𑐣𑐾𑐥𑐵𑐮𑐫𑐵 𑐂𑐟𑐶𑐴𑐵𑐳𑐫𑑂 𑐀𑐣𑐵𑐰𑐺𑐲𑑂𑐚𑐶 𑐰 𑐟𑐣𑑂𑐟𑑂𑐬𑐱𑐵𑐳𑑂𑐟𑑂𑐬𑐫𑑂 𑐰𑐶𑐱𑑂𑐰𑐵𑐳

𑐫𑑀𑐐𑐾𑐣𑑂𑐡𑑂𑐬𑐩𑐵𑐣 𑐱𑑂𑐬𑐾𑐲𑑂𑐛

𑐣𑐾𑐥𑐵𑑅𑐫𑐵 𑐂𑐟𑐶𑐴𑐵𑐳 𑐀𑐢𑑂𑐫𑐫𑐣 𑐫𑐵𑐫𑐾𑐧𑐮𑐫𑑂 𑐩𑐾𑐩𑐾𑐐𑐸 𑐰𑐶𑐲𑐫𑐰𑐳𑑂𑐟𑐸 𑐠𑐾𑑄 𑐣𑐵𑐥𑐣𑐵𑐥𑑄 𑐰𑐂𑐐𑐸 𑐰𑐶𑐲𑐫 𑐟𑐣𑑂𑐟𑑂𑐬𑐱𑐵𑐳𑑂𑐟𑑂𑐬 𑐣𑑄 𑐏𑑅 𑑋 𑐟𑐣𑑂𑐟𑑂𑐬𑐱𑐵𑐳𑑂𑐟𑑂𑐬𑑄 𑐕𑐸 𑐕𑐸 𑐫𑐵𑐫𑐾𑐦𑐸 𑐰 𑐮𑐵 𑐗𑐷𑐳𑑄 𑐩𑐳𑐶𑐄 𑑋 𑐣𑐾𑐥𑐵𑐮𑐫𑑂 𑐐𑐧𑐮𑐾𑑄 𑐣𑐶𑐳𑐾𑑄 𑐟𑐣𑑂𑐟𑑂𑐬𑑄 𑐠𑐵𑐫𑑂 𑐎𑐵𑐮 𑐰 𑐣𑑄 𑐫𑐎𑐶𑐣𑐳𑐵𑐠 𑐗𑐷𑐳𑑄 𑐢𑐵𑐫𑐾𑐩𑐦𑐸 𑑋 𑐟𑐬 𑐣𑐾𑐥𑐵𑑅𑐫𑐵 𑐳𑐨𑑂𑐫𑐟𑐵𑐫𑐵 𑐱𑐸𑐬𑐸𑐰𑐵𑐟𑑄 𑐣𑐶𑐳𑐾𑑄 𑐳𑐩𑐵𑐖𑐫𑑂 𑐟𑐣𑑂𑐟𑑂𑐬𑑄 𑐠𑐵𑐫𑑂 𑐎𑐫𑐵 𑐰𑐫𑐵𑐔𑑂𑐰𑑄𑐐𑐸 𑐢𑐵𑑅𑐳𑐵 𑐥𑑂𑐬𑐳𑑂𑐚 𑐬𑐸𑐥𑑄 𑐏𑐣𑐾𑐡𑐸 𑑋 𑐣𑐾𑐥𑐵𑑅𑐫𑐵 𑐳𑐨𑑂𑐫𑐟𑐵𑐫𑐵 𑐱𑐸𑐬𑐸𑐰𑐵𑐟 𑐢𑐫𑐵𑐐𑐸 𑐀𑐖𑐶𑐩𑐵 𑐢𑐬𑑂𑐩 𑐏𑑅 𑑋 𑐠𑐣 𑐣𑑂𑐫𑐵𑐫𑐾𑐎𑐷𑐐𑐸 𑐀𑐢𑐶𑐎𑐵𑑄𑐱 𑐖𑐵𑐟𑑂𑐬𑐵 𑐥𑐬𑑂𑐰 𑐢𑐫𑐵𑐐𑐸 𑐀𑐖𑐶𑐩𑐵 𑐣𑐵𑐥 𑐳𑑂𑐰𑐵𑐥𑐹 𑐡𑐫𑐵𑐔𑑂𑐰𑑄𑐐𑐸 𑐗𑐷𑐳𑑄 𑐏𑑄𑐎𑐵 𑐰𑐫𑐵𑐔𑑂𑐰𑐣𑐵𑐐𑐸 𑐡𑐸 𑑋 𑐄𑐎𑐶𑑄 𑐣𑐾𑐥𑐵𑑅 𑐀𑐖𑐶𑐩𑐵 𑐥𑑂𑐬𑐢𑐵𑐣 𑐡𑐾𑐱 𑐏𑑅 𑑋 𑐠𑐣 𑐩𑐾𑐩𑐾𑐐𑐸 𑐢𑐬𑑂𑐩 𑐳𑑄𑐳𑑂𑐎𑐺𑐟𑐶 𑐡𑐬𑑂𑐱𑐣 𑐥𑑂𑐬𑐰𑐾𑐱 𑐖𑐸𑐂 𑐣𑑂𑐴𑑂𑐫𑑅 𑐩𑐸𑐎𑑄 𑐀𑐖𑐶𑐩𑐵 𑐢𑐬𑑂𑐩, 𑐳𑑄𑐳𑑂𑐎𑐺𑐟𑐶𑑄 𑐠𑐵𑐫𑑂 𑐎𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐣𑐾𑐥𑐵𑑅𑐫𑐵 𑐐𑐸𑐮𑐶 𑐣𑑄 𑐀𑐖𑐶𑐩𑐵 𑐡𑐸, 𑐀𑐮𑐾 𑐰 𑐀𑐖𑐶𑐩𑐵𑐫𑐵 𑐐𑐸𑐮𑐶 𑐣𑑄 𑐖𑐵𑐟𑑂𑐬𑐵 𑐳𑑂𑐠𑐵𑐥𑐣𑐵𑐫𑐵 𑐏𑑃 𑐡𑐸, 𑐄𑐎𑐷 𑐟𑐣𑑂𑐟𑑂𑐬 𑐣𑐵𑐥 𑐏𑑃 𑐳𑑂𑐰𑐵𑐣𑐵𑐔𑑂𑐰𑐣𑐷𑐐𑐸 𑐣𑑄 𑐄𑐮𑐶 𑐴𑐾 𑐫𑐠𑐵𑐬𑑂𑐠 𑐏𑑅 𑑋

𑐠𑑂𑐰 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐂𑐟𑐶𑐴𑐵𑐳 𑐱𑐶𑐬𑑀𑐩𑐞𑐶 𑐧𑐵𑐧𑐸𑐬𑐵𑐩 𑐁𑐔𑐵𑐬𑑂𑐫𑐫𑐵 𑐢𑐵𑐥𑐹 𑐠𑐸𑐎𑐠𑑄 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸, ‘𑐁𑐬𑑂𑐫𑐵𑐰𑐬𑑂𑐟𑐩𑐵 𑐬𑐴𑐾𑐎𑐵 𑐁𑐬𑑂𑐫𑐴𑐬𑐸𑐳𑑃𑐐 𑐥𑑂𑐬𑐟𑑂𑐫𑐎𑑂𑐲 𑐰𑐵 𑐀𑐥𑑂𑐬𑐟𑑂𑐫𑐎𑑂𑐲 𑐬𑐸𑐥𑐩𑐵 𑐳𑐩𑑂𑐥𑐬𑑂𑐎 𑐳𑑂𑐠𑐵𑐥𑐶𑐟 𑐴𑐸𑐣𑐸 𑐨𑐣𑑂𑐡𑐵 𑐥𑐴𑐶𑐮𑐾 𑐰𑐬𑑂𑐟𑐩𑐵𑐣 𑐣𑐾𑐥𑐵𑐮𑐩𑐵 𑐬𑐴𑐾𑐎𑐵 𑐳𑐩𑑂𑐥𑐹𑐬𑑂𑐞 𑐣𑐶𑐰𑐵𑐳𑐷𑐎𑑀 𑐩𑐹𑐮 𑐢𑐬𑑂𑐩𑐎𑑀 𑐬𑐸𑐥𑐩𑐵 𑐟𑐣𑑂𑐟𑑂𑐬𑐩𑐣𑑂𑐟𑑂𑐬 𑐗𑐵𑐬𑐦𑐸𑐎 𑐟𑐠𑐵 𑐢𑐵𑐩𑐷 𑐗𑐵𑑃𑐎𑑂𑐬𑐷𑐴𑐬𑐸 𑐖𑐳𑑂𑐟𑐵 𑐥𑐬𑐩𑑂𑐥𑐬𑐵𑐐𑐟 𑐩𑐹𑐮𑑂𑐫 𑐟𑐠𑐵 𑐩𑐵𑐣𑑂𑐫𑐟𑐵𑐴𑐬𑐸 𑐥𑑂𑐬𑐔𑐮𑐶𑐟 𑐬𑐴𑐾𑐎𑐵 𑐴𑐸𑐡𑐵𑐴𑐸𑐣 𑑋 𑐊𑐎 𑐟 𑐫𑐟𑐶𑐧𑐾𑐮𑐵 𑐳𑐩𑑂𑐩 𑐨𑐵𑐬𑐟𑐩𑐵 𑐣𑐿 𑐥𑐣𑐶 𑐩𑐹𑐬𑑂𑐟𑐶𑐥𑐹𑐖𑐵𑐎𑑀 𑐬𑐵𑐩𑑂𑐬𑑀𑐳𑑃𑐐 𑐰𑐶𑐎𑐵𑐳 𑐨𑐂𑐳𑐎𑐾𑐎𑑀 𑐠𑐶𑐊𑐣, 𑐡𑑀𑐳𑑂𑐬𑑀 𑐎𑐸𑐬𑐵 𑐁𑐬𑑂𑐫𑐴𑐬𑐸𑐮𑐾 𑐟𑑂𑐫𑐴𑐵𑑃𑐎𑐵 𑐩𑐹𑐮 𑐣𑐶𑐰𑐵𑐳𑐷 𑐎𑐶𑐬𑐵𑑃𑐟𑐴𑐬𑐸𑐮𑐵𑐃 𑐫𑐎𑑂𑐲 𑐳𑐩𑑂𑐧𑐣𑑂𑐢𑐶 𑐀𑐣𑐸𑐲𑑂𑐛𑐵𑐣 𑐟𑐠𑐵 𑐂𑐣𑑂𑐡𑑂𑐬, 𑐀𑐐𑑂𑐣𑐶, 𑐀𑐡𑐶𑐟𑐶, 𑐰𑐬𑐸𑐞, 𑐊𑐰𑑄 𑐬𑐸𑐡𑑂𑐬 𑐁𑐡𑐶 𑐰𑐿𑐡𑐶𑐎 𑐡𑐾𑐰𑐟𑐵𑐴𑐬𑐸𑐎𑑀 𑐥𑐹𑐖𑐵 𑐊𑐰𑑄 𑐀𑐬𑑂𑐔𑐣𑐵𑐴𑐬𑐸 𑐐𑐬𑑂𑐣𑐾 𑐀𑐢𑐶𑐎𑐵𑐬 𑐥𑐣𑐶 𑐡𑐶𑐊𑐎𑐵 𑐠𑐶𑐊𑐣𑐣𑑂 𑑋 𑐫𑐳𑐿𑐮𑐾 𑐁𑐬𑑂𑐫𑐰𑐬𑑂𑐟𑐩𑐵 𑐁𑐰𑐡𑑂𑐢 𑐨𑐊𑐬 𑐬𑐴𑐾𑐎𑐵 𑐁𑐬𑑂𑐫𑐴𑐬𑐸𑐎𑑀 𑐥𑑂𑐬𑐰𑐾𑐱 𑐴𑐸𑐣𑐸𑐨𑐣𑑂𑐡𑐵 𑐥𑐴𑐶𑐮𑐾 𑐣𑐾𑐥𑐵𑐮𑐎𑐵 𑐩𑐹𑐮 𑐣𑐶𑐰𑐵𑐳𑐷 ‘𑐣𑐾𑐥𑐵𑐬’ 𑐰𑐵 ‘𑐣𑐾𑐰𑐵𑐬’ 𑐴𑐬𑐸𑐮𑐾 𑐨𑐵𑐬𑐟𑐷𑐫 𑐳𑐨𑑂𑐫𑐟𑐵 𑐟𑐠𑐵 𑐳𑑄𑐳𑑂𑐎𑐺𑐟𑐶𑐰𑐶𑐡𑑂𑐴𑐬𑐸𑐮𑐵𑐃 𑐥𑐣𑐶 𑐳𑑂𑐰𑐷𑐎𑐵𑐬𑑂𑐣𑐸 𑐟 𑐥𑐬𑐿 𑐬𑐴𑑀𑐳 𑐁𑐬𑑂𑐫 𑐨𑐵𑐲𑐵 𑐥𑐬𑐶𑐰𑐵𑐬𑐎𑐵 𑐨𑐵𑐲𑐵𑐴𑐬𑐸𑐮𑐵𑐃 𑐀𑐥𑐣𑐵𑐄𑐣 𑐥𑐣𑐶 𑐳𑐎𑐶𑐬𑐴𑐾𑐎𑑀 𑐡𑐾𑐏𑐶𑑄𑐡𑐿𑐣 𑑋 𑐁𑐬𑑂𑐫𑐰𑐬𑑂𑐟𑐩𑐵 𑐁𑐰𑐡𑑂𑐢 𑐨𑐊𑐬 𑐬𑐴𑐾𑐎𑐵 𑐁𑐬𑑂𑐫𑐴𑐬𑐸𑐳𑑃𑐐 𑐳𑐩𑑂𑐥𑐬𑑂𑐎 𑐳𑑂𑐠𑐵𑐥𑐶𑐟 𑐨𑐊𑐥𑐕𑐶 𑐨𑐣𑐾 𑐨𑐵𑐬𑐟𑐷𑐫 𑐳𑐨𑑂𑐫𑐟𑐵 𑐟𑐠𑐵 𑐳𑑄𑐳𑑂𑐎𑐺𑐟𑐶𑐎𑑀 𑐥𑑂𑐬𑐨𑐵𑐰𑐴𑐬𑐸 𑐫𑐳 𑐎𑑂𑐲𑐾𑐟𑑂𑐬𑐩𑐵 𑐎𑑂𑐬𑐩𑐶𑐎 𑐬𑐸𑐥𑐩𑐵 𑐥𑐬𑑂𑐣 𑐠𑐵𑐮𑐾𑐎𑑀 𑐗𑐮𑐎 𑐥𑐵𑐂𑐣𑑂𑐕 𑑋 (𑐁𑐔𑐵𑐬𑑂𑐫 𑑒𑑐𑑖𑑐–𑑗𑑑) 𑑋

𑐠𑐸𑐎𑐠𑑄 𑐨𑐵𑐬𑐟𑐷𑐫 𑐳𑐨𑑂𑐫𑐟𑐵 𑐣𑐾𑐥𑐵𑐮𑐫𑑂 𑐡𑐸𑐴𑐵𑑄 𑐰𑐳𑐾𑑄𑐮𑐶 𑐠𑐣 𑐔𑑂𑐰𑑄𑐥𑐶𑑄𑐳𑑄 𑐄𑐎𑐶𑐫𑐵𑐟 𑐳𑐴𑐖𑐬𑐸𑐥𑑄 𑐳𑑂𑐰𑐷𑐎𑐵𑐬 𑐫𑐵𑐟 𑐢𑐵𑑅𑐳𑐵𑑄 𑐨𑐵𑐬𑐟𑑄 𑐳𑐨𑑂𑐫𑐟𑐵 𑐖𑑂𑐰𑐣𑐵 𑐰𑑅𑐥𑐶𑑄𑐳𑑄 𑐣𑑄 𑐠𑐣𑐫𑐵 𑐳𑐣𑐟𑐣 𑐬𑐸𑐥𑑄 (𑐣𑑂𑐴𑐵𑐥𑐵𑑄 𑐣𑐶𑐳𑐾𑑄) 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐀𑐖𑐶𑐩𑐵 𑐢𑐬𑑂𑐩𑐫𑐵𑐟 𑐳𑐴𑐖 𑐬𑐸𑐥𑑄 𑐁𑐟𑑂𑐩𑐳𑐵𑐟 𑐫𑐵𑑅𑐐𑐸 𑐏𑐣𑐾𑐡𑐸 𑑋 𑐏𑐵𑐳 𑐴𑐾 𑐢𑐵𑐫𑐾𑐐𑐸 𑐏𑑅𑐳𑐵 𑐠𑐣𑐫𑐵 𑐀𑐖𑐶𑐩𑐵 𑐢𑐬𑑂𑐩𑑄 𑐴𑐶𑐣𑑂𑐡𑐹 𑐢𑐬𑑂𑐩 𑐰 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐡𑐠𑐸𑐂 𑐟𑐵𑑃𑐫𑐵 𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐕𑐵𑐫𑑂 𑐢𑐵𑑅𑐳𑐵 𑐗𑐷𑐳𑑄 𑐀𑐟𑐶𑐎𑑄 𑐴𑐣𑐵𑐧𑐣𑐵 𑐟𑐫𑐵 𑐔𑑂𑐰𑐣𑐵𑐐𑐸 𑐴𑐶𑐣𑑂𑐡𑐹 𑐢𑐬𑑂𑐩𑐫𑐵 𑐖𑐸𑐂𑐩𑐵 𑐰𑐵 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐟𑐷𑐬𑑂𑐠𑐳𑑂𑐠𑐮𑐫𑑂 𑐀𑐣 𑐀𑐖𑐶𑐩𑐵𑐫𑐵 𑐳𑑂𑐠𑐵𑐥𑐣𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐂 𑐢𑐵𑑅𑐳𑐵 𑐀𑐖𑐶𑐩𑐵𑐫𑐵 𑐩𑐹𑐬𑑂𑐟𑐶 𑐰 𑐄𑐎𑐶𑐫𑐵 𑐡𑐾𑐐𑑅 𑐣𑑄 𑐳𑐩𑐵𑐣𑐬𑐸𑐥𑑄 𑐀𑐟𑐶 𑐥𑐸𑐖𑐶𑐟 𑐖𑐸𑐫𑐵𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐄𑐎𑐶𑑄 𑐀𑐖𑐶𑐩𑐵 𑐢𑐬𑑂𑐩𑐫𑐵𑐟 𑐣𑐾𑐥𑐵𑑅𑐫𑐵 𑐳𑐩𑐣𑑂𑐰𑐫𑐵𑐟𑑂𑐩𑐎 𑐬𑐸𑐥𑑄 𑐗𑐷𑐳𑑄 𑐎𑐵𑐫𑐾 𑐴𑐾 𑐩𑐵𑑅 𑑋 𑐠𑐸𑐎𑐶𑐫𑐵𑐟 𑐳𑐸𑐣𑐵𑐣𑑄 𑐰𑐶𑐨𑐾𑐡 𑐴𑐫𑐾𑐩𑐖𑐶𑐄, 𑐴𑐫𑐾 𑐣𑑄 𑐦𑐂𑐩𑐏𑐸 𑑋

𑐀𑐖𑐶𑐩𑐵 𑐢𑐬𑑂𑐩𑐣𑐵𑐥 𑐨𑐵𑐬𑐟𑐷𑐫 𑐳𑐨𑑂𑐫𑐟𑐵 𑐳𑑂𑐰𑐵𑐫𑐾𑐢𑐸𑑄𑐎𑐸𑐳𑐾𑑄𑐮𑐶 𑐣𑐾𑐥𑐵𑑅𑐫𑐵 𑐳𑐨𑑂𑐫𑐟𑐵 𑐂𑐟𑐶𑐴𑐵𑐳𑑄 𑐣𑑂𑐴𑐹𑐐𑐸 𑐬𑐸𑐥 𑐎𑐵𑐮 𑐰𑐵 𑐰𑐶𑐎𑐵𑐳𑐫𑐵 𑐐𑐟𑐶 𑐎𑐵𑐮 𑐢𑐫𑐵𑑄 𑐁𑐥𑐵𑑅 𑐏𑑃 𑐖𑐸𑐂𑐩𑐏𑐸 𑑋 𑐠𑐠𑐾 𑐳𑑂𑐰𑑄𑐐𑐹 𑐢𑐬𑑂𑐩𑐫𑐵 𑐳𑐡𑐨𑐵𑐰, 𑐳𑐩𑐶𑐱𑑂𑐬𑐞, 𑐳𑐥𑑂𑐬𑐾𑐩 𑐐𑐸𑐧𑐮𑐾 𑐣𑐶𑐳𑐾𑑄 𑐣𑑂𑐴𑑂𑐫𑐵𑐟 𑐰 𑐮𑐵 𑐥𑑂𑐬𑐳𑑂𑐚 𑐬𑐸𑐥𑑄 𑐢𑐵𑐫𑐾𑐩𑐦𑐸𑐳𑐵 𑐰𑐿𑐱𑐵𑐮𑐷𑑄 𑐰𑑅𑐥𑐶𑑄 𑐮𑐶𑐔𑑂𑐕𑐰𑐷 𑐰 𑐎𑐥𑐶𑐮𑐰𑐳𑑂𑐟𑐸𑑄 𑐰𑑅𑐥𑐶𑑄 𑐱𑐵𑐎𑑂𑐫𑐟𑐫𑑂 𑐁𑐐𑐩𑐣𑑄 𑐣𑐶𑐳𑐾𑑄 𑐏𑑅 𑐢𑐎𑐵𑑅 𑐢𑐵𑑅𑐰𑐣𑐾𑐩𑐵𑑅𑐐𑐸 𑐁𑐢𑐵𑐬 𑐡𑐸𑑋 𑐁𑐬𑑂𑐫 𑐳𑐨𑑂𑐫𑐟𑐵 𑐖𑑂𑐰𑐣𑐵 𑐰𑑅𑐥𑐶𑑄𑐳𑑄 𑐣𑑄 𑐀𑐖𑐶𑐩𑐵 𑐢𑐬𑑂𑐩𑐫𑐵 𑐟𑐣𑑂𑐟𑑂𑐬𑐫𑐵𑐟 𑐳𑐴𑐖𑐬𑐸𑐥𑑄 𑐳𑑂𑐰𑐷𑐎𑐵𑐬 𑐫𑐵𑐳𑐾𑑄𑐮𑐶 𑐮𑐶𑐔𑑂𑐕𑐰𑐷 𑐂𑐮𑐫𑑂 𑐠𑑂𑐫𑑄𑐧𑐮𑐫𑑂 𑐠𑐣𑐫𑐵 𑐳𑐨𑑂𑐫𑐟𑐵 𑐨𑐵𑐬𑐟𑐷𑐫 𑐳𑐨𑑂𑐫𑐟𑐵𑐣𑐵𑐥 𑐖𑑂𑐰𑑅𑐮𑐵𑑅 𑐰𑐣𑐾𑐢𑐸𑑄𑐎𑐹𑐐𑐸 𑐏𑐣𑐾𑐡𑐸 𑑋 𑐮𑐶𑐔𑑂𑐕𑐰𑐷 𑐖𑐸𑐖𑐸𑐥𑐶𑑄𑐳𑑄 𑐨𑐵𑐬𑐟𑐫𑑂 𑐰𑐶𑐨𑐶𑐣𑑂𑐣 𑐬𑐵𑐖𑑂𑐫𑐫𑐵 𑐖𑐸𑐖𑐸𑐥𑐶𑐣𑐶 𑐩𑑂𑐴𑑂𑐫𑐵𑐫𑑂𑐩𑐔𑐵 𑐰𑐶𑐰𑐵𑐴 𑐫𑐵𑐣𑐵𑐟𑑅𑐐𑐸 𑐏𑑃 𑐖𑐫𑐡𑐾𑐰 𑐡𑑂𑐰𑐶𑐟𑐷𑐫𑐫𑐵 𑐥𑐱𑐸𑐥𑐟𑐶 𑐀𑐨𑐶𑐮𑐾𑐏𑑄 𑐳𑐵𑐎𑑂𑐲𑐷 𑐧𑐎𑐾 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 (𑐰𑐖𑑂𑐬𑐵𑐔𑐵𑐬𑑂𑐫 𑑒𑑐𑑒𑑐–𑑕𑑔𑑘) 𑑋
𑐟𑐣𑑂𑐟𑑂𑐬𑐫𑐵 𑐁𑐢𑐵𑐬𑑄 𑐳𑐨𑑂𑐫𑐟𑐵 𑐳𑐺𑐖𑐣𑐵 𑐖𑐸𑐫𑐵𑐔𑑂𑐰𑑄𑐐𑐸 𑐣𑐾𑐥𑐵𑑅𑐫𑐵 𑐳𑐨𑑂𑐫𑐟𑐵𑐫𑑂 𑐮𑐶𑐔𑑂𑐕𑐰𑐷 𑐃 𑐠𑑂𑐫𑑄𑐳𑐾𑑄𑐮𑐶 𑐮𑐶𑐏𑐟 𑐬𑐸𑐥𑑄 𑐠𑐵𑐫𑑂 𑐎𑐵𑑅𑐐𑐸 𑐏𑐣𑐾𑐡𑐸 𑑋 𑐟𑐬 𑐠𑑁𑑄𑐟𑐎 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐮𑐶𑐔𑑂𑐕𑐰𑐷𑐎𑐵𑐮𑐶𑐣 𑐀𑐨𑐶𑐮𑐾𑐏𑐫𑑂 𑐐𑐣𑑄 𑐣𑑄 𑐟𑐣𑑂𑐟𑑂𑐬𑐫𑐵 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐢𑐵𑑅𑐳𑐵 𑐏𑐣𑐾𑐩𑐡𑐸 𑑋 𑐟𑐬 𑐠𑐠𑐾 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐩𑐡𑐸𑐳𑐵𑑄 𑐮𑐶𑐔𑑂𑐕𑐰𑐷 𑐖𑐸𑐖𑐸 𑐩𑐵𑐣𑐡𑐾𑐰𑐫𑐵 𑐂𑐮𑐫𑑂 𑐠𑑂𑐫𑑄𑐧𑐮𑐫𑑂 𑐥𑐱𑐸𑐥𑐟𑐶𑐣𑐵𑐠𑐫𑐵 𑐳𑑂𑐠𑐵𑐥𑐣𑐵 𑐣𑐵𑐥𑑄 𑐔𑐵𑑃𑐐𑐸𑐣𑐵𑐬𑐵𑐫𑐞 𑐏𑐵𑐳𑑂𑐟𑐶𑐫𑐵 𑐧𑑁𑐡𑑂𑐢 𑐳𑑂𑐟𑐸𑐥𑐫𑐵 𑐣𑐵𑐥𑑄 𑐥𑐮𑐵𑐘𑑂𑐔𑑀𑐎 𑐀𑐖𑐶𑐩𑐵𑐫𑐵 𑐳𑑂𑐠𑐵𑐥𑐣𑐵 𑐖𑐸𑐂𑐢𑐸𑑄𑐎𑐹𑐐𑐸 𑐏𑐣𑐾𑐡𑐸 𑑋

𑐀𑐖𑐶𑐩𑐵𑐫𑐵 𑐳𑑂𑐠𑐵𑐥𑐣𑐵𑐫𑐵 𑐖𑐷𑐰 𑐢𑐵𑐬𑐞 𑐫𑐵𑐫𑐾𑐟 𑐥𑐸𑐬𑐱𑑂𑐔𑐬𑐞𑐫𑐵 𑐁𑐰𑐱𑑂𑐫𑐎 𑐡𑐸 𑑋 𑐀𑐠𑐾 𑐥𑐸𑐬𑐱𑑂𑐔𑐬𑐞 𑐢𑐫𑐵𑐐𑐸 𑐟𑐵𑐣𑑂𑐟𑑂𑐬𑐶𑐎 𑐰𑐶𑐢𑐶𑐰𑐶𑐢𑐵𑐣 𑐎𑐠𑑄 𑐫𑐵𑐂𑐐𑐸 𑐥𑐸𑐖𑐵 𑐏𑑅 𑑋 𑐠𑐸𑐎𑐷 𑐕𑐸 𑐥𑑂𑐬𑐳𑑂𑐚 𑐬𑐸𑐥𑑄 𑐏𑐣𑐾𑐡𑐸 𑐢𑐵𑑅𑐳𑐵 𑐮𑐶𑐔𑑂𑐕𑐰𑐷𑐎𑐵𑐮𑐫𑐵 𑐐𑐸𑐐𑐸𑑄 𑐣𑑄 𑐀𑐨𑐶𑐮𑐾𑐏𑐫𑑂 𑐟𑐣𑑂𑐟𑑂𑐬𑐫𑐵 𑐰𑐶𑐲𑐫 𑐄𑐮𑑂𑐮𑐾𑐏 𑐩𑐫𑐵𑑅𑐳𑐵𑑄 𑐮𑐶𑐔𑑂𑐕𑐰𑐷𑐂𑐮𑐫𑑂 𑐳𑐩𑐵𑐖𑐫𑑂 𑐥𑐬𑐵𑐥𑐹𑐬𑑂𑐰 𑐂𑐮𑑄𑐣𑐶𑐳𑐾𑑄 𑐣𑑂𑐴𑑂𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐟𑐣𑑂𑐟𑑂𑐬𑐫𑐵 𑐩𑐴𑐟𑑂𑐰 𑐡𑐸 𑐢𑐫𑐵𑐐𑐸 𑐖𑑂𑐰𑐮𑐣𑑂𑐟 𑐄𑐡𑐵𑐴𑐬𑐞 𑐏𑐣𑐾𑐡𑐸 𑑋 𑐠𑑂𑐰 𑐏𑑃 𑐥𑐮𑐵𑐘𑑂𑐔𑑀𑐎 𑐀𑐖𑐶𑐩𑐵𑐫𑐵 𑐳𑑂𑐠𑐵𑐥𑐣𑐵𑑄 𑐣𑑂𑐰𑐰𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑑅𑐫𑐵 𑐖𑐣𑐟𑐵𑐫𑐵 𑐩𑑂𑐰𑐵𑐫𑐾𑐐𑐸 𑐁𑐢𑐵𑐬 𑐢𑐫𑐵𑐐𑐸 𑐳𑐨𑑂𑐫𑐟𑐵𑐫𑐵 𑐳𑐸𑐬𑐸𑐰𑐵𑐟𑐫𑐵 𑐀𑐰𑐳𑑂𑐠𑐵𑑄 𑐣𑐶𑐳𑐾𑑄 𑐧𑐸𑑃𑐖𑑂𑐫𑐵 𑐴𑐾 𑐏𑑅 𑑋 𑐎𑐺𑐲𑐶𑐥𑑂𑐬𑐢𑐵𑐣 𑐡𑐾𑐱𑐫𑐵 𑐩𑐹 𑐁𑐢𑐵𑐬 𑐢𑐫𑐵𑐐𑐸 𑐮𑑅 𑐏𑑅 𑑋 𑐮𑑅 𑐩𑐡𑐫𑐾𑐎𑑄 𑐧𑐸𑑃𑐖𑑂𑐫𑐵 𑐖𑐸𑐂𑐩𑐏𑐸 𑑋 𑐣𑐾𑐥𑐵𑐮𑐫𑑂 𑐳𑐶𑑃𑐔𑐵𑐂𑐫𑐵 𑐰𑑂𑐫𑐰𑐳𑑂𑐠𑐵 𑐩𑐡𑐸𑐐𑐸𑐫𑐵 𑐎𑐵𑐬𑐞𑑄 𑐩𑐸𑐎𑑂𑐎𑑄 𑐮𑑅𑐫𑐵 𑐮𑐵𑐐𑐶 𑐁𑐎𑐵𑐱𑐫𑑂 𑐣𑐶𑐬𑑂𑐨𑐬 𑐏𑑅 𑑋 𑐣𑐾𑐥𑐵𑑅𑐫𑐵 𑐰𑑄𑐱𑐵𑐰𑐮𑐷 𑐰 𑐫𑐠𑐵𑐬𑑂𑐠𑐟𑐵𑐫𑑂 𑐀𑐢𑑂𑐫𑐫𑐣 𑐫𑐵𑑅𑐰𑐣𑐾𑐧𑐮𑐫𑑂 𑐮𑐶𑐔𑑂𑐕𑐰𑐷𑐎𑐵𑐮𑑄 𑐣𑐶𑐳𑐾𑑄 𑐬𑐵𑐞𑐵𑐎𑐵𑐮 𑐟𑐎 𑐴𑐾 𑐂𑐮𑐫𑑂𑐧𑑂𑐫𑐮𑐫𑑂 𑐀𑐣𑐵𑐰𑐺𑐲𑑂𑐚𑐶 𑐖𑐸𑐫𑐵𑑅 𑐧𑐸𑑃𑐖𑑂𑐫𑐵 𑐫𑐵𑐫𑐾𑐩𑐏𑐣𑐵 𑐰𑐵𑐠𑐵𑐰𑐵𑐠𑐵 𑐎𑑄𑐐𑐸 𑐰 𑐟𑐣𑑂𑐟𑑂𑐬𑐫𑐵𑐟 𑐧𑑅 𑐎𑐫𑐵𑑅 𑐰𑐵 𑐰𑐫𑐾𑐎𑐵𑑅 𑐡𑐾𑐱𑐫𑑂 𑐧𑐸𑑃𑐖𑑂𑐫𑐵 𑐣𑑂𑐫𑐵𑐫𑐾𑐎𑐮 𑐢𑐫𑐵𑐐𑐸 𑐏𑐣𑐾𑐡𑐸, 𑐐𑐸𑐐𑐸 𑐮𑐶𑐏𑐶𑐟 𑐬𑐸𑐥𑑄 𑐴𑐾 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐮𑐶𑐔𑑂𑐕𑐰𑐷 𑐖𑐸𑐖𑐸 𑐐𑐞𑐡𑐾𑐰𑐫𑐵 𑐂𑐮𑐫𑑂 𑐰𑐵 𑐩𑐰𑐫𑐵𑑅 𑐡𑐾𑐱𑐫𑑂 𑐴𑐵𑐴𑐵𑐎𑐵𑐬 𑐖𑐹𑐐𑐸 𑐂𑐮𑐫𑑂 𑐣𑐵𑐐𑐳𑐵𑐢𑐣𑐵 𑐫𑐵𑐣𑐵𑑅 𑐰𑐵 𑐰𑐫𑐾𑐎𑐵𑑅 𑐥𑑂𑐬𑐖𑐵 𑐥𑐵𑐮𑐣 𑐫𑐵𑑅𑐐𑐸 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐣𑐫𑐵 𑐖𑐣𑐟𑐵𑐫𑐵 𑐰𑐶𑐱𑑂𑐰𑐵𑐳 𑐮𑑅𑐫𑐵 𑐖𑐣𑑂𑐩𑐡𑐵𑐟𑐵 𑐡𑐾𑐰𑐬𑐵𑐖 𑐂𑐣𑑂𑐡𑑂𑐬𑐫𑐵 𑐣𑐵𑐥𑑄 𑐣𑐵𑐐𑐬𑐵𑐖 𑐣𑑄 𑐏𑑅 𑑋 𑐣𑐵𑐐𑐫𑐵𑐟 𑐳𑐵𑐢𑐣 𑐫𑐵𑐣𑐵𑑅 𑐰𑐵 𑐰𑐫𑐾𑐎𑐾𑐐𑐸 𑐢𑐫𑐵𑐐𑐸 𑐟𑐣𑑂𑐟𑑂𑐬𑐫𑐵 𑐳𑐵𑐢𑐣 𑐏𑑅 𑑋 𑐠𑐸𑐐𑐸 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐣𑐾𑐥𑐵𑑅𑐫𑐵 𑐡𑐎𑐮𑐫𑑂 𑐥𑐸𑐮𑐵𑑄𑐐𑐸 𑐰𑑄𑐱𑐵𑐰𑐮𑐷 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷𑐂 𑐠𑐸𑐎𑐠𑑄 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐏𑐣𑐾𑐡𑐸, ‘𑐬𑐵𑐖𑐵 𑐱𑑂𑐬𑐷 𑐐𑐞𑐡𑐾𑐰 𑐰𑐬𑑂𑐲 𑑔𑑕 𑑋𑑋 𑐟𑐳𑑂𑐫𑑅 𑐬𑐵𑐖𑐾 𑐣𑐾𑐥𑐵𑐮𑐾 𑐨𑐹𑐩𑐶𑐰𑐬𑑂𑐲𑐟𑑂𑐬𑐫𑑄 𑐀𑐣𑐵𑐰𑐺𑐲𑑂𑐚𑐶 𑐰𑐵𑐬𑐶… 𑐁𑐎𑐵𑐎𑑂𑐲𑐞𑐵𑐫𑐎𑐵𑐩𑐾𑐣𑑅 𑐱𑑂𑐬𑐷 𑐥𑐱𑐸𑐥𑐟𑐶 𑐨𑐚𑑂𑐚𑐵𑐬𑐶𑐎𑐵𑐫 𑐩𑐴𑐵𑐣𑐵𑐐 𑐣𑐶𑐬𑑂𑐖𑐶𑐟𑑂𑐫𑑅 𑐟𑐳𑑂𑐫𑐩𑐣𑐶 𑐩𑐸𑐎𑑂𑐟𑐾 𑐐𑐞𑐡𑐾𑐰𑐣𑐵𑐩 ….𑐎𑐺𑐟𑑄 𑐥𑑂𑐬𑐡𑑀𑐎𑐶𑐟𑑄 𑐟𑐟 𑐥𑑂𑐬𑐨𑐵𑐰𑐵𑐮𑑂𑐥𑐴𑐵𑐰𑐺𑐲𑑂𑐚𑐶 𑐎𑐺𑐟𑑄 𑐥𑑂𑐬𑐖𑐵 𑐳𑐸𑐏𑐵 𑐨𑐰𑐟𑐶’’ (𑐬𑐾𑐐𑑂𑐩𑐷, 𑑑𑑙𑑖𑑖–𑑑𑑑𑑗)

𑐠𑐠𑐾 𑐴𑐾 𑐀𑐣𑐵𑐰𑐺𑐲𑑂𑐚𑐶𑐫𑐵 𑐎𑐵𑐬𑐞𑑄 𑐁𑐳𑐵𑐩𑑄 𑐣𑐶𑐳𑐾𑑄 𑐟𑐣𑑂𑐟𑑂𑐬𑐫𑐵 𑐳𑐵𑐢𑐣 𑐫𑐵𑐣𑐵𑑅 𑐧𑐸𑑄𑐐𑐡𑑂𑐫𑑅 𑐣𑐾𑐥𑐵𑑅 𑐧𑐶𑐖𑑂𑐫𑐵𑐎𑐾𑐩𑐵𑑅𑐐𑐸, 𑐧𑐸𑑄𑐐𑐡𑑂𑐫𑑅 𑐣𑐾𑐥𑐵𑑅 𑐧𑐶𑐖𑑂𑐫𑐵𑐳𑐾𑑄𑐮𑐶 𑐣𑐶𑐫𑐩𑐶𑐟 𑐬𑐸𑐥𑑄 𑐰𑐵 𑐰𑐫𑐵𑑅 𑐠𑐣𑐫𑐵 𑐧𑐸𑑃𑐖𑑂𑐫𑐵 𑐖𑐸𑐮 𑐢𑐫𑐵𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋 𑐰𑐶𑐨𑐶𑐣𑑂𑐣 𑐰𑑄𑐱𑐵𑐰𑐮𑐷𑐂 𑐧𑐸𑑄𑐐𑐡𑑂𑐫𑑅𑐫𑐵 𑐁𑐐𑐩𑐣𑐫𑐵𑐟 𑐰𑐶𑐨𑐶𑐣𑑂𑐣 𑐧𑐵𑐏𑑄 𑐳𑑂𑐰𑐵𑐎𑐵𑐟𑑅𑐐𑐸 𑐡𑐸 𑑋 𑐟𑐬 𑐰𑐶𑐱𑑂𑐰𑐵𑐳 𑐫𑐵𑐫𑐾𑐧𑐴𑐐𑐸 𑐕𑐟𑐵 𑐏𑑃 𑐕𑐸 𑐢𑐵𑑅𑐳𑐵 𑐧𑐸𑑄𑐐𑐡𑑂𑐫𑑅𑐫𑐵 𑐣𑐾𑐥𑐵𑑅 𑐧𑐶𑐖𑑂𑐫𑐵𑐎𑐾𑐟 𑐖𑐸𑐖𑐸 𑐣𑐬𑐾𑐣𑑂𑐡𑑂𑐬𑐡𑐾𑐰 𑐄𑐐𑐸 𑐃𑐫𑐵 𑐥𑑂𑐬𑐳𑐶𑐡𑑂𑐢 𑐟𑐵𑐣𑑂𑐟𑑂𑐬𑐶𑐎 𑐧𑐣𑑂𑐢𑐸𑐡𑐟𑑂𑐟 𑐰 𑐮𑐮𑐶𑐟 𑐎𑐶𑐳𑐵𑐣𑐫𑐵𑐟 𑐢𑐵𑑅𑐳𑐵 𑐳𑐸𑐣𑐵𑑄 𑐣𑑄 𑐟𑑂𑐰𑑅𑐦𑐶𑐎𑐹𑐐𑐸 𑐏𑐣𑐾𑐩𑐡𑐸 𑑋 𑐥𑐸𑐮𑐵𑑄𑐐𑐸 𑐰𑑄𑐱𑐵𑐰𑐮𑐷 𑐎𑐠𑑄 𑐎𑐫𑐵𑐟𑑅𑐐𑐸 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷𑐂 𑐖𑐸𑐖𑐸 𑐣𑐬𑐾𑐣𑑂𑐡𑑂𑐬𑐡𑐾𑐰 𑐰 𑐰𑐣𑑂𑐢𑐸𑐡𑐟𑑂𑐟 𑐁𑐔𑐵𑐬𑑂𑐫 𑐖𑐵𑐣𑐵𑑅 𑐖𑐵𑐟𑑂𑐬𑐵 𑐣𑑂𑐫𑐵𑐫𑐾𑐎𑐮 𑐢𑐫𑐵𑐟𑑅𑐐𑐸 𑐡𑐸𑐳𑐵 𑐧𑐸𑑄𑐐𑐡𑑂𑐫𑑅𑐫𑐵𑐟 𑐮𑑀𑐎𑐾𑐱𑑂𑐰𑐬𑐫𑐵 𑐬𑐸𑐥𑑄 𑐳𑐩𑑂𑐧𑑀𑐢𑐣 𑐠𑐸𑐎𑐠𑑄 𑐫𑐵𑐣𑐵𑐟𑑅𑐐𑐸 𑐏𑐣𑐾𑐡𑐸– ‘𑐬𑐵𑐖𑐵 𑐱𑑂𑐬𑐷 𑐣𑐬𑐾𑐣𑑂𑐡𑑂𑐬𑐡𑐾𑐰 𑐰𑐬𑑂𑐲 𑑓𑑕 𑐟𑐳𑑂𑐫.. 𑐁𑐔𑐵𑐬𑑂𑐫 𑐰𑑄𑐢𑐸𑐡𑐟𑑂𑐟 𑐡𑑂𑐰𑐾𑐣 𑐱𑑂𑐬𑐷 𑐰𑐸𑐐𑑂𑐩 𑐮𑑀𑐎𑐾𑐱𑑂𑐰𑐬 𑐨𑐚𑐵𑐬𑐎𑐳𑑂𑐫 𑐖𑐵𑐟𑑂𑐬𑐵𑐎𑐺𑐟𑐵 𑐨𑐰𑐟𑐶’ (𑐬𑐾𑐐𑑂𑐩𑐷 𑑑𑑙𑑖𑑖–𑑑𑑑𑑘) 𑑋 𑐧𑐸𑑄𑐐𑐡𑑂𑐫𑑅 𑐣𑐾𑐥𑐵𑑅 𑐧𑐶𑐖𑑂𑐫𑐵𑐎𑐹𑐐𑐸 𑐏𑑃𑐫𑐵𑐟 𑐎𑐫𑐵𑑅 𑐂𑐟𑐶𑐴𑐵𑐳𑐎𑐵𑐬𑐟 𑐊𑐎𑐩𑐟 𑐏𑐣𑐾𑐩𑐡𑐸 𑑋

𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷𑐂 𑐮𑐶𑐔𑑂𑐕𑐰𑐷 𑐖𑐸𑐖𑐸 𑐣𑐬𑐾𑐣𑑂𑐡𑑂𑐬𑐡𑐾𑐰𑐫𑐵 𑐂𑐮𑐫𑑂 𑐧𑐸𑑄𑐐𑐡𑑂𑐫𑑅 𑐣𑐾𑐥𑐵𑑅 𑐧𑐶𑐖𑑂𑐫𑐵𑐎𑐵𑑅 𑐖𑐵𑐟𑑂𑐬𑐵 𑐫𑐵𑑅𑐐𑐸 𑐄𑐮𑑂𑐮𑐾𑐏 𑐡𑑅𑐳𑐵 𑐠𑑂𑐰 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐀𑐢𑑂𑐫𑐾𑐟𑐵 𑐬𑐰𑐶 𑐱𑐵𑐎𑑂𑐫𑐫𑐵 𑐢𑐵𑐥𑐹 𑐠𑐸𑐎𑐠𑑄 𑐡𑐸, ‘𑐧𑐸𑑄𑐐𑐡𑑂𑐫𑑅 𑐠𑐣 𑐴𑑅𑐐𑐸 𑐃 𑐐𑐸𑐧𑐮𑐫𑑂 𑐏𑑅 𑐢𑐫𑐵𑐐𑐸 𑐧𑐵𑐬𑐾 𑐠𑐷𑐠𑐷 𑐰𑑄𑐱𑐵𑐰𑐮𑐷𑐂 𑐠𑐷𑐠𑐷 𑐳𑑄𑐰𑐟𑑂 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐞𑐶𑐬𑐟𑑂𑐣𑐩𑐵𑐮𑐵 𑐀𑐰𑐡𑐵𑐣𑐫𑑂 𑐎𑐮𑐶𑐐𑐟 𑐳𑑄𑐰𑐟𑑂 𑑓𑑖𑑐𑑐, 𑐬𑐵𑐂𑐚 𑐰𑑄𑐱𑐵𑐰𑐮𑐷𑐂 𑐎𑐮𑐶𑐐𑐟 𑐳𑑄𑐰𑐟𑑂 𑑓𑑖𑑒𑑓, 𑐥𑐡𑑂𑐩𑐐𑐶𑐬𑐷 𑐰𑑄𑐱𑐵𑐰𑐮𑐷𑐂 𑐎𑐮𑐶𑐐𑐟 𑐳𑑄𑐰𑐟𑑂 𑑓𑑕𑑔𑑘, 𑐨𑐵𑐲𑐵 𑐰𑑄𑐱𑐵𑐰𑐮𑐷𑐂 𑐎𑐮𑐶𑐐𑐟 𑐳𑑄𑐰𑐟𑑂 𑑓𑑖𑑗𑑖 𑐢𑐎𑐵𑑅 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐮𑐶𑐔𑑂𑐕𑐰𑐷 𑐖𑐸𑐖𑐸 𑐣𑐬𑐾𑐣𑑂𑐡𑑂𑐬 𑐡𑐾𑐰𑐫𑐵 𑐱𑐵𑐳𑐣𑐎𑐵𑐮 𑐂𑐳𑑂𑐰𑐷 𑐳𑑄𑐰𑐟𑑂 𑑖𑑔𑑓–𑑖𑑗𑑙 𑐏𑑅 𑑋 𑐂𑐳𑑂𑐰𑐷 𑐳𑑄𑐰𑐟𑑂 𑐰 𑐎𑐮𑐶𑐐𑐟 𑐳𑑄𑐰𑐟𑑂 𑐡𑐠𑐸𑐂 𑑓𑑑𑑐𑑐 𑐡𑑃𑐫𑐵 𑐦𑐬𑐎 𑐡𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐫𑐾𑐧𑐮𑐫𑑂 𑐕𑐸𑑄 𑐣𑑄 𑐰𑑄𑐱𑐵𑐰𑐮𑐷𑐂 𑐧𑐶𑐫𑐵𑐟𑑅𑐐𑐸 𑐳𑑄𑐰𑐟𑑂 𑐣𑐬𑐾𑐣𑑂𑐡𑑂𑐬 𑐡𑐾𑐰𑐫𑐵 𑐬𑐵𑐖𑑂𑐫𑐎𑐵𑐮 𑐡𑐸𑐣𑐾 𑐩𑐮𑐵𑑅 𑑋’ (𑐱𑐵𑐎𑑂𑐫– 𑑑𑑑𑑒𑑗–𑑑𑑒) 𑐰𑐶𑐨𑐶𑐣𑑂𑐣 𑐰𑑄𑐱𑐵𑐰𑐮𑐷𑐂 𑐣𑑂𑐴𑑂𑐫𑐵𑐎𑐠𑑄 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐳𑐵𑑄 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷 𑐡𑐎𑐮𑐫𑑂 𑐥𑐸𑐮𑐵𑑄𑐐𑐸 𑐰𑑄𑐱𑐵𑐰𑐮𑐷 𑐏𑑅 𑑋 𑐧𑐸𑐡𑑂𑐢 𑐢𑐬𑑂𑐩𑐫𑑂 𑐮𑑀𑐎𑐾𑐱𑑂𑐰𑐬𑐫𑐵 𑐩𑐴𑐟𑑂𑐰 𑐟𑐳𑐎𑑄 𑐟𑐔𑑂𑐰𑑅 𑑋 𑐮𑑀𑐎𑐾𑐱𑑂𑐰𑐬𑐫𑐵 𑐖𑑂𑐫𑐵 𑐢𑐫𑐵𑐐𑐸 𑐠𑑅𑐩𑑂𑐴𑑄 𑐀𑐣𑐾𑐎 𑐎𑐲𑑂𑐚 𑐳𑐴 𑐫𑐵𑐣𑐵𑑅 𑐣𑑄 𑐥𑑂𑐬𑐵𑐞𑐷 𑐩𑐵𑐟𑑂𑐬𑐫𑐵 𑐎𑐮𑑂𑐫𑐵𑐞 𑐫𑐵𑐫𑐾𑐐𑐸, 𑐀𑐠𑐾 𑐎𑐮𑑂𑐫𑐵𑐞 𑐫𑐵𑐂𑐩𑑂𑐴 𑐮𑑀𑐎𑐾𑐱𑑂𑐰𑐬 𑐧𑐵𑐬𑑄𑐧𑐵𑐬 𑐖𑐣𑑂𑐩 𑐎𑐫𑐵𑑅 𑐮𑑀𑐎 𑐎𑐮𑑂𑐫𑐵𑐞 𑐫𑐵𑐂 𑐢𑐫𑐵𑐐𑐸 𑐖𑐣𑐰𑐶𑐱𑑂𑐰𑐵𑐳 𑐏𑑅 𑑋

𑐮𑐶𑐔𑑂𑐕𑐰𑐷𑐎𑐵𑐮𑐫𑑂 𑐐𑐠𑐾 𑐰𑐵 𑐩𑐰𑐫𑐵𑑅 𑐴𑐵𑐴𑐵𑐎𑐵𑐬 𑐖𑐸𑐂𑐐𑐸 𑐏𑑅 𑐀𑐠𑐾 𑐴𑐾 𑐩𑐮𑑂𑐮𑐎𑐵𑐮𑐫𑑂 𑐣𑑄 𑐂𑐮𑐫𑑂𑐧𑑂𑐫𑐮𑐫𑑂 𑐀𑐣𑐵𑐰𑐺𑐲𑑂𑐚𑐶 𑐖𑐸𑐫𑐵𑑅 𑐴𑐵𑐴𑐵𑐎𑐵𑐬 𑐖𑐹𑐐𑐸 𑐏𑐣𑐾𑐡𑐸 𑑋 𑐠𑐠𑐾 𑐩𑐮𑑂𑐮𑐎𑐵𑐮𑐫𑑂 𑐮𑐶𑐏𑐶𑐟 𑐬𑐸𑐥𑑄 𑐰𑐵 𑐩𑐰𑐫𑐵𑑅 𑐴𑐵𑐴𑐵𑐎𑐵𑐬 𑐖𑐹𑐐𑐸 𑐄𑐮𑑂𑐮𑐾𑐏 𑐖𑐹𑐐𑐸 𑐢𑐫𑐵𑐐𑐸 𑐖𑐸𑐖𑐸 𑐀𑐨𑐫 𑐩𑐮𑑂𑐮𑐫𑐵 𑐂𑐮𑐫𑑂 𑐏𑑅 𑑋 𑐏 𑐮𑐵 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷𑐂 𑐀𑐨𑐫 𑐩𑐮𑑂𑐮𑐫𑐵 𑐂𑐮𑐫𑑂 𑐰𑐵 𑐩𑐰𑐫𑐵𑑅 𑐴𑐵𑐴𑐵𑐎𑐵𑐬 𑐖𑐸𑐮 𑐢𑐫𑐵𑐐𑐸 𑐄𑐮𑑂𑐮𑐾𑐏 𑐩𑐡𑐸, 𑐄𑐐𑐸 𑐰𑑄𑐱𑐵𑐰𑐮𑐷 𑐣𑐾.𑐳𑑄. 𑑓𑑗𑑕 𑐁𑐲𑐵𑐝 𑐱𑐸𑐎𑑂𑐮 𑐟𑐺𑐟𑐶𑐫𑐵 𑐎𑐸𑐣𑑂𑐴𑐸 𑐟𑐳𑐎𑑄 𑐨𑐸𑐏𑐵𑐫𑑂 𑐧𑑂𑐰𑐮, 𑐰𑐴𑐾 𑐨𑐸𑐏𑐵𑐔𑑄 𑐖𑐸𑐖𑐸 𑐣𑑄 𑐮𑑂𑐴𑐵𑐣𑐵𑑅 𑐳𑐶𑐟 𑐣𑐵𑐥𑑄 𑐳𑑂𑐰𑐨𑐵𑐐𑐫𑑂 𑐕𑐨𑐵𑐐 𑐩𑐣𑐹𑐟 𑐣𑑄 𑐳𑐶𑐟 𑐢𑐫𑐵𑐐𑐸 𑐄𑐮𑑂𑐮𑐾𑐏 𑐡𑐸 (𑐬𑐾𑐐𑑂𑐩𑐷 𑑅 𑑑𑑙𑑖𑑖–𑑑𑑓𑑒) 𑑋 𑐟𑐬 𑐎𑐾𑐱𑐬 𑐰𑑄𑐱𑐵𑐰𑐮𑐷𑐂 𑐢𑐵𑑅𑐳𑐵 𑐖𑐸𑐖𑐸 𑐀𑐨𑐫 𑐩𑐮𑑂𑐮𑐫𑐵 𑐂𑐮𑐫𑑂 𑐟𑐳𑐎𑑄 𑐨𑐸𑐏𑐵𑐫𑑂 𑐣𑑄 𑐧𑑂𑐰𑐮, 𑐀𑐣𑐵𑐰𑐺𑐲𑑂𑐚𑐶 𑐣𑐵𑐥𑑄 𑐩𑐴𑐵𑐩𑐵𑐬𑐷, 𑐰 𑐥𑑂𑐬𑐖𑐵𑐎𑑂𑐲𑐫 𑐖𑐸𑐮 𑐢𑐎𑐵𑑅 𑐠𑐸𑐎𑐠𑑄 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐏𑐣𑐾𑐡𑐸, ‘𑐬𑐵𑐖𑐵 𑐱𑑂𑐬𑐷 𑐀𑐨𑐫 𑐩𑐮𑑂𑐮𑐡𑐾𑐰 𑐰𑐬𑑂𑐲 𑑔𑑘 𑐩𑐵𑐳 𑑒 𑑋 𑐩𑐴𑐵𑐩𑐵𑐬𑐷 𑐀𑐣𑐵𑐰𑐺𑐲𑑂𑐚𑐶 𑐡𑐸𑐬𑑂𑐨𑐶𑐎𑑂𑐲 𑐥𑑂𑐬𑐖𑐵𑐎𑑂𑐲𑐫 𑐨𑐹𑐩𑐶𑐎𑐩𑑂𑐥 𑐕𑐟𑑂𑐬𑐨𑐒𑑂𑐐 𑑋𑑋’ (𑐬𑐾𑐐𑑂𑐩𑐷 𑑅 𑑑𑑙𑑖𑑖–𑑑𑑖𑑑) 𑐟𑐬 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷 𑐰 𑐠𑐸𑐐𑐸 𑐰𑑄𑐱𑐵𑐰𑐮𑐷 𑐨𑐸𑐏𑐵𑐔𑑄 𑐮𑑂𑐴𑐵𑐣𑐵𑑅 𑐖𑐸𑐖𑐸 𑐀𑐨𑐫 𑐩𑐮𑑂𑐮 𑐳𑐶𑐟 𑐢𑐎𑐵𑑅 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐕𑐵𑐫𑑂𑐢𑐵𑑅𑐳𑐵 ‘𑐕𑐟𑑂𑐬𑐨𑐒𑑂𑐐’ 𑐢𑐎𑐵𑑅 𑐄𑐮𑑂𑐮𑐾𑐏 𑐢𑐫𑐵𑐐𑐸 𑐖𑐸𑐖𑐸 𑐩𑑄𑐟 𑐢𑐵𑑅𑐐𑐸 𑐏𑑅 𑑋 𑐨𑐸𑐏𑐵𑐫𑑂 𑐧𑑂𑐰𑐂𑐐𑐸 𑐢𑐫𑐵𑐐𑐸 𑐥𑑂𑐬𑐎𑑀𑐥 𑐏𑑅 𑑋

𑐮𑐶𑐔𑑂𑐕𑐰𑐷 𑐀𑐨𑐶𑐮𑐾𑐏𑐫𑑂 𑐐𑐣𑑄 𑐣𑑄 𑐨𑐸𑐏𑐵𑐫𑑂 𑐧𑑂𑐰𑐫𑐵𑑅 𑐠𑐠𑐾 𑐖𑐸𑐮 𑐢𑐎𑐵𑑅 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐏𑐣𑐾𑐩𑐡𑐸 𑑋 𑐀𑐠𑐾 𑐩𑐡𑐸𑐳𑐵𑑄 𑐨𑐸𑐏𑐵𑐫𑑂𑐫𑐵 𑑑𑑑 𑐣𑑄 𑐮𑐵𑐣𑐵𑐔𑑂𑐰𑑄𑐐𑐸 𑐣𑐾𑐥𑐵𑑅𑐫𑐵 𑐮𑐶𑐔𑑂𑐕𑐰𑐷𑐎𑐵𑐮𑐫𑐵 𑐏𑐸𑐳𑑅 𑐣𑑂𑐴𑐫𑐳𑑅 𑐡𑑃𑐫𑐵 𑐡𑐸𑐣𑐾 𑐕𑐎𑑅 𑐴𑐾 𑐨𑐸𑐏𑐵𑐫𑑂 𑐩𑐧𑑂𑐰𑑅𑐐𑐸 𑐏𑐂𑐩𑐏𑐸 𑑋 𑐏𑐵𑐳 𑐏𑑃 𑐮𑐵 𑐕𑐸 𑐢𑐵𑑅𑐳𑐵 𑐮𑐶𑐔𑑂𑐕𑐰𑐷 𑐂𑐮𑐫𑑂 𑐳𑑂𑐠𑐵𑐥𑐣𑐵 𑐫𑐵𑐣𑐵𑐟𑑅𑐐𑐸 𑐀𑐨𑐶𑐮𑐾𑐏 𑐢𑐫𑐵𑐐𑐸 𑐱𑐵𑐳𑐣 𑐟𑐴𑑄 𑐖𑐵𑐬𑐷 𑐫𑐵𑐣𑐵𑐟𑑅𑐐𑐸 𑐁𑐡𑐾𑐱, 𑐣𑐶𑐫𑐩, 𑐱𑐵𑐳𑐣𑐟𑐴𑑄 𑐟𑑅𑐐𑐸 𑐢𑐵𑐬𑑂𑐩𑐶𑐎 𑐎𑐺𑐟𑐶 𑐰 𑐖𑐣𑐟𑐵𑑄 𑐡𑐫𑐾𑐎𑐷𑐐𑐸 𑐡𑐾𑐐𑑅, 𑐴𑐶𑐟𑐶, 𑐥𑐵𑐚𑐷, 𑐥𑑁𑐰𑐵𑐫𑐵 𑐰𑐬𑑂𑐞𑐣 𑐏𑑅 𑑋 𑐠𑑂𑐰 𑐖𑐎 𑐨𑐶𑑄𑐖𑑂𑐫𑐵 𑐏𑑅 𑑋 𑐨𑐶𑑄𑐖𑑂𑐫𑐵𑐫𑐵 𑐄𑐮𑑂𑐮𑐾𑐏 𑐏𑑅 𑑋 𑐩𑐨𑐶𑑄 𑐏𑑃 𑐄𑐮𑑂𑐮𑐾𑐏 𑐡𑐂𑐩𑐏𑐸 𑑋 𑐨𑐸𑐏𑐵𑐫𑑂𑐫𑐵𑐟 𑐩𑐨𑐶𑑄𑐫𑐵 𑐬𑐸𑐥𑑄 𑐎𑐵𑐂𑐐𑐸 𑐏𑑅 𑑋 𑐄𑐎𑐶𑑄 𑐮𑐶𑐔𑑂𑐕𑐰𑐷𑐎𑐵𑐮𑐫𑑂 𑐐𑐸𑐐𑐸𑑄 𑐣𑑄 𑐀𑐨𑐶𑐮𑐾𑐏𑐫𑑂 𑐨𑑂𑐰𑐏𑐵𑐫𑑂𑐫𑐵 𑐄𑐮𑑂𑐮𑐾𑐏 𑐩𑐖𑐹𑐐𑐸 𑐏𑑅 𑐢𑐵𑐫𑐾𑐦𑐸 𑑋

𑐩𑐮𑑂𑐮𑐎𑐵𑐮𑐫𑐵 𑐩𑐢𑑂𑐫𑐂𑐮𑐫𑑂 𑐣𑑄 𑐣𑐾𑐥𑐵𑐮𑐫𑑂 𑐰𑐵 𑐩𑐰𑐫𑐵𑑅 𑐴𑐵𑐴𑐵𑐎𑐵𑐬 𑐖𑐹𑐐𑐸 𑐰 𑐄𑐎𑐶𑐫𑐵 𑐣𑐶𑐰𑐵𑐬𑐞 𑐮𑐵𑐐𑐶 𑐟𑐣𑑂𑐟𑑂𑐬 𑐱𑐵𑐳𑑂𑐟𑑂𑐬𑐫𑐵 𑐴𑐾 𑐧𑑅 𑐎𑐫𑐵𑑅 𑐰𑐵 𑐰𑐫𑐾𑐎𑐹𑐐𑐸 𑐏𑐣𑐾𑐡𑐸 𑑋 𑐩𑐮𑑂𑐮𑐎𑐵𑐮𑐫𑐵 𑐂𑐟𑐶𑐴𑐵𑐳𑐫𑑂 𑐠𑑅𑐫𑐵𑐟 𑐠𑐩𑑂𑐴𑑄 𑐎𑐰𑐶𑐖𑐸𑐥𑐶𑑄𑐳𑑄 𑐩𑐢𑑂𑐫𑐾 𑐡𑐎𑐮𑐫𑑂 𑐟𑑅𑐢𑑄𑐩𑑂𑐴 (𑐎𑐰𑐶𑐣𑑂𑐡𑑂𑐬), 𑐱𑐳𑑂𑐟𑑂𑐬 𑐰𑐶𑐡𑑂𑐫𑐵𑐫𑑂 𑐖𑐎 𑐩𑐏𑐸, 𑐀𑐣𑐾𑐎 𑐱𑐵𑐳𑑂𑐟𑑂𑐬 𑐳𑑄𑐐𑐷𑐟, 𑐣𑐺𑐟𑑂𑐫 𑐰 𑐟𑐣𑑂𑐟𑑂𑐬 𑐱𑐵𑐳𑑂𑐟𑑂𑐬𑐫𑑂 𑐳𑐩𑐾𑐟 𑐠𑑅𑐫𑐵𑐟 𑐠𑑅𑐩𑑂𑐴𑑄 𑐡𑐵𑐰𑐵 𑐳𑐵𑐠 𑐱𑐶𑐮𑐵𑐥𑐟𑑂𑐬, 𑐀𑐣𑐾𑐎 𑐮𑐶𑐏𑐶𑐟 𑐡𑐳𑑂𑐟𑐵𑐰𑐾𑐖𑐫𑑂 𑐳𑑅𑐳𑑂𑐫𑐹 𑐢𑐎𑐵𑑅 𑐄𑐮𑑂𑐮𑐾𑐏 𑐫𑐵𑐣𑐵𑐰𑑄𑐩𑑂𑐴 𑐩𑐮𑑂𑐮 𑐖𑐸𑐖𑐸 𑐢𑐫𑐵𑐩𑑂𑐴 𑐥𑑂𑐬𑐟𑐵𑐥 𑐩𑐮𑑂𑐮 𑐏𑑅 𑑋 𑐠𑑅𑐐𑐸 𑐥𑑂𑐬𑐳𑐳𑑂𑐟𑐶𑐂 𑐳𑐸𑑄 𑐣𑑄 𑐩𑐮𑑂𑐮 𑐖𑐸𑐖𑐸𑐥𑐶𑑄𑐳𑑄 𑐩𑐫𑐵𑑅𑐎𑐠𑑄 𑐠𑑅𑐫𑐵𑐟 𑐠𑐩𑑂𑐴𑑄 𑐥𑑂𑐬𑐟𑐵𑐥 𑐩𑐮𑑂𑐮𑑄 𑐠𑐸𑐎𑐠𑑄 𑐄𑐮𑑂𑐮𑐾𑐏 𑐫𑐵𑑅𑐐𑐸 𑐏𑐣𑐾𑐡𑐸, ‘𑐌𑑄 𑐳𑑂𑐰𑐳𑑂𑐟𑐶 𑑋𑑋 𑐱𑐵𑐳𑑂𑐟𑑂𑐬 𑐱𑐵𑐳𑑂𑐟𑑂𑐬 𑐳𑑄𑐐𑐷𑐟𑐵𑐡𑐶 𑐳𑐎𑐮 𑐰𑐶𑐡𑑂𑐫𑐵𑐥𑐵𑐬𑑄𑐐𑐟 𑐩𑐴𑐵𑐬𑐵𑐖𑐵𑐢𑐶𑐬𑐵𑐖 𑐣𑐾𑐥𑐵𑐮𑐾𑐱𑑂𑐰𑐬 𑐰𑐶𑐡𑐐𑑂𑐢 𑐔𑐸𑐜𑐵𑐩𑐞𑐶 𑐳𑐎𑐮𑐬𑐵𑐖 𑐔𑐎𑑂𑐬𑐵𑐢𑐷𑐱𑑂𑐰𑐬 𑐱𑑂𑐬𑐷𑐱𑑂𑐬𑐷 𑐬𑐵𑐖𑐬𑐵𑐖𑐾𑐣𑑂𑐡𑑂𑐬 𑐎𑐰𑐷𑐣𑑂𑐡𑑂𑐬 𑐖𑐫𑐥𑑂𑐬𑐟𑐵𑐥 𑐩𑐮𑑂𑐮 𑐥𑐬𑐩𑐨𑐚𑑂𑐚𑐵𑐬𑐎 𑐡𑐾𑐰’ 𑐔𑑂𑐰𑐫𑐵𑐟𑑅𑐐𑐸 𑐏𑐣𑐾𑐡𑐸 𑑋

𑐥𑑂𑐬𑐟𑐵𑐥 𑐩𑐮𑑂𑐮𑐫𑐵 𑐂𑐮𑐫𑑂 𑐰𑐫𑐵 𑐡𑐬𑐰𑐵𑐬𑐫𑑂 𑐖𑑂𑐘𑐵𑐣𑐵𑐣𑐣𑑂𑐡 𑐰 𑐮𑐩𑑂𑐧𑐎𑐬𑑂𑐞 𑐨𑐚𑑂𑐚𑐥𑐶𑑄 𑐥𑑂𑐬𑐳𑐶𑐡𑑂𑐢 𑐟𑐵𑐣𑑂𑐟𑑂𑐬𑐶𑐎𑐟 𑐏𑐣𑐾𑐡𑐸 (𑐱𑐬𑑂𑐩𑐵 𑑅𑑒𑑐𑑒𑑗–𑑒𑑖𑑙) 𑑋 𑐠𑑅𑐟 𑐠𑑅𑐩𑑂𑐴𑑄 𑐳𑐵𑐥 𑐴𑐾 𑐰𑐶𑐡𑑂𑐰𑐵𑐣 𑐰 𑐀𑐮𑑁𑐎𑐶𑐎 𑐠𑐾𑐾𑑄𑑄 𑐟𑐵𑐫𑐾𑐎𑐷𑐩𑑂𑐴 𑐖𑐸𑐖𑐸 𑐥𑑂𑐬𑐟𑐵𑐥 𑐩𑐮𑑂𑐮𑑄 𑐠𑑅 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐬𑐰𑐵𑐬 (𑐮𑐵𑐫𑑂𑐎𑐹)𑐫𑐵 𑐣𑐵𑑄 𑐴𑐾 𑐴𑐶𑐂𑐎𑐹𑐐𑐸 𑐣𑑄 𑐏𑐣𑐾𑐡𑐸 𑑋 𑐕𑐵𑐫𑑂𑐢𑐵𑑅𑐳𑐵 𑐴𑐣𑐸𑐩𑐵𑐣𑐢𑑂𑐰𑐵𑐏𑐵 𑐡𑐬𑐧𑐵𑐬𑐫𑐵 𑐣𑐵𑑄 𑐥𑑂𑐬𑐟𑐵𑐥 𑐩𑐮𑑂𑐮 𑐳𑑂𑐰𑐫𑐵𑑄 𑐣𑑂𑐴𑐵𑐥𑐵 ‘𑐐𑐸𑐞𑐥𑑀 𑐮𑐵𑐫𑑂𑐎𑐹 𑐢𑐵𑐂𑐐𑐸 𑐏𑑅 𑑋 ‘𑐐𑐸𑐞𑐥𑑀’ 𑐢𑐎𑐵𑑅 𑐣𑐵𑑄𑐖𑐵𑐫𑐵𑐔𑑂𑐰𑑄𑐐𑐸 𑐡𑐬𑐧𑐵𑐬𑐫𑐵 𑐩𑐹 𑐮𑐸𑐏𑐵𑐫𑑂 𑐥𑐶𑐴𑐵𑑄 𑐰𑐫𑐾𑐧𑐮𑐫𑑂 𑐖𑑅𑐥𑐵𑑅𑐥𑐵𑐏𑐾 𑐰𑐶𑐱𑐵𑐮 𑐴𑐣𑐸𑐩𑐵𑐣 𑐳𑑂𑐠𑐵𑐥𑐣𑐵 𑐫𑐵𑐳𑐾𑑄𑐮𑐶 ‘𑐐𑐸𑐞𑐥𑑀’ 𑐮𑐵𑐫𑑂𑐎𑐹𑐫𑐵 𑐠𑐵𑐳𑐫𑑂 ‘𑐴𑐣𑐸𑐩𑐵𑐣𑐢𑑂𑐰𑐵𑐏𑐵’ 𑐮𑐵𑐫𑑂𑐎𑐹 𑐢𑐎𑐵𑑅 𑐥𑑂𑐬𑐏𑑂𑐫𑐵𑐟 𑐖𑐹𑐰𑑄𑐐𑐸 𑐏𑑅 𑑋 𑐀𑐠𑐾 𑐳𑑂𑐠𑐵𑐥𑐣𑐵 𑐫𑐵𑑅𑐩𑑂𑐴 𑐰𑐶𑐱𑐵𑐮 𑐴𑐣𑐸𑐩𑐵𑐣𑐫𑐵 𑐩𑐹𑐬𑑂𑐟𑐶𑐫𑐵𑐟 𑐄𑐐𑐸 𑐃𑐫𑐵 𑐮𑐵𑐫𑑂𑐎𑐹 𑐟𑐵𑐣𑑂𑐟𑑂𑐬𑐶𑐎 𑐮𑐩𑑂𑐧𑐎𑐬𑑂𑐞 𑐨𑐚𑑂𑐚𑑄 𑐟𑐣𑑂𑐟𑑂𑐬𑐱𑐵𑐳𑑂𑐟𑑂𑐬 𑐀𑐣𑐸𑐳𑐵𑐬 𑐳𑐵𑐢𑐣 𑐫𑐵𑐣𑐵𑑅 𑐴𑐣𑐸𑐩𑐵𑐣𑐫𑐵𑐟 𑐖𑐵𑐐𑐾 𑐫𑐵𑐣𑐵𑑅 𑐮𑐜𑑂𑐜𑐸 𑐣𑐎𑐹𑐐𑐸 𑐰𑑄𑐱𑐵𑐰𑐮𑐷𑐂 𑐄𑐮𑑂𑐮𑐾𑐏 𑐏𑐣𑐾𑐡𑐸 (𑐫𑑀𑐐𑐷 𑑅 𑑒𑑐𑑑𑑓–𑑘𑑓) 𑑋