𑐥𑑂𑐬𑐡𑐾𑐱𑐫𑑂 𑐨𑐵𑐲𑐵 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵 𑐣𑐶𑐟𑐶𑑄 𑐳𑑂𑐰𑑄𑐐𑐹 𑐮𑑃𑐥𑐸

𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣 𑐎𑐠𑑄 𑐐𑐛𑐣 𑐖𑐹𑐐𑐸 𑐨𑐵𑐲𑐵 𑐁𑐫𑑀𑐐𑑄 𑐳𑐶𑐦𑐵𑐬𑐶𑐳 𑐫𑐵𑑅𑐎𑐠𑑄 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐎𑐵𑐩𑐎𑐵𑐖𑐶 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸 𑐣𑐶𑐟𑐶𑑄 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐳𑐬𑐎𑐵𑐬𑑄 𑐮𑐶𑐧𑐵𑐎𑑂𑐎 𑐖𑐹𑐳𑐵𑑄 𑐐𑐸𑐐𑐸 𑐎𑐠𑑄 𑐏𑑃 𑐎𑑂𑐰𑑅𑐕𑐶𑐟 𑐄𑐎𑐶𑐫𑐵𑐟 𑐎𑐫𑐵𑑅 𑐣𑐾𑐰𑐵𑑅 𑐰 𑐟𑐵𑐩𑐵𑐒 𑐳𑐩𑐸𑐡𑐵𑐫𑑄 𑐮𑐳𑐎𑐸𑐳 𑐫𑐵𑑅𑐐𑐸 𑐡𑐸 𑑋 𑐁𑑅 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣 𑐎𑐠𑑄 𑐴𑐾 𑐨𑐵𑐲𑐵 𑐁𑐫𑑀𑐐𑐫𑐵 𑐳𑐶𑐦𑐵𑐬𑐶𑐳𑐫𑐵 𑐁𑐢𑐵𑐬𑐫𑑂 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵 𑐮𑐵𑐐𑐹 𑐖𑐸𑐂𑐐𑐸 𑐖𑐸𑐮 𑐢𑐎𑐵𑑅 𑐟𑐵𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋

𑐕𑐏𑐾 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑑄 𑐨𑐵𑐲𑐵𑐫𑐵 𑐳𑐰𑐵𑐮𑐫𑑂 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐡𑐸𑐳𑐵, 𑐩𑐾𑐏𑐾 𑐥𑑂𑐬𑐡𑐾𑐱𑐫𑐵 𑐳𑑄𑐳𑐡𑐫𑐵 𑐃 𑐴𑐾 𑐎𑑂𑐰𑐵𑑅𑐐𑐸 𑐡𑐸 𑑋 𑐳𑑄𑐰𑐶𑐢𑐵𑐣 𑐎𑐠𑑄 𑐮𑐵 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑑄𑐳𑐡𑐫𑑂 𑐰𑐶𑐢𑐾𑐫𑐎 𑐫𑑄𑐎𑐵𑑅 𑐎𑐵𑐣𑐹𑐣 𑐡𑐫𑐾𑐎𑐵𑑅 𑐮𑐵𑐐𑐹 𑐫𑐵𑐫𑐾𑐩𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐁𑑅 𑐩𑑄𑐳𑐶𑐬 𑐩𑐴𑐶𑐣𑐵𑐫𑐵 𑑔 𑐐𑐟𑐾 𑐁𑐩 𑐣𑐶𑐬𑑂𑐰𑐵𑐔𑐣 𑐖𑐸𑐂𑐐𑐸 𑐀𑐰𑐳𑑂𑐠𑐵 𑐖𑐸𑐫𑐵 𑐥𑑂𑐬𑐡𑐾𑐱 𑐳𑑄𑐳𑐡𑐫𑐵 𑐃 𑐣𑑄 𑐦𑐹𑐐𑐸 𑐡𑐸 𑑋 𑐁𑑅𑐫𑐵 𑐔𑐸𑐣𑐵𑐰𑐫𑑂 𑐥𑑂𑐬𑐡𑐾𑐱 𑐳𑐨𑐵𑐫𑐵 𑐣𑐶𑐟𑐶𑑄 𑐣𑑄 𑐔𑐸𑐣𑐵𑐰 𑐖𑐸𑐂𑐐𑐸 𑐏𑑅 𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐁𑑅 𑐠𑐠𑐾𑑄 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑑄𑐳𑐡𑑄 𑐰𑐶𑐢𑐾𑐫𑐎 𑐥𑐵𑐬𑐶𑐟 𑐫𑐵𑐣𑐵𑑅 𑐋𑐣 𑐮𑐵𑐐𑐹 𑐫𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐴𑐾 𑐩𑑄𑐟 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐣𑑂𑐴𑐹𑐐𑐸 𑐳𑑄𑐳𑐡 𑐴𑐾 𑐰𑐫𑐾𑐩𑐵𑐣𑐶 𑑋 𑐄𑐎𑐶𑑄 𑐁𑑅 𑐳𑐵𑑄𑐳𑐡 𑐖𑐸𑐫𑐵𑑅 𑐟𑑂𑐫𑐵𑐣𑐵 𑐰𑐂𑐥𑐶𑑄𑐳𑑄 𑐠𑑂𑐰 𑐖𑑂𑐫𑐵 𑐫𑐵𑐂 𑐎𑐶 𑐩𑐫𑐵𑐂 𑐢𑐫𑐵𑐐𑐸 𑐐𑐩𑑂𑐨𑐷𑐬 𑐣𑑂𑐴𑑂𑐫𑐳𑑅 𑐧𑑂𑐰𑐮𑑄𑐐𑐸 𑐡𑐸 𑑋

𑐳𑑄𑐰𑐶𑐢𑐵𑐣𑐳𑐨𑐵𑐥𑐵𑐏𑐾𑑄 𑐳𑑄𑐰𑐶𑐢𑐵𑐣 𑐣𑐶𑐬𑑂𑐩𑐵𑐞 𑐖𑐸𑐂 𑐢𑐸𑑄𑐎𑐵𑑅 𑐣𑑂𑐴𑐵𑐥𑐵𑑄𑐐𑐸 𑐔𑐸𑐣𑐵𑐰𑐥𑐵𑐏𑐾𑑄 𑐟𑑂𑐫𑐵𑐣𑐵𑐰𑑅𑐥𑐶𑑄 𑐣𑐶𑐰𑐬𑑂𑐟𑐩𑐵𑐣 𑐳𑐵𑑄𑐳𑐡𑐟 𑐏𑑅 𑑋 𑐄𑐩𑐶𑐳𑑄 𑐳𑑄𑐰𑐶𑐢𑐵𑐣𑐫𑐵 𑐨𑐵𑐰𑐣𑐵 𑐀𑐮𑐾 𑐳𑑄𑐰𑐶𑐢𑐵𑐣 𑐡𑐫𑐾𑐎𑐹𑐐𑐸 𑐂𑐮𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑐳𑑄 𑐟𑑅𑐐𑐸 𑐏𑑃, 𑐄𑐩𑐶𑐐𑐸 𑐩𑐵𑐐, 𑐩𑐸𑐡𑑂𑐡𑐵 𑐧𑐵𑑄𑐮𑐵𑐎 𑐴𑐾 𑐠𑐹 𑑋 𑐁𑑅 𑐰𑐂𑐥𑐶𑑄 𑐳𑐵𑑄𑐳𑐡𑐟 𑐐𑐖𑑂𑐫𑐵𑑅𑐥𑐶𑑄 𑐖𑐸𑐂 𑐢𑐎𑐵𑑅 𑐢𑐵𑐫𑐾𑐠𑐵𑐎𑐸 𑑋 𑐳𑑄𑐑𑐷𑐫𑐟𑐵𑐫𑐵𑐟 𑐴𑐾 𑐰𑐶𑐬𑑀𑐢 𑐫𑐵𑐂𑐥𑐶𑑄, 𑐀𑐮𑐾 𑐕𑐐𑐹 𑐨𑐵𑐲𑐵 𑐕𑐐𑐹 𑐨𑐾𑐲 𑐕𑐐𑐹 𑐖𑐵𑐟𑐷𑐫𑐵 𑐨𑐵𑐰𑐣𑐵 𑐖𑑂𑐰𑐣𑐷𑐥𑐶𑑄 𑐀𑐥𑑂𑐰𑑅 𑐟𑑂𑐫𑐵𑐣𑐵 𑐰𑐮 𑐢𑐵𑑅𑐳𑐵 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐮𑐵𑐐𑐹 𑐫𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐰𑐂𑐩𑐏𑐸 𑑋 𑐄𑐎𑐶𑑄 𑐠𑑂𑐰 𑐐𑐩𑑂𑐨𑐷𑐬 𑐰𑐶𑐲𑐫 𑐏𑑅 𑑋

𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑑄𑐳𑐡𑑄 𑐳𑑄𑐑𑐷𑐫𑐟𑐵𑐫𑐵 𑐨𑐵𑐰𑐣𑐵 𑐎𑐠𑑄 𑐐𑐸𑐮𑐶 𑐖𑑂𑐫𑐵 𑐫𑐵𑐫𑐾𑐩𑐵𑑅𑐐𑐸 𑐏𑑅 𑐄𑐮𑐶 𑐖𑑂𑐫𑐵 𑐫𑐵𑑅𑐐𑐸 𑐏𑐣𑐾𑐩𑐡𑐸 𑑋 𑐢𑐵𑐫𑐾𑐟 𑐮𑐵 𑐎𑐾𑐣𑑂𑐡𑑂𑐬𑐷𑐫 𑐳𑐬𑐎𑐵𑐬𑑄 𑐀𑐢𑐶𑐎𑐵𑐬 𑐴𑐾 𑐩𑐧𑐶𑐄 𑐢𑐎𑐵𑑅 𑐢𑐵𑐂 𑑋 𑐟𑐬 𑐳𑑄𑐰𑐶𑐢𑐵𑐣𑐫𑑂 𑐡𑐸𑐐𑐸 𑐀𑐢𑐶𑐎𑐵𑐬𑐫𑐵𑐟 𑐕𑑂𑐫𑐮𑐵𑑅 𑐟𑐎𑑄 𑐖𑑂𑐫𑐵 𑐫𑐵𑑅𑐐𑐸 𑐏𑐣𑐾𑐩𑐡𑐸 𑑋 𑐡𑐾𑐫𑑂𑐫𑐵 𑐣𑑂𑐴𑐫𑑂𑐐𑐹 𑐥𑑂𑐬𑐡𑐾𑐱 𑐩𑐢𑑂𑐫𑐾 𑐩𑐢𑐾𑐱 𑐥𑑂𑐬𑐡𑐾𑐱𑐫𑐵 𑐴𑐾 𑐏𑑃 𑐮𑑂𑐴𑐵𑐫𑐾𑐐𑐸 𑐏𑑅𑐳𑐵𑑄 𑐀𑐣 𑐩𑐢𑐾𑐳 𑐥𑑂𑐬𑐡𑐾𑐱𑐫𑐵 𑐣𑐵𑐩𑑄 𑐰𑐶𑐱𑑂𑐰 𑐰𑐶𑐡𑑂𑐫𑐵𑐮𑐫 𑐟𑐎𑑄 𑐡𑐫𑐾𑐎𑐮 𑑋 𑐩𑐢𑐾𑐳 𑐥𑑂𑐬𑐡𑐾𑐱𑐫𑐵 𑐣𑐶𑑄𑐟𑐶𑑄 𑐮𑑀𑐎𑐳𑐾𑐰𑐵 𑐁𑐫𑑀𑐐𑐣𑐶𑐳𑐾𑑄 𑐥𑑂𑐬𑐴𑐬𑐷𑐫𑐵 𑐳𑐰𑐵𑐮𑐫𑐵𑐟 𑐟𑐎𑑄 𑐎𑐫𑐵𑑅 𑐕𑐐𑐹 𑐎𑐠𑑄 𑐎𑐾𑐣𑑂𑐡𑑂𑐬𑐷𑐫 𑐳𑐬𑐎𑐵𑐬𑐮𑐶𑐳𑐾 𑐳𑑄𑐑𑐬𑑂𑐲 𑐫𑐵𑐟 𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐢𑐵𑐟𑑂𑐠𑐾𑑄 𑐥𑑂𑐬𑐡𑐾𑐱𑐥𑐵𑐏𑐾𑑄 𑐳𑑄𑐑𑐷𑐫𑐟𑐵𑐫𑐵 𑐀𑐨𑑂𑐫𑐵𑐳 𑐫𑐵𑐫𑐾𑐐𑐸 𑐣𑐶𑐟𑐶𑑄 𑐩𑐢𑐾𑐱 𑐥𑑂𑐬𑐡𑐾𑐱𑑄 𑐕𑐸𑑄 𑐕𑐸𑑄 𑐎𑐸𑐟𑑅 𑐫𑐵𑑅𑐐𑐸 𑐏𑐣𑐾𑐡𑐸 𑑋

𑐣𑑂𑐴𑐫𑐐𑐹 𑐥𑑂𑐬𑐡𑐾𑐱 𑐩𑐢𑑂𑐫𑐾 𑐐𑐞𑑂𑐜𑐎𑐷 𑐥𑑂𑐬𑐡𑐾𑐱𑑄 𑐥𑑂𑐬𑐡𑐾𑐱𑐳𑑂𑐟𑐬𑐫𑐵 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣 𑐡𑐫𑐾𑐎𑐮 𑑋 𑐐𑐞𑑂𑐜𑐎𑐷 𑐥𑑂𑐬𑐡𑐾𑐱 𑐥𑑂𑐬𑐟𑐶𑐲𑑂𑐛𑐵𑐣 𑐡𑐫𑐾𑐎𑐵𑑅 𑐀𑐣𑐫𑐵 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐣𑐶𑐟𑐶𑑄 𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐰𑐵𑐳𑑂𑐟𑐰𑐫𑑂 𑐥𑑂𑐬𑐡𑐾𑐱𑐫𑐵 𑐎𑑂𑐲𑐾𑐟𑑂𑐬𑐵𑐢𑐶𑐎𑐵𑐬 𑐡𑐸𑐣𑐾𑐫𑐵 𑐖𑑂𑐫𑐵 𑐴𑐾 𑐏𑑅 𑐠𑑂𑐰 𑑋 𑐠𑐸𑐐𑐸 𑐎𑐠𑑄 𑐳𑑂𑐰𑐮 𑐢𑐵𑑅𑐳𑐵 𑐥𑑂𑐬𑐡𑐾𑐱 𑐠𑑅𑐩𑑂𑐴𑐾𑐳𑑂𑐫𑐵𑑄 𑐴𑐾 𑐫𑐵𑐫𑐾𑐦𑐸𑐐𑐸 𑐖𑑂𑐫𑐵 𑐣𑑄 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾 𑐩𑐡𑐸 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑐰𑐵𑐮𑐫𑑂 𑐮𑐵 𑐗𑐣 𑐴𑐾 𑐏𑐣𑐾𑐩𑐡𑐸 𑑋

𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐟𑐎𑑄 𑐣𑐾𑐰𑐵𑑅 𑐰 𑐟𑐵𑐩𑐵𑐒𑐟𑐫𑑂𑐐𑐸 𑐨𑐵𑐰𑐣𑐵𑐫𑐵 𑐀𑑅𑐏𑑅 𑐮𑐵 𑐟𑑅𑐐𑐸 𑐴𑐾 𑐖𑐸𑐮 𑐄𑐎𑐶𑐳𑐣𑑄 𑐣𑐵𑑄 𑐟𑐎𑑄 𑐠𑐖𑑂𑐫𑐵𑑅𑐐𑐸 𑐡𑐶𑐣𑐫𑑂 𑐑𑑀𑐲𑐞𑐵 𑐫𑐵𑐟, 𑐐𑐸𑐐𑐸 𑐡𑐶𑐣𑐫𑐵𑐟 𑐣𑐾𑐰𑐵𑑅 𑐰 𑐟𑐵𑐩𑐵𑐒𑐟𑐫𑑂𑐳𑑄 𑐴𑐵𑐎𑐸𑐐𑐸 𑐣𑑂𑐴𑐶𑐫𑐵 𑐬𑐸𑐥𑐫𑑂 𑐴𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐰 𑐢𑐫𑐵𑐐𑐸 𑐥𑐸𑐲 𑑒𑑗 𑐐𑐟𑐾 𑐏𑑅 𑑋 𑐥𑐺𑐠𑑂𑐰𑐷 𑐣𑐵𑐬𑐵𑐫𑐞 𑐱𑐵𑐴𑐫𑐵 𑐧𑐸𑐡𑐶𑑄𑐫𑐵 𑐡𑐶𑑄 𑑋 𑐐𑐸𑐐𑐸 𑐡𑐶𑑄𑐫𑐵𑐟 𑐧𑑂𑐬𑐩𑑂𑐴𑐸𑐧𑐵𑐡𑐷 𑐳𑑀𑐔 𑐡𑐸𑐥𑐶𑑄𑐳𑑄 𑐥𑐺𑐠𑑂𑐰𑐷 𑐖𑐫𑐣𑑂𑐟𑐷, 𑐬𑐵𑐲𑑂𑐚𑑂𑐬𑐶𑐫 𑐊𑐎𑐟𑐵 𑐡𑐶𑐰𑐳 𑐢𑐎𑐵𑑅 𑐴𑐣𑐵 𑐰𑐫𑐵𑐔𑑂𑐰𑐣 𑑋 𑐀𑐮𑐾 𑐣𑐾𑐰𑐵𑑅, 𑐟𑐵𑐩𑐵𑐒 𑐣𑐵𑐥𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂𑐳𑑄 𑐴𑐵𑐎𑐹𑐐𑐸 𑐣𑑂𑐴𑐶 𑐢𑐎𑐵𑑅 𑐴𑐣𑐵 𑐰𑐫𑐵𑐔𑑂𑐰𑐣 𑑋 𑐀𑐖𑑂𑐫𑐵𑑅𑐐𑐸 𑐡𑐶𑐣𑐫𑑂 𑐮𑐵𑐎𑐵𑑅 𑑓 𑐣𑐩𑑂𑐧𑐬 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐧𑐵𑐐𑑂𑐩𑐟𑐷 𑐟𑑅𑐐𑐸 𑐏𑑅 𑑋 𑐄𑐎𑐶𑑄 𑐣𑐾𑐰𑐵𑑅 𑐰 𑐟𑐵𑐩𑐵𑐒𑐟𑐫𑑂𑐐𑐸 𑐡𑐺𑐲𑑂𑐚𑐶𑐎𑑀𑐞𑑄 𑐳𑑂𑐰𑐮 𑐢𑐵𑑅𑐳𑐵 𑐮𑐵 𑐁𑑅 𑐟𑐎 𑐣𑑄 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑑄 𑐏𑐵𑐳 𑐴𑐾 𑐳𑐩𑐸𑐡𑐵𑐫𑐫𑐵 𑐣𑐶𑑄𑐟𑐶𑑄 𑐕𑐸𑑄 𑐖𑑂𑐫𑐵 𑐫𑐵𑑅𑐐𑐸 𑐏𑐣𑐾𑐩𑐡𑐸 𑑋

𑐮𑐶𑐥𑐵𑑄𑐐𑐸 𑐂𑐮𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐬𑐵𑐲𑑂𑐚𑑂𑐬𑐶𑐫 𑐳𑑄𑐐𑐛𑐣 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱, 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐰 𑐣𑐾𑐥𑐵𑐮 𑐟𑐵𑐩𑐵𑐒 𑐑𑐾𑐡𑐸𑐒𑐫𑐵 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐳𑐩𑐶𑐟𑐶𑐥𑐵𑐏𑐾𑑄 𑐕𑐸𑑄 𑐕𑐸𑑄 𑐥𑐴𑐮 𑐫𑐵𑐣𑐵𑑅 𑐨𑐵𑐲𑐵 𑐁𑐫𑑀𑐐𑐫𑐵 𑐳𑐶𑐦𑐵𑐬𑐶𑐳 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐎𑐵𑐩𑐎𑐵𑐖𑐶 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐥𑑂𑐬𑐡𑐾𑐱𑐫𑑂 𑐮𑐵𑐐𑐹 𑐖𑐸𑐂 𑐢𑐎𑐵𑑅 𑐁𑐱𑐵 𑐫𑐵𑑅𑐐𑐸 𑐏𑑅 𑑋 𑐟𑐬 𑐡𑐾𑐱𑐫𑑂 𑐔𑐸𑐣𑐵𑐰𑐫𑐵 𑐩𑐵𑐴𑑀𑐮𑑄 𑐫𑐵𑐣𑐵 𑐁𑑅 𑐕𑐸 𑐖𑐸𑐂𑐐𑐸 𑐏𑑅 𑐢𑐎𑐵𑑅 𑐟𑐳𑐎𑑄 𑐢𑐵𑐫𑐾 𑐠𑐵𑐎𑐸𑐐𑐸 𑐀𑐰𑐳𑑂𑐠𑐵 𑐧𑑂𑐰𑐮𑑄𑐐𑐸 𑐡𑐸 𑑋

𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱, 𑐰𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐰 𑐣𑐾𑐥𑐵𑐮 𑐟𑐵𑐩𑐵𑐒 𑐑𑐾𑐡𑐸𑐒𑐫𑐵 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐥𑐵𑐏𑐾𑑄 𑐥𑑂𑐬𑐡𑐾𑐱 𑐳𑐵𑑄𑐳𑐡𑐟𑐫𑑂𑐟 𑐡𑐧𑐵𑐧 𑐧𑐶𑐂𑐐𑐸, 𑐮𑐰𑐶𑐒 𑐫𑐵𑐫𑐾𑐐𑐸, 𑐖𑑂𑐘𑐵𑐥𑐣 𑐥𑑁 𑐧𑐶𑐂𑐐𑐸, 𑐥𑑂𑐬𑐟𑑂𑐫𑐾𑐎 𑐳𑐵𑑄𑐳𑐡𑐟𑐫𑑂𑐟 𑐥𑑁 𑐧𑐶𑐂𑐐𑐸, 𑐊𑐳𑐊𑐩𑐊𑐳 𑐫𑐵𑐫𑐾𑐐𑐸, 𑐥𑑂𑐬𑐡𑐬𑑂𑐱𑐣 𑐫𑐵𑐫𑐾𑐐𑐸, 𑐳𑐨𑐵𑐩𑐸𑐏, 𑐄𑐥𑐳𑐨𑐵𑐩𑐸𑐏𑑄𑐣𑐶𑐳𑐾𑑄 𑐎𑐫𑐵𑑅 𑐳𑐩𑑂𑐧𑐣𑑂𑐢𑐶𑐟 𑐩𑐣𑑂𑐟𑑂𑐬𑐷𑐣𑐶𑐳𑐾𑑄 𑐩𑐸𑐏𑑂𑐫𑐩𑐣𑑂𑐟𑑂𑐬𑐷𑐫𑐵𑐟 𑐟𑐎𑑄 𑐖𑑂𑐘𑐵𑐥𑐣 𑐥𑑁 𑐮𑑅𑐮𑑂𑐴𑐵𑐫𑐾𑐐𑐸 𑐖𑑂𑐫𑐵 𑐵𑑅𑐐𑐸 𑐏𑑅 𑑋 𑐄𑐮𑐶 𑐖𑐎 𑐩𑐏𑐸 𑐨𑐵𑐲𑐵 𑐁𑐫𑑀𑐐𑐫𑐵 𑐥𑑁 𑐳𑐶𑑄𑐴𑐡𑐬𑐧𑐵𑐬𑐫𑑂 𑐠𑑂𑐫𑑄𑐎𑐾𑐐𑐸, 𑐳𑐶𑑄𑐴𑐡𑐬𑐧𑐵𑐬𑐫𑐵 𑐥𑑁 𑐠𑑅𑐥𑐶𑑄𑐳𑑄 𑐴𑐾 𑐖𑑂𑐰𑐣𑐵 𑐰𑐣𑐵𑑅 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑑂 𑐠𑑂𑐫𑑄𑐎𑐾𑐐𑐸, 𑐳𑐵𑑄𑐳𑐡𑐟𑐫𑑂𑐟 𑐩𑐸𑑄𑐎𑐵𑑅 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸, 𑐣𑐾𑐰𑐵𑑅 𑐏𑐮𑑅 𑐥𑐸𑐔𑑅𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑐮𑐶𑐳𑐾 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸𑐣𑐶𑐳𑐾𑑄 𑐠𑐷𑐠𑐷 𑐎𑐠𑑄𑐫𑐵 𑐡𑐧𑐵𑐧 𑐩𑐸𑐮𑐎 𑐀𑐨𑐶𑐫𑐵𑐣 𑐳𑑄𑐔𑐵𑐮𑐣 𑐩𑐫𑐵𑑅𑐐𑐸 𑐣𑑄 𑐩𑐏𑐸 𑑋

𑐀𑐠𑐾𑐴𑐾 𑐨𑐵𑐲𑐵 𑐁𑐫𑑀𑐐𑐫𑐵 𑐳𑐶𑐦𑐵𑐬𑐶𑐳 𑐮𑑅𑐮𑑂𑐴𑐵𑐫𑐾𑐐𑐸, 𑐨𑐵𑐲𑐵 𑐁𑐫𑑀𑐐𑑄 𑐡𑐫𑐾𑐎𑐹𑐐𑐸 𑐣𑐩𑐸𑐣𑐵 𑐎𑐵𑐣𑐹𑐣 𑐮𑑅𑐮𑑂𑐴𑐵𑐫𑐾𑐐𑐸 𑐖𑑂𑐫𑐵 𑐟𑐎𑑄 𑐫𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐎𑐠𑑄 𑐳𑑂𑐰𑐮 𑐢𑐵𑑅𑐳𑐵 𑐫𑐵𑐫𑐾𑐩𑐵𑑅𑐐𑐸 𑐖𑑂𑐫𑐵 𑐦𑐸𑐎𑑂𑐎 𑐫𑐵𑐠𑐾𑑄 𑐴𑐾 𑐫𑐵𑑅𑐐𑐸 𑐡𑐸 𑐀𑐮𑐾 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐰𑐫𑐵 𑐰𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐳𑐬𑐎𑐵𑐬𑑄 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐎𑐵𑐩𑐎𑐵𑐖𑐶 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐮𑐵𑐐𑐹 𑐫𑐵𑐫𑐾𑐐𑐸 𑐣𑐶𑐟𑐶𑑄 𑐥𑑂𑐬𑐎𑑂𑐬𑐶𑐫𑐵 𑐣𑑂𑐴𑑂𑐫𑐵𑐎𑐾𑐐𑐸 𑐢𑐎𑐵𑑅 𑐣𑐶𑐬𑑂𑐞𑐫 𑐫𑐵𑐣𑐵𑑅 𑐎𑐵𑐬𑑂𑐫𑐡𑐮 𑐐𑐛𑐣 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐣𑑄 𑐫𑐵𑑅𑐐𑐸 𑐏𑑅 𑑋 𑐠𑐸𑐮𑐶 𑐟𑐎 𑐳𑑂𑐰𑐮 𑐢𑐵𑑅𑐳𑐵 𑐳𑐎𑐵𑐬𑐵𑐟𑑂𑐩𑐎 𑐬𑐸𑐥𑑄 𑐕𑐸𑑄 𑐕𑐸𑑄 𑐥𑐴𑐮 𑐩𑐖𑐹𑐐𑐸 𑐢𑐵𑑅𑐳𑐵 𑐀𑐰𑐱𑑂𑐫 𑐣𑑄 𑐩𑐏𑐸 𑑋 𑐟𑐬 𑐁𑑅 𑐳𑑄𑐳𑐡 𑐴𑐾 𑐩𑐡𑐫𑐾𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐕𑐸 𑐖𑐸𑐂 𑐢𑐫𑐵𑐐𑐸 𑐳𑐎𑐳𑐶𑐐𑐸 𑐔𑐵𑐳𑑀𑐫𑐵 𑐰𑐶𑐲𑐫 𑐖𑐸𑐫𑐵𑐧𑐶𑐄𑐐𑐸 𑐡𑐸 𑑋

𑐁𑑅𑐫𑐵 𑐳𑑂𑐰𑑄𑐐𑐹 𑐮𑑃𑐥𑐸

𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑐬𑐎𑐵𑐬𑑄 𑐐𑐸𑐐𑐸 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐳𑐬𑐎𑐵𑐬𑐷 𑐎𑐵𑐩𑐎𑐵𑐖𑐶 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐮𑐵𑐐𑐹 𑐫𑐵𑐫𑐾𑐐𑐸 𑐢𑐎𑐵𑑅 𑐣𑐶𑐬𑑂𑐞𑐫 𑐫𑐵𑑅𑐐𑐸𑐫𑐵𑐟 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑑂𑐰𑑄𑐐𑐹 𑐮𑑃𑐥𑐸 𑐏𑐣𑐾𑐡𑐸 𑑋 𑐥𑑂𑐬𑐡𑐾𑐱 𑐳𑑄𑐳𑐡 𑐩𑐡𑐫𑐾 𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵 𑐖𑐹𑐳𑐵𑑄 𑐳𑐨𑐵𑐩𑐸𑐏, 𑐄𑐥𑐳𑐨𑐵𑐩𑐸𑐏 𑐣𑐵𑐥𑑄 𑐥𑑂𑐬𑐡𑐾𑐱 𑐳𑐬𑐎𑐵𑐬 𑐮𑐵 𑐡 𑐴𑐾 𑐡𑐣𑐶 𑑋 𑐄𑐎𑐶𑑄 𑐁𑑅 𑐂𑐔𑑂𑐕𑐵𑐱𑐎𑑂𑐟𑐶 𑐡𑐟 𑐢𑐵𑑅𑐳𑐵 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐳𑐬𑐎𑐵𑐬𑐫𑐵 𑐩𑐣𑑂𑐟𑑂𑐬𑐷𑐟𑐫𑑂𑐳𑑄 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐎𑐵𑐩𑐎𑐵𑐖𑐶 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐮𑐵𑐐𑐹 𑐫𑐵𑐫𑐾𑐟 𑐣𑑂𑐴𑑂𑐫𑐵𑑅𑐰𑐣𑐾𑐦𑐂𑐐𑐸 𑐩𑐹𑐮 𑐬𑐸𑐥𑑄 𑐳𑑂𑐰𑑄𑐐𑐹 𑐮𑑃𑐥𑐸 𑐏𑐣𑐾𑐡𑐸 𑑋
𑐨𑐵𑐲𑐵 𑐣𑐷𑐟𑐶 𑐡𑐫𑐾𑐎𑐵𑑅 𑐮𑐵𑐐𑐹 𑐫𑐵𑐫𑐾𑐐𑐸 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑐬𑐎𑐵𑐬𑑄 𑐁𑑅𑐫𑐵 𑐀𑐰𑐳𑑂𑐠𑐵𑐫𑑂 𑐳𑑄𑐳𑐡 𑐩𑐡𑐸𑐳𑐵𑑄 𑐀𑑅𑐥𑐸𑐎 𑐴𑐾 𑐨𑐵𑐲𑐵 𑐣𑐷𑐟𑐶 𑐟𑐫𑐵𑐬 𑐫𑐵𑐣𑐵𑑅 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑂𑐥𑐵𑐏𑐾𑑄 𑐮𑐵𑐐𑐹 𑐫𑐵𑐣𑐵𑑅 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐨𑐵𑐲𑐵 𑐣𑐷𑐟𑐶 𑐩𑐹𑐮 𑐬𑐸𑐥𑑄 𑐨𑐵𑐲𑐵 𑐋𑐣 𑐎𑐠𑑄 𑐴𑐾 𑐴𑐫𑐾𑐐𑐸 𑐀𑐮𑐾 𑐎𑐣𑑂𑐴𑐫𑑂 𑐰𑐣𑐵𑑅 𑐣𑑂𑐴𑐹𑐐𑐸 𑐳𑑄𑐳𑐡𑑄 𑐄𑐎𑐶𑐫𑐵𑐟 𑐴𑐾 𑐋𑐣𑐫𑐵 𑐬𑐸𑐥𑐫𑑂 𑐫𑑄𑐎𑐵𑑅 𑐳𑑄𑐳𑐡𑑄 𑐥𑐵𑐬𑐶𑐟 𑐫𑐵𑐫𑐾𑐦𑐂 𑑋 𑐣𑑂𑐴𑐹𑐥𑐶𑑄 𑐳𑐵𑑄𑐳𑐡𑐟𑐫𑑂𑐳𑑄 𑐣𑑄 𑐄𑐎𑐶𑐫𑐵𑐟 𑐋𑐣𑐫𑐵 𑐬𑐸𑐥𑐫𑑂 𑐥𑐵𑐬𑐶𑐟 𑐫𑐵𑐫𑐾𑐟 𑐧𑐵𑐢𑑂𑐫 𑐖𑐸𑐂 𑑋 𑐄𑐎𑐶𑑄 𑐁𑑅𑐫𑐵 𑐳𑐬𑐎𑐵𑐬𑐫𑐵𑐟 𑐠𑑂𑐰 𑐮𑑃𑐥𑐸 𑐔𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐁𑑅 𑐳𑐬𑐎𑐵𑐬𑐫𑑂 𑐡𑐸𑐐𑐸 𑐡𑐮𑐣𑐶𑐳𑐾𑑄 𑐩𑐣𑑂𑐟𑑂𑐬𑐷𑐟𑐫𑑂𑐳𑑄 𑐠𑐸𑐐𑐸 𑐏𑑃𑐫𑑂 𑐢𑑂𑐫𑐵𑐣 𑐧𑐶𑐂𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸 𑑋

𑐨𑐵𑐲𑐵 𑐰𑐶𑐢𑐫𑐾𑐎 𑐡𑐫𑐾𑐎𑐾𑐐𑐸

𑐨𑐵𑐲𑐵 𑐁𑐫𑑀𑐐𑐫𑐵 𑐳𑐶𑐦𑐵𑐬𑐶𑐳 𑐎𑐠𑑄 𑐳𑐬𑐎𑐵𑐬𑑄 𑐠𑑅𑐩𑑂𑐴𑑄 𑐴𑐾 𑐨𑐵𑐲𑐵 𑐰𑐶𑐢𑐾𑐫𑐎 𑐟𑐫𑐵𑐬 𑐫𑐵𑐫𑐾𑐐𑐸 𑑋 𑐨𑐵𑐲𑐵 𑐁𑐫𑑀𑐐𑐥𑐵𑐏𑐾𑑄 𑐡𑐫𑐾𑐎𑐹𑐐𑐸 𑐣𑐩𑐸𑐣𑐵 𑐋𑐣𑐫𑐵𑐟 𑐴𑐾 𑐁𑐢𑐵𑐬 𑐎𑐠𑑄 𑐣𑐵𑐮𑐵𑑅 𑐰𑐶𑐢𑐾𑐫𑐎 𑐟𑐫𑐵𑐬 𑐫𑐵𑐣𑐵𑑅 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑄 𑐥𑐵𑐬𑐶𑐟 𑐫𑐵𑐫𑐾𑐐𑐸 𑑋 𑐀𑐠𑐾 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑄 𑐥𑐵𑐬𑐶𑐟 𑐫𑐵𑐣𑐵𑐟𑐮 𑐢𑐵𑑅𑐳𑐵 𑐰 𑐳𑐬𑐎𑐵𑐬𑐫𑐵 𑐰𑐶𑐢𑐾𑐫𑐎 𑐖𑐸𑐂 𑑋 𑐳𑐬𑐎𑐵𑐬𑐫𑐵 𑐳𑐩𑑂𑐥𑐟𑑂𑐟𑐶 𑐖𑐸𑐂 𑑋 𑐎𑐣𑑂𑐴𑐫𑑂 𑐰𑐣𑐵𑑅 𑐣𑑂𑐴𑐹𑐐𑐸 𑐳𑑄𑐳𑐡 𑐰𑐂 𑐀𑐮𑐾 𑐣𑑂𑐴𑐹𑐐𑐸 𑐴𑐾 𑐳𑐬𑐎𑐵𑐬 𑐰𑐂 𑑋 𑐄𑐐𑐸 𑐂𑐮𑐫𑑂 𑐰 𑐳𑐬𑐎𑐵𑐬𑑄 𑐰 𑐰𑐶𑐢𑐾𑐫𑐎𑐫𑐵𑐟 𑐣𑐵𑐮𑐵 𑐎𑐵𑐫𑐾𑐟 𑐧𑐵𑐢𑑂𑐫 𑐖𑐸𑐂 𑑋 𑐀𑐮𑐾 𑐳𑑄𑐳𑐡𑐫𑑂 𑐫𑑄𑐎𑐵𑑅 𑐥𑐵𑐬𑐶𑐟 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐮𑑃𑐥𑐸 𑐔𑐵𑐮𑐷 𑑋 𑐣𑑂𑐴𑐹𑐐𑐸 𑐳𑑄𑐳𑐡𑑄 𑐄𑐐𑐸 𑐎𑐠𑑄𑐫𑐵 𑐰𑐶𑐢𑐾𑐫𑐎 𑐴𑐫𑐾𑐐𑐸 𑐰 𑐨𑐵𑐲𑐵𑐫𑐵 𑐳𑐰𑐵𑐮𑐫𑑂 𑐋𑐣 𑐮𑐵𑐐𑐹 𑐫𑐵𑐫𑐾𑐐𑐸𑐥𑐵𑐏𑐾 𑐧𑐶𑐳𑐶𑐄𑑃 𑐰𑐣𑐾 𑐦𑐂𑐩𑐏𑐸 𑑋

𑐀𑐢𑑂𑐫𑐵𑐡𑐾𑐱𑐥𑐵𑐏𑐾𑑄 𑐮𑐵𑐐𑐹 𑐫𑐵𑐫𑐾𑐐𑐸

𑐁𑑅𑐫𑐵 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑐥𑐵𑐏𑐾𑑄 𑐨𑐵𑐲𑐵 𑐋𑐣𑐫𑐵𑐟 𑐀𑐢𑑂𑐫𑐵𑐡𑐾𑐱 𑐩𑐵𑐬𑑂𑐦𑐟 𑐮𑐵𑐐𑐹 𑐫𑐵𑐫𑐾𑐐𑐸 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐨𑐵𑐲𑐵 𑐁𑐫𑑀𑐐𑑄 𑐟𑐫𑐵𑐬 𑐫𑐵𑑅𑐐𑐸 𑐣𑐩𑐹𑐣𑐵 𑐋𑐣𑐫𑐵 𑐁𑐢𑐵𑐬 𑐎𑐫𑐵𑑅 𑐮𑐵𑐐𑐹 𑐫𑐵𑐫𑐾𑐐𑐸 𑐏𑑅 𑑋 𑐨𑐵𑐲𑐵 𑐋𑐣 𑐮𑐵𑐐𑐹 𑐫𑐵𑐫𑐾 𑐢𑐸𑑄𑐎𑐵𑑅 𑐠𑐸𑐮𑐶𑐫𑐵 𑐡𑐸𑐣𑐾 𑐰 𑐰𑐶𑐢𑐾𑐫𑐎 𑐥𑐵𑐬𑐶𑐟 𑐫𑐵𑐫𑐾𑐩𑐵𑑅 𑐢𑐫𑐵𑐐𑐸 𑐏𑑃 𑐥𑑂𑐬𑐡𑐾𑐱𑐫𑐵 𑐴𑐎𑐫𑑂 𑐩𑐡𑐸𑐐𑐸𑐮𑐶𑑄 𑐀𑐗 𑐀𑑅𑐥𑐸𑐂𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐀𑐮𑐾 𑐁𑑅𑐫𑐵 𑐳𑐬𑐎𑐵𑐬𑑄 𑐮𑐵𑐐𑐹 𑐫𑐵𑐣𑐵 𑐰𑐣𑐾𑐢𑐸𑑄𑐎𑐹𑐐𑐸𑐫𑐵𑐟 𑐎𑐣𑑂𑐴𑐫𑑂 𑐣𑑂𑐴𑐹𑐐𑐸 𑐳𑑄𑐳𑐡𑐫𑐵 𑐣𑑂𑐴𑐹𑐐𑐸 𑐳𑐬𑐎𑐵𑐬𑑄 𑐮𑐵𑐐𑐹 𑐫𑐵𑐫𑐾𑐟 𑐧𑐵𑐢𑑂𑐫 𑐖𑐸𑐂 𑑋 𑐄𑐎𑐶𑑄 𑐢𑐵𑐠𑐾𑑄 𑐴𑐾 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐎𑐵𑐩𑐎𑐵𑐖𑐶 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐮𑐵𑐐𑐹 𑐫𑐵𑐫𑐾𑐐𑐸 𑐣𑐶𑐫𑐟 𑐏𑑅𑐳𑐵 𑐰𑐬𑑂𑐟𑐩𑐵𑐣 𑐩𑐣𑑂𑐟𑑂𑐬𑐷𑐟𑐫𑑂𑐳𑑄 𑐀𑐢𑑂𑐫𑐵𑐡𑐾𑐱 𑐩𑐵𑐬𑑂𑐦𑐟 𑐮𑐵𑐐𑐹 𑐫𑐵𑐣𑐵 𑐰𑐣𑐾𑐐𑐸 𑐴𑐶𑐩𑑂𑐩𑐟 𑐟𑐫𑐾𑐩𑐵𑑅 𑑋

𑐠𑐸𑐐𑐸 𑐎𑐠𑑄 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐩𑐵𑐒 𑐨𑐵𑐲𑐵 𑐮𑐵𑐐𑐹 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑑂𑐰𑑄𑐐𑐹 𑐎𑐠𑑄𑐫𑐵 𑐮𑑃𑐥𑐸 𑐔𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵𑐟 𑐳𑐬𑐎𑐵𑐬𑐫𑑂 𑐡𑐸𑐐𑐸 𑐡𑐮𑐫𑐵 𑐣𑐾𑐟𑐵𑐟, 𑐎𑐵𑐬𑑂𑐫𑐎𑐬𑑂𑐟𑐵𑐣𑐶𑐳𑐾𑑄 𑐰𑐬𑑂𑐟𑐩𑐵𑐣 𑐥𑑂𑐬𑐡𑐾𑐱 𑐳𑐬𑐎𑐵𑐬𑐫𑑂 𑐡𑐸𑐥𑐶𑑄 𑐩𑐣𑑂𑐟𑑂𑐬𑐷𑐟 𑐐𑐩𑑂𑐨𑐷𑐬 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐩𑐵𑑅 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐳𑑂𑐰𑐫𑑄 𑐣𑐾𑐰𑐵𑑅 𑐰 𑐟𑐵𑐩𑐵𑐒𑐟 𑐣𑑄 𑐳𑐔𑐾𑐟 𑐖𑐸𑐫𑐵 𑐰𑐣𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋 𑐀𑐗 𑐰𑐶𑐱𑐾𑐲 𑐫𑐵𑐣𑐵𑑅 𑐠𑐸𑐐𑐸 𑐩𑐸𑐡𑑂𑐡𑐵𑐫𑐵𑐟 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐣𑐾𑐟𑐺𑐟𑑂𑐰 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱, 𑐰𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐣𑐵𑐥𑑄 𑐣𑐾𑐥𑐵𑐮 𑐟𑐵𑐩𑐵𑐒 𑐑𑐾𑐡𑐸𑐒𑐫𑐵 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐳𑐩𑐶𑐟𑐶 𑐳𑐎𑑂𑐬𑐶𑐫 𑐖𑐸𑐫𑐵 𑐔𑑂𑐰𑐣𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐫𑐡𑐶 𑐰𑐬𑑂𑐟𑐩𑐵𑐣 𑐥𑑂𑐬𑐡𑐾𑐱 𑐳𑐬𑐎𑐵𑐬𑑄 𑐮𑐵𑐐𑐹 𑐩𑐫𑐵𑐟 𑐢𑐵𑑅𑐳𑐵 𑐠𑐸𑐎𑐶𑐫𑐵𑐟 𑐴𑐾 𑐁𑑅 𑐣𑐾𑐰𑐵𑑅 𑐰 𑐟𑐵𑐩𑐵𑐒𑐟𑐫𑑂𑐳𑑄 𑐥𑑂𑐬𑐡𑐾𑐱𑐫𑐵 𑐣𑐶𑑄𑐟𑐶𑑄 𑐔𑐸𑐣𑐵𑐰𑐷 𑐩𑐸𑐡𑑂𑐡𑐵 𑐡𑐫𑐾𑐎𑐵 𑐰𑐣𑐾𑐩𑐵𑑅 𑑋 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐥𑑂𑐬𑐡𑐾𑐱𑐫𑐵 𑐳𑐬𑐎𑐵𑐬𑐷 𑐎𑐵𑐩𑐎𑐵𑐖𑐫𑐵 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐮𑐵𑐐𑐹 𑐫𑐵𑐂𑐩𑑂𑐴 𑐳𑐵𑑄𑐳𑐡 𑐣𑐵𑐥𑑄 𑐮𑐵𑐐𑐹 𑐫𑐵𑐂𑐐𑐸 𑐡𑐮𑐫𑐵𑐟 𑐖𑐎 𑐟𑑂𑐫𑐵𑐎𑐾𑐐𑐸 𑐖𑐸𑐂 𑐢𑐎𑐵𑑅 𑐑𑑀𑐲𑐞𑐵 𑐴𑐾 𑐫𑐵𑐣𑐵𑑅 𑐰𑐣𑐾𑐟 𑐟𑐫𑐵𑐬 𑐖𑐸𑐂𑐩𑐵𑑅 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐁𑐰𑑄𑐣𑐶𑐳𑐾𑑄 𑐴𑐾 𑐳𑐔𑐾𑐟 𑐖𑐸𑐫𑐵𑑅 𑐰𑐣𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋