𑐣𑐾𑐥𑐵𑐮𑐨𑐵𑐲𑐵 𑐩𑐶𑐳𑐵 𑐳𑐵𑐴𑐶𑐟𑑂𑐫𑐎𑐵𑐬 𑐰𑐶𑐲𑐫𑐫𑑂 𑐐𑑀𑐲𑑂𑐛𑐶

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷ 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 𑐩𑐶𑐳𑐵 𑐳𑑂𑐬𑐲𑑂𑐚𑐵𑐟𑐫𑑂 𑐫𑑀𑐐𑐡𑐵𑐣 𑐧𑐶𑐲𑐫𑐫𑐵𑐟 𑐎𑐫𑐵𑑅 𑐕𑐐𑐹 𑐰𑐶𑐔𑐵𑐬 𑐐𑑀𑐲𑑂𑐛𑐶 𑐖𑐸𑐮 𑑋 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣 𑐩𑐵𑐟𑐺𑐨𑐵𑐲𑐵 𑐰𑐶𑐨𑐵𑐐𑐫𑐵 𑐐𑑂𑐰𑐳𑐵𑐮𑐫𑑂 𑐐𑐸𑐘𑑂𑐖𑐣𑐮𑐶𑐳𑐾𑐫𑐵 𑐳𑐴𑐎𑐵𑐬𑑂𑐫𑐫𑐫𑑂 𑐄𑐐𑐸 𑐰𑐶𑐔𑐵𑐬 𑐐𑑀𑐲𑑂𑐛𑐶 𑐖𑐹𑐐𑐸 𑐏𑑅 𑑋

𑐐𑑀𑐲𑑂𑐛𑐶𑐫𑐵 𑐄𑐮𑐾𑐖𑑂𑐫𑐵 𑐫𑐵𑐳𑐾𑑄 𑐎𑐸𑐮𑐥𑐟𑐶 𑐐𑑄𑐐𑐵𑐥𑑂𑐬𑐳𑐵𑐡 𑐄𑐥𑐾𑑂𑐬𑐟𑐷𑑄 𑐬𑐵𑐲𑑂𑐚𑑂𑐬𑐶𑐫 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑑄𑐑𑐳𑑄𑐳𑑂𑐠𑐵𑐮𑐶𑐳𑐾 𑐳𑐴𑐎𑐵𑐬𑑂𑐫 𑐫𑐵𑐣𑐵𑑅 𑐠𑐸𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐣𑐾𑐐𑐸 𑐄𑐡𑑂𑐡𑐾𑐱𑑂𑐫𑐎𑐠𑑄 𑐩𑐶𑐳𑐵 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂 𑐳𑑄𑐳𑑂𑐠𑐵 𑐐𑐸𑐘𑑂𑐖𑐣𑐮𑐶𑐳𑐾𑐫𑐵 𑐳𑐴𑐎𑐵𑐬𑑂𑐫 𑐠𑐸𑐐𑐸 𑐰𑐶𑐔𑐵𑐬 𑐐𑑀𑐲𑑂𑐛𑐶 𑐫𑐵𑐣𑐵𑐐𑐸 𑐏𑑅 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐥𑑂𑐬𑐟𑐶𑐲𑑂𑐛𑐵𑐣𑐥𑐵𑐏𑐾𑑄 𑐥𑐶𑐠𑐣𑐾𑐟𑑂𑐫𑐣𑐵𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐬𑑂𑐰𑐩𑐵𑐣𑑂𑐫 𑐏𑑃𑐐𑑂𑐰𑑅𑐢𑐸𑐎𑐹 𑐫𑐵𑐎𑐣𑑄 𑐥𑐶𑐠𑐣𑐾𑐐𑐸𑐎𑐠𑑄 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐮𑐎𑑂𑐲𑑂𑐩𑐷 𑐩𑐵𑐮𑐷𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐬𑐲𑑂𑐚𑐵 𑐐𑐖𑐮 𑐔𑑂𑐰𑐩𑐶 𑐃𑐱𑑂𑐰𑐬𑐷𑐩𑐿𑑃𑐫𑐵 𑐱𑑂𑐬𑐾𑐲𑑂𑐛𑑄 ‘𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐵𑐬𑐷 𑐳𑑂𑐬𑐲𑑂𑐚𑐵𑐟𑐫𑑂 𑐫𑑀𑐐𑐡𑐵𑐣’ 𑐰𑐶𑐲𑐫𑐫𑑂 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅𑐳𑐵 𑐎𑐰𑐫𑐶𑐟𑑂𑐬𑐷 𑐥𑑂𑐬𑐟𑐶𑐳𑐬𑐵 𑐳𑐵𑐫𑑂𑐩𑐶𑑄 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐐𑐸𑐘𑑂𑐖𑐣𑐫𑐵 𑐀𑐢𑑂𑐫𑐎𑑂𑐲 𑐳𑐵𑐴𑐶𑐟𑑂𑐫𑐎𑐵𑐬 𑐖𑐮𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛𑑄 𑐮𑐳𑐎𑐸𑐳 𑐫𑐵𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐩𑐶𑐳𑐵 𑐳𑑂𑐬𑐲𑑂𑐚𑐵𑐟𑐫𑑂 𑐫𑑀𑐐𑐡𑐵𑐣 𑐰 𑐨𑐵𑐰𑐷 𑐫𑑀𑐖𑐣𑐵 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐾𑐩𑐴𑐶𑐬𑐵 𑐟𑐸𑐮𑐵𑐢𑐬, 𑐧𑐡𑑂𑐬𑐷 𑐧𑐾𑐡𑐣𑐵, 𑐳𑐸𑐩𑐵 𑐱𑑂𑐬𑐾𑐲𑑂𑐛, 𑐎𑐺𑐲𑑂𑐞 𑐥𑑂𑐬𑐖𑐵𑐥𑐟𑐶𑐥𑐶𑑄𑐳𑑄 𑐩𑐶𑐳𑐵 𑐳𑑂𑐬𑐲𑑂𑐚𑐵 𑐰 𑐳𑐵𑐴𑐶𑐟𑑂𑐫𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐣𑑂𑐴𑑂𑐫𑐳𑑅 𑐟𑐫𑐵𑐡𑐷𑐐𑐸 𑐏𑑅 𑑋