𑐧𑐸𑐡𑑂𑐢𑐰𑐔𑐣 – 𑐥𑐵𑐮𑐶𑐨𑐵𑐲𑐵

 

𑑑.𑐥𑐺𑐲𑑂𑐛𑐨𑐹𑐩𑐶
𑐨𑐵𑐲𑐵𑐫𑐵 𑐩𑐹𑐮 𑐳𑑅 𑐏𑑅 𑑋 𑐠𑑅𑐐𑐸 𑐩𑐣𑐫𑑂 𑐡𑐸𑐐𑐸 𑐏𑑃𑐫𑐵𑐟 𑐳𑑅𑐥𑐵𑐏𑐾𑑄 𑐎𑐣𑐷𑐐𑐸 𑐕𑐐𑐹 𑐩𑐵𑐢𑑂𑐫𑐩 𑐨𑐵𑐲𑐵 𑐏𑑅 𑑋 𑐰𑐔𑐣𑐫𑐵 𑐬𑐹𑐥𑐫𑑂 𑐏𑑃𑐮𑑂𑐴𑐵𑐧𑐮𑑂𑐴𑐵 𑐰 𑐧𑐶𑐔𑐵𑑅𑐫𑐵 𑐎𑐵𑐮𑐧𑐶𑐮 𑐫𑐵𑐫𑐾𑐐𑐸 𑐳𑑅𑐫𑐵 𑐥𑐸𑐔𑑅𑐫𑐵𑐟 𑐨𑐵𑐲𑐵 𑐢𑐵𑐂 𑑋 𑐳𑑄𑐳𑑂𑐎𑐺𑐟𑐫𑑂 ‘𑐨𑐵𑐲’ 𑐢𑐵𑐟𑐸𑑄 𑐨𑐵𑐲𑐵 𑐖𑐹𑐐𑐸 𑐏𑑅, 𑐄𑐎𑐶𑐫𑐵 𑐀𑐬𑑂𑐠 𑐢𑐵𑐫𑐾𑐐𑐸 𑐰𑐵 𑐎𑐣𑐾𑐐𑐸 𑐏𑑅 𑑋 𑐥𑐵𑐮𑐶𑐂 ‘𑐨𑐵𑐳’ 𑐢𑐵𑐟𑐸𑑄 𑐨𑐵𑐲𑐵𑐫𑐵 𑐧𑑂𑐫𑐸𑐟𑑂𑐥𑐟𑑂𑐟𑐶 𑐖𑐹𑐐𑐸 𑐏𑑅, 𑐄𑐎𑐶𑐫𑐵 𑐀𑐬𑑂𑐠 𑐣𑑄 𑐢𑐵𑐫𑐾𑐐𑐸 𑐰𑐵 𑐎𑐣𑐾𑐐𑐸 𑐴𑐾 𑐏𑑅 𑑋 𑐳𑐡𑑂𑐡𑐣𑐷𑐟𑐶 𑐢𑐵𑐟𑐸𑐩𑐵𑐮𑐵 𑐐𑑂𑐬𑐣𑑂𑐠𑐫𑑂 𑐨𑐵𑐳𑐧𑑂𑐫𑐟𑑂𑐟𑐵𑐫𑑄 𑐰𑐵𑐔𑐵𑐫𑑄 𑐀𑐬𑑂𑐠𑐵𑐟𑑂 𑐥𑐞𑑂𑐜𑐶𑐟𑐫𑐵 𑐰𑐔𑐣𑐫𑐵𑐟 𑐨𑐵𑐲𑐵 𑐢𑐎𑐵𑑅 𑐰𑐬𑑂𑐞𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐄𑐐𑐸 𑐴𑐾 𑐐𑑂𑐬𑐣𑑂𑐠𑐫𑑂 𑐨𑐳𑑂𑐳 𑐨𑐳𑑂𑐳𑐣𑐾 𑐀𑐬𑑂𑐠𑐵𑐟𑑂 𑐨𑐵𑐲𑐵 𑐢𑐫𑐵𑐐𑐸, 𑐎𑐣𑐾𑐐𑐸 𑐰 𑐏𑑃 𑐮𑑂𑐴𑐵𑐫𑐾𑐐𑐸 𑐁𑐡𑐶 𑐀𑐬𑑂𑐠 𑐎𑐠𑑄 𑐣𑑄 𑐎𑑂𑐫𑐣𑐵𑐟𑑅𑐐𑐸 𑐡𑐸 𑑋

𑐠𑑁𑑄𑐫𑐵 𑐂𑐮𑐫𑑂 𑐰𑐶𑐱𑑂𑐰𑐫𑑂 𑐠𑑂𑐫𑑄𑐩𑐠𑑂𑐫𑑄 𑐏𑐸𑐡𑑂𑐰𑑅 𑐰 𑐣𑑂𑐫𑐵𑐳𑑅 (𑑖𑑕𑑐𑑐) 𑐠𑐷𑐠𑐷 𑐨𑐵𑐳𑑄 𑐏𑑃𑐮𑑂𑐴𑐵𑐧𑐮𑑂𑐴𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐴𑐶𑐣𑑂𑐡𑐷𑑄 𑐕𑐐𑐹 𑐢𑐵𑐥𑐹 𑐣𑑄 𑐡𑐸 𑐎𑐶 ‘𑐔𑐵𑐬 𑐎𑑀𑐱 𑐩𑐾 𑐥𑐵𑐣𑐷 𑐧𑐡𑐮𑐾, 𑐁𑐛 𑐎𑑀𑐱 𑐩𑐾 𑐰𑐵𑐞𑐷’ 𑐀𑐬𑑂𑐠𑐵𑐟 ‘𑐥𑑂𑐫𑑄𑐐𑐹 𑐎𑑀𑐱𑐫𑑂 𑐮𑑅𑐫𑐵 (𑐳𑐰𑐵𑑅) 𑐴𑐶𑐮𑐷, 𑐔𑑂𑐫𑐵𑐐𑐹 𑐎𑑀𑐱𑐫𑑂 𑐨𑐵𑐫𑑂 (𑐴𑐶𑐮𑐷)’ 𑑋 𑐃𑐎𑐠𑑄 𑐡𑐾𑐱, 𑐳𑐩𑐵𑐖, 𑐟𑑂𑐰𑐵𑑅, 𑐥𑐬𑐶𑐰𑐵𑐬 𑐰 𑐩𑐣𑐹 𑐩𑐣𑐹 𑐡𑐠𑐸𑐂 𑐨𑐵𑐫𑑂 𑐴𑐶𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑐩𑐢𑑂𑐫𑐾 𑐥𑐵𑐮𑐶 𑐣𑑄 𑐕𑐐𑐹 𑐨𑐵𑐲𑐵 𑐏𑑅 𑑋 𑐨𑐐𑐰𑐵𑐣𑑂 𑐧𑐸𑐡𑑂𑐢𑑄 𑐠𑐸𑐐𑐸 𑐨𑐵𑐳𑑄 𑐴𑐾 𑐖𑐣𑑂𑐩𑐩𑐬𑐞𑐫𑐵 𑐔𑐎𑑂𑐬𑑄 𑐧𑐵𑐫𑐵𑐰𑐣𑐷𑐐𑐸 𑐡𑐾𑐱𑐣𑐵 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐏𑑅 𑑋 𑐄𑐐𑐸 𑐨𑐵𑐲𑐵 𑐄𑐧𑐮𑐫𑑂𑐫𑐵 𑐖𑐣𑐨𑐵𑐲𑐵 𑐏𑑅, 𑐐𑐸𑐎𑐶𑐫𑐵𑐟 𑐏𑑃𑐮𑑂𑐴𑐵𑐧𑐮𑑂𑐴𑐵𑐫𑐵 𑐬𑐸𑐥𑐫𑑂 𑐣𑑄 𑐕𑐫𑑂𑐮𑐵𑐧𑐸𑐮𑐵 𑐫𑐵𑐣𑐵𑐟𑑅𑐐𑐸 𑐏𑑅 𑑋

𑐩𑐹𑐮 𑐟𑑂𑐬𑐶𑐥𑐶𑐚𑐎𑐫𑑂 𑐥𑐵𑐮𑐶 𑐨𑐵𑐲𑐵𑐫𑐵𑐟 𑐠𑐷𑐠𑐷 𑐣𑐵𑐩𑑄 𑐎𑑂𑐫𑐣𑐵𑐟𑑅𑐐𑐸 𑐡𑐸 𑑋 𑐐𑐠𑐾𑐎𑐶 𑐩𑐹𑐮 𑐟𑑂𑐬𑐶𑐥𑐶𑐚𑐎𑐫𑐵 𑐰𑐶𑐣𑐫 𑐥𑐶𑐚𑐎𑐫𑑂 𑐀𑐬𑐶𑐫𑐎 𑐰 𑐀𑐨𑐶𑐢𑐩𑑂𑐩𑐥𑐶𑐚𑐎𑐫𑐵 𑐰𑐶𑐨𑐒𑑂𑐐𑐫𑑂 𑐢𑐩𑑂𑐩𑐣𑐶𑐬𑐸𑐟𑑂𑐟𑐶 𑐢𑐎𑐵 𑐎𑑂𑐫𑐣𑐵𑐟𑑅𑐐𑐸 𑐡𑐸 𑑋 𑐀𑐠𑐾 𑐴𑐾 𑐳𑐩𑑂𑐩𑑀𑐴𑐰𑐶𑐣𑑀𑐡𑐣𑐷 (𑐰𑐶𑐨𑐒𑑂𑐐𑐫𑐵 𑐀𑐚𑑂𑐛𑐎𑐠𑐵)𑐂 𑐳𑐨𑐵𑐰𑐣𑐶𑐬𑐸𑐟𑑂𑐟𑐶, 𑐳𑐩𑐣𑑂𑐟𑐥𑐵𑐳𑐵𑐡𑐶𑐎𑐵 (𑐰𑐶𑐣𑐫 𑐥𑐶𑐚𑐎𑐫𑐵 𑐀𑐚𑑂𑐛𑐎𑐠𑐵)𑐫𑑂 𑐩𑐵𑐐𑐢𑐶𑐨𑐵𑐳𑐵, 𑐥𑐚𑐶𑐳𑐩𑑂𑐨𑐶𑐡𑐵𑐩𑐐𑑂𑐐𑐫𑐵 𑐀𑐚𑑂𑐛𑐎𑐠𑐵𑐫𑑂 𑐩𑐵𑐐𑐢𑐶𑐎𑐵 𑐨𑐵𑐳𑐵 𑐰 𑐩𑐹𑐮𑐨𑐵𑐳𑐵, 𑐢𑐩𑑂𑐩𑐥𑐡 𑐀𑐚𑑂𑐛𑐎𑐠𑐵𑐫𑑂 𑐟𑐣𑑂𑐟𑐶𑐨𑐵𑐳𑐵 𑐰 𑐰𑐖𑐶𑐬𑐧𑐸𑐡𑑂𑐢𑐶𑐚𑐷𑐎𑐵 𑐣𑐵𑐥𑑄 𑐳𑐵𑐬𑐟𑑂𑐠𑐡𑐷𑐥𑐣𑐶𑐚𑐷𑐎𑐵𑐫𑑂 𑐥𑐎𑐟𑐶𑐨𑐵𑐳𑐵 𑐢𑐎𑐵𑑅 𑐕𑑂𑐫𑐮𑐵𑐟𑑅𑐐𑐸 𑐡𑐸 𑑋

𑑒. 𑐩𑑂𑐴𑐳𑐷𑐎𑐵
𑐥𑐵𑐮𑐶𑐫𑐵𑐟 𑐩𑐵𑐐𑐢𑐶 𑐀𑐠𑐰𑐵 𑐩𑐵𑐐𑐢𑐶 𑐣𑐶𑐬𑐸𑐟𑑂𑐟𑐶 𑐀𑐬𑑂𑐠𑐵𑐟𑑂 𑐩𑐵𑐐𑐢𑐶𑐨𑐵𑐲𑐵 𑐢𑐎𑐵𑑅 𑐣𑑄 𑐢𑐵𑐂 𑑋 𑐰𑐶𑐣𑐫𑐥𑐶𑐚𑐎 𑐀𑐚𑑂𑐛𑐎𑐠𑐵, 𑐔𑐹𑐰𑐶𑐐𑑂𑐐, 𑐏𑐸𑐡𑑂𑐡𑐎𑐰𑐟𑑂𑐠𑐸𑐎𑑂𑐏𑐣𑑂𑐢𑐎𑐫𑑂 “𑐳𑐎𑐵𑐫 𑐣𑐶𑐬𑐸𑐟𑑂𑐟𑐶𑐫𑐵𑐟𑐶 𑐊𑐟𑑂𑐠 𑐳𑐎𑐵 𑐣𑐶𑐬𑐸𑐟𑑂𑐟𑐶 𑐣𑐵𑐩 𑐳𑐩𑑂𑐩𑐵𑐳𑐩𑑂𑐧𑐸𑐡𑑂𑐢𑐾𑐣 𑐰𑐸𑐟𑑂𑐟𑐥𑑂𑐥𑐎𑐵𑐬𑑀 𑐩𑐵𑐐𑐢𑐶𑐎𑑀 𑐰𑑀𑐴𑐵𑐬𑑀” 𑐀𑐬𑑂𑐠𑐵𑐟𑑂 𑐳𑐎𑐵𑐫 𑐣𑐶𑐬𑐸𑐟𑑂𑐟𑐶 𑐢𑐎𑐵𑑅 𑐠𑐣 𑐠𑑅𑐐𑐸 𑐨𑐵𑐲𑐵 𑐢𑐎𑐵𑑅 𑐳𑐩𑑂𑐫𑐎𑑂𑐳𑐩𑑂𑐧𑐸𑐡𑑂𑐢𑑄 𑐣𑑂𑐰𑐰𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐩𑐵𑐐𑐢𑐶 𑐨𑐵𑐲𑐵 𑐏𑑅 𑑋 𑐥𑐡𑐬𑐸𑐥𑐳𑐶𑐡𑑂𑐢𑐶 𑐰𑑂𑐫𑐵𑐎𑐬𑐞𑐫𑑂 “𑐳𑐵 𑐩𑐵𑐐𑐢𑐷 𑐩𑐹𑐮𑐨𑐵𑐳𑐵, 𑐣𑐬𑐵 𑐫𑐵𑐫𑐵𑐡𑐶𑐎𑐥𑑂𑐥𑐶𑐎𑐵 𑑋 𑐧𑑂𑐬𑐴𑑂𑐩𑐵𑐣𑑀 𑐔’𑐳𑑂𑐳𑐸𑐟𑐵𑐮𑐵𑐥𑐵, 𑐳𑐩𑑂𑐧𑐸𑐡𑑂𑐢𑐵 𑐔𑐵𑐥𑐶 𑐨𑐵𑐳𑐬𑐾 𑑋 𑐀𑐬𑑂𑐠𑐵𑐟𑑂 𑐄𑐐𑐸 𑐩𑐵𑐐𑐢𑐷 𑐩𑐹𑐮𑐨𑐵𑐲𑐵, 𑐩𑐣𑐹𑐣𑐶𑐳𑐾𑑄 𑐐𑐣 𑐟𑐎 𑐣𑑂𑐴𑐵𑐥𑐵𑐫𑐵𑐐𑐸 𑐎𑐮𑑂𑐥𑐫𑐵 𑐧𑑂𑐬𑐴𑑂𑐩𑐵, 𑐀𑐳𑐸𑐬 𑐰 𑐳𑐩𑑂𑐧𑐸𑐡𑑂𑐢𑐥𑐶𑑄𑐳𑑄 𑐣𑑄 𑐣𑑂𑐰𑐰𑐵𑐣𑐵 𑐧𑐶𑐖𑑂𑐫𑐵𑐂𑐐𑐸 𑐨𑐵𑐲𑐵 𑐏𑑅 𑑋 𑐠𑐸𑐐𑐸 𑐐𑐵𑐠𑐵𑐫𑑂 𑐨𑐵𑐲𑐵𑐫𑐵 𑐥𑑂𑐬𑐵𑐔𑐷𑐣𑐟𑐵𑐫𑐵𑐟 𑐣𑑂𑐴𑑂𑐫𑐧𑑂𑐰𑐫𑐵𑐟𑑅𑐐𑐸 𑐏𑑅 𑑋

𑐧𑐸𑐡𑑂𑐢𑐫𑐵 𑐥𑐵𑐮𑐫𑑂 𑐰𑐾𑐡𑐫𑐵 𑐨𑐵𑐲𑐵 𑐕𑐣𑑂𑐡𑐳𑑂 𑐏𑑅 𑑋 𑐔𑐹𑐰𑐶𑐐𑑂𑐐𑐥𑐵𑐮𑐶𑐫𑑂 𑐨𑐐𑐰𑐵𑐣𑑂 𑐧𑐸𑐡𑑂𑐢𑑄 𑐫𑐾𑐩𑐷 𑐰 𑐟𑐾𑐎𑐸𑐮 𑐣𑐶𑐩𑑂𑐴 𑐡𑐵𑐖𑐸𑐎𑐶𑐖𑐵 𑐧𑑂𑐬𑐵𑐴𑑂𑐩𑐞 𑐨𑐶𑐎𑑂𑐲𑐸𑐥𑐶𑑄𑐟 𑐳𑐩𑑂𑐧𑑀𑐢𑐣 𑐫𑐵𑐣𑐵𑑅 ‘𑐨𑐶𑐎𑑂𑐲𑐸𑐥𑐶𑑄, 𑐧𑐸𑐡𑑂𑐢𑐰𑐔𑐣𑐫𑐵𑐟 𑐐𑐸𑐩𑑂𑐴𑐾𑐳𑐶𑐣𑑄 𑐕𑐣𑑂𑐡𑐳𑑂𑐫𑑂 𑐄𑐮𑑂𑐠𑐵 𑐫𑐵𑐂, 𑐰𑐫𑐵𑐟 𑐡𑐸𑐲𑑂𑐎𑐺𑐟𑑂𑐫 𑐁𑐥𑐟𑑂𑐟𑐶 𑐮𑐵𑐂 𑑋 𑐨𑐶𑐎𑑂𑐲𑐸𑐥𑐶𑑄, 𑐀𑐣𑐸𑐩𑐟𑐶 𑐧𑐶𑐫𑐵𑐔𑑂𑐰𑐣𑐵, 𑐠𑑅𑐐𑐸 𑐨𑐵𑐳𑑄 𑐧𑐸𑐡𑑂𑐢𑐰𑐔𑐣𑐫𑐵𑐟 𑐀𑐢𑑂𑐫𑐫𑐣 𑐫𑐵𑐫𑐾𑐟 𑐢𑐎𑐵𑑅 𑐰𑐶𑐣𑐫 𑐥𑑂𑐬𑐖𑑂𑐘𑐥𑑂𑐟 𑐫𑐵𑐣𑐵𑐧𑐶𑐖𑑂𑐫𑐵𑐟 𑑋 (“𑐣, 𑐨𑐶𑐎𑑂𑐏𑐰𑐾, 𑐧𑐸𑐡𑑂𑐢𑐰𑐔𑐣𑑄 𑐕𑐣𑑂𑐡𑐳𑑀 𑐁𑐬𑑀𑐥𑐾𑐟𑐧𑑂𑐧𑑄 𑑋 𑐫𑑀 𑐁𑐬𑑀𑐥𑐾𑐫𑑂𑐫, 𑐁𑐥𑐟𑑂𑐟𑐶 𑐡𑐸𑐎𑑂𑐎𑐚𑐳𑑂𑐳 𑑋 𑐀𑐣𑐸𑐖𑐵𑐣𑐵𑐩𑐶, 𑐨𑐶𑐎𑑂𑐏𑐰𑐾, 𑐳𑐎𑐵𑐫 𑐣𑐶𑐬𑐸𑐟𑑂𑐟𑐶𑐫𑐵 𑐧𑐸𑐡𑑂𑐢𑐰𑐔𑐣𑑄 𑐥𑐬𑐶𑐫𑐵𑐥𑐸𑐞𑐶𑐟𑐸𑑄 𑑋”) 𑐠𑐸𑐐𑐸 𑐀𑐨𑐶𑐰𑑂𑐫𑐟𑑂𑐟𑐶𑑄m 𑐧𑐸𑐡𑑂𑐢 𑐰𑐔𑐣𑐫𑐵𑐟 𑐠𑑅𑐠𑑅𑐐𑐸 𑐨𑐵𑐲𑐵𑑄 𑐳𑐫𑐾𑐎𑐾𑐐𑐸 𑐳𑐷𑐎𑐾𑐐𑐸 𑐳𑑂𑐰𑐟𑐣𑑂𑐟𑑂𑐬𑐟𑐵 𑐧𑐶𑐫𑐵𑐟𑑅𑐐𑐸 𑐫𑐔𑐸𑐎 𑐳𑐷𑐡𑐸 𑑋 𑐥𑐵𑐮𑐶 𑐨𑐵𑐲𑐵𑐫𑐵 𑐠𑑅𑐐𑐸 𑐔𑑂𑐰𑐫𑐾𑐐𑐸 𑐮𑐶𑐥𑐶 𑐩𑐡𑐸𑐐𑐸𑐮𑐶𑑄 𑐠𑑅𑐠𑑅𑐐𑐸 𑐮𑐶𑐥𑐶𑑄 𑐴𑐾 𑐥𑐵𑐮𑐶 𑐨𑐵𑐲𑐵𑐫𑐵𑐟 𑐀𑑅𑐥𑐸𑐎 𑐳𑐫𑐾𑐎𑐾𑐦𑐸 𑑋

𑐥𑐵𑐮𑐶 𑐱𑐧𑑂𑐡𑐫𑐵 𑐰𑑂𑐫𑐸𑐟𑑂𑐥𑐟𑑂𑐟𑐶 𑐥𑐵 𑐢𑐵𑐟𑐸𑑄 𑐰𑑅𑐐𑐸 𑐏𑑅 𑑋 𑐥𑐵 𑐬𑐎𑑂𑐏𑐞𑐾 𑐥𑐵 𑐢𑐵𑐟𑐸𑐫𑐵 𑐀𑐬𑑂𑐠 𑐬𑐎𑑂𑐲𑐵 𑐫𑐵𑐫𑐾𑐐𑐸 𑐏𑑅 𑑋 𑐕𑐸𑐎𑐶𑐫𑐵𑐟 𑐬𑐎𑑂𑐲𑐵 𑐫𑐵𑐫𑐾𑐐𑐸 𑐢𑐵𑑅𑐳𑐵 𑐩𑐵𑐐𑐢𑐶 𑐨𑐵𑐲𑐵𑐫𑑂 𑐳𑐸𑐬𑐎𑑂𑐲𑐶𑐟 𑐧𑐸𑐡𑑂𑐢 𑐰𑐔𑐣𑐫𑐵𑐟 𑐬𑐎𑑂𑐲𑐵 𑐫𑐵𑐫𑐾𑐟 𑐢𑐎𑐵𑑅 𑐢𑐵𑐫𑐾𑐦𑐸 𑑋 𑐩𑐴𑐵𑐣 𑐀𑐚𑑂𑐛𑐎𑐠𑐵𑐔𑐵𑐬𑑂𑐫 𑐧𑐸𑐡𑑂𑐢𑐑𑑀𑐲𑑄 𑐰𑐶𑐳𑐸𑐡𑑂𑐢𑐶𑐩𑐐𑑂𑐐 𑐐𑑂𑐬𑐣𑑂𑐠𑐫𑑂 𑐣𑐾𑐰 𑐥𑐵𑐮𑐶𑐫𑑄 𑐣 𑐀𑐚𑑂𑐛𑐎𑐠𑐵𑐫𑑄 𑐁𑐐𑐟𑑄 𑐀𑐬𑑂𑐠𑐵𑐟𑑂 𑐣 𑐥𑐵𑐮𑐶 𑐣 𑐀𑐚𑑂𑐛𑐎𑐠𑐵𑐫𑑂 𑐰𑑅𑐐𑐸 𑐏𑑅 𑑋 𑐠𑐣 𑐥𑐵𑐮𑐶 𑐢𑐎𑐵𑑅 𑐧𑐸𑐡𑑂𑐢 𑐰𑐔𑐣, 𑐐𑐸𑐐𑐸 𑐩𑐹𑐮 𑐟𑑂𑐬𑐶𑐥𑐶𑐚𑐎𑐫𑐵𑐟 𑐎𑑂𑐫𑐣𑐵𑐟𑑅𑐐𑐸 𑐏𑑅 𑑋 𑐰𑐒𑑂𑐐𑐷𑐳 𑐳𑑄𑐫𑐸𑐎𑑂𑐟𑐫𑑂 𑐨𑐐𑐰𑐵𑐣𑑂 𑐧𑐸𑐡𑑂𑐢𑑄 𑐨𑐫𑐬𑐴𑐶𑐟 𑐣𑐶𑐬𑑂𑐰𑐵𑐞𑐫𑑂 𑐠𑑂𑐫𑑄𑐎𑐾𑐟, 𑐡𑐸𑑅𑐏 𑐀𑐣𑑂𑐟𑑂𑐫 𑐫𑐵𑐫𑐾𑐟 𑐐𑐸𑐐𑐸 𑐨𑐵𑐳𑑄 𑐢𑐬𑑂𑐩𑐡𑐾𑐱𑐣𑐵 𑐫𑐵𑐣𑐵𑐧𑐶𑐖𑑂𑐫𑐵𑐟, 𑐄𑐐𑐸 𑐨𑐵𑐲𑐵 𑐣𑐶𑐱𑑂𑐔𑐫 𑐣𑑄 𑐨𑐵𑐲𑐵𑐟 𑐩𑐢𑑂𑐫𑐾 𑐄𑐟𑑂𑐟𑐩𑐐𑐸 𑐏𑑅 𑑋 (𑐫𑑄 𑐧𑐸𑐡𑑂𑐢𑑀 𑐨𑐵𑐳𑐟𑐾 𑐰𑐵𑐔𑑄, 𑐏𑐾𑐩𑑄 𑐣𑐶𑐧𑑂𑐧𑐵𑐣𑐥𑐟𑑂𑐟𑐶𑐫𑐵 𑑋 𑐡𑐸𑐎𑑂𑐏𑐳𑑂𑐳𑐣𑑂𑐟𑐎𑐶𑐬𑐶𑐫𑐵𑐫, 𑐳𑐵 𑐰𑐾 𑐰𑐵𑐔𑐵𑐣𑐩𑐸𑐟𑑂𑐟𑐩𑐵 𑑋𑑋) 𑐢𑐎𑐵𑑅 𑐥𑑂𑐬𑐱𑑄𑐳𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑑓. 𑐥𑐵𑐮𑐶 𑐏𑑃𑐐𑑂𑐰𑑅𑐫𑐵 𑐄𑐟𑑂𑐥𑐟𑑂𑐟𑐶 
𑐨𑐐𑐰𑐵𑐣𑑂 𑐧𑐸𑐡𑑂𑐢𑑄 𑐄𑐥𑐡𑐾𑐱 𑐎𑐣𑐵𑐧𑐶𑐖𑑂𑐫𑐵𑐫𑐾 𑐢𑐸𑑄𑐎𑐵𑑅 𑐨𑐶𑐎𑑂𑐲𑐸𑐥𑐶𑑄𑐳𑑄 𑐨𑐣𑑂𑐟𑐾 ! 𑐀𑐡𑑂𑐨𑐸𑐟, 𑐁𑐱𑑂𑐔𑐬𑑂𑐫, 𑐠𑑂𑐰 𑐕𑐸 𑐣𑐵𑑄 𑐡𑐸𑐐𑐸 𑐢𑐬𑑂𑐩 𑐥𑐬𑑂𑐫𑐵𑐫 𑐏 𑑅 ? (𑐀𑐔𑑂𑐕𑐬𑐶𑐫𑑄, 𑐨𑐣𑑂𑐟𑐾, 𑐀𑐧𑑂𑐨𑐸𑐟𑑄, 𑐨𑐣𑑂𑐟𑐾, 𑐎𑑀 𑐣𑐵𑐩𑑀 𑐀𑐫𑑄, 𑐨𑐣𑑂𑐟𑐾, 𑐢𑐩𑑂𑐩𑐥𑐬𑐶𑐫𑐵𑐫𑑀’𑐟𑐶 ?) 𑐢𑐎𑐵𑑅 𑐣𑑂𑐫𑐣𑐵𑐧𑐶𑐖𑑂𑐫𑐵𑐂 𑑋 𑐀𑐮𑐾 𑐨𑐐𑐰𑐵𑐣𑑂 𑐧𑐸𑐡𑑂𑐢𑑄 𑐠𑑂𑐰 𑐢𑐬𑑂𑐩𑐥𑐬𑑂𑐫𑐵𑐫 𑐏𑑅 𑐢𑐎𑐵𑑅 𑐢𑐵𑐬𑐞𑐵 𑐫𑐵 𑐢𑐎𑐵𑑅 𑐢𑐫𑐵𑐧𑐶𑐖𑑂𑐫𑐵𑐂 𑑋 𑐠𑐸𑐎𑐶𑐫𑐵 𑐡𑐳𑐸𑐫𑐵 𑐬𑐹𑐥𑐫𑑂 𑐡𑐷𑐑𑐣𑐶𑐎𑐵𑐫𑐫𑐵 𑐧𑑂𑐬𑐴𑑂𑐩𑐖𑐵𑐮𑐳𑐹𑐟𑑂𑐬𑐫𑐵 𑐀𑐣𑑂𑐟𑑂𑐫𑐫𑑂 𑐁𑐣𑐣𑑂𑐡 𑐨𑐣𑑂𑐟𑐾𑑄 𑐨𑐐𑐰𑐵𑐣𑑂 𑐧𑐸𑐡𑑂𑐢𑐫𑐵𑐟 𑐠𑑂𑐰 𑐢𑐬𑑂𑐩𑐥𑐬𑑂𑐫𑐵𑐫𑐫𑐵 𑐣𑐵𑐩 𑐕𑐸 𑐏𑑅 𑐢𑐎𑐵𑑅 𑐣𑑂𑐫𑑄𑐐𑐸 𑐂𑐮𑐫𑑂 𑐠𑐸𑐎𑐶𑐫𑐵𑐟 𑐀𑐬𑑂𑐠𑐖𑐵𑐮, 𑐢𑐬𑑂𑐩𑐖𑐵𑐮, 𑐧𑑂𑐬𑐴𑑂𑐩𑐖𑐵𑐮, 𑐡𑐺𑐲𑑂𑐚𑐶𑐖𑐵𑐮 𑐰𑐵 𑐀𑐣𑐸𑐟𑑂𑐟𑐬 𑐳𑑄𑐐𑑂𑐬𑐵𑐩𑐰𑐶𑐖𑐫 𑐢𑐎𑐵𑑅 𑐢𑐵𑐬𑐞 𑐫𑐵 𑐢𑐎𑐵𑑅 𑐢𑐫𑐵𑐧𑐶𑐖𑑂𑐫𑐵𑐟 𑑋 (𑐂𑐩𑑄 𑐢𑐩𑑂𑐩𑐥𑐬𑐶𑐫𑐵𑐫𑑄 𑐀𑐟𑑂𑐠𑐖𑐵𑐮𑐣𑑂𑐟𑐶𑐥𑐶 𑐣𑑄 𑐢𑐵𑐬𑐾𑐴𑐶, 𑐢𑐩𑑂𑐩𑐖𑐵𑐮𑐣𑑂𑐟𑐶𑐥𑐶 𑐣𑑄 𑐢𑐵𑐬𑐾𑐴𑐶, 𑐧𑑂𑐬𑐴𑑂𑐩𑐖𑐵𑐮𑐣𑑂𑐟𑐶𑐥𑐶 𑐣𑑄 𑐢𑐵𑐬𑐾𑐴𑐶, 𑐡𑐶𑐚𑑂𑐛𑐶𑐖𑐵𑐮𑐣𑑂𑐟𑐶𑐥𑐶 𑐣𑑄 𑐢𑐵𑐬𑐾𑐴𑐶, 𑐀𑐣𑐸𑐟𑑂𑐟𑐬𑑀 𑐳𑐒𑑂𑐐𑐵𑐩𑐰𑐶𑐖𑐫𑑀𑐟𑐶𑐥𑐶 𑐣𑑄 𑐢𑐵𑐬𑐾𑐴𑐷’𑐟𑐶 𑑋 )

𑐀𑐠𑐾 𑐴𑐾 𑐩𑐖𑑂𑐗𑐶𑐩𑐣𑐶𑐎𑐵𑐫𑐫𑐵 𑐩𑐴𑐵𑐳𑐷𑐴𑐣𑐵𑐡 𑐳𑐹𑐟𑑂𑐬𑐫𑐵 𑐡𑐾𑐱𑐣𑐵 𑐮𑐶𑐥𑐵 𑐁𑐫𑐸𑐲𑑂𑐩𑐵𑐣𑑂 𑐣𑐵𑐐𑐳𑐩𑐵𑐮𑑄 𑐨𑐐𑐰𑐵𑐣𑑂 𑐧𑐸𑐡𑑂𑐢𑐫𑐵𑐎𑐾 𑐢𑐬𑑂𑐩 𑐥𑐬𑑂𑐫𑐵𑐫𑐫𑐵 𑐧𑐵𑐬𑐾 𑐣𑑂𑐴𑑂𑐫𑐳𑑅 𑐟𑐂𑐧𑐮𑐫𑑂 𑐂𑐮𑐫𑑂 𑐠𑑂𑐰 𑐮𑑀𑐩𑐴𑑄𑐳𑐣𑐥𑐬𑐶𑐫𑐵𑐫𑑀 𑐢𑐎𑐵𑑅 𑐢𑐵𑐬𑐞 𑐫𑐵 𑐢𑐎𑐵𑑅 𑐢𑐫𑐵𑐧𑐶𑐖𑑂𑐫𑐵𑐟 𑑋 𑐨𑐐𑐰𑐵𑐣𑑂 𑐧𑐸𑐡𑑂𑐢𑑄 𑐀𑐣𑐾𑐎 𑐥𑐬𑑂𑐫𑐵𑐫𑑄 𑐢𑐬𑑂𑐩 𑐥𑑂𑐬𑐎𑐵𑐱𑐶𑐟 𑐫𑐵𑐣𑐵𑐧𑐶𑐖𑑂𑐫𑐵𑐟 𑐢𑐎𑐵𑑅 (𑐨𑐐𑐰𑐟𑐵 𑐀𑐣𑐾𑐎 𑐥𑐬𑐶𑐫𑐵𑐫𑐾𑐣 𑐢𑐩𑑂𑐩𑑀 𑐥𑐎𑐵𑐳𑐶𑐟𑑀) 𑐣𑑄 𑐁𑐥𑐵𑑅 𑐳𑐹𑐟𑑂𑐬𑐫𑑂 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸 𑐥𑐬𑐶𑐫𑐵𑐫 𑐱𑐧𑑂𑐡 𑐴𑐾 𑐮𑐶𑐥𑐵 𑐔𑐶𑐴𑐵𑐎𑑅 𑐖𑐸𑐫𑐵𑑅 𑐥𑐵𑐮𑐶 𑐖𑐹𑐰𑑄𑐐𑐸 𑐏𑑅 𑑋 𑐠𑐸𑐎𑐶𑐫𑐵 𑐀𑐬𑑂𑐠 𑐧𑐸𑐡𑑂𑐢 𑐰𑐔𑐣 𑐏𑑅 𑑋 𑐥𑐵𑐮𑐶𑐩𑐴𑐵𑐰𑑂𑐫𑐵𑐎𑐬𑐞𑐫𑑂 𑐨𑐶𑐎𑑂𑐲𑐸 𑐖𑐐𑐡𑐶𑐱 𑐎𑐵𑐱𑑂𑐫𑐥𑑄 𑐥𑐵𑐮𑐶𑐫𑐵 𑐀𑐬𑑂𑐠 𑐧𑐸𑐡𑑂𑐢 𑐰𑐔𑐣 𑐖𑐹𑐐𑐸𑐮𑐶𑑄 𑐠𑑂𑐰 𑐏𑑃𑐐𑑂𑐰𑑅 𑐩𑐹𑐮 𑐟𑑂𑐬𑐶𑐥𑐶𑐚𑐎 𑐐𑑂𑐬𑐣𑑂𑐠𑐫𑐵 𑐮𑐵𑐐𑐶 𑐖𑐎 𑐕𑑂𑐫𑐮𑐵𑐟𑐮, 𑐀𑐬𑑂𑐠𑐎𑐠𑐵𑐫𑐵 𑐣𑐶𑐟𑐶𑑄 𑐩𑐏𑐸 𑐢𑐎𑐵𑑅 𑐎𑑂𑐫𑐣𑐵 𑐟𑐮 𑑋

𑐳𑐩𑑂𑐬𑐵𑐚 𑐀𑐱𑑀𑐎𑑄 𑐨𑐵𑐧𑑂𑐬𑐸 𑐱𑐶𑐮𑐵𑐮𑐾𑐏𑐫𑑂 𑐨𑐐𑐰𑐵𑐣𑑂 𑐧𑐸𑐡𑑂𑐢𑐫𑐵 𑐄𑐥𑐡𑐾𑐱 𑐢𑐩𑑂𑐩𑐥𑐬𑐶𑐫𑐵𑐫𑐫𑐵𑐟 𑐥𑐵𑐮𑐶𑐫𑐵𑐫𑐾 𑐢𑐎𑐵𑑅 𑐕𑑂𑐫𑐮𑐵𑐟𑑅𑐐𑐸 𑐡𑐸 𑑋 (𑐂𑐩𑐵𑐣𑐶 𑐨𑐣𑑂𑐟𑐾 ! 𑐢𑐩𑑂𑐩–𑐥𑐮𑐶𑐫𑐵𑐫𑐵𑐣𑐶–𑐰𑐶𑐣𑐫𑐳𑐩𑐸𑐎𑐳𑑀, 𑐀𑐬𑐶𑐫𑐰𑑄𑐳𑐵, 𑐀𑐣𑐵𑐐𑐟𑐨𑐫𑐵𑐣𑐶, 𑐩𑐸𑐣𑐶𑐐𑐵𑐠𑐵, 𑐩𑑀𑐣𑐾𑐫𑑂𑐫𑐳𑐸𑐟𑑂𑐟𑑄, 𑐄𑐥𑐟𑐶𑐳𑑂𑐳–𑐥𑐳𑐶𑐣𑑀 (𑐥𑐘𑑂𑐴𑑀), 𑐊 𑐔 𑐬𑐵𑐴𑐸𑐮𑑀𑐰𑐵𑐡𑐾 𑐩𑐸𑐳𑐵𑐰𑐵𑐡𑑄 𑐀𑐢𑐶𑐎𑐶𑐔𑑂𑐔 𑑋 ) 𑐥𑐬𑐶𑐫𑐵𑐫 𑐏𑑃𑐐𑑂𑐰𑑅 𑐎𑐠𑐴𑑄 𑐥𑐮𑐶𑐫𑐵𑐫–𑐥𑐵𑐮𑐶𑐫𑐵𑐫–𑐥𑐵𑐮𑐶 𑐖𑐸𑐫𑐵𑐰𑐣 𑑋 𑐐𑐸𑐮𑐶𑑄 𑐐𑐸𑐮𑐶𑑄 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣𑐟𑐫𑑂𑐳𑑄 𑐥𑐵𑐛–𑐥𑐵𑐷–𑐥𑐵𑐷𑐶–𑐥𑐵𑐮𑐶 𑐀𑐠𑐰𑐵 𑐥𑐣𑑂𑐟𑐶–𑐥𑐟𑑂𑐟𑐶–𑐥𑐚𑑂𑐚𑐶–𑐥𑐮𑑂𑐮𑐶–𑐥𑐵𑐮𑐶𑐥𑐵𑐏𑐾𑑄 𑐥𑐵𑐮𑐶 𑐨𑐵𑐲𑐵𑐫𑐵 𑐰𑑂𑐫𑐸𑐟𑑂𑐥𑐟𑑂𑐟𑐶 𑐖𑐹𑐐𑐸 𑐢𑐫𑐵𑐟𑑅𑐐𑐸 𑐡𑐸 𑑋 𑐩𑑀𑐐𑑂𑐐𑐮𑑂𑐮𑐵𑐣𑐳𑐸𑐟𑑂𑐟𑐥𑐵𑐛𑐫𑑂 𑐥𑐵𑐮𑐶 𑐏𑑃𑐐𑑂𑐰𑑅𑐫𑐵𑐟 𑐥𑐵𑐮𑐫𑑂 𑐫𑐵𑐂𑐐𑐸, 𑐬𑐎𑑂𑐲𑐵 𑐫𑐵𑐂𑐐𑐸 𑐖𑐸𑐫𑐵 𑐥𑐵𑐮𑐶 𑐏𑑅, 𑐥𑑄𑐎𑑂𑐟𑐶 𑐰 𑐎𑐸𑐚𑐶𑐫𑐵 𑐬𑐸𑐥𑐫𑑂 𑐎𑑂𑐫𑐣𑐵𑐟𑑅𑐐𑐸 𑐡𑐸 𑑋 𑐠𑐸𑐐𑐸 𑐥𑐵𑐮𑐶 𑐏𑑃𑐐𑑂𑐰𑑅𑐫𑐵 𑐄𑐟𑑂𑐥𑐟𑑂𑐟𑐶𑐫𑐵 𑐧𑐵𑐬𑐾 𑐫𑐎𑑂𑐰 𑐩𑐟𑐨𑐾𑐡 𑐡𑑅𑐳𑐵𑑄 𑐥𑐵𑐮𑐶 𑐨𑐵𑐲𑐵 𑐄𑐐𑐸 𑐃𑐫𑐵 𑐖𑐣𑐨𑐵𑐲𑐵 𑐢𑐎𑐵𑑅 𑐧𑐵𑑄𑐮𑐵𑐎 𑐳𑐷𑐎𑐵 𑐎𑐵𑐫𑐾𑐦𑐸 𑑋

𑑔. 𑐣𑐶𑐲𑑂𑐎𑐬𑑂𑐲 
𑐧𑑁𑐡𑑂𑐢 𑐰𑐶𑐡𑑂𑐰𑐵𑐣 𑐨𑐬𑐟 𑐳𑐶𑑄𑐴 𑐄𑐥𑐵𑐢𑑂𑐫𑐵𑐫𑐫𑐵 𑐢𑐵𑐥𑐸 𑐎𑐠𑑄 𑐗𑐶𑑄𑐐𑐸𑑄𑐐𑐹𑐐𑐸 𑐱𑐟𑐵𑐧𑑂𑐡𑐷𑐂 𑐰𑐫𑐵𑑅 𑐳𑑂𑐥𑐲𑑂𑐚 𑐬𑐸𑐥𑑄 𑐴𑐾 𑐩𑐵𑐐𑐢𑐶 𑐨𑐵𑐲𑐵𑐫𑐵𑐟 𑐥𑐵𑐮𑐶 𑐨𑐵𑐲𑐵 𑐢𑐎𑐵𑑅 𑐕𑑂𑐫𑐮𑐵𑐧𑐸𑐮𑐵 𑐫𑐵𑐣𑐵𑐴𑑅𑐐𑐸 𑐏𑑅 𑑋 𑐨𑐐𑐰𑐵𑐣𑑂 𑐧𑐸𑐡𑑂𑐢𑐫𑐵 𑐰𑐔𑐣𑐫𑐵𑐟 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵𑐟𑑅𑐐𑐸 𑐰 𑐥𑐵𑐮𑐣 𑐫𑐵𑐣𑐵 𑐟𑑅𑐐𑐸 𑐨𑐵𑐲𑐵 𑐖𑐸𑐫𑐵𑑅 𑐥𑐵𑐮𑐶 𑐨𑐵𑐲𑐵 𑐢𑐎𑐵𑑅 𑐢𑐵𑑅𑐐𑐸 𑐏𑑅 𑑋 𑐠𑐵𑑄𑐿𑐎𑐣𑑂𑐴𑐫𑑂 𑐩𑐵𑐐𑐢𑐶 𑐢𑐎𑐵𑑅 𑐢𑐵𑐫𑐾𑐐𑐸 𑐔𑐮𑐣 𑐟𑐣𑐵𑑅 𑐩𑐹𑐮 𑐟𑑂𑐬𑐶𑐥𑐶𑐚𑐎 𑐰 𑐀𑐬𑑂𑐠𑐎𑐠𑐵 𑐁𑐡𑐶 𑐦𑐸𑐎𑑂𑐎𑑄 𑐐𑑂𑐬𑐣𑑂𑐠𑐫𑐵 𑐨𑐵𑐲𑐵𑐫𑐵𑐟 𑐥𑐵𑐮𑐶 𑐨𑐵𑐲𑐵 𑐢𑐵𑑅𑐐𑐸 𑐏𑑅 𑑋 𑐥𑐵𑐮𑐶 𑐳𑐵𑐴𑐶𑐟𑑂𑐫𑐫𑐵 𑐡𑐸𑐣𑐾 𑐧𑐸𑐡𑑂𑐢 𑐰𑐔𑐣 𑐥𑐵𑐮𑐶 𑐟𑑂𑐬𑐶𑐥𑐶𑐚𑐎, 𑐀𑐣𑐸𑐥𑐶𑐚𑐎, 𑐀𑐬𑑂𑐠𑐎𑐠𑐵, 𑐰𑑄𑐱𑐳𑐵𑐴𑐶𑐟𑑂𑐫, 𑐎𑐵𑐰𑑂𑐫, 𑐁𑐏𑑂𑐫𑐵𑐣, 𑐰𑑂𑐫𑐵𑐎𑐬𑐞, 𑐕𑐣𑑂𑐡 𑐰 𑐱𑐧𑑂𑐡𑐎𑑀𑐱 𑐡𑐸𑐠𑑂𑐫𑐵𑑅 𑑋 𑐄𑐐𑐸 𑐳𑐵𑐴𑐶𑐟𑑂𑐫 𑐦𑐸𑐎𑑂𑐎 𑐴𑐾 𑐥𑐵𑐮𑐶 𑐨𑐵𑐲𑐵𑑄 𑐔𑑂𑐰𑐫𑐵𑐟𑑅𑐐𑐸 𑐏𑑅 𑑋

𑐥𑐵𑐮𑐶 𑐨𑐵𑐲𑐵, 𑐨𑐵𑐲𑐵 𑐖𑐎 𑐩𑐏𑐸𑐳𑐾 𑐧𑐸𑐡𑑂𑐢 𑐰𑐔𑐣 𑐰𑐵 𑐧𑐸𑐡𑑂𑐢 𑐱𑐶𑐎𑑂𑐲𑐵 𑐏𑑅 𑐢𑐎𑐵𑑅 𑐩𑐣𑐣 𑐫𑐵𑐫𑐾𑐐𑐸 𑐁𑐰𑐱𑑂𑐫𑐎 𑐖𑐹 𑑋 𑐠𑐸𑐐𑐸 𑐨𑐵𑐲𑐵𑐫𑐵 𑐖𑑂𑐘𑐵𑐣𑑄 𑐨𑐐𑐰𑐵𑐣𑑂 𑐧𑐸𑐡𑑂𑐢𑑄 𑐎𑐣𑐵𑐧𑐶𑐖𑑂𑐫𑐵𑐣𑐵𑐟𑑅𑐐𑐸 𑐰𑐔𑐣𑐫𑐵𑐟 𑐠𑑅𑐩𑑂𑐴𑑄 𑐥𑑂𑐬𑐟𑑂𑐫𑐎𑑂𑐲 𑐬𑐹𑐥𑑄 𑐀𑐣𑐸𑐨𑐹𑐟𑐶 𑐫𑐵𑐫𑐾𑐐𑐸 𑐀𑐰𑐳𑐬 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐨𑐶𑐎𑑂𑐲𑐸 𑐳𑑄𑐰𑐬𑑄 𑐟𑐳𑐎𑑄 𑐧𑐵𑑄𑐮𑐵𑐎 𑐐𑐵𑐠𑐵 𑐔𑐶𑐣𑐵 𑐟𑐫𑐵𑐧𑐶𑐖𑑂𑐫𑐵𑐟 𑐎𑑀𑐩𑐮𑐬𑐩𑑂𑐩𑐵𑐫𑑄 𑐥𑐵𑐮𑐶𑐨𑐵𑐳𑐵, 𑐨𑐐𑐰𑐵 𑐢𑐩𑑂𑐩𑑄 𑐡𑐾𑐳𑐶𑐟𑐰𑐵𑐔𑐵 𑑋
𑐥𑐷𑐟𑐶𑐩𑐸𑐡𑐵𑐬𑑄 𑐡𑐾𑐣𑑂𑐟𑐶 𑐖𑐣𑐵𑐣𑑄, 𑐥𑐳𑑂𑐳𑐠 𑐊𑐟𑑄 𑐳𑐸𑐣𑑂𑐡𑐬𑐨𑐵𑐳𑐵 𑑋𑑋

𑐀𑐬𑑂𑐠𑐵𑐟𑑂, 𑐠𑐸𑐐𑐸 𑐥𑐵𑐮𑐶 𑐨𑐵𑐲𑐵 𑐎𑑂𑐫𑐵𑐟𑐸 𑐰 𑐣𑑂𑐴𑑂𑐫𑐂𑐥𑐸 𑑋 𑐨𑐐𑐰𑐵𑐣𑑂 𑐧𑐸𑐡𑑂𑐢𑑄 𑐡𑐾𑐱𑐣𑐵 𑐫𑐵𑐣𑐵𑐧𑐶𑐖𑑂𑐫𑐵𑐣𑐵 𑐟𑑅𑐐𑐸 𑐰𑐔𑐣 𑐏𑑅 𑑋 𑐠𑑂𑐰 𑐨𑐵𑐲𑐵𑑄 𑐖𑐣𑐳𑐩𑐹𑐴𑐫𑐵𑐟 𑐩𑐴𑐵𑐣𑑂𑐥𑑂𑐬𑐷𑐟𑐶 𑐄𑐟𑑂𑐥𑐣𑑂𑐣 𑐫𑐵𑐣𑐵𑐧𑐷 𑑋 𑐄𑐎𑐶 𑐧𑐵𑑄𑐮𑐵𑑅𑐐𑐸 𑐨𑐵𑐲𑐵𑐫𑐵𑐟 𑐳𑐫𑐾𑐎𑐾𑐣𑐸, 𑐳𑐷𑐎𑐾𑐣𑐸 𑑋 𑐥𑐵𑐮𑐶𑐨𑐵𑐲𑐵 𑐧𑑁𑐡𑑂𑐢 𑐡𑐾𑐱𑐫𑑂 𑐖𑐎 𑐩𑐏𑐳𑐾 𑐐𑐿𑐬 𑐧𑑁𑐡𑑂𑐢 𑐡𑐾𑐱𑐫𑑂 𑐣𑑄 𑐧𑐸𑐡𑑂𑐢 𑐱𑐶𑐎𑑂𑐲𑐵 𑐰 𑐰𑐶𑐥𑐱𑑂𑐫𑐣𑐵 𑐳𑐫𑐾𑐎𑐾𑐟 𑐰𑐶𑐱𑑂𑐰𑐰𑑂𑐫𑐵𑐥𑐷 𑐬𑐸𑐥𑑄 𑐳𑑂𑐫𑐣𑐾𑐎𑐣𑐾 𑐖𑐸𑐫𑐵𑐔𑑂𑐰𑑄𑐐𑐸 𑐧𑐵𑑄𑐮𑐵𑑅𑐐𑐸 𑐥𑐎𑑂𑐲 𑐏𑑅 𑑋 𑐠𑐸𑐎𑐶𑑄 𑐧𑐸𑐡𑑂𑐢𑐫𑐵 𑐖𑑂𑐘𑐵𑐣 𑐥𑑂𑐬𑐔𑐵𑐬𑐥𑑂𑐬𑐳𑐵𑐬 𑐫𑐵𑐫𑐾𑐟 𑐩𑐴𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮𑐫𑑂 𑐣𑑄 𑐥𑐵𑐮𑐶 𑐨𑐵𑐲𑐵𑐫𑐵 𑐰𑐶𑐎𑐵𑐳𑐫𑐵 𑐮𑐵𑐐𑐶 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐔𑑂𑐰𑐕𑐵𑐫𑐾𑐧𑐴𑑅 𑐖𑐹 𑑋
𑐔𑐶𑐬𑑄 𑐟𑐶𑐚𑑂𑐛𑐟𑐸 𑐧𑐸𑐡𑑂𑐢𑐳𑐵𑐳𑐣𑑄 𑑋