𑐟𑑅𑐩𑐸𑑃𑐖𑑂𑐫𑐵𑐫𑐵 𑐣𑐵𑐫𑑅 𑐄𑐮𑐎𑐫𑐵𑐟 𑐴𑐣𑐾𑐖𑑂𑐫𑐵

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵𑐫𑐵 𑐐𑑂𑐰𑐳𑐵𑐮𑐫𑑂 𑐰𑑄𑐐𑐸 𑐎𑑁𑐮𑐵𑐠𑑂𑐰 𑐡𑑂𑐰𑐵𑐡𑐱𑐶 𑐰 𑐟𑑂𑐬𑐫𑑀𑐡𑐱𑐶 𑐣𑐶𑐣𑑂𑐴𑐸𑐫𑑄𑐎𑑄𑑄 𑐥𑐷𑐣𑐶𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐨𑐵𑐬𑑂𑐰𑐵𑐔𑑀𑐫𑑂 𑐖𑐸𑐮 𑑋 𑐟𑑅𑐩𑐸𑑃𑐖𑑂𑐫𑐵𑐫𑑂 𑐠𑐸𑐐𑐸𑐳𑐷 𑐟𑐵𑑅𑐃𑐟𑐎 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵𑐫𑐵 𑐣𑐵𑐫𑑅 𑐖𑐸𑐫𑐵𑑅 𑐖𑑂𑐫𑐵 𑐫𑐵𑐣𑐵𑐡𑐷𑐩𑑂𑐴 𑐖𑐣𑐎𑐰𑐶 𑐔𑐣𑑂𑐡𑑂𑐬𑐧𑐴𑐵𑐡𑐸𑐬 𑐄𑐮𑐎𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐣𑐾𑐥𑐵𑐮 𑐩𑐖𑐡𑐸𑐬 𑐎𑐶𑐳𑐵𑐣 𑐥𑐵𑐬𑑂𑐚𑐷 (𑐣𑐾𑐩𑐎𑐶𑐥𑐵)𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐣𑐵𑐬𑐵𑐫𑐞𑐩𑐵𑐣 𑐧𑐶𑐖𑐸𑐎𑑂𑐕𑐾𑑃 𑐬𑑀𑐴𑐟𑐶𑑄 𑐟𑑅𑐩𑐸𑑃𑐖𑑂𑐫𑐵𑐫𑐵 𑐣𑐵𑐫𑑅 𑐄𑐮𑐎𑐫𑐵𑐟 𑐣𑐷𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄𑐮𑐶𑐳𑐾𑑄 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅 𑐴𑐣𑐵𑐥𑑁 𑐡𑐾𑐕𑐵𑐳𑐾 𑐴𑐣𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐟𑑅𑐩𑐸𑑃𑐖𑑂𑐫𑐵𑐫𑐵 𑐟𑐵𑑅𑐃𑐟𑐎 𑐣𑐵𑐫𑑅 𑐖𑐸𑐫𑐵𑐡𑐷𑐩𑑂𑐴 𑐄𑐮𑐎𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑐳𑐾𑑄 𑐮𑑅𑐮𑑂𑐴𑐵𑑅𑐐𑐸 𑐢𑑂𑐫𑐧𑐵 𑐰𑐫𑑂𑐎𑐮𑑄 𑐟𑑅𑐩𑐸𑑃𑐖𑑂𑐫𑐵𑐫𑐵𑐟 𑐴𑐾 𑐐𑑂𑐰𑐵𑐴𑐵𑐮𑐶𑐎𑐠𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐠𑐸𑐎𑐠𑑄 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐟𑐵𑑅𑐃 𑐣𑐶𑐳𑐾𑑄 𑐳𑐵𑑄𑐳𑑂𑐎𑐺𑐟𑐶𑐎 𑐏𑑂𑐫𑐮𑐫𑑂 𑐖𑑂𑐰𑑅𑐩𑐡𑐸𑐐𑐸 𑐫𑑀𑐐𑐡𑐵𑐣 𑐧𑐶𑐫𑐵 𑐰𑐫𑐵𑐔𑑂𑐰𑐣𑐵𑐡𑐷𑐩𑑂𑐴 𑐎𑐮𑐵𑐎𑐵𑐬 𑐡𑐾𑐰𑐔𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐣𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵𑐟 𑐣𑑄 𑐩𑐹𑐥𑐵𑐴𑐵𑑄 𑐬𑑀𑐴𑐟𑐶𑑄 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅 𑐴𑐣𑐵𑐥𑑁 𑐡𑐾𑐕𑐵𑐳𑐾 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐠𑐵𑐣𑐷𑐫 𑐳𑐵𑑄𑐳𑑂𑐎𑐺𑐟𑐶𑐎 𑐐𑐸𑐬𑐸𑐥𑐶𑑄 𑐧𑐡𑑂𑐬𑐷 𑐣𑑂𑐫𑐵𑐂𑐔𑑂𑐫𑐵𑐂 𑐰 𑐴𑐬𑐶𑐥𑑂𑐬𑐳𑐵𑐡 𑐧𑐵𑐚𑐷𑐫𑐵𑐟 𑐣𑑄 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐟𑑅𑐩𑐸𑑃𑐖𑑂𑐫𑐵𑐫𑑂 𑐳𑐵𑐴𑐶𑐟𑑂𑐫𑐫𑐵 𑐠𑐷𑐠𑐷 𑐰𑐶𑐢𑐵𑐥𑐵𑐏𑐾𑑄 𑐄𑐟𑑂𑐎𑐺𑐲𑑂𑐚 𑐖𑐹𑐥𑐶𑑄𑐟 𑐳𑐶𑐬𑐥𑐵𑑅 𑐣𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐠𑐸𑐐𑐸𑐳𑐷 𑐔𑐶𑐣𑐵𑐏𑑃𑐥𑐵𑐏𑐾 𑐎𑐵𑐱𑐶𑐬𑐵𑐩 𑐰𑐶𑐬𑐳 𑐣𑑂𑐴𑐵𑐥, 𑐥𑑂𑐬𑐾𑐩 𑐥𑑂𑐬𑐖𑐵𑐥𑐟𑐶 𑐮𑐶𑐄 𑐰 𑐐𑑄𑐐𑐵𑐬𑐵𑐩 𑐖𑑂𑐫𑐵𑐏𑑂𑐰 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐏𑑅𑐳𑐵 𑐧𑐵𑐏𑑄 𑐰𑐶𑐢𑐵𑐥𑐵𑐏𑐾 𑐊𑐮 𑐎𑐾. 𑐳𑐸𑐣𑑂𑐡𑐬 𑐣𑑂𑐴𑐵𑐥 𑐰 𑐬𑐵𑐩𑐐𑑀𑐥𑐵𑐮 𑐧𑐩𑐣𑐹 𑐮𑐶𑐄 𑐮𑐵𑑅𑐐𑐸 𑐏𑑅 𑑋 𑐳𑐵𑐴𑐶𑐟𑑂𑐫𑐫𑑂 𑐄𑐟𑑂𑐎𑐺𑐲𑑂𑐚 𑐖𑐸𑐫𑐵𑐡𑐷𑐥𑐶𑑄𑐟 𑐩𑐹𑐥𑐵𑐴𑐵𑑄 𑐧𑐶𑐖𑐸𑐎𑑂𑐕𑐾𑑃 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐶𑐣𑑂𑐴𑐸𑐫𑑄𑐎𑑄 𑐖𑐹𑐐𑐸 𑐟𑑅𑐩𑑃𑐸𑐖𑑂𑐫𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐡𑐶𑑄𑐫𑐵 𑐖𑑂𑐫𑐵𑐗𑑂𑐰𑑅 𑐩𑐶𑐳𑐵 𑐣𑐾𑐟𑐺 𑐔𑐣𑐩𑐟𑐶 𑐏𑐸𑐮𑐶𑐩𑐸𑐮𑐶𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐨𑐵𑐰𑐵𑐬𑑂𑐔𑐵𑐫𑐵 𑐳𑑂𑐠𑐵𑐣𑐷𑐫 𑑙𑑓 𑐡𑑃 𑐡𑐸𑐩𑑂𑐴 𑐴𑐬𑐶𑐮𑐵𑐮 𑐥𑑄𑐔𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑑂𑐴𑐵𑐥𑐵𑑄𑐐𑐸 𑐣𑑂𑐴𑐶𑐫𑐵 𑐟𑑅𑐩𑐸𑑃𑐖𑑂𑐫𑐵𑐫𑑂 𑐩𑐡𑐸𑐩𑑂𑐴 𑐱𑑀𑐨𑐵 𑐧𑐶𑐖𑐸𑐎𑑂𑐕𑐾𑑃𑐫𑐵𑐟 𑐮𑐸𑐩𑑄𑐎𑐵𑑅 𑐰𑐫𑑂𑐎𑑅𑐫𑐵𑐟 𑐣𑑄 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐴𑐶𑐡 𑐢𑐬𑑂𑐩𑐨𑐎𑑂𑐟 𑐩𑐵𑐣𑐰 𑐀𑑄𑐐 𑐥𑑂𑐬𑐟𑑂𑐫𑐵𑐬𑑀𑐥𑐞 𑐎𑐾𑐣𑑂𑐡𑑂𑐬𑐫𑐵 𑐥𑑂𑐬𑐩𑐸𑐏 𑐜𑐵. 𑐥𑐸𑐎𑐵𑐬𑐔𑐣𑑂𑐡𑑂𑐬 𑐱𑑂𑐬𑐾𑐲𑑂𑐛, 𑐳𑐵𑐴𑐶𑐟𑑂𑐫𑐎𑐵𑐬 𑐂𑐣𑑂𑐡𑐶𑐬𑐵 𑐥𑑂𑐬𑐳𑐵𑐂𑑃, 𑐖𑑂𑐫𑑀𑐟𑐶𑐲𑐱𑐵𑐳𑑂𑐟𑑂𑐬𑐷 𑐰𑐷𑐬𑐾𑐣𑑂𑐡𑑂𑐬𑐨𑐎𑑂𑐟 𑐥𑑂𑐬𑐢𑐵𑐣𑐵·, 𑐂𑐟𑐶𑐴𑐵𑐳𑐰𑐶𑐡𑑂 𑐜𑐵. 𑐥𑐸𑐬𑐸𑐲𑑀𑐟𑑂𑐟𑐩𑐮𑑀𑐔𑐣 𑐱𑑂𑐬𑐾𑐲𑑂𑐛, 𑐳𑐷𑐩𑐵𑐰𑐶𑐡𑑂 𑐬𑐟𑐣 𑐨𑐞𑑂𑐜𑐵𑐬𑐷, 𑐳𑐵𑐴𑐶𑐟𑑂𑐫𑐎𑐵𑐬 𑐣𑐬𑐾𑐣𑑂𑐡𑑂𑐬 𑐥𑑂𑐬𑐳𑐵𑐂𑑃, 𑐰𑐬𑐶𑐲𑑂𑐛 𑐀𑐢𑐶𑐰𑐎𑑂𑐟𑐵 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐞𑑂𑐜𑐵𑐬𑐷, 𑐳𑐩𑑂𑐩𑐵𑐣𑐟𑐶 𑐰𑑂𑐫𑐎𑑂𑐟𑐶𑐟𑑂𑐰m 𑐄𑐮𑐎, 𑐣𑐾𑐩𑐎𑐶𑐥𑐵𑐫𑐵 𑐳𑐔𑐶𑐰 𑐥𑐾𑑂𑐬𑐩 𑐳𑐸𑐰𑐵𑐮, 𑐰𑐬𑐶𑐲𑑂𑐛 𑐩𑐶𑐳𑐵 𑐮𑑂𑐰𑐫𑑂 𑐰𑐶𑐱𑐾𑐲𑐖𑑂𑐘 𑐜𑐵. 𑐳𑐵𑐣𑐸𑐩𑐿𑑄𑐫𑐵 𑐱𑑂𑐬𑐾𑐲𑑂𑐛, 𑐱𑐩𑑂𑐨𑐹 𑐥𑐴𑐵𑐜𑐷, 𑐰𑐬𑐶𑐲𑑂𑐛 𑐂𑐣𑑂𑐖𑐶𑐣𑐶𑐫𑐬 𑐬𑐵𑐖𑐡𑐵𑐳 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮𑐷 𑐳𑐾𑐣𑐵𑐫𑐵 𑐥𑐹𑐬𑑂𑐰 𑐖𑐬𑑂𑐣𑐾𑐮 𑐥𑐾𑑂𑐬𑐩𑐳𑐶𑑄𑐴 𑐧𑐳𑑂𑐣𑑂𑐫𑐵𑐟, 𑐂𑐟𑐶𑐴𑐵𑐳𑐰𑐶𑐡𑑂 𑐰𑐶𑐱𑑂𑐰𑐩𑑀𑐴𑐣 𑐖𑑀𑐱𑐷, 𑐥𑐸𑐮𑐵𑑄𑐩𑑂𑐴 𑐣𑑂𑐫𑐵𑐫𑐵𑐢𑐶𑐱 𑐐𑑁𑐬𑐷𑐧𑐴𑐵𑐡𑐸𑐬 𑐎𑐵𑐬𑑂𑐎𑐷𑐥𑐶𑑄𑐳𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐫𑐵 𑐖𑑂𑐫𑐵𑐗𑑂𑐰𑑅 𑐟𑑅𑐩𑐸𑑃𑐖𑑂𑐫𑐵𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅𑐮𑐶𑐳𑐾𑑄 𑐱𑐶𑐎𑑂𑐲𑐵𑐳𑐾𑐰𑐷 𑐖𑑂𑐘𑐵𑐣𑐳𑐵𑐐𑐬 𑐥𑑂𑐬𑐖𑐵𑐥𑐟𑐶𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐏𑑅𑐳𑐵 𑐣𑐶𑐣𑑂𑐴𑐸𑐫𑑄𑐎𑑄 𑐠𑐷𑐠𑐷 𑐩𑑂𑐫𑐾𑑃, 𑐴𑐸𑐮𑐵𑐥𑑂𑐫𑐵𑐏𑑄, 𑐏𑑂𑐫𑐵𑐮𑑅, 𑐣𑐵𑐚𑐎𑐮𑐶𑐳𑐾𑑄 𑐳𑐵𑑄𑐳𑑂𑐎𑐺𑐟𑐶𑐎 𑐰 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑑅 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋