𑐥𑐵𑐮𑑄𑐥𑐵𑑅 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐣𑐶𑑄𑐟𑐶𑑄 𑐳𑐴𑐮𑐴

𑐏𑑂𑐰𑐥- 𑐩𑑂𑐴𑑀𑐟𑐶𑑄 𑐣𑑄 𑐣𑐶𑐮𑐵𑐫𑑂 𑐕𑐎𑑂𑐰𑑅 𑐕𑐐𑐹 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐾𑐐𑐸 𑐮𑑂𑐫𑐵𑐏𑑄 𑐳𑐴𑐮𑐴 𑐖𑐹𑐐𑐸 𑐡𑐸 𑑋 𑐠𑐣𑐫𑐵 𑐳𑐵𑐴𑐶𑐟𑑂𑐫𑐮𑐶𑐳𑐾 𑐳𑐬𑑀𑐎𑐵𑐬𑐵 𑐡𑐸𑐐𑐸 𑐠𑐷𑐠𑐷 𑐳𑑄𑐳𑑂𑐠𑐵𑐫𑐵 𑐡𑐠𑐸𑐂 𑐖𑐹𑐐𑐸 𑐳𑐴𑐮𑐴 𑐩𑐸𑑃𑐖𑑂𑐫𑐵𑑄 𑐩𑑂𑐴𑑀𑐟𑐶𑑄 𑐣𑑄 𑐣𑐶𑐮𑐵𑐫𑑂 𑐕𑐎𑑂𑐰𑑅 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐳𑐴𑐮𑐴 𑐖𑐹𑐐𑐸 𑐏𑑅 𑑋

𑐰𑐶𑐬𑐵𑐚 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑐵 𑐎𑐸𑐟𑐮𑐫𑑂 𑐣𑐾𑐥𑐵𑐮 𑐳𑐵𑐴𑐶𑐟𑑂𑐫 𑐩𑐣𑑂𑐡𑐶𑐬, 𑐣𑑂𑐴𑑂𑐫𑐖𑑂𑐫𑐵 𑐏𑐮𑑅, 𑐳𑐶𑐡𑑂𑐢𑐶𑐡𑐵𑐳 𑐥𑑂𑐬𑐟𑐶𑐲𑑂𑐛𑐵𑐣, 𑐬𑐵𑐩𑐱𑐾𑐏𑐬 𑐮𑐸𑐩𑐣𑑂𑐟𑐶 𑐡𑐧𑐹, 𑐫𑐵𑐟𑐵𑐖𑑅, 𑐨𑐎𑑂𑐟𑐥𑐸𑐬 𑐳𑐵𑐴𑐶𑐟𑑂𑐫𑐶𑐎 𑐳𑐩𑐵𑐖 𑐠𑐾𑑄𑐖𑑂𑐫𑐵𑑅𑐐𑐸 𑐳𑐵𑐴𑐶𑐟𑑂𑐫𑐶𑐎 𑐰 𑐳𑐵𑐴𑐶𑐟𑑂𑐫𑐮𑐶𑐳𑐾 𑐳𑐬𑑀𑐎𑐵𑐬 𑐡𑐸𑐐𑐸 𑐳𑑄𑐳𑑂𑐠𑐵𑐫𑐵 𑐥𑑂𑐬𑐟𑐶𑐣𑐶𑐢𑐶 𑐡𑐠𑐸𑐂 𑐩𑑂𑐴𑑀𑐟𑐶𑑄 𑐣𑑄 𑐣𑐶𑐮𑐵𑐫𑑂 𑐕𑐎𑑂𑐰𑑅 𑐥𑐵𑐮𑑄𑐥𑐵𑑅 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐏𑑃𑐫𑑂 𑐳𑐴𑐮𑐴 𑐖𑐹𑐐𑐸 𑐏𑑅 𑑋 𑐕𑐐𑐹 𑐢𑐮𑑅 𑐴𑐾 𑐡𑐫𑐾𑐎𑐵𑑅 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐏𑑃𑐫𑑂 𑐳𑐴𑐮𑐴 𑐖𑐹𑐐𑐸 𑐏𑑅 𑑋

𑐰𑐶𑐢𑐵𑐐𑐟 𑐬𑐸𑐥𑑄 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐫𑐵 𑐮𑐵𑐐𑐵𑐎𑐠𑑄 𑐳𑐵𑐴𑐶𑐟𑑂𑐫𑐎 𑐖𑑂𑐫𑐵𑐗𑑂𑐰𑑅 𑐄𑐎𑐶𑐫𑐵 𑐳𑐩𑐷𑐎𑑂𑐲𑐵, 𑐳𑐩𑐵𑐮𑑀𑐔𑐣𑐵, 𑐃𑐫𑐵 𑐁𑐰𑐱𑑂𑐫𑐎𑐟𑐵 𑐰 𑐩𑐵𑐐𑐎𑐠𑑄 𑐳𑐵𑐴𑐶𑐟𑑂𑐫𑐫𑐵 𑐠𑐷𑐠𑐷 𑐰𑐶𑐲𑐫𑐫𑑂 𑐰𑐶𑐢𑐵𑐐𑐟 𑐬𑐸𑐥𑑄 𑐐𑑀𑐲𑑂𑐛𑐶, 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐟 𑐳𑐵𑐴𑐶𑐟𑑂𑐫𑐥𑑂𑐬𑐟𑐶 𑐀𑐣𑐸𑐬𑐵𑐐 𑐧𑑂𑐰𑐮𑑄𑐎𑐾𑐐𑐸, 𑐳𑐵𑐴𑐶𑐟𑑂𑐫 𑐳𑐶𑐬𑑂𑐖𑐣𑐵𑐫𑐵 𑐰𑐶𑐲𑐫𑐫𑑂 𑐥𑑂𑐬𑐱𑐶𑐎𑑂𑐲𑐞, 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑑂𑐬𑐱𑐶𑐎𑑂𑐲𑐫𑐵, 𑐨𑐵𑐲𑐵 𑐩𑐴𑐵𑐬𑐠𑐷𑐥𑐶𑐣𑐶𑐐𑐸 𑐧𑐸𑐡𑐶𑑄 𑐴𑐣𑐾𑐐𑐸𑐣𑐵𑐥𑑄 𑐩𑐾𑐩𑐾𑐐𑐸 𑐰𑐶𑐲𑐫𑐫𑐵𑐟 𑐣𑑄 𑐖𑑂𑐫𑐵𑐗𑑂𑐰𑐮𑐫𑑂 𑐡𑐸𑐠𑑂𑐫𑐵𑐎𑐵 𑐫𑑄𑐎𑐾𑐐𑐸 𑐏𑑃𑐫𑑂 𑐳𑐴𑐮𑐴 𑐖𑐹𑐐𑐸 𑐏𑑅 𑑋

𑐠𑐸𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐧𑐮𑐫𑑂 𑐳𑐬𑑀𑐎𑐵𑐬𑐰𑐵𑐮𑐵 𑐳𑑄𑐳𑑂𑐠𑐵𑐥𑐵𑐏𑐾𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑑅𑐥𑐶𑐣𑐶𑐐𑐸 𑐣𑐶𑐫𑐩𑐶𑐟 𑐖𑑂𑐫𑐵𑐗𑑂𑐰𑑅𑐫𑐵 𑐮𑐶𑐔𑑂𑐰𑑅 𑐩𑐮𑐵𑐂𑐎𑐠𑑄 𑐖𑑂𑐫𑐵𑐗𑑂𑐰𑑅𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸, 𑐕𑐐𑐹 𑐳𑑄𑐳𑑂𑐠𑐵𑐫𑐵 𑐐𑑂𑐰𑐳𑐵𑑅 𑐥𑐵𑑅 𑐮𑐵𑐂𑐐𑐸 𑐂𑐮𑐫𑑂 𑐩𑐾𑐩𑐾𑐐𑐸 𑐏𑐮𑑅, 𑐥𑐸𑐔𑐮𑑄 𑐣𑑄 𑐧𑑂𑐰𑐟𑐶 𑐎𑐵𑐫𑐾𑐐𑐸, 𑐰𑐶𑐲𑐫𑐐𑐟 𑐁𑐰𑐱𑑂𑐫𑐎𑐟𑐵 𑐎𑐠𑑄 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐰 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐧𑐮𑐫𑑂 𑐩𑐮𑑂𑐰𑐵𑐂𑐎𑐠𑑄 𑐰𑐵 𑐕𑐐𑐹 𑐴𑐾 𑐥𑑂𑐬𑐎𑐺𑐟𑐶𑐫𑐵 𑐖𑑂𑐫𑐵𑐗𑑂𑐰𑑅 𑐩𑐫𑐵𑐫𑐾𑐐𑐸 𑐰𑐶𑐲𑐫𑐫𑑂 𑐳𑐴𑐮𑐴 𑐖𑐹𑐐𑐸 𑐏𑑅 𑑋

𑐁𑑅𑐫𑐵𑐟 𑐠𑐸𑐎𑐠𑑄𑐫𑐵 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐧𑐵𑐬𑐾 𑐳𑐴𑐮𑐴 𑐖𑐹𑐐𑐸 𑐏𑑅𑐳𑐵𑑄 𑐳𑐬𑑀𑐎𑐵𑐬𑐰𑐵𑐮 𑐳𑑄𑐳𑑂𑐠𑐵𑐫𑑂 𑐳𑐴𑐮𑐴 𑐧𑑂𑐫𑐵𑐎𑐾𑐢𑐸𑑄𑐎𑐵𑑅 𑐖𑐎 𑐖𑑂𑐫𑐵𑐗𑑂𑐰𑑅𑐫𑐵 𑐢𑐮𑑅 𑐟𑐫𑐵𑐬 𑐫𑐵𑐫𑐾𑐐𑐸 𑐏𑑃 𑐎𑑂𑐰𑑅𑐕𑐶𑐄𑐐𑐸 𑐡𑐸𑐳𑐵 𑐧𑐵𑑅𑐕𑐶 𑐮𑐶𑐥𑐵 𑐔𑑂𑐰𑐣𑐷𑐐𑐸 𑐩𑐾𑐐𑐸 𑐩𑐸𑑃𑐖𑑂𑐫𑐵𑑄 𑐠𑑂𑐰 𑐧𑐵𑐬𑐾 𑐣𑐶𑐬𑑂𑐞𑐫 𑐖𑐸𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋