𑐧𑐵𑐐𑐩𑐟𑐶𑐫𑐵 ‘𑐨𑐵𑐲𑐵 𑐎𑐵𑐣𑐹𑐣’ 𑐧𑐵𑐬𑐾 𑐡𑐾𑐫𑑂 𑐡𑐧𑐹𑐫𑐵 𑐳𑐴𑐮𑐴

𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐫𑑂𑐫𑐵𑐟 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑑂 𑐳𑐬𑐎𑐵𑐬𑐷 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐮𑐵𑐐𑐹 𑐩𑐫𑐵𑑅𑐟𑐮𑐾 𑐣𑐾𑐰𑐵𑑅 𑐳𑐩𑐸𑐡𑐵𑐫𑑄 𑐡𑐶𑐥𑐵𑑅 𑐴𑐾 𑐩𑐎𑐵𑐳𑐾 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵 𑐰𑐣𑐾𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐱𑐣𑐶𑐰𑐵𑑅 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐥𑐵𑐏𑐾𑑄 𑐫𑐵𑑅𑐐𑐸 𑐕𑐐𑐹 𑐳𑐴𑐮𑐴 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐷𑐥𑐶𑑄 𑐰𑐎𑑂𑐟𑐵𑐟𑐫𑑂𑐳𑑄 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐣𑑄 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵 𑐡𑐫𑐾𑐎𑐾𑐐𑐸 𑐮𑐵𑐐𑐶𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵 𑐔𑑂𑐰𑐣𑐾𑐐𑐸 𑐏𑑃 𑐢𑐵𑑅𑐐𑐸 𑐏𑑅 𑑋

𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐥𑐰𑐶𑐟𑑂𑐬 𑐧𑐖𑑂𑐬𑐵𑐔𑐵𑐬𑑂𑐫𑑄 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 𑐬𑐵𑐲𑑂𑐚𑑂𑐬𑐨𑐵𑐲𑐵 𑐋𑐣 𑐮𑐵𑐐𑐹 𑐩𑐖𑐹𑐟𑐮𑐾 𑐬𑐵𑐖𑐣𑐷𑐟𑐶𑐎 𑐡𑐮, 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐳𑐵𑑄𑐳𑐡𑐟𑐫𑑂𑐟 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐏𑐧𑐬𑐡𑐵𑐬𑐷 𑐫𑐵𑐣𑐵𑐔𑑂𑐰𑐣𑐾𑐐𑐸 𑐣𑐵𑐥𑑄 𑐖𑐣𑐟𑐵𑐫𑑂 𑐰𑐣𑐵 𑐣𑑄 𑐩𑐵𑑅𑐐𑐸 𑐎𑐠𑑄 𑐠𑐸𑐂𑐎𑐾𑐐𑐸 𑐖𑑂𑐫𑐵 𑐫𑐵𑐫𑐾𑐐𑐸 𑐏𑑃𑐫𑑂 𑐧𑑅𑐧𑐶𑐫𑐵𑐡𑐶𑐮 𑑋

𑐀𑐠𑐾 𑐴𑐾 𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱𑐫𑐵 𑐎𑐖𑐶 𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣𑑄 𑐫𑐡𑐶 𑐨𑐵𑐲𑐵𑐫𑐵 𑐠𑐸𑐐𑐸 𑐀𑐢𑐶𑐎𑐵𑐬 𑐥𑑂𑐬𑐵𑐥𑑂𑐟 𑐩𑐖𑐸𑐮 𑐢𑐵𑑅𑐳𑐵 𑐰𑐵 𑐨𑐵𑐲𑐵 𑐳𑐩𑑂𑐧𑐣𑑂𑐢𑐷 𑐋𑐣 𑐥𑐵𑐬𑐶𑐟 𑐩𑐫𑐵𑐟 𑐢𑐵𑑅𑐳𑐵 𑐁𑐣𑑂𑐡𑑀𑐮𑐣 𑐫𑐵𑐫𑐾𑐟 𑐟𑐎𑑄 𑐟𑐫𑐵𑐬 𑐖𑐸𑐂𑐩𑐵𑑅 𑐢𑐫𑐵𑐡𑐶𑐮 𑑋

𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑑂 𑐣𑐾𑐰𑐵𑑅𑐨𑐵𑐫𑑂 𑐰 𑐟𑐵𑐩𑐵𑐒 𑐨𑐵𑐫𑑂𑐫𑐵𑐟 𑐳𑐬𑐎𑐵𑐬𑐷 𑐖𑑂𑐫𑐵 𑐏𑑃𑐫𑐵 𑐨𑐵𑐫𑑂 𑐎𑐠𑑄 𑐮𑐵𑐐𑐹 𑐫𑐵𑐎𑐾𑐐𑐸 𑐣𑐶𑑄𑐟𑐶𑑄 𑐩𑐡𑐶𑐎𑑂𑐎 𑐎𑐸𑐟𑑅 𑐫𑐵𑐫𑐾𑐩𑐵𑑅𑐐𑐸 𑐰 𑐄𑐎𑐶𑐫𑐵 𑐮𑐵𑐐𑐶𑑄 𑐕𑐸 𑐐𑐖𑑂𑐫𑐵𑑅𑐐𑐸 𑐥𑐮𑐵𑑅𑐣𑑂𑐴𑑂𑐫𑐵𑐎𑐾 𑐩𑐵𑐮𑐷 𑐢𑐂𑐐𑐸 𑐰𑐶𑐲𑐫𑐫𑑂 𑐳𑐴𑐮𑐴 𑐫𑐵𑐫𑐾𑐟 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐏𑑅 𑑋 𑐨𑐵𑐲𑐵 𑐳𑐩𑑂𑐧𑐣𑑂𑐢𑐷 𑐥𑑂𑐬𑐳𑑂𑐟𑐵𑐰𑐶𑐟 𑐋𑐣 𑐥𑑂𑐬𑐡𑐾𑐱𑐫𑐵 𑐩𑐸𑐏𑑂𑐫𑐩𑐣𑑂𑐟𑑂𑐬𑐷𑐫𑐵𑐟 𑐮𑑅𑐮𑑂𑐴𑐵𑐫𑐾 𑐢𑐸𑑄𑐎𑐹𑐐𑐸 𑐡𑐸𑐳𑐵 𑐁𑑅 𑐳𑑄𑐳𑐡𑑄 𑐥𑐵𑐬𑐶𑐟 𑐖𑐸𑐂𑐰𑑄 𑐎𑐵𑐣𑐸𑐣𑐎 𑐠𑑄 𑐮𑐵𑐐𑐹 𑐖𑐸𑐂 𑑋 𑐰𑐶𑐢𑐾𑐫𑐎 𑐥𑐵𑐬𑐶𑐟 𑐖𑐸𑐂𑐰𑑄 𑐄𑐎𑐶𑐫𑐵𑐟 𑐐𑐸𑐎𑐠𑑄 𑐮𑐵𑐐𑐹 𑐫𑐵𑐣𑐵 𑐫𑑄𑐎𑐾𑐐𑐸 𑐰 𑐠𑑂𑐰 𑐳𑐰𑐵𑐮𑐫𑑂 𑐥𑑂𑐬𑐳𑑂𑐟𑐵𑐰𑐶𑐟 𑐋𑐣𑐫𑑂 𑐕𑐸 𑐕𑐸 𑐏𑑃 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑐢𑐎𑐵𑑅 𑐳𑐴𑐮𑐴 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐖𑐹𑐐𑐸 𑐏𑑅 𑑋

𑐡𑐾𑐫𑑂 𑐡𑐧𑐹 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱𑐫𑐵 𑐣𑐵𑐫𑑅 𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐳𑐴𑐮𑐴 𑐖𑑂𑐫𑐵𑐗𑑂𑐰𑐮𑐫𑑂 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 𑐳𑐬𑐎𑐵𑐬𑑄 𑐡𑐫𑐾𑐎𑐹𑐐𑐸 𑐎𑐵𑐬𑑂𑐫𑐡𑐮𑐫𑐵 𑐡𑐸𑐖𑑅𑐥𑐶𑑄 𑐥𑑂𑐬𑐵.𑐜𑐵. 𑐌𑐩𑐎𑐵𑐬𑐾𑐱𑑂𑐰𑐬 𑐱𑑂𑐬𑐾𑐲𑑂𑐛 𑐰 𑐨𑐵𑐲𑐵𑐰𑐶𑐡𑑂 𑐀𑐩𑐺𑐟 𑐫𑑀𑐘𑑂𑐖𑐣 𑐟𑐵𑐩𑐵𑐒𑐥𑐶𑑄𑐳𑑄 𑐣𑑄 𑐥𑐵𑐴𑐵𑑄 𑐎𑐠𑑄 𑐧𑑂𑐰𑐟𑐶𑐎𑐫𑐵𑐡𑐷𑐐𑐸 𑐏𑑅 𑑋

𑐰𑐫𑑂𑐎𑑅𑐥𑐶𑐣𑑂𑐳𑑄 𑐧𑐵𑐐𑑂𑐩𑐟𑐷 𑐥𑑂𑐬𑐡𑐾𑐱 𑐳𑐬𑐎𑐵𑐬𑐫𑐵𑐟 𑐮𑑅𑐮𑑂𑐴𑐵𑐣𑐵𑐐𑐸 𑐥𑑂𑐬𑐳𑑂𑐟𑐵𑐰𑐶𑐟 𑐋𑐣𑐫𑑂 𑐣𑐾𑐰𑐵𑑅𑐨𑐵𑐫𑑂 𑐰 𑐟𑐵𑐩𑐵𑐒 𑐨𑐵𑐲𑐵𑐫𑐵𑐟 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐳𑐬𑐎𑐵𑐬𑐷 𑐖𑑂𑐫𑐵 𑐏𑑃𑐫𑐵 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐮𑐵𑐐𑐹 𑐫𑐵𑐫𑐾𑐐𑐸 𑐣𑐵𑐥𑑄 𑐨𑐵𑐲𑐵𑐫𑐵 𑐏𑑃𑐫𑐵𑐟 𑐎𑐫𑐵𑑅 𑐳𑐸𑐣𑐵𑑄 𑐣𑑄 𑐀𑐥𑐩𑐵𑐣 𑐫𑐵𑐟, 𑐰𑐶𑐨𑐾𑐡𑐫𑐵𑐟 𑐢𑐵𑑅𑐳𑐵 𑐰𑐫𑐵𑐟 𑐎𑐵𑐣𑐸𑐣𑐷 𑐎𑐵𑐬𑐰𑐵𑐴𑐷 𑐫𑐵𑐫𑐾𑐦𑐂𑐐𑐸 𑐀𑐮𑐾 𑐳𑐬𑐎𑐵𑐬𑐷 𑐣𑐶𑐎𑐵𑐫𑐥𑐵𑐏𑐾𑑄 𑐣𑐾𑐰𑐵𑑅𑐨𑐵𑐫𑑂 𑐰 𑐟𑐵𑐩𑐵𑐒 𑐨𑐵𑐫𑑂𑐫𑐵𑐟 𑐮𑐵𑐐𑐹 𑐫𑐵𑐫𑐾𑐐𑐸 𑐳𑐰𑐵𑐮𑐫𑑂 𑐁𑐮𑐟𑐵𑐮 𑐫𑐵𑐟 𑐢𑐵𑑅𑐳𑐵 𑐄𑐎𑐷 𑐡𑐞𑑂𑐜 𑐳𑐩𑐾𑐟 𑐧𑐷𑐦𑐂𑐐𑐸 𑐏𑑃 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐖𑐵𑐣𑐎𑐵𑐬𑐷 𑐫𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑑂𑐰𑐎𑐸𑐥𑐶𑑄 𑐄𑐩𑐾𑐱 𑐳𑑂𑐠𑐵𑐥𑐶𑐟, 𑐱𑐵𑐣𑑂𑐟𑐵𑐱𑑂𑐬𑐾𑐲𑑂𑐛, 𑐎𑐾𑐣𑑂𑐡𑑂𑐬𑐷𑐫 𑐕𑑂𑐫𑐵𑐘𑑂𑐖𑐾 𑐩𑐔𑐵𑐬𑐵𑐖𑐵 𑐩𑐴𑐬𑑂𑐖𑐣, 𑐳𑑂𑐰𑐣𑐶𑐐𑑅 𑐰𑐶𑐱𑐾𑐲 𑐥𑑂𑐬𑐡𑐾𑐱𑐫𑐵 𑐧𑐬𑐶𑐲𑑂𑐛 𑐣𑑂𑐰𑐎𑐸 𑐣𑐰𑐶𑐣 𑐠𑐾𑐔𑑂𑐰𑐩𑐶, 𑐩𑐸𑐏𑑂𑐫 𑐳𑐔𑐶𑐰 𑐐𑐞𑐾𑐱𑐩𑐵𑐣 𑐱𑑂𑐬𑐾𑐲𑑂𑐛, 𑐕𑑂𑐫𑐵𑐘𑑂𑐖𑐾 𑐐𑑄𑐐𑐵𑐡𑐾𑐰𑐷 𑐩𑐴𑐬𑑂𑐖𑐣, 𑐫𑐾𑑃 𑐖𑐶𑐮𑑂𑐮𑐵𑐫𑐵 𑐣𑐵𑐫𑑅𑐢𑐣𑐧𑐴𑐵𑐡𑐸𑐬 𑐩𑐴𑐬𑑂𑐖𑐟 𑐟𑐶𑐩𑐶𑐮𑐵, 𑐏𑑂𑐰𑐥𑐫𑐵 𑐣𑐵𑐫𑑀 𑐣𑐬𑐾𑐱 𑐣𑐾𑐰𑐵𑑅 𑐣𑐵𑐥𑑄 𑐳𑑂𑐰𑐣𑐶𑐐𑑅𑐫𑐵 𑐠𑐷𑐠𑐷 𑐥𑐵𑐮𑐶𑐎𑐵𑐫𑐵 𑐣𑐾𑐟𑐺𑐟𑑂𑐰𑐥𑐶𑑄𑐳𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋