 𑐫𑐎𑑂𑐰 𑐴𑐾 𑐥𑐸𑐞𑑂𑐫𑐐𑐸 𑐖𑑂𑐫𑐵 𑐫𑐵𑐣𑐵𑑅 𑐔𑐶𑐎𑑄 𑐣𑑄 𑐫𑐎𑑂𑐰, 𑐂𑐟𑐵 𑐣𑑄 𑐟𑐵𑑅𑐴𑐵𑐎𑑅 𑐖𑐸𑐫𑐵𑑅 𑐔𑑂𑐫𑐵𑐣𑐵𑐔𑑂𑐰𑑄𑐐𑐸 𑐥𑐵𑐮𑑂𑐔𑐵 𑐰𑐵, 𑐦𑐫𑑂 𑐰𑐵 𑐩𑐾𑐐𑐸 𑐕𑐸𑑄 𑐎𑐵𑐬𑐞𑑄 𑐳𑐶𑐟 𑐢𑐵𑐫𑐾𑐰𑑄 𑐠𑑂𑐰𑐫𑐵𑐟 𑐄𑐥𑐔𑑂𑐕𑐾𑐡 𑐎𑐬𑑂‍𑐩𑑄 𑐳𑐷𑐐𑐸 𑐢𑐵𑐂 𑑋 𑐗𑐷𑐳𑑄 𑐥𑐸𑐞𑑂𑐫𑐵𑐣𑐸𑐩𑑀𑐡𑐣 𑐫𑐵𑐫𑐾𑐐𑐸 𑐎𑐵𑐬𑐞 𑐣 𑐠𑑂𑐰 𑐴𑐾 𑐏𑑅 𑐎𑐶 𑐠𑐖𑑂𑐫𑐵𑑅𑐥𑐶𑑄 𑐳𑐟𑑂𑐰𑐥𑐶𑑄𑐟 𑐩𑐵𑑅𑐩𑐵𑑅𑐐𑐸 𑐥𑐸𑐞𑑂𑐫 𑐧𑐶𑐫𑐵𑑅 𑐠𑑂𑐰 𑐳𑑄𑐳𑐵𑐬𑑄 𑐫𑐵𑐎𑐣𑑄 𑐔𑑂𑐫𑐹𑐟 𑐩𑐫𑐵𑐎𑐾𑐐𑐸 𑐏𑑅 𑑋

𑐥𑐟𑑂𑐟𑐶𑐡𑐵𑐣 𑐰 𑐢𑐬𑑂‍𑐩𑐬𑐵𑐖
𑐧𑐸𑐡𑑂𑐢 𑐢𑐬𑑂‍𑐩𑐫𑑂 𑐥𑐸𑐞𑑂𑐫𑐵𑐣𑐸𑐩𑐵𑐡𑐣 𑐠𑐾𑑄 𑐩𑐾𑐐𑐸 𑐕𑐐𑐹 𑐖𑑂𑐰𑐮𑐵𑑅𑐐𑐸 𑐥𑐸𑐞𑑂𑐫 𑐥𑐟𑑂𑐟𑐶𑐡𑐵𑐣 𑐏𑑅 𑑋 𑐥𑐵𑐮𑐶 𑐨𑐵𑐳𑑄 𑐥𑐟𑑂𑐟𑐶𑐡𑐵𑐣𑐫𑐵 𑐀𑐬𑑂‍𑐠 𑐠𑐠𑐾 𑐫𑐵𑐣𑐵 𑐧𑐶𑐫𑐵𑐟𑑅𑐐𑐸 𑐡𑐸𑐎𑐶 𑐥𑐟𑐧𑑂𑐰𑐵𑐟𑐶 𑐟𑐶 𑐥𑐟𑑂𑐟𑐶, 𑐥𑐟𑑂𑐟𑐶𑐫𑐵 𑐡𑐵𑐣𑑄 𑐥𑐟𑑂𑐟𑐶𑐡𑐵𑐣𑑄 𑐀𑐬𑑂‍𑐠𑐵𑐟 𑐥𑐸𑐞𑑂𑐫 𑐫𑐵𑐣𑐵𑑅 𑐥𑑂𑐬𑐵𑐥𑑂𑐔 𑐖𑐹𑐐𑐸𑐫𑐵𑐟 𑐥𑐟𑑂𑐟𑐶 𑐢𑐵𑐂, 𑐰 𑐴𑐾 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐥𑐸𑐞𑑂𑐫𑑄 𑐩𑐾𑐥𑐶𑑄 𑐳𑐟𑑂𑐰𑐥𑐶𑑄𑐟 𑐣𑑄 𑐄𑐡𑑂𑐢𑐵𑐬 𑐫𑐵𑐫𑐾𑐟 𑐧𑐷𑐐𑐸𑐫𑐵𑐟 𑐥𑐟𑑂𑐟𑐶𑐡𑐵𑐣 𑐢𑐵𑐂 𑑋
𑐥𑐟𑑂𑐟𑐶𑐡𑐵𑐣 𑐣𑐵𑐥 𑐢𑐬𑑂‍𑐩𑐬𑐵𑐖𑐣𑐵𑐥 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐕𑐐𑐹 𑐧𑐵𑐏𑑄 𑐠𑐠𑐾 𑐡𑐸 𑑋

𑐀𑐎𑐸𑐱𑐮 𑐎𑐬𑑂‍𑐩𑑄 𑐩𑐣𑐹𑐟 𑐕𑐸 𑐐𑐟𑐶 𑐮𑐵𑑅𑐰𑐣𑐷 𑐢𑐫𑐵𑐐𑐸 𑐏𑑃 𑐫𑐩𑐮𑑀𑐎𑐫𑐵 𑐖𑐸𑐖𑐸 𑐫𑐩𑐬𑐵𑐖𑑄 𑐧𑐵𑑄𑐮𑐵𑐎 𑐴𑐾 𑐳𑐶𑐄 𑑋 𑐀𑐫𑑂 𑐖𑐹𑐐𑐸𑐮𑐶𑑄 𑐰𑑄 𑐦𑐫𑐵𑑄𑐥𑐟𑑂𑐟𑐶 𑐢𑐬𑑂‍𑐩 𑐟𑐫𑐵𑑅 𑐳𑐸𑐫𑐵𑐟 𑐣𑑄 𑐣𑐬𑐎𑐫𑑂 𑐢𑑂𑐰𑐫𑐾𑐐𑐸 𑐎𑐵𑐬𑑂‍𑐫 𑐩𑐫𑐵𑑅 𑑋 𑐠𑐠𑐾 𑐢𑐬𑑂‍𑐩 𑐟𑐫𑐵𑑅 𑐖𑑂𑐫𑐵 𑐫𑐵𑐂𑐐𑐸𑐮𑐶𑑄 𑐰𑐫𑐵𑐟 𑐢𑐬𑑂‍𑐩𑐬𑐵𑐖 𑐢𑐵𑑅𑐐𑐸 𑐏𑑅 𑑋 𑐢𑐬𑑂‍𑐩𑐬𑐵𑐖 𑐠𑐵𑐫𑑂 𑐣𑑄 𑐫𑐎𑑂𑐰 𑐥𑐸𑐞𑑂𑐫𑐐𑐸 𑐖𑑂𑐫𑐵 𑐫𑐵𑐣𑐵𑑅 𑐟𑐥𑑂𑐫𑑄𑐎 𑐳𑑂𑐰𑐬𑑂‍𑐐𑐫𑑂 𑐮𑐵𑐂𑐥𑐶𑑄 𑐰𑐫𑐾𑐩𑐵𑑅 𑐣 𑐀𑐎𑐸𑐱𑐮 𑐎𑐬𑑂‍𑐩 𑐖𑐎 𑐫𑐵𑐣𑐵𑑅 𑐟𑐥𑑂𑐫𑑄𑐎 𑐣𑐬𑐎𑐫𑑂 𑐰𑐣𑐷𑐥𑐶𑑄 𑐰𑐫𑐾𑐩𑐵𑑅𑑋

𑐰𑐫𑐵𑐠𑐵𑐫𑑂 𑐡𑐠𑐸𑐂 𑐮𑐵𑑅𑐥𑐶𑑄 𑐳𑐟𑑂𑐰𑐥𑐶𑑄 𑐖𑐎 𑐰𑐂𑐐𑐸 𑐏𑑅 𑑋 𑐕𑐎𑑅 𑑖𑑔𑑕 𑐳𑐟𑑂𑐰 𑐠𑑂𑐰 𑐳𑑄𑐳𑐵𑐬𑑄 𑐔𑑂𑐫𑐸𑐟 𑐖𑐸𑐫𑐵𑑅 𑐢𑐬𑑂‍𑐩𑐬𑐵𑐖𑐠𑐵𑐫𑑂 𑐰𑐫𑐵𑑅 𑐖𑐶 𑐩𑑂𑐰𑐵𑑅𑐳𑐵𑑄 𑐩𑑂𑐰𑐵𑑅𑐳𑐵𑑄 𑐠𑑅𑐐𑐸 𑐖𑐣𑑂𑐩 𑐡𑐶𑑄𑐫𑐵 𑐬𑐵𑐐𑐫𑑂 𑐮𑐵𑐣𑐵𑑅 𑐫𑐎𑑂𑐰 𑐣𑐶𑐬𑑂‍𑐡𑑀𑐲 𑐥𑑂𑐬𑐵𑐞𑐷𑐥𑐶𑑄 𑐴𑐟𑑂𑐫𑐵 𑐫𑐵𑐣𑐵𑐐𑐸 𑐥𑐵𑐥𑑄 𑐖𑐶𑐐𑐸 𑐣𑐬𑐎 𑐐𑐩𑐣 𑐳𑐸𑐣𑐵𑐣𑑄 𑐥𑐣𑐾 𑐩𑐦𑐂𑐐𑐸 𑐖𑐸𑐮 𑐢𑐎𑐵𑑅 𑐏𑑂𑐰𑐏𑑂𑐰𑑄 𑐧𑐶𑐮𑐵𑐥 𑐫𑐵𑐣𑐵𑐔𑑂𑐰𑐣 𑑋 𑐢𑐬𑑂‍𑐩𑐬𑐵𑐖𑑄 𑐰𑐫𑐵𑐟 𑐣𑐬𑐎𑐫𑑂 𑐩𑐕𑑂𑐰𑐫𑐾𑐎𑐾𑐐𑐸 𑐮𑐵𑐐𑐶 𑐕𑐸 𑐮𑑂𑐰𑐐𑐶𑐥𑐶𑑄 𑐏𑑄 𑐮𑐵 ? 𑐩𑐳𑑂𑐟 𑐏𑑄 𑐮𑐵 ?

𑐥𑑂𑐰𑐵𑐠𑐫𑑂 𑐡𑐸𑐥𑐶𑑄 𑐩𑐶𑐳𑑂𑐟 𑐏𑑄 𑐮𑐵 ? 𑐧𑐸𑐬𑐵𑐧𑐸𑐬𑐷𑐥𑐶𑑄 𑐏𑑄 𑐮𑐵 𑐢𑐎𑐵𑑅 𑐤𑑂𑐫𑐳𑑅𑐟 𑐣𑑂𑐫𑐣 𑑋 𑐰 𑐩𑐣𑐸𑐣𑐏𑑄 𑐖𑐶𑑄 𑐏𑑄 𑐖𑐎 𑐢𑐵𑑅𑐳𑐵𑑄 𑐢𑐬𑑂‍𑐩𑐬𑐵𑐖𑑄 𑐠𑑂𑐰 𑐠𑐸𑐩𑐶𑐟 𑐎𑐬𑐸𑐞𑐵 𑐟𑐫𑐵𑑅 𑐎𑐸𑐱𑐮 𑐎𑐬𑑂‍𑐩 𑐫𑐵𑑅𑐐𑐸 𑐡𑐸 𑐢𑐎𑐵𑑅 𑐣𑐬𑐎𑐫𑑂 𑐩𑐕𑑂𑐰𑐂𑐐𑐸 𑐏𑑅 𑑋 𑐟𑐬 𑐰 𑐩𑐣𑐸𑐏𑑄 𑐖𑐶 𑐟𑐳𑐎𑑄 𑐥𑑂𑐬𑐨𑐵𑐡𑐶𑐟𑐫𑑂 (𑐩𑑀𑐖𑐩𑐳𑑂𑐟𑐶) 𑐖𑐎 𑐮𑐵𑐣𑐵𑐔𑑂𑐰𑐣 𑐀𑐬𑑂‍𑐠𑐵𑐟 𑐩𑐏𑑄 𑐢𑐫𑐵𑐧𑐶𑐮 𑑋 𑐴𑐵𑐣𑑄 𑐢𑐬𑑂‍𑐩𑐬𑐵𑐖𑑄 𑐠𑑂𑐰 𑐥𑐟𑑂𑐟𑐶𑐡𑐵𑐣 𑐫𑐵𑑅𑐐𑐸 𑐡𑐸 𑐮𑐵 𑐢𑐎𑐵𑑅 𑐠𑑅𑐐𑐸 𑐡𑐶𑐰𑑂𑐫𑐡𑐺𑐲𑑂𑐚𑐶𑑄 𑐳𑑂𑐰𑐮 𑑋

𑐥𑐸𑐞𑑂𑐫 𑐢𑐫𑐵𑐐𑐸 𑐕𑐸 𑐏𑑅 ? 𑐠𑑂𑐰 𑐢𑐫𑐵𑐐𑐸 𑐠𑑂𑐰 𑐴𑐾 𑐏𑑅 𑐢𑐎𑐵𑑅 𑐎𑑂𑐫𑐣𑐾 𑐠𑐵𑐎𑐸 𑑋 𑐖𑐧 𑐩𑐣𑐹𑐟𑐫𑑂𑐟 𑐡𑐵𑐣 𑐢𑐬𑑂‍𑐩𑐫𑐵 𑐦𑐮𑑄 𑐩𑑄𑐐𑐮 𑐖𑐹𑐐𑐸 𑐏𑐣𑐷, 𑐀𑐧𑐮𑐫𑑂 𑐟𑐶𑐣𑐶 𑐥𑐸𑐞𑑂𑐫 𑐢𑐵𑑅𑐐𑐸 𑐪𑐳𑐶𑐂 𑑋 𑐧𑐸𑐡𑑂𑐢 𑐢𑐬𑑂‍𑐩𑐫𑑂 𑐠𑐠𑐾 𑐔𑑂𑐰𑐫𑐵𑐟𑑅𑐐𑐸 𑐡𑐸 𑐎𑐶 𑐀𑐮𑑀𑐨, 𑐀𑐡𑑂𑐰𑐾𑐲 𑐰 𑐀𑐩𑑀𑐴 𑐠𑐾𑑄𑐖𑑂𑐫𑐵𑑅𑐐𑐸 𑐎𑐸𑐱𑐮 𑐎𑐵𑐬𑑂‍𑐫𑑄 𑐥𑐸𑐞𑑂𑐫 𑐳𑑄𑐔𑐫 𑐖𑐸𑐂 𑑋 𑐠𑑂𑐰 𑐢𑐵𑑅𑐐𑐸𑐫𑐵 𑐀𑐬𑑂‍𑐠 𑐕𑐸 𑐎𑐠𑑄 𑐣𑑄 𑐮𑑀𑐨 𑐩𑐫𑐵𑐫𑐾𑐐𑐸, 𑐳𑐸𑑄 𑐥𑑂𑐬𑐟𑐶 𑐣𑑄 𑐡𑑂𑐰𑐾𑐲 𑐨𑐵𑐰𑐩 𑐟𑐫𑐾𑐐𑐸 𑐰 𑐕𑐸 𑐰𑐳𑑂𑐟𑐸𑐥𑑂𑐬𑐟𑐶 𑐣𑑄 𑐩𑑀𑐴 𑐩𑐟𑐫𑐾𑐐𑐸 𑐎𑐵𑐬𑑂‍𑐫𑑄 𑐴𑐾 𑐥𑐸𑐞𑑂𑐫 𑐳𑑄𑐔𑐫 𑐖𑐸𑐂 𑑋

𑐠𑐖𑑂𑐫𑐵𑑅𑐐𑐸 𑐎𑐱𑐮 𑐎𑐵𑐬𑑂‍𑐫𑑄 𑐠𑑅𑐐𑐸 𑐖𑐷𑐰𑐣 𑐣𑑄 𑐩𑐾𑐥𑐶𑐣𑐶𑐐𑐸 𑐖𑐷𑐰𑐣 𑐣𑑄 𑐳𑐸𑐏𑐩𑐫 𑐖𑐸𑐂 𑑋 𑐀𑐗 𑐠𑐠𑐾 𑐣𑑄 𑐢𑐵𑐫𑐾𑐐𑐸 𑐫𑐵𑑅𑐎𑐶 𑐠𑐖𑑂𑐫𑐵𑑅𑐐𑐸 𑐎𑐸𑐱𑐮 𑐎𑐵𑐬𑑂‍𑐫 𑐫𑐵𑐂𑐥𑐶𑑄 𑐩𑐾𑐐𑐸 𑐖𑐣𑑂𑐩𑐫𑑂 𑐡𑑂𑐫𑑅𑐥𑐶𑑄 𑐖𑐸𑐫𑐵𑑅 𑐳𑑂𑐰𑐬𑑂‍𑐐𑐫𑑂 𑐖𑐎 𑐖𑐣𑑂𑐩 𑐖𑐸𑐂 𑑋 𑐠𑐠𑐾 𑐢𑐵𑑅𑐐𑐸𑐫𑐵 𑐀𑐬𑑂‍𑐠 𑐠𑐸𑐐𑐸 𑐴𑐾 𑐖𑐣𑑂𑐩𑐫𑑂 𑐡𑑂𑐫𑑅𑐥𑐶𑑄 𑐠𑐾𑑄 𑐡𑐎𑑂𑐰𑐳𑐶𑐣𑑄 𑐩𑐵𑐣𑐾 𑐫𑐵𑐂 𑑋