𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐫 𑐮𑐵𑐎𑑂𑐰𑐥𑐵𑐎𑑂𑐰 𑐱𑐸𑐮𑑂𑐎

‘𑐟𑑅𑐢𑑄𑐐𑐸 𑐰 𑐧𑐵𑑄𑐮𑐵𑑅𑐐𑐸’ 𑐢𑐫𑐵𑐟𑑅𑐐𑐸 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐫𑑂 𑐎𑐵𑐫𑐪𑑂𑐫𑐵𑐫𑑂 𑐨𑐬𑑂𑐣𑐵 𑐫𑐵𑐫𑐾𑐟 𑐳𑐴𑐬𑐷 𑐎𑑂𑐲𑐾𑐟𑑂𑐬𑐫𑐵 𑐀𑐨𑐶𑐨𑐵𑐰𑐎𑑄 𑐡𑑃𑐫𑑂𑐡𑐳𑑄 𑐳𑐎𑐳𑐫𑐵 𑐀𑐣𑐸𑐨𑐰 𑐫𑐵𑐫𑐾𑐩𑐵𑑅 𑑋 𑐨𑐬𑑂𑐣𑐵𑐫𑐵 𑐣𑐶𑑄𑐟𑐶𑑄 𑐥𑑂𑐬𑐰𑐾𑐱 𑐥𑐬𑐷𑐎𑑂𑐲𑐵 𑐧𑐷𑐩𑐵𑑅𑐐𑐸, 𑐱𑐿𑐎𑑂𑐲𑐶𑐎 𑐳𑐟𑑂𑐬 𑐱𑐸𑐬𑐸 𑐖𑐸𑐂 𑐤𑑂𑐫𑑅 𑐴𑐾 𑐠𑐶𑐎𑐾𑐎 𑐱𑐸𑐮𑑂𑐎 𑐥𑐸𑐮𑐵𑑅 𑐨𑐬𑑂𑐣𑐵 𑐫𑐵𑐫𑐾𑐩𑐵𑑅𑐐𑐸 𑐰 𑐐𑐸𑐮𑐶𑐏𑐾 𑐳𑑂𑐎𑐸𑐮𑐫𑑂 𑐢𑐵𑐎𑑂𑐰 𑐢𑑂𑐫𑐧𑐵 𑐩𑐧𑐶𑐮 𑐢𑐵𑑅𑐳𑐵 𑐨𑐬𑑂𑐣𑐵 𑐫𑐵𑐫𑐾 𑐩𑐏𑐣𑐷𑐐𑐸 𑐳𑐩𑐳𑑂𑐫𑐵 𑐂𑐩𑐶𑐳𑑄 𑐦𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐠𑑅 𑐫𑐳𑐾𑑄 𑐱𑐸𑐮𑑂𑐎 𑐰𑐺𑐡𑑂𑐢𑐶𑐮𑐶𑐳𑐾𑑄 𑐀𑐥𑑂𑐰𑑅𑐠𑐾𑑄 𑐣𑐶𑐖𑐷 (𑐳𑑄𑐳𑑂𑐠𑐵𑐐𑐟𑑄) 𑐰𑐶𑐡𑑂𑐫𑐵𑐮𑐫𑐫𑑂 𑐨𑐬𑑂𑐣𑐵 𑐖𑐸𑐂𑐢𑐸𑑄𑐎𑐵𑑅 𑐀𑐨𑐶𑐨𑐵𑐰𑐎 𑐰 𑐰𑐶𑐡𑑂𑐫𑐵𑐬𑑂𑐠𑐷 𑐀𑐳𑐣𑑂𑐟𑐸𑐲𑑂𑐚 𑐖𑐹𑐳𑐵𑑄 𑐣𑑄 𑐂𑐥𑐶𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐨𑐬𑑂𑐣𑐵 𑐩𑐫𑐵𑐳𑐾 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐫𑑂 𑐴𑐾 𑐠𑑅 𑐩𑐳𑑂𑐟𑐫𑑂𑐟 𑐧𑑂𑐰𑑄𑐎𑐾𑐟 𑐧𑐵𑐢𑑂𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐨𑐬𑑂𑐣𑐵 𑐳𑐶𑐢𑐫𑐾𑐢𑐸𑑄𑐎𑐵𑑅 𑐀𑐨𑐶𑐨𑐵𑐰𑐎 𑐰 𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐑𑐳𑑄𑐐𑐛𑐣𑑄 𑐱𑐸𑐮𑑂𑐎𑐫𑐵 𑐰𑐺𑐡𑑂𑐢𑐶𑐫𑐵 𑐰𑐶𑐬𑑀𑐢 𑐫𑐵𑐫𑐾𑐐𑐸 𑐫𑐵𑐂 𑑋
𑐰𑐶𑐬𑑀𑐢𑐫𑐵𑐟 𑐳𑑄𑐧𑑀𑐢𑐣𑐫𑐵 𑐍𑐥𑐔𑐵𑐬𑐶𑐎𑐟𑐵 𑐥𑐹𑐰𑑄𑐎𑐾𑐟 𑐳𑐩𑑂𑐧𑐣𑑂𑐢𑐶𑐟 𑐳𑐬𑐎𑐵𑐬 𑐰 𑐣𑐶𑐎𑐵𑐫𑑄 𑐰𑐺𑐡𑑂𑐢𑐶 𑐖𑐹𑐐𑐸 𑐱𑐸𑐮𑑂𑐎 𑐮𑐶𑐟 𑐎𑐵𑐫𑐾𑐟 𑐣𑐶𑐬𑑂𑐡𑐾𑐱𑐣 𑐣𑑄 𑐧𑐷 𑑋 𑐟𑐬 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑑄 𑐢𑐵𑑅𑐳𑐵 𑐄𑐎𑐶𑐫𑐵𑐟 𑐟𑐵𑑅𑐳𑐵𑑄 𑐩𑐟𑐵𑑅 𑐥𑐴𑑅 𑐫𑐵𑐣𑐵𑐔𑑂𑐰𑐣𑐷 𑑋 𑐠𑑂𑐰 𑐡𑐠𑐸𑐂 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐣𑑄 𑐱𑐸𑐬𑐸 𑐖𑐸𑐂 𑑋 𑐀𑐣𑑄 𑐮𑐶𑐥𑐵 𑐰𑐵𑐬𑑂𑐲𑐶𑐎 𑐥𑐬𑐷𑐎𑑂𑐲𑐵 𑐰𑐂 𑑋 𑐀𑐮𑐾 𑐴𑐵𑐎𑐣𑑄 𑐩𑐾𑐐𑐸 𑐡𑑃𑐫𑐵 𑐤𑐹𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬𑐮𑐶𑐳𑐾𑑄 𑐱𑐸𑐮𑑂𑐎𑐫𑐵 𑐣𑐵𑐩𑐫𑑂 𑐰𑐶𑐬𑑀𑐢 𑐰 𑐳𑐴𑐩𑐟𑐶𑐫𑐵 𑐥𑐸𑐮𑐵𑑄𑐐𑐸 𑐴𑐾 𑐱𑑂𑐬𑐺𑑄𑐏𑐮𑐵 𑐡𑑀𑐴𑐬𑐾 𑐖𑐸𑐂 𑑋
𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐫𑐵 𑐮𑑂𑐫𑐵𑑅 𑐀𑐥𑑂𑐰𑑅 𑐡𑐸𑐐𑐸 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐱𑐶𑐎𑑂𑐲𑐵 𑐳𑐩𑐶𑐟𑐶𑑄 𑐠𑐸𑐐𑐸 𑐡𑑃𑐫𑐵 𑐱𑐿𑐎𑑂𑐲𑐶𑐎 𑐳𑐟𑑂𑐬𑐫𑐵 𑐣𑐶𑑄𑐟𑐶𑑄 𑐰𑐺𑐡𑑂𑐢𑐶 𑐖𑐹𑐐𑐸 𑐱𑐸𑐮𑑂𑐎 𑐮𑐶𑐟 𑐎𑐵𑐫𑐾 𑐧𑐿𑐱𑐵𑐏 𑑑𑑑 𑐐𑐟𑐾 𑐣𑐶𑐬𑑂𑐡𑐾𑐱𑐣 𑐧𑐷𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 𑐀𑐥𑑂𑐰𑑅𑐠𑐾𑑄 𑐰𑐶𑐡𑑂𑐫𑐵𑐮𑐫𑑄 𑐨𑐬𑑂𑐣𑐵 𑐥𑐸𑐬𑐵 𑐫𑐵𑐫𑐾𑐢𑐸𑑄𑐎𑐹𑐐𑐸𑐮𑐶𑑄 𑐄𑐐𑐸 𑐱𑐸𑐮𑑂𑐎 𑐮𑐶𑐟 𑐧𑐷𑐐𑐸 𑐳𑐩𑑂𑐨𑐵𑐰𑐣𑐵 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐰𑐶𑐐𑐟𑐫𑑂 𑐣𑑄 𑐨𑐬𑑂𑐣𑐵 𑐳𑐶𑐢𑐫𑐾𑐎𑐵𑑅 𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐐𑐛𑐣𑑄 𑐁𑐣𑑂𑐡𑑀𑐮𑐣 𑐫𑐵𑐫𑐾𑐰𑑄 𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫𑐮𑐶𑐳𑐾𑐫𑐵 𑐳𑐴𑐩𑐟𑐶𑐂 𑐠𑑅𑐫𑐳𑐾 𑐰𑐺𑐡𑑂𑐢𑐶 𑐫𑐵𑑅𑐐𑐸 𑐱𑐸𑐮𑑂𑐎 𑐩𑐾𑐐𑐸 𑐩𑐴𑐶𑐣𑐵𑐫𑐵 𑐱𑐸𑐮𑑂𑐎𑐫𑑂 𑐳𑐩𑐵𑐫𑑀𑐖𑐣 𑐫𑐵𑐫𑐾𑐐𑐸 𑐢𑐵𑑅𑐳𑐵𑑄 𑐣𑑄 𑐄𑐎𑐶𑐫𑐵 𑐎𑐵𑐬𑑂𑐫𑐵𑐣𑑂𑐰𑐫𑐣 𑐖𑐹𑐐𑐸 𑐩𑐡𑐸 𑑋
𑐫𑐾𑑃 𑐩𑐣𑐥𑐵𑐫𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑑄 𑐎, 𑐏, 𑐐 𑐰 𑐑 𑐰𑐬𑑂𑐐𑐫𑐵 𑐁𑐢𑐵𑐬𑐫𑑂 𑐱𑐸𑐮𑑂𑐎 𑐎𑑂𑐰𑑅𑐕𑐷𑐐𑐸 𑐣𑐶𑑄𑐟𑐶𑑄 𑐎𑐾𑐣𑑂𑐡𑑂𑐬 𑐳𑐬𑐎𑐵𑐬𑐫𑐵 𑐰𑐶𑐐𑐟𑐫𑐵 𑐩𑐵𑐥𑐡𑐞𑑂𑐜𑐫𑐵 𑐁𑐢𑐵𑐬 𑐣𑐵𑐮𑐵𑐎𑐵𑑅𑐐𑐸 𑐏𑑅𑐳𑐵𑑄 𑐣𑑄 𑐱𑐸𑐮𑑂𑐎𑐫𑐵 𑐀𑐣𑐸𑐐𑐩𑐣 𑐖𑐸𑐫𑐵𑑅 𑐮𑐶𑐟 𑐧𑐷𑐐𑐸 𑐥𑑂𑐬𑐎𑑂𑐬𑐶𑐫𑐵 𑐢𑐵𑑅𑐳𑐵 𑐱𑐸𑐬𑐸 𑐖𑐹𑐐𑐸 𑐩𑐡𑐸 𑑋 𑐫𑐾𑑃 𑐩𑐣𑐥𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐣𑐶𑐬𑑂𑐩𑐮𑐵 𑐎𑐾𑐳𑐷𑑄 𑐳𑐩𑑂𑐧𑐣𑑂𑐢𑐶𑐟 𑐥𑐎𑑂𑐲𑐫𑐵 𑐥𑐬𑐵𑐩𑐬𑑂𑐱𑐫𑑂 𑐴𑐾 𑐣𑐶𑐬𑑂𑐡𑐾𑐱𑐣 𑐖𑐹𑐐𑐸𑐮𑐶𑑄 𑐰𑐺𑐡𑑂𑐢𑐶 𑐖𑐹𑐐𑐸 𑐱𑐸𑐮𑑂𑐎 𑐮𑐶𑐟 𑐎𑐵𑐫𑐾 𑐩𑐦𑐂𑐐𑐸 𑐖𑐶𑐎𑐶𑐬 𑐫𑐵𑐣𑐵𑐡𑐶𑐮 𑑋
𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑑄 𑐰𑐵𑐬𑑂𑐲𑐶𑐎 𑐱𑐸𑐮𑑂𑐎, 𑐚𑑂𑐫𑐸𑐱𑐣 𑐱𑐸𑐮𑑂𑐎, 𑐏𑐵𑐖𑐵, 𑐧𑐳, 𑐥𑐬𑐷𑐎𑑂𑐲𑐵 𑐱𑐸𑐮𑑂𑐎 𑐮𑐶𑐳𑐾𑑄 𑐩𑐾𑐩𑐾𑐐𑐸 𑐱𑐷𑐬𑑂𑐲𑐎𑐫𑑂 𑐩𑐣𑑀𑐩𑐵𑐣𑐷 𑐢𑑄𑐐𑑄 𑐱𑐸𑐮𑑂𑐎 𑐎𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐫𑐾𑑃 𑐩𑐣𑐥𑐵𑑄 𑐱𑐿𑐎𑑂𑐲𑐶𑐎 𑐳𑐟𑑂𑐬 𑑒𑑐𑑗𑑖 𑐫𑐵 𑐣𑐶𑑄𑐟𑐶𑑄 𑐕𑐐𑐹 𑐣𑐶𑐳𑐾𑑄 𑐣𑑂𑐫𑐵𑐐𑐹 𑐟𑐐𑐶𑑄 𑐟𑐎 ‘𑐑’ 𑐰𑐬𑑂𑐐𑐫𑑂 𑐮𑐵𑑅𑐐𑐸 𑐰𑐶𑐡𑑂𑐫𑐵𑐮𑐫𑑄 𑐀𑐥𑑂𑐰𑐮𑐫𑑂 𑐩𑐵𑐳𑐶𑐎 𑐱𑐸𑐮𑑂 𑑑,𑑖𑑓𑑐, ‘𑐐’ 𑐰𑐬𑑂𑐐𑐫𑐵 𑐣𑐶𑐡𑑂𑐰𑑅, ‘𑐏’ 𑐰𑐬𑑂𑐐𑐫𑐵 𑑒,𑑔𑑑𑑘 𑐰 ‘𑐎’ 𑐰𑐬𑑂𑐐𑐫𑐵 𑐣𑐶𑑄𑐟𑐶𑑄 𑑒,𑑘𑑑𑑒 𑐎𑑂𑐰𑑅𑐕𑐶𑐄𑐐𑐸 𑐏𑑅 𑑋
𑐏𑐸𑐐𑐹𑐣𑐶𑐳𑐾𑑄 𑐔𑑂𑐫𑐵𑐐𑐹 𑐟𑐐𑐶𑐟𑐎 ‘𑐑’ 𑐰𑐬𑑂𑐐𑐫𑐵 𑐀𑐥𑑂𑐰𑐮𑐫𑑂 𑐱𑐸𑐮𑑂𑐎 𑑑,𑑙𑑐𑑑, ‘𑐐’ 𑐰𑐬𑑂𑐐𑐫𑐵 𑑒,𑑓𑑕𑑑, ‘𑐏’ 𑐰𑐬𑑂𑐐𑐫𑐵𑑒,𑑘𑑐𑑑 𑐰 ‘𑐎’ 𑐰𑐬𑑂𑐐𑐫𑐵 𑑓,𑑒𑑕𑑑 𑐎𑐵𑐫𑐩 𑐫𑐵𑑅𑐐𑐸 𑐡𑐸 𑑋 𑐐𑐸𑑄𑐐𑐹 𑐰 𑐗𑐶𑐐𑐹 𑐟𑐐𑐶𑐩𑐫𑑂 ‘𑐑’ 𑐰𑐬𑑂𑐐𑐫𑐵 𑐰𑐶𑐡𑑂𑐫𑐵𑐮𑐫𑑄 𑑓,𑑕𑑓𑑗 𑐟𑐎 𑐀𑐥𑑂𑐰𑑅 𑐱𑐸𑐮𑑂𑐎 𑐎𑐵𑐫𑐾 𑐡𑐂𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 ‘𑐐’ 𑐰𑐬𑑂𑐐𑐫𑐵 𑐣𑐶𑑄𑐟𑐶𑑄 𑑓,𑑐𑑔𑑙, ‘𑐏’ 𑐰𑐬𑑂𑐐𑐫𑐵 𑐣𑐶𑑄𑐟𑐶𑑄 𑑓,𑑗𑑖𑑒 𑐰 ‘𑐎’ 𑐰𑐬𑑂𑐐𑐫𑐵 𑐣𑐶𑑄𑐟𑐶𑑄 𑑔,𑑒𑑗𑑖 𑐟𑐎𑐵 𑐟𑐎 𑐀𑐥𑑂𑐰𑑅 𑐱𑐸𑐮𑑂𑐎 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐡𑐸, 𑐟𑐬 𑐟𑐟𑑅𑐢𑑄𑐐𑐸 𑐰𑐶𑐡𑑂𑐫𑐵𑐮𑐫𑑄 𑐄𑐎𑐶𑐫𑐵 𑐣𑐶𑐡𑐸𑐐𑑄𑐣𑐶𑐳𑐾𑑄 𑐳𑑂𑐰𑐡𑐸𑐐𑑄 𑐟𑐎 𑐱𑐸𑐮𑑂𑐎 𑐎𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐩𑐴𑐵𑐣𑐐𑐬 𑐡𑐸𑐣𑐾 𑐠𑑁𑑄𑐎𑐤𑐫𑑂 𑑙𑑑 𑐐𑐹 𑐳𑐵𑐩𑐸𑐡𑐵𑐫𑐶𑐎 𑐰 𑑖𑑔𑑕 𑐐𑐹 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫 𑐡𑐸 𑑋 𑐠𑐸𑐥𑐶𑑄 𑐰𑐶𑐡𑑂𑐫𑐵𑐮𑐫𑐫𑑂 𑐣𑐶𑐐𑐹 𑐮𑐵𑐏 𑐳𑑂𑐰𑐡𑑂𑐰𑑅 𑐰 𑑙𑑗𑑑 𑐰𑐶𑐡𑑂𑐫𑐵𑐬𑑂𑐠𑐷𑐟 𑐀𑐢𑑂𑐫𑐫𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐄𑐎𑐷𑐩𑐢𑑂𑐫𑐾 𑐕𑐐𑐹 𑐮𑐵𑐏 𑐣𑑂𑐫𑐫𑑂𑐔𑑂𑐫𑐵𑐡𑑂𑐰𑑅 𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐳𑑂𑐠𑐵𑐐𑐟 𑐰 𑐮𑑂𑐫𑑄 𑐡𑐸𑐥𑐶𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐀𑐢𑑂𑐫𑐫𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐄𑐏𑐾 𑐣𑐶𑐖𑐷 𑐟𑐠𑐵 𑐁𑐰𑐵𑐳𑐷𑐫 𑐰𑐶𑐡𑑂𑐫𑐵𑐮𑐫 𑐀𑐬𑑂𑐐𑐣𑐵𑐂𑐖𑐾𑐳𑐣 (𑐥𑑂𑐫𑐵𑐧𑑂𑐳𑐣) 𑐰 𑐬𑐵𑐲𑑂𑐚𑑂𑐬𑐶𑐫 𑐣𑐶𑐖𑐷 𑐟𑐠𑐵 𑐁𑐰𑐵𑐳𑐷𑐫 𑐰𑐶𑐡𑑂𑐫𑐵𑐮𑐫 𑐳𑑄𑐐𑐛𑐣 (𑐊𑐣 𑐥𑑂𑐫𑐵𑐧𑑂𑐳𑐣𑑄) 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐫𑐵𑐟 𑐣𑑄 𑐳𑐩𑑂𑐥𑐟𑑂𑐟𑐶𑐫𑐵 𑐀𑐢𑐶𑐎𑐵𑐬 𑐡𑐸𑐐𑐸 𑐰 𑐠𑑅𑐥𑐶𑑄𑐳𑑄 𑐮𑐵𑐐𑐟 𑐰 𑐏𑐬𑑂𑐔𑐫𑐵 𑐮𑐶𑐢𑑄𑐳𑐵𑐫𑑂 𑐖𑐎 𑐱𑐸𑐮𑑂𑐎 𑐎𑐫𑐵 𑐰𑐫𑐵𑐔𑑂𑐰𑐣𑐵𑐐𑐸 𑐢𑐵𑑅𑐐𑐸 𑐡𑐸 𑑋 𑐣𑐾𑐥𑐵𑐮 𑐀𑐨𑐶𑐨𑐵𑐰𑐎 𑐳𑑄𑐑𑑄 𑐩𑐵𑐥𑐡𑐞𑑂𑐜 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐎𑐵𑑅𑐐𑐸 𑐱𑐸𑐮𑑂𑐎 𑐮𑐶𑐟 𑐧𑐷𑐩𑐵𑑅𑐐𑐸 𑐩𑐵𑐐 𑐫𑐵𑐳𑐾𑑄 𑐖𑐾𑐛 𑐩𑐴𑐶𑐣𑐵𑐫𑐵 𑐱𑐸𑐮𑑂𑐎𑐫𑑂 𑐳𑐩𑐵𑐫𑑀𑐖𑐣𑐫𑐵 𑐣𑐶𑑄𑐟𑐶𑑄 𑐠𑑅𑐥𑐶𑑄 𑐴𑐾 𑐖𑐵𑐐𑐬𑐸𑐎 𑐖𑐸𑐫𑐵𑑅 𑐤𑑂𑐫𑐔𑐶𑐮𑐾𑐩𑐵𑑅𑐐𑐸 𑐢𑐵𑑅𑐐𑐸 𑐡𑐸 𑑋