𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑑑𑑘 𑐎𑑂𑐰𑑅𑐐𑐸 𑐡𑑃 𑐩𑐸𑑃𑐖𑑂𑐫𑐵 𑐎𑑂𑐰𑐔𑐵𑐮

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐰𑐶𑐖𑐫𑐬𑐟𑑂𑐣 | 𑑒𑑐𑑗𑑖 𑐱𑑂𑐬𑐵𑐰𑐞 𑑒𑑘, 𑐩𑑄𑐐𑐮𑐧𑐵𑐬 𑑑𑑓:𑑔𑑙:𑑑𑑐

𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑐵𑐒𑐩𑐫 𑐏𑑂𑐫𑐮𑐫𑑂 𑐕𑐐𑐹 𑐥𑑂𑐬𑐵𑐖𑑂𑐘𑐶𑐎 𑐳𑑄𑐐𑐛𑐣 𑐎𑐠𑑄 𑐣𑐷𑐳𑑂𑐰𑐣𑐵𑐟𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑑑𑑘 𑐎𑑂𑐰𑑅𑐐𑐸 𑐡𑑃 𑐩𑐸𑑃𑐖𑑂𑐫𑐵𑑅 𑐠𑑁𑑄 𑐩𑑄𑐐𑐮𑐰𑐵𑑅 𑐎𑐶𑐥𑐹𑐫𑐵 𑑒 𑐰𑐜𑐵 𑐡𑑂𑐫𑑅𑐢𑑂𑐰𑐵𑐏𑐵𑐫𑐵 𑐣𑑂𑐫𑐵𑐩𑐵𑐳𑐶𑐩𑐵𑐫𑑂 𑐔𑑂𑐰𑑄𑐐𑐸 𑐠𑑅𑐐𑐸 𑐳𑐨𑐵 𑐨𑐰𑐣𑐫𑑂 𑐎𑑂𑐰𑐔𑐵𑑅𑐐𑐸 𑐡𑐸 𑑋

𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐊𑐎𑐾𑐡𑐾𑐩𑐶𑐫𑐵 𑐳𑑄𑐬𑐎𑑂𑐲𑐎 𑐰𑐵𑐒𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲, 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐜𑐵. 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐩𑐹𑐥𑐵𑐴𑐵𑑃 𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐔𑐶𑐟𑑂𑐟𑐬𑐣𑑂𑐖𑐣 𑐣𑐾𑐥𑐵𑐮𑐷𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐊𑐎𑐾𑐡𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐡𑐔𑑂𑐕𑐶𑐫𑐵 𑐥𑑂𑐬𑐐𑐟𑐶 𑐰𑐶𑐰𑐬𑐞 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅𑐳𑐵 𑐡𑐵𑑃𑐨𑐬𑐷 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐁𑐬𑑂𑐠𑐶𑐎 𑐥𑑂𑐬𑐟𑐶𑐰𑐾𑐡𑐣 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐡𑑃 𑐩𑐸𑑃𑐖𑑂𑐫𑐵𑐫𑑂 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐨𑐵𑐲𑐵𑐰𑐶𑐡𑑂 𑐴𑐶𑐟𑐎𑐬𑐰𑐷𑐬 𑐳𑐶𑑄𑐴 𑐎𑐳𑐵𑑅, 𑐨𑐵𑐲𑐵𑐳𑐾𑐰𑐷𑐮𑐶𑐳𑐾𑑄 𑐳𑐵𑐴𑐸 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬, 𑐜𑐵. 𑐳𑐸𑐩𑐣𑐎𑐩𑐮 𑐟𑐸𑐮𑐵𑐢𑐬 𑐰 𑐩𑐹𑐥𑐵𑐴𑐵𑑃 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐜𑐵. 𑐖𑑀𑐱𑐷𑐥𑐶𑐣𑑂𑐳𑑄 𑐣𑐸𑐐𑑅 𑐏𑑃 𑐟𑐫𑐵𑐡𑐷𑐐𑐸 𑐏𑑅𑑋

𑐀𑐠𑐾𑐴𑐾𑐟𑐸𑑄 𑐄𑐐𑐸 𑐡𑑃 𑐩𑐸𑑃𑐖𑑂𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐥𑐵𑐬𑑂𑐲𑐡𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑐣𑐶𑐬𑑂𑐩𑐮𑐩𑐵𑐣 𑐟𑐸𑐮𑐵𑐢𑐬, 𑐣𑐵𑑄𑐖𑐵𑐩𑑂𑐴 𑐣𑐺𑐟𑑂𑐫𑐵𑑄𑐐𑐣𑐵 𑐎𑐮𑐵𑐎𑐵𑐬 𑐣𑐵𑐬𑐵𑐫𑐞𑐡𑐾𑐰𑐷 𑐥𑑂𑐬𑐢𑐵𑐣, 𑐳𑐵𑐴𑐶𑐟𑑂𑐫𑐎𑐵𑐬 𑐱𑐵𑐎𑑂𑐫 𑐳𑐸𑐬𑐾𑐣, 𑐥𑐟𑑂𑐬𑐎𑐵𑐬 𑐳𑐸𑐬𑐾𑐱𑐎𑐶𑐬𑐞 𑐩𑐵𑐣𑐣𑑂𑐢𑐬, 𑐔𑐶𑐟𑑂𑐬𑐎𑐵𑐬 𑐊𑐎𑐵𑐬𑐵𑐩 𑐳𑐶𑑄 𑐰 𑐳𑐵𑐴𑐶𑐟𑑂𑐫𑐎𑐵𑐬 𑐥𑐸𑐬𑑂𑐞 𑐩𑐸𑐣𑐎𑑅𑐩𑐶𑐥𑐶𑐣𑑂𑐟 𑐮𑑂𑐫𑑅𑐐𑐸 𑐡𑐸𑐳𑐵𑑅 𑐩𑐵𑐂𑐎𑑂𑐬𑑀𑐳𑐦𑑂𑐚 𑐰𑐶𑐖𑑂𑐘 𑐊𑐮𑐣 𑐧𑐿𑐮𑑀𑐔𑐣 𑐟𑐸𑐮𑐵𑐢𑐬𑐫𑐵𑐟 𑐁𑐩𑐣𑑂𑐟𑑂𑐬𑐶𑐟 𑐥𑐵𑐬𑑂𑐲𑐡𑑂 𑐎𑐠𑑄 𑐮𑑂𑐫𑑅𑐐𑐸 𑐡𑐸 𑑋