𑐡𑐩𑑁𑐮𑐷𑐫𑐵 𑐡𑑂𑐫𑑅 𑐧𑐏𑐟 𑐣𑐵𑐬𑐵𑐫𑐞

𑐖𑑂𑐫𑐵 𑐫𑐵𑐫𑐾𑐐𑐸 𑐴𑐾 𑐖𑐷𑐰𑐣 𑐩𑐏𑐸 𑐮𑐵 ? 𑐠𑑅𑐐𑐸 𑑙𑑑 𑐡𑑃 𑐟𑐵𑑅𑐴𑐵𑐎𑑅𑐐𑐸 𑐖𑐷𑐰𑐣𑐫𑐵𑐟 𑐤𑑂𑐫𑐂𑐥𑐸𑐎 𑐡𑑂𑐫𑑅𑐏𑑅 𑐳𑐵𑑅𑐠𑐾𑑄 𑐑𑐬𑐑𑐬 𑐳𑐵𑐮𑐵𑑅 𑐳𑐩𑐵𑐖𑐫𑐵𑐟 𑐁𑑅 𑐣𑑄 𑐮𑐸𑐩𑐸𑐐𑐸 𑐩𑐟𑐶𑐣𑐵 𑐰𑐵 𑐳𑐾𑐰𑐵 𑐧𑐶𑐫𑐵𑐔𑑂𑐰𑑄𑐪 𑐧𑐏𑐟 𑐣𑐵𑐬𑐵𑐫𑐞𑐫𑐵𑐟 𑐏𑐣𑐷𑐧𑐮𑐫𑑂 𑐠𑐠𑐾 𑐣𑐸𑐐𑐮𑐫𑑂 𑐩𑐰𑐳𑐾 𑐔𑑂𑐰𑐣𑐾𑐦𑐂𑐩𑐏𑐸 𑑋 𑐧𑐏𑐟 𑐣𑐵𑐬𑐵𑐫𑐞 𑐱𑑂𑐬𑐾𑐲𑑂𑐛 – 𑐣𑐵𑐩𑑄 𑐴𑐾 𑐐𑐵𑑅 𑐁𑑅𑐫𑐵 𑐣𑐎𑐟𑐶𑐣𑐶 𑐣𑐎𑐟𑐶𑐣𑐶 𑐥𑑂𑐮𑐵𑐣𑐶𑐒 𑐫𑐵𑐣𑐵𑑅 𑐰𑐶𑐳𑑂𑐟𑐵𑐬 𑐫𑐵𑐣𑐵𑐟𑑅𑐐𑐸 𑐡𑐩𑑁𑐮𑐷𑐂 𑐔𑑂𑐰𑑄𑐥𑐶𑑄𑐟 𑑋

𑐰𑐫𑐵 𑐏𑑂𑐰𑐵𑐮𑐫𑑂 𑐳𑐮𑑄𑐳𑑅𑐥𑐸 𑐧𑐵𑐏𑑄 𑐡𑐸, 𑐰𑐫𑐵𑐐𑐸 𑐤𑐶𑐮𑐵𑐫𑑂 𑐡𑑂𑐰𑐮𑑄𑐡𑑂𑐰𑑅 𑐏𑑂𑐰𑑅𑐳𑑅 𑐡𑐸 𑑋 𑐀𑐠𑐾𑐳𑐵𑑄 𑐰 𑐤𑐶𑐮𑐵 𑐴𑐾 𑐔𑑂𑐰𑐣𑐷, 𑐂𑐮𑑄 𑐴𑐵𑐫𑐾𑐎𑐾 𑐩𑐦𑐸𑐐𑐸 𑐕𑐥𑐸 𑐣𑐶𑐥𑐸 𑐰𑐵 𑐎𑑂𑐫𑐣𑐵𑑅 𑑋 𑐩𑑁𑐎𑐵 𑐮𑐵𑐟𑐎𑐶 𑐁𑑅 𑐴𑐾 𑐥𑑂𑐫𑑄𑐥𑐵 𑐯𑑂𑐰𑐣𑐵𑑅 𑐥𑑂𑐫𑐵𑐏𑑄𑐥𑐵𑑅 𑐎𑐵𑐎𑐵𑑄 𑐩𑑂𑐫𑐾𑑃 𑐴𑐵𑐮𑐵𑐴𑐂 – “𑐩𑐕𑐶𑐣𑑂𑐡𑐬𑐣𑐵𑐠 𑐎𑐬𑐸𑐞𑐵𑐣𑐶𑐢𑐵𑐣 𑐡𑐾𑐰” 𑑋 𑐕𑐐𑐹 𑐀𑐖𑐹 𑐴𑐾 𑐔𑐵𑐫𑐵𑐥𑐸𑐐𑐸 𑐳𑑄𑐖𑑀𑐐 𑐢𑐵𑐫𑐾𑐩𑐵𑐮 𑑋
𑐰𑐫𑑂𑐎𑑅𑐫𑐵 𑐎𑐵𑐫 𑐱𑑄𑐎𑐬 𑐣𑐵𑐬𑐵𑐫𑐞𑐖𑐸𑑄 𑐠𑑅 𑐧𑑁𑐫𑐵 𑐧𑐵𑐬𑐾 𑐖𑐷𑐰𑐣𑐷 𑐔𑑂𑐰𑐫𑐾𑐟 𑐢𑐎𑐵𑑅 𑐖𑐶 𑐰 𑐬𑐾𑐏𑐵 𑐱𑐵𑐎𑑂𑐫𑐫𑐵𑐟 𑐫𑑄𑐎𑐾𑐐𑐸 𑐏𑑃 𑐎𑑂𑐰𑑅𑐖𑐶𑐟 𑑋

𑐖𑐶𑐥𑐶𑑄𑐮𑐶𑐳𑐾𑑄 𑐜𑐎𑐸𑐩𑐾𑐣𑑂𑐚𑑂𑐬𑐷 𑐡𑐫𑐾𑐎𑐾𑐟 𑐩𑐾𑐐𑐸 𑐥𑐸𑐔𑑅 𑐣𑑄 𑐰𑐣𑐷𑐐𑐸 𑐖𑐸𑐫𑐵𑐔𑑂𑐰𑐣 – 𑐬𑐵𑐖𑐸 𑐳𑑂𑐫𑐳𑑂𑐫𑑅, 𑐥𑐰𑐶𑐟𑑂𑐬 𑐎𑐳𑐵𑑅, 𑐁𑐮𑑀𑐎 𑐟𑐸𑐮𑐵𑐢𑐬 𑐰 𑐬𑐵𑐖𑐾𑐱 𑐜𑑄𑐐𑑀𑐮 𑐡𑐸𑐐𑐸 𑑋 𑐕𑐐𑐹 𑐤𑑂𑐫𑐂𑐥𑐸𑐐𑐸 𑐥𑐸𑐔𑑅 𑐟𑐫𑐵𑐬 𑐖𑐸𑐮 𑑋 𑐳𑑂𑐰𑐣𑐶𑐐𑑅𑐫𑐵 𑐠𑑅 𑐴𑐾 𑐖𑐎 𑐳𑐎𑐟𑐵𑑄 𑐢𑐎𑐵𑑅 𑐔𑑂𑐰𑐣𑐷𑐥𑐶𑑄 𑐟𑐸𑑄𑐧𑑂𑐫𑐵𑑄 𑐣𑐾𑐰𑐵𑑅𑐟𑐫𑑂𑐟 𑐳𑑂𑐰𑐣𑐶𑐐𑐮𑑄𑐥𑐶𑐣𑐾 𑐔𑑂𑐰𑑄𑐥𑐶𑑄𑐳𑑄 𑐣𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐮𑑂𑐫𑑄𑐎𑐵𑐟𑐫𑐾𑐟 𑐕𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐢𑐎𑐵𑑅 𑐎𑑂𑐫𑐣𑐾𑐐𑐸 𑐣𑑄 𑐖𑐶𑐐𑐸 𑐣𑐸𑐐𑐮𑐫𑑂 𑐕𑐎𑐹𑐔𑐵 𑐩𑐣𑑂𑐟𑐸𑐣𑐵 𑐳𑐸𑐮𑐵𑐔𑑂𑐰𑑄𑐐𑐸 𑐮𑐸𑐂𑐎𑐵 𑐖𑐶𑑄 𑑋

𑐰𑐣𑐾 𑐢𑐵𑐢𑐵𑑄 𑐮𑐶𑐧𑐵𑐟, 𑐄𑐎𑐶𑑄 𑐧𑐴𑐣𑐷 𑐡𑐩𑑁𑐮𑐷𑐂 𑐱𑑄𑐎𑐬𑐡𑐵𑐂𑐫𑐵 𑐕𑐾𑑃𑐎𑑂𑐰𑐫𑑂 𑐠𑑂𑐫𑑄𑐧𑐮𑐫𑑂 𑐔𑐵𑐤𑐳𑐶𑐫𑐵 𑐣𑐶𑐟𑐵𑑅𑐟𑑂𑐫𑐵 𑐠𑐵𑐟 𑑋 𑐫𑐵𑐐𑑂𑐮𑐵𑐥𑑂𑐫𑐵𑐐𑑂𑐮𑐵𑐐𑐸 𑐪 𑐖𑑂𑐰𑐣𑐵𑑅 𑐠𑐴𑐵𑑄 𑐰𑐣𑐵 𑑋 𑐕𑐸

𑐐𑐠𑐾 𑐩𑐳𑐶𑐂𑐎𑑄 𑐀𑐣 𑐖𑐶𑐩𑐶𑐟 𑐢𑐎𑐵𑑅 𑐟𑑂𑐰𑑅𑐟𑐵𑐟𑑅𑐐𑐸 𑐎𑑂𑐰𑐠𑐵𑐫𑑂 𑐡𑑂𑐫𑐣𑐵𑐕𑑂𑐰𑐫𑐵 𑑋

𑑒𑑐𑑑𑑙 𑐦𑐾𑐧𑑂𑐬𑐸𑐰𑐬𑐷 𑑒𑑓𑐫𑐵 𑐳𑐸𑐠𑐫𑑂 𑐡𑐣𑐵𑐧𑐮𑐫𑑂 𑐩𑐾𑐩𑐾𑐥𑐶𑑄 𑐣𑑄 𑐠𑑂𑐫𑐣𑐾𑐢𑐸𑑄𑐎𑐮 𑑋 𑐳𑐸𑐠 𑐖𑑂𑐫𑐵 𑐳𑐶𑐢𑐫𑐾𑐎𑐵𑑅 𑐄𑐩𑐶𑐐𑐸 𑐴𑐾 𑐥𑐸𑐮𑐵𑑄𑐐𑐸 𑐕𑐾𑑃𑐫𑑂 𑐔𑑂𑐫𑐵 𑐟𑑂𑐰𑐣𑐾𑐟 𑐰𑐣𑐵 𑑋 𑐥𑐸𑐮𑐵𑑄𑐐𑐸 𑐥𑐴𑐐𑐸 𑐴𑐶𑐳𑐶𑐔𑐵 𑐡𑐸𑐐𑐸 𑐕𑐾𑑃 𑑒𑑗 𑐳𑐵𑐮𑐥𑐵𑐏𑐾 𑐀𑐣𑐫𑐵 𑐰𑑂𑐫𑐰𑐳𑑂𑐠𑐶𑐟 𑐚𑐵𑐄𑐣 𑐥𑑂𑐮𑐵𑐣𑐶𑐒𑑂𑐐𑐫𑑂 𑐡𑐎𑐮𑐫𑑂 𑐤𑐵𑐥𑐵𑑄 𑐖𑐐 𑐟𑑅𑐐𑐸 𑐰 𑐋𑐟𑐶𑐴𑐵𑐳𑐶𑐎 𑐕𑐾𑑃 𑑋 𑐀𑐣𑐫𑐵 𑐰𑐵𑐟𑐵𑐰𑐬𑐞 𑐴𑐾 𑐮𑐸𑐩𑐸𑐳𑐾 𑑋 𑐔𑐶𑐫𑐵 𑐥𑐶𑐫𑐵𑐔𑑂𑐰𑑃𑐔𑑂𑐰𑑄 𑐱𑑄𑐎𑐬 𑐡𑐵𑐂𑐣𑑄 𑐰𑐫𑑂𑐎𑑅𑐫𑐵 𑐧𑐵𑑅 𑐪𑐳𑐶𑐂𑐎𑐵 𑐧𑐶𑐫𑐵𑐡𑐶𑐮 𑑋

𑐖𑐶𑐩𑐶𑐳𑑄 𑐏𑐣𑐾𑐰𑑄 𑐡𑐣𑐵𑑅 𑐖𑑂𑐰𑐖𑐮𑐥𑐵 𑐫𑐵𑐣𑐵 𑑋 𑐰𑐫𑑂𑐎𑐮𑑄 𑐡𑑂𑐫𑐧𑐵𑑄 𑐎𑐵𑐫𑐾𑐩𑐡𑐂𑐐𑐸 𑐩𑐸𑐳𑐸𑐎𑐵𑑅 𑐦𑑂𑐰𑐳𑐵 𑐰𑑅𑐐𑐸 𑐳𑐸𑐰𑐵𑑅 𑐧𑐶𑐫𑐵𑐡𑐶𑐮, ‘𑐨𑐵𑐐𑑂𑐫𑐩𑐵𑐣𑐶’ 𑑋 𑐖𑐶𑐩𑐶𑐳𑑄 𑐖𑐶𑐥𑐶𑑄 𑐰𑐫𑐵𑐐𑐸 𑐎𑐵𑐬𑐞 𑐂𑐟𑑂𑐫𑐵𑐡𑐶 𑐎𑐣𑐵 𑑋 ‘𑐖𑐶𑐩𑐶𑐐𑐸 𑐨𑐵𑐫𑑂 𑐕𑐶𑐎𑐥𑐶𑑄𑐳𑑄 𑐠𑐸𑐂𑐩𑐏𑐸’ 𑐢𑐵𑐢𑐵𑑄 𑐏𑑂𑐰𑐥 𑐨𑐵𑐫𑑂𑐫𑐵 𑐳𑐸𑐣𑑂𑐡𑐬𑐟𑐵 𑐧𑐵𑐳𑐵 𑐮𑐵𑐫𑐾𑐠𑐾𑑄 𑐮𑐵𑐣𑐵𑐡𑐶𑐮 𑑋 𑐤𑐵𑐥𑐵𑑄 𑐮𑐵 𑐨𑐔𑐵 𑐮𑐶𑐔𑐶𑐮𑐵𑐡𑐶𑐮 𑐰𑐫𑑂𑐎𑑅 𑑋 𑐩𑐕𑐵𑐮 𑐮𑐵 𑐩𑐳𑐶𑐄, “𑐪𑐵𑑅 𑐎𑐣𑐾𑐐𑐸 𑐩𑐡𑐸, 𑐎𑐣𑐾 𑐩𑐳𑑅” 𑐢𑐎𑐵𑑅 𑑋

𑐟𑐬 𑐮𑐶𑐥𑐵 𑐎𑐣𑐾𑐟 𑐟𑐎 𑐟𑐫𑐵𑐬 𑐖𑐸𑐫𑐵𑐡𑐶𑐮 𑑋 𑐳𑐟𑐶𑐣𑐵𑐰𑑄𑐮𑐶𑐳𑐾 𑐏𑑃 𑐧𑐵𑑅 𑐰𑐮 𑑋 𑐎𑐣𑐾𑐐𑐸 𑐏𑑃 𑐮𑐵 𑐠𑐵𑑅𑐐𑐵𑑅 𑐩𑐡𑐫𑐾𑐎 𑐡𑐸 𑐏𑐣𑐶 𑑋 𑐕𑐐𑐹 𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐂𑐟𑐶𑐴𑐵𑐳 𑑋 𑐗𑐷𑐐𑐸 𑐳𑑄𑐳𑑂𑐎𑐺𑐟𑐶𑐫𑐵 𑐨𑐵𑐳𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐕𑐪 𑐡𑑂𑐫𑑅 𑑋 𑐠𑑂𑐰 𑐄𑐩𑐾𑐬𑐫𑑂 𑐣𑑄 𑐳𑐦𑐹 𑐧𑑂𑐰𑐣𑐾𑐐𑐸 𑐩𑐟𑑂𑐰𑑅𑐟𑐹𑐣𑐶 𑑋 𑐥𑑂𑐫𑐳𑑅 𑐣𑑂𑐫𑐵𑐳𑑅 𑐥𑑁 𑐡𑐸𑐐𑐸 𑐐𑐞𑐾𑐱 𑐥𑐸𑐬𑐵𑐞, 𑐴𑐬𑐶𑐰𑑄𑐱 𑐥𑐸𑐬𑐵𑐞 𑐰 𑐩𑐾𑐩𑐾𑐐𑐸 𑐀𑐖𑑂𑐫𑐵𑑅𑐐𑐸 𑐴𑐾 𑐟𑐟𑑅𑐥𑑃𑐐𑐸 𑐣𑑂𑐫𑐵𑐐𑐹 𑐏𑐸𑐐𑐹 𑐳𑐦𑐹 𑐖𑑂𑐰𑐣𑐵𑑅 𑐎𑐸𑐴𑐵𑑄 𑐗𑐵𑐮 𑑋 𑐥𑐵𑐣𑐵 𑐥𑐵𑐣𑐵𑐫𑐵 𑐏𑑃 𑐮𑐸𑐩𑑄, 𑐎𑐣𑑂𑐠𑐵𑐐𑑂𑐬 𑑋

𑐩𑐴𑐵𑐨𑐵𑐬𑐟𑐫𑑂 𑐰𑑂𑐫𑐵𑐳 𑐆𑐲𑐶𑐫𑐵 𑐩𑐟𑑂𑐳𑑂𑐫𑐐𑐣𑑂𑐢𑐵𑐮𑐶𑐳𑐾 𑐩𑐟𑐶𑐣𑐵 𑐖𑐹𑐐𑐸 𑐠𑐵𑐫𑑂 𑑋 𑐥𑐹𑐬𑑂‍𑐰–𑐥𑐱𑑂𑐔𑐶𑐩 𑐬𑐵𑐖𑐩𑐵𑐬𑑂‍𑐐𑐫𑐵 𑐮𑐶𑐎𑑂𑐎𑐳𑑄 𑐮𑐵𑑅𑐐𑐸 𑐕𑐎𑐹𑐔𑐵 𑐱𑐴𑐬, 𑐡𑐩𑑁𑐮𑐷 𑑋 𑐁𑑅 𑐄𑐎𑐶𑐫𑐵 𑐣𑐵𑑄 𑐰𑑂𑐫𑐵𑐳 𑐣𑐐𑐬𑐥𑐵𑐮𑐶𑐎𑐵 — 𑐟𑐣𑐴𑐸𑑃 𑐖𑐶𑐮𑑂𑐮𑐵𑐫𑐵 𑐳𑐡𑐬𑐩𑐸𑐎𑐵𑐩 𑐣𑑄 𑑋 𑐳𑐸𑐎𑐵 𑐳𑐵𑐮𑐵𑐟𑑅𑐐𑐸 𑐠𑐾𑑄 𑐟𑐟𑐥𑑂𑐫𑑄𑐐𑐸 𑐮𑑃, 𑐖𑑅𑐏𑑅 𑐢𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐣𑐶𑐟𑑃𑐥𑑂𑐫𑐟𑑃 𑐖𑐵𑑅𑐐𑐸 𑐤𑐹𑐤𑐹𑐐𑐸 𑐕𑐾𑑃𑐟, 𑐕𑐏𑐵𑐣𑐶𑐏𑐵 𑐥𑐸𑐮𑐵𑑄𑐐𑐸 𑐢𑐸𑐳𑐶𑐮𑐹𑐐𑐸 𑐕𑐾𑑃𑐟 𑑋

𑐩𑐣𑐹𑐟 𑐡𑐸, 𑐥𑐳𑑅 𑐡𑐸, 𑐧𑐿𑑄𑐎 𑐡𑐸, 𑐖𑐶𑐮𑑂𑐮𑐵𑐫𑐵𑐟 𑐩𑐵𑑅𑐐𑐸 𑐡𑐎𑑂𑐰 𑐢𑐫𑐵𑐠𑐾𑑄 𑐖𑑂𑐫𑐵𑐎𑐹 𑐀𑐣 𑐴𑐾 𑑋 𑐟𑐬 𑐣𑑄 𑐫𑐾𑑃𑐫𑑂 𑐠𑐾𑑄 𑐩𑐶𑐏𑐵𑐫𑑂 𑐢𑑂𑐰𑐂𑐎𑐠𑑄𑐫𑐵 𑐴𑐸𑐮𑐩𑐸𑐮 𑐩𑐡𑐸, 𑐩𑑀𑐚𑐬 𑐖𑐵𑐩 𑐩𑐡𑐸, 𑐮𑑃𑐫𑑂𑐮𑑃𑐫𑑂 𑐥𑐳𑑅 𑐩𑐡𑐸, 𑐎𑐵𑐮𑐎𑐸𑐮 𑐩𑐡𑐸, 𑐦𑑀𑐴𑐬 𑐩𑐡𑐸 𑑋 𑐄𑐩𑐶𑐟 𑐐𑐸𑐮𑐶 𑐩𑐵𑑅 𑐄𑐮𑐶𑐖𑐎 𑐧𑐳𑑂𑐟𑐷, 𑐄𑐮𑐶 𑐖𑐎 𑐖𑐷𑐰𑐣 𑑋 𑐮𑑀𑐨 𑐡𑐣𑐵𑐰𑐂, 𑐗𑐷 𑐣𑑄 𑐗𑐷𑐟 𑐩𑐵𑐎𑑂𑐰 𑐖𑐎 𑐳𑑂𑐰𑐣𑐶𑐐𑑅 𑐡𑐫𑐾𑐎𑐵𑐟𑐫𑐾 𑐕𑐵𑐫𑑂 𑐩𑐖𑐶𑐄𑐐𑐸 ?

𑐰𑐶.𑐳𑑄.𑐫𑐵 𑑑𑑙𑑘𑑕 𑐳𑐵𑐮𑐫𑑂 𑐧𑐹𑐐𑐸 𑐟𑐣𑐸𑐳𑐹 (𑐀𑐠𑐰𑐵 𑐟𑐣𑐴𑐸𑑃𑐳𑐸𑐬) 𑐢𑐂𑐐𑐸 𑐠𑐵𑐳𑐫𑑂 𑑋 𑐴𑐶𑐳𑐶𑐔𑐵 𑐡𑐸𑐐𑐸 𑐐𑐵𑑄 𑑋 𑐟𑐬 𑐩𑐔𑐵𑐧𑐮𑐫𑑂 𑐮𑐵 𑐡𑐸𑑅𑐏 𑐴𑐾, 𑐟𑐬 𑐧𑑁𑐪𑐮𑐶𑐳𑐾 𑐮𑑂𑐰𑐵𑐣𑐵𑑅 𑐮𑑂𑐰𑐵𑐣𑐵𑑅 𑐴𑐾 𑐧𑑂𑐰𑐣𑐾𑐐𑐸 𑐳𑐫𑐾𑐎𑐵𑐡𑐶𑐮 𑑋 𑐃𑐫𑐵 𑐑𑑅𑐔𑐵𑐮𑑄 𑐰𑐫𑑂𑐎𑑅𑐫𑐵𑐟 𑐐𑐣 𑐖𑐎 𑐩𑐫𑑄𑐎𑐹, 𑐕𑐸 𑐖𑐎 𑐩𑐫𑐵𑐎𑐹 𑑋 𑐨𑐔𑐵 𑐨𑐔𑐵 𑐧𑐸𑑃 𑐡𑐸𑐐𑐸, 𑐄𑐎𑐷 𑐎𑐹 𑐰𑐵𑐫𑐾𑐐𑐸 𑐖𑑂𑐫𑐵 𑐟𑑂𑐰𑑅𑐟𑐵𑑅 𑐧𑐣𑐾𑐖𑑂𑐫𑐵 𑐫𑐵𑐫𑐾𑐐𑐸 𑐢𑐎𑐵𑑅 𑐄𑐏𑐾𑑄𑐠𑐸𑐏𑐾𑑄 𑐗𑐵𑐮 𑑋

𑐡𑑂𑐰𑐎𑑂𑐰𑐫𑑂 𑐤𑑂𑐫𑑃𑐎𑑂𑐰 𑐄𑐐𑐸𑑄 𑐠𑐸𑐐𑐸𑑄 𑐳𑐵𑐩𑐵𑐣 𑐟𑐫𑐵𑑅 𑐀𑐣𑐫𑐵 𑐳𑐵𑐩𑐵𑐣 𑐫𑑄𑐎𑐵𑑅 𑐠𑐣, 𑐠𑐣𑐫𑐵 𑐳𑐵𑐩𑐵𑐣 𑐫𑑄𑐎𑐵𑑅 𑐀𑐣 — 𑐩𑐵𑑅𑐥𑐶𑑄𑐟 𑐩𑐵𑑅𑐐𑐸 𑐳𑐵𑐩𑐵𑐣 𑐠𑑂𑐫𑑄𑐎𑐵𑑅 𑐣𑐶𑐐𑑅𑐥𑑂𑐫𑑄𑐐𑑅 𑐮𑐧𑑅 𑑋 𑐠𑑂𑐰 𑐴𑐾 𑐰𑐫𑑂𑐎𑑅𑐫𑐵 𑐖𑐷𑐰𑐣 𑑋 𑐣 𑐥𑑂𑐫𑐢𑐵𑐣𑐶 𑐣𑐶𑐳𑐾𑑄 𑐔𑐶, 𑐔𑐶𑐎𑑄 𑐀𑐮𑐾 𑐔𑐸𑐬𑐳 𑐟𑐎𑑄 𑑋 𑐟𑐣𑐴𑐸𑑃𑐣𑐶𑐳𑐾𑑄 𑐫𑐾𑑃𑐟𑐎 𑐨𑐵𑐬𑐶 𑐎𑑂𑐰𑐧𑐶𑐫𑐵𑑅 𑐧𑐣𑐾𑐖𑑂𑐫𑐵 𑐫𑐵𑐣𑐵𑐐𑐸 𑐮𑐸𑐩𑑄 𑑋 𑐫𑐾𑑃𑐫𑑂 𑐰𑐣𑐾𑐧𑐮𑐫𑑂 𑐐𑐣 𑐐𑐣 𑐖𑐸𑐣𑐵𑑅 𑐰𑐣𑐾𑐐𑐸 𑐢𑐂𑐐𑐸 𑐮𑐸𑐩𑑄, 𑐐𑐣 𑐐𑐣 𑐔𑐵 𑐔𑑂𑐰𑐣𑐾𑐐𑐸 𑐢𑐂𑐐𑐸 𑐣𑑄 𑐮𑐸𑐩𑑄 𑑋

𑐀𑐠𑐾 𑐴𑐾 𑐠𑑀𑐬𑐷 𑐢𑐂𑐐𑐸 𑐣𑐵𑐬𑐵𑐫𑐞𑐐𑐝 𑐮𑐶𑐎𑑂𑐎 𑐨𑐵𑐬𑐟𑐫𑐵 𑐳𑐷𑐩𑐵 𑐎𑑂𑐲𑐾𑐟𑑂𑐬𑐫𑑂 𑐟𑐎𑑄 𑐳𑐵𑐩𑐵𑐣 𑐠𑑂𑐫𑑄𑐎𑐾𑐐𑐸 𑐫𑐵𑐣𑐵𑐡𑐶𑐮 𑑋 𑐠𑑅𑐐𑐸 𑐳𑑄𑐑𑐬𑑂‍𑐲𑐫𑐵 𑐡𑐶𑐣 𑐰𑐫𑑂𑐎𑑅 𑐠𑑅𑐟 𑐢𑐵𑐠𑐾𑑄 𑐮𑐵 𑐪𑐐𑐳𑐫𑑂 𑐮𑐵 𑐢𑐂𑐠𑐾𑑄 𑐖𑐸𑐂𑐢𑐸𑑄𑐎𑐮 𑑋 ‘𑐠𑑂𑐰 𑐡𑐎𑑂𑐰 𑐦𑐫𑑂𑐐𑑄 𑐏𑑃 𑐎𑐵 𑑋 𑐠𑐖𑑂𑐫𑐵𑑅𑐐𑐸 𑐏𑑃 𑐎𑐣𑐎𑐶 𑐖𑐶𑐟𑑅 𑐰𑐾𑑃 𑐢𑐵𑐂 𑑋 𑐐𑐣 𑐏𑐂 ? 𑐳𑐸𑐣𑐵𑑄 𑐥𑐟𑑂𑐫𑐵𑑅 𑐫𑐵𑐂 ?’𑐖𑑂𑐫𑐵 𑐫𑐵𑑅𑐳𑐵 𑐐𑐣 𑐎𑐩𑐵𑐂 𑐩𑐡𑐂 ? 𑐰𑑅𑐐𑐸 𑐁𑐩𑑂𑐡𑐵𑐣𑐷𑐫𑐵𑐟 𑐥𑐵𑐫𑑂𑐩𑑂𑐰𑑅 𑐡𑐫𑐾𑐎𑐵𑑅 𑐕𑑂𑐫𑑄𑐐𑐹𑐫𑐵 𑐪𑐶𑐔𑐵𑐫𑑂 𑐟𑐫𑐵𑑅 𑐳𑐤𑐸𑐏𑐫𑑂 𑐳𑑂𑐰𑐠𑐣𑐵𑐟𑐮 𑑋

𑐀𑐮𑐾 𑐃 𑐰𑑅𑐮𑐶𑐳𑐾 𑐖𑐐𑑂𑐐𑐵 𑐖𑐩𑐶𑐣 𑐖𑑀𑐬𑐾 𑐫𑐵𑐟 𑑋 𑐠𑑅𑐐𑐸 𑐖𑐷𑐰𑐣𑐫𑐵 𑐰 𑐮𑐸𑑃𑐳𑑂𑐰𑐵𑑄 𑐠𑐖𑑂𑐫𑐵𑑅𑐐𑐸 𑐎𑑂𑐲𑐞 𑑋 𑐠𑑅𑐐𑐸 𑐰𑐶𑐐𑐟𑐫𑑂 𑐤𑐵𑐫𑑂 𑐟𑐥𑐸 𑐰𑐫𑑂𑐎𑑅𑐫𑐵 𑑋 𑐩𑐾𑐥𑐶𑑄𑐳𑑄 𑐰𑐶𑐱𑑂𑐰𑐵𑐳 𑐴𑐾 𑐫𑐵𑐂𑐩𑐏𑐸 𑐢𑐂𑐐𑐸 𑐣𑑄 𑐠𑐹 𑑋 𑐟𑐬 𑐕𑐟𑐵 𑐏𑑃𑐫𑑂 𑐑𑐩𑐞𑑂𑐜 𑐴𑐾 𑐡𑐸 — 𑐩𑐏𑐸𑐐𑐸 𑐫𑐵𑐣𑐵𑑅 𑐩𑐣𑐫𑐵, 𑐩𑐖𑐶𑐄𑐐𑐸 𑐫𑐵𑐣𑐵𑑅 𑐩𑐣𑐫𑐵 𑑋 𑐣𑐷𑐡𑑃 𑐩𑐡𑐸𑐧𑐮𑐫𑑂 𑐂𑐴𑐶𑐥𑐵 𑐖𑐸𑐮, 𑐥𑑀𑐏𑐬𑐵 𑐡𑐾𑐄𑐬𑐵𑐮𑐷𑐫𑐵 𑐧𑐵𑐮𑐎𑐸𑐩𑐵𑐬𑐷 𑐱𑑂𑐬𑐾𑐲𑑂𑐛𑐮𑐶𑐳𑐾 𑑋 𑐠𑑅 𑐳𑑂𑐰𑐫𑐵𑑅 𑐗𑐶𑐡𑑃 𑐎𑑂𑐰𑐎𑐵𑐮𑐶𑐪 𑐰 𑑋 𑐰𑑅𑐧𑐮𑐫𑑂 𑐕𑐸𑑄 𑐩𑐳𑐶𑐄, 𑐕𑐸𑑄 𑐫𑐵𑐫𑐾𑐩𑐳𑑅 𑑋

𑐤𑐹𑐐𑐸 𑐠𑐵𑐫𑑂, 𑐤𑐹𑐐𑐸 𑐖𑐷𑐰𑐣 𑑋 𑐠𑑅 𑐨𑐵𑑅𑐟𑐫𑐵 𑐳𑐸𑐏𑐫𑑂 𑐡𑐸𑐏𑐫𑑂 𑐳𑐵𑐠 𑐧𑐶𑐂𑐐𑐸 𑐧𑐵𑐴𑐾𑐎 𑐩𑐾𑐐𑐸 𑐥𑐵𑑅 𑐣𑑄 𑐩𑐦𑐫𑐾𑐎𑐹 𑐖𑐸𑐂 𑑋 𑐟𑑂𑐫𑐵𑐐 𑐰 𑐳𑐩𑐬𑑂‍𑐥𑐞𑐫𑐵 𑐕𑐥𑐸 𑐧𑐵𑐏𑑄 𑑋 𑐪𑑄 𑐦𑐸 𑐮𑐵 𑐩𑐦𑐸 𑐮𑐵, 𑐥𑑂𑐫𑐪 𑐎𑐵𑐫𑑂 𑐰 𑐳𑑂𑐰𑐪 𑐪𑑂𑐫𑐵𑐫𑑂 𑐧𑐶𑐫𑐵𑐡𑐶𑐮 𑑋 “𑐕𑐸𑑄 𑐣𑑄 𑐩𑐢𑐫𑐵 𑐰𑐫𑐵𑐟 𑑋 𑐩𑐔𑐵𑐫𑐵 𑐧𑑁 𑐣𑑄 𑐩𑐢𑐫𑐵, 𑐀𑐫𑑂 𑐣𑑄 𑐩𑐢𑐫𑐵 𑑋 𑐣𑐵𑐥𑑄 𑐴𑐾 𑐔𑑂𑐰𑐣𑐾𑐐𑐸, 𑐣𑐵𑐥𑑄 𑐴𑐾 𑐣𑐫𑐾𑐐𑐸 𑐎𑐵,” 𑐠𑑅𑐐𑐸 𑐥𑐴 𑐏𑑃𑐏𑑄 𑐠𑑅 𑐴𑐾 𑐤𑐶𑐮𑐵𑐡𑐷 𑐂𑐟𑐶𑐂𑐟𑐶𑑄, 𑐤𑐵𑐫𑑂𑐥𑐣𑐫𑑂 𑐳𑐸𑐫𑐵𑐟𑑅𑐐𑐸 𑐗𑐶𑑄𑐣𑐶𑐔𑐵𑑅 𑐟𑐸𑐎𑐶𑐔𑐵 𑐳𑑄𑐎𑐵𑑅 𑑋

𑐕𑐐𑐹 𑐣𑐶𑐐𑐹 𑐖𑐣𑑂𑐩𑐫𑐵 𑐳𑑄𑐳𑑂𑐎𑐵𑐬𑑄 𑐖𑐎 𑐐𑐵𑐂𑐐𑐸 𑐩𑐏𑐸, 𑐠𑑂𑐰 𑐄𑐩𑐾𑐬𑐫𑑂 𑐟𑐎𑑄 𑐠𑐠𑐾 𑐣𑐵𑐥𑑄 𑐴𑑂𑐰𑐣𑐵𑐔𑑂𑐰𑐣𑐾𑐐𑐸 𑐎𑐬𑑂‍𑐩 𑐡𑐫𑐾𑐎𑐾𑐟 𑑋 𑐁𑑅 𑐟𑐎𑑄 𑐰𑑄 𑐰𑐫𑐵, 𑐰𑑄 𑐰𑐫𑐵 𑐏𑑂𑐰𑐵𑑅 𑐳𑑂𑐰𑐫𑐵𑑅 𑐏𑑃 𑐯𑐵𑐫𑐾 𑐩𑐐𑐵𑑅𑐣𑐶 𑑋 𑐀𑐗 𑐧𑐴𑐣𑐷 𑐣𑐶𑐪𑐾𑐳𑑂𑐫𑐵𑑄 𑐏𑑂𑐰𑐵𑑅 𑐏𑑂𑐰𑐵𑑅 𑐳𑑂𑐰𑐫𑐵𑑅 𑐨𑐟𑐶𑐔𑐵 𑐨𑐟𑐶𑐔𑐵 “𑐥𑐵𑐮𑐸𑐐𑐸” 𑐟𑑂𑐰𑐣𑐾𑐩𑐵𑑅 𑑋 𑐀𑐮𑐾 𑐟𑐶𑐣𑐶 𑐧𑐾𑐮𑐶 𑐫𑐵𑐫𑐾𑐐𑐸 𑐳𑐹𑐬 𑐰𑐂 𑑋 𑐠𑐖𑑂𑐫𑐵𑑅𑐐𑐸 𑐩𑐟𑐶𑐣𑐵, 𑐠𑐖𑑂𑐫𑐵𑑅𑐐𑐸 𑐳𑐸𑐏, 𑐠𑑂𑐰 𑐳𑑂𑐰𑐫𑐵𑑅 𑐩𑐟𑐶𑐣𑐵𑐫𑐵 𑐧𑐵𑐏𑑄 𑐐𑐣 𑐧𑑂𑐰𑐣𑐾𑐡𑐂 ?

𑐂𑐮𑑄 𑐰𑐫𑑂𑐎𑑅𑐫𑐵𑐟 𑑑𑑘𑐳𑐵𑐮𑐥𑐵𑐏𑐾 𑐢𑐬𑐩𑐥𑐵𑐣𑐶𑐂 𑐎𑑂𑐰𑐎𑐵𑐮 𑑋 𑐀𑐣𑑄 𑑒𑑕 𑐳𑐵𑐮𑐥𑐵𑐏𑐾 𑐡𑐩𑑁𑐮𑐷𑐂 𑐠𑑂𑐫𑐣 𑑋 𑐰 𑐂𑐮𑐫𑑂 𑐠𑑂𑐰 𑐠𑐵𑐫𑑂 𑐢𑐂𑐐𑐸 𑐍𑐮 𑐮𑐐𑐾 𑐖𑐸𑐂𑐐𑐸 𑐠𑐵𑐫𑑂 𑑋 𑐠𑑂𑐰 𑐠𑐵𑐳𑐫𑑂 𑐣𑐎𑐟𑐶𑐣𑐶 𑐣𑐎𑐟𑐶𑐣𑐶 𑐍𑐮𑑀 𑐄𑐣𑑂𑐩𑐹𑐮𑐣 𑐖𑐸𑐂𑐰𑑄 𑐠𑑂𑐰 𑐠𑐵𑐫𑑂𑐫𑐵𑐟 𑐠𑑅𑐐𑐸 𑐎𑐬𑑂‍𑐩𑐨𑐹𑐩𑐶 𑐡𑐫𑐾𑐎𑐾𑐟 𑐢𑐎𑐵𑑅 𑐠𑐣 𑐎𑐸𑐴𑐵𑑄 𑐗𑐵𑐮 𑑋 𑐖𑐵𑐎𑐶𑐧𑐖𑐶 𑐥𑐳𑑅 𑐟𑐫𑐵𑐡𑐶𑐮, 𑐮𑐶𑐥𑐵 𑐎𑐵𑐥𑑅 𑐥𑐳𑑅 𑐣𑑄 𑑋 𑐀𑐣𑑄 𑐎𑐵𑐥𑑅 𑐠𑐵𑐫𑐾𑐐𑐸 𑐟𑐵𑐣 𑐟𑐫𑐵𑐡𑐶𑐮, 𑐴𑑀𑐖𑐶𑐫𑐬𑐷𑐫𑐵 𑐩𑐶𑐱𑐶𑐣 𑐣𑑄 𑐟𑐫𑐵𑐡𑐶𑐮 𑑋

𑐪𑐳𑐶𑐎𑑂𑐰𑐳𑐶𑐟 𑐀𑐠𑐾𑑄 𑐔𑑂𑐰𑐣𑐾𑐩𑐖𑐶𑐄, 𑐖𑑂𑐫𑐵 𑐫𑐵𑑅 𑐰𑐵 𑐢𑐎𑐵𑑅 𑐖𑑂𑐫𑐵 𑐫𑐵𑐎𑐮 𑑋 𑐟𑐬 𑐕𑐎𑑅 𑐱𑐟𑑂𑐬𑐸 𑐮𑐐𑐾 𑐖𑐸𑐫𑐵𑑅 𑐟𑑂𑐫𑐵𑐳𑐵 𑐎𑐫𑐵𑐟𑐫𑐵𑐐𑐸𑐮𑐶𑑄 𑐮𑐶𑐟𑑂𑐟𑐸𑐮𑐶𑐟 𑑋 𑐴𑐵𑐬𑐐𑐸𑐴𑐵𑐬 𑐦𑑂𑐰𑐣 𑑋 𑐩𑐳𑑅𑐪𑐾𑐳𑐶𑐟 𑐐𑑂𑐰𑐵𑐴𑐵𑐮𑐶 𑐰𑐮, 𑐏𑐜𑑂𑐐 𑐟𑐬𑐾 𑐖𑐸𑐮 𑑋 “𑐏𑑅 𑐖𑐶 𑐐𑑂𑐫𑐵𑐟 𑐏𑑅 𑑋 𑐟𑐬 𑐖𑐶 𑐕𑐟𑐶𑑄 𑐴𑐵𑐬𑐾 𑐩𑐔𑐵𑐫𑐵,” 𑐰 𑐡𑐺𑐝 𑐰𑐶𑐱𑑂𑐰𑐵𑐳𑑄 𑐴𑐾 𑐰𑐫𑑂𑐎𑑅𑐫𑐵𑐟 𑐟𑑂𑐫𑐵𑐎𑐵𑐧𑐶𑐮 𑑋 𑐠𑑂𑐰 𑐄𑐩𑐾𑐬𑐫𑑂 𑐣𑑄 𑐰𑐫𑑂𑐎𑑅 𑐣𑐶𑐪𑑄 𑐣𑐶𑐐𑐹 𑐎𑐶𑐮𑑀𑐩𑐶𑐚𑐬 𑐟𑐵𑐥𑐵𑑅𑐐𑐸 𑐠𑑅𑐐𑐸 𑐮𑑂𑐫𑑄 𑐡𑐣𑐶𑐐𑐸 𑐕𑐎𑐹𑐔𑐵 𑐧𑐸𑑃𑐂 𑐖𑑂𑐫𑐵 𑐳𑑄 𑐰𑐣𑐷 𑑋

𑐑𑐵𑑃𑐫𑑂 𑐮𑑅𑐰𑐣𑐷, 𑐣𑐶𑐪𑐟𑐶𑐥𑐹 𑐏𑑂𑐫𑐵𑑅 𑐫𑐵𑐫𑐵𑑄 𑑋 𑐖𑐷𑐰𑐣𑐫𑐵 𑐃𑐮𑐔𑑄 𑐴𑐾 𑐡𑐶𑐣𑐵𑐧𑐶𑐂 𑐄𑐩𑐶𑐐𑐸 𑐣𑐶𑐩𑑂𑐟𑐶𑑄 𑑋 𑐧𑐬𑐸 𑐳𑑄𑐳𑐵𑐬 𑐧𑐸𑐬𑐵𑐧𑐸𑐬𑐶 𑐖𑐸𑐂, 𑐰𑐫𑑂𑐎𑑅𑐥𑐶𑑄 𑐣𑐶𑐪 𑐤𑑂𑐫𑐵𑐧𑐮𑐾𑑄 𑐮𑑂𑐫𑐵𑐫𑑂𑐪–𑐮𑑂𑐫𑐵𑐳𑐾 𑐴𑐾 𑑋𑐩𑐾𑐐𑐸 𑐤𑑂𑐫𑐵𑐠𑐾 𑐖𑐹𑐳𑐵𑑄 𑐠𑑅 𑐎𑐵𑐫𑑂–𑐪𑑂𑐫𑐵𑐫𑑂𑐥𑐶𑑄𑐟 𑐩𑐵𑐎𑑂𑐰 𑐩𑐵𑑅𑐠𑐾 𑐧𑑂𑐰𑑄𑐎𑐾𑐟 𑐐𑐧𑐮𑐾𑑄 𑐮𑐶𑐔𑐶𑐮𑐵𑐩𑐡𑐷 𑑋 𑐠𑑁𑑄 𑐎𑐵𑐫𑑂𑐥𑐶𑑄 𑐠𑐵𑐳𑐫𑑂 𑐠𑐵𑐳𑐫𑑂 𑐠𑑂𑐫𑑄𑐐𑐸 𑐣𑑂𑐫𑐣𑐵𑑅 𑐰𑐫𑑂𑐎𑑅𑐫𑐵 𑐎𑐶𑐳𑐶𑐤𑐵𑐫𑑂 𑑋 𑐰𑐫𑑂𑐎𑐮𑑄 𑐮𑐸𑐩𑑄𑐎𑐵𑐡𑐷, “𑐖𑐶𑑄 𑐮𑐵 𑐩𑐳𑑂𑐟𑐫𑑂𑐟 𑐤𑑂𑐫𑐵𑐧𑐮𑐾𑑄 𑐠𑑂𑐰 𑐴𑐾 𑐢𑐵𑐫𑐾𑐐𑐸 𑑋

𑐩𑐏𑐸𑐐𑐸 𑐕𑐟𑐵 𑐖𑑂𑐫𑐵 𑐫𑐵𑐣𑐵𑑅 𑐎𑐩𑐾 𑐫𑐵𑐫𑐾𑐩𑐟𑐾 𑑋 𑐩𑐾𑐐𑐸 𑐕𑐸 𑐤𑑂𑐫𑐵𑑅 𑐰 𑐫𑐵 𑑋”𑐨𑐔𑐵 𑐨𑐔𑐵 𑐎𑐩𑐾 𑐫𑐵𑐫𑐾𑐐𑐸, 𑐣𑐫𑐾𑐐𑐸 𑐟𑑂𑐰𑐣𑐾𑐐𑐸, 𑐡𑑂𑐫𑐣𑐾𑐐𑐸 𑐮𑐵 𑐤𑑂𑐫𑐵𑐪𑐾𑐳𑑂𑐫𑐵𑑄 𑐫𑐵𑐂 𑑋 𑐟𑐬 𑐰𑐫𑑂𑐎𑐮𑑄 𑐩𑐔𑐵𑑄𑐣𑐶𑐳𑐾𑑄 𑐠𑑅𑐐𑐸 𑐥𑐸𑐬𑑂‍𑐏𑐵𑑄 𑐳𑑂𑐫𑐣𑐵𑐠𑐎𑐹𑐐𑐸 𑐢𑐎𑐵𑑅 𑐀𑐣𑐫𑐵 𑐏𑐶𑑄, 𑐢𑐵𑑅 𑐠𑐵𑐫𑐾𑐐𑐸, 𑐡𑐵𑐦𑐵 𑐨𑐖𑐣 𑐴𑐵𑐮𑐾𑐐𑐸, 𑐮𑐵𑐏𑐾 𑐥𑑂𑐫𑐵𑐏𑑄 𑐴𑐸𑐮𑐾𑐐𑐸, 𑐡𑐾𑐰𑐷𑐣𑐵𑐔 𑐎𑑂𑐫𑐣𑐾𑐐𑐸, 𑐀𑐮𑐾 𑐂𑐮𑐫𑑂𑐧𑑂𑐫𑐮𑐫𑑂 𑐬𑐵𑐖𑐵𑐬𑐵𑐣𑐷𑐫𑐵 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸𑐫𑐵𑐟 𑐠𑑅𑐐𑐸 𑐖𑐷𑐰𑐣𑐫𑐵 𑐁𑐳𑐎𑑂𑐟𑐶𑐫𑐵 𑐬𑐸𑐥𑐫𑑂 𑐴𑐾 𑐠𑑅 𑐮𑐶𑐄𑐮𑐶𑐄 𑐧𑑂𑐰𑐮𑑄𑐎𑐾 𑐧𑐶𑐫𑐵𑐡𑐶𑐮 𑑋

𑐖𑐵𑐟𑑂𑐬𑐵𑐥𑐬𑑂‍𑐰 𑐖𑐸𑐮𑐎𑐶 𑐰𑐫𑑂𑐎𑑅𑐫𑐵 𑐮𑐵𑐂𑐩𑐏𑐸, 𑐟𑑂𑐰𑐵𑐮𑐫𑑂 𑐪𑐳𑐶𑐎𑑂𑐰𑐳𑐶𑐟 𑐥𑑂𑐫𑐵𑐏𑑄 𑐪𑐶𑐟𑐾𑐟, 𑐨𑐖𑐣 𑐫𑐵𑐫𑐾𑐟 𑐳𑑅𑐟𑑅 𑐖𑐸𑐂 𑑋 𑐥𑑂𑐫𑐮𑐵𑐟𑐎 𑐖𑐸𑐂𑐐𑐸 𑐔𑑁𑐩𑐵𑐳 𑐨𑐖𑐣𑐫𑑂 𑐁𑑅 𑐣𑑄 𑐰𑐫𑑂𑐎𑑅𑐫𑐵 𑐴𑐾 𑐳𑑅 𑐟𑐳𑑅 𑑋 𑐠𑑅 𑐖𑑂𑐰𑐮𑐶𑑄𑐖𑑂𑐰𑑅𑐥𑐶𑑄, 𑐠𑑅 𑐳𑑂𑐰𑐫𑐵𑑅 𑐎𑑂𑐰𑐎𑐵𑐮𑐶𑐥𑐶𑑄, 𑐀𑐮𑐾 𑐀𑐗 𑐠𑑅 𑐳𑑂𑐰𑐫𑐵𑑄 𑐠𑐎𑐵𑐮𑐶𑐥𑐶𑑄𑐟 𑐴𑐾 𑐟𑐎𑑄 𑐎𑑂𑐰𑐟 𑐴𑐫𑐵𑑅 𑐀𑐖𑑂𑐫𑐵𑑅𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐫𑑂 𑐳𑐬𑐶𑐎 𑐫𑐵𑐣𑐵𑐟𑐂 𑑋 𑐠𑑅𑐐𑐸 𑐐𑐵𑑄𑐫𑐵𑐟 𑐖𑐷𑐰𑐣𑑂𑐟 𑐫𑐵𑐣𑐵𑐟𑐂 𑑋

𑐠𑑅 𑐐𑐣 𑐐𑐣 𑐰𑐣, 𑐀𑐣 𑐀𑐣 𑐠𑑅 𑐣𑐾𑐰𑐵𑑅 𑐢𑐎𑐵𑑅 𑐥𑐬𑐶𑐔𑐫 𑐳𑐬𑑂‍𑐐𑐟𑐫𑑂 𑐠𑑂𑐰𑐫𑐾𑐎𑐵𑐔𑑂𑐰𑐣𑐷 𑑋 𑐐𑐸𑐂𑐡𑑃 𑐥𑐸𑐮𑐾𑐢𑐸𑑄𑐎𑐮, 𑐠𑑂𑐰 𑐖𑑂𑐫𑐵 𑐠𑑁𑑄 𑐟𑐎𑑄 𑐡𑐶𑐄𑐐𑐸 𑐩𑐡𑐸𑐣𑐶 𑑋 𑐄𑐎𑐶𑑄 𑐮𑐵 𑐠𑑁𑑄 𑐟𑐎 𑐣𑑄 𑐟𑑂𑐰𑐵𑐮𑐫𑑂 𑐔𑐵𑑅𑐴𑐶𑐄𑐰𑐣𑐾𑐧𑐮𑐫𑑂 𑐣𑐵𑐥𑐮𑐵𑐎𑑂𑐰𑐳𑑂𑐫𑐵𑑄 𑐐𑐸𑐬𑐸 𑐢𑐎𑐵𑑅 𑐖𑑂𑐰𑐖𑐮𑐥𑐵 𑐫𑐵𑐂, 𑐰𑑄 𑐰 𑐴𑐾 𑐣𑐶𑐥𑐵 𑐯𑐵𑑅 𑐧𑑂𑐰𑐫𑐾𑐎𑐵𑑅 ‘𑐨𑐵𑐐𑑂𑐫𑐩𑐵𑐣𑐷’ 𑐢𑐎𑐵𑑅 𑐳𑐸𑐰𑐵𑑅 𑐧𑐶𑐫𑐵𑐠𑐎𑐷 𑑋
𑐔𑐶𑐣𑑂𑐟𑐵 𑐡𑐸 𑐧𑐏𑐟 𑐣𑐵𑐬𑐵𑐫𑐞𑐫𑐵 𑑋 𑐰𑐫𑑂𑐎𑑅𑐫𑐵 𑐖𑐎 𑐩𑐏𑐸 𑐠𑑂𑐰 𑐫𑐸𑐐𑐫𑐵 𑐴𑐾 𑐔𑐶𑐣𑑂𑐟𑐵 𑐏𑑅 𑑋

𑐄𑐮𑐶 𑐠𑐵𑐎𑐸𑐎 𑐤𑐵𑐥𑐵𑐫𑐵 𑐥𑐸𑐳𑑂𑐟𑐵𑐥𑐵𑐏𑐾𑑄 𑐮𑐵𑐣𑐵𑐎𑐫𑐵𑐐𑐸 𑐠𑑂𑐰 𑐖𑐷𑐰𑐶𑐟 𑐳𑑄𑐳𑑂𑐎𑐺𑐟𑐶 𑐁𑑅 𑐥𑐵𑑅 𑐦𑐫𑐵𑐎𑐵𑐂𑐥𑐶𑑄 𑐴𑐾 𑐩𑐡𑐸 𑑋 𑐳𑑄𑐳𑐵𑐬 𑐀𑐣𑐶𑐟𑑂𑐫 𑐏𑑅, 𑐳𑐎𑐳𑑂𑐫𑐵𑑄 𑐳𑐶𑐄 𑑋 𑐰𑐫𑑂𑐎𑑅𑐫𑐵 𑐖𑑂𑐰𑐮𑐶𑑄𑐖𑑂𑐰𑑅𑐥𑐶𑑄 𑐐𑐸𑐮𑐶𑐏𑐾 𑐠𑑂𑐰 𑐳𑑄𑐳𑐵𑐬 𑐟𑑂𑐰𑑅𑐟𑐵𑐰𑐣𑐾𑐢𑐸𑑄𑐎𑐮, 𑐡𑐣𑐶𑐥𑐶𑑄 𑐣𑑄 𑐡𑐎𑑂𑐰𑑄 𑐁𑑅 𑐤𑐵𑐥𑐵 𑐠𑐾𑑄 𑐳𑐣𑐵𑐖𑐸𑐂 𑐩𑐦𑐸 𑑋 𑐀𑐮𑐾 𑐮𑑂𑐫𑐵𑐫𑑂𑐪 𑐮𑑂𑐫𑐵𑐳𑐾𑐥𑐶𑑄 𑐳𑐸𑑄 𑐴𑐾 𑐡𑐩𑑁𑐮𑐷𑐂 𑐩𑑄𑐟 𑐢𑐵𑑅𑐳𑐵𑑄 𑐖𑐶𑐄, 𑐐𑐸𑐮𑐶𑑄 𑐫𑐾𑑃𑐫𑑂, 𑐐𑐸𑐮𑐶𑑄 𑐮𑐵 𑐰𑐶𑐡𑐾𑐱𑐫𑑂 𑑋 𑐄𑐩𑐶 𑐨𑐵𑐫𑑂 𑐳𑑄𑐳𑑂𑐎𑐺𑐟𑐶 𑐮𑑂𑐫𑑄𑐎𑐵𑐔𑑂𑐰𑐣𑐾 𑐩𑐮𑐵𑑅 𑑋