𑐣𑐵𑐣𑐷𑐩𑐿𑑄𑐫𑐵 𑐱𑑂𑐬𑐾𑐲𑑂𑐛𑐫𑐵 ‘𑐳𑐩𑐵𑐖𑐫𑐵 𑐎𑐶𑐥𑐵𑑅’ 𑐥𑐶𑐴𑐵𑑃𑐰𑐮

𑐄𑐩𑐾𑐬𑑄 𑑗𑑔 𑐡𑑃 𑐡𑐸𑐩𑑂𑐴 𑐣𑐵𑐣𑐷𑐩𑐿𑑄𑐫𑐵 𑐱𑑂𑐬𑐾𑐲𑑂𑐛𑐫𑐵 𑐣𑐶𑐐𑐹𑐐𑐸 𑐳𑐦𑐹 𑐎𑐠𑑄 ‘𑐳𑐩𑐵𑐖𑐫𑐵 𑐎𑐶𑐥𑐵𑑅’ 𑐣𑐵𑑄𑐫𑐵𑐐𑐸 𑐳𑐦𑐹 𑐧𑐸𑐢𑐰𑐵𑑅 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐡𑐸 𑑋

𑐣𑐵𑐣𑐷𑐩𑐿𑑄𑐫𑐵 𑐱𑑂𑐬𑐾𑐲𑑂𑐛𑐫𑐵 𑐄𑐐𑐸 𑐣𑐶𑐐𑐹𑐐𑐸 𑐳𑐦𑐹 ‘𑐳𑐩𑐵𑐖𑐫𑐵 𑐎𑐶𑐥𑐵𑑅’ 𑐔𑐶𑐏𑐶𑐦𑑂𑐫𑐣𑐾 𑐖𑑂𑐫𑐵𑐗𑑂𑐰𑐮𑐫𑑂 𑐜𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷, 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏𑑄 𑐠𑑅𑐟 𑐴𑐾 𑐩𑐕𑐵𑑅𑐳𑐾 𑐔𑑂𑐰𑑄𑐐𑐸 𑐏𑑃 𑐎𑐸𑐮𑐵𑐡𑐶𑐮 𑑋 𑐠𑑅𑐥𑐶𑑄 𑐳𑐦𑐹 𑐥𑐶𑐎𑐵𑐫𑐾𑐐𑐸 𑐥𑐵𑐏𑐾 𑐣𑐶𑐳𑑂𑐎𑐺𑐫 𑐠𑐾𑑄 𑐖𑐸𑐫𑐵𑐔𑑂𑐰𑑄𑐐𑐸 𑐟𑐬 𑐔𑑂𑐰𑐩𑐶 𑐩𑐫𑐖𑐸𑑄 𑐠𑑂𑐰 𑐄𑐩𑐾𑐬𑐫𑑂 𑐣𑑄 𑐳𑐦𑐹 𑐥𑐶𑐎𑐵𑑅𑐐𑐸𑐮𑐶𑑄 𑐰𑐫𑑂𑐎𑑅𑐫𑐵 𑐖𑑀𑐱 𑐰 𑐖𑐵𑑃𑐐𑐬𑐫𑐵𑐟 𑐳𑐩𑑂𑐩𑐵𑐣 𑐫𑐵𑐣𑐵𑐡𑐶𑐮 𑑋 𑐠𑑅𑐐𑐸 𑐣𑑄 𑐎𑐺𑐟𑐶 𑐥𑐶𑐎𑐵𑐫𑐾𑐟 𑐁𑐥𑐮𑑄 𑐳𑐦𑐹 𑐮𑑂𑐫𑑄 𑐡𑐣𑐶𑐐𑐸 𑐏𑑃 𑐣𑑄 𑐰𑐫𑐎𑐮𑑄 𑐎𑐣𑐵𑐡𑐶𑐮 𑑋 𑐠𑑂𑐰 𑐳𑐶𑐧𑐾𑑄 𑐣𑑂𑐴𑑂𑐫𑑅 𑐣𑐵𑐣𑐷𑐩𑐿𑑄𑐫𑐵 𑐱𑑂𑐬𑐾𑐲𑑂𑐛𑐫𑐵 ‘𑐮𑐸𑐩𑐣𑑂𑐟𑐶𑐫𑐵 𑐖𑑅’ 𑐣𑐵𑑄𑐫𑐵𑐐𑐸 𑐳𑐦𑐹 𑐥𑐶𑐡𑑄𑐐𑐸 𑐏𑑅 𑑋

𑐳𑐦𑐹𑐫𑐵 𑐧𑐵𑐬𑐾 𑐣𑐸𑐐𑑅𑐏𑑃 𑐟𑐫𑐾𑐐𑐸 𑐗𑑂𑐰𑐮𑐫𑑂 𑐃𑐮𑑀𑐴𑑄 𑐥𑑂𑐬𑐎𑐵𑐱𑐣𑐫𑐵 𑐥𑑂𑐬𑐧𑐣𑑂𑐢𑐎 𑐰 𑐣𑑅𑐮𑐶 𑐳𑐵𑐴𑐶𑐟𑑂𑐫𑐶𑐎 𑐮𑐫𑑂𑐥𑑁𑐫𑐵 𑐳𑐩𑑂𑐥𑐵𑐡𑐎 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫𑑄 𑐠𑐸𑐐𑐸 𑐳𑐦𑐹 𑐳𑐵𑐴𑐶𑐟𑑂𑐫𑐎𑐵𑐬𑑄 𑐎𑐮𑑂𑐥𑐣𑐵 𑐫𑐵𑐣𑐵 𑐔𑑂𑐰𑐫𑐵𑐟𑑅𑐐𑐸 𑐏𑑃 𑐩𑐏𑐸𑐳𑐾 𑐳𑐩𑐵𑐖𑐫𑐵 𑐩𑐹𑐮𑑂𑐫 𑐰 𑐩𑐵𑐣𑑂𑐫𑐟𑐵𑐫𑐵𑐟 𑐐𑐠𑐾 𑐏𑑅 𑐀𑐠𑐾 𑐣𑑂𑐴𑑂𑐫𑐧𑑂𑐰𑐫𑐵𑐟𑑅𑐐𑐸 𑐳𑐦𑐹𑐫𑐵 𑐬𑐸𑐥𑐫𑑂 𑐎𑐣𑐵𑐡𑐶𑐮 𑑋 𑐠𑐸𑐐𑐸 𑐳𑐦𑐹 𑐔𑑂𑐰𑐩𑐶𑐫𑐵 𑐧𑐶𑐔𑐵𑑅 𑐩𑐏𑐸𑐳𑐾 𑐣𑐾𑐰𑐵𑑅 𑐳𑐩𑐵𑐖𑐫𑐵 𑐩𑐹𑐮𑑂𑐫 𑐩𑐵𑐣𑑂𑐫𑐟𑐵𑐫𑐵 𑐴𑐳𑑂𑐟𑐵𑐣𑐟𑐬𑐞 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑐢𑐎𑐵𑑅 𑐨𑐵𑐖𑐸 𑐱𑐵𑐎𑑂𑐫𑑄 𑐢𑐫𑐵𑐡𑐶𑐮 𑑋

𑐄𑐥𑐥𑑂𑐬𑐵𑐢𑑂𑐫𑐵𑐥𑐎 𑐬𑐵𑐖𑐶𑐟 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑑄 𑐳𑐦𑐹 𑐧𑑂𑐰𑐣𑐾𑐧𑐮𑐫𑑂 𑐗𑐷 𑐀𑐖𑐶𑐥𑐶𑑄𑐳𑑄 𑐩𑐸𑐮𑐫𑑂 𑐟𑐫𑐵𑑅 𑐩𑐳𑑂𑐟𑐫𑑂𑐟 𑐧𑐵𑐏𑑄 𑐎𑐣𑐾𑐠𑐾𑑄 𑐎𑐣𑐵𑐟𑑅𑐐𑐸 𑐀𑐣𑐸𑐨𑐰 𑐖𑐸𑐂𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐠𑐸𑐎𑐷 𑐡𑐸𑐠𑑂𑐫𑐵𑐣𑐵 𑐔𑑂𑐰𑑄𑐐𑐸 𑐴𑐬𑐾𑐎 𑐥𑑂𑐬𑐳𑑄𑐐𑑄 𑐧𑑂𑐰𑐩𑐶𑐥𑐶𑑄𑐟 𑐗𑐹𑐩𑐶𑑄 𑐫𑑄𑐎𑐵𑐧𑐷𑐐𑐸 𑐏𑑃 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋 𑐕𑐵𑐫𑑂 𑐢𑐵𑑅𑐳𑐵 𑐠𑐸𑐐𑐸 𑐳𑐦𑐹𑐟𑐶𑐂 𑐣𑐾𑐰𑐵𑑅𑐟𑐫𑑂 𑐂𑐟𑐶𑐴𑐵𑐳 𑐣𑑄 𑐡𑐸, 𑐣𑐾𑐰𑐵𑑅 𑐳𑑄𑐳𑑂𑐎𑐵𑐬𑐫𑐵 𑐎𑐶𑐔𑑅 𑐣𑑄 𑐡𑐸 𑐰 𑐧𑐶𑐳𑑄𑐐𑐟𑐶 𑐣𑑄 𑐡𑐸 𑑋

𑐳𑐦𑐹𑐫𑐵 𑐥𑑂𑐬𑐎𑐵𑐱𑐎 𑐎𑐺𑐲𑑂𑐞𑐬𑐵𑐩 𑐱𑑂𑐬𑐾𑐲𑑂𑐛𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐄𑐥 𑐥𑑂𑐬𑐵. 𑐬𑐵𑐖𑐶𑐟 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟𑐔𑑂𑐫𑐵𑐎𑐵𑑅 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋
𑐔𑑂𑐰𑐩𑐶 𑐣𑐵𑐣𑐷𑐩𑐿𑑄𑐫𑐵 𑐱𑑂𑐬𑐾𑐲𑑂𑐛𑑄 𑐳𑐦𑐹 𑐥𑐶𑐎𑐵𑐫𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑐣𑑂𑐟 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐷𑐡𑐳𑐾𑑄 𑐖𑐷𑐰𑐣𑐫𑐵 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑑂 𑐊𑐩 𑐊 𑐥𑐸𑐰𑑄𑐎𑐾 𑐢𑐸𑑄𑐎𑐵𑑅 𑐠𑑅𑐎𑐾 𑐣𑑂𑐴𑐹𑐐𑐸 𑐖𑑀𑐱 𑐖𑐵𑑃𑐐𑐬 𑐰𑑅𑐐𑐸 𑐏𑑃 𑐣𑑄 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐬𑑀𑐖𑐷𑐣𑐵 𑐖𑑀𑐱𑐷𑑄 𑐮𑐳𑐎𑐸𑐱 𑐫𑐵𑐣𑐵𑐡𑐷𑐐𑐸 𑐰 𑐩𑐶𑐣𑐬𑑂𑐰𑐵 𑐱𑐬𑑂𑐩𑐵𑑄 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋