𑐣𑐾𑐥𑐵𑐮𑐨𑐵𑐲𑐵 𑐱𑐸𑐡𑑂𑐢𑑄 𑐔𑑂𑐰𑐫𑐾𑐐𑐸 𑐟𑐵𑐮𑐶𑐩

𑐣𑐾𑐥𑐵𑐮𑐨𑐵𑐲𑐵 𑐀𑑅𑐥𑐸𑐎, 𑐫𑐂𑐥𑐸𑐎 𑐰 𑐣𑑂𑐴𑑂𑐫𑐂𑐥𑐸𑐎 𑐔𑑂𑐰𑐫𑐾 𑐧𑑂𑐰𑐣𑐾 𑐳𑐫𑐾𑐎𑐾𑐐𑐸 𑐟𑐵𑐮𑐶𑐩 𑐏𑑂𑐰𑐥𑐫𑐵 𑐫𑐸𑐐 𑐰𑐶𑐖𑐫 𑐥𑐸𑐳𑑂𑐟𑐎𑐵𑐮𑐫𑐫𑑂 𑐖𑐸𑐮 𑑋 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐏𑑂𑐰𑐥 𑐣𑐐𑐬 𑐳𑐩𑐶𑐟𑐶𑐫𑐵 𑐐𑑂𑐰𑐳𑐵𑐮𑐫𑑂 𑐄𑐐𑐸 𑐟𑐵𑐮𑐶𑐩 𑐖𑐹𑐐𑐸 𑐏𑑅 𑑋 𑐕𑐣𑑂𑐴𑐸𑐫𑐵 𑐟𑐵𑐮𑐶𑐩𑐫𑑂 𑐥𑑂𑐬𑐱𑐶𑐎𑑂𑐲𑐎 𑐐𑑀𑐎𑐹𑐮 𑐩𑐵𑐣𑐣𑑂𑐢𑐬 (𑐥𑑁𑐨𑐵 𑐳𑐵𑐫𑑂𑐩𑐶𑑄) 𑐰𑑂𑐫𑐵𑐰𑐴𑐵𑐬𑐶𑐎 𑐬𑐸𑐥𑑄 𑐣𑐾𑐥𑐵𑐮𑐨𑐵𑐲𑐵 𑐀𑑅𑐥𑐸𑐎 𑐰 𑐱𑐸𑐡𑑂𑐢 𑐔𑑂𑐰𑐫𑐾𑐐𑐸 𑐟𑐵𑐮𑐶𑐩 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐠𑐷𑐠𑐷 𑐰𑐶𑐱𑐾𑐲𑐟𑐵𑑄 𑐖𑐵𑑅𑐐𑐸 𑐨𑐵𑐲𑐵 𑐖𑐸𑐫𑐵𑑅 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐠𑐷𑐠𑐷 𑐎𑐠𑑄 𑐔𑑂𑐰𑐫𑐾𑐐𑐸 𑐧𑑂𑐰𑐣𑐾𑐐𑐸 𑐔𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐎𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐸𑐮𑐵𑑄𑐐𑐸 𑐥𑐴𑑅 𑐩𑑂𑐰𑐵𑐎𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐏𑑂𑐰𑐥𑐫𑑂 𑐖𑐎 𑐖𑐸𑐫𑐵𑐔𑑂𑐰𑑄𑐐𑐸 𑐎𑐣𑐵𑐡𑐶𑐮 𑑋 𑐨𑐵𑐫𑑂 𑐢𑐫𑐵𑐐𑐸 𑐃 𑐎𑐠𑑄 𑐴𑐶𑐮𑐵𑐔𑑂𑐰𑐣𑐷𑐐𑐸 𑐖𑐹𑐐𑐸𑐮𑐶𑑄 𑐣𑑄 𑐀𑐰𑐳𑑂𑐠𑐵 𑐰 𑐃 𑐎𑐠𑑄 𑐨𑐵𑐲𑐵𑐫𑐵 𑐥𑐴 𑐥𑐵𑐣𑐵𑐰𑐣𑐷𑐐𑐸 𑐳𑑂𑐰𑐵𑐨𑐵𑐰𑐶𑐎 𑐖𑐸𑐫𑐵𑐔𑑂𑐰𑑄𑐐𑐸 𑐎𑐣𑐵𑐡𑐶𑐳𑐾𑑄 𑐖𑐷𑐰𑐣𑑂𑐟 𑐨𑐵𑐲𑐵 𑐖𑐸𑐫𑐵𑐔𑑂𑐰𑑄𑐐𑐸 𑐎𑐵𑐬𑐞𑑄 𑐣𑑄 𑐠𑐠𑐾 𑐨𑐵𑐫𑑂 𑐴𑐶𑐮𑐵𑐰𑐣𑐷𑐐𑐸𑐮𑐶𑑄 𑐏𑑃 𑐢𑐫𑐵𑐡𑐶𑐮 𑑋

𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐩𑐶𑐮𑐵𑐦𑐸𑐟𑐶, 𑐳𑐶𑐣𑑂𑐴𑐦𑐸𑐟𑐶, 𑐮𑐶𑐦𑐸𑐟𑐶 𑐴𑑂𑐬𑐱𑑂𑐰 𑐄𑐎𑐵𑐬, 𑐡𑐷𑐬𑑂𑐑 𑐄𑐎𑐵𑐬𑐫𑐵 𑐄𑐔𑑂𑐔𑐵𑐬𑐞 𑐰 𑐔𑐶𑐣𑐵 𑐁𑐏𑑅 𑐔𑑂𑐰𑐫𑐾𑐐𑐸 𑐎𑐵𑐂𑐡𑐵 𑐧𑐵𑐬𑐾 𑐄𑐐𑐸 𑐥𑑂𑐬𑐱𑐶𑐎𑑂𑐲𑐞𑐫𑑂 𑐳𑐴𑐨𑐵𑐐𑐷𑐟𑐫𑑂𑐟 𑐰𑑂𑐫𑐵𑐰𑐴𑐵𑐬𑐶𑐎 𑐬𑐸𑐥𑑄 𑐟𑐵𑐮𑐶𑐩 𑐧𑐶𑐫𑐵𑐡𑐷𑐐𑐸 𑐏 𑑋 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱𑐫𑐵 𑐣𑑂𑐰𑐎𑐸 𑐴𑐬𑐶𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛, 𑐖𑐶𑐮𑑂𑐮𑐵 𑐀𑐢𑑂𑐫𑐎𑑂𑐲 𑐣𑐬𑐾𑐱 𑐳𑐸𑐰𑐵𑐮, 𑐣𑐐𑐬 𑐀𑐢𑑂𑐫𑐎𑑂𑐲 𑐎𑐺𑐲𑑂𑐞𑐥𑑂𑐬𑐳𑐵𑐡 𑐥𑑂𑐬𑐖𑐵𑐥𑐟𑐶, 𑐣𑐾𑐰𑐵𑑅 𑐩𑐶𑐳𑐵 𑐡𑐧𑐹𑐫𑐵 𑐥𑐡𑐵𑐢𑐶𑐎𑐵𑐬𑐷 𑐣𑐵𑐥𑑄 𑐨𑐵𑐲𑐵𑐴𑑂𑐫𑑅𑐩𑐶𑐟𑐫𑑂 𑐳𑐴𑐨𑐵𑐐𑐷𑐟𑐵 𑐡𑐸𑐐𑐸 𑐏𑑅 𑑋 𑐠𑐸𑐎𑐠𑑄𑐫𑐵 𑐥𑑂𑐬𑐱𑐶𑐎𑑂𑐲𑐞𑑄 𑐨𑐵𑐲𑐵 𑐔𑑂𑐰𑐫𑐾 𑐧𑑂𑐰𑐣𑐾𑐐𑐸 𑐮𑐵𑐐𑐶𑑄 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐀𑐥𑐾𑐎𑑂𑐲𑐵 𑐫𑐵𑑅𑐐𑐸 𑐡𑐸 𑑋