𑐣𑐾𑐥𑐵𑐮 𑐮𑐶𑐥𑐶 𑐣𑐾𑐥𑐵𑑅𑐫𑐵 𑐣𑐶𑐟𑐶𑑄 𑐐𑑁𑐬𑐰𑐫𑐵 𑐥𑑂𑐬𑐟𑐶𑐎

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑓 𑐔𑐿𑐟𑑂𑐬 𑑑𑑙, 𑐱𑐣𑐶𑐧𑐵𑐬 𑑑𑑒:𑑒𑑐:𑑕𑑐

– 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬 –

𑐔𑐷𑐣 𑐳“𑐫𑑂𑐨𑐵𑐫𑑂 𑐏𑐮𑑅𑐫𑐵 𑐣𑑂𑐫𑐵𑐐𑐹 𑐮𑐶𑐥𑐶𑐰𑐡𑑂𑐢 𑐡𑐳𑐶 𑐡𑐸𑐐𑐸 𑐨𑐵𑐫𑑂 𑐩𑐢𑑂𑐫𑐾 𑐣𑐾𑐥𑐵𑐮𑐨𑐵𑐲𑐵 𑐣𑑄 𑐕𑐐𑐹 𑐏𑑅 𑑋 𑐣𑐾𑐥𑐵𑐮 𑐮𑐶𑐥𑐶 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐶𑐟𑐶𑑄 𑐖𑐎 𑐐𑑁𑐬𑐰𑐫𑐵 𑐧𑐶𑐲𑐫 𑐩𑐖𑐸𑐳𑐾 𑐣𑐾𑐥𑐵𑑅𑐫𑐵 𑐣𑐶𑐟𑐶𑑄 𑐴𑐾 𑐐𑑁𑐬𑐰𑐫𑐵 𑐥𑑂𑐬𑐟𑐶𑐎 𑐖𑐹𑐐𑐸 𑐡𑐸 𑑋 𑐣𑐾𑐥𑐵𑑅 𑐡𑐾𑐱𑑄 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑐫𑐵 𑐡𑐸𑐖𑑅 𑐖𑐸𑐂𑐟 𑐂𑐣𑐵𑐥 𑐥𑑁 𑐧𑑂𑐫𑐹𑐧𑐮𑐫𑑂 𑐡𑐾𑐫𑐵 𑐠𑑅𑐐𑐸 𑐮𑐶𑐥𑐶 𑐎𑐠𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵𑐟 𑐥𑑂𑐬𑐳𑑂𑐟𑐸𑐟 𑐫𑐵𑑅𑐐𑐸 𑐏𑑅 𑑋 𑐠𑑁𑑄𑐫𑐵 𑐥𑐬𑐶𑐳𑑂𑐠𑐶𑐵𑐟𑐶𑐂 𑐣𑐾𑐥𑐵𑐮𑐨𑐵𑐲𑐵 𑐩𑐹𑐮𑐟𑑅 𑐡𑐾𑐰𑐣𑐵𑐐𑐬𑐷 𑐮𑐶𑐥𑐶𑑄 𑐖𑐎 𑐔𑑂𑐰𑐫𑐾𑐐𑐸 𑐫𑐵𑑅𑐳𑐵𑑄 𑐥𑑂𑐬𑐵𑐔𑐶𑐣 𑐂𑐮𑐫𑑂 𑐠𑑂𑐰 𑐨𑐵𑐫𑑂𑐫𑐵𑐟 𑐩𑐾𑐩𑐾𑐐𑐸 𑐮𑐶𑐥𑐶 𑐣𑑄 𑐔𑑂𑐰𑐫𑐾𑐐𑐸 𑐖𑐹𑐐𑐸 𑐡𑐸 𑑋 𑐥𑑂𑐬𑐵𑐔𑐶𑐣𑐎𑐵𑐮𑑄 𑐣𑐶𑐳𑐾𑑄 𑐴𑐾 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐤𑑂𑐫𑐵𑐐𑐸 𑐖𑑂𑐫𑐵𑐏“𑐫𑐵𑐟 𑐣𑑄 𑐮𑐶𑐥𑐶𑐰𑐡𑑂𑐢 𑐫𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸, 𑐔𑐵𑐴𑐾 𑐎𑐬𑑂‍𑐩𑐎𑐵𑐞𑑂𑐜𑐫𑐵 𑐖𑑂𑐫𑐵𑐫𑑂 𑐖𑐸𑐂𑐩𑐵, 𑐔𑐵𑐴𑐾 𑐰𑐵𑐳𑑅𑐟𑐵𑐳𑑅 𑐖𑑂𑐫𑑀𑐟𑐶𑐲𑐷 𑐁𑐡𑐶𑐫𑐵 𑐖𑑂𑐫𑐵𑐫𑑂 𑐖𑐸𑐂𑐩𑐵 𑑋 𑐠𑐠𑐾 𑐣𑐾𑐥𑐵𑐮𑐨𑐵𑐲𑐵𑑄 𑐥𑑂𑐬𑐵𑐔𑐶𑐣𑐎𑐵𑐮𑐫𑑂 𑐔𑑂𑐰𑐖𑑂𑐫𑐵𑐫𑑂 𑐕𑑂𑐫𑑅𑐐𑐸 𑐮𑐶𑐥𑐶 𑑅 𑐐𑑀𑐮𑐩𑑀𑐮, 𑐮𑐶𑐟𑑂𑐟𑐸𑐩𑑀𑐮 𑐥𑐵𑐔𑐸𑐩𑑀𑐮, 𑐎𑑂𑐰𑑄𑐩𑑀𑐮, 𑐴𑐶𑑄𑐩𑑀𑐮, 𑐎𑐸𑑄𑐩𑑀𑐮, 𑐬𑐘𑑂𑐖𑐣𑐵, 𑐨𑐸𑐖𑐶𑑄𑐩𑑀𑐮 𑐰 𑐥𑑂𑐬𑐔𑐮𑐶𑐟 𑐮𑐶𑐥𑐶 𑐏𑑅 𑑋 𑐟𑐬 𑐠𑐠𑐾 𑐟𑑅𑐐𑐸 𑐎𑐠𑑄𑐫𑐵 𑐮𑐶𑐥𑐶𑐫𑐵 𑐥𑑂𑐬𑐫𑑀𑐐 𑐖𑐹𑐳𑐵𑑄 𑐰𑐶𑐱𑐾𑐲 𑐀𑐨𑐶𑐮𑐾𑐏 𑐐𑑂𑐬𑐣𑑂𑐠 𑐔𑑂𑐰𑐖𑑂𑐫𑐵𑐫𑑂 𑐥𑑂𑐬𑐔𑐮𑐶𑐟, 𑐨𑐸𑐖𑐶𑑄𑐩𑑀𑐮 𑐰 𑐬𑐘𑑂𑐖𑐣𑐵 𑐮𑐶𑐥𑐶 𑐴𑐾 𑐕𑑂𑐫𑐮𑐾𑐐𑐸 𑐖𑐹𑐐𑐸 𑐡𑐸 𑑋 𑐮𑐶𑐥𑐶 𑐰𑐶𑐎𑐵𑐳𑐫𑐵 𑐨𑑂m𑐰𑐮𑐫𑑂 𑐗𑐷 𑐥𑐹𑐬𑑂‍𑐰𑐖 𑐮𑐶𑐥𑐶𑐎𑐵𑐬𑐟𑐫𑑂𑐳𑑄 𑐣𑐶𑐟𑐵 𑐏“ 𑐎𑑂𑐰𑐵𑐟𑐸𑐎 𑐖𑑂𑐰𑑄𑐐𑐸 𑐳𑐷 𑐡𑐸 –𑑑) 𑐰𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐾 𑐕𑐶𑑄𑐐𑐸, 𑐳𑑂𑐥𑐲𑑂𑐚𑐐𑐸, 𑐔𑑂𑐰𑐫𑐾 𑐧𑑂𑐰𑐣𑐾 𑐀𑑅𑐥𑐸𑐐𑐸, 𑑒) 𑐠𑑅𑐥𑐶𑐣𑐶𑐐𑐸 𑐖𑐵𑐟𑐶𑐫 𑐎𑐮𑐵 𑐱𑐶𑐮𑑂𑐥𑐫𑐵 𑐥𑐴𑐶𑐔𑐵𑐣 𑐖𑐹𑐂𑐐𑐸 𑐎𑐮𑐵𑐥𑐹𑐬𑑂‍𑐞 𑐱𑐿𑐮𑐷𑐫𑐵𑐐𑐸 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐥𑑂𑐬𑐵𑐔𑐷𑐣 𑐂𑐮𑐫𑑂 𑐣𑐾𑐥𑐵𑑅𑐐𑐵𑐮𑐫𑑂 𑐧𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐾𑐟 𑐕𑐶𑑄𑐐𑐸 𑐀𑑅𑐥𑐸𑐐𑐸 𑐨𑐸𑐖𑐶𑑄𑐩𑑀𑐮 𑐰 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐧𑑂𑐫𑐵𑐥𑐎 𑐥𑑂𑐬𑐔𑐮𑐣 𑐖𑐹𑐐𑐸 𑐡𑐸𑐳𑐵, 𑐳𑑂𑐰𑐫𑐾 𑐴𑐾 𑐫𑐂𑐥𑐸𑐳𑐾 𑐔𑑂𑐰𑑄𑐐𑐸 𑐎𑐮𑐵𑑄 𑐕𑐵𑐫𑑂𑐥𑑂𑐫𑐹𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶𑐂 𑐢𑐵𑑅𑐳𑐵 𑐣𑐾𑐥𑐵𑐮 𑐰 𑐣𑐾𑐥𑐵𑐮𑑄 𑐥𑐶𑐣𑐾 𑐣𑑄 𑐩𑐵𑑄𑐐𑐮𑐶𑐎 𑐖𑑂𑐫𑐵𑐏“𑐫𑑂 𑐠𑐵𑐫𑑂 𑐎𑐫𑐵𑑅 𑐠𑐵𑐟𑑄 𑐔𑑂𑐰𑐣𑐾 𑐦𑐫𑐵𑐰𑑄 𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐥𑑂𑐬𑐵𑐔𑐶𑐣 𑐀𑐨𑐶𑐮𑐾𑐏𑐫𑑂 𑐣𑐾𑐥𑐵𑐮𑐨𑐵𑐲𑐵, 𑐣𑐾𑐥𑐵𑐮 𑐳𑑄𑐰𑐟𑑂 𑐢𑐎𑐵𑑅 𑐤𑑂𑐫𑐠𑐣𑐵𑐟𑑅𑐠𑐾𑑄 𑐣𑐾𑐥𑐵𑐮 𑐮𑐶𑐥𑐶 𑐰𑐵 𑐬𑐘𑑂𑐖𑐣𑐵 𑐮𑐶𑐥𑐶 𑐁𑐡𑐶𑐫𑐵 𑐣𑐵𑑄 𑐤𑑂𑐠𑐣𑐵𑐟𑑅𑐐𑐸 𑐄𑐮𑐶 𑐏𑐣𑐾𑐩𑐡𑐸 𑑋 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷𑐫𑐵 𑑒𑑒 (𑐎) 𑐥𑐟𑐶𑐂, 𑐱𑑂𑐬𑐷 𑐨𑐹𑐩𑐶𑐐𑐸𑐥𑑂𑐟𑐫𑐵 𑐥𑐟𑐶𑐂 𑐣𑐾𑐥𑐵𑐮𑐫𑑂 𑐐𑑀𑐮𑐣𑐵𑐩 𑐀𑐎𑑂𑐲𑐬 𑐥𑑂𑐬𑐰𑐟𑑂𑐬𑑂‍𑐟𑐟𑐾 𑐢𑐎𑐵𑑅 𑐔𑑂𑐰𑐫𑐵𑐟𑑅𑐐𑐸 𑐰 𑐫𑐾“𑐫𑐵 𑐖𑐸𑐖𑐸 𑐎𑐰𑐶𑐣𑑂𑐡𑑂𑐬 𑐖𑐫𑐥𑑂𑐬𑐟𑐵𑐥 𑐩𑐮𑑂𑐮𑐫𑐵 𑐴𑐣𑐸𑐩𑐵𑐣𑐢𑑂𑐰𑐵𑐏𑐵 𑐮𑐵𑐫𑑂𑐎𑐹 𑐖𑑅𑐢𑐸𑑄𑐫𑐵 𑐣𑐾.𑐳𑑄𑑄. 𑑗𑑗𑑔 𑐫𑐵 𑐀𑐨𑐶𑐮𑐾𑐏𑐫𑑂 𑐡𑐎𑐮𑐫𑑂 𑐤𑐵𑐥𑐵𑑄 𑐐𑑀𑐮𑐩𑑀𑐮 𑐁𑐏𑐬 𑐢𑐎𑐵𑑅 𑐤𑑂𑐫𑐠𑐣𑐵𑐟𑑅𑐐𑐸 𑐕𑐸𑑄 𑐨𑐔𑐵 𑐏𑐣𑐾𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐮𑐶𑐥𑐶𑐫𑐵 𑐰𑐶𑐎𑐵𑐳𑐎𑑂𑐬𑐩 𑐧𑐵𑐬𑐾 𑐮𑐶𑐥𑐶 𑐰𑐶𑐱𑐾𑐲𑐖𑑂𑐘𑐥𑐶𑐣𑐶𑐐𑐸 𑐧𑐶𑐔𑐵𑑅 𑐢𑐵𑑅𑐳𑐵 𑐕𑐸𑑄 𑐨𑐔𑐵𑑅 𑐥𑐵𑑅𑐐𑐸 𑐏𑐣𑐾𑐡𑐸 𑑋 𑐥𑑂𑐬𑐳𑐶𑐡𑑂𑐢 𑐮𑐶𑐥𑐶 𑐰𑐶𑐱𑐾𑐲𑐖𑑂𑐘 𑐱𑑄𑐎𑐬𑐩𑐵𑐣 𑐬𑐵𑐖𑐰𑑄𑐱𑐷𑐫𑐵 𑐢𑐵𑐥𑐹𑐎𑐠𑑄 𑐮𑐶𑐔𑑂𑐕𑐰𑐶 𑐮𑐶𑐥𑐶𑐫𑐵 𑐮𑐶𑐄 𑐥𑑂𑐬𑐵𑐔𑐷𑐣 𑐣𑐾𑐰𑐵𑑅 𑐮𑐶𑐥𑐶 𑐮𑐹𑐐𑐸 𑐏𑑅 𑑋 𑐥𑑂𑐬𑐵𑐔𑐶𑐣 𑐣𑐾𑐥𑐵𑐮 𑐮𑐶𑐥𑐶𑑄 𑐴𑐾 𑐨𑐸𑐖𑐶𑑄𑐩𑑀𑐮, 𑐎𑐸𑑄𑐩𑑀𑐮, 𑐥𑐵𑐔𑐸𑐩𑑀𑐮 𑐮𑐶𑐥𑐶 𑐕𑐳𑐶𑐎𑐠𑑄 𑐰𑐶𑐎𑐵𑐳 𑐖𑐸𑐖𑐸𑑄 𑐰𑑅𑐐𑐸 𑐏𑑅 𑑋 𑐟𑐬 𑐂𑐟𑐶𑐴𑐵𑐳𑐎𑐵𑐬 𑐜𑐶𑐮𑑂𑐮𑐷𑐬𑐩𑐞 𑐬𑐾𑐐𑑂𑐩𑐷, 𑐮𑐶𑐥𑐶 𑐰𑐶𑐱𑐾𑐲𑐖𑑂𑐘 𑐴𑐾𑐩𑐬𑐵𑐖 𑐱𑐵𑐎𑑂𑐫𑐥𑐶𑑄𑐳𑑄 𑐢𑐵𑑅𑐳𑐵 𑐄𑐟𑑂𑐟𑐬 𑐮𑐶𑐔𑑂𑐕𑐰𑐶 𑐮𑐶𑐥𑐶𑐫𑐵 𑐮𑐶𑐄 𑐐𑑀𑐮𑐩𑑀𑐮, 𑐨𑐸𑐖𑐶𑑄𑐩𑑀𑐮, 𑐖𑐸𑐫𑐵 𑐟𑐶𑐣𑐶 𑐬𑐘𑑂𑐖𑐣𑐵 𑐰 𑐣𑐾𑐥𑐵𑐮 𑐮𑐶𑐥𑐶 𑐮𑐹𑐐𑐸 𑐏“ 𑐤𑑂𑐫𑐠𑐣𑐵𑐡𑐷𑐐𑐸 𑐡𑐸 𑑋 𑐀𑐠𑐾 𑐴𑐾 𑐐𑐸𑐮𑐶 𑐐𑐸𑐮𑐶𑐳𑑂𑐫𑐵𑑄 𑐎𑐸𑐚𑐶𑐮 𑐮𑐶𑐥𑐶𑐫𑐵 𑐳𑑂𑐰𑑄𑐐𑐹 𑐎𑐔𑐵 𑐩𑐢𑑂𑐫𑐾 𑐣𑐾𑐥𑐵𑐮 𑐮𑐶𑐥𑐶 𑐣𑑄 𑐕𑐐𑐹 𑐏𑑅 (𑐥𑐵𑐛𑐎, 𑐃.𑐳𑑄. 𑑑𑑙𑑖𑑙𑑅𑑗𑑖–𑑘𑑑) 𑐰 𑐠𑑂𑐰 𑐕𑐳𑐶 𑐎𑐠𑑄 𑐬𑐘𑑂𑐖𑐣𑐵, 𑐨𑐸𑐖𑐶𑑄𑐩𑑀𑐮, 𑐰 𑐥𑑂𑐬𑐔𑐮𑐶𑐟 𑐖𑐸𑐫𑐵𑑅 𑐥𑐶𑐡𑑄𑐐𑐸 𑐏𑑅 𑐢𑐫𑐵𑐟𑑅𑐐𑐸 𑐡𑐸 𑑋 𑐥𑑂𑐬𑑀.𑐩𑑀𑐴𑐣𑐬𑐵𑐖 𑐱𑐬𑑂‍𑐩𑐵𑐫𑐵 𑐢𑐵𑐥𑐹 𑐎𑐠𑑄 𑐠𑐸𑐥𑐶𑑄 𑐦𑐸𑐎𑑂𑐎 𑐕𑐐𑐹 𑐴𑐾 𑐮𑐶𑐥𑐶 𑐏𑑅 𑑋 𑐁𑐏𑑅 𑐔𑑂𑐰𑐂𑐧𑐮𑐫𑑂 𑐠𑐸𑐩𑐶𑐐𑐸 𑐕𑑂𑐫𑑄 (𑐩𑑀𑐮) 𑐰𑐶𑐨𑐶𑐣𑑂𑐣 𑐎𑐠𑑄 𑐟𑐂𑐐𑐸 𑐖𑐹𑐐𑐸𑐮𑐶𑑄 𑐖𑐎 𑐠𑐸𑐩𑐶𑐐𑐸 𑐠𑐷𑐠𑐷 𑐣𑐵𑑄 𑐖𑐹𑐐𑐸 𑐏𑑅 𑑋 𑐰𑐵𑐳𑑂𑐟𑐰𑐫𑑂 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐧𑐵𑑄𑐮𑐵𑐎 𑐀𑐢𑑂𑐫𑐫𑐣 𑐫𑐵𑐫𑐾𑐧𑐮𑐫𑑂 𑐣𑐾𑐥𑐵𑐮 𑐮𑐶𑐥𑐶 𑐡𑐸𑐣𑐾 𑐮𑐵𑑅𑐐𑐸 𑐠𑐷𑐠𑐷 𑐮𑐶𑐥𑐶𑐫𑐵 𑐣𑐵𑑄 𑐕𑐸𑐣𑐵𑐟𑑅𑐐𑐸 𑐥𑑂𑐬𑐔𑐮𑐶𑐟, 𑐬𑐘𑑂𑐖𑐣𑐵, 𑐨𑐸𑐖𑐶𑑄𑐩𑑀𑐮 𑐁𑐡𑐶 𑐁𑐏𑑅𑐫𑐵 𑐕𑑂𑐫𑑄𑐫𑐵 𑐁𑐎𑐵𑐬 𑐰 𑐧𑐵𑐣𑑂𑐎𑐷 𑐖𑐎 𑐥𑐵𑑅𑐐𑐸 𑐏𑐣𑐾𑐡𑐸 𑑋 𑐄𑐎𑐶𑑄 𑐠𑐸𑐥𑐶𑑄 𑐠𑐷𑐠𑐷 𑐮𑐶𑐥𑐶 𑐩𑐏𑐸𑐳𑐾 𑐕𑐐𑐹 𑐴𑐾 𑐮𑐶𑐥𑐶𑐫𑐵 𑐠𑐷𑐠𑐷 𑐱𑐿𑐮𑐷 𑐏𑑅 𑑋 (𑐳𑑂𑐠𑐵𑐥𑐶𑐟,𑐣𑐾.𑐳𑑄.𑑑𑑑𑑑𑑘 𑑅 𑑑𑑔–𑑑𑑕)
𑐣𑐾𑐥𑐵𑑅𑐫𑐵 𑐮𑐶𑐥𑐶𑐫𑐵 𑐂𑐟𑐶𑐴𑐵𑐳𑐫𑑂 𑐡𑐎𑐮𑐫𑑂 𑐤𑐵𑐥𑐵𑑄 𑐮𑐶𑐥𑐶𑐫𑐵 𑐥𑑂𑐬𑐫𑑀𑐐 𑐡𑐎𑐮𑐫𑑂 𑐤𑐵𑐥𑐵𑑄 𑐮𑐶𑐥𑐶𑐫𑐵 𑐥𑑂𑐬𑐫𑑀𑐐 𑐖𑐹𑐐𑐸 𑐀𑐨𑐶𑐮𑐾𑐏 𑐂.𑐥𑐹.𑑒𑑕𑑕𑐫𑐵 𑐥𑐶𑐥𑑂𑐮𑐶𑐴𑐰𑐵𑐫𑐵 𑐳𑑂𑐟𑐩𑑂𑐨𑐵𑐨𑐶𑐮𑐾𑐏 𑐏𑑅 𑑋 𑐠𑑂𑐰 𑐧𑑂𑐬𑐵𑐪𑐷 𑐮𑐶𑐥𑐶𑑄 𑐔𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐠𑑁𑑄𑐫𑐵 𑐡𑐾𑐰𑐣𑐵𑐐𑐬𑐷 𑐮𑐶𑐥𑐶, 𑐣𑐾𑐥𑐵𑐮 𑐮𑐶𑐥𑐶 𑐁𑐡𑐶 𑐦𑐸𑐎𑑂𑐎𑑄 𑐮𑐶𑐥𑐶𑐫𑐵 𑐴𑐾 𑐎𑐔𑐵𑐩𑐔𑐵 𑐏𑑅 𑑋 𑐂𑐟𑐶𑐴𑐵𑐳𑐎𑐵𑐬 𑐢𑐣𑐰𑐖𑑂𑐬𑐖𑐸𑑄 𑐳𑐩𑑂𑐥𑐵𑐡𑐣 𑐫𑐵𑐣𑐵𑐡𑐶𑐐𑐸 𑐳𑐦𑐸𑐟𑐶𑐂 𑐡𑐸𑐠𑑂𑐫𑐵𑑅𑐐𑐸 𑑑𑑙𑑐 𑐐𑐹 𑐀𑐨𑐶𑐮𑐾𑐏 𑐩𑐢𑑂𑐫𑐾 𑑕𑑓 𑐐𑐹 𑐀𑐨𑐶𑐮𑐾𑐏 𑐐𑐸𑐥𑑂𑐟𑐵 𑐮𑐶𑐥𑐶𑑄 𑐔𑑂𑐰𑐫𑐵𑐟𑑅𑐐𑐸 𑐡𑐸𑐳𑐵 𑑑𑑓𑑗 𑐐𑐹 𑐀𑐨𑐶𑐮𑐾𑐏 𑐎𑐸𑐚𑐶𑐮𑐵 𑐮𑐶𑐥𑐶𑑄 𑐔𑑂𑐰𑐫𑐵𑐟𑑅𑐐𑐸 𑐏𑑅 𑑋 𑐠𑑂𑐰 𑐴𑐾 𑐎𑐸𑐚𑐶𑐮𑐵 𑐮𑐶𑐥𑐶𑐫𑐵 𑐕𑐐𑐹 𑐎𑐔𑐵𑐫𑐵 𑐬𑐸𑐥𑐫𑑂 𑐣𑐾𑐥𑐵𑐮 𑐮𑐶𑐥𑐶 𑐥𑐶𑐡𑐣 𑑋 𑐠𑑁𑑄 𑐣𑐾𑐥𑐵𑐮𑐫𑑂 𑐠𑑂𑐰 𑐴𑐾 𑐣𑐾𑐥𑐵𑐮 𑐮𑐶𑐥𑐶 𑐰𑐶𑐎𑐵𑐳 𑐖𑐸𑐫𑐵𑑅 𑐠𑑂𑐰𑐫𑐵𑐟 𑐕𑑂𑐫𑐮𑐷𑐐𑐸 𑐱𑐿𑐮𑐷 𑐎𑐠𑑄 𑐰𑐶𑐨𑐶𑐣𑑂𑐣 𑐣𑐵𑑄 𑐐𑐠𑐾 𑐨𑐸𑐖𑐶𑑄𑐩𑑀𑐮, 𑐮𑐶𑐟𑑂𑐟𑐸𑐩𑑀𑐮, 𑐐𑑀𑐮𑐩𑑀𑐮 𑐁𑐡𑐶 𑐖𑐹𑐰𑐣 𑑋 𑐠𑐸𑐥𑐶𑑄 𑐮𑐶𑐥𑐶 𑐩𑐢𑑂𑐫𑐾 𑐣𑐾𑐥𑐵𑐮𑐨𑐵𑐲𑐵𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐕𑑂𑐫𑑅𑐐𑐸 𑐮𑐶𑐥𑐶 𑐥𑑂𑐬𑐔𑐮𑐶𑐟 𑐣𑐾𑐥𑐵𑐮 𑐮𑐶𑐥𑐶 𑐏𑑅𑐳𑐵 𑐀𑐣𑑄 𑐮𑐶𑐥𑐵 𑐨𑐸𑐖𑐶𑐩𑑀𑐮 𑐰 𑐬𑐘𑑂𑐖𑐣𑐵 𑐮𑐶𑐥𑐶 𑐏𑑅 𑑋 𑐥𑑂𑐬𑐔𑐮𑐶𑐟 𑐣𑐾𑐥𑐵𑐮 𑐮𑐶𑐥𑐶𑐫𑐵𑐟 𑐣𑐾𑐥𑐵𑐮 𑐮𑐶𑐥𑐶 𑐖𑐎 𑐣𑑄 𑐢𑐵𑐫𑐾𑐐𑐸 𑐫𑐵𑑅 𑑋 𑐀𑐠𑐾 𑐴𑐾 𑐣𑐾𑐥𑐵𑐮 𑐮𑐶𑐥𑐶𑐫𑐵𑐟 𑐣𑐾𑐰𑐵𑑅𑐁𑐏𑑅 𑐣𑑄 𑐢𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐮𑐶𑐥𑐶𑑄 𑐔𑑂𑐰𑐫𑐵𑐟𑑅𑐐𑐸 𑐡𑐎𑐮𑐫𑑂 𑐥𑐸𑐮𑐵𑑄𑐐𑐸 𑐡𑐳𑐸 𑐣𑐾.𑐳𑑄. 𑑒𑑘 𑐳𑐵𑐮𑐫𑐵 𑐮𑑄𑐎𑐵𑐰𑐟𑐵𑐬 𑐏𑑅 𑑋 𑐠𑑂𑐰 𑐧𑐵𑐴𑐾𑐎 𑐩𑐾𑐩𑐾𑐐𑐸 𑐮𑐶𑐥𑐶 𑐄𑐳𑑂𑐟 𑐕𑑂𑐫𑑅𑐐𑐸 𑐩𑐡𑐸 𑑋 𑐣𑐾𑐥𑐵𑐮𑐫𑑂 𑐣𑐾𑐥𑐵𑑅 𑐮𑐶𑐥𑐶𑐫𑐵 𑐰𑐶𑐎𑐵𑐳 𑐟𑐠𑐵 𑐥𑑂𑐬𑐔𑐵𑐬 𑐫𑐵𑐫𑐾𑐐𑐸𑐮𑐶𑐂 𑐧𑑁𑐡𑑂𑐢 𑐀𑐢𑑂𑐫𑐫𑐣 𑐳𑑄𑐳𑑂𑐠𑐵𑐣𑐫𑑂 𑐁𑐎𑑂𑐬𑐩𑐞 𑐖𑐸𑐳𑐾𑑄𑐮𑐶 𑐀𑐣𑐫𑐵 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣𑐟 𑐠𑑅𑐥𑐶𑐣𑐶𑐐𑐸 𑐥𑑂𑐬𑐵𑐔𑐶𑐣 𑐧𑑁𑐡𑑂𑐢 𑐢𑐬𑑂‍𑐩𑐫𑐵 𑐠𑐷𑐠𑐷 𑐐𑑂𑐬𑐣𑑂𑐠 𑐖𑑂𑐰𑐣𑐵𑑅 𑐠𑐸𑐏𑐾𑑄 𑐄𑐏𑐾𑑄 𑐧𑐶𑐳𑑂𑐫𑐸𑑄𑐰𑐣𑐾𑐐𑐸 𑐖𑐸𑐮 𑑋 𑐠𑐠𑐾 𑐴𑐾 𑐧𑐶𑐳𑑂𑐫𑐸𑐰𑐣𑐾𑐐𑐸 𑐨𑑂m𑐰𑐮𑐫𑑂 𑐐𑐸𑐮𑐶𑑄 𑐣𑐾𑐥𑐵𑐮𑐫𑑂 𑐣𑑄 𑐰𑐮 𑑋 𑐮𑐶𑐔𑑂𑐰𑑅𑐎𑐠𑑄 𑐠𑐸𑐩𑐶𑐐𑐸 𑐥𑐵𑐏𑐾𑑄 𑐣𑐾𑐥𑐵𑐮 𑐮𑐶𑐥𑐶𑑄 𑐔𑑂𑐰𑐫𑐵𑐟𑑅𑐐𑐸 𑐳𑐥𑐹m 𑐁𑐥𑐵𑐮𑑄 𑐣𑐾𑐥𑐵𑐮𑐫𑑂 𑐣𑑄 𑐡𑐸𑐴𑐵𑑄𑐰𑐮 𑑋 𑐁𑐢𑐸𑐣𑐶𑐎 𑐣𑐾𑐥𑐵𑐮𑐫𑑂 𑐣𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐟𑐠𑐵 𑐳𑑄𑐬𑐎𑑂𑐲𑐞 𑐳𑐩𑑂𑐰𑐡𑑂𑐬𑑂‍𑐢𑐣𑐫𑐵 𑐖𑑂𑐫𑐵𑐫𑑂 𑐤𑐵𑐥𑐵𑑄 𑐤𑑂𑐫𑐔𑐶𑐄𑐥𑐶𑑄 𑐧𑑁𑐡𑑂𑐢 𑐥𑐞𑑂𑐜𑐶𑐟𑐟 𑐏𑑅 –𑐳𑐶𑐡𑑂𑐢𑐶𑐴𑐬𑑂‍𑐲, 𑐥𑐹𑐬𑑂‍𑐞𑐴𑐬𑑂‍𑐲, 𑐩𑐶𑐟𑑂𑐬𑐵𑐣𑐣𑑂𑐡 𑐁𑐡𑐶 𑑋 𑐰𑐫𑑂𑐎𑑅𑐥𑐶𑑄 𑐥𑐵𑐏𑐾𑑄 𑐴𑐾 𑐳𑐶𑐮𑑂𑐨𑐵 𑐮𑐾𑐨𑐶 𑐠𑐾𑑄 𑐖𑑂𑐫𑐵𑑅𑐥𑐶𑑄 𑐂𑐟𑐶𑐴𑐵𑐳𑐎𑐵𑐬𑐥𑐶𑑄 𑐣𑐫𑐣𑐬𑐵𑐖 𑐥𑐵𑐞𑑂𑐜𑐾, 𑐧𑐵𑐧𑐸𑐬𑐵𑐩 𑐁𑐔𑐵𑐬𑑂‍𑐫𑐥𑐶𑑄𑐟 𑐣𑐾𑐥𑐵𑑅𑐫𑐵 𑐂𑐟𑐶𑐴𑐵𑐳 𑐣𑐶𑐩𑐵𑐬𑑂‍𑐞 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐁𑐥𑐵𑐮𑑄 𑐐𑑂𑐰𑐵𑐴𑐵𑐮𑐷 𑐠𑑂𑐰𑐫𑑂𑐎𑑅𑐥𑐶𑑄 𑐥𑐵𑐏𑐾𑑄 𑐴𑐾 𑐔𑐹𑐮𑐵𑐐𑐸 𑐡𑐸 𑑋 𑐠𑑁𑑄 𑐣𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐰𑐬𑑂‍𑐞𑐩𑐵𑐮𑐵 𑐁𑐡𑐶 𑐡𑐫𑐾𑐎𑐵𑑅 𑐠𑐸𑐎𑐶𑐫𑐵𑐟 𑐖𑐣𑐩𑐵𑐣𑐳𑐫𑑂 𑐥𑑂𑐬𑐔𑐵𑐬𑐥𑑂𑐬𑐳𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐳𑐎𑑂𑐬𑐶𑐫 𑐬𑐸𑐥𑑄 𑐤𑑂𑐫𑐔𑐶𑐮𑐵𑐡𑐷𑐪 𑐴𑐾𑐩𑐬𑐵𑐖 𑐱𑐵𑐎𑑂𑐫 𑐣𑑄 𑐕𑐪 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣 𑐴𑐾 𑐏𑑅 𑑋

𑐣𑐾𑐥𑐵𑑅𑐫𑐵 𑐥𑑂𑐬𑐵𑐔𑐷𑐣 𑐐𑑂𑐬𑐣𑑂𑐠𑐫𑑂 𑐩𑐶𑐏𑐵 𑐧𑑂𑐰𑐫𑐾𑐧𑐮𑐫𑑂 𑐣𑐾.𑐳𑑄. 𑑖𑑐𑑗 𑐖𑑅𑐏𑑅 𑐰 𑐰 𑐳𑑂𑐰𑐫𑐵𑑄 𑐤𑑂𑐫𑑅𑐔𑐮𑐣 𑐔𑐮𑑂𑐟𑐶𑐂 𑐡𑐸𑐐𑐸 𑐮𑐶𑐥𑐶 𑐨𑐸𑐖𑐶𑑄𑐩𑑀𑐮 𑐏𑑅 𑑋 𑐠𑐸𑐐𑐸 𑐂𑐮𑐫𑑂 𑐟𑐎 𑐩𑑅 𑐨𑑂𑐰𑑄𑐫𑐵 𑐔𑐮𑐣 𑐔𑐮𑑂𑐟𑐶 𑐩𑐡𑐸𑐐𑐸𑐮𑐶𑑄 𑐨𑐸𑐖𑐶𑑄𑐩𑑀𑐮 𑐁𑐏𑑅𑐰𑐶𑐱𑐾𑐲 𑐫𑐵𑐣𑐵 𑐟𑐵𑐜𑐥𑐟𑑂𑐬𑐫𑑂 𑐔𑑂𑐰𑐫𑐾𑐐𑐸 𑐖𑐹𑐐𑐸 𑐏𑐣𑐾𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐤𑐵𑐥𑐵𑑄𑐫𑐵 𑐐𑑂𑐬𑐣𑑂𑐠 𑐐𑐠𑐾 – 𑐴𑐬𑐩𑐾𑐏𑐮𑐵, 𑐣𑐵𑐬𑐡 𑐳𑑄𑐴𑐶𑐟𑐵, 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷 𑐁𑐡𑐶 𑐨𑐸𑐖𑐶𑑄𑐩𑑀𑐮 𑐮𑐶𑐥𑐶𑑄 𑐔𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐨𑐸𑐖𑐶𑑄𑐩𑑀𑐮 𑐮𑐶𑐥𑐶𑐫𑐵 𑐮𑑂𑐫𑐹 𑐮𑑂𑐫𑐹 𑐬𑐘𑑂𑐖𑐣𑐵𑐮𑐶𑐥𑐶 𑐣𑑄 𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐬𑐘𑑂𑐖𑐣𑐵𑐮𑐶𑐥𑐶 𑐰𑐶𑐱𑐾𑐲 𑐫𑐵𑐣𑐵𑑅 𑐢𑐵𑐬𑑂‍𑐩𑐶𑐎 𑐩𑐵𑑄𑐐𑐮𑐶𑐎 𑐖𑑂𑐫𑐵𑐏“𑐫𑑂 𑐄𑐔𑑂𑐔 𑐥𑐰𑐶𑐟𑑂𑐬 𑐠𑐵𑐫𑑂 𑐎𑐫𑐵𑐔𑑂𑐰𑑄𑐐𑐸 𑐩𑐏𑐸𑐳𑐾 𑐧𑑁𑐡𑑂𑐢 𑐢𑐬𑑂‍𑐩𑐫𑐵 𑐮“𑐮𑐶𑐣𑐵𑐔𑑂𑐰𑑄𑐐𑐸 𑐔𑐷𑐣, 𑐱𑑂𑐬𑐷𑐮𑑄𑐎𑐵, 𑐖𑐵𑐥𑐵𑐣, 𑐟𑐶𑐧𑑂𑐧𑐟 𑐁𑐡𑐶 𑐡𑐾𑐱𑐫𑑂 𑐟𑐎 𑐣𑑄 𑐠𑑂𑐰 𑐮𑐶𑐥𑐶𑑄 𑐥𑑂𑐬𑐔𑐮𑐶𑐟 𑐖𑐹𑐐𑐸 𑐡𑐸 𑑋 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐩𑐾𑐐𑐸 𑐎𑐮𑐵𑐟𑑂𑐩𑐎 𑐬𑐸𑐥 𑐎𑐸𑐚𑐵𑐎𑑂𑐲𑐬 𑐟𑐠𑐵 𑐳𑐥𑑂𑐟𑐵𑐎𑑂𑐲𑐬 𑐏𑑅 𑐐𑐸𑐐𑐸 𑐕𑐐𑑅 𑐁𑐏𑐮𑐫𑑂 𑐩𑐾𑐐𑐸 𑐁𑐏𑑅 𑐡𑐾𑐟𑐣𑐵𑑅 𑐔𑑂𑐰𑑄𑐎𑑂𑐰𑐫𑑂 𑐰𑑄𑐎𑐵𑑅 𑐔𑑂𑐰𑐫𑐾𑐐𑐸 𑐫𑐵𑐂 𑑋 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵𑐟 𑐧𑑂𑐫𑐧𑐴𑐵𑐬𑐶𑐎 𑐮𑐏𑐣𑐫𑑂 𑐄𑐳𑑂𑐟 𑐩𑐕𑑂𑐫𑑅𑐳𑐵𑑄 𑐡𑑂𑐫𑑅𑐫𑐵 𑐩𑐹𑐬𑑂‍𑐟𑐶 𑐡𑐸𑐣𑐾 𑐖𑐷𑐰𑐣𑑂𑐫𑐵𑐳 𑐫𑐵𑐫𑐾𑐟 𑐟𑐂𑐐𑐸 𑐴𑑂𑐡𑐫 𑐩𑐣𑑂𑐟𑑂𑐬𑐫𑐵 𑐮𑐸𑑄 𑐁𑐏𑑅𑐫𑐵𑐟 𑐬𑐘𑑂𑐖𑐣𑐵𑐮𑐶𑐥𑐶𑑄 𑐔𑑂𑐰𑐫𑐾𑐐𑐸 𑐠𑐶𑐟𑐶 𑐣𑐾𑐥𑐵𑐮𑐫𑑂 𑐁𑐥𑐵𑐮𑑄 𑐡𑐸 𑑋 𑐣𑐾.𑐳𑑄. 𑑖𑑐𑑐 𑐮𑐶𑐥𑐶 𑐣𑐾𑐥𑐵𑐮𑐨𑐵𑐲𑐵𑑄 𑐥𑑂𑐬𑐔𑐮𑐶𑐟 𑐣𑐾𑐥𑐵𑐮 𑐮𑐶𑐥𑐶 𑐫𑐵𑐟 𑐀𑐥𑑂𑐰𑑅 𑐰𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐾𑐐𑐸 𑐫𑐵𑐟 𑑋 𑐠𑐸𑐐𑐸 𑐂𑐮𑐫𑑂 𑐰𑐫𑐵𑑅 𑐩𑑅𑐨𑑂𑐰𑑄𑐫𑐵 𑐁𑐰𑐶𑐲𑑂𑐎𑐵𑐬 𑐖𑐸𑐂 𑐢𑐸𑑄𑐎𑐹𑐐𑐸𑐮𑐶𑑄 𑐠𑑂𑐰 𑐣𑐾𑐥𑐵𑐮 𑐮𑐶𑐥𑐶 𑐀𑐥𑑂𑐰𑑅 𑐢𑐫𑐵𑑅𑐠𑐾𑑄 𑐩𑑅𑐨𑑂𑐰“𑐟𑐫𑑂 𑐴𑐾 𑐔𑑂𑐰𑐫𑑂𑐐𑐸 𑐖𑐸𑐮 𑑋 𑐄𑐟𑑂𑐟𑐬 𑐩𑐮𑑂𑐮𑐎𑐵𑐮 𑐟𑐠𑐵 𑐱𑐵𑐴𑐎𑐵𑐮𑐫𑐵 𑐥𑐹𑐰𑐵𑐡𑑂𑐬𑑂‍𑐢 𑐟𑐎𑑄 𑐠𑑂𑐰 𑐮𑐶𑐥𑐶𑑄 𑐣𑐾𑐥𑐵𑑅𑐫𑐵 𑐖𑐣𑐖𑐷𑐰𑐣𑐫𑑂 𑐟𑐠𑐵 𑐬𑐵𑐖𑐎𑐶𑐫 𑐖𑑂𑐫𑐵𑐏“𑐫𑑂 𑐠𑐵𑐫𑑂 𑐎𑐫𑐵𑐔𑑂𑐰𑑄𑐐𑐸𑐮𑐶𑑄 𑐠𑑂𑐰 𑐮𑐶𑐥𑐶 𑐔𑑂𑐰𑐫𑐾 𑐧𑑂𑐰𑐣𑐾 𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐣𑑄 𑐄𑐧𑐮𑐫𑑂 𑐄𑐟𑐶𑐎𑑄 𑐡𑐫𑐵𑐔𑑂𑐰𑐣 𑑋 𑐣𑐾𑐥𑐵𑐮𑐨𑐵𑐲𑐵 𑐨𑐵𑐲𑐷𑐥𑐶𑑄𑐳𑑄 𑐖𑐎 𑐩𑐏𑐸 𑐟𑐟𑑂𑐎𑐵𑐮𑐷𑐣 𑐣𑐾𑐥𑐵𑑅𑐐𑐵𑑅𑐫𑐵 𑐦𑐸𑐎𑑂𑐎 𑐨𑐵𑐲𑐵𑐨𑐵𑐲𑐷 𑐢𑐬𑑂‍𑐩𑐵𑐮𑐩𑑂𑐧𑐷 𑑄 𑐣𑑄 𑐠𑑂𑐰 𑐮𑐶𑐥𑐶𑐫𑐵𑐟 𑐟𑑂𑐰𑐵𑑅 𑐴𑐾 𑐩𑐡𑐫𑐾𑐎 𑐣𑐾.𑐳𑑄. 𑑗𑑐𑑐 𑐖𑑅𑐏𑑅 𑐣𑐶𑐳𑐾𑑄 𑐎𑐫𑐵𑑅 𑐣𑐾.𑐳𑑄. 𑑑𑑐𑑒𑑐 𑐫𑐵 𑐡𑐱𑐎 𑐟𑐎 𑐕𑑂𑐫𑑅𑐐𑐸 𑐏𑐣𑐾𑐡𑐸 𑑋 𑐥𑐺𑐠𑑂𑐰𑐷𑐣𑐵𑐬𑐵𑐫𑐞 𑐱𑐵𑐴𑐫𑐵 𑐮𑐶𑐥𑐵 𑐥𑑂𑐬𑐟𑐵𑐥𑐳𑐶𑑄𑐴 𑐱𑐵𑐴𑐫𑐵 𑐥𑐵𑐮𑐫𑑂 𑐣𑐾.𑐳𑑄. 𑑘𑑙𑑕 𑐳 𑐣𑐾𑐥𑐵𑑅𑐫𑐵 𑐯𑐵𑐳𑐵 𑐣𑐵𑐥 𑐖𑐹𑐐𑐸 𑐳𑐣𑑂𑐢𑐶𑐥𑐟𑑂𑐬𑐫𑑂 𑐟𑐎 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐖𑐎 𑐩𑐏𑐸 𑐣𑐾𑐥𑐵𑐮 𑐮𑐶𑐥𑐶 𑐣𑑄 𑐕𑑂𑐫𑑅𑐐𑐸 𑐡𑐸 𑑋 𑐖𑐸𑐖𑐸 𑐬𑐞𑐧𑐴𑐵𑐡𑐸𑐬 𑐱𑐵𑐴𑐫𑐵 𑐂𑐮𑐫𑑂 𑐟𑐎 𑐣𑑄 𑐑𑐬𑐵𑐫𑐳𑐷 𑐟𑐩𑐳𑐸𑐎𑐫𑑂 𑐣𑐾𑐥𑐵𑐮𑐨𑐵𑐲𑐵, 𑐣𑐾𑐥𑐵𑐮 𑐮𑐶𑐥𑐶 𑐕𑑂𑐫𑐮𑐵𑑅 𑐖𑐸𑐖𑐸𑐫𑐵 𑐮𑐵𑐮𑐩𑑀𑐴𑐬 𑐖𑐎 𑐡𑐾𑐰𑐣𑐵𑐐𑐬𑐷 𑐮𑐶𑐥𑐶 𑐣𑐾𑐥𑐵𑐮𑐷 𑐨𑐵𑐲𑐵𑑄 𑐟𑐫𑐾𑐐𑐸 𑐫𑐵𑑅𑐐𑐸 𑐏𑐣𑐾𑐡𑐸, 𑐮𑐶𑐥𑐵 𑐖𑐸𑐖𑐸 𑐳𑐸𑐬𑐾𑐣𑑂𑐡𑑂𑐬 𑐰𑐶𑐎𑑂𑐬𑐩𑐫𑐵 𑐥𑐵𑐮𑐫𑑂 𑐠𑑂𑐫𑑄𑐎𑐵𑑅 𑐣𑐾𑐥𑐵𑐮𑐫𑑂 𑐳𑐬𑐎𑐵𑐬𑐷 𑐀𑐜𑑂𑐜𑐵𑐏𑐵𑐣𑐵𑐫𑑂 𑐣𑐾𑐰𑐵𑑅 𑐨𑐵𑐲𑐵𑑄 𑐔𑑂𑐰𑐫𑐵𑐟𑑅𑐐𑐸 𑐐𑐸𑐐𑐸𑑄 𑐨𑑂𑐰𑑄𑐨𑐶𑑄 𑐡𑐳𑐶 𑐎𑐠𑑄 𑐳𑑂𑐰𑐶𑐎𑐺𑐟 𑐖𑐸𑐂𑐩𑐏𑐸 𑐢𑐂𑐐𑐸 𑐥𑐮𑐵𑐏𑑄 𑐥𑑂𑐬𑐔𑐮𑐶𑐟 𑐮𑐶𑐥𑐶, 𑐬𑐘𑑂𑐖𑐣𑐵 𑐮𑐶𑐥𑐶 𑐁𑐡𑐶 𑐳𑐫𑐾𑐎𑐾𑐐𑐸𑐮𑐷 𑐐𑐟𑐶𑐬𑑀𑐢 𑐴𑐫𑐵𑐧𑐶𑐮, 𑐬𑐵𑐖𑐎𑐶𑐫 𑐨𑐵𑐫𑑂 𑐣𑐾𑐥𑐵𑐮𑐷𑐨𑐵𑐲𑐵 𑐰 𑐮𑐶𑐥𑐶 𑐡𑐾𑐰𑐣𑐵𑐐𑐬𑐷 𑐖𑐸𑐮 𑑋 𑐮𑐶𑐔𑑂𑐰𑑅 𑐎𑐠𑑄 𑐣𑐾𑐥𑐵𑐮 𑐮𑐶𑐥𑐶𑑄 𑐡𑐾𑐰𑐣𑐵𑐐𑐬𑐷 𑐮𑐶𑐥𑐶𑐫𑐵𑐟 𑐠𑐵𑐫𑑂 𑐟𑑂𑐰𑑅𑐟𑐸 𑐟𑑂𑐰𑑅𑐟𑐸𑑄 𑐰𑐣𑐾𑐟 𑐎𑐬𑑄𑐎𑑂𑐫𑐣 𑑋 𑐣𑐾𑐥𑐵𑐮𑐨𑐵𑐲𑐵 𑐣𑑄 𑐡𑐾𑐰𑐣𑐵𑐐𑐬𑐷𑑄 𑐮𑐶𑐥𑐶𑑄 𑐔𑑂𑐰𑐫𑐾𑐐𑐸 𑐖𑐸𑐮 𑑋 𑐀𑐗 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐀𑐥𑑂𑐰𑑅 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬𑐫𑑂 𑐴𑐫𑐾𑐟 𑐮𑐶𑐥𑐶𑐫𑐵 𑐩𑑀𑐴 𑐎𑐫𑐵𑐔𑑂𑐰𑐣𑐵 𑐖𑐎 𑐩𑐖𑐶𑐮 𑐢𑐫𑐵𑐐𑐸 𑐢𑐵𑐬𑐞𑐵 𑐧𑑂𑐰𑐮𑐣 𑑋 𑐀𑐮𑐾 𑐣𑐾.𑐳𑑄. 𑑑𑑐𑑒𑑐 𑐡𑐱𑐎𑑄 𑐣𑐶𑐳𑐾𑑄 𑐳𑐷𑐡𑐫𑐾𑐎 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑐮𑐾𑐳𑐵 𑐡𑐾𑐰𑐣𑐵𑐐𑐬𑐷 𑐮𑐶𑐥𑐶 𑐕𑑂𑐫𑐮𑐾𑐐𑐸 𑐫𑐵𑐣𑐵𑐴𑐮 𑑋 𑐟𑐬 𑐠𑐠𑐾 𑐨𑐵𑐲𑐵 𑐥𑑂𑐬𑐔𑐵𑐬𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵𑐟 𑐟𑑂𑐰𑑅𑐟𑐾𑐐𑐸 𑐫𑐵𑑅𑐳𑐵𑑄 𑐢𑐬𑑂‍𑐩𑐵𑐡𑐶𑐟𑑂𑐫 𑐢𑐬𑑂‍𑐩𑐵𑐔𑐵𑐬𑑂‍𑐫𑐫𑐵 𑐳𑐩𑑂𑐥𑐵𑐡𑐣𑐫𑑂 𑐥𑐶𑐡𑑄𑐐𑐸 𑐧𑐸𑐡𑑂𑐢 𑐢𑐬𑑂‍𑐩 𑐰 𑐣𑐾𑐥𑐵𑐮𑐨𑐵𑐲𑐵 𑐥𑐟𑑂𑐬𑐶𑐎𑐵𑑄𑐣𑐶𑐳𑐾𑑄 𑐠𑑂𑐰𑐫𑐵 𑐳𑑄𑐬𑐎𑑂𑐲𑐞 𑐳𑑄𑐰𑐡𑑂𑐢𑐬𑑂‍𑐣𑐫𑐵 𑐣𑐶𑐟𑐶𑑄 𑐴𑐵𑐣𑑄 𑐥𑐮𑐵𑑅 𑐯𑑂𑐰𑐣𑐵𑐴𑐮𑑋 𑐥𑐣𑑂𑐣𑐵𑐥𑑂𑐬𑐳𑐵𑐡 𑐰𑐿𑐡𑑂𑐫𑑄 𑐣𑐾𑐥𑐵𑐮 𑐡𑐾𑐱𑐫𑐵 𑐀𑐎𑑂𑐲𑐬 𑐧𑑀𑐢(𑐣𑐾.𑐳𑑄. 𑑑𑑐𑑗𑑐) 𑐳𑐥𑐹m𑐔𑐵 𑐥𑐶𑐎𑐫𑐵𑑅 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑐸𑐣𑐬𑐄𑐟𑑂𑐠𑐵𑐣𑐫𑐵 𑐀𑐨𑐶𑐫𑐵𑐣 𑐤𑐵𑐥𑐵𑑄 𑐔𑑂𑐰𑐫𑐾𑐎𑐵𑐡𑐶𑐮 𑑋 𑐠𑑂𑐰𑐫𑐵𑑄 𑐮𑐶𑐥𑐵 𑐴𑐾𑐩𑐬𑐵𑐖 𑐱𑐵𑐎𑑂𑐫𑐫𑐵 𑐣𑐾𑐥𑐵𑐮 𑐮𑐶𑐥𑐶 𑐳𑑄𑐐𑑂𑐬𑐴 (𑑑𑑐𑑗𑑑), 𑐰𑐬𑑂‍𑐞 𑐥𑐬𑐶𑐔𑐫(𑑑𑑐𑑙𑑓) 𑐥𑐶𑐡𑐣 𑑋 𑐠𑑂𑐰 𑐥𑐮𑐵𑑅 𑑒𑑐𑑑𑑗 𑐳𑐵𑐮𑐫𑑂 𑐥𑑂𑐬𑐖𑐵𑐟𑐣𑑂𑐟𑑂𑐬 𑐮𑐶𑐥𑐵 𑐗𑐣 𑐳𑐱𑐎𑑂𑐟 𑐖𑐸𑐮 𑑋 𑐠𑑁𑑄 𑐥𑑂𑐬𑐵𑐔𑐷𑐣 𑐮𑐶𑐥𑐶𑐫𑐵 𑐳𑑄𑐬𑐎𑑂𑐲𑐞 𑐳𑑄𑐰𑐡𑑂𑐬𑑂‍𑐢𑐣𑐫𑐵 𑐣𑐶𑐟𑐶𑑄 𑐁𑐥𑐵𑐮𑑄 𑐳𑑄𑐑 𑐳𑑄𑐳𑑂𑐠𑐵𑑄 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶, 𑐁𑐱𑐵 𑐳𑐥𑐹m 𑐎𑐸𑐠𑐶, 𑐮𑐶𑐥𑐶𑐠𑐥𑐹 𑐐𑐸𑐠𑐶, 𑐁𑐡𑐶 𑐠𑐸𑐎𑐶𑐫𑐵 𑐡𑐳𑐸 𑐏𑑅 𑑋 𑐠𑑁𑑄𑐫𑐵 𑐤𑐹 𑐥𑐹𑐳𑑂𑐟𑐵𑑄 𑐠𑐸𑐎𑐶𑐫𑐵𑐟 𑐣𑐾𑐥𑐵𑑅𑐫𑐵 𑐥𑑂𑐬𑐵𑐔𑐷𑐣 𑐐𑑁𑐬𑐰 𑐨𑐵𑑅𑐥𑐵𑑅 𑐳𑐎𑐵𑐬𑐵𑐟𑑂𑐩𑐎 𑐬𑐸𑐥𑑄 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑁𑑄 𑐠𑐵𑐫𑑂𑐠𑐵𑐳𑐫𑑂 𑐮𑐶𑐥𑐶 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐫𑐾𑐐𑐸 𑐖𑐎 𑐩𑐏𑐸, 𑐣𑐾𑐥𑐵𑐮 𑐮𑐶𑐥𑐶𑑄 𑐥𑐟𑑂𑐬𑐥𑐟𑑂𑐬𑐶𑐎𑐵 𑐟𑐎𑑄 𑐥𑐶𑐎𑐵𑐫𑐾𑐐𑐸 𑐖𑐹𑐐𑐸 𑐡𑐸 –𑐟𑑂𑐰𑐵𑑅𑐡𑐾𑐰𑐵, 𑐥𑑁𑐨𑐵𑑅, 𑐩𑐟, 𑐳𑐐𑑄, 𑐠𑐥𑐹 𑐁𑐡𑐶 𑐣𑐾𑐥𑐵𑐮 𑐮𑐶𑐥𑐶𑑄 𑐥𑐶𑐡𑑄𑐐𑐸 𑐥𑐟𑑂𑐬𑐶𑐎𑐵𑐟 𑐏𑑅 𑑋 𑐀𑐗 𑐠𑑁𑑄𑐫𑐵 𑐳𑑂𑐰𑐣𑐶𑐐𑑅𑐫𑐵 𑐣𑐐𑐬𑐥𑐵𑐮𑐶𑐎𑐵𑑄 𑐣𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵𑐟 𑐩𑐵𑐣𑑂𑐫𑐟𑐵 𑐧𑐷𑐐𑐸 𑐫𑐵𑑅𑐐𑐸𑐮𑐶𑑄 𑐠𑑂𑐰𑐫𑐵 𑐨𑐰𑐶𑐲𑑂𑐫 𑐄𑐖𑑂𑐰𑐮 𑐏𑐣𑐾𑐡𑐸 𑑋
(𑐳𑑄𑐨𑐵𑐬 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐂𑐟𑐶𑐴𑐵𑐳)