𑐥𑑂𑐬𑐾𑐩 𑐩𑑀𑐴𑐣 𑐳𑐶𑐬𑐥𑐵𑑅 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑐫𑐵𑐟 𑐮𑑅𑐮𑑂𑐴𑐵𑐟

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑖 𑐁𑐱𑑂𑐰𑐶𑐣 𑑑, 𑐧𑐸𑐢𑐧𑐵𑐬 𑑒𑑑:𑑐𑑐:𑑒𑑖

𑐨𑐵𑐲𑐵 𑐠𑐸𑐰𑐵𑑅 𑐥𑑂𑐬𑐾𑐩 𑐧𑐴𑐵𑐡𑐸𑐬 𑐎𑐳𑐵𑑅𑐫𑐵 𑐮𑐸𑐩𑐣𑑂𑐟𑐶𑐂 𑐂 𑐩𑑀𑐴𑐣 𑐎𑐺𑐲𑑂𑐞 𑐜𑑄𑐐𑑀𑐮𑑄 𑐣𑐾𑐥𑐵𑐮𑐨𑐵𑐲𑐵 𑐏𑑂𑐫𑐮𑐫𑑂 𑐔𑑂𑐰𑐩𑐶𑐥𑐶𑐣𑑂𑐟 𑐴𑑅𑐥𑐵𑑅 𑐧𑐶𑐂𑐐𑐸 𑐟𑐵𑐟𑐸𑐣𑐵𑑅 𑐠𑐷𑐠𑐷 𑐧𑐶𑐢𑐵𑐫𑑂 𑐣𑐶𑐡𑑃𑐫𑑂 𑐕𑐎𑑂𑐰𑑅 𑐕𑐩𑑂𑐴𑐳𑐶𑐟 𑐳𑐶𑐬𑐥𑐵𑑅 𑐧𑐶𑐂𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐗𑑂𑐰𑐮𑐫𑑂 𑐠𑐸𑐐𑐸𑐳𑐷 𑐄𑐥𑐣𑑂𑐫𑐵𑐳 𑐧𑐶𑐢𑐵𑐫𑑂 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑐫𑐵 𑐔𑑂𑐰𑐳𑐵𑑄 𑐥𑐶𑐡𑑄𑐐𑐸 ‘𑐡 𑐥𑑀𑐲𑑂𑐚𑐬’ 𑐣𑐵𑑄𑐐𑐸 𑐄𑐥𑐣𑑂𑐫𑐵𑐳𑐫𑐵𑐟 𑐫𑐾𑑃𑐫𑐵 𑐏𑐸𑐳𑐶𑐧𑐸𑑃𑐂 𑐗𑑅𑐗𑑅 𑐢𑐵𑐫𑐾𑐎 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾 𑐔𑑂𑐰𑐩𑐶 𑐩𑐮𑑂𑐮𑐫𑐵𑐟 𑐴𑐣𑐵𑐧𑐣𑐵 𑐫𑐵𑐳𑐾 𑐴𑐣𑐵𑐥𑑁 𑐰 𑐡𑐵𑑄 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋
𑐥𑑂𑐬𑐾𑐩–𑐩𑑀𑐴𑐣 𑐳𑐶𑐬𑐥𑐵𑑅 𑐐𑐸𑐠𑐶𑐫𑐵 𑐐𑑂𑐰𑐳𑐵𑐮𑐫𑑂 𑐧𑑄𑐱𑐷 𑐎𑐺𑐲𑑂𑐞 𑐜𑑄𑐐𑑀𑐮𑐫𑐵 𑐣𑐵𑐫𑑅𑐳𑐸𑐂 𑐥𑐰𑐶𑐟𑑂𑐬 𑐎𑐳𑐵𑐮𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑃 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐳𑐔𑑂𑐕𑐶𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐴𑐣𑐵𑐧𑐣𑐵 𑐣𑑄 𑐫𑐵𑑅𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐬𑐾𑐞𑐸 𑐧𑐵𑐳𑑂𑐎𑑀𑐮𑐵𑑄 𑐮𑐳𑐎𑐸𑐳 𑐣𑑂𑐰𑐔𑐹 𑐩𑐠𑐸𑐬𑐵 𑐳𑐵𑐫𑐩𑐶𑑄 𑐳𑑄𑐳𑑂𑐠𑐵 𑐰 𑐳𑐶𑐬𑐥𑐵𑑅𑐫𑐵𑐟 𑐎𑐫𑐵𑑅 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅𑐳𑐵 𑐳𑑂𑐣𑐾𑐴 𑐳𑐵𑐫𑐩𑐶𑑄 𑐔𑑂𑐰𑐩𑐶 𑐩𑐮𑑂𑐮𑐫𑐵 𑐳𑐶𑐬𑐥𑐵𑑅 𑐟𑑂𑐫𑐵𑐎𑐹𑐐𑐸 𑐳𑐦𑐹 𑐏𑐳𑐨𑐵𑐲𑑄 𑐀𑐣𑐸𑐰𑐵𑐡𑐫𑐵𑐣𑐵 𑐧𑐮𑐫𑑂 𑐠𑑅𑐫𑐵𑐟 𑐟𑐵𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋
𑐣𑐸𑐐𑑅𑐏𑑃 𑐟𑐫𑐾𑐐𑐸 𑐗𑑂𑐰𑐮𑐫𑑂 𑐔𑑂𑐰𑐩𑐶 𑐩𑐮𑑂𑐮 𑐠𑐩𑑂𑐴𑑄 𑐔𑑂𑐰𑐫𑐵𑐐𑐸 𑐄𑐥𑐣𑑂𑐫𑐵𑐳𑐫𑐵𑐟 𑐳𑐶𑐬𑐥𑐵𑑅 𑐮𑐵𑑅𑐐𑐸𑐏𑑃𑐫𑑂 𑐠𑑅𑐀𑐟𑐶𑐎𑑄 𑐮𑐫𑑂𑐟𑐵𑑅𑐐𑐸 𑐏𑑃 𑐎𑐣𑐵𑐡𑐶𑐳𑐾 𑐟𑐬 𑐠𑐩𑑂𑐴𑑄 𑐐𑐸𑐧𑐮𑐫𑑂𑐣𑑄 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐐𑐸 𑐣𑐶𑐟𑐶𑑄 𑐁𑐱𑐵𑐎𑐸𑐟𑐶 𑐩𑐖𑐸𑐫𑐵𑐐𑐸 𑐣𑑄 𑐢𑐫𑐵𑐡𑐶𑐮 𑑋 𑐠𑐩𑑂𑐴𑑄 𑐔𑑂𑐰𑐫𑐵𑐐𑐸 𑐳𑐦𑐸𑐟𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐠𑐥𑐹 𑐣𑐵𑐥𑑄 𑐳𑐎𑐮 𑐣𑐾𑐰𑐵𑑅𑐟𑐫𑑂 𑐣𑐸𑐐𑐮𑐫𑑂 𑐠𑐷 𑐦𑐫𑐾𑐩𑐵 𑐢𑐿𑐐𑐸 𑐧𑐶𑐔𑐵𑑅 𑐫𑐵𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐧𑐸𑐏𑑃–𑐣𑐾𑐰𑐵𑑅 𑐳𑐹𑐔𑐣𑐵 𑐎𑐾𑐣𑑂𑐡𑑂𑐬
𑐎𑐶𑐥𑐵– 𑐬𑐵𑐖𑐾𑐣𑑂𑐡𑑂𑐬 𑐬𑐘𑑂𑐖𑐶𑐟