𑐣𑐾𑐰𑐵𑑅 𑐖𑑂𑐘𑐵𑐣𑐎𑑀𑐱 𑐡𑐫𑐾𑐎𑐾𑐟 𑐊𑐎𑐾𑐡𑐾𑐩𑐶𑑄 𑐖𑑂𑐫𑐵 𑐣𑑂𑐴𑑂𑐫𑐵𑐎𑐮

𑐫𑐾𑑃 – 𑐣𑐾𑐰𑐵𑑅 𑐖𑐵𑐟𑐶𑐮𑐶𑐳𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐳𑐩𑑂𑐥𑐹𑐬𑑂𑐞 𑐰𑐶𑐲𑐫𑐫𑐵 𑐡𑑃 𑐡𑐸𑐠𑑂𑐫𑐵𑐎𑐵𑑅 ‘𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱’ 𑐡𑐫𑐾𑐎𑐾𑐐𑐸 𑐮𑐵𑐐𑐶𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐩𑐶𑑄 𑐥𑐴𑐮 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋 𑐄𑐎𑐶𑐫𑐵 𑐮𑐵𑐐𑐶𑑄 𑐠𑐷𑐠𑐷 𑐏𑑂𑐫𑑅𑐫𑐵𑐥𑐶𑑄 𑐣𑐾𑐰𑐵𑑅 𑐰𑐶𑐡𑑂𑐰𑐵𑐣 𑐰 𑐰𑐶𑐖𑑂𑐘𑐥𑐶𑐣𑐶 𑐰𑐺𑐴𑐟𑑂 𑐨𑐾𑐮𑐵 𑐫𑐵𑐳𑐾𑑄 𑐣𑐾𑐰𑐵𑑅 𑐖𑑂𑐘𑐵𑐣𑐎𑑀𑐱 𑐐𑐖𑑂𑐫𑐵𑑅𑐐𑐸 𑐖𑐸𑐂𑐩𑐵𑑅 𑐰 𑐠𑑂𑐰 𑐐𑑂𑐬𑐣𑑂𑐠 𑐐𑐫𑑂 𑐫𑐵𑐣𑐵𑑅 𑐡𑐫𑐾𑐎𑐵 𑐰𑐣𑐾 𑐢𑐂𑐐𑐸 𑐧𑐵𑐬𑐾 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋

𑐧𑐸𑐢𑐰𑐵𑑅 𑐫𑐵𑑅𑐐𑐸 𑐄𑐐𑐸 𑐨𑐾𑐮𑐵𑐫𑑂 𑐳𑐴𑐨𑐵𑐐𑐷 𑐣𑐾𑐰𑐵𑑅 𑐰𑐶𑐡𑑂𑐰𑐵𑐣𑐟𑐫𑑂𑐳𑑄 𑐠𑐷𑐠𑐷 𑐣𑑂𑐴𑐫𑑂𑐐𑐹 𑐥𑐸𑐔𑑅 𑐡𑐫𑐾𑐎𑐵𑑅 𑐣𑐾𑐰𑐵𑑅 𑐖𑑂𑐘𑐵𑐣𑐎𑑀𑐱𑐫𑑂 𑐡𑐸𑐠𑑂𑐫𑐵𑐎𑐾𑐩𑐵𑑅𑐐𑐸 𑐰𑐶𑐲𑐫, 𑐠𑑂𑐰𑐮𑐶𑐳𑐾 𑐳𑐩𑑂𑐧𑐣𑑂𑐢𑐶𑐟 𑐖𑐵𑐣𑐎𑐵𑐬𑐷 𑐰 𑐄𑐎𑐶𑐫𑐵𑐟 𑐥𑑂𑐬𑐳𑑂𑐟𑐸𑐟 𑐫𑐵𑐫𑐾𑐐𑐸 𑐱𑐿𑐮𑐷𑐫𑐵 𑐧𑐵𑐬𑐾 𑐳𑐴𑐮𑐴 𑐫𑐵𑑅𑐐𑐸 𑐏𑑅 𑑋 𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐩𑐹𑐥𑐵𑐴𑐵𑑄 𑐎𑐠𑑄 𑐗𑐵𑑅𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐣𑐾𑐥𑐵𑐮𑐨𑐵𑐲𑐵 𑐊𑐎𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐔𑐶𑐟𑑂𑐟𑐬𑐘𑑂𑐖𑐣 𑐣𑐾𑐥𑐵𑐮𑐷𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐏𑑅 𑑋

𑐄𑐎𑐷 𑐖𑑂𑐘𑐵𑐣𑐎𑑀𑐱𑐫𑐵 𑐀𑐰𑐢𑐵𑐬𑐞𑐵 𑐧𑐵𑐬𑐾 𑐖𑑂𑐘𑐵𑐣𑐎𑑀𑐱 𑐥𑐬𑐶𑐫𑑀𑐖𑐣𑐵𑐫𑐵 𑐳𑑄𑐫𑑀𑐖𑐎 𑐰𑐬𑐶𑐲𑑂𑐛 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐫𑐖𑑂𑐘𑐩𑐵𑐣𑐥𑐟𑐶 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐊𑐎𑐾𑐡𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑑅𑐥𑐶𑑄𑐳𑑄 𑐠𑑂𑐰 𑐖𑑂𑐘𑐵𑐣𑐎𑑀𑐱𑐫𑑂 𑐣𑐾𑐰𑐵𑑅 𑐖𑐵𑐟𑐶𑐮𑐶𑐳𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐳𑐵𑐴𑐶𑐟𑑂𑐫,
𑐬𑐴𑐣𑐳𑐴𑐣, 𑐳𑐵𑐩𑐵𑐖𑐶𑐎 𑐳𑑄𑐬𑐔𑐣𑐵, 𑐣𑐳𑐵𑐟𑑂𑐰𑑃𑐳𑐵 𑐁𑐡𑐶 𑐰𑐶𑐲𑐫𑐫𑐵 𑐏𑑃 𑐡𑐸𑐠𑑂𑐫𑐵𑐎𑐾𑐐𑐸 𑐏𑑃 𑐥𑑂𑐬𑐳𑑂𑐟𑐵𑐰 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐩𑐸𑑃𑐖𑑂𑐫𑐵𑐥𑐵𑐏𑐾𑑄 𑐥𑐶𑐴𑐵𑑄 𑐰𑑅𑐐𑐸 𑐮𑐶𑐔𑑂𑐰𑑅𑐫𑐵 𑐮𑐶𑐢𑑄𑐳𑐵𑐫𑑂 𑐕𑐐𑐹 𑐁𑐢𑐵𑐬𑐥𑐟𑑂𑐬 𑐡𑐫𑐾𑐎𑐵𑑅 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐳𑑂𑐰𑐡𑑃𑐫𑐵 𑐡𑐸𑐣𑐾 𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸 𑐢𑐎𑐵𑑅 𑐟𑐵𑑅 𑐟𑐫𑐵𑐟𑑅𑐐𑐸 𑐠𑑂𑐰 𑐎𑑀𑐱 𑐡𑐫𑐾𑐎𑐾𑐫𑐵 𑐮𑐵𑐐𑐶𑑄 𑐩𑐵𑑅𑐐𑐸 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶𑐫𑐵 𑐮𑐵𑐐𑐶𑑄 𑐫𑐾𑑃 𑐩𑐣𑐥𑐵𑐮𑐶𑐳𑐾 𑐏𑑃𑐮𑑂𑐴𑐵𑐧𑐮𑑂𑐴𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋