𑐥𑐵𑐥–𑐥𑐸𑐞𑑂𑐫–𑐢𑐬𑑂𑐩 (𑐔𑐶𑐣𑐵𑐏𑑃)

–𑐬𑐷𑐡𑐾𑐣 𑐩𑐴𑐬𑑂𑐖𑐣

𑐎𑐶𑐥𑐹—𑑑

𑐥𑐵𑐥–𑐥𑐸𑐞𑑂𑐫–𑐢𑐬𑑂𑐩 𑐢𑐫𑐵𑐐𑐸 𑐕𑐸𑑄 𑐏𑑅 ?
𑐖𑐶𑑄 𑐩𑐳𑐶𑐮, 𑐖𑐶 𑐩𑐠𑐸𑐮 !
𑐗𑐷 𑐣𑐾𑐰𑐵𑑅 𑐖𑐸𑐫𑐵𑐣𑑄 𑐖𑐸𑐫𑐵𑐣𑑄
𑐗𑐷𑐳 𑐩𑐵𑑄𑐨𑐵𑐳𑑄 𑐣𑐸𑐐𑑅 𑐔𑐎𑑄𑐎𑐵𑑅
𑐣𑐸𑐐𑐮𑐫𑑂 𑐳𑑂𑐰𑐵𑑃 𑐴𑑂𑐰𑐫𑐾𑐎𑐵𑑅 𑐣𑐸𑐐𑑅 𑐳𑑅 𑐠𑑂𑐰𑐫𑐾𑐎𑐵𑑅
𑐩𑐵𑑄𑐨𑐵𑐫𑑂𑐫𑐵𑐟 𑐩𑐟𑐶𑐣𑐵 𑐩𑐫𑐵𑐳𑐾
𑐏𑐮𑑂𑐴𑐵𑐧𑐮𑑂𑐴𑐵 𑐫𑐵𑐂𑐩𑐏𑐸
𑐠𑑂𑐰𑐴𑐾 𑐡𑐎𑐮𑐾 𑐟𑐢𑑄𑐐𑐸 𑐥𑐵𑐥 𑐖𑐸𑐂 𑑋𑑋

𑐗𑐷 𑐣𑐾𑐰𑐵𑑅 𑐖𑐸𑐫𑐵𑑅 𑐩𑐵𑑄𑐨𑐵𑐳𑐵𑐫𑐵𑐟
𑐢𑑂𑐫𑐵𑐎𑐸𑐣𑐫𑑂 𑐰𑐵𑑄𑐕𑑂𑐰𑐫𑐵𑑅 𑐨𑑂𑐰𑐵𑐳𑐶 𑐖𑐸𑐫𑐵𑑅
𑐠𑑅𑐠𑐰𑐫𑑂 𑐐𑐵𑐮𑐫𑑂 𑐣𑐬𑑂𑐎𑐫𑑂 𑐎𑐸𑐴𑐵𑑄 𑐰𑐣𑐵𑑅
𑐎𑐬𑑂𑐎𑐶𑐫𑐵 𑐨𑐵𑐫𑑂 𑐕𑑂𑐫𑐮𑐵𑑅
𑐡𑐵𑐳 𑐖𑐸𑐫𑐵𑑅 𑐏𑑃 𑐮𑑂𑐴𑐵𑐂
𑐡𑐎𑐮𑐾 𑐟𑑅𑐢𑑄𑐐𑐸 𑐴𑐶𑑄𑐳𑐵 𑐖𑐸𑐂
𑐀𑐮𑐾 𑐥𑐸𑐞𑑂𑐫 𑐢𑐫𑐵𑐐𑐸 𑐠𑑂𑐰𑐴𑐾 𑐖𑐸𑐂 𑑋𑑋

𑐗𑐷𑐳𑑄 𑐗𑐷𑐐𑐸 𑐩𑐵𑑄𑐨𑐵𑐫𑑂𑐫𑐵𑐟 𑐐𑐸𑐮𑐶 𑐩𑐟𑐶𑐣𑐵 𑐫𑐵𑐂
𑐄𑐮𑐶𑐴𑐾 𑐗𑐷𑐟 𑐩𑐟𑐶𑐣𑐵 𑐫𑐵𑐂
𑐡𑐸𑐣𑐸𑐐𑐮𑑄 𑐠𑐸𑐂𑐎𑐵𑑅 𑐗𑐷 𑐗𑐷 𑐖𑐵𑐣𑐵𑑅
𑐗𑐷𑐐𑐸 𑐩𑐵𑑄𑐨𑐵𑐫𑑂𑐫𑐵𑐟 𑐴𑑅𑐥𑐵𑑅 𑐧𑐶𑐫𑐵𑑅
𑐠𑐎𑐵𑐫𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐷
𑐠𑑂𑐰𑐴𑐾 𑐡𑐎𑐮𑐾 𑐟𑑅𑐢𑑄𑐐𑐸 𑐥𑐹𑐞𑑂𑐫 𑐖𑐸𑐂 𑑋𑑋

𑐗𑐷𑐐𑐸 𑐩𑐵𑑄𑐨𑐵𑐫𑑂 𑐡𑐿𑐰𑐷–𑐱𑐎𑑂𑐟𑐶𑑄 𑐖𑐵𑑅𑐐𑐸
𑐥𑑂𑐬𑐵𑐎𑐺𑐟𑐶𑐎 𑐰𑐶𑐱𑐸𑐡𑑂𑐢 𑐨𑐵𑐫𑑂
𑐗𑐷𑐐𑐸 𑐎𑐬𑑂𑐩 𑐩𑐵𑑄𑐨𑐵𑐫𑑂𑐫𑐵𑐟 𑐩𑑂𑐰𑐵𑐎𑐾𑐐𑐸 𑐖𑐸𑐂𑐩𑐵𑑅
𑐀𑐮𑐾𑐖𑐎 𑐴𑐮𑐶𑐩𑐫𑑂 𑐗𑐷 𑐮𑑂𑐫𑐣𑐷
𑐗𑐷𑐐𑐸 𑐥𑐸𑐳𑑂𑐟𑐵 𑐮𑑂𑐫𑐣𑐷
𑐕𑐸𑑄 𑐣𑑄 𑐟𑐣𑐶𑐩𑐏𑐸
𑐕𑐸𑐣𑑄 𑐣𑑂𑐴𑐣𑐶𑐩𑐏𑐸
𑐩𑐏𑐸𑐮𑐵 𑐢𑐿𑐐𑐸 𑐖𑐹𑐳𑐵
𑐗𑐷𑐥𑐶𑑄 𑐦𑐸𑐎𑑂𑐎 𑐳𑐹𑐣𑑂𑐫𑐟𑐵𑐫𑑂 𑐟𑐣𑐵𑐰𑐣𑐷
𑐐𑐣𑐵𑐰𑐣𑐷 𑐕𑐸𑑄 𑐣𑑄 𑐮𑑂𑐫𑐣𑐶𑐩𑐏𑐸
𑐕𑐸𑑄 𑐣𑑄 𑐡𑐂𑐩𑐏𑐸
𑐗𑐷𑐐𑐸 𑐳𑐨𑑂𑐫𑐟𑐵 𑐳𑑄𑐳𑑂𑐎𑐺𑐟𑐶 𑐗𑐷𑐐𑐸 𑐩𑑂𑐴𑐳𑐷𑐎𑐵
𑐦𑐸𑐎𑑂𑐎 𑐣𑑂𑐴𑐣𑐵𑐰𑐣𑐷
𑐗𑐷𑐐𑐸 𑐨𑐎𑑂𑐟𑐶𑐫𑐵𑐟 𑐱𑐎𑑂𑐟𑐶𑐂 𑐴𑐶𑐂𑐎𑐾𑐐𑐸
𑐗𑐷𑐥𑐶𑑄 𑐣𑐾𑐥𑐵𑑅𑐩𑐶 𑐕𑐥𑑂𑐥𑑄𑐕𑐢𑐷 𑐖𑐵𑐫𑐾𑐐𑐸
𑐗𑐷𑐐𑐸 𑐣𑐾𑐥𑐵𑐮𑐨𑐵𑐳𑐵 𑐴𑐾 𑐏𑑅
𑐐𑐸𑐧𑐮𑐾 𑐟𑐶𑐧𑑅 𑐧𑐶𑐫𑐵𑑅 𑐠𑐎𑐵𑐫𑐾𑐐𑐸
𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐾𑐐𑐸
𑐠𑑂𑐰𑐴𑐾 𑐰𑐶𑐱𑐸𑐡𑑂𑐢 𑐢𑐬𑑂𑐩 𑐖𑐸𑐂 𑑋𑑋

𑐳𑐸𑐨𑐵𑐫𑑂–𑐖𑐫 𑐩𑐵𑑄𑐨𑐵𑐫𑑂