𑐜𑑀𑐮𑑂𑐩𑐵𑐫𑐵 𑐩𑑂𑐴𑐐𑐳 – LETS READ

 

 

𑐳𑐸𑐠𑐳𑐶𑐫𑐵 𑐗𑐮𑐩𑐮 𑐣𑐶𑐨𑐵:𑐖𑐮𑑄 𑐠𑐶𑐣𑐵𑐔𑑂𑐰𑑄𑐐𑐸 𑐴𑐶𑐩𑐵𑐮𑐫𑐵 𑐮𑐶𑐎𑑂𑐎𑐳𑑄 𑐣𑑂𑐴𑐫𑑂‌𑐡𑑄 𑐡𑐸𑐩𑑂𑐴 𑐜𑑀𑐮𑑂𑐩𑐵 𑐔𑑂𑐰𑐣𑐷 𑑋 𑐜𑑀𑐮𑑂𑐩𑐵 𑐠: 𑐀𑐖𑐶, 𑐩𑐵𑑄, 𑐧𑐵: 𑐰 𑐎𑐾𑐴𑐾𑑃 𑐣𑐵𑐥 𑐔𑑂𑐰𑐣𑐷 ! 𑐜𑑀𑐮𑑂𑐩𑐵𑐫𑐵 𑐕𑐾𑑄𑐫𑑂 𑐏𑐶𑐔𑐵, 𑐏𑐵 𑐰 𑐕𑐩𑑂𑐴 𑐔𑑂𑐰𑐵𑐩𑑂𑐰:𑐳𑐵 𑐣𑑄 𑐮𑐴𑐶𑐣𑐵 𑐟:𑐐𑐸 𑐡𑐸 𑑋 𑐜𑑀𑐮𑑂𑐩𑐵𑐫𑐵𑐟 𑐔𑑂𑐰𑐵𑐩𑑂𑐰:𑐳𑐵 𑐟𑐳𑑂𑐳𑐎𑑄 𑐫: 𑑋 𑐩𑐵𑐫𑐵𑑄 𑐰𑐫𑐵𑐟 “𑐫𑐵𑐏𑑀” 𑐢𑐎𑐵: 𑐳:𑐟𑐷 𑑋
𑐟𑐶𑐒𑑂𑐟𑐶𑐒𑑂 ! 𑐟𑐶𑐒𑑂𑐟𑐶𑐒𑑂 !! 𑐫𑐵𑐣𑑄 𑐣𑐶𑐳𑐾𑑄 𑐠𑑂𑐰𑐫𑐵𑐔𑑂𑐰𑑄𑐐𑐸 𑐑𑐞𑑂𑐚𑐶𑐫𑐵 𑐳: 𑑋 𑐴𑑂𑐰𑐵𑐄𑑃 𑐴𑑂𑐰𑐵𑐄𑑃 𑐴𑐵:𑐐𑐸 𑐏𑐶𑐔𑐵𑐫𑐵 𑐳𑐮𑑄 𑐠𑑁𑑄 𑐣𑑄 𑐜𑑀𑐮𑑂𑐩𑐵𑐫𑐵 𑐕𑐾𑑄 𑐫𑐂𑐥𑐸𑐳𑑂𑐳𑐾 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 !
𑐟𑐶𑐒𑑂𑐟𑐶𑐒𑑂 ! 𑐟𑐶𑐒𑑂𑐟𑐶𑐒𑑂 !! 𑐫𑐵𑐏𑑀𑐫𑐵 𑐐:𑐥𑐟𑐫 𑐑𑐵𑐣𑐵𑐟𑐵:𑐐𑐸 𑐐𑑄𑐫𑐵 𑐳:𑐮𑐶𑐳𑐾𑑄 𑐠𑑁𑑄 𑐣𑑄 𑐫𑐵𑐏𑑀𑑄 𑐁𑐥𑐵𑐮𑑄 𑐳𑐵𑐩𑐵𑐣 𑐎𑐸𑐧𑐶𑐫𑐵 𑐴:𑐐𑐸 𑐡𑐸 ! 𑐜𑑀𑐮𑑂𑐩𑐵𑐫𑐵 𑐀𑐧𑐸𑑄 𑐮𑐶𑐎𑑂𑐎𑐳𑑄 𑐔𑑂𑐰𑑄𑐐𑐸 𑐐𑐵𑐩𑑄 𑐕𑐾𑑄𑐫𑐵𑐟 𑐩𑐵:𑐐𑐸 𑐣𑐳𑐵𑐖𑑂𑐰𑐮𑑄, 𑐩𑐾𑐩𑐾𑐐𑐸 𑐴𑐮𑑄𑐖𑑂𑐰𑐮𑑄 𑐫𑐵𑐏𑑀𑐫𑐵𑐟 𑐎𑐸𑐧𑐷𑐎𑐵 𑐴𑐂 !
𑐜𑑀𑐮𑑂𑐩𑐵‌𑑄 𑐫𑐵𑐏𑑀𑐫𑐵𑐟 𑐟𑐳𑐎𑑂𑐎𑑄 𑐫𑐫𑐾𑐎𑐹 ! 𑐫𑐵𑐏𑑀𑑄 𑐜𑑀𑐮𑑂𑐩𑐵𑐫𑐵𑐟 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐳𑐸𑐠𑐫 𑐡𑐸𑐬𑐹 𑐧𑐷 ! 𑐔𑐶𑐎𑐸𑐮𑐵𑐫𑐵 𑐂𑐮𑐫𑑂 𑐴𑐶𑐩𑐵𑐮𑐫𑐵 𑐔𑐶𑐎𑐸 𑐥𑐵𑐏𑐾𑑄 𑐧𑐔𑐾 𑐖𑐸𑐂𑐟 𑐜𑑀𑐮𑑂𑐩𑐵𑑄 𑐫𑐵𑐏𑑀𑐫𑐵 𑐣𑐵𑐂𑐳𑐾 𑐔𑑂𑐰𑑄𑐐𑐸 𑐅𑐣𑐫𑐵 𑐟𑐥𑐸𑐮𑐶𑑄 𑐥𑐸𑐫𑐵: 𑐐𑐮𑐧𑐣𑑂𑐡𑐶𑑄 𑐣𑑂𑐫𑐂 !
𑐜𑑀𑐮𑑂𑐩𑐵𑐫𑐵𑐟 𑐔𑐵𑐄𑐔𑐵𑐄 𑐟𑐳𑐎𑑄 𑐫: ! 𑐄𑐎𑐶𑑄 𑐜𑑀𑐮𑑂𑐩𑐵𑐫𑐵 𑐀𑐧𑐸𑑄 𑐳𑐵𑐩𑐵𑐣 𑐴𑐂𑐧𑐮𑐫 𑐣𑑂𑐴𑑂𑐫𑐵𑐧𑐮𑐾𑑄 𑐜𑑀𑐮𑑂𑐩𑐵𑐫𑐵𑐟 𑐟𑐳𑐎𑑄 𑐫:𑐐𑐸 𑐔𑐵𑐄𑐔𑐵𑐄 𑐣𑑄 𑐴𑐫𑐵𑐧𑐷 ! 𑐔𑐵𑐄𑐔𑐵𑐄 𑐎𑐸𑐬𑐸𑐩 𑐎𑐸𑐬𑐸𑐩 𑐣𑐫𑐾𑐧𑐮𑐫𑑂 𑐟𑐳𑐎𑑄 𑐳𑐵:𑐐𑐸 𑐣𑐵𑐥𑑄 𑐣𑑂𑐴𑑂𑐫𑐵𑐂𑐥𑐸𑐳𑐾𑐔𑑂𑐰𑑄 !
𑐜𑑀𑐮𑑂𑐩𑐵𑐫𑐵 𑐀𑐧𑐸𑑄 𑐫𑐵𑐏𑑀𑐫𑐵𑐟 𑐎𑐸𑐧𑐶𑐎𑐵: 𑐴:𑐐𑐸 𑐔𑐵𑐄𑐔𑐵𑐄 𑐜𑑀𑐮𑑂𑐩𑐵𑑄 𑐣𑑂𑐴𑑂𑐫𑐵𑐂𑐥𑐸𑐎 𑐳𑐵𑐎𑑂𑐎 𑐣𑐂 𑐟𑐬 𑐔𑐵𑐄𑐔𑐵𑐄𑐫𑐵 𑐏𑑀𑐮 𑐢𑐵:𑐳𑐵 𑐕𑐾𑑄 𑐥𑐶𑐣𑐾 𑐴𑐾 𑐰𑐵𑑄𑐕𑑂𑐰𑐂 !
𑐳𑐵𑐩𑐵𑐣 𑐎𑑂𑐰𑐧𑐶𑐫𑐵 𑐰𑐂𑐧𑐮𑐫 𑐫𑐵𑐏𑑀𑐫𑐵 𑐟𑐳𑐎𑑄 𑐟𑑂𑐫𑐵𑐣𑐸 𑐀𑐮𑐾 𑐣𑐫𑐾 𑐣𑑄 𑐥𑐶𑐟𑑂𑐫𑐵: 𑑋 𑐠𑑁𑑄 𑐣𑑄 𑐳𑐵𑐩𑐵𑐣 𑐎𑑂𑐰𑐧𑐶𑐫𑐵 𑐰:𑐩𑑂𑐴 𑐫𑐵𑐏𑑀𑐫𑐵 𑐟𑐳𑐎𑑄 𑐟𑐳𑐎𑑄 𑐟𑑂𑐫𑐵𑐣𑐸𑐳𑐾 𑐔𑑂𑐰𑐣𑐵, 𑐣𑐫𑐾 𑐣𑑄 𑐥𑐶𑐟𑑂𑐫𑐵𑐟 𑑋 𑐳𑐵𑐩𑐵𑐣 𑐎𑐸𑐧𑐶𑐫𑐵 𑐰:𑐩𑑂𑐴 𑐫𑐵𑐏𑑀𑐫𑐵𑐟 𑐠𑐵𑐿𑑄 𑐣𑑄 𑐣𑐫𑐾 𑐥𑐶𑐟𑑂𑐫𑐵𑐟 𑑋 𑐰 𑐕𑐾𑑄𑐫 𑐥𑐶𑐣𑐾 𑐔𑑂𑐰𑑄𑐐𑐸 𑐏𑑂𑐫𑐮𑐫𑑂 𑐰𑐣𑐵: 𑐑𑐵𑑃𑐫𑑂 𑐣𑐮 𑑋 𑐌!!!𑐴𑑀!!! 𑐜𑑀𑐮𑑂𑐩𑐵𑑄 𑐰𑐵𑑄𑐕𑑂𑐰:𑐐𑐸 𑐔𑐵𑐄𑐔𑐵𑐄𑐫𑐵 𑐏𑑀𑐮 𑐦𑐳𑑄 𑐥𑐸𑐂𑐎𑐵: 𑐏𑑂𑐫𑐮𑐫𑑂 𑐑𑐵𑑃𑐳𑐫𑑂 𑐮𑐵:𑐰𑑄𑐐𑐸 𑐖𑐸𑐂 𑑋 𑐫𑐵𑐏𑑀𑑄 𑐑𑐵𑑃𑐫𑑂 𑐣𑐵𑐥𑐣𑐵𑐥𑑄 𑐔𑐵𑐄𑐔𑐵𑐄𑐫𑐵 𑐏𑑀𑐮 𑐣𑑄 𑐣𑐮 𑑋
𑐏𑐵𑑄 ! 𑐏𑐵𑑄! 𑐏𑐵𑑄! 𑐏𑐵𑑄! 𑐔𑐵𑐄𑐔𑐵𑐄𑐫𑐵 𑐏𑑀𑐮 𑐎𑐠𑐸𑐂 𑐠𑐵𑐣𑐵: 𑐫𑐵𑐏𑑀𑑄 𑐏𑑂𑐫𑐵𑑄𑐎 𑐏𑑂𑐫𑐵𑐎 𑐫𑐵𑐣𑐵: 𑐩𑐸𑐳𑐸 𑐟𑐫𑐵𑐔𑑂𑐰𑐣 𑑋 𑐰𑐫𑐵𑐟 𑐏𑐵𑑄! 𑐏𑐵𑑄 ! 𑐳𑑂𑐫𑐵𑑄 ! 𑐳𑑂𑐫𑐵𑑄 ! 𑐖𑐸𑐫𑐵𑐔𑑂𑐰𑐣 𑑋
𑐫𑐵𑐏𑑀 𑐟𑐳𑐎𑑄 𑐩𑑂𑐴𑐩𑐦𑐸𑐩𑑂𑐴𑐠𑐾𑑄 𑐖𑐸𑐮 𑑋 𑐜𑑀𑐮𑑂𑐩𑐵𑑄 𑐎𑐵𑐔𑐵𑐎𑐵𑐔𑐵 𑐧𑑁𑐩𑑂𑐴𑐾𑐳𑐶𑐟 𑐳:𑐟𑐷 𑑋 𑐜𑑀𑐮𑑂𑐩𑐵𑐫𑐵 𑐀𑐧𑐸𑐫𑐵𑐟 𑐠𑑂𑐰 𑐏𑐣𑐵: 𑐟𑐳𑐎𑑄 𑐔𑐶𑐣𑑂𑐟𑐵 𑐖𑐸𑐂 𑑋
𑐔𑐵𑐄𑐔𑐵𑐄𑐫𑐵 𑐏𑑀𑐮 𑐰 𑐩𑐾𑐩𑐾𑐐𑐸 𑐦𑑀𑐴𑐬 𑐣𑐫𑐵: 𑐴𑐾 𑐫𑐵𑐏𑑀 𑐧𑐶𑐬𑐵𑐩𑐷 𑐖𑐹𑐐𑐸 𑐠𑐾𑑄 𑐔𑑂𑐰𑑄 𑐄𑐎𑐶𑑄 𑐁𑐰𑑄𑐣𑐶𑐳𑐾 𑐔𑐵𑐄𑐔𑐵𑐄𑐫𑐵 𑐏𑑀𑐮 𑐣𑑂𑐴𑑂𑐫:𑐣𑐾 𑐮𑐵:𑐠𑐵𑐫 𑐰𑐵𑑄𑐕𑑂𑐰𑐫𑐾 𑐩𑐟𑐾 𑐠𑑂𑐰 𑐡𑐵𑐮𑐵𑐫 𑐖𑐎 𑐰𑐵𑑄𑐕𑑂𑐰𑐫𑐾𑐐𑐸 𑐫𑐵 𑐢𑐎𑐵: 𑐜𑑀𑐮𑑂𑐩𑐵𑐫𑐵 𑐧𑑁 𑐣𑑄 𑐦𑑀𑐴𑐬 𑐰𑐵𑑄𑐕𑑂𑐰𑐫𑐾𑐟 𑐡𑐵𑐮𑐵𑐔𑐵 𑐕𑑂𑐐: 𑐣𑑄 𑐡𑐫𑐾𑐎𑐵 𑐧𑐶𑐮 𑑋
𑐫𑐵𑐏𑑀𑐫𑐵𑐟 𑐔𑐔𑑂𑐕𑐶 𑐩𑐸𑐳𑐸 𑐣𑑄 𑐰𑐮 𑐳𑑂𑐫𑐵𑑃 𑐳𑑂𑐫𑐵𑑃 𑐣𑑄 𑐰𑐮 𑑋 𑐜𑑀𑐮𑑂𑐩𑐵𑐫𑐵 𑐧𑐵: 𑐧𑐶𑐬𑐵𑐩𑐷 𑐫𑐵𑐏𑑀𑐫𑐵 𑐠𑐵𑐫 𑐥𑐶𑐰𑐵: 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐵𑐏𑑀 𑐧𑐶𑐬𑐵𑐩𑐷 𑐖𑐹𑐐𑐸𑐮𑐶𑑄 𑐥𑐷𑐬 𑐎𑐫𑐵𑐔𑑂𑐰𑑄𑐩𑑂𑐴 𑐜𑑀𑐮𑑂𑐩𑐵 𑐠: 𑐡𑑂𑐫𑐣𑐾 𑐣𑑂𑐴𑑂𑐫: 𑐡𑑂𑐫: 𑐫𑐵𑐟 𑐥𑑂𑐬𑐵𑐬𑑂𑐠𑐣𑐵 𑐫𑐵𑐂 “𑐖𑐶𑐩𑐶 𑐫𑐵𑐏𑑀𑐫𑐵𑐟 𑐫𑐵𑐎𑐣𑑄 𑐮𑑄𑐎𑐵𑐧𑑂𑐫𑐸 “𑑋
𑐄𑐐𑐸 𑐔𑐵𑐣𑑂𑐴𑐫 𑐜𑑀𑐮𑑂𑐩𑐵𑑄 𑐩𑑂𑐴𑐐𑐳𑐫𑑂 𑐫𑐾𑐟𑐶𑐫𑐵𑐟 𑐏𑐣 𑑋 𑐫𑐾𑐟𑐶𑑄 𑐢𑐵𑐂 “𑐖𑐶 𑐀𑐥𑑂𑐰: 𑐫𑐵𑐣𑐵: 𑐩𑑂𑐴𑐩𑐦𑐫𑐵 𑐔𑑂𑐰𑐣𑐷 𑑋 फ़𑑀𑐴𑐬𑑄 𑐫𑐵𑐣𑐵𑑄 𑐟𑐸𑐂𑐳𑐾 𑐟𑐮𑐎𑑂𑐎 𑐠𑐷𑐐𑐸 𑐔𑑂𑐰𑐵𑐥𑐸𑐐𑐸𑑄 𑐣𑑄 𑐩𑑂𑐴𑐩𑐦𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐔𑑂𑐰𑐵𑐩𑑂𑐰:𑐳𑐵 𑐀𑐮𑐾 𑐩𑐾𑐩𑐾𑐥𑐶𑑄 𑐳𑐎𑐮𑐾𑑄 𑐩𑑂𑐴𑐩𑐦𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐕𑐶𑐩𑐶𑐳𑑄 𑐣𑑂𑐴𑑂𑐫𑐮𑐵:𑐠𑐵𑐫 𑐦𑑀𑐴𑐬 𑐰𑐵𑑄𑐕𑑂𑐰:𑐐𑐸𑐮𑐶𑑄 𑐖𑐶 𑐧𑐶𑐬𑐵𑐩𑐷 𑐖𑐸𑐮𑑋 𑐁𑐰𑑄𑐮𑐶 𑐕𑐶𑑂𑐩𑐶𑐰𑑄𑐳𑑄 𑐣𑑂𑐴𑑂𑐫𑐮𑐵:𑐠𑐵𑐫 𑐦𑑀𑐴𑐬 𑐰𑐵𑑄𑐕𑑂𑐰𑐫𑐾𑐐𑐸 𑐧𑐵𑐣𑐷 𑐟𑑂𑐰:𑐟𑐾𑐩𑐵𑐮 ” 𑐢:𑐎𑐵: 𑐫𑐟𑐶𑑄 𑐜𑑀𑐮𑑂𑐩𑐵𑐫𑐵𑐟 𑐩𑑂𑐴𑐐𑐳𑐫𑑂 𑐢𑐵𑐮 𑑋
𑐦𑑀𑐴𑐬 𑐰𑐵𑑄𑐕𑑂𑐰𑐫𑐾 𑐩𑐟𑐾
𑐎𑐣𑑂𑐴𑐾𑐏𑐸𑐣𑐸 𑐜𑑀𑐮𑑂𑐩𑐵𑐫𑐵 𑐎𑐾𑐴𑐾𑑄 𑐩𑐵𑐫𑐵𑑄 𑐔𑐶𑐟𑑂𑐬 𑐔𑑂𑐰𑐫𑐵𑐔𑑂𑐰𑐣𑐷 𑑋 𑐔𑐶𑐟𑑂𑐬 𑐡𑐫𑐾𑐎𑐾 𑐳𑐶𑐢𑐫𑐾𑐎𑐵 𑐨𑑂𑐰𑑄 𑐦𑐸𑐎𑑂𑐎 𑐧𑑃𑐫𑑂 𑐕𑑂𑐫𑐵𑐮𑐧𑑂𑐫𑐵𑐮 𑐖𑐸𑐂𑐎 𑐰𑐵𑑄𑐕𑑂𑐰𑐫𑐵 𑐟𑐂 𑑋 𑐠𑑂𑐰 𑐏𑐣𑐵: 𑐜𑑀𑐮𑑂𑐩𑐵𑑄 𑐎𑐾𑐴𑐾𑑄𑐫𑐵𑐟 “𑐣𑑂𑐴𑑂𑐫𑐮𑐵:𑐠𑐵𑐫𑑂 𑐦𑑀𑐴𑐬 𑐰𑐵𑑄𑐕𑑂𑐰𑐮 𑐢𑐵𑐫𑐾𑐰𑑄 𑐫𑐵𑐏𑑀 𑐰 𑐔𑑂𑐰𑐵𑐥𑐸𑐐𑐸𑑄 𑐩𑑂𑐴𑐩𑐦𑐂 𑑋” 𑐢𑐵 𑐢𑐵𑑄 𑐨𑑂𑐰𑑄 𑐦𑐸𑐎𑑂𑐎 𑐩𑐸𑐣𑐵: 𑐰𑐫𑐵 𑐀𑐧𑐸𑑄 𑐩𑑂𑐴𑐶𑐐: 𑐡𑐫𑐾𑐎𑐵 𑐧𑑂𑐫𑐹𑐐𑐸 𑐦𑑀𑐴𑐬 𑐰𑐵𑑄𑐕𑑂𑐰𑐫𑐾𑐐𑐸 𑐡𑐵𑐮𑐵𑐫𑑂 𑐰𑐵𑑄𑐕𑑂𑐰𑐮 𑑋
𑐜𑑀𑐮𑑂𑐩𑐵 𑐴𑐠𑐵𑐳𑑄 𑐫𑐵𑐏𑑀 𑐡𑐸𑐐𑐸 𑐠𑐵𑐳𑐫𑑂 𑐧𑑂𑐰𑐵𑑃𑐫𑑂 𑐰𑐣 𑑋 𑐜𑑀𑐮𑑂𑐩𑐵𑐫𑐵 𑐀𑐖𑐶 𑐰 𑐀𑐧𑐸𑑄 𑐩𑑂𑐴𑐩𑐦𑐸𑐩𑑂𑐴 𑐫𑐵𑐏𑑀𑐫𑐵𑐟 𑐳𑐸𑐳𑐵:𑐎𑐸𑐳𑐵: 𑐫𑐵𑐣𑐵𑐔𑑂𑐰𑐣 𑑋
𑐜𑑀𑐮𑑂𑐩𑐵𑐫𑐵 𑐀𑐖𑐶𑑄 𑐜𑑀𑐮𑑂𑐩𑐵𑐫𑐵𑐟 𑐢𑐫𑐵𑐡𑐶𑐮 ” 𑐕𑑄 𑐕𑐸𑐣𑑄 𑐥𑐷𑐬 𑐎𑐵𑐫𑐾𑐩𑑂𑐰𑐵: 𑐕 𑐳𑑂𑐎𑐹𑐮 𑐴𑐸𑑄 𑑋 𑐕𑐶𑐩𑐶 𑐀𑐧𑐸 𑐰 𑐖𑐶𑑄 𑐫𑐵𑐏𑑀𑐫𑐵𑐟 𑐧𑐵𑑄𑐮𑐵𑐎 𑐧𑐶𑐔𑐵: 𑐫𑐵𑐫𑐾 𑑋 “
𑐟𑐶𑐒𑑂𑐟𑐶𑐒𑑂 ! 𑐟𑐶𑐒𑑂𑐟𑐶𑐒𑑂 𑑋 “𑐫𑐵𑐏𑑀 !!” 𑐳𑑂𑐎𑐹𑐮 𑐰𑐣𑐵𑐰:𑐩𑑂𑐴 𑐜𑑀𑐮𑑂𑐩𑐵𑑄 𑐳𑐸 𑐣𑐫𑐵𑐔𑑂𑐰𑑄𑐩𑑂𑐴 𑐫𑐵𑐏𑑀𑐫𑐵𑐟 𑐏𑐣 𑑋𑐁: 𑐫𑐵𑐏𑑀𑐫𑐵𑐟 𑐧𑐶𑐬𑐵𑐩𑐷 𑐖𑐹𑐐𑐸 𑐮𑐣𑐾 𑐢𑐸𑑄𑐎𑐮 𑑋 𑐜𑑀𑐮𑑂𑐩𑐵𑑄 𑐫𑐵𑐏𑑀𑐫𑐵𑐟 𑐩𑐵𑐫𑐵 𑐫𑐵𑐣𑐵𑑄 𑐢𑐵𑐮 “𑐫𑐵𑐏𑑀 𑐖𑐶𑐟: 𑐎𑑂𑐲𑐩𑐵 𑐫𑐵 , 𑐁𑐰𑑄𑐣𑐶𑐳𑐾𑑄 𑐖𑐶𑑄 𑐣𑑂𑐴𑑂𑐫𑐮𑐵:𑐠𑐵𑐫 𑐦𑑀𑐴𑐬 𑐰𑐵𑑄𑐕𑑂𑐰𑐫𑐾 𑐩𑐏𑐸𑐟𑑋 𑐀𑐮𑐾 𑐕 𑐣𑑄 𑐩𑑂𑐴𑐩𑐦𑐐𑐸 𑐖𑐸𑐂 𑐩𑐏𑐸𑐟 𑑋 “
𑐟𑐶𑐒𑑂𑐟𑐶𑐒𑑂 ! 𑐟𑐶𑐒𑑂𑐟𑐶𑐒𑑂 𑑋 𑐳𑐸𑐠𑐳𑐶𑐫𑐵 𑐳𑐸𑐥𑐵𑑃𑐫𑑂 𑐣𑐵𑐥𑑄 𑐫𑐵𑐏𑑀𑐫𑐵 𑐐:𑐥𑐟𑐫 𑐑𑐵𑐣𑐵𑐟:𑐐𑐸 𑐐𑑄𑐫𑐵 𑐫𑐂𑐥𑐸𑐐𑐸 𑐳𑐮𑑄 𑐔𑑂𑐰𑐵𑐥𑐸𑐐𑐸𑑄 𑐠𑑂𑐰𑐫𑐵𑐔𑑂𑐰𑐣 𑑋

Brought to you by
Let’s Read! is an initiative of The Asia Foundation’s Books for Asia
program that fosters young readers in Asia. booksforasia.org
To read more books like this and get further information about
this book, visit letsreadasia.org
Original Story
𑐜𑑀𑐮𑑂𑐩𑐵𑐫𑐵 𑐩𑑂𑐴𑐐𑐳, author: Unknown. Released under CC BY-NC-SA 4.0.
This work is a modified version of the original story. © The Asia
Foundation, 2019. Some rights reserved. Released under CC
BY-NC-SA 4.0.
For full terms of use and attribution,
http://creativecommons.org/licenses/by-nc-sa/4.0/
Contributing translators: Jeevan Kumar Maharjan, Kamala
Manandhar, and Akash Maharjan