𑐣𑐾𑐥𑐵𑑅𑐫𑐵 𑐳𑐔𑑂𑐕𑐶 𑐰 𑐣𑐷𑐣𑑂𑐫𑐵𑐐𑐹 𑐨𑐵𑐳𑑄 𑐔𑑂𑐰𑐫𑐾𑐟 𑐀𑑅𑐥𑐸𑐎𑐾𑐫𑐵 𑐣𑐶𑑄𑐟𑐶𑑄 𑐁𑑅 𑐕𑐐𑐹 𑐴𑐾 ‘𑐦𑐣𑑂𑐚’

𑐣𑐾𑐥𑐵𑐮𑐫𑑂 𑐮𑑂𑐴𑐵𑐂𑐐𑐸 𑑑𑑒𑑕 𑐨𑐵𑐫𑑂𑐫𑐵 𑐩𑑄𑐎𑐵𑑅 𑐮𑐾𑐏𑐣 𑐥𑐡𑑂𑐢𑐟𑐶 𑐡𑐫𑐾𑐎𑐾𑐐𑐸 𑐟𑐵𑐟𑐸𑐣𑐵𑑅 𑐕𑐐𑐹 𑐴𑐾 ‘𑐦𑐣𑑂𑐚’ 𑐡𑐫𑐾𑐎𑐹𑐐𑐸 𑐡𑐸 𑑋 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑑄 𑐣𑐷𑐳𑑂𑐰𑑄𑐐𑐸 𑐣𑐾𑐥𑐵𑑅𑐫𑐵 𑐨𑐵𑐫𑑂𑐫𑐵 𑐩𑑄𑐎𑐵𑑅 𑐮𑐾𑐏𑐣 𑐥𑐡𑑂𑐢𑐟𑐶𑐫𑐵 𑐰𑐶𑐎𑐵𑐳 𑐀𑐢𑑂𑐫𑐫𑐣 𑐎𑐵𑐬𑑂𑐫𑐡𑐮 𑐰 𑐁𑐰𑐬𑐞 𑐥𑑂𑐬𑐎𑐵𑐱𑐣 𑐡𑐠𑐸𑐫𑐵 𑐳𑐴𑐩𑐟𑐶𑐎𑐠𑑄 𑐦𑐣𑑂𑐚 𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐏𑑅 𑑋
𑐎𑐮𑐵𑐎𑐵𑐬 𑐬𑐩𑐾𑐱 𑐥𑑁𑐜𑐾𑐮𑑄 𑐎𑐵𑐬𑑂𑐫𑐡𑐮𑐫𑐵 𑐥𑑂𑐬𑐟𑐶𑐰𑐾𑐡𑐣𑐫𑐵 𑐎𑐠𑑄 ‘𑐡𑐸𑐧𑑀’ 𑐣𑐵𑑄𑐫𑐵 ‘𑐦𑐣𑑂𑐚’𑐫𑐵 ‘𑐜𑐶𑐖𑐵𑐂𑐣’ 𑐫𑐵𑐣𑐵𑑅 𑐩𑑄𑐐𑐮𑐧𑐵𑑅 𑐄𑐐𑐸 𑐦𑐣𑑂𑐚 𑐥𑑂𑐬𑐟𑐶𑐲𑑂𑐛𑐵𑐣𑐫𑐵𑐟 𑐮𑑅𑐮𑑂𑐴𑐵𑑅𑐣𑐵𑐐𑐸 𑐢𑐎𑐵𑑅 𑐢𑐫𑐵𑐡𑐶𑐮 𑑋 𑐁𑐰𑐬𑐞 𑐥𑑂𑐬𑐎𑐵𑐱𑐣𑐫𑐵 𑐥𑑂𑐬𑐧𑐣𑑂𑐢 𑐣𑐶𑐬𑑂𑐡𑐾𑐱𑐎 𑐥𑑁𑐜𑐾𑐮𑑄 𑑒𑑒𑑔 ‘𑐎𑑂𑐫𑐵𑐬𑐾𑐎𑑂𑐚𑐬’ 𑐡𑐹𑐐𑐸 ‘𑐡𑐸𑐧𑑀’ 𑐦𑐣𑑂𑐚 𑐡𑐾𑐰𑐣𑐵𑐐𑐬𑐷 𑐰 ‘𑐫𑐸𑐣𑐶𑐎𑑀𑐜’ 𑐳𑐶𑐧𑐾𑑄 𑐧𑑂𑐫𑐵𑐐𑐮𑑄 ‘𑐮𑐾𑐁𑐄𑐚’𑐫𑑂 𑐖𑐸𑐳𑐵𑑄 𑐣𑑄 𑐕𑑂𑐫𑐮𑐾𑐟 𑐀𑑅𑐥𑐹𑐐𑐸 𑐢𑐫𑐵𑐡𑐶𑐮 𑑋
𑐩𑑄𑐐𑐮𑐧𑐵𑑅 𑐥𑑂𑐬𑐟𑐶𑐲𑑂𑐛𑐵𑐣𑐫𑑂 𑐐𑑂𑐰𑐳𑐵𑑅𑐐𑑂𑐰𑑅𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐳𑑂𑐟𑐵𑐰𑐶𑐟 𑐦𑐣𑑂𑐚𑐫𑐵 𑐰𑐶𑐲𑐫𑐳 𑐨𑐵𑐲𑐵𑐰𑐶𑐡𑑂𑐣𑐵𑐥𑑄 𑐳𑐴𑐮𑐴 𑐰 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐖𑑂𑐫𑐵 𑐣𑐵𑐥𑑄 𑐖𑐹𑐐𑐸 𑐏𑑅 𑑋 𑐄𑐐𑐸 𑐗𑑂𑐰𑐮𑐫𑑂 𑐨𑐵𑐲𑐵𑐰𑐶𑐡𑑂 𑐥𑑂𑐬𑐵 𑐜𑐵 𑐩𑐵𑐢𑐰 𑐥𑑀𑐏𑐬𑐾𑐮𑑄 𑐥𑑂𑐬𑐳𑑂𑐟𑐵𑐰𑐶𑐟 𑐦𑐣𑑂𑐚𑑄 𑐮𑐶𑐥𑐶 𑐩𑐡𑐹𑐥𑐶𑑄 𑐟𑐬 𑐣𑐾𑐥𑐵𑐮𑐫𑑂 𑐮𑑂𑐴𑐵𑐂𑐐𑐸 𑐫𑐎𑑂𑐰 𑐨𑐵𑐫𑑂𑐡𑐸𑐥𑐶𑐣𑐶𑐐𑐸 𑐮𑐾𑐏𑐣 𑐥𑐡𑑂𑐢𑐟𑐶𑐂 𑐏𑐣𑐾𑐡𑐹𑐐𑐸 𑐳𑐩𑐳𑑂𑐫𑐵 𑐎𑑂𑐰𑐥𑐵𑐮𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋
𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐎𑐸𑐮𑐥𑐟𑐶 𑐨𑐹𑐥𑐵𑐮 𑐬𑐵𑐃𑐣𑑄 𑐰𑐶𑐖𑑂𑐘 𑐎𑐵𑐬𑑂𑐫𑐡𑐮𑐫𑐵 𑐐𑑂𑐰𑐵𑐴𑐵𑐮𑐶𑐂 𑐣𑑂𑐴𑐹𑐐𑐸 𑐦𑐣𑑂𑐚 𑐡𑐫𑐾𑐎𑐵𑐐𑐸 𑐰 𑐠𑑂𑐰 𑐎𑐸𑐟𑑅 𑐟𑐳𑐎𑑄 𑐖𑑂𑐫𑐵 𑐰𑐂𑐐𑐸 𑐢𑐫𑐵𑐡𑐶𑐮 𑑋 𑐨𑐵𑐲𑐵 𑐁𑐫𑑀𑐐𑐫𑐵 𑐣𑐵𑐫𑑅 𑐜𑐵 𑐐𑑀𑐥𑐵𑐮 𑐛𑐵𑐎𑐸𑐬𑑄 𑐥𑑂𑐬𑐳𑑂𑐟𑐵𑐰𑐶𑐟 𑐦𑐣𑑂𑐚𑑄 𑐣𑐾𑐥𑐵𑐮𑐫𑑂 𑐮𑑂𑐴𑐵𑐂𑐐𑐸 𑐦𑐸𑐎𑑂𑐎 𑐨𑐵𑐫𑑂𑐫𑐵 𑐮𑐾𑐏𑐣𑐫𑑂 𑐕𑐐𑐹𑐴𑐾 𑐥𑐴𑑅 𑐰𑐂𑐐𑐸 𑐢𑐫𑐵𑐡𑐶𑐮 𑑋 𑐎𑐵𑐬𑑂𑐫𑐡𑐮𑐫𑐵 𑐎𑐖𑐶 𑐜𑐵 𑐀𑐩𑐺𑐟 𑐫𑑀𑐘𑑂𑐖𑐣 𑐟𑐵𑐩𑐵𑐒𑑄 𑐥𑑂𑐬𑐳𑑂𑐟𑐵𑐰𑐶𑐟 𑐦𑐣𑑂𑐚𑑄 𑐣𑐾𑐥𑐵𑑅𑐫𑐵 𑐨𑐵𑐫𑑂𑐥𑐶𑐣𑐶𑐐𑐸 𑐮𑐾𑐏𑐣𑐫𑑂 𑐳𑐴𑐖𑐟𑐵 𑐰𑐂𑐐 𑐢𑐫𑐵𑐡𑐶𑐮 𑑋 𑐎𑐵𑐬𑑂𑐫𑐡𑐮𑐫𑐵 𑐡𑐸𑐖𑑅 𑐥𑑂𑐬𑐵 𑐨𑐷𑐩𑐣𑐵𑐬𑐵𑐫𑐞 𑐬𑐾𑐐𑑂𑐩𑐷𑑄 𑐥𑑂𑐬𑐳𑑂𑐟𑐵𑐰𑐶𑐟 𑐦𑐣𑑂𑐚𑐫𑐵 𑐰𑐶𑐱𑐾𑐲𑐟𑐵𑐣𑐵𑐥𑑄𑐫𑐵 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐳𑐡𑐳𑑂𑐫𑐳𑐔𑐶𑐰 𑐜𑐵 𑐢𑐣𑐥𑑂𑐬𑐳𑐵𑐡 𑐳𑐸𑐰𑐾𑐡𑐷, 𑐥𑑂𑐬𑐵 𑐬𑐵𑐩 𑐮𑑀𑐴𑐣𑐷, 𑐜𑐵 𑐎𑐺𑐲𑑂𑐞𑐥𑑂𑐬𑐳𑐵𑐡 𑐔𑐵𑐮𑐶𑐳𑐾, 𑐜𑐵 𑐎𑐬𑑂𑐞𑐵𑐏𑐬 𑐏𑐟𑐶𑐰𑐜𑐵, 𑐡𑐶𑐮𑐾𑐣𑑂𑐡𑑂𑐬 𑐳𑐸𑐧𑑂𑐧𑐵, 𑐜𑐵 𑐳𑐹𑐬𑑂𑐫𑐥𑑂𑐬𑐳𑐵𑐡 𑐫𑐵𑐡𑐰 𑐰 𑐬𑐵𑐖𑐣𑐮𑐵𑐮 𑐖𑑀𑐱𑐷𑑄 𑐦𑐣𑑂𑐚𑐫𑐵 𑐰𑐶𑐲𑐫𑐳 𑐖𑐶𑐖𑑂𑐘𑐵𑐳𑐵𑐣𑐵𑐥𑑄 𑐚𑐶𑐥𑑂𑐥𑐞𑐷 𑐧𑐶𑐫𑐵𑐡𑐷𑐐𑐸 𑐦𑐣𑑂𑐚 𑐡𑐫𑐾𑐎𑐵𑐡𑐷𑐩𑑂𑐴 𑐎𑐮𑐵𑐎𑐵𑐬 𑐥𑑁𑐜𑐾𑐮𑑄 𑐬𑐵𑐳𑐳𑐫𑐵𑐟 𑐢𑐫𑐵𑐡𑐶𑐮 𑑋
𑐥𑑂𑐬𑐟𑐶𑐲𑑂𑐛𑐵𑐣𑑄 𑐣𑐷𑐳𑑂𑐰𑑄𑐐𑐸 𑐀𑐢𑑂𑐫𑐫𑐣 𑐎𑐵𑐬𑑂𑐫𑐡𑐮𑐫𑐵 𑐎𑐖𑐶𑐳 𑐜𑐵 𑐟𑐵𑐩𑐵𑐒, 𑐳𑐴𑐳𑑄𑐫𑑀𑐖𑐎𑐫𑑂 𑐜𑐵 𑐰𑐶𑐲𑑂𑐞𑐸𑐎𑐸𑐩𑐵𑐬 𑐳𑐶𑑄𑐖𑐵𑐮𑐷 𑐰 𑐡𑐸𑐖𑐮𑐫𑑂 𑐥𑑂𑐬𑐵 𑐨𑐷𑐩𑐣𑐵𑐬𑐵𑐫𑐞 𑐬𑐾𑐐𑑂𑐩𑐷, 𑐜𑐵 𑐟𑐵𑐬𑐵𑐩𑐞𑐶 𑐬𑐵𑐃, 𑐀𑐩𑑂𑐧𑐬𑐖𑐒 𑐮𑐶𑐩𑑂𑐧𑐹, 𑐥𑑂𑐬𑐵𑐖𑑂𑐘 𑐟𑑂𑐬𑐿𑐮𑑀𑐎𑑂𑐫𑐩𑐵𑐣 𑐧𑐣𑐾𑐥𑐵𑐮𑐷 𑐰 𑐴𑑄𑐳𑐰𑐟𑐷 𑐎𑐸𑐬𑑂𑐩𑐷 𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋