𑐧𑐵𑐐𑐧𑐖𑐵𑑅𑐫𑐵 𑐮𑑃𑐫𑑂

𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬

𑐖𑐷𑐰𑐣 𑐢𑐂𑐐𑐸 𑐐𑐸𑐮𑐶 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋 𑐖𑐷𑐰𑐣𑐫𑐵 𑐰𑐣𑐾𑐢𑐸𑑄𑐎𑐹𑐐𑐸 𑐏𑑃 𑐮𑐸𑐩𑑄𑐎𑐾𑐐𑐸 𑐣𑑄 𑐐𑐸𑐧𑐮𑐾𑑄 𑐐𑐸𑐧𑐮𑐾𑑄 𑐳𑐶𑐎𑑂𑐎 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋

𑐥𑐷𑐣𑑂𑐫𑐵𑐡𑑃 𑐣𑑂𑐴𑑂𑐫𑑅𑐫𑐵 𑐏𑑃, 𑐖𑐶 𑐗𑐶𑑄𑐣𑑂𑐫𑐵𑐡𑑃 𑐡𑐸𑐐𑐸 𑐃, 𑐄𑐧𑐮𑐫𑑂 𑐖𑐶 𑐣𑑂𑐴𑐵𑐫𑑂𑐎𑑄𑐟𑑂𑐰𑐵𑑅𑐫𑐵 𑐕𑐾𑑄 𑐥𑐸𑐟𑐮𑐷 𑐳𑐟𑐎𑐫𑐵 𑐥𑐡𑑂𑐩𑑀𑐡𑐫 𑐴𑐵𑐂𑐳𑑂𑐎𑐹𑐮𑐫𑑂 𑐧𑑂𑐰𑑄 𑐰𑐣𑐾𑐐𑐸 𑑋 𑐳𑑂𑐎𑐹𑐮 𑐰𑐣𑐾𑐧𑐮𑐫𑑂 𑐖𑐶 𑐣𑑂𑐴𑑂𑐫𑐵𑐧𑐮𑐾𑑄 𑐧𑐵𑐐𑐧𑐖𑐵𑐬𑐫𑐵 𑐏𑐰–𑐳𑐶𑐠𑐮𑑃 𑐮𑐶𑐣𑐵𑑅 𑐰𑐣𑐾𑐐𑐸 – 𑐫𑐵𑐎𑑅𑐔𑐵 𑑋 𑐰𑐴𑐾 𑐮𑑃𑐫𑐵 𑐎𑑂𑐰𑐠𑑂𑐫𑐵𑑅𑐐𑐸 𑐖𑐰𑐮𑑃– 𑐰𑐫𑐵 𑐠𑑅𑐐𑐸 𑐏𑐰𑐮𑑃 𑐮𑐶𑐣𑐵𑑅 𑐰𑐂 𑐀𑐠𑐾 𑐴𑐾 𑐗𑐶𑑄𑐥𑑂𑐫𑐡𑑃 𑐗𑐶𑑄𑐣𑑂𑐫𑐵𑐡𑑃 𑐡𑐸𑐩𑑂𑐴 𑐕𑐩𑑂𑐴 𑐩𑐫𑑂𑐖𑐸 – 𑐜𑐶𑐮𑑂𑐮𑐷𑐧𑐖𑐵𑐬𑐥𑐵𑐏𑐾𑑄 𑐣𑑂𑐴𑑂𑐫𑑅𑐏𑐵𑐫𑐵 𑐎𑐣𑑂𑐫𑐵 𑐩𑐣𑑂𑐡𑐶𑐬 𑐴𑐵𑐂𑐳𑑂𑐎𑐹𑐮𑐫𑑂 𑐧𑑂𑐰𑑄 𑐰𑐣𑐾𑐟 𑑋 𑐰 𑐴𑐾 𑐮𑑃𑐫𑑂 𑐰𑐴𑐾 𑐠𑐵𑐳𑐫𑑂 𑐣𑑂𑐴𑐶𑑄𑐣𑑂𑐴𑐶𑑄, 𑐮𑐵𑑄 𑐮𑐵𑑄, 𑐡𑑄 𑐡𑑄 𑑋 𑐣𑐶𑐡𑑃 𑐟𑐎 𑐖𑐶𑑄 𑐰𑐫𑐵𑐟 𑐣𑑂𑐴𑐶𑑄 𑐣𑑂𑐴𑐶𑑄 𑐏𑐣𑐵𑐐𑐸, 𑐣𑑂𑐴𑐶𑑄 𑐣𑑂𑐴𑐶𑑄 𑐳𑑂𑐰𑐫𑐵𑐐𑐸 𑐀𑐮𑐾 𑐣𑑂𑐴𑐶𑑄 𑐣𑑂𑐴𑐶𑑄 𑐫𑐫𑐾𑐎𑐵𑐐𑐸 𑐠𑑁𑑄 𑐥𑐷𑐡𑑃 𑐥𑐷𑐣𑑂𑐫𑐵𑐡𑑃 𑐮𑐶𑐥𑐵 𑐮𑐸𑐩𑑄𑐎𑐵𑐧𑐮𑐫𑑂 𑐀𑐴𑑀 ! 𑐐𑐸𑐮𑐶 𑐣𑑂𑐴𑑂𑐫𑐂𑐥𑐸 ! 𑐐𑐸𑐮𑐶 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋

𑐳𑑂𑐎𑐹𑐮 𑐢𑐂𑐐𑐸 𑐂𑐮𑐫𑑂 𑐰𑐣𑐾𑐩𑐵𑑅, 𑐂𑐮𑐫𑑂 𑐠𑑂𑐫𑑄𑐎𑐾𑐩𑐵𑑅 𑑋 𑐖𑐶𑐥𑐶𑑄 𑐧𑐵𑐐𑐧𑐖𑐵𑐬𑐫𑑂 𑐰 𑐴𑐾 𑐂𑐮𑐫𑑂 𑐠𑑂𑐫𑐣𑐷, 𑐰𑐴𑐾 𑐂𑐮𑐫𑑂 𑐣𑐵𑐥𑐮𑐵𑐂 𑑋 𑐮𑑃 𑐕𑐥𑐸 𑐴𑐾 𑐖𑐹𑐳𑐵𑑄 𑐖𑐶𑐥𑐶𑑄 𑐣𑐶𑐩𑑂𑐴 𑐣𑐶𑐏𑐾 𑐳𑑂𑐰𑐫𑐵𑑅 𑐰𑐣𑐵𑐔𑑂𑐰𑐣𑐵𑐐𑐸 𑐖𑐸𑐂 𑑋 𑐖𑐶 𑐥𑐹𑐬𑑂𑐰 𑐳𑑂𑐰𑐫𑐵𑑅 𑐰𑐣𑐾 𑐰 𑐥𑐱𑑂𑐔𑐶𑐩 𑐳𑑂𑐰𑐫𑐵𑑅 𑐰𑐣𑐷 𑑋 𑐖𑐶 𑐏𑐰𑑄 𑐰𑐣𑐾 𑐰 𑐖𑐰𑑄 𑐰𑐣𑐷 𑑋 𑐖𑐶𑐐𑐸 𑐖𑐰 𑐰𑐫𑐵 𑐏𑐰 𑐏𑑅 𑑋 𑐕𑐐𑐹 𑐴𑐾 𑐂𑐮𑐫𑑂, 𑐕𑐥𑐸 𑐴𑐾 𑐮𑑃𑐫𑑂 𑐣𑐵𑐥 𑐮𑐵𑐂 – 𑐐𑐸𑐧𑐮𑐾𑑄 𑐢𑑂𑐰𑐡𑐸𑐂 𑐢𑐵𑑅𑐳𑐵 𑐩𑐡𑐸 𑑋 𑐳𑑂𑐎𑐹𑐮 𑐰𑐣𑐾𑐐𑐸 𑐨𑐔𑐵 𑐮𑐶𑐥𑐵 𑐮𑐵𑐟𑐎𑐶 𑐰𑐫𑐵𑐟 𑐧𑐵𑐐𑐧𑐖𑐵𑐬𑐫𑐵 𑐠𑐸𑐏𑐾 𑐳𑐶𑐠𑐫𑑂 𑐫𑐹𑐣𑐵𑐣𑐷 𑐍𑐲𑐢𑐵𑐮𑐫𑐫𑐵 𑐎𑑂𑐰𑑄 𑐰𑐫𑐵𑐔𑑂𑐰𑑄𑐐𑐸 𑐏𑐣𑐷 𑑋 𑐳𑑂𑐎𑐹𑐮 𑐰𑐣𑐾𑐐𑐸 𑐨𑐔𑐵 𑐣𑑂𑐴𑑂𑐫𑐠𑑂𑐫𑐵𑐟𑐎𑐶 𑐰𑐫𑐵𑐟 𑐴𑐸𑑄𑐎𑐣 𑐟𑐸𑐎𑐸𑐔𑐵 𑐟𑐵𑑄𑐣𑐶𑐳𑐾𑑄 𑐰𑐫𑐵𑐔𑑂𑐰𑑄𑐐𑐸 𑐏𑐣𑐷 𑑋 𑐥𑐵𑐫𑑂𑐕𑐶 𑐂𑐮𑐫𑑂 𑐳𑑂𑐎𑐹𑐮 𑐰𑐣𑐾𑐧𑐮𑐫𑑂 𑐰𑐫𑐵𑐟 𑐧𑐵𑐐𑐧𑐖𑐵𑐬𑐫𑐵 𑐡𑐠𑐸 𑐠𑑂𑐫𑑄𑐎𑐵𑑅 𑐏𑐣𑐷 – 𑐣𑑂𑐴𑑂𑐫𑑅𑐣𑐾𑑄 𑐣𑑄 𑐳𑑂𑐰𑐫𑐾 𑐮𑐵𑑅, 𑐮𑐶𑐦𑑅 𑐳𑑂𑐰𑐫𑐵𑑅 𑐣𑑄 𑐳𑑂𑐰𑐫𑐾 𑐮𑐵𑑅 𑑋 𑐣𑑂𑐴𑐶𑑄 𑐣𑑂𑐴𑐶𑑄 𑐏𑐣𑐷, 𑐏𑑂𑐰𑐵𑑅 𑐔𑐹𑐮𑐵𑐂, 𑐩𑐶𑐏𑐵 𑐣𑑄 𑐮𑑂𑐰𑐵𑐂, 𑐩𑐸𑐳𑐸𑐴𑐸𑑄 𑐣𑑂𑐴𑐶𑐮𑐾𑐐𑐸 𑐣𑑄 𑐖𑐸𑐂 – 𑐣𑐟𑐸𑐳𑐟𑐸 𑐢𑐵𑑅𑐳𑐵 𑐐𑐸𑐧𑐮𑐾𑑄 𑐩𑐧𑑂𑐫𑐵𑑅 𑑋

𑐁𑑅𑐟𑐎𑑄 𑐮𑐸𑐩𑑄𑐣𑐶 – 𑐕𑐣𑑂𑐴𑐸 𑐰 𑐖𑐶𑐟𑑅 𑐳𑑂𑐰𑐫𑐵𑑅 𑐰𑐫𑐵𑐔𑑂𑐰𑑄𑐐𑐸 𑐖𑐸𑐂𑐩𑐵𑑅, 𑐮𑑃𑐫𑑂 𑐮𑐸𑐦𑐶𑑄 𑐴𑐵𑐣𑐵𑑅 𑐗𑐣𑑂𑐣𑐿 𑐠𑐸𑐣𑑂𑐣𑐵𑑄 𑐔𑐸𑐂𑐎 𑐡𑐫𑐾𑐟𑑂𑐫𑑄𑐐𑐸 𑑋 𑐡𑐫𑐵𑑅 𑐰𑐫𑐵𑐟 𑐕𑐸𑑄 𑐖𑐸𑐂 𑐮𑐵 𑐠𑐾𑑄 𑐢𑐣𑑂𑐣𑐵 𑐖𑐸𑐫𑐵𑑅 𑐖𑐶 𑐰𑐫𑐵𑐥𑐵𑐏𑐾 𑐧𑑂𑐰𑐵𑑄𑐰𑐣𑐾 𑐟𑑂𑐫𑐣𑐵𑐐𑐸 𑑋 𑐰 𑐮𑐵 𑐩𑐕𑐵𑐮𑐵𑑅 𑐮𑐶𑐦𑑅 𑐮𑐶𑐦𑑅 𑐳𑑂𑐰𑐳𑑂𑐰𑑄 𑐨𑐵𑐟𑐵𑐨𑐵𑐟𑐵𑑄 𑐰𑐣 𑑋 𑐐𑐸𑐧𑐵𑐫𑑂𑐟 𑐖𑐶𑑄 𑐰𑐫𑐵𑐟 𑐮𑐶𑐦𑑅 𑐳𑑂𑐰𑐫𑐵𑐔𑑂𑐰𑐣𑐵, 𑐰𑐫𑐵𑐟 𑐴𑐵𑐣𑑄 𑐕𑐸𑑄 𑐩𑐖𑐸𑐂𑐩𑐵 𑐢𑐎𑐵𑑅 𑐩𑐟𑐷 𑐟𑐫𑐵𑐔𑑂𑐰𑐣𑐵 𑑋 𑐰 𑐣𑑄 𑐢𑐸𑐔𑑂𑐔𑐵𑐥𑐟𑐶𑐎𑑄 𑐮𑐶𑐦𑑅 𑐳𑑂𑐰𑐳𑑂𑐰𑑄 𑐣𑑂𑐴𑑂𑐫𑐖𑑂𑐫𑐵𑑄 𑐰𑐣𑐵𑐔𑑂𑐰𑐣 𑑋

𑐀𑐠𑐾𑐴𑐾 𑐴𑐵𑐣𑑄 𑐕𑐎𑑅 𑐖𑐶 𑐰𑐫𑐵𑐟 𑐳𑑂𑐰𑐳𑑂𑐰𑐵𑑄, 𑐰𑐫𑐵 𑐩𑑂𑐴 𑐕𑐩𑑂𑐴𑑄 𑐳𑑂𑐰𑐳𑑂𑐰𑑄 𑐰𑐣𑐵𑐔𑑂𑐰𑐣𑐵𑐐𑐸 – 𑐮𑑃𑐫𑑂 𑐮𑐸𑐦𑐶𑑄 𑐴𑐵𑐣𑐵𑑅 𑐗𑐣𑑂𑐣𑐿 𑐡𑐫𑐾𑐟𑑂𑐫𑑄𑐐𑐸 𑑋 𑐖𑐶𑑄 𑐧𑐵𑑄𑐮𑐵𑐎𑑂𑐎 𑐴𑐾 𑐏𑑄, 𑐰𑐫𑐵 𑐕𑐥𑐮𑐵𑑅 𑐎𑐵𑐔𑐵𑐎𑑂𑐎 𑐴𑐾 𑐖𑐶𑐥𑐵𑐏𑐾 𑐣𑑂𑐴𑑂𑐫𑐵𑐫𑐾 𑐢𑐸𑑄𑐎𑐹𑐐𑐸 𑑋 𑐖𑐶 𑐣𑑄 𑐰𑐠𑐾𑑄 𑐴𑐾 𑐩𑐕𑐵𑐮𑐵𑑅 𑐨𑐵𑐟𑐵𑐨𑐵𑐟𑐵𑑄 𑐣𑑂𑐴𑑂𑐫𑐖𑑂𑐫𑐵𑑄 𑐰𑐣𑐵 𑑋 𑐥𑐮𑐏 𑐮𑐶𑐥𑐵 𑐮𑐶𑐦𑑅 𑐳𑑂𑐰𑐫𑐵𑑄 𑐰𑑄 𑐣𑑄 𑐖𑐶𑐟𑑅 𑐐𑐸𑐧𑐵𑐫𑑂𑐟 𑐮𑐶𑐦𑑅 𑐳𑑂𑐰𑐫𑐵𑐔𑑂𑐰𑑄𑐐𑐸 𑑋 𑐖𑐶𑐟𑑅 𑐣𑑄 𑐕𑐸𑑄 𑐖𑐸𑐂𑐮𑐵 𑐢𑐎𑐵𑑅 𑐰𑐫𑐵 𑐣𑑄 𑐐𑐸𑐮𑐶 𑐢𑐣𑑂𑐣𑐵 𑐖𑐸𑐂 𑑋

𑐰 𑐩𑐕𑐵𑑅 𑐢𑐫𑐵𑑄 𑐖𑐶 𑐗𑑄 𑐴𑐾 𑐩𑐕𑐵𑑅 𑑋 𑐖𑐶 𑐩𑐕𑐵 𑐢𑐫𑐵𑑄 𑐰 𑐗𑑄 𑐴𑐾 𑐩𑐕𑐵𑑅 𑑋 𑐐𑐸𑐮𑐶 𑐩𑐕𑐵𑑅𑐥𑐶𑑄 𑐖𑐸𑐂 𑐖𑐶𑐥𑐶𑑄, 𑐣𑑂𑐴𑐶𑑄 𑐣𑑂𑐴𑐶𑑄 𑐕𑐥𑐸 𑐴𑐾 𑐮𑑃𑐥𑐸𑐫𑐵 𑐮𑑃𑐖𑐸𑐰𑐵𑑅 𑐖𑐸𑐫𑐵𑑄 𑐣𑑄, 𑐠𑐰𑑄𑐠𑑅 𑐕𑐸𑑄 𑐕𑐸𑑄 𑐖𑐸𑐫𑐵𑑅 𑐣𑑄 𑐢𑑂𑐰𑐡𑐸𑐎𑐾 𑐩𑐕𑐵𑑅𑐥𑐶𑑄, 𑐣𑑂𑐰𑐟𑐸𑐳𑐸𑐟𑐸 𑐧𑑂𑐫𑐵𑐎𑐾 𑐩𑐕𑐵𑑅𑐥𑐶𑑄 𑐖𑐶𑐩𑐶𑐳𑑄 𑐐𑐸𑐧𑐮𑐾𑑄 𑐴𑐾 𑐠𑐰𑑄𑐠𑑅𑐫𑐵 𑐣𑐸𑐐𑑅 𑐏𑑃 𑐧𑑂𑐫𑐵𑐎𑐾 𑐢𑐎𑐵𑑅 𑐮𑑃𑐥𑐸𑐫𑐵 𑐄𑐏𑐾 𑐳𑐶𑐠𑑄 𑐠𑐸𑐏𑐾 𑐳𑐶𑐠𑐫𑑂 𑐰 𑐠𑐸𑐏𑐾 𑐳𑐶𑐠𑑄 𑐄𑐏𑐾 𑐳𑐶𑐠𑐫𑑂 𑐩𑐫𑐵𑐣𑐵 𑑋 𑐖𑐶𑐩𑐶 𑐡𑐠𑐸𑐂 𑐰 𑐴𑐾 𑐧𑐵𑐐𑐧𑐖𑐵𑐬𑐫𑐵 𑐮𑑃 𑐕𑐧𑑂𑐫𑐵 𑐏𑑅 – 𑐰 𑐖𑐶𑐩𑐶𑐟 𑐐𑐸𑐧𑐮𑐾𑑄 𑐟𑐵𑐥𑐵𑑅 𑐣𑑄 𑐩𑐖𑐹, 𑐳𑐟𑐷 𑐣𑑄 𑐩𑐖𑐹 𑑋 𑐣𑐸𑐐𑑅𑐫𑐵 𑐏𑑃 𑐏𑑅 – 𑐖𑐶𑐩𑐶𑐳𑑄 𑐐𑐸𑐮𑐶 𑐏𑑃 𑐮𑑂𑐴𑐵𑐣𑐵, 𑐐𑐸𑐮𑐶 𑐩𑑂𑐴𑐐𑐳𑐫𑑂 𑐩𑑂𑐴𑑄𑐎𑐵, 𑐠𑑅𑐟 𑐫𑑅𑐐𑐸 𑐳𑑄𑐳𑐵𑐬 𑐡𑐫𑐾𑐎𑐵, 𑐠𑑅𑐟 𑐫𑑅𑐐𑐸 𑐖𑐷𑐰𑐣 𑐡𑐫𑐾𑐎𑐵 𑑋 𑐄𑐧𑐮𑐫𑑂 𑐖𑐶𑐥𑐶𑑄 𑐗𑐶𑑄𑐥𑑂𑐫𑐡𑑃 𑐗𑐶𑑄𑐣𑑂𑐫𑐵𑐡𑑃 𑐡𑐸𑐥𑐶𑑄 𑐩𑐳𑑂𑐟 𑐏𑑅 – 𑐩𑐣𑐹𑐟 𑐏𑑅 𑑋

 

 

𑐖𑐶𑑄 𑐳𑑂𑐰𑐫𑐾, 𑐄𑐧𑐮𑐫𑑂 𑐢𑐵𑐟𑑂𑐠𑐾𑑄 𑐖𑐶𑐥𑐶𑑄 𑐣𑐶𑐩𑑂𑐴𑐾𑐳𑐶𑐫𑐵 𑐩𑐟𑐶𑐣𑐵 𑐖𑐹𑐐𑐸 𑐏𑑅, 𑐡𑐸𑐐𑑂𑐫𑑄𑐐𑐸 𑐩𑐟𑐶𑐣𑐵 𑐖𑐹𑐐𑐸 𑐏𑑅 𑑋 𑐰 𑐐𑐸𑐖𑑂𑐰𑑅𑐐𑐸 𑐩𑐟𑐶𑐣𑐵 𑐏𑑅 𑐖𑐶𑑄 𑐩𑐳𑑂𑐫𑐹 𑑋 𑐀𑐠𑐾𑐳𑐵𑑄 𑐰 𑐣𑑄 𑐕𑐟𑐵𑐖𑐶𑐫𑐵 𑐩𑐟𑐶𑐣𑐵 𑐴𑐾 𑐖𑐸𑐂𑐩𑐵𑑅 𑑋 𑐮𑑃𑐫𑐵 𑐖𑐰𑑄𑐏𑐰𑑄 𑐕𑐥𑐸 𑐴𑐾 𑐮𑑃𑐥𑐸𑐂 𑐣𑐶𑐡𑑃 𑐟𑐎 𑐩𑐡𑐶𑐎𑑂𑐎 𑐮𑑃𑐖𑐸𑐰𑐵𑑅 𑐖𑐸𑐫𑐵𑑅 𑐳𑑂𑐰𑐵𑑅𑐐𑐸 𑐳𑑂𑐰𑐵𑐥𑐹 𑐥𑐷𑐣𑑂𑐫𑐵𑐡𑑃 𑐮𑐶𑐥𑐵 𑐠𑑁𑑄 𑐣𑑄 𑐄𑐮𑐶 𑐴𑐾 𑐎𑑂𑐰𑐵𑐟𑐸𑐣𑐶 𑐠𑐾𑑄 𑐖𑐶𑑄 𑐔𑐵𑐫𑐾𑐎𑐾𑐦𑐸 𑑋 𑐰 𑐄𑐧𑐮𑐫𑑂 𑐐𑐠𑐾 𑐔𑑂𑐰𑑄, 𑐐𑐠𑐾 𑐏𑑅 𑐰 𑐦𑐸𑐎𑑂𑐎 𑐮𑐸𑐩𑑄𑐎𑐾𑐦𑐸 𑐣𑐶 𑐖𑐶𑑄 𑑋 𑐰𑐫𑐵 𑐢𑐶𑐎𑑅, 𑐰𑐫𑐵 𑐡𑐸, 𑐰𑐫𑐵 𑐧𑑂𑐫𑐵, 𑐰𑐫𑐵 𑐏𑑂𑐰𑐵𑑅, 𑐰𑐫𑐵 𑐳𑑃 𑐦𑐸𑐎𑑂𑐎 𑐦𑐸𑐎𑑂𑐎𑑄 𑐐𑐠𑐾 𑐏𑑅 𑐀𑐠𑐾 𑐴𑐾 𑐮𑐸𑐂𑐎𑐾 𑐦𑐸𑐣𑐶 𑐖𑐶𑑄, 𑐏𑐎𑐾 𑐦𑐸𑐣𑐶 𑐖𑐶𑑄 𑑋 𑐟𑐸𑐂𑐳𑐾 𑐔𑐵𑐎𑐮𑐵𑑅𑐐𑐸 𑐏𑑂𑐰𑐵𑑅, 𑐣𑑂𑐴𑐵𑐫𑑂, 𑐩𑐶𑐏𑐵, 𑐎𑐥𑐵𑑅 𑐩𑐣𑐔𑐵 𑐳𑐎𑐟𑐵𑑄 𑐏𑑂𑐰𑐵𑑅𑐥𑐵𑑅𑐫𑐵𑐟 𑐮𑑂𑐰𑑅𑐐𑐸 𑐢𑐫𑐵𑑄 𑐩𑐧𑑂𑐫𑐵𑑅 𑑋 𑐳𑐶𑐫𑐹𑐳𑐶𑐫𑐹 𑐢𑐵𑑅𑐐𑐸 𑐳𑑃 𑐟𑐟𑑅𑐴𑐵𑐎𑑅 𑑋 𑐣𑑂𑐴𑑂𑐫𑐵𑐄𑑃𑐐𑐸 𑐳𑑂𑐰𑐵𑑄𑐦𑑂𑐰𑑅 𑐡𑐸𑐐𑐸 𑐔𑐸𑐮𑐸𑐔𑐸𑐮𑐸 𑐢𑐵𑑅𑐐𑐸 𑐎𑐵𑐥𑑅𑐫𑐵 𑐮𑑄 𑐰𑐫𑐵𑐟 𑐐𑐸𑐮𑐶 𑐮𑑂𑐰𑑅 𑑋 𑐣𑐵𑐫𑐹𑐐𑐸 𑐥𑐮𑐵𑐏𑑄 𑐔𑐶𑐔𑐷 𑐥𑐮𑐵𑑅 𑐫𑐵𑐣𑐵𑑅 𑐔𑑂𑐰𑐫𑐾𑐎 𑐥𑐮𑐵𑑅 𑐕𑐶𑐣𑐵𑑅 𑐣𑑂𑐫𑐵𑐳𑐶 𑐰𑐣𑐵𑐔𑑂𑐰𑐣𑐷𑐧𑐮𑐫𑑂 𑐰 𑐳𑐸𑐥𑐵𑑃𑐔𑐫𑑂 𑐣𑑂𑐫𑐵𑐳𑐶 𑐰𑐣𑐵𑐔𑑂𑐰𑑄𑐩𑑂𑐴 𑐣𑐔𑑂𑐔𑐵𑐩𑑂𑐴 𑐀𑐥𑑂𑐳𑐬𑐵 𑐠𑐾𑑄 𑐔𑑂𑐰𑐣𑐷 𑑋 𑐖𑐶𑑄 𑐣𑑂𑐴𑑂𑐫𑐵𑐧𑐮𑐾𑑄 𑐰𑐫𑐵𑐟 𑐕𑐸𑑄 𑐖𑐸𑐂 𑐢𑐎𑐵𑑅 𑐐𑑂𑐫𑐵𑑅 𑑋 𑐠𑑁𑑄𑐟𑐎𑑄 𑐐𑑂𑐫𑐵𑑅𑐣𑐶 𑐖𑐶 𑑋 𑐰𑐫𑐵𑐟 𑐖𑐶𑑄 𑐠𑑁𑑄𑐟𑐎𑑄 𑐮𑐸𑐩𑑄𑐎𑐵𑐔𑑂𑐰𑐣𑐵 𑐠𑐾𑑄 𑐰𑑄 𑐣𑑄 𑐖𑐶𑐟𑑅 𑐮𑐸𑐩𑑄𑐎𑐵 𑐔𑑂𑐰𑐣 𑐖𑐸𑐂𑐩𑐵𑑅 𑑋 𑐠𑑁𑑄 𑐕𑐎𑑂𑐰𑑅 𑐣𑑄 𑐰𑐫𑐵𑐟 𑐧𑐵𑐐𑐧𑐖𑐵𑐬𑐫𑐵 𑐰 𑐴𑐾 𑐮𑑃𑐥𑐸𑐂 𑐖𑐰 𑐳𑐶𑐠𑐫𑑂 𑐏𑑄𑐎𑐾 𑐦𑐸𑐳𑐵 𑐐𑐸𑐮𑐶 𑐖𑑂𑐫𑐹 𑑋 𑐣𑑂𑐫𑐣𑐾 𑐡𑑅𑐳𑐵 𑐐𑐸𑐮𑐶 𑐖𑑂𑐫𑐹, 𑐄𑐧𑐮𑐫𑑂 𑐰𑐫𑐵 𑐣𑑄 𑐖𑐶𑐮𑐶𑐳𑐾 𑐩𑐟𑐶𑐣𑐵 𑐖𑐹𑐐𑐸 𑐩𑐟𑐷 𑐡𑐸 𑐮𑐵 𑐩𑐡𑐸 𑐮𑐵 𑐠𑐾𑑄 ? 𑐀𑐮𑐾 𑐄𑐧𑐮𑐫𑑂𑐫𑐵 𑐰 𑐣𑐸𑐐𑐮𑐫𑑂 𑐳𑑂𑐰𑐔𑐵𑑅𑐐𑐸 𑐩𑐟𑐶𑐣𑐵 𑐠𑑁𑑄 … 𑐠𑑁𑑄…. 𑐠𑑁𑑄 (?) 𑐀𑐴𑑀 𑑋 𑐖𑐶𑑄 𑐰𑐫𑐵𑐟 𑐁𑑅 𑐩𑑂𑐴𑐳𑐷𑐎𑐾 𑐦𑐂 𑐩𑐏𑐸𑐟 𑑋 𑐰𑑄 𑐖𑐶𑐟𑑅 𑐁𑑅 𑐩𑑂𑐴𑐳𑐷𑐎𑐾 𑐴𑐾 𑐦𑐂𑐩𑐏𑐸𑐟 𑑋 𑐖𑐶𑑄 𑐩𑑂𑐴𑐳𑑂𑐫𑐹𑐩𑑂𑐴 𑐰 𑐮𑐵 𑐗𑐶𑑄𑐥𑑂𑐫𑐡𑑃 𑐗𑐶𑑄𑐣𑑂𑐫𑐵𑐡𑑃 𑐟𑐶 𑐡𑐸𑐩𑑂𑐴 𑐣𑐔𑑂𑐔𑐵𑐩𑑂𑐴 𑐩𑐶𑐳𑐵𑐩𑐔𑐵 𑐏𑑅 𑑋 𑐰𑐫𑐵 𑐣𑐵𑑄 𑐣𑑄 𑐩𑐳𑑂𑐫𑐹 𑐖𑐶𑑄, 𑐰𑐫𑐵 𑐐𑐵𑑄 𑐣𑑄 𑐩𑐳𑑂𑐫𑐹 𑐖𑐶𑑄 𑑋 𑐰𑑄 𑐩𑑂𑐴𑐳𑑂𑐫𑐹𑐩𑑂𑐴 𑐖𑐶 𑐣𑑄 𑐄𑐧𑐮𑐫𑑂 𑐗𑐶𑑄𑐣𑑂𑐫𑐵𑐡𑑃 𑐗𑐶𑑄𑐏𑐸𑐡𑑃 𑐟𑐶 𑐡𑐸𑐩𑑂𑐴 𑐩𑐶𑐖𑑄𑐩𑐔𑐵 𑐮𑐵 𑐏𑑅 𑐣𑐶 𑑋 𑐖𑐶𑐐𑐸 𑐣𑐵𑑄 𑐣𑑄 𑐩𑐳𑑂𑐫𑐹 𑐰𑑄 𑐐𑐵𑑄 𑐣𑑄 𑐩𑐳𑑂𑐫𑐹 𑑋 𑐰𑐫𑐵𑐟 𑐮𑐸𑐩𑑄𑐎𑐾𑐧𑐮𑐫𑑂 𑐖𑐶 𑐣𑑄 𑐗𑐶𑑄𑐏𑐸𑐡𑑃 𑐡𑐸𑐩𑑂𑐴 𑐩𑐶𑐖𑑄𑐩𑐔𑐵 𑐖𑐸𑐂𑐩𑐵𑑅, 𑐳𑑂𑐎𑐹𑐮𑐫𑑂 𑐰𑐣𑐷𑐩𑑂𑐴 𑐖𑑂𑐘𑐵𑐣𑐷𑐩𑑂𑐴 𑐩𑐔𑐵, 𑐩𑐕𑐵𑑅 𑐩𑐕𑐵𑑅 𑐕𑐩𑑂𑐴 𑐩𑐶𑐳𑐵𑐩𑐔𑐵𑐫𑐵𑐟 𑐣𑑂𑐴𑐶𑑄𑐣𑑂𑐴𑐶𑑄 𑐟𑑂𑐰𑑅 𑐴𑐾 𑐩𑐦𑐷𑐎 𑐳𑑂𑐰𑐫𑐵 𑐖𑐸𑐂𑐩𑑂𑐴 𑐩𑐔𑐵 𑑋 𑐮𑑂𑐫𑐵𑐫𑑂𑐩𑑂𑐴 𑐳𑐹 𑐴𑐾 𑐧𑐵𑑄𑐮𑐵𑐎 𑐰𑐮 𑐮𑐵 𑐩𑐰𑐮 𑐮𑐵 – 𑐕𑐩𑑂𑐴 𑐩𑐶𑐳𑐵𑐩𑐔𑐵𑐫𑐵𑐟 𑐟𑐵𑐥𑐵𑐎𑑄 𑐳𑑂𑐰𑐖𑐎 𑐳𑑂𑐰𑐫𑐵𑑅 𑐕𑐏𑐾 𑐢𑐵𑑅 𑐩𑐟𑐶𑐣𑐵 𑐫𑐵𑐣𑐵 𑐖𑐸𑐫𑐵𑐩𑑂𑐴 𑐖𑐶𑑄 𑐰𑐫𑐵𑐟 𑐮𑐸𑐩𑑄𑐎𑐾𑐟 𑐠𑑁𑑄 𑐣𑑄 𑐩𑐔𑐵 𑐖𑐸𑐫𑐵𑐧𑐷 𑐩𑐵𑑅 𑑋 𑐖𑑂𑐫𑐵𑐠𑑅 𑐖𑐸𑐫𑐵𑑅 𑐖𑐶𑑄 𑐰𑐫𑐵𑐟 𑐧𑐵𑑄𑐮𑐵𑐎 𑐮𑐸𑐩𑑄𑐎𑐾 𑐣𑑄 𑐩𑐦𑐸, 𑐮𑐸𑐂𑐎𑐾 𑐣𑑄 𑐩𑐦𑐸 𑑋 𑐖𑐶 𑐁𑑅 𑐖𑑂𑐫𑐵𑐠𑑅 𑐖𑐹 𑐠𑐾𑑄 𑐰 𑐣𑑄 𑐖𑑂𑐫𑐵𑐠𑐶 𑐖𑐸𑐮 𑐖𑐸𑐂 𑑋 𑐖𑑂𑐫𑐵𑐠𑐶𑐩𑑂𑐴 𑐰𑐫𑐵𑐟 𑐖𑐶𑑄 𑐩𑑂𑐴𑐩𑐳𑑂𑐫𑐹, 𑐢𑑂𑐰𑐡𑐸𑐎𑑂𑐎 𑐣𑐵𑐥𑐮𑐵𑑅𑐳𑐵𑑄 𑐩𑑂𑐴𑐳𑐷𑐎𑐾 𑐦𑐂𑐩𑐏𑐸 𑐖𑐶𑑄 𑑋 𑐄𑐧𑐮𑐫𑑂𑐫𑐵𑐩𑑂𑐴 𑐰𑐫𑐵𑐟 𑐖𑐎 𑐖𑐶𑑄 𑐩𑑂𑐴𑐳𑑂𑐫𑐹 𑑋 𑐄𑐧𑐮𑐫𑑂𑐫𑐵𑐩𑑂𑐴 𑐰𑐫𑐵𑐟 𑐮𑐸𑐩𑑄𑐎𑐾𑐟 𑐖𑐶 𑐠𑑅 𑐣𑑄 𑐄𑐧𑐮𑐫𑑂𑐫𑐵𑐩𑑂𑐴 𑐖𑐸𑐂𑐩𑐵𑑅 𑑋 𑐄𑐎𑐵 – 𑐖𑐶 𑐣𑑂𑐴𑐵𑐫𑑂𑐎𑑄𑐟𑑂𑐰𑐵𑐮𑑄 𑐧𑐵𑐐𑐧𑐖𑐵𑐬 𑐖𑐸𑐣𑐵𑑅 𑐥𑐸𑐟𑐮𑐷𑐳𑐟𑐎𑐥𑐵𑐏𑐾 𑐳𑑂𑐎𑐹𑐮𑐫𑑂 𑐰𑐣𑐵𑐔𑑂𑐰𑐣𑐵, 𑐰 𑐣𑑄 𑐜𑐶𑐮𑑂𑐮𑐷𑐧𑐖𑐵𑐬𑑄 𑐧𑐵𑐐𑐧𑐖𑐵𑑅 𑐖𑐸𑐣𑐵𑑅 𑐣𑑂𑐴𑑂𑐫𑑅𑐏𑐵𑐥𑐵𑐏𑐾 𑐳𑑂𑐎𑐹𑐮𑐫𑑂 𑐰𑐣𑐵𑐔𑑂𑐰𑐣 𑑋 𑐖𑐶𑐐𑐸 𑐮𑑂𑐴𑐵𑐟𑐫𑑂 𑐣𑑄 𑐳𑐦𑐹 𑐡𑐸, 𑐰𑐫𑐵 𑐮𑑂𑐴𑐵𑐟𑐫𑑂 𑐣𑑄 𑐳𑐦𑐹 𑐡𑐸 𑑋 𑐧𑐵𑐐𑐧𑐖𑐵𑐬𑐫𑐵 𑐡𑐠𑐸𑐂𑐳𑑄 𑐠𑑂𑐫𑐣 – 𑐖𑐶 𑐮𑑃𑐫𑐵 𑐳𑐶𑐠𑐫𑑂 𑐰 𑐏𑐰𑐫𑑂 𑐎𑑂𑐰𑐠𑑂𑐫𑐵𑑅𑐐𑐸 𑐮𑑃𑐫𑑂 𑑋 𑐰𑑄 𑐣𑑄 𑐳𑑂𑐰𑐮, 𑐖𑐶𑑄 𑐣𑑄 𑐳𑑂𑐰𑐫𑐵, 𑐏𑑂𑐰𑐵𑑅–𑐩𑐶𑐏𑐵 𑐔𑐹𑐮𑐵𑐟 𑑋 𑐖𑐶𑐥𑐶𑑄 𑐣𑐶𑐩𑑂𑐴𑑄 𑐩𑐕𑐵𑐮𑐵 𑑋 𑐰 𑐣𑑄 𑐩𑐸𑐳𑐸𑐴𑐸𑑃 𑐣𑑂𑐴𑐶𑐮 𑐖𑐶 𑐣𑑄 𑐩𑐸𑐳𑐸𑐴𑐸𑑃 𑐣𑑂𑐴𑐶𑐮𑐵 𑑋 𑐎𑑂𑐰𑐎𑑂𑐰𑑅 𑐕𑐸𑐕𑐸𑑄 𑐮𑐶𑐦𑑅 𑐮𑐶𑐦𑑅 𑐳𑑂𑐰𑐳𑑂𑐰𑑄 𑐖𑐶 𑐥𑐹𑐬𑑂𑐰𑐥𑐵𑐏𑐾 𑐰𑐣𑐵 𑑋 𑐎𑑂𑐰𑐎𑑂𑐰𑑅 𑐕𑐸𑐕𑐸𑑄, 𑐮𑐶𑐦𑑅 𑐮𑐶𑐦𑑅 𑐳𑑂𑐰𑐳𑑂𑐰𑑄 𑐰 𑐥𑐱𑑂𑐔𑐶𑐩𑐥𑐵𑐏𑐾 𑐰𑐣 𑑋 𑐰𑐫𑐵𑐟 𑐖𑐶𑑄 𑐐𑐸𑐮𑐶 𑐢𑑂𑐰𑐡𑐸𑐎𑐾𑐟 𑐳𑑂𑐰𑐫𑐵 𑐢𑑂𑐰𑐡𑐸𑐎𑐾 𑐩𑐦𑐸 𑑋 𑐰𑐫𑐵𑐟 𑐖𑐶𑑄 𑐐𑐸𑐮𑐶 𑐣𑑂𑐰𑐟𑐸𑐂𑐟 𑐳𑑂𑐰𑐫𑐵 𑐣𑑂𑐰𑐟𑐸𑐂 𑐩𑐦𑐸 𑑋 𑐰𑑄 𑐣𑑄 𑐖𑐶𑐟𑑅 𑐐𑐸𑐮𑐶 𑐢𑑂𑐰𑐡𑐸𑐎𑐾𑐟 𑐳𑑂𑐰𑐮 𑐖𑐸𑐂, 𑐢𑑂𑐰𑐡𑐸𑐎𑐾 𑐩𑐦𑐸𑐟 𑐖𑐸𑐂, 𑐰𑑄 𑐣𑑄 𑐖𑐶𑐟𑑅 𑐐𑐸𑐮𑐶 𑐣𑑂𑐰𑐟𑐸𑐂𑐟 𑐳𑑂𑐰𑐮 𑐖𑐸𑐂, 𑐣𑑂𑐰𑐟𑐸𑐂 𑐩𑐦𑐸𑐟 𑐖𑐸𑐂 𑑋 𑐖𑐶𑐩𑐶 𑐐𑐸𑐖𑑂𑐰𑑅𑐐𑐸 𑐩𑐟𑐶𑐣𑐵 𑐖𑐸𑐂 𑑋 𑐥𑐷𑐣𑑂𑐫𑐵𑐡𑑃 𑐮𑐶𑐥𑐵 – 𑐠𑑁𑑄𑐟𑐎 𑐮𑐸𑐩𑑄 𑐮𑐸𑐩𑑄 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋

𑐖𑐶𑐥𑐶𑑄 𑐄𑐧𑐮𑐫𑑂 𑐐𑐸𑐮𑐶 𑐕𑐸𑑄 𑐩𑐳𑑂𑐫𑐹𑐥𑐶𑑄 𑐖𑐸𑐂 𑑋 𑐩𑐟𑐶𑐣𑐵 𑐢𑐂𑐐𑐸 𑐀𑐠𑐾𑐴𑐾 𑐫𑐵𑐫𑐾𑐐𑐸 𑐢𑐎𑐵𑑅 𑐔𑑂𑐰𑐣 𑐖𑐸𑐂 𑑋 𑐩𑐟𑐶𑐣𑐵 𑐫𑐵𑐂𑐥𑐶𑑄 𑐠𑐰𑑄𑐠𑑅 𑐢𑑂𑐰𑐡𑐸𑐎𑐾 𑐩𑐖𑑂𑐫𑐹 𑐢𑐎𑐵𑑅 𑐩𑐏𑐵 𑐔𑑂𑐰𑐣 𑐖𑐸𑐂 𑑋 𑐩𑐟𑐶𑐣𑐵 𑐫𑐵𑐂𑐥𑐶𑐳𑑄 𑐠𑐰𑑄𑐠𑑅 𑐣𑑂𑐰𑐟𑐸𑐂 𑐴𑐾 𑐩𑐖𑑂𑐫𑐹 𑐢𑐎𑐵𑑅 𑐩𑐏𑐵 𑐔𑑂𑐰𑐣 𑐖𑐸𑐂 𑑋 𑐩𑐟𑐶𑐣𑐵 𑐢𑐂𑐐𑐸 𑐟𑐵𑐥𑐵𑐎𑑄 𑐳𑑂𑐰𑐫𑐵𑑅, 𑐟𑐵𑐥𑐵𑐎𑑄 𑐣𑑂𑐴𑐶𑐮𑐵𑑅, 𑐣𑐸𑐐𑑅𑐫𑐵 𑐏𑑃 𑐣𑐸𑐐𑐮𑐫𑑂 𑐟𑐸𑑄 𑐟𑐫𑐵𑑅 𑐫𑐵𑐫𑐾𑐐𑐸 𑐢𑐎𑐵𑑅 𑐔𑑂𑐰𑐣 𑐖𑐸𑐂 𑑋 𑐣𑑂𑐴𑐐𑐳 𑐩𑑂𑐴𑑄𑐎𑐵𑑅, 𑐖𑐷𑐰𑐣 𑐩𑑂𑐴𑑄𑐎𑐵𑑅 𑐩𑐟𑐶𑐣𑐵 𑐫𑐵𑐫𑐾𑐐𑐸 𑐣𑑄 𑐩𑐟𑐶𑐣𑐵 𑐴𑐾 𑐢𑐎𑐵𑑅 𑐔𑑂𑐰𑑄𑐐𑐸 𑐣𑑄 𑐖𑐸𑐂𑐦𑐸 𑑋 𑐠𑑁𑑄 𑐠𑑂𑐰 𑐏𑑃 𑐮𑐸𑐩𑐣𑐷𑐧𑐮𑐫𑑂 𑐴𑐵𑐣𑑄 𑐕𑐎𑑅 𑐧𑐵𑐐𑐧𑐖𑐵𑐬 𑐖𑐸𑐣𑐵𑑅 𑐳𑑂𑐎𑐹𑐮 𑐰𑐣𑐾 𑐩𑐵𑐳𑑂𑐟𑐶 𑐰𑐂, 𑐰𑐮𑐶𑐳𑐾 𑐴𑐵𑐣𑑄 𑐕𑐎𑑅 𑐦𑐾𑐬𑐎𑐠𑑄 𑐩𑐟𑐶𑐣𑐵 𑐫𑐵𑐫𑐾 𑐩𑐵𑐳𑑂𑐟𑐶 𑐰𑐂 𑑋 𑐰 𑐮𑑃𑐫𑐵 𑐖𑐰𑐫𑑂, 𑐖𑐶 𑐮𑑃𑐫𑐵 𑐏𑐰𑐫𑑂 𑑋 𑐰 𑐥𑐹𑐬𑑂𑐰𑐥𑐵𑐏𑐾𑑄 𑐰𑐂, 𑐖𑐶 𑐥𑐱𑑂𑐔𑐶𑐩𑐥𑐵𑐏𑐾 𑐰𑐣𑐾 𑑋 𑐖𑐶𑑄 𑐠𑑅𑐐𑐸 𑐮𑑃𑐫𑐵 𑐏𑐰𑐫𑑂 𑐰 𑐰𑐫𑐵 𑐠𑑅𑐐𑐸 𑐮𑑃𑐫𑐵 𑐏𑐰𑐫𑑂 𑑋 𑐀𑐴𑑀 𑐖𑐶𑐥𑐶𑑄 𑐮𑐵 𑐐𑐸𑐧𑐮𑐾𑑄 𑐴𑐾 𑐢𑑂𑐰𑐩𑐡𑐸𑐂𑐐𑐸 𑐮𑑃𑐫𑑂 𑐏𑐣𑐶 𑑋 𑐀𑐴𑑀 𑐖𑐶𑐩𑐶𑐐𑐸 𑐩𑐟𑐶𑐣𑐵 𑐰 𑐴𑐾 𑐏𑐣𑐶𑑄 𑑋 𑐐𑐸𑐮𑐶 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋 𑐮𑐸𑐩𑑄 𑐮𑐸𑐩𑑄 𑐟𑐳𑐎𑑄 𑐴𑐾 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋

– 𑐫𑐖𑑂𑐫𑐹𑐥𑐵𑐏𑐾𑑄

𑐠𑐸𑐐𑐸 𑐔𑑂𑐰𑐳𑐸 𑐣𑑂𑐫𑐣𑐵𑐡𑐶𑐳𑑃 𑑅 𑐧𑐵𑐐𑐧𑐖𑐵𑑅𑐫𑐵 𑐮𑑃𑐫𑑂