𑐣𑐾𑐥𑐵𑐮𑐨𑐵𑐲𑐵𑑄 𑐧𑐸𑐮𑐾𑐚𑐶𑐣 𑐥𑐶𑐠𑐣𑐾𑐟 𑐬𑐵𑐳𑐳 𑐎𑐵𑐬𑑂𑐫𑐎𑐵𑐬𑐷 𑐀𑐢𑑂𑐫𑐎𑑂𑐲 𑐢𑐬𑑂𑐩𑐾𑐣𑑂𑐡𑑂𑐬 𑐗𑐵𑐮𑐶𑐳𑐾 𑐳𑐴𑐮𑐴

𑐣𑐾𑐥𑐵𑐮𑐨𑐵𑐲𑐵 𑐳𑐩𑑂𑐧𑐡𑑂𑐢 𑐥𑑂𑐬𑐵𑐖𑑂𑐘𑐶𑐎 𑐰 𑐁𑐩𑐳𑑄𑐔𑐵𑐬 𑐏𑑂𑐫𑑅𑐫𑐵 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐳𑑄 𑐣𑐾𑐥𑐵𑐮𑐨𑐵𑐲𑐵𑐮𑐶𑐳𑐾𑑄 𑐩𑐸𑐏𑑂𑐫 𑐬𑐵𑐲𑑂𑐚𑑂𑐬𑐶𑐫 𑐨𑐵𑐳𑑄 𑐳𑐩𑐵𑐔𑐵𑐬 𑐳𑐾𑐰𑐵 𑐳𑑄𑐔𑐵𑐮𑐣 𑐫𑐵𑐫𑐾𑐟 𑐬𑐵𑐲𑑂𑐚𑑂𑐬𑐶𑐫 𑐳𑐩𑐵𑐔𑐵𑐬 𑐳𑐩𑐶𑐟𑐶 (𑐬𑐵𑐳𑐳)𑐫𑐵𑐟 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐄𑐥𑐎𑐸𑐮𑐥𑐟𑐶 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬, 𑐳𑐣𑑂𑐢𑑂𑐫𑐵 𑐚𑐵𑐂𑐩𑑂𑐳 𑐥𑐶𑐠𑐣𑐵 𑐥𑑂𑐬𑐵.𑐮𑐶.𑐫𑐵 𑐣𑐵𑐫𑑅 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟, 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐴 𑐣𑑂𑐴𑐶𑐥𑑁𑐫𑐵 𑐳𑐩𑑂𑐥𑐵𑐡𑐎 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐳𑑄𑐬𑐎𑑂𑐲𑐞 𑐟𑐠𑐵 𑐥𑑂𑐬𑐰𑐡𑑂𑐬𑑂𑐢𑐣 𑐀𑐨𑐶𑐫𑐵𑐣𑐫𑑂 𑐎𑑂𑐬𑐶𑐫𑐵𑐱𑐷𑐮 𑐰𑑂𑐫𑐎𑑂𑐟𑐶𑐟𑑂𑐰𑐟𑐫𑑂𑐳𑑄 𑐬𑐵𑐳𑐳𑐫𑐵 𑐎𑐵𑐬𑑂𑐫𑐎𑐵𑐬𑐷 𑐀𑐢𑑂𑐫𑐎𑑂𑐲 𑐢𑐬𑑂𑐩𑐾𑐣𑑂𑐡𑑂𑐬 𑐗𑐵𑐫𑐵𑐟 𑐣𑐵𑐥 𑐮𑐵𑐣𑐵𑑅 𑐳𑑄𑐰𑐶𑐢𑐵𑐣𑐫𑐵 𑐩𑐬𑑂𑐩 𑐰 𑐨𑐵𑐰𑐣𑐵𑐎𑐠𑑄 𑐬𑐵𑐲𑑂𑐚𑑂𑐬𑐶𑐫 𑐨𑐵𑐳𑑄 𑐣𑑄 𑐳𑐩𑐵𑐔𑐵𑐬 𑐳𑐾𑐰𑐵 𑐥𑑂𑐬𑐰𑐵𑐴 𑐫𑐵𑐫𑐾𑐟 𑐬𑐵𑐳𑐳𑐫𑐵 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐂𑐮𑐫𑑂 𑐬𑐵𑐳𑐳𑐫𑐵 𑐥𑐸𑐮𑐵𑑄𑐩𑑂𑐴 𑐩𑐴𑐵𑐥𑑂𑐬𑐧𑐣𑑂𑐢𑐎 𑐟𑐎𑑄 𑐖𑐸𑐫𑐵𑐡𑐷𑐩𑑂𑐴 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐄𑐥𑐎𑐸𑐮𑐥𑐟𑐶 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐳𑑄𑐰𑐶𑐢𑐵𑐣𑐫𑑂 𑐰𑑂𑐫𑐰𑐳𑑂𑐠𑐵 𑐖𑐸𑐫𑐵𑐔𑑂𑐰𑑄𑐐𑐸 𑐳𑐩𑐵𑐰𑐾𑐱𑐷 𑐳𑐶𑐡𑑂𑐢𑐵𑐣𑑂𑐟𑐫𑐵𑐟 𑐁𑐟𑑂𑐩𑐳𑐵𑐠 𑐫𑐵𑐣𑐵𑑅 𑐡𑐾𑐫𑑂 𑐡𑐸𑐣𑐾 𑐡𑐎𑐮𑐫𑑂 𑐀𑐥𑑂𑐰𑑅 𑐣𑐰𑐵𑐂𑐐𑐸 𑐨𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐮𑐶𑐳𑐾𑑄 𑐩𑐿𑐠𑐶𑐮𑐷, 𑐨𑑀𑐖𑐥𑐸𑐬𑐷 𑐮𑐐𑐵𑐫𑐟 𑐩𑐾𑐩𑐾𑐐𑐸 𑐨𑐵𑐳𑑄 𑐣𑑄 𑐕𑐳𑐶𑐎𑐠𑑄 𑐳𑐩𑐵𑐔𑐵𑐬 𑐳𑐾𑐰𑐵 𑐳𑑄𑐔𑐵𑐮𑐣 𑐫𑐵𑐫𑐾𑐟 𑐬𑐵𑐳𑐳 𑐣𑐾𑐟𑐺𑐟𑑂𑐰 𑐳𑐩𑐎𑑂𑐲 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐡𑐾𑐫𑑂𑐫𑐵 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐳𑑄𑐬𑐎𑑂𑐲𑐞, 𑐳𑑄𑐰𑐡𑑂𑐬𑑂𑐢𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐡𑐵𑐫𑐶𑐟𑑂𑐰 𑐬𑐵𑐖𑑂𑐫𑐫𑐵 𑐖𑐹𑐐𑐸 𑐣𑑂𑐴𑑂𑐫𑐠𑑃𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐳𑐩𑑂𑐰𑐡𑑂𑐢 𑐀𑐨𑐶𑐫𑐣𑑂𑐟𑐵𑐟𑐫𑑂𑐳𑑄 𑐠𑐷𑐠𑐷 𑐨𑐵𑐳𑑄 𑐳𑐩𑐵𑐔𑐵𑐬 𑐳𑐩𑑂𑐥𑑂𑐬𑐾𑐲𑐞 𑐫𑐵𑐫𑐾𑐐𑐸 𑐰𑐶𑐔𑐵𑑅𑐮𑐶𑐳𑐾𑑄 𑐣𑑂𑐴𑑂𑐫𑑅 𑐰𑐣𑐵𑐔𑑂𑐰𑑄𑐐𑐸 𑐰𑐬𑑂𑐟𑐩𑐵𑐣 𑐬𑐵𑐳𑐳 𑐣𑐾𑐟𑐺𑐟𑑂𑐰𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐠𑑅𑐥𑐶𑑄 𑐣𑑂𑐴𑑂𑐫𑐵𑐧𑐮𑐾𑑄 𑐣𑑄 𑐟𑐫𑐵𑐬 𑐡𑐸𑐐𑐸 𑐳𑑂𑐥𑐲𑑂𑐚 𑐫𑐵𑐣𑐵𑐡𑐶𑐮 𑑋

𑐬𑐵𑐳𑐳𑐫𑐵 𑐎𑐵𑐬𑑂𑐫𑐎𑐵𑐬𑐷 𑐀𑐢𑑂𑐫𑐎𑑂𑐲 𑐗𑐵𑑄 𑐬𑐵𑐲𑑂𑐚𑑂𑐬𑐶𑐫 𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐳𑐩𑐵𑐔𑐵𑐬 𑐳𑐵𑐩𑐐𑑂𑐬𑐷 𑐄𑐟𑑂𑐥𑐵𑐡𑐣𑐫𑑂 𑐧𑑅 𑐧𑐷𑐩𑐵𑑅𑐐𑐸 𑐁𑐰𑐱𑑂𑐫𑐎 𑐡𑐸𑐐𑐸 𑐏𑑃 𑐎𑐸𑐮𑐵𑐡𑐶𑐳𑐾𑑄 𑐡𑐾𑐫𑑂 𑐡𑐸𑐣𑐾 𑐨𑐵𑐲𑐵𑐫𑐵 𑐥𑑂𑐬𑐫𑑀𑐐 𑐫𑐵𑐂𑐥𑐶𑑄 𑐰𑑂𑐫𑐎𑑂𑐟𑐶 𑐰 𑐁𑐩𑐳𑑄𑐔𑐵𑐬 𑐩𑐵𑐢𑑂𑐫𑐩 𑐳𑐩𑐾𑐟𑐫𑐵 𑐡𑐺𑐲𑑂𑐚𑐶𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐩𑐿𑐠𑐶𑐮𑐷 𑐨𑐵𑐲𑐵𑐫𑐵 𑐳𑐩𑐵𑐔𑐵𑐬 𑐧𑐸𑐮𑐾𑐚𑐶𑐣 𑐥𑐶𑐠𑐣𑐾𑐐𑐸 𑐳𑑀𑐔𑐫𑐵𑐮𑐶𑐳𑐾𑑄 𑐳𑐴𑐮𑐴 𑐥𑑂𑐬𑐎𑑂𑐬𑐶𑐫𑐵 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑐎𑐵𑐐𑐸 𑐳𑑂𑐥𑐲𑑂𑐚 𑐫𑐵𑐣𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐁𑐬𑑂𑐠𑐶𑐎 𑐳𑐩𑐳𑑂𑐫𑐵𑐫𑐵 𑐳𑐩𑐵𑐣𑐵 𑐫𑐵𑐣𑐵𑐔𑑂𑐰𑑄𑐐𑐸 𑐰𑐶𑐱𑐾𑐲 𑐫𑐵𑐣𑐵𑑅 𑐔𑐶𑐔𑐶𑐢𑑄𑐐𑐸 𑐮𑐐𑐵𑐣𑐷𑐫 𑐰 𑐬𑐵𑐲𑑂𑐚𑑂𑐬𑐶𑐫 𑐨𑐵𑐲𑐵𑐫𑐵 𑐁𑐩𑐳𑑄𑐔𑐵𑐬𑐩𑐵𑐢𑑂𑐫𑐩𑐫𑐵𑐟 𑐧𑐔𑐾 𑐫𑐵𑐫𑐾𑐐𑐸 𑐡𑐵𑐫𑐶𑐟𑑂𑐰 𑐬𑐵𑐖𑑂𑐫𑐫𑐵 𑐖𑐹𑐐𑐸𑐮𑐶𑑄 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐠𑐩𑑂𑐴𑑄 𑐳𑑄𑐔𑐵𑐬 𑐰 𑐳𑐹𑐔𑐣𑐵 𑐥𑑂𑐬𑐰𑐶𑐢𑐶 𑐩𑐣𑑂𑐟𑑂𑐬𑐵𑐮𑐫𑐳𑐴𑐶𑐟 𑐠𑐷𑐠𑐷 𑐳𑑂𑐠𑐵𑐣𑐷𑐫 𑐟𑐴𑐫𑑂 𑐣𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐰𑐎𑐵𑐮𑐟 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐴𑐶𑐮𑐵 𑐰𑐣𑐵𑐔𑑂𑐰𑑄𑐐𑐸 𑐥𑐬𑐶𑐰𑐾𑐱𑐫𑐵𑐟 𑐁𑐟𑑂𑐩𑐳𑐵𑐠 𑐫𑐵𑐣𑐵𑑅 𑐬𑐵𑐲𑑂𑐚𑑂𑐬𑐶𑐫 𑐨𑐵𑐳𑑄 𑐳𑐩𑐵𑐔𑐵𑐬 𑐳𑐾𑐰𑐵 𑐳𑑄𑐔𑐵𑐮𑐣 𑐫𑐵𑐫𑐾𑐐𑐸 𑐥𑐎𑑂𑐲𑐫𑑂 𑐬𑐵𑐳𑐳 𑐡𑐸𑐐𑐸 𑐳𑑂𑐥𑐲𑑂𑐚 𑐫𑐵𑐣𑐵𑐡𑐶𑐳𑐾𑑄 𑐀𑐢𑑂𑐫𑐎𑑂𑐲 𑐗𑐵𑑄 𑐳𑑂𑐬𑑀𑐟 𑐳𑐸𑐣𑐶𑐱𑑂𑐔𑐶𑐟 𑐖𑐹𑐐𑐸𑐫𑐵𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐩𑐿𑐠𑐶𑐮𑐷 𑐨𑐵𑐳𑑄 𑐳𑐩𑐵𑐔𑐵𑐬 𑐳𑐾𑐰𑐵 𑐳𑑄𑐔𑐵𑐮𑐣 𑐫𑐵𑐫𑐾𑐐𑐸 𑐳𑑂𑐥𑐲𑑂𑐚 𑐫𑐵𑐣𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐬𑐵𑐲𑑂𑐚𑑂𑐬𑐶𑐫 𑐨𑐵𑐳𑑄 𑐳𑐩𑐵𑐔𑐵𑐬 𑐳𑐾𑐰𑐵 𑐳𑑄𑐔𑐵𑐮𑐣 𑐫𑐵𑐫𑐾𑐐𑐸 𑐥𑑂𑐬𑐎𑑂𑐬𑐶𑐫𑐵𑐫𑑂 𑐡𑐸𑐐𑐸 𑐬𑐵𑐳𑐳𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐟𑐬𑐵𑐃𑐫𑐵 𑐕𑐸𑑄 𑐥𑐵𑐮𑐶𑐎𑐵 𑐂𑐔𑑂𑐕𑐸𑐎 𑐡𑐸𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐳𑑂𑐰𑐣𑐶𑐐𑑅 𑐡𑐸𑐣𑐾𑐫𑐵 𑐣𑐐𑐬𑐥𑐵𑐮𑐶𑐎𑐵𑐟𑐫𑑂𑐳𑑄 𑐣𑑄 𑐁𑐰𑐱𑑂𑐫𑐎 𑐳𑐵𑐠 𑐰 𑐐𑑂𑐰𑐵𑐴𑐵𑐮𑐶 𑐥𑑂𑐬𑐵𑐥𑑂𑐟 𑐖𑐸𑐂𑐐𑐸 𑐰𑐵𑐟𑐵𑐰𑐬𑐞 𑐟𑐫𑐵𑐬 𑐫𑐵𑐣𑐵𑐧𑐷𑐟 𑐣𑐾𑐥𑐵𑐮𑐨𑐵𑐲𑐵 𑐳𑐩𑑂𑐰𑐡𑑂𑐢 𑐳𑑄𑐑𑐳𑑄𑐳𑑂𑐠𑐵 𑐰 𑐀𑐨𑐶𑐫𑐣𑑂𑐟𑐵𑐟𑐫𑑂𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋