𑐨𑐵𑐲𑐵 𑐖𑐵𑐟𑐶 𑐀𑐢𑐶𑐎𑐵𑐬𑐫𑐵 𑐏𑑃 (𑐜𑐵. 𑐧𑐵𑐮 𑐐𑑀𑐥𑐵𑐮 𑐱𑑂𑐬𑐾𑐲𑑂𑐛𑐫𑐵 𑐔𑑂𑐰𑐳𑐹)

𑐩𑐢𑐾𑐱𑐷 𑐁𑐣𑑂𑐡𑑀𑐮𑐣, 𑐩𑐢𑐾𑐱𑐷 𑐨𑑁𑐩𑐔𑐵, 𑐀𑑄𑐐𑐶𑐎𑐺𑐟 𑐣𑐵𑐐𑐬𑐶𑐎, 𑐴𑐶𑐣𑑂𑐡𑐶 𑐨𑐵𑐲𑐵, 𑐳𑐶𑐎𑑂𑐎𑐶𑐩𑐶𑐎𑐬𑐞, 𑐦𑐶𑐖𑐶𑐎𑐬𑐞 𑐀𑐮𑐾 𑐰 𑐣𑐾𑐰𑐵𑑅 𑐖𑐵𑐟𑐶

𑐜𑐵. 𑐧𑐵𑐮 𑐐𑑀𑐥𑐵𑐮 𑐱𑑂𑐬𑐾𑐲𑑂𑐛

𑐣𑑂𑐴𑐾𑐠𑐵𑐣𑐵 :

𑐣𑐾𑐥𑐵𑐫𑐵 𑐬𑐵𑐖𑑂𑐫𑐳𑐟𑑂𑐟𑐵 𑐠𑑁𑑄 𑐏𑐸𑐬𑐵𑐦𑐵𑐟𑐷 𑐡𑐶𑐩𑐵𑐐𑐥𑐶𑑄 𑐏𑐫𑑂‌ 𑐧𑑂𑐬𑐩𑑂𑐴𑐸𑐟𑐫 𑐮𑑂𑐴𑐵𑐟𑐫 𑐮𑐵𑐣𑐵𑐔𑑀𑑄𑐐𑐸 𑐡𑐸 𑑋 𑐟𑐥𑑂𑐫𑑄𑐎 𑐴𑐾 𑐢𑐵𑐫𑐾𑐧𑐮𑐫𑑂 𑐕𑐥𑐸𑐔 𑐱𑐵𑐲𑐎𑐰𑐬𑑂𑐐𑐫𑐵 𑐲𑐜𑐫𑐣𑑂𑐟𑑂𑐬𑐎𑐵𑐬𑐷 𑐏𑐳(𑐁𑐬𑑂𑐫 𑐣𑐱𑑂𑐮𑐫𑐵 𑐧𑑂𑐬𑐩𑑂𑐴𑐸 𑐎𑑂𑐲𑐾𑐟𑑂𑐬𑐷 𑐀𑐗 𑐮𑐵 𑐀𑐥𑑀 𑐫𑐵𑐣𑐵 𑐚𑐥𑐬𑐚𑐸𑐂𑑄𑐫𑑂𑐫𑐵 𑐥𑑂𑐬𑐰𑐺𑐟𑐶𑐥𑐶𑑄 𑐏𑐫𑑂 𑐧𑑂𑐬𑐩𑑂𑐴𑐸𑐟𑐫𑐳𑑄 𑐴𑐾 𑐖𑐎 𑐬𑐵𑐖𑑂𑐫𑐳𑐟𑑂𑐟𑐵𑐫 𑐴𑐵𑐮𑐷𑐩𑐸𑐴𑐵𑐮𑐷 𑐫𑐵𑐣𑐵𑐔𑑀𑑄𑐐𑐸 𑐠𑑁𑑄𑐫𑐵 𑐳𑑂𑐠𑐶𑐟𑐶 𑐡𑐸 𑑋 𑐣𑐾𑐰𑐵𑐟𑐫𑐳𑑄 𑐟𑐵 𑐃 𑐣𑑂𑐴𑐾𑐰𑐣𑐶𑐳𑐾𑑄 𑐀𑐢𑐶𑐎𑐵𑐬𑐫𑐵 𑐁𑐣𑑂𑐡𑑀𑐮𑐣 𑐫𑐵𑐣𑐵 𑐰𑐫𑐵𑐔𑑀𑑄𑐐𑐸 𑐏 𑑋 𑐟𑐬 𑐁𑐟𑐮𑐾𑑄 𑐣𑐾𑐰𑐵𑐟𑐫𑐳𑑄 𑐠𑐐𑐸 𑐕𑐸𑑄 𑐣𑑄 𑐀𑐢𑐶𑐎𑐵𑐬 𑐎𑐵𑐫𑐾 𑐦𑐫𑐵𑐔𑑀𑑄𑐐𑐸 𑐢𑐵𑐳𑐵 𑐩𑐡𑐸 𑑋 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐣𑐾𑐰𑐵𑐟𑐫𑐐𑐸 𑐀𑐢𑐶𑐎𑐵𑐬 𑐐𑐣𑑄 𑐣𑑄 𑐳𑐸𑐣𑐶𑐱𑑂𑐔𑐶𑐟 𑐖𑐸𑐫𑐵𑐔𑑀𑑄𑐐𑐸 𑐩𑐡𑐸 𑑋 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣𑑄 𑐣𑐾𑐰𑐵𑐟 𑐟𑐢𑑄𑐐𑐸 𑐡𑑂𑐫𑐵𑐥𑑄 𑐦𑐫𑐾𑐩𑐵𑐐𑐸 𑐡𑐸 𑑋 𑐟𑐬 𑐣𑐾𑐰𑐵 𑐣𑐾𑐟𑐺𑐟𑑂𑐰𑑄 𑐣𑐵𑐥𑑄 𑐣𑐾𑐰𑐵𑐟𑐫𑐳𑑄 𑐕𑐸𑑄 𑐫𑐵𑐫𑐾 𑐦𑐫𑐵𑐔𑑀𑑄𑐐𑐸 𑐩𑐡𑐸 𑑋 𑐀𑐢𑐶𑐎𑐵𑐬𑐫𑐵 𑐁𑐣𑑂𑐡𑑀𑐮𑐣 𑐖𑐣𑐖𑐵𑐟𑐶 𑐠𑐵𑐬𑐸 𑐩𑐢𑐾𑐱𑐷𑐟 𑐣𑑄 𑐡𑐸 𑑋 𑐟𑐬 𑐀𑐩𑐶𑐐𑐸 𑐁𑐣𑑂𑐡𑑀𑐮𑐣𑐫𑐵𑐟 𑐣𑑄 𑐣𑐾𑐰𑐵𑐟𑐫𑐳𑑄 𑐳𑐩𑐬𑑂𑐠𑐣 𑐰 𑐕𑐸𑑄 𑐣𑑄 𑐎𑐠𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐫𑐵𑐣𑐵 𑐰𑐿𑐔𑑀𑑄𑐐𑐸 𑐏𑐣𑐾𑐩𑐡𑐸 𑑋
𑐣𑐾𑐰𑐵𑐟 𑐗𑐷𑐐𑐸 𑐳𑑄𑐳𑑂𑐎𑐺𑐟𑐷 𑐴𑐾 𑐖𑐎 𑐟𑐢𑑄, 𑐗𑐷𑐐𑐸 𑐖𑐵𑐟𑑂𑐬𑐵𑐩𑐵𑐟𑑂𑐬𑐵 𑐰 𑐣𑐏𑐔𑐏 𑐖𑐎 𑐟𑐢𑑄, 𑐗𑐷𑐐𑐸 𑐨𑑀𑐫𑑂 𑐖𑐎 𑐟𑐢𑑄 𑐟𑐖𑐶 𑐢𑐎𑐵 𑐦𑐸𑐳𑑂𑐎𑐸𑐮𑐸 𑐑𑐩𑐞𑑂𑐜 𑐫𑐵𑐣𑐵 𑐩𑐏𑑂𑐏 𑐖𑐸𑐫𑐵 𑐔𑑀𑐣𑐵𑐔𑑀𑑄𑐐𑐸 𑐏𑐣𑐾𑐡𑐸 𑑋 𑐀𑐠𑐾 𑐩𑐏𑐸𑐳𑐾𑑄 𑐣𑐾𑐥𑐵𑐫𑐵 𑐗𑐷 𑐳𑐎𑐮𑐾𑑄 𑐣𑐾𑐥𑐵𑐩𑐶 𑐡𑐎𑑀 𑐳𑐩𑐵𑐣 𑐏 𑐀𑐮𑐾 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐣𑐶𑐩𑑂𑐟𑐶𑑄 𑐦𑐸𑐎𑑂𑐎 𑐣𑐵𑐥𑑄 𑐖𑐵𑐫𑐾𑐩𑐵𑐮 𑐢𑐎𑐵 𑐣𑐾𑐰𑐵𑐟𑐫𑐳𑑄 𑐠𑐸𑐂𑐎𑐾 𑐦𑐸𑐐𑐸 𑐏𑐣𑐾𑐩𑐡𑐸 𑑋 𑐏𑐳(𑐁𑐬𑑂𑐫 𑐱𑐵𑐲𑐎𑐰𑐬𑑂𑐐𑐫𑐵 𑐰𑐶𑐬𑑀𑐢 𑐢𑐿𑐐𑐸 𑐳𑐎𑐮𑐾𑑄 𑐏𑐳 𑐖𑐵𑐟𑐶𑐫𑐵 𑐧𑐶𑐬𑑀𑐢 𑐩𑐏𑐸 𑐢𑐿𑐐𑐸 𑐩𑐏𑐸 𑐟𑐬 𑐀𑐟𑑂𑐫𑐵𑐔𑐵𑐬 𑐫𑐵𑐣𑐵𑐔𑑀𑑄𑐥𑐶𑑄 𑐏𑐳 𑐱𑐵𑐲𑐎𑐟𑐫𑐟 𑐳𑐎𑐮𑐾𑑄 𑐕𑐥𑑂𑐥𑑄 𑐖𑐸𑐫𑐵 𑐧𑐳𑑂𑐰𑐵𑐫𑐾 𑐦𑐫𑐾𑐎𑐾𑐩𑐵𑐮 𑐢𑐎𑐵 𑐔𑐵𑐫𑐾𑐎𑐾 𑐩𑐵𑐐𑐸 𑐡𑐸 𑑋

𑐀𑐢𑐶𑐎𑐵𑐬 𑐥𑑂𑐬𑐵𑐥𑑂𑐟𑐷𑐫𑐵 𑐮𑐜𑐵𑑄𑐂 𑐣𑐾𑐰𑐵𑐟 𑐖𑐎 𑐳𑑄𑐐𑐛𑐷𑐟 𑐖𑐸𑐫𑐵𑑄 𑐫𑐵𑐫𑐾𑐦𑐂𑐐𑐸 𑐩𑐏𑐸 𑐢𑐿𑐐𑐸 𑐏𑑄, 𑐩𑐢𑐾𑐳𑐫 𑐰 𑐖𑐵𑐣𑐖𑐵𑐟𑐶𑐟𑐫 𑐁𑐣𑑂𑐡𑑀𑐮𑐣𑐫 𑐬𑐵𑐖𑑂𑐫𑐳𑐟𑐵𑑄 𑐫𑐵𑐐𑐸 𑐎𑑂𑐬𑐸𑐬 𑐡𑐩𑐣𑐫𑐵𑐟 𑐳𑑀𑐫𑐵 𑐣𑑄 𑐗𑐷𑐳𑑄 𑐔𑐵𑐫𑐾𑐎𑐾𑐩𑐵 𑑋 𑐣𑐾𑐰𑐵𑐟 𑐖𑐣𑐖𑐵𑐟𑐶𑐫𑐵 𑐣𑐵𑐥𑐣𑐵𑐥𑑄 𑐩𑐢𑐾𑐳𑐫𑐵 𑐁𑐣𑑂𑐡𑑀𑐮𑐎𑐵𑐬𑐷𑐟 𑐣𑐵𑐥𑑄 𑐕𑐠𑐵𑐫𑑂 𑐔𑑀𑐣𑐾 𑐦𑐳𑐵 𑐴𑐾 𑐖𑐎 𑐣𑐾𑐰𑐵𑐟𑐫𑐳𑑄 𑐠𑐐𑐸 𑐀𑐢𑐶𑐎𑐵𑐬 𑐎𑐵𑐫𑐾 𑐦𑐿 𑐢𑐎𑐵 𑐠𑐸𑐂𑐎𑐾𑐩𑐵𑐐𑐸 𑐡𑐸 𑑋
𑐳𑐟𑑂𑐟𑐵𑐢𑐵𑐬𑐷 𑐏𑐸𑐬𑐵𑐦𑐵𑐟𑐶 𑐡𑐶𑐩𑐵𑐐𑐫𑐵 𑐏𑐫𑑂‌ 𑐧𑑂𑐬𑐩𑑂𑐴𑐸𑐟𑐫𑐳𑑄 𑐣𑐾𑐰𑐵 𑐣𑐾𑐰𑐵 𑐮𑑂𑐰𑐵𑐎𑐾𑐐𑐸, 𑐖𑐣𑐖𑐵𑐟𑐶 𑐖𑐣𑐖𑐵𑐟𑐶𑐫𑐵𑐟 𑐮𑑂𑐰𑐵𑐎𑐾𑐐𑐸, 𑐩𑐢𑐾𑐳𑐷 𑐩𑐢𑐾𑐳𑐷 𑐮𑑂𑐰𑐵𑐎𑐾𑐐𑐸, 𑐠𑐵𑐬𑐸 𑐠𑐵𑐬𑐸 𑐮𑑂𑐰𑐵𑐎𑐾𑐐𑐸 𑐣𑐷𑐟𑐶 𑐖𑑀𑐣𑐵 𑐣𑐾𑐰𑐵 𑐖𑐣𑐖𑐵𑐟𑐷 𑐩𑐢𑐾𑐳𑐷 𑐠𑐵𑐬𑐸 𑐳𑐸𑐫𑐵𑐟𑑄 𑐩𑐶𑐮𑐾 𑐩𑐫𑐵𑐫𑐾𑐐𑐸 𑐰 𑐀𑐢𑐶𑐎𑐵𑐬 𑐩𑐧𑐷𑐐𑐸 𑐲𑐜𑐫𑐣𑑂𑐟𑑂𑐬 𑐠𑐣 𑐫𑐵𑐣𑐵𑐔𑑀𑑄𑐐𑐸 𑐡𑐸 𑐢𑐎𑐵 𑐗𑐷 𑐣𑐾𑐰𑐵𑐟𑐫𑐳𑑄 𑐠𑐸𑐂𑐎𑐾 𑐦𑐫𑐵𑐔𑑀𑑄𑐐𑐸 𑐩𑐡𑐸 𑑋 𑐣𑐾𑐰𑐵𑐟 𑐖𑐣𑐖𑐵𑐟𑐶𑐟𑐫𑑂‌𑐐𑐸 𑐁𑐣𑑂𑐡𑑀𑐮𑐣𑐫𑑂 𑐣𑑄 𑐎𑐸𑐴𑐵 𑐩𑐰𑐣𑐶𑐥𑐶𑑄, 𑐀𑐠𑐾 𑐴𑐾 𑐩𑐢𑐾𑐳𑐫𑐵 𑐁𑐣𑑂𑐡𑑀𑐮𑐣𑐫𑐫𑐵𑐟 𑐩𑐵𑐎𑐠𑑄 𑐳𑐩𑐬𑑂𑐠𑐣 𑐩𑐫𑐵𑐂𑐥𑐶𑑄 𑐎𑐠𑑄𑐫𑐵 𑐖𑐸𑐫𑐵𑐔𑑀𑑄𑐐𑐸 𑐡𑐸 𑑋 𑐖𑐣𑐖𑐵𑐟𑐷𑐟𑐫𑐳𑑄 𑐕𑐸 𑐫𑐵𑐣𑐵𑐔𑑀𑐣 𑐀𑐮𑐾 𑐩𑐢𑐾𑐳𑑄 𑐕𑐸 𑐫𑐵𑐣𑐵𑐔𑑀𑐣 𑐢𑐎𑐵 𑐣𑐾𑐰𑐵𑐟𑐫𑐳𑑄 𑐠𑐸𑐂𑐎𑐵𑐔𑑀𑑄𑐐𑐸 𑐏𑐣𑐾𑐩𑐡𑐸 𑑋

𑐣𑐾𑐥𑐵𑐫𑐵 𑐠𑐷𑐠𑐷 𑐖𑐵𑐟𑐶, 𑐖𑐣𑐖𑐵𑐟𑐶, 𑐩𑐢𑐾𑐱𑐷 𑐖𑐣𑐟𑐵𑐫𑐵𑐟 𑐀𑐢𑐶𑐎𑐵𑐬 𑐧𑐷𑐐𑐸 𑐥𑐮𑑂𑐳𑐵 𑐣𑐱𑑂𑐮𑐰𑐵𑐡𑐷 𑐏𑐫 𑐧𑑂𑐬𑐩𑑂𑐴𑐸 𑐱𑐵𑐲𑐎𑐟𑐫𑐳𑑄 𑐀𑐦𑑂𑐬𑐶𑐎𑐵 𑐰 𑐂𑐠𑐶𑐫𑑀𑐥𑐶𑐫𑐵𑐫𑐵 𑐄𑐡𑐵𑐬𑐴𑐞 𑐧𑐶𑐫𑐵 𑐀𑐣 𑐖𑐹𑐐𑐸𑑄 𑐩𑐖𑐹𑐐𑐸 𑐏𑑄 𑐮𑑂𑐴𑐵𑐣𑐵 𑐳𑑄𑐑𑐶𑐫𑐟𑐵𑐫𑐵 𑐁𑐣𑑂𑐡𑑀𑐮𑐣𑐫𑐵𑐟 𑐧𑐡𑐩𑐵𑐣 𑐫𑐵𑐣𑐵 𑐎𑑀𑐟𑐾𑐮𑐾𑐟 𑐖𑐵𑐠𑐨𑐵𑐰𑐷 𑐏𑑄 𑐮𑑂𑐴𑐵𑐫𑐾𑐐𑐸 𑐫𑐵𑐣𑐵 𑐰𑐿𑐔𑑀𑑄𑐐𑐸 𑐡𑐸 𑑋 𑐣𑐾𑐰𑐵𑐟𑐫𑑂‌𑐐𑐸 𑐁𑐣𑑂𑐡𑑀𑐮𑐣𑐫𑐵𑐟, 𑐖𑐣𑐖𑐵𑐟𑐶𑐫𑐵 𑐁𑐣𑑂𑐡𑑀𑐮𑐣𑐫𑐵𑐟, 𑐩𑐢𑐾𑐱𑐶𑐟𑐫 𑐁𑐣𑑂𑐡𑑀𑐮𑐣𑐫𑐵𑐟 𑐧𑐡𑐣𑐵𑐩 𑐫𑐵𑐣𑐵 𑐀𑐩𑐶𑐟 𑐎𑑀𑐟𑐾𑐮𑐾𑐐𑐸 𑐣𑐷𑐟𑐶 𑐎𑐠𑑄 𑐀𑐩𑐶𑐳𑑄 𑐀𑐣𑐾𑐎 𑐴𑐠𑐎𑐞𑑂𑐜𑐵 𑐫𑐵𑐣𑐵𑐔𑑀𑑄𑐐𑐸 𑐡𑐸 𑑋 𑐩𑐠𑐸𑐫𑐵 𑐰𑐵 𑐠𑐸𑐫𑐵 𑐣𑑄 𑐐𑐸𑐮𑐶𑑄 𑐣𑐾𑐰𑐵𑐟 𑐣𑑂𑐴𑐾𑐮𑐸𑐰𑐵𑐟 𑐠𑐾𑑄𑐎 𑐣𑑄 𑐏𑐫 𑐧𑑂𑐬𑐩𑑂𑐴𑐸𑐟𑐫 𑐮𑑂𑐫𑐹𑐮𑑂𑐫𑐹 𑐰𑐣𑐵 𑐀𑐩𑐶 𑐳𑐶𑐟𑐶𑑄𑐮𑐵 𑐔𑑂𑐫𑑀 𑐖𑐸𑐫𑐵𑐔𑑀𑑄𑐐𑐸 𑐖𑐎 𑐩𑐏𑐸 𑐎𑐶 𑐠𑐥𑐶𑐣𑐶𑐐𑐸 𑐀𑐢𑐶𑐎𑐵𑐬 𑐥𑑂𑐬𑐵𑐥𑑂𑐟𑐶𑐫𑐵 𑐖𑑂𑐫𑐵𑐫 𑐣𑑄 𑐟𑐔𑑀𑐎𑑄 𑐮𑑂𑐫𑐸𑐣𑐾 𑐮𑐵𑐣𑐵𑐔𑑀𑑄𑐐𑐸 𑐡𑐸 𑑋 𑐀𑐢𑐶𑐎𑐵𑐬𑐫𑐵 𑐏𑑄 𑐮𑑂𑐴𑐵𑐟𑐎𑐶 𑐴𑐾 𑐳𑐵𑐩𑑂𑐥𑑂𑐬𑐡𑐵𑐫𑐷𑐎, 𑐨𑐵𑐬𑐟𑐰𑐵𑐡𑐷 𑐖𑐸𑐂𑐐𑐸 𑐀𑐮𑐾 𑐳𑐟𑑂𑐟𑐵𑐢𑐵𑐬𑐷𑐟𑐫 𑐏𑑄 𑐏 𑐏 𑐢𑐵𑐮𑐎𑐶 𑐖𑐎 𑐬𑐵𑐲𑑂𑐚𑑂𑐬𑐰𑐵𑐡𑐷 𑐖𑐸𑐂𑐐𑐸 𑐕𑐐𑐹 𑐎𑐠𑑄𑐫𑐵 𑐰𑐵𑐟𑐵𑐰𑐬𑐞 𑐠𑐣 𑐡𑐫𑐾𑐎𑐵𑐟𑐐𑐸 𑐏𑐣𑐾𑐡𑐸 𑑋 𑐩𑐴𑐵𑐎𑐵𑐮𑐷 𑐣𑐡𑐷 𑐨𑐵𑐬𑐟𑐫𑐵𑐟 𑐩𑑂𑐫𑐸𑐥𑐶𑐳𑑄 𑐴𑐾 𑐠𑑁𑑄 𑐠𑐥𑐶𑑄𑐟 𑐟𑐎𑐮𑐾 𑐟𑐢𑑄𑐥𑐶𑑄 𑐬𑐵𑐲𑑂𑐚𑑂𑐬𑐰𑐵𑐡𑐶 𑐎𑐠𑑄 𑐧𑑀𑐫𑐵 𑐀𑐮𑐾 𑐨𑐵𑐬𑐟𑐫𑐵 𑐧𑐶𑐬𑑀𑐢𑐫 𑐟𑐟𑐢𑑄𑐐𑐸 𑐣𑐵𑐬𑐵 𑐧𑐶𑐫𑐵 𑐣𑐾𑐥𑐵𑐮𑐷 𑐖𑐣𑐟𑐵𑐫𑐵𑐟 𑐮𑐏𑐫 𑐩𑐶𑐏𑐵 𑐎𑑄𑐎𑐵𑐟𑐐𑐸 𑐡𑐸 𑑋 𑐳𑐟𑑂𑐟𑐵𑐢𑐵𑐬𑐷 𑐏𑐫 𑐧𑑂𑐬𑐩𑑂𑐴𑐸𑐟𑐫 𑐠𑐖𑑂𑐫𑐵𑐐𑐸 𑐗𑑄𑐐 𑐏𑑄 𑐩𑐠𑐸𑐫𑐵 𑐗𑐷 𑐣𑐾𑐰𑐵𑐟 𑐣𑑄 𑐬𑐵𑐲𑑂𑐚𑑂𑐬𑐰𑐵𑐡𑐶 𑐖𑐸𑐂𑐩𑐵 𑐢𑐎𑐵 𑐀𑐢𑐶𑐎𑐵𑐬 𑐥𑑂𑐬𑐵𑐥𑑂𑐟𑐷𑐫𑐵 𑐁𑐣𑑂𑐡𑑀𑐮𑐣𑑄 𑐧𑐶𑐩𑐸𑐏 𑐖𑐸𑐫𑐵𑐔𑑀𑑄𑐐𑐸 𑐡𑐸 𑑋

𑐩𑐾𑐥𑐶𑐣𑑂𑐳𑑄 𑐀𑐢𑐶𑐎𑐵𑐬 𑐩𑐵𑐮 𑐢𑐎𑐵 𑐁𑐣𑑂𑐡𑑀𑐮𑐣 𑐫𑐵𑐂 𑐧𑐮𑐫 𑐏𑐫 𑐧𑑂𑐬𑐩𑑂𑐴𑐸𑐟𑐫𑐐𑐸 𑐣𑐶𑐫𑐣𑑂𑐟𑑂𑐬𑐞𑐫𑑂 𑐡𑐸𑐐𑐸 𑐩𑐶𑐜𑐶𑐫𑐵𑐟𑐫𑐳𑑄 𑐁 𑐠𑐸𑐩𑐶𑐳𑑄 𑐡𑐾𑐱 𑐎𑐸𑐔𑐵 𑐠𑐮𑐶𑐐𑐸 𑐖𑐸𑐮 𑐢𑐎𑐵 𑐦𑐫𑑂‌𑐐𑑄 𑐏𑑄 𑐧𑐫𑐧𑐫 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐏𑐫 𑐧𑑂𑐬𑐩𑑂𑐴𑐸𑐟𑐫𑐳𑑄 𑐐𑐵𑐎𑑄 𑐫𑐵𑐫𑐾𑐐𑐸 𑐫𑐵𑐣𑐵𑐔𑑀𑑄𑐐𑐸 𑐡𑐸 𑑋 𑐟𑐬 𑐴𑐮𑐶𑐩𑐫𑑂 𑐐𑐣𑑄 𑐣𑑄 𑐳𑑄𑐑𑐶𑐫𑐟𑐵𑐫 𑐰𑐣𑐵 𑐕𑐸𑑄 𑐣𑑄 𑐡𑐾𑐱 𑐎𑐸𑐔𑐵 𑐡𑐐𑐸 𑐄𑐡𑐵𑐴𑐬𑐞 𑐢𑐵𑐳𑐵 𑐩𑐡𑐸 𑑋 𑐧𑐬𑐸 𑐳𑑄𑐑𑐷𑐫𑐟𑐵𑑄 𑐎𑐸𑐔𑐵 𑐡𑐮𑐾𑐟𑐾𑑄𑐐𑐸 𑐡𑐾𑐱 𑐟𑐎𑑄 𑐎𑐸𑐔𑐵 𑐩𑐡𑐐𑐸 𑐄𑐡𑐵𑐴𑐬𑐞 𑐖𑐎 𑐡𑐸 𑑋 𑐐𑐠𑐾 𑐧𑐾𑐮𑑂𑐖𑐷𑐫𑐩, 𑐀𑐣 𑐜𑐔 𑐖𑐵𑐟𑐶 𑐰 𑐦𑑂𑐬𑐾𑐣𑑂𑐔 𑐨𑐵𑐫𑑂 𑐮𑑂𑐴𑐵𑐂𑐥𑐶𑑄 𑐖𑐵𑐟𑐶𑐫𑐵 𑐮𑑂𑐰𑐵𑐥𑐸𑑄 𑐕𑐐𑐹 𑐂𑐮𑐫𑑂 𑐡𑐾𑐱 𑐴𑐾 𑐎𑐸𑐔𑐵𑐡𑐮𑐾 𑐟𑑂𑐫𑑄𑐐𑐸 𑐏 𑐟𑐬 𑐳𑑄𑐑𑐷𑐫𑐟𑐵 𑐰𑐳𑐾𑑄𑐮𑐶𑑄 𑐡𑐾𑐱 𑐎𑐸𑐔𑐵 𑐩𑐡𑐮𑐶𑐐𑐸 𑐧𑐵𑐟𑐵𑐰𑐬𑐞 𑐧𑑀𑐮𑐣 𑑋

𑐩𑐢𑐾𑐱𑐷 𑐖𑐣𑐟𑐵 𑐰 𑐩𑐢𑐾𑐱 𑐁𑐣𑑂𑐡𑑀𑐮𑐣 :

𑐏𑐫𑐟 𑐩𑐢𑐾𑐳𑐷 𑐱𑐧𑑂𑐡𑐫𑐵𑐟 𑐩𑐢𑐾𑐳𑐷 𑐩𑐢𑐵𑐳𑐾𑑄 𑐹𑐩𑐬𑑂𑐳𑑂𑐫𑐵𑐹 𑐢𑐵𑐫𑐾𑐐𑐸 𑐫𑐵𑐂𑐐𑐸 𑐣𑐾𑐥𑐵𑐮 𑐨𑐵𑐲𑐵𑐫𑐵 𑐳𑑂𑐰𑐨𑐵𑐰 𑐎𑐠𑑄 𑐳𑐟𑑂𑐫 𑐏 𑑋 𑐀𑐠𑐾𑐴𑐾 𑐕𑐸𑑄 𑐣𑑄 𑐱𑐧𑑂𑐡𑐫𑐵 𑐦𑐬𑐎 𑐦𑐬𑐎 𑐳𑐣𑑂𑐡𑐬𑑂𑐨𑐫 𑐦𑐬𑐎 𑐦𑐬𑐎 𑐎𑐠𑑄 𑐕𑐾𑐮𑐵𑐧𑐸𑐮𑐵 𑐫𑐵𑐂𑐐𑐸 𑐣𑑄 𑐳𑐟𑑂𑐫 𑐏 𑑋 𑐩𑐬𑑂𑐳𑑂𑐫𑐵𑐹 𑐱𑐧𑑂𑐡𑐫𑐵𑐟 𑐳𑑂𑐰𑐵𑐨𑐵𑐰𑐶𑐎𑐬𑐸𑐥𑐫 𑐣𑐾𑐥𑐵𑐮𑐨𑐵𑐲𑐷 𑐣𑐾𑐰𑐵 𑐳𑐩𑐸𑐡𑐵𑐫𑑄 𑐣𑐩𑑂𑐬 𑐨𑐵𑐲𑐵𑐫 𑐣𑑄 𑐄𑐟𑐶𑐎𑑄 𑐕𑐾𑐮𑐾𑐐𑐸 𑐫𑐵 𑑋 𑐟𑐬 𑐨𑐔𑐵 𑐴𑐵𑐎𑐸𑐐𑐸 𑐏𑑂𑐰𑐵𑐥𑐵𑐩𑑂𑐴 𑐩𑐣𑐹 𑐏𑐣𑐎𑐶𑑄 𑐴𑐾 𑐹𑐩𑐬𑑂𑐳𑑂𑐫𑐵𑐹 𑐢𑐎𑐵 𑐴𑐾𑐥𑐾 𑐫𑐵𑐣𑐵 𑐎𑑀𑐴𑐾𑑄𑐎𑐵 𑐏𑑄 𑐮𑑂𑐴𑐵𑐂𑐐𑐸 𑐣𑑄 𑐣𑐾𑐰𑐵 𑐳𑐩𑐸𑐡𑐵𑐫𑐫𑐵 𑐠𑐐𑐸 𑐥𑑂𑐬𑐰𑐺𑐟𑐶 𑐣𑑄 𑐄𑐟𑐶𑐎𑑄 𑐫𑐠𑐵𑐬𑑂𑐠 𑐏 𑑋 𑐳𑑀𑐣𑐶𑐐𑐮𑐫 𑐄𑐎𑐠𑑄 𑐴𑐾𑐥𑐾 𑐫𑐵𑐎𑐾 𑐩𑐣𑑄𑐥𑐶𑑄 𑐩𑐢𑐾𑐱𑐷 𑐖𑐎 𑐩𑐏𑐸 𑐴𑐵𑐎𑐸𑐐𑐸 𑐏𑑂𑐰𑐵𑐥𑐵 𑐡𑐸𑐥𑐶𑑄 𑐩𑐣𑐹𑐟 𑐟𑐎𑑄 𑐣𑑄 𑐩𑑂𑐴𑑀 𑐴𑐾 𑐖𑐎 𑐡𑐃 𑐢𑐫𑐵𑐐𑐸 𑐖𑐶𑐐𑐸 𑐀𑐣𑐸𑐩𑐵𑐣 𑐏 𑑋 𑐰𑐶𑐐𑐟𑐫𑐵 𑐠𑑀 𑐟𑐠𑑂𑐫𑐫𑐵𑐟 𑐀𑐠𑐾 𑐖𑐹𑐐𑐸 𑐩𑐡𑐸, 𑐠𑐠𑐾 𑐏 𑐴𑐾 𑐩𑐏𑐸 𑐢𑐎𑐵 𑐨𑐶𑑄𑐳𑐎𑐵 𑐏𑑄𑐮𑑂𑐴𑐵𑐣𑐵 𑐟𑑀𑐥𑐸𑐫𑐵 𑐖𑐸𑐂𑐐𑐸𑐫𑐵 𑐕𑐸𑑄 𑐀𑐬𑑂𑐠 𑐩𑐡𑐸 𑑋 𑐧𑐬𑐸 𑐳𑐷𑐎𑑄 𑐩𑐳𑐷𑐎𑑄 𑐣𑐾𑐰𑐵 𑐳𑐩𑐸𑐡𑐵𑐫𑐥𑐵𑐏𑐾𑑄 𑐀𑐠𑐾 𑐖𑐹𑐰𑑄𑐐𑐸 𑐎𑐩𑐖𑑀𑐬𑐷 𑐥𑑂𑐬𑐟𑐶 𑐳𑐔𑐾𑐟 𑐣𑐾𑐰𑐵𑐟𑐫𑐳𑑄 𑐩𑐢𑐾𑐱𑐷𑐟𑐫 𑐥𑑂𑐬𑐟𑐶 𑐎𑑂𑐲𑐩𑐵 𑐦𑑀𑐣𑐾𑐩𑐵 𑐢𑐫𑐵𑐐𑐸 𑐖𑐶𑐐𑐸 𑐩𑐵𑐣𑑂𑐫𑐟𑐵 𑐏 𑑋

𑐣𑐾𑐥𑐵𑐮𑐫 𑐕𑐐𑐹 𑐳𑐩𑐸𑐴𑑄 𑐩𑐾𑐐𑐸 𑐳𑐩𑐸𑐴𑐫𑐵𑐟 𑐀𑐮𑐾 𑐕𑐐𑐹 𑐠𑐵𑐳𑐫 𑐔𑑀𑑄𑐥𑐶𑐳𑑄 𑐩𑐾𑐐𑐸 𑐠𑐵𑐳𑐫 𑐔𑑀𑑄𑐥𑐶𑑄 𑐩𑐣𑐸𑐟𑐫𑐟 𑐴𑐾𑐰𑐵𑐫 𑐔𑐰𑐵𑐫 𑐫𑐵𑐣𑐵 𑐴𑐵𑐫𑐾𑐎𑐶𑐐𑐸 𑐰 𑐴𑐾𑐰𑐵𑐫 𑐔𑐰𑐵𑐫 𑐫𑐵𑐂𑐐𑐸 𑐔𑐮𑐣 𑐴𑐵𑐎𑐣𑑄 𑐕𑐸𑑄 𑐣𑑂𑐴𑐸𑐐𑐸 𑐣𑑄 𑐩𑐏𑐸 𑑋 𑐕𑐸𑑄 𑐃 𑐣𑑂𑐴𑐾𑐰 𑐴𑐾 𑐖𑐎 𑐟𑐶𑐣𑐶 𑐕𑐩𑑂𑐴 𑐩𑐢𑐾𑐱𑐷 𑐔𑑀𑐳𑐵𑐩𑐶 𑐬𑐶𑐟𑐵 𑐳𑐵𑐴𑐖𑐸𑑄 𑐏𑐳 𑐨𑐵𑐲𑐵𑐫 𑐥𑑂𑐬𑐳𑐵𑐬𑐞 𑐖𑐸𑐂𑐐𑐸 𑐀𑐣𑐾𑐎𑐣 𑐚𑐾𑐮𑐶𑐨𑐶𑐖𑐣𑐫 𑐩𑐢𑐾𑐱𑐷𑐟𑐫𑐟 𑐴𑑀𑐥𑐾 𑐫𑐵𑐣𑐵, 𑐏𑐶𑐮𑑂𑐮𑐶 𑐄𑐜𑐾 𑐫𑐵𑐣𑐵, 𑐏𑑂𑐰𑐵𑐥𑐵𑐮𑐫 𑐴𑐵𑐎 𑐥𑐵𑐣𑐵 𑐏𑐫 𑐨𑐵𑐫𑐫𑐵𑐟 𑐳𑐾𑑄𑐎𑐵 𑐮𑑂𑐴𑐵𑐣𑐵 𑐩𑐢𑐾𑐱𑐷𑐟𑐫𑐟 𑐀𑐥𑐩𑐵𑐣 𑐫𑐵𑐫𑐾𑐐𑐸 𑐎𑐠𑑄𑐫𑐵 𑐖𑑂𑐫𑐵𑐗𑑀𑐟 𑐥𑐶𑐧𑑀𑐫𑐵 𑐰𑐿𑐔𑑀𑑄𑐐𑐸 𑐏𑑄𑐫 𑐟𑐵𑐴𑐵𑐎 𑐔𑑀𑐳𑐸 𑐔𑑀𑐫𑐵 𑐧𑐶𑐬𑑀𑐢 𑐫𑐵𑐐𑐸 𑐏𑑄 𑐠𑐣 𑐮𑐸𑐩𑑄𑐎𑐾 𑐧𑐴 𑐖𑐸 𑑋 𑐠𑑁𑐟𑐮𑐾𑑄 𑐣𑑄 𑐳𑐟𑑂𑐟𑐵𑐢𑐵𑐬𑐷 𑐰𑐵 𑐳𑐟𑑂𑐟𑐵𑑄 𑐥𑐶𑐣𑐾𑐫𑐵 𑐥𑐵𑐴𑐵𑐜𑐾𑐟𑐫𑐳𑑄 𑐩𑐢𑐾𑐱𑐷𑐟𑐫𑐟 𑐠𑐸𑐎𑐠𑑄 𑐴𑐾𑐩𑐵𑐟𑐶 𑐖𑑂𑐫𑐵 𑐫𑐵𑐣𑐵 𑐀𑐥𑐩𑐵𑐣 𑐫𑐵𑐫𑐾𑐐 𑐫𑐵𑐣𑐵 𑐰𑑄𑐔𑑀𑐐𑐸 𑐡𑐸 𑑋 𑐠𑐖𑑂𑐫𑐵𑐐𑐸 𑐖𑑂𑐫𑐵𑑄 𑐩𑐢𑐾𑐱𑐷𑐟𑐫𑐟 𑐣𑐸𑐐𑐮𑐫 𑐳𑑂𑐫𑐶𑐎𑐐𑐸 𑐳𑑂𑐰𑐵𑐨𑐵𑐰𑐶𑐎 𑐏 𑑋

𑐢𑐵𑐟𑑂𑐠𑐾𑑄𑐮𑐵 𑐣𑐾𑐥𑐵𑐫𑐵 𑐥𑐴𑐵𑐜𑐾 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐳𑑄 𑐩𑐢𑐾𑐱𑐫𑐵 𑐣𑐾𑐥𑐵𑐮𑐷𑐟𑐫𑐳𑑄 𑐕𑐸 𑐢𑐫𑐵𑐔𑑀𑐣 𑐢𑐫𑐵𑐐𑐸 𑐠𑐸𑐂𑐎𑐾𑐟 𑐐𑐧𑐮𑐾𑑄 𑐳𑑀𑐐𑐸 𑐏𑐣𑐾𑐩𑐡𑐸 𑑋 𑐩𑐢𑐾𑐱𑐫𑐵 𑐣𑐾𑐥𑐵𑐮𑐷𑐟𑐫𑐳𑑄 𑐳𑑄𑐰𑐶𑐢𑐵𑐣𑐫 𑐏𑐳(𑐁𑐬𑑂𑐫𑐫𑐵𑐟 𑐖𑐎 𑐄𑐮𑑂𑐮𑐾𑐏 𑐫𑐵𑐣𑐵 𑐣𑐾𑐥𑐵𑐫𑐵𑐟 𑐧𑑂𑐬𑐩𑑂𑐴𑐸 𑐎𑑂𑐲𑐾𑐟𑑂𑐬𑐷𑐟𑐫𑐐𑐸 𑐖𑐎 𑐬𑐵𑐖𑑂𑐫 𑐠𑐾𑑄 𑐫𑐵𑐫𑐾𑐟 𑐳𑑀𑐫𑐵𑐔𑑀𑑄𑐐𑐸 𑐐𑐮𑐟 𑐖𑐸𑐮, 𑐖𑐶𑐩𑐶𑐐𑐸 𑐬𑐵𑐲𑑂𑐚𑑂𑐬𑐶𑐫𑐟𑐵 𑐐𑑀 𑐬𑐸, 𑐖𑐶𑐩𑐶𑐐𑐸 𑐳𑐨𑑂𑐫𑐟𑐵 𑐐𑑀 ?, 𑐖𑐶𑐩𑐶𑐐𑐸 𑐡𑐾𑐱 𑐐𑑀 ? 𑐖𑐶𑐩𑐶𑐐𑐸 𑐨𑐹𑐩𑐷 𑐐𑑀 ?, 𑐖𑐶𑐩𑐶𑐐𑐸 𑐨𑐵𑐲𑐵 𑐐𑑀 ?, 𑐖𑐶𑐩𑐶𑐐𑐸 𑐨𑐵𑐫 𑐣𑑄 𑐳𑐬𑐎𑐵𑐬𑐷 𑐎𑐵𑐩𑐎𑐵𑐖𑐫𑐵 𑐨𑐵𑐲𑐵 𑐖𑐸𑐂𑐩𑐵𑐮, 𑐖𑐶𑐩𑐶𑐐𑐸 𑐨𑐾𑐲𑐨𑐸𑐳𑐵𑐫𑐵𑐟 𑐣𑑄 𑐳𑐣𑑂𑐩𑐵𑐣 𑐡𑐫𑐾𑐩𑐵𑐮, 𑐖𑐶𑐩𑐶𑐐𑐸 𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑐣𑑂𑐩𑐵𑐣 𑐡𑐫𑐾𑐩𑐵𑐮, 𑐧𑐴𑐸𑐬𑐵𑐲𑑂𑐚𑑂𑐬𑐶𑐫 𑐡𑐾𑐱 𑐣𑐾𑐥𑐵 𑐠𑐖𑑂𑐫𑐵𑐐𑐸 𑐡𑐾𑐱𑐫 𑐕𑐥𑐸𑐔 𑐏𑐳(𑐁𑐬𑑂𑐫𑐟𑐫 𑐬𑐵𑐲𑑂𑐚𑑂𑐬𑐶𑐫𑐟𑐵𑐫𑐵 𑐖𑐎 𑐏𑑄 𑐮𑑂𑐴𑐵𑐫𑐾 𑐩𑐖𑐶𑐮, 𑐥𑐴𑐶𑐔𑐵𑐣 𑐰 𑐳𑐵𑐩𑐬𑑂𑐠𑑂𑐫𑐫𑐵 𑐁𑐢𑐵𑐬𑐫 𑐳𑑄𑐑𑐷𑐫𑐟𑐵 𑐖𑐸𑐂𑐩𑐵𑐮, 𑐬𑐵𑐖𑑂𑐫𑐵 𑐳𑑄𑐔𑐮𑐫𑐣𑐫 𑐖𑐶𑐩𑐶𑐐𑐸 𑐣𑑄 𑐳𑐴𑐨𑐵𑐐𑐶𑐟𑐵 𑐡𑐫𑐾𑐩𑐵𑐮 𑐢𑐫𑐵 𑐰𑐿𑐔𑑀𑑄𑐐𑐸 𑐏 𑑋 𑐠𑐠𑐾 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐴𑐵𑐮𑐵𑐔𑑀𑑄𑐥𑐶𑑄 𑐩𑐢𑐾𑐱𑐷𑐟𑐫𑐟 𑐀𑐣𑐾𑐎 𑐎𑐠𑑄 𑐁𑐬𑑀𑐥 𑐧𑐶𑐫𑐵 𑐧𑐡𑐣𑐵𑐩 𑐫𑐵𑐫𑐾𑐟 𑐳𑑀𑐫𑐵𑐔𑑀𑑄𑐐𑐸 𑐏𑐣𑐾𑐡𑐸 𑑋 𑐩𑐢𑐾𑐱𑐷 𑐁𑐣𑑂𑐡𑑀𑐮𑐣𑐫𑐵 𑐰𑐵𑐳𑑂𑐟𑐰𑐶𑐎𑐟𑐵 𑐕𑐸 𑐏 𑐢𑐫𑐵𑐐𑐸 𑐠𑐸𑐂𑐎𑐾𑐐𑐸 𑐐𑐧𑐮𑐾𑑄 𑐥𑑂𑐬𑐫𑐵𑐳 𑐩𑐫𑐵𑐐𑐸𑐮𑐶𑑄 𑐴𑐾 𑐥𑐴𑐵𑐜𑐾 𑐬𑐵𑐲𑑂𑐚𑑂𑐬𑐰𑐵𑐡𑐷𑐟 𑐠𑑁𑑄 𑐡𑐶𑐐𑐨𑑂𑐬𑐫 𑐮𑐵𑐣𑐵𑐔𑑀𑑄𑐐𑐸 𑐏 𑑋 𑐧𑐎𑑄𑐦𑐸𑐳𑑂𑐬𑐾 𑐬𑐵𑐲𑑂𑐚𑑂𑐬𑐧𑐵𑐡𑐫𑐵 𑐣𑐳𑐵𑑄 𑐎𑐵𑑄 𑐖𑐸𑐫𑐵𑐔𑑀𑑄𑐐𑐸𑐮𑐶𑑄 𑐀𑐩𑐶𑐳𑑄 𑐩𑐢𑐾𑐱𑐶 𑐖𑐣𑐟𑐵𑑄 𑐕𑐸 𑐢𑐫𑐵𑐔𑑀𑐣 𑐠𑐸𑐂𑐎𑐾𑐟 𑐳𑑀𑐫𑐵 𑐔𑑀𑑄𑐐𑐸 𑐩𑐡𑐸 𑑋

𑐏𑐣𑐾 𑐡𑐫𑐾𑐎 𑐏𑐣𑐾 𑐩𑐡𑐫𑐾𑐎 𑐨𑐵𑐬𑐟𑐫𑐵 𑐟𑐵𑐰𑐾𑐡𑐵𑐬𑐷 𑐫𑐵𑐣𑐵 𑐣𑐾𑐥𑐵𑐫𑐵 𑐬𑐵𑐖𑑂𑐫𑐳𑐟𑑂𑐟𑐵𑐫 𑐴𑐵𑐮𑐶𑐩𑐸𑐴𑐵𑐮𑐷 𑐫𑐵𑐣𑐵𑐔𑑀𑑄𑐥𑐶𑑄 𑐣𑐾𑐥𑐵𑐫 𑐕𑐥𑐸𑐔 𑐏𑐫 𑐧𑑂𑐬𑐩𑑂𑐴𑐸𑐟𑐫𑐐𑐸 𑐦𑐸𑐳𑑂𑐎𑐸𑐮𑐸 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐵𑐫𑐵 𑐏𑑄 𑐥𑐟𑑂𑐫𑐵 𑐫𑐵𑐣𑐵 𑐟𑐶𑑄𑐟𑐶𑑄𑐣𑑂𑐴𑐸𑐫𑐵 𑐖𑐹𑐥𑐶𑑄 𑐣𑐾𑐥𑐵𑐮𑐫𑐵 𑐎𑐠𑐶𑐟 𑐬𑐵𑐲𑑂𑐚𑑂𑐬𑐰𑐵𑐡𑐷𑐟 𑐳𑐡𑐶𑐫𑑁𑑄 𑐣𑐶𑐳𑐾𑑄 𑐬𑐵𑐖𑑂𑐫𑐳𑐟𑑂𑐟𑐵𑑄 𑐫𑐵𑐣𑐵𑐔𑑀𑑄𑐐𑐸 𑐄𑐟𑑂𑐥𑐷𑐜𑐣𑐫𑐵 𑐧𑐶𑐬𑐸𑐡𑑂𑐢𑐫 𑐮𑑂𑐰𑐵𑐣𑐵𑐔𑑀𑑄𑐥𑐶𑑄 𑐡𑐾𑐱 𑐡𑐸𑐣𑐾𑐫𑐵 𑐩𑐢𑐾𑐱𑐷𑐟𑐫𑐟 𑐢𑐵𑐳𑐵 𑐣𑑂𑐴𑑂𑐫𑐵𑐧𑐮𑐾𑑄 𑐧𑐾𑐎𑑀𑐐𑐸 𑐩𑐶𑐏𑐵𑑄 𑐳𑑀𑐫𑐵 𑐠𑐶𑐥𑐶𑑄 𑐣𑐾𑐥𑐵𑐮𑐷 𑐩𑐏𑐸, 𑐠𑐶𑐥𑐶𑑄 𑐨𑐵𑐬𑐟𑐷𑐫 𑐏 𑐢𑐵𑐫𑐾𑐟 𑐟𑐎 𑐣𑑄 𑐮𑐶𑐩𑐳𑑀𑐂𑐥𑐶𑑄 𑐖𑐸𑐫𑐵𑐔𑑀𑑄𑐐𑐸 𑐡𑐸 𑑋 𑐄𑐟𑑂𑐥𑐷𑐜𑐶𑐟 𑐩𑐢𑐾𑐱𑐷 𑐰 𑐖𑐣𑐖𑐵𑐟𑐶𑐟𑐫𑐟 𑐀𑐢𑐶𑐎𑐵𑐬 𑐧𑐷 𑐩𑐵𑐮𑐶 𑐢𑐎𑐵 𑐳𑑄𑐑𑐷𑐫𑐟𑐵𑑄 𑐡𑐾𑐱 𑐴𑐾 𑐎𑐸𑐔𑐵 𑐎𑐸𑐔𑐵 𑐖𑐸𑐂𑐐𑐸 𑐖𑐸𑐮 𑐢𑐎𑐵 𑐦𑐫 𑐏𑑄 𑐮𑑂𑐴𑐵𑐣𑐵 𑐖𑐸𑐂𑐥𑐶𑑄 𑐳𑐟𑑂𑐟𑐢𑐵𑐬𑐷𑐟𑐫 𑐏𑑄 𑐥𑐟𑑂𑐫𑐵 𑐫𑐵𑐣𑐵 𑐖𑐸𑐂𑐥𑐶𑑄 𑐐𑐸𑐮𑐶𑑄 𑐣𑐾𑐰𑐵 𑐣𑑂𑐴𑐾𑐮𑐸𑐰𑐵𑐟 𑐠𑐾𑑄𑐎 𑐣𑑄 𑐡𑐸𑐐𑐸 𑐏𑐣𑐵 𑐢𑐵𑐳𑐵 𑐟𑐳𑐎𑑄 𑐟𑐵𑐖𑐸𑐥 𑐔𑐵𑐫𑐾𑐩𑐵 𑑋

𑐣𑐾𑐥𑐵𑐮𑐫 𑑒𑑐𑑗𑑓 𑐳𑐵𑐮𑐫 𑐰𑐶𑐨𑐾𑐡𑐎𑐵𑐬𑐷 𑐳𑑄𑐰𑐶𑐢𑐵𑐣 𑐰𑐧𑐮𑐾 𑐣𑐾𑐰𑐵𑐟 𑐠𑐾𑑄 𑐟𑐩𑐵𑐳𑐾 𑐖𑐎 𑐖𑐸𑐫𑐵 𑐩𑐔𑑀𑑄𑐳𑐾𑑄 𑐩𑐢𑐾𑐱𑐷𑐟𑐫𑐳𑑄 𑐟𑐖𑐶𑐐𑐸 𑐁𑐣𑑂𑐡𑑀𑐮𑐣 𑐴𑐾 𑐫𑐵𑐐𑐸 𑐏 𑑋 𑐨𑐸𑐏𑐵𑐫 𑐧𑑀𑐫𑐵 𑐡𑐾𑐱 𑐟𑐴𑐳 𑐣𑐴𑐳 𑐖𑐸𑐫𑐵𑐔𑑀𑑄𑐐𑐸 𑐂𑐮𑐫 𑐴𑐠𑐵𑐳𑑄 𑐰𑐶𑐨𑐾𑐡𑐎𑐵𑐬𑐷 𑐳𑑄𑐰𑐶𑐢𑐵𑐣 𑐎𑑀𑐔𑐶𑐣𑐵 𑐩𑐢𑐾𑐱𑐷𑐟𑐫𑐟 𑐁𑐣𑑂𑐡𑑀𑐮𑐣 𑐫𑐵𑐫𑐾𑐟 𑐧𑐵𑐢𑑂𑐫 𑐫𑐵𑐐𑐸 𑐮𑐵 𑐢𑐵𑐟𑑂𑐠𑐾𑑄 𑐰𑐶𑐨𑐾𑐡𑐎𑐵𑐬𑐷 𑐳𑑄𑐰𑐶𑐢𑐵𑐣 𑐴𑐥𑐶𑑄 𑐄𑐧𑐮𑐾𑐫𑐵 𑐳𑑀𑑄𑐐𑐸 𑐥𑑂𑐬𑐩𑐹𑐏 𑐡𑐮𑐟 – 𑐣𑐾𑐎𑐥𑐵 𑐊𑐩𑐵𑐮𑐾, 𑐊𑐎𑐶𑐎𑐺𑐟 𑐩𑐵𑐌𑐰𑐵𑐡𑐷 𑐬 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐏 𑑋 𑐰𑐶𑐨𑐾𑐡𑐎𑐵𑐬𑐷 𑐳𑑄𑐰𑐶𑐢𑐵𑐣 𑐴𑐫𑐵 𑐡𑐾𑐱𑐫 𑐡𑐸𑐣𑐾 𑐀𑐩𑐶𑐳𑑄 𑐱𑑂𑐬𑐺𑐖𑐣𑐵𑐫𑐵𑐐𑐸 𑐰 𑐰𑐶𑐎𑐬𑐵𑐮 𑐳𑑂𑐠𑐶𑐟𑐶𑐫𑐵 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐥𑐮𑑂𑐳𑐵 𑐡𑐩𑐣 𑐴𑐾 𑐫𑐵𑐣𑐵 𑐳𑐩𑐵𑐢𑐵𑐣 𑐥𑐶𑐎𑐵𑐫𑐾𑐐𑐸 𑐢𑐫𑐵𑐠𑐾𑑄 𑐁𑐣𑑂𑐡𑑀𑐮𑐣𑐫𑐵 𑐗𑑀𑐮𑐫 𑑖𑑐 𑐏𑐸𑐂𑐩𑑂𑐴𑑄 𑐩𑐫𑐵𑐎 𑐩𑐢𑐾𑐱𑐷 𑐖𑐣𑐟𑐵𑐫𑐵 𑐖𑑂𑐫𑐵𑐣 𑐴𑐾 𑐎𑐵𑐮 𑑋 𑐠𑐟 𑐟𑐳𑐎𑑄 𑐬𑐵𑐲𑑂𑐚𑑂𑐬𑐰𑐵𑐡𑐶 𑐟𑐵𑐫𑐾𑐎𑐶𑐥𑐶𑑄 𑐐𑐸𑐮𑐶𑑄 𑐣𑐾𑐰𑐵𑐟𑐫𑐳𑑄 𑐠𑐾𑑄𑐎 𑐣𑑄 𑐀𑐠𑐾 𑐩𑐢𑐾𑐱𑐷 𑐖𑐣𑐟𑐵𑐫𑐵 𑐳𑑂𑐫𑐵𑐐𑐸 𑐰 𑐐𑐸 𑐡𑐩𑐣 𑐫𑐵𑐐𑐸 𑐫𑐵𑐟 𑐖𑐵𑐫𑐖 𑐟𑐵𑐫𑐾𑐎𑐵 𑐖𑐸𑐐𑐸 𑐢𑐵𑐳𑐵 𑐀𑐖𑐸 𑐔𑐵𑐫𑐵𑐥𑐸 𑑋 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐮𑑂𑐰𑐵𑐣𑐵𑐔𑑀𑑄𑐥𑐶𑑄 𑐩𑐢𑐾𑐱𑐷 𑐖𑐣𑐟𑐵𑐫𑐵 𑐥𑑄 𑐮𑐶𑐂𑐐𑐸 𑐥𑐮𑑂𑐳𑐵 𑐐𑐸𑐮𑐶𑑄 𑐣𑐾𑐰𑐵𑐟 𑐠𑐠𑐾 𑐡𑐩𑐣𑐎𑐵𑐬𑐷 𑐣𑐱𑑂𑐮𑐰𑐵𑐡𑐷 𑐳𑐬𑐎𑐵𑐬𑐫𑐵 𑐥𑐎𑑂𑐲 𑐥𑑀𑐲𑐞 𑐖𑐸𑐂𑐐𑐸 𑐏𑑄𑐫 𑐧𑑂𑐰𑐵𑐫𑐾 𑐖𑐸𑐫𑐵 𑐖𑐹𑐐𑐸 𑐏𑐣𑐶𑐧𑐮𑐾 𑐟𑐳𑐎𑑄 𑐡𑐸𑑅𑐏 𑐟𑐵 𑑋

𑐁𑐣𑑂𑐡𑑀𑐮𑐣𑐎𑐵𑐬𑐷 𑐩𑐢𑐾𑐱𑐷 𑐖𑐣𑐟𑐵𑐫𑐵 𑐩𑐵𑐐 𑐥𑐸𑐰𑑄𑐎𑐾𑐐𑐸 𑐥𑐮𑑂𑐳𑐵 𑐣𑐵𑐎𑐵𑐰𑐣𑑂𑐡𑐶 𑐫𑐵𑐟 𑐢𑐎𑐵 𑐩𑐢𑐾𑐱𑐷𑐟𑐫𑐟 𑐡𑑀𑐲 𑐧𑐶𑐫𑐵, 𑐨𑐵𑐬𑐟𑐫𑐵𑐟 𑐡𑑀𑐲 𑐧𑐶𑐫𑐵, 𑐨𑐵𑐬𑐟𑐷𑐫 𑐣𑐵𑐎𑐵𑐧𑐣𑑂𑐡𑐷𑐫𑐵 𑐴𑑁𑐰𑐵 𑐏𑐜𑐵 𑐫𑐵𑐣𑐵 𑐴𑐵𑐰𑐵𑐡𑐵𑐬𑐷 𑐬𑐵𑐲𑑂𑐚𑑂𑐬𑐧𑐵𑐡𑐫𑐵 𑐣𑐵𑐬𑐵 𑐧𑐶𑐫𑐵 𑐣𑐾𑐥𑐵𑐮𑐷 𑐖𑐣𑐟𑐵𑐫𑐵𑐟 𑐐𑑂𑐫𑐵𑐳, 𑐥𑐾𑐚𑑂𑐬𑑀𑐮, 𑐜𑐶𑐖𑐾𑐮 𑐮𑐐𑐵𑐫𑐟 𑐡𑐿𑐣𑐷𑐎 𑐄𑐥𑐨𑑀𑐐𑑂𑐫 𑐳𑐵𑐩𑐐𑑂𑐬𑐷𑐫𑐵 𑐀𑐨𑐵𑐰𑐫 𑐡𑐸𑐦𑑂𑐰𑐵𑐣𑐵 𑐴𑐵𑐎𑐸𑐧𑑄𑐖𑐵𑐟𑐫 𑐮𑑂𑐴𑐵𑐟𑐫 𑐧𑐖𑐵𑐬 𑐮𑐮𑑂𑐴𑐵𑐣𑐵 𑐣𑐾𑐥𑐵𑐮𑐷 𑐖𑐣𑐟𑐵𑐫𑐵𑐟 𑐀𑐣𑐵𑐰𑐱𑑂𑐫𑐎 𑐡𑐸𑑅𑐏 𑐧𑐷𑐐𑐸 𑐖𑑂𑐫𑐵 𑐄𑐧𑐮𑐾 𑐳𑐬𑐎𑐵𑐬𑑄 𑐐𑐸𑐐𑐸 𑐫𑐵𑐟 𑐰 𑐟𑐳𑐎𑑄 𑐐𑐿𑐬𑐖𑐶𑐩𑑂𑐩𑐾𑐡𑐵𑐬𑐷 𑐰 𑐖𑐑𑐣𑑂𑐫 𑐀𑐥𑐬𑐵𑐢 𑐏 𑑋

𑐣𑐾𑐥𑐵𑐮𑐫𑐵 𑐳𑐵𑐬𑑂𑐰𑐨𑑁𑐩𑐶𑐎𑐟𑐵𑐫𑐵 𑐏𑑄 𑐮𑑂𑐴𑐵𑐫𑐾𑐧𑐮𑐾 𑐰𑐵 𑐣𑐾𑐥𑐵𑐮𑐥𑑂𑐬𑐟𑐶𑐫𑐵 𑐰𑐦𑐵𑐡𑐵𑐬𑐶𑐟𑐵𑐫𑐵 𑐏𑑄 𑐮𑑂𑐴𑐵𑐫𑐾𑐧𑐮𑐾 𑐣𑐾𑐥𑐵𑐮𑐫𑐵 𑐱𑐵𑐳𑐎𑐟𑐫𑐳𑑄 𑐣𑑂𑐴𑑂𑐫𑐵𑐧𑐮𑐾𑑄 𑐴𑐾 𑐩𑐢𑐾𑐳𑐷 𑐖𑐣𑐟𑐵𑐫𑐵𑐟 𑐀𑐥𑐸𑐐𑐸 𑐣𑐶𑐱𑐵𑐣𑐵 𑐡𑐫𑐾𑐎𑐵 𑐠𑐥𑐶𑐳𑑄 𑐟𑐳𑐎𑑄 𑐟𑐢𑑄𑐐𑐸 𑐬𑐵𑐲𑑂𑐚𑑂𑐬𑐰𑐵𑐡𑐷 𑐖𑑂𑐫𑐵 𑐫𑐵𑐣𑐵𑐐𑐸 𑐟𑐵𑐫𑐾𑐎𑐶𑐐𑐸 𑐗𑐷𑐳𑑄 𑐏𑐣𑐵 𑐰𑐂𑐔𑑀𑐣𑐵𑐐𑐸 𑐡𑐸 𑑑 𑐩𑐢𑐾𑐳𑐷 𑐣𑐾𑐟𑐵𑐟𑐫 𑐣𑐾𑐥𑐵𑐮𑐥𑑂𑐬𑐟𑐶 𑐰𑐦𑐵𑐡𑐵𑐬𑐶𑐟𑐵𑐫𑐵 𑐏𑑄𑐫 𑐱𑑄𑐎𑐵 𑐫𑐵𑐫𑐾𑐐𑐸 𑐀𑐢𑐶𑐎𑐵𑐬 𑐣𑑂𑐴𑑂𑐫𑐵𑐩𑑂𑐴𑐾𑐳𑐶𑐟𑑄 𑐡𑐸 𑑋 𑐫𑐡𑐶 𑐳𑐸𑐫𑐵𑐟𑑄 𑐥𑑂𑐬𑐩𑐵𑐞 𑐳𑐵𑐠 𑐣𑐾𑐥𑐵𑐮 𑐧𑐶𑐬𑑀𑐢𑐷 𑐖𑑂𑐫𑐵 𑐫𑐵𑐣𑐵𑐔𑑀𑑄𑐐𑐸 𑐮𑐸𑐟 𑐢𑐵𑐳𑐵 𑐀𑐩𑐶𑐟 𑐎𑐛𑐑𑐬𑐵𑐫 𑐠𑐣𑐾 𑐴𑐾 𑐣𑑄 𑐩𑐵 𑑋 𑐟𑐬 𑐩𑐢𑐾𑐳𑐷 𑐣𑐾𑐟𑐵𑐟𑐫𑐟 𑐥𑐟𑐶𑐣𑑄 𑐳𑐸𑐫𑐵 𑐦𑐮𑐵𑐣𑐵 𑐮𑐵 𑐨𑐵𑐬𑐟𑐷𑐫 𑐎𑐵 𑐰𑐵 𑐦𑐮𑐵𑐣𑐵 𑐨𑐵𑐬𑐟𑐷𑐫 𑐊𑐖𑐾𑐣𑑂𑐚 𑐖𑐸𑐮 𑐢𑐎𑐵 𑐳𑑂𑐰𑐵𑑄𑐥𑐸𑐫𑐵 𑐦𑐸𑐳𑐦𑐸𑐳 𑐏𑑄 𑐮𑑂𑐴𑐵𑐣𑐵 𑐔𑐬𑐶𑐟𑑂𑐬𑐴𑐟𑑂𑐫𑐵 𑐫𑐵𑐣𑐵 𑐖𑐸𑐂𑐐𑐸 𑐢𑐫𑐵𑐐𑐸 𑐟𑐳𑐎𑑄 𑐏𑐟𑐬𑐣𑐵𑐎 𑐖𑑂𑐫𑐵 𑐏 𑑋 𑐀𑐢𑐶𑐎𑐵𑐬𑐫𑐵 𑐣𑐶𑐟𑐶𑑄 𑐮𑑂𑐰𑐵𑐣𑐵𑐔𑑀𑑄𑐥𑐶 𑐩𑐢𑐾𑐱𑐷𑐟𑐫𑐟 𑐣𑐾𑐥𑐵𑐮𑐫 𑐔𑑀𑐣𑐵 𑐨𑐵𑐬𑐟𑐫𑐵 𑐥𑐎𑑂𑐲𑐫 𑐖𑑂𑐫𑐵 𑐫𑐵𑐣𑐵 𑐔𑑀𑐣𑐵 𑐢𑐎𑐵 𑐁𑐢𑐵𑐬𑐴𑐷𑐣 𑐁𑐬𑑀𑐥 𑐧𑐷𑐥𑐶𑑄 𑐣𑑄 𑐁𑐥𑐵𑐮𑑄 𑐡𑐸 𑑋

𑐟𑐵 𑐃 𑐣𑑂𑐴𑐾𑐰𑐣𑐶𑐳𑐾𑑄 𑐗𑑄𑐐 𑐬𑐵𑐖𑐣𑐷𑐟𑐶 𑐫𑐵𑐣𑐵 𑐰𑐿𑐔𑑀𑑄𑐥𑐶 𑐏𑐫 𑐧𑑂𑐬𑐩𑑂𑐴𑐸𑐟𑐫 𑐥𑐸𑐔𑐮𑑄 𑐩𑐢𑐾𑐳𑐷𑐟𑐫 𑐰𑐶𑐬𑐸𑐡𑑂𑐢𑐫 𑐖𑐎 𑐩𑐏𑐸 𑐠𑐥𑐶𑐣𑐶𑐐𑐸 𑐰𑐶𑐥𑐎𑑂𑐲𑐷𑐟𑐫𑐟 𑐰𑐵 𑐠𑐥𑐶𑐣𑐶𑐐𑐸 𑐥𑐵𑐬𑑂𑐚𑐶 𑐡𑐸𑐣𑐾𑐫𑐵 𑐳𑐩𑐎𑐵𑐮𑐶𑐣 𑐣𑐾𑐟𑐵 𑐰𑐵 𑐥𑐸𑐮𑐵𑑄𑐥𑐶𑑄 𑐎𑐩𑑂𑐫𑐸𑐣𑐶𑐲𑑂𑐚 𑐣𑐾𑐟𑐵𑐴𑐬𑐸𑐟𑐫𑐟 𑐟𑐎 𑐣𑑄 𑐀𑐣𑐾𑐎 𑐁𑐬𑑀𑐥 𑐧𑐶𑐫𑐵 𑐔𑐬𑐶𑐟𑑂𑐬𑐴𑐟𑑂𑐫𑐵𑐫𑐵 𑐴𑐠𑐎𑐞𑑂𑐜𑐵 𑐕𑐾𑐮𑐾𑐐𑐸 𑐫𑐵𑐣𑐵 𑐰𑐫𑐵𑐔𑑀𑑄𑐐𑐸 𑐗𑐷𑐳𑑄 𑐏𑐣𑐵 𑐴𑐾 𑐔𑑀𑐣𑐵𑐐𑐸 𑐡𑐸 𑑋 𑐡𑐳𑐶 𑐣 𑐥𑑂𑐬𑐩𑐵𑐞 𑐠𑐟 𑐩𑐫𑐮𑐎𑐶𑑄 𑐧𑐶𑐣𑐵 𑐁𑐢𑐵𑐬 𑐧𑐶𑐣𑐵 𑐥𑑂𑐬𑐩𑐵𑐞 𑐳𑐸𑐫𑐵𑐟𑑄 𑐣𑑄 𑐠𑑀 𑐦𑐮𑐵𑐣𑐵 𑐡𑐾𑐱𑐫𑐵 𑐊𑐖𑐾𑐣𑑂𑐟 𑐴𑐾 𑐏 𑐢𑐎𑐵 𑐧𑐶𑐮𑑂𑐮𑐵 𑐨𑑂𑐫𑐵𑐎𑐵 𑐖𑐸𑐂𑐐𑐸 𑐣𑐾𑐥𑐵𑐫𑐵 𑐏𑑀𑐎𑑂𑐬𑑀 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐐𑐸 𑐐𑑂𑐫𑐵𑐣𑐵𑐥𑐸𑐐𑐸 𑐥𑑂𑐬𑐰𑐺𑐟𑐶 𑐠𑐣 𑐡𑐸 𑑋 𑐳𑐡𑐶𑐫𑑁𑑄 𑐣𑐶𑐳𑐾𑑄 𑐬𑐵𑐖𑑂𑐫𑐳𑐟𑑂𑐟𑐵𑑄 𑐧𑐶𑐫𑐵 𑐰𑐿𑐔𑑀𑑄𑐐𑐸 𑐄𑐟𑑂𑐥𑐷𑐜𑐣𑐫𑐵 𑐧𑐶𑐬𑐸𑐡𑑂𑐢𑐫 𑐮𑑂𑐰𑐵𑐣𑐵𑐔𑑀𑑄𑐥𑐶𑑄 𑐡𑐾𑐱 𑐡𑐸𑐣𑐾𑐫𑐵 𑐩𑐢𑐾𑐱𑐷𑐟𑐫𑐟 𑐐𑐸𑐮𑐶𑑄𑐳𑐶𑐟𑑄 𑐨𑐵𑐬𑐟𑑄 𑐰𑐥𑐶𑑄 𑐢𑐵𑐫𑐾 𑐖𑐶𑐮 𑐮𑐵 𑐰𑐵 𑐐𑐸𑐮𑐶𑑄𑐳𑐶𑐟 𑐨𑐵𑐬𑐟𑐫𑐵 𑐊𑐖𑐾𑐣𑑂𑐚 𑐢𑐫𑐵𑑄 𑐖𑐶𑐮 𑐀𑐗 𑐣𑑂𑐴𑐾𑐖𑑂𑐫𑐵𑐣𑐵 𑐳𑐩𑐐𑑂𑐬 𑐩𑐢𑐾𑐱𑐷𑐟𑐫𑐟 𑐠𑐾𑑄𑐎 𑐴𑐾 𑐠𑐶𑐥𑐶𑑄 𑐦𑐸𑐎𑑄 𑐨𑐵𑐬𑐟𑑄 𑐰𑐥𑐶𑑄 𑐏 𑐢𑐎𑐵 𑐢𑐫𑐵 𑐩𑐢𑐾𑐱𑐷 𑐁𑐣𑑂𑐡𑑀𑐮𑐣𑐫𑐵𑐟 𑐧𑐡𑐣𑐵𑐩 𑐫𑐵𑐫𑐾𑐐𑐸 𑐑𑐔𑐵𑐫𑐵𑐥𑐸𑐐𑐸 𑐎𑐸𑐟 𑐠𑐣𑐫𑐵 𑐧𑐎𑑄𑐦𑐸𑐳𑑂𑐬𑐾 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐳𑑄 𑐫𑐵𑐣𑐵𑐔𑑀𑑄𑐐𑐸 𑐡𑐸 𑑋 𑐠𑐖𑑂𑐫𑐵𑐐𑐸 𑐏𑑄𑐫 𑐗𑐷 𑐳𑐎𑐮𑐾𑑄 𑐳𑐔𑐾𑐟 𑐰 𑐳𑐟𑐬𑑂𑐎 𑐖𑐸𑐂𑐩𑐵 𑑋

𑐣𑐾𑐥𑐵𑐮𑐫 𑐨𑐵𑐬𑐟𑐫𑐵 𑐟𑐮𑐰 𑐣𑐫𑐵 𑐖𑑂𑐫𑐵 𑐫𑐵𑐣𑐵𑐔𑑀𑐥𑐶𑑄 𑐬𑐀𑐫𑐵 𑐖𑐵𑐐𑐶𑐬𑐾𑐟 𑐁𑐥𑐵𑐮𑑄 𑐡𑐸 𑐢𑐫𑐵𑐐𑐸 𑐧𑐫𑐧𑐫 𑐗𑐶𑐠𑐵𑐫 𑐡𑐸 𑑋 𑐠𑐸𑐎𑐾 𑐕𑐸𑑄 𑐳𑐟𑑂𑐫𑐟𑐵 𑐩𑐡𑐂 𑐢𑐵𑐫𑐾 𑐩𑐦𑐹 𑑋 𑐠𑐸𑐎𑐾 𑐩𑐢𑐾𑐱𑐫𑐵 𑐣𑐾𑐟𑐵 𑐖𑐎 𑐩𑐏𑐸 𑐎𑐵𑐬𑑂𑐫𑐎𑐬𑑂𑐟𑐵 𑐣𑑄 𑐡𑐂 𑐢𑐵𑐫𑐾 𑑋 𑐐𑐸𑐮𑐶𑐳𑑂𑐫𑐵𑑄 𑐮𑐵 𑑓𑑘𑑐𑑐𑑐 𑐣𑐾𑐥𑐵𑐮𑐷𑐟𑐫𑐟 𑐨𑐵𑐬𑐟𑐫𑐵 𑐬𑐀 𑐳𑑄𑐳𑑂𑐠𑐵𑑄 𑐟𑐮𑐰 𑐣𑐎𑐵𑐟𑐐𑐸 𑐡𑐸 𑐢𑐎𑐵 𑐣𑑄 𑐢𑐫𑐵 𑐰𑑄𑐔𑑀𑑄𑐐𑐸 𑐡𑐸 𑑋 𑐠𑑀 𑐢𑐵𑐟𑑂𑐠𑐾𑑄 𑐏𑐳𑐵 𑐠𑐸𑐎𑐾 𑐐𑐸𑐮𑐶 𑐩𑐢𑐾𑐱𑐫𑐵 𑐣𑐾𑐟𑐵𑐟 𑐡𑐸 𑐐𑐸𑐮𑐶 𑐥𑐴𑐵𑐜𑐫𑐵 𑐠𑐟 𑐬𑐵𑐲𑑂𑐚𑑂𑐬𑐰𑐵𑐡𑐶 𑐢𑐵𑐂𑐥𑐶𑑄 𑐥𑐵𑐬𑑂𑐚𑐷 𑐰 𑐣𑐾𑐟𑐵𑐟 𑐰𑐵 𑐩𑐾𑐩𑐾𑐥𑐶𑑄 𑐳𑐸𑐳𑐸 𑐡𑐸 𑐠𑑀 𑐬𑐴𑐳𑑂𑐫𑐫𑐵 𑐴𑐾 𑐏𑑄 𑐏 𑑋 𑐟𑐬 𑐦𑐸𑐎 𑐩𑐢𑐾𑐱𑐫𑐵 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵 𑐰𑐵 𑐦𑐸𑐎 𑐥𑐴𑐵𑐜𑐫𑐵 𑐥𑐵𑐬𑑂𑐚𑐷 𑐣𑐾𑐟𑐵𑐟 𑐰 𑐎𑐵𑐬𑑂𑐫𑐎𑐬𑑂𑐟𑐟𑐵 𑐨𑐵𑐬𑐟𑐫𑐵 𑐟𑐮𑐰 𑐣𑐂𑐥𑐶𑑄 𑐖𑐸𑐮, 𑐨𑐵𑐬𑐟𑐫𑐵 𑐡𑐮𑐵𑐮 𑐖𑐸𑐮 𑐢𑐎𑐵 𑐴𑐵𑐮𑐵 𑐖𑐸𑐂𑐐𑐸 𑐮𑐵 𑐰𑐾𑑄 𑐥𑐴 𑐖𑐎 𑐏 𑑋

𑐩𑐢𑐾𑐱𑐷 𑐣𑐾𑐟𑐵𑐟 𑐨𑐵𑐬𑐟𑐫 𑐰𑐣𑐵 𑐀𑐣𑐫𑐵 𑐣𑐾𑐟𑐵𑐟 𑐣𑐵𑐥𑑄 𑐐𑑀𑐥𑑂𑐫 𑐏𑑄 𑐮𑑂𑐴𑐵 𑐖𑐸𑐮 𑐳𑐴𑐫𑑀𑐐 𑐦𑑀𑑄 𑐖𑐸𑐮 𑐢𑐫𑐵𑐐𑐸 𑐏𑑄 𑐩𑐢𑐾𑐱𑐷 𑐣𑐾𑐟𑐵𑐫𑐟 𑐏𑐸𑐧 𑐁𑐮𑑀𑐔𑐵𑐣𑐵 𑐖𑐸𑐂𑐐𑐸 𑐗𑐷𑐳𑑄 𑐏𑐣𑐵 𑑋 𑐥𑑂𑐬𑐾𑐳𑐫 𑐴𑐾 𑐰𑑀𑐐𑐸 𑐀𑐩𑐶𑐐𑐸 𑐏𑑄 𑐳𑐸𑐣𑐵𑑄 𑐩𑐳𑑂𑐫𑐸𑐐𑐸 𑐐𑑀𑐥𑑂𑐫 𑐏𑑄 𑐣𑑄 𑐩𑐏𑐸 𑑋 𑐖𑐸𑐖𑐸 𑐟𑑂𑐬𑐶𑐨𑐸𑐰𑐣 𑐣𑐶𑐳𑐾𑑄, 𑐧𑐶𑐥𑐶 𑐎𑑀𑐂𑐬𑐵𑐮, 𑐐𑐞𑐾𑐱𑐩𑐵𑐣, 𑐥𑐸𑐲𑑂𑐥𑐮𑐵𑐮, 𑐐𑐶𑐬𑐶𑐖𑐵 𑐥𑑂𑐬𑐳𑐵𑐡 𑐎𑑀𑐂𑐬𑐵𑐮𑐵, 𑐥𑑂𑐬𑐔𑐞𑑂𑐜, 𑐮𑐶𑐳𑐾𑑄 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐰 𑐣𑐾𑐥𑐵𑐮 𑐎𑐩𑑂𑐫𑐸𑐣𑐶𑐳𑑂𑐚 𑐥𑐵𑐬𑑂𑐚𑐶𑐫𑐵 𑐀𑐣𑐾𑐎𑐣 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵𑐟𑐫 𑐏𑑄 𑐮𑑂𑐴𑐵𑐫𑐾𑐐𑐸 𑐏𑐳𑐵𑑄 𑐐𑐸𑐮𑐶𑑄 𑐨𑐵𑐬𑐟𑐫 𑐱𑐬𑐞 𑐎𑐵𑐂𑐥𑐶𑑄 𑐐𑐸𑐮𑐶𑑄 𑐨𑐵𑐬𑐟𑐫𑐵 𑐐𑑂𑐰𑐵𑐴𑐵𑐮𑐶𑑄 𑐎𑑂𑐬𑐵𑐣𑑂𑐟𑐶 𑐫𑐵𑐂𑐥𑐶𑑄𑐳𑐵 𑐨𑐵𑐬𑐟𑐷𑐫 𑐡𑐸𑐟𑐵𑐰𑐵𑐳𑑄 𑐎𑐬𑑀𑐜𑑁 𑐎𑐬𑑀𑐜 𑐢𑐾𑐰𑐵 𑐎𑐫𑐵 𑐩𑐡𑐣 𑐨𑐞𑑂𑐜𑐬𑐷𑐫𑐵 𑐣𑐵𑐩𑐫 𑐚𑑂𑐬𑐳𑑂𑐚 𑐡𑐫𑐾𑐎𑐵 𑐖𑑂𑐫𑐵 𑐫𑐵𑐣𑐵 𑐖𑐸𑐂𑐐𑐸 𑐥𑐵𑐬𑑂𑐚𑐶𑐟 𑐣𑑄 𑐗𑐶𑐳𑑄 𑐏𑐣𑐵 𑐴𑐾 𑐔𑑀𑐣𑐐𑐸 𑐡𑐸 𑑋 𑑒𑑐𑑐𑑗 𑐳𑐮𑐵𑐫𑐵 𑐎𑑂𑐬𑐵𑐣𑑂𑐟𑐶 𑐢𑐵 𑐰𑐵 𑑒𑑐𑑔𑑖 𑐧𑐴𑐸𑐡𑐮𑐫𑐵 𑐁𑐣𑑂𑐡𑑀𑐮𑐣 𑐢𑐵 𑐰𑐵 𑐩𑐵𑐌𑐰𑐵𑐡𑐷 𑐖𑐣𑐫𑐸𑐡𑑂𑐢 𑐢𑐵 𑐰𑐵 𑑒𑑐𑑖𑑓 𑐫𑐵 𑐖𑐣𑐁𑐣𑑂𑐡𑑀𑐮𑐣 𑐀𑐮𑐾 𑐠𑐣 𑐰𑐐𑐸 𑐐𑐞𑐟𑐣𑑂𑐟𑑂𑐬, 𑐨𑐵𑐬𑐟𑐫𑐵 𑐐𑑂𑐰𑐵𑐴𑐵𑐮𑐶 𑐩𑐎𑐵𑐳𑐾𑑄 𑐗𑐷𑐠𑐵𑐫 𑐕𑐸𑑄 𑐬𑐵𑐖𑐣𑐷𑐟𑐶𑐎 𑐴𑑂𑐫𑐸𑐥𑐵 𑐰𑐐𑐸 𑐩𑐡𑐸 𑑋 𑐠𑑀 𑐳𑐎𑐳𑑂𑐫𑐵𑑄 𑐏𑐣𑐵 𑐴𑐾 𑐔𑑀𑑄𑐐𑐸 𑐳𑐟𑑂𑐫 𑐏 𑑋 𑐀𑐠𑐾 𑐢𑐎𑐵 𑐣𑐾𑐥𑐵𑐮𑐫𑐵 𑐬𑐵𑐖𑐣𑐟𑐶𑐎 𑐥𑐵𑐬𑑂𑐚𑐶 𑐰 𑐣𑐾𑐟𑐵𑐟𑐫𑐟 𑐠𑐶𑐥𑐶𑑄 𑐦𑐸𑐎 𑐴𑐾 𑐨𑐵𑐬𑐟𑐫𑐵 𑐡𑐮𑐵𑐮 𑐏 𑐨𑐵𑐬𑐟𑐫𑐵 𑐟𑐰𑐾𑐡𑐵𑐬 𑐴𑐾 𑐏 𑐢𑐎𑐵 𑐴𑐵𑐮𑐵 𑐣𑑄 𑐖𑐸𑐂𑐐𑐸 𑐧𑐾𑐎𑐵𑐬𑐫𑐵 𑐏𑑄 𑐏 𑑋 𑐨𑐵𑐬𑐟𑐫𑐵 𑐐𑑂𑐰𑐵𑐴𑐵𑐮𑐶 𑐦𑑀𑑄 𑐖𑐸𑐮 𑐢𑐵𑐫𑐾𑐰𑑄 𑐩𑐢𑐾𑐱𑐷 𑐣𑐾𑐟𑐵𑐟 𑐖𑐎 𑐡𑐱𑐡𑑂𑐬𑑀𑐴𑐷 𑐴𑐾 𑐖𑐸𑐮 𑐢𑐵𑐫𑐾𑐐𑐸 𑐟𑐳𑐎𑑄 𑐥𑐸𑐬𑑂𑐰𑐵𑐐𑑂𑐬𑐴𑐶 𑐏𑑄 𑐖𑐎 𑐏 𑑋 𑐄𑐟𑑂𑐟𑐬 𑐥𑑂𑐬𑐡𑐾𑐱𑐫𑐵 𑐩𑐹𑐏𑑂𑐫 𑐩𑐣𑑂𑐟𑑂𑐬𑐷 𑐫𑑀𑐐𑐶 𑐁𑐡𑐶𑐟𑑂𑐫𑐣𑐵𑐠𑐫𑐵𑐠𑐵𑐫 𑐣𑐾𑐥𑐵𑐮𑐫𑐵𑐟 𑐴𑐶𑐣𑑂𑐡𑐸 𑐬𑐵𑐖𑑂𑐫 𑐡𑐫𑐾𑐎𑐵 𑐧𑐷𑐩𑐵𑐮 𑐢𑐎𑐵 𑐧𑐶𑑄𑐟𑐶 𑐫𑐵𑐰𑐣𑐶𑐥𑐶𑑄 𑐬𑐵𑐖𑐵𑐰𑐵𑐡𑐷 𑐩𑐞𑑂𑐜𑐮𑐾𑐟 𑐠𑐾𑑄 𑐠𑐟 𑐬𑐵𑐲𑑂𑐚𑑂𑐬𑐰𑐵𑐡𑐷 𑐢𑐵𑐂𑐥𑐶𑑄 𑐢𑐵𑐳𑐵 𑐣𑐾𑐥𑐵𑐮𑐫 𑐳𑐸𑑄 𑐴𑐾 𑐩𑐡𑐸 𑐢𑐵𑐳𑐵𑑄 𑐖𑑂𑐫𑐸 𑑋 𑐟𑐥𑐵𑐮𑑄 𑐳𑐸𑐬𑐸𑐰𑐵 𑐦𑐶𑐣𑐵 𑐝𑐵𑐎𑐵 𑐟𑐥𑐸𑐮𑐶𑑄 𑐥𑐸𑐫𑐵 𑐳𑐶𑑄𑐴𑐡𑐬𑐰𑐵𑐬𑐫 𑐔𑑀𑐣𑐵 𑐨𑐵𑐬𑐟𑐫𑐵𑐟 𑐩𑐵𑐴𑐵𑐎𑐵𑐮𑐷 𑐩𑐷𑐥𑐶𑑄 𑐨𑐵𑐬𑐟𑐫𑐵 𑐁𑐖𑑂𑐘𑐵 𑐥𑐵𑐮𑐎 𑐥𑐴𑐵𑐜𑐫𑐵 𑐎𑐠𑐶𑐟 𑐬𑐵𑐲𑑂𑐚𑑂𑐬𑐰𑐵𑐡𑐷 𑐱𑐵𑐲𑐎𑐟 𑐨𑐵𑐬𑐟𑐷𑐫 𑐡𑐮𑐵𑐮 𑐢𑐵𑐫𑐾𑐐𑐸 𑐏 𑐎𑐶 𑐩𑐢𑐾𑐱𑐷 𑐣𑐾𑐟𑐵𑐟 𑐨𑐵𑐬𑐟𑐷𑐫 𑐡𑐮𑐵𑐮 𑐏 𑐢𑐵𑐫𑐾𑐐𑐸 𑐬𑐸 𑐁𑐟𑐎 𑐳𑐸𑑄 𑐣𑑄 𑐩𑐢𑐾𑐱𑐶 𑐣𑐾𑐟𑐵𑑄 𑐨𑐵𑐬𑐟𑐮𑐶𑐳𑐾𑑄 𑐀𑐠𑐾 𑐕𑐸𑑄 𑐣𑑄 𑐀𑐳𑐩𑐵𑐣 𑐳𑐣𑑂𑐢𑐷 𑐳𑐩𑑂𑐗𑑁𑐟𑐵𑐫 𑐳𑐴𑐶 𑐫𑐵𑐰𑑄𑐐𑐸 𑐂𑐟𑐶𑐴𑐵𑐳 𑐮𑐵 𑐗𑐷𑐠𑐵𑐫 𑐩𑐡𑐸 𑑋

𑐣𑐶𑐩𑑂𑐴 𑐥𑐾𑐩𑑂𑐴 𑐣𑐾𑐟𑐵𑐟 𑐨𑐵𑐬𑐟𑐫𑐵 𑐡𑐵𑐳 𑐖𑐸𑐮 𑐖𑐸𑐂𑐦𑐸 𑑋 𑐣𑐾𑐥𑐵𑐮 𑐴𑐾 𑐫𑑄𑐎𑐵 𑐨𑐵𑐬𑐟𑐫 𑐮𑑂𑐰𑐵𑐎 𑐕𑑂𑐫𑐵𑐫𑐾 𑐢𑐎𑐵 𑐐𑐸𑐮𑐶𑑄 𑐳𑐣𑐵 𑐖𑐸𑐮 𑐣𑑄 𑐢𑐵𑐫𑐾 𑑋 𑐟𑐬 𑐦𑐸𑐎 𑐴𑐾 𑐩𑐢𑐾𑐱𑐷 𑐣𑐾𑐟𑐵𑐟 𑐨𑐵𑐬𑐟𑐫𑐵 𑐡𑐮𑐵𑐮 𑐖𑐸𑐮, 𑐦𑐸𑐎 𑐴𑐾 𑐩𑐢𑐾𑐱𑐷 𑐣𑐾𑐟𑐵𑐟 𑐨𑐵𑐬𑐟𑐫 𑐣𑐾𑐥𑐵 𑐮𑑂𑐰𑐵𑐎𑐕𑑂𑐫𑐵𑐫𑐾𑐟 𑐳𑐣𑐵𑐖𑐹𑐥𑐶𑑄 𑐏 𑐢𑐎𑐵 𑐀𑐟𑐶𑐱𑐫𑑀𑐎𑑂𑐟𑐶 𑐏𑑄 𑐮𑑂𑐴𑐵𑐣𑐵 𑐖𑐸𑐂𑐐𑐸 𑐢𑐫𑐵𑐐𑐸 𑐥𑐵𑐐𑐮𑐥𑐣 𑐖𑐎 𑐏 𑑋

𑐩𑐢𑐾𑐱𑐷 𑐨𑑁𑐩𑐔𑐵, 𑐀𑑄𑐐𑐶𑐎𑐺𑐟 𑐣𑐵𑐐𑐬𑐶𑐎 :

𑐣𑐾𑐥𑐵𑐮𑐫 𑐐𑐸𑐮𑐶𑑄 𑐠𑐟 𑐩𑐵𑐣𑐰𑐵𑐢𑐶𑐎𑐵𑐬𑐰𑐵𑐡𑐷, 𑐩𑐴𑐶𑐮𑐵 𑐀𑐨𑐶𑐫𑐣𑑂𑐟𑐵 𑐢𑐵𑐂𑐥𑐶𑐳𑑄 𑐥𑐴𑐵𑐜𑐾 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐳𑑄 𑐠𑐾𑑄𑐎 𑐣𑑄 𑐨𑐵𑐬𑐟𑑄 𑐣𑐾𑐥𑐵𑐮𑐫 𑐂𑐴𑐶𑐥𑐵 𑐫𑐵𑐣𑐵𑐰𑐥𑐶𑑄 𑐩𑐢𑐾𑐱𑐷 𑐨𑑁𑐩𑐳𑑂𑐟𑐫𑐟 𑐀𑑄𑐐𑐶𑐎𑐺𑐟 𑐣𑐵𑐐𑐬𑐶𑐎 𑐖𑐸𑐐𑐸𑐫𑐵 𑐴𑐸𑐣𑐶𑑄 𑐨𑐾𑐡𑐨𑐵𑐰 𑐫𑐵𑐫𑐾𑐩𑐵, 𑐥𑐎𑑂𑐲𑐥𑐵𑐟 𑐫𑐵𑐫𑐾𑐩𑐵, 𑐦𑐸𑐎 𑐎𑐠𑑄𑐫𑐵 𑐬𑐵𑐖𑐣𑐿𑐟𑐷𑐎 𑐀𑐢𑐶𑐎𑐵𑐬𑑄 𑐧𑐣𑑂𑐔𑐶𑐟 𑐫𑐵𑐫𑐾𑐩𑐵 𑐢𑐎𑐵 𑐴𑐵𑐮𑐵 𑐖𑐸𑐂𑐥𑐶𑑄 𑐣𑑄 𑐗𑐷𑐠𑐵𑐫 𑐡𑐸 𑑋 𑐧𑐶𑐡𑐾𑐱𑐷 𑐨𑑁𑐩𑐳𑐟𑐫𑐟 𑐳𑐩𑐵𑐣 𑐀𑐢𑐶𑐎𑐵𑐬 𑐧𑐷 𑐩𑐖𑑂𑐫𑐸 𑐀𑑄𑐐𑐶𑐎𑐺𑐟 𑐣𑐵𑐐𑐬𑐶𑐎𑐫𑐵𑐟 𑐳𑐩𑐵𑐣 𑐀𑐢𑐶𑐎𑐵𑐬𑑄 𑐧𑐣𑑂𑐔𑐶𑐟 𑐫𑐵𑐫𑐾𑐩𑐵 𑐢𑐫𑐵𑐐𑐸 𑐠𑑀 𑐀𑐩𑐵𑐣𑐰𑐷𑐫 𑐳𑑀𑐔 𑐏 𑑋 𑐳𑐎𑐮𑐾𑑄 𑐩𑐣𑐸𑐟 𑐖𑐣𑑂𑐩𑑄 𑐴𑐾 𑐳𑑂𑐰𑐟𑐣𑑂𑐟𑑂𑐬 𑐰 𑐳𑐩𑐵𑐣 𑐩𑐬𑑂𑐫𑐵𑐡𑐵 𑐰 𑐀𑐢𑐶𑐎𑐵𑐬𑐫𑐵 𑐴𑐎𑐡𑐵𑐬 𑐏 𑐢𑐎𑐵 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑐫𑐵 𑐩𑐵𑐣𑐰 𑐀𑐢𑐶𑐎𑐵𑐬𑐫𑐵 𑐰𑐶𑐱𑑂𑐰𑐰𑑂𑐫𑐵𑐥𑐶 𑐑𑑀𑐲𑐞𑐵𑑄 𑐢𑐵𑐐𑐸 𑐡𑐸 𑑋 𑐩𑐶𑐖𑑄 𑐩𑐶𑐳𑐵 𑐧𑐬𑐵𑐧𑐬 𑐀𑐢𑐶𑐎𑐵𑐬𑐫𑐵 𑐴𑐎𑐡𑐵𑐬 𑐏 𑐢𑐫𑐵𑐐𑐸 𑐰𑐶𑐱𑑂𑐰𑐰𑑂𑐫𑐵𑐥𑐶 𑐩𑐵𑐣𑑂𑐫𑐟𑐵 𑐏 𑑋 𑐣𑐵𑐐𑐬𑐶𑐎𑐟𑐵𑐫𑐵 𑐏𑑄𑐫 𑐩𑐶𑐖𑑄 𑐰𑐵 𑐩𑐶𑐳𑐵 𑐰𑐵 𑐀𑑄𑐐𑐶𑐎𑐺𑐟 𑐣𑐵𑐐𑐬𑐶𑐎 𑐳𑐎𑐳𑐶𑐟𑑄 𑐴𑐾 𑐳𑐩𑐵𑐣 𑐧𑑂𑐫𑐰𑐴𑐵𑐬 𑐫𑐵𑐫𑐾𑐩𑐵 𑐢𑐫𑐵𑐐𑐸 𑐰𑐶𑐱𑑂𑐰𑐰𑑂𑐫𑐵𑐥𑐶 𑐩𑐵𑐣𑑂𑐫𑐟𑐵 𑐏 𑑋 𑐀𑑄𑐐𑐶𑐎𑐺𑐟 𑐀𑐗 𑐣𑐾𑐥𑐵𑐮𑐫 𑐧𑑂𑐫𑐵𑐴𑐵 𑐫𑐵𑐣𑐵𑐰𑐥𑐶𑑄 𑐨𑑁𑐩𑐳𑑂𑐟𑐫𑐟 𑐖𑐎 𑐡𑑀𑐳𑑂𑐬𑑀 𑐡𑐬𑑂𑐖𑐵𑐫𑐵 𑐣𑐵𑐐𑐬𑐶𑐎 𑐎𑐠𑑄 𑐰𑑂𑐫𑐰𑐴𑐵𑐬 𑐫𑐵𑐫𑐾𑐩𑐵 𑐢𑐫𑐵𑐐𑐸 𑐏𑑄 𑑒𑑑 𑐳𑑁𑑄 𑐱𑐟𑐵𑐧𑑂𑐡𑐶𑐫𑐵𑐟 𑐮𑑀𑐐𑐸 𑐏𑑄 𑐩𑐏𑐸 𑑋 𑐠𑐖𑑂𑐫𑐵𑐐𑐸 𑐳𑑄𑐎𑐷𑐬𑑂𑐞 𑐬𑐵𑐲𑑂𑐚𑑂𑐬𑐰𑐵𑐡𑐫𑐵 𑐥𑐎𑑂𑐲𑐫 𑐧𑐶𑐮𑐎𑐸𑐮 𑐳𑐸𑑄 𑐣𑑄 𑐰𑐣𑐾𑐩𑐖𑑂𑐫𑐸 𑑋 𑐣𑐾𑐥𑐵𑐮𑐫 𑐮𑐵 𑐨𑑁𑐩𑐳𑑂𑐟𑐫𑐟 𑐖𑐎 𑐩𑐏𑐸 𑐧𑐶𑐡𑐾𑐱𑐷 𑐣𑐵𑐥𑑄 𑐂𑐴𑐶𑐥𑐵 𑐫𑐵𑐣𑐵𑐰𑐣𑐶𑐥𑐶𑑄 𑐩𑑂𑐴𑑂𑐫𑐵𑐫𑐩𑐳𑑂𑐟𑐫𑐟 𑐮𑐵 𑐗𑐣 𑐴𑐾 𑑒𑑐𑑗𑑗 𑐫𑐵 𑐥𑑂𑐬𑐳𑑂𑐟𑐵𑐰𑐶𑐟 𑐣𑐵𑐐𑐬𑐶𑐎𑐟𑐵 𑐰𑐶𑐢𑐾𑐫𑐾𑐎𑑄 𑐀𑐢𑐶𑐎𑐵𑐬𑑄 𑐥𑐹𑐬𑑂𑐞 𑐧𑐣𑑂𑐔𑐶𑐟 𑐫𑐵𑐐𑐸 𑐡𑐸 𑑋 𑐩𑑂𑐴𑑂𑐫𑐵𑐫𑐩𑐳𑑂𑐟𑐫𑐟 𑐖𑐸𑐫𑐵𑐔𑑀𑑄𑐐𑐸 𑐠𑐖𑑂𑐫𑐵𑐐𑐸 𑐥𑐎𑑂𑐲𑐥𑐵𑐟 𑐀𑐟𑑂𑐫𑐵𑐔𑐵𑐬𑐫𑐵 𑐧𑐶𑐬𑑀𑐢𑐫 𑐳 𑐟𑐫𑐵𑐔𑑀𑑄𑐥𑐶 𑐣𑐾𑐥𑐵𑐫𑐵 𑐩𑐴𑐶𑐮𑐵 𑐀𑐨𑐶𑐫𑐣𑑂𑐟𑐵𑐟 𑐩𑐡𑐸𑐐𑐸 𑐡𑐸 𑐟𑐬 𑐐𑐸𑐮𑐶𑑄 𑐠𑐟 𑐩𑐴𑐶𑐮𑐵 𑐀𑐨𑐶𑐫𑐣𑑂𑐟𑐵 𑐢𑐵𑐂𑐥𑐶𑑄𑐳𑑄 𑐢𑐵𑐳𑐵 𑐨𑐵𑐬𑐟𑐫 𑐂𑐴𑐶𑐥𑐵 𑐫𑐵𑐣𑐵𑐰𑐣𑐶𑐥𑐶𑑄 𑐣𑐾𑐥𑐵𑐮𑐷 𑐩𑑂𑐴𑑂𑐫𑐵𑐫𑐩𑐳𑑂𑐟𑐫𑐟 𑐣𑐵𑐐𑐬𑐶𑐎𑐟𑐵 𑐎𑐵𑐫𑐾𑐟 𑐀𑐣 𑐣𑑂𑐴𑐫𑐡𑑄 𑐃 𑐥𑐷 𑐩𑐵𑐐𑐸𑐮𑐶𑑄 𑐣𑐾𑐥𑐵𑐮𑐫 𑐂𑐴𑐶𑐥𑐵 𑐫𑐵𑐣𑐵 𑐰𑐂𑐥𑐶𑑄 𑐨𑑁𑐩𑐳𑑂𑐟𑐫𑐟 𑐣𑑄 𑐣𑐵𑐐𑐬𑐶𑐎𑐟𑐵 𑐎𑐵𑐫𑐾𑐟 𑐣𑑂𑐴𑐫𑐡𑑄 𑐴𑐾 𑐥𑐷𑐎𑐾 𑐩𑐵 𑐀𑐖𑑂𑐖 𑐀𑐥𑐶𑑄 𑐀𑑄𑐐𑐶𑐎𑐺𑐟 𑐣𑐵𑐐𑐬𑐶𑐎 𑐖𑐸𑐐𑐸𑐮𑐶𑑄 𑐖𑑂𑐫𑐸𑐟𑐵𑐕𑐶 𑐀𑐩𑐶𑐟 𑐦𑐸𑐎 𑐎𑐠𑑄𑐫𑐵 𑐬𑐵𑐖𑐣𑐶𑐟𑐶𑐎 𑐀𑐢𑐶𑐎𑐵𑐬𑑄 𑐰𑑄𑐔𑐶𑐟 𑐫𑐵𑐫𑐾𑐩𑐵 𑐠𑐾𑑄𑐎 𑐢𑐵𑐂𑐥𑐶𑑄 𑐣𑑄 𑐡𑐫𑐵𑐔𑑀𑑄𑐐𑐸 𑐡𑐸 𑑋 𑐎𑐬𑑂𑐥𑐶𑐣𑐶𑐐𑐸 𑐡𑐾𑐱𑐫𑐵 𑐨𑐶𑑄𑐐𑐸 𑐧𑐵𑑄𑐮𑐵𑐐𑐸 𑐏𑑄 𑐣𑐵𑐮𑐵 𑐎𑐵𑐫𑐾𑐐𑐸 𑐮𑐵 𑐳𑐴𑐶 𑐏𑑄 𑐏 𑐟𑐬 𑐎𑐬𑑂𑐥𑐶𑐣𑐶𑐐𑐸 𑐡𑐾𑐱𑐫𑐵 𑐢𑑀𑐐𑑂𑐐𑐶𑐐𑐸, 𑐳𑑂𑐫𑑄𑐐𑐸, 𑐧𑐵𑑄𑐩𑐮𑐵𑐐𑐸 𑐏𑑄𑐫𑐵 𑐄𑐡𑐵𑐴𑐬𑐞 𑐎𑐫𑐵 𑐠𑐥𑐶𑑄𑐠𑐵𑐫 𑐣𑑄 𑐀𑐠𑐾𑐴𑐾 𑐖𑐸𑐂𑐩𑐵 𑐀𑐠𑐾𑐴𑐾 𑐫𑐵𑐫𑐾𑐩𑐵 𑐢𑐎𑐵 𑐴𑐵𑐮𑐵 𑐖𑐸𑐂𑐐𑐸 𑐕𑐸𑑄 𑐣𑑄 𑐎𑐠𑑄 𑐧𑐸𑐡𑑂𑐢𑐶𑐩𑐵𑐣𑐷 𑐩𑐏𑐸 𑑋 𑐧𑐬𑐸 𑐠𑐐𑐸 𑐡𑐾𑐱𑐫 𑐣𑑂𑐫𑐵𑐫𑐥𑐹𑐬𑑂𑐞 𑐰𑑂𑐫𑐰𑐳𑑂𑐠𑐵𑐫𑐵 𑐣𑐶𑑄𑐟𑐶𑑄 𑐴𑐵𑐮𑐾𑐐𑐸, 𑐮𑑂𑐰𑐵𑐫𑐾𑐐𑐸 𑐫𑐵𑐟 𑐢𑐵𑐳𑐵 𑐴𑐾 𑐖𑐎 𑐠𑐣𑐫𑐵 𑐩𑐴𑐶𑐮𑐵 𑐀𑐨𑐶𑐫𑐣𑑂𑐟𑐵𑐟𑐫𑐐𑐸 𑐂𑐖𑑂𑐖𑐟 𑐰 𑐳𑐣𑑂𑐩𑐵𑐣 𑐡𑐂𑐐𑐸 𑐏 𑑋

𑐀𑑄𑐐𑐶𑐎𑐺𑐟𑑄 𑐡𑐾𑐱 𑐮𑐸𑐣𑐶𑐐𑐸 𑐖𑐸𑐮 𑐢𑐵𑐂𑐥𑐶𑐣𑐶𑐐𑐸 𑐦𑐫𑐐𑑄 𑐏𑑄 𑐥𑐟𑑂𑐫𑐵 𑐫𑐵𑐣𑐵 𑐧𑑂𑐰𑐵𑑄𑐫𑐾 𑐖𑐸𑐂 𑐣𑑂𑐴𑑂𑐫𑑀 𑐟𑐠𑑂𑐫 𑐟𑐠𑑂𑐫𑐵𑑄𑐎 𑐕𑐎 𑐳𑐶𑐂𑐎𑐾𑐐𑐸 𑐣𑑄 𑐥𑐵𑐫𑐕𑐶 𑐖𑐸𑐂 𑑋 𑐕𑐸𑑄 𑐃 𑐣𑑂𑐴𑐾𑐰 𑐳𑐾𑐟𑑀𑐥𑐵𑐚𑐷 𑐀𑐣𑐮𑐵𑐂𑐣 𑐥𑑁𑐫𑐵 𑐳𑑄𑐥𑐵𑐡𑐎𑐫𑐵 𑐔𑑀𑐳𑐸𑐂 𑐥𑐶𑐡𑑄𑐐𑐸 𑐐𑐺𑐴 𑐩𑐣𑑂𑐟𑑂𑐬𑐵𑐮𑐫 𑐟𑐠𑑂𑐫𑐵𑐎𑑄 𑐕𑐎 𑐧𑑀𑐣𑐵 𑐳𑑀𑐫𑐾 :

‘𑐐𑐺𑐴 𑐩𑐣𑑂𑐟𑑂𑐬𑐵𑐮𑐫, 𑐣𑐵𑐐𑐬𑐶𑐎𑐟𑐵 𑐱𑐵𑐏𑐵𑐫𑐵 𑐟𑐠𑑂𑐫𑐵𑑄𑐎 𑐎𑐠𑑄 𑐣𑐵𑐐𑐬𑐶𑐎𑐟𑐵 𑐰𑐶𑐟𑐬𑐞 𑐥𑑂𑐬𑐞𑐵𑐮𑐷 𑐳𑐸𑐬𑐹 𑐖𑐸𑐫𑐵 𑐠𑐸𑐏𑐾 𑑒𑑐𑑗𑑓 𑐀𑐳𑐵𑐬 𑐩𑐳𑐵𑐣𑑂𑐟𑐟𑐎𑐫𑐵 𑐡𑐸𑐣𑐾 𑑓 𑐮𑐵𑐏 𑑖𑑔 𑐴𑐖𑐵𑐬 𑑕𑑓 𑐩𑑂𑐴 𑐰𑐶𑐡𑐾𑐱𑐷 𑐩𑐶𑐳𑐵𑐟𑐫𑐳𑑄 𑐣𑐾𑐥𑐵𑐮𑐷 𑐩𑐶𑐖𑑄𑐥𑐶𑑄 𑐣𑐵𑐥𑑄 𑐂𑐴𑐶𑐥𑐵 𑐫𑐵𑐣𑐵𑐰𑐫𑐵 𑐠𑐣𑐫𑐵 𑐀𑑄𑐐𑐷𑐎𑐺𑐟 𑐣𑐵𑐐𑐬𑐶𑐎𑐟𑐵 𑐎𑐵𑐐𑐸 𑐡𑐸 𑑋 𑐐𑐺𑐴𑐮𑐫 𑐖𑐣𑐳𑑄𑐏𑑂𑐫𑐵𑐫𑐵 𑐟𑐠𑑂𑐫𑐵𑑄𑐎 𑐟𑐫𑐾𑐐𑐸 𑐫𑐵𑐐𑐸 𑑒𑑐𑑐𑑙 𑐳𑐵𑐮𑑄 𑐮𑐶𑐳𑐾𑑄 𑐏 𑑋 𑐠𑐠𑐾 𑐢𑐵𑐫𑐾𑐧𑐮𑐾 𑐰𑑄𑐐𑐸 𑑖𑑘 𑐡𑑄𑐫𑐵 𑐡𑐸𑐣𑐾 𑐔𑐵𑐬 𑐮𑐵𑐏 𑐳𑑀𑐫𑐵𑑄 𑐩𑑂𑐴𑑀 𑐰𑐶𑐡𑐾𑐱𑐷 𑐣𑐵𑐐𑐬𑐶𑐎 𑐂𑐴𑐶𑐥𑐵 𑐫𑐵𑐣𑐵 𑐣𑐾𑐥𑐵𑐮𑐫 𑐰𑐐𑐸 𑐏𑐣𑐾𑐡𑐸 𑑋 𑐖𑐧𑐎𑐶, 𑐰𑑄𑐐𑐸 𑑖𑑘 𑐡𑑄𑐫𑐵 𑐡𑐸𑐣𑐾 𑐣𑐾𑐥𑐵𑐮𑐫𑐵 𑐖𑐣𑐳𑑄𑐏𑑂𑐫𑐵 𑐳𑑀𑐡𑐸𑐐𑑄 𑐀𑐥𑑀𑐫𑐵 𑐗𑐣𑑂𑐜𑐿 𑐟𑐷𑐣 𑐎𑐬𑑀𑐜 𑐠𑐾𑑄𑐐𑐸 𑐡𑐸 𑑋

𑐎𑐠𑐶𑐟 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐳𑑄 𑐣𑐶𑐐𑐹𑐐𑐸 𑐖𑐣𑐁𑐣𑑂𑐡𑑀𑐮𑐣 𑐮𑐶𑐥𑐵 𑑔𑑐 𑐮𑐵𑐏 𑐨𑐵𑐬𑐟𑐷𑐫𑐟𑐫𑐟 𑐣𑐵𑐐𑐬𑐶𑐎𑐟𑐵 𑐧𑐶𑐮 𑐢𑐎𑐵 𑐗𑐹𑐛 𑐏𑑄𑐫𑐵 𑐥𑑂𑐬𑐔𑐵𑐬𑐥𑑂𑐬𑐳𑐵𑐬 𑐏𑐸𑐧 𑐫𑐵𑐣𑐵 𑐰𑐫𑐵𑐔𑑀𑑄𑐐𑐸 𑐡𑐸 𑑋 𑐐𑐸𑐮𑐶𑐳𑐶𑐟𑑄 𑐠𑑀 𑐏𑑄 𑐢𑐵𑐟𑑂𑐠𑐾𑑄 𑐏𑐐𑐸 𑐏𑑄 𑐏 𑐢𑐫𑐵𑐐𑐸 𑐨𑑂𑐬𑐩 𑐣𑑄 𑐡𑐸 𑑋 𑐖𑐧𑐎𑐶, 𑐫𑐠𑐵𑐬𑑂𑐠 𑐩𑐾𑐐𑐸 𑐴𑐾 𑐡𑐸 𑑋 𑐐𑐺𑐴 𑐩𑐣𑑂𑐟𑑂𑐬𑐵𑐮𑐫𑐫𑐵 𑐎𑐠𑑄 𑐄𑐧𑐮𑐾 𑐐𑐵𑑄𑐐𑐵𑐩𑐫 𑐣𑐵𑐐𑐬𑐶𑐎𑐟𑐵 𑐚𑑀𑐮𑐷 𑐰𑐣𑐵 𑐖𑐩𑑂𑐩𑐵 𑑒𑑖 𑐮𑐵𑐏 𑑗𑑐 𑐴𑐖𑐵𑐬 𑐖𑐎 𑐣𑐵𑐐𑐬𑐶𑐎𑐟𑐵 𑐂𑐣𑐾𑐐𑐸 𑐫𑐵𑐐𑐸 𑐡𑐸 𑑋 𑐄𑐎𑐷 𑐩𑐢𑑂𑐫𑐾 𑑒𑑕 𑐮𑐵𑐏 𑑙𑐥𑐴𑐵𑐜𑐫 𑑑𑑓 𑐮𑐵𑐏, 𑐩𑐢𑐾𑐳𑐫 𑑑𑑒 𑐮𑐵𑐏𑑐 𑐠 𑐩𑐵𑑄𑐧𑑁𑑄 𑐣𑐶𑐩𑑂𑐴𑑄 𑐣𑐾𑐥𑐵𑐮𑐷 𑐣𑐵𑐐𑐬𑐶𑐎 𑐖𑐸𑐐𑐸 𑐎𑐵𑐬𑐞𑑄 𑐰𑑄𑐱𑐖𑐫𑐵 𑐁𑐢𑐵𑐬𑐫 𑐣𑐵𑐐𑐬𑐶𑐎𑐟𑐵 𑐎𑐵𑐥𑐶𑑄 𑐖𑐎 𑐏 𑑋 𑐮𑑂𑐫𑑄 𑑑 𑐮𑐵𑐏 𑑗𑑐 𑐴𑐖𑐵𑐬𑑄 𑐖𑐎 𑐄𑐧𑐮𑐾𑐫𑐵 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑐫𑐵 𑐣𑐶𑐬𑑂𑐞𑐫 𑐎𑐠𑑄 𑐳𑑀𑐩𑑂𑐴 𑐣𑐾𑐥𑐵𑐮𑐷 𑐣𑐵𑐐𑐬𑐶𑐎𑐫𑐵 𑐳𑐶𑐦𑐵𑐬𑐶𑐳𑐫𑐵 𑐁𑐢𑐵𑐬𑐫 𑐀𑑄𑐐𑐷𑐎𑐺𑐟 𑐣𑐵𑐐𑐬𑐶𑐎𑐟𑐵 𑐎𑐵𑐐𑐸 𑐡𑐸 𑑋‘

𑐳𑐶𑐩𑐵𑐥𑐵𑐬𑐶𑑄 𑐣𑐾𑐥𑐵𑐮𑐷𑐟 𑐣𑐵𑐥𑑄 𑐂𑐴𑐶𑐥𑐵 𑐫𑐵𑐣𑐵𑐰𑐥𑐶𑑄 𑐩𑐢𑐾𑐱𑐷 𑐨𑑁𑐥𑐶𑑄𑐬𑐖𑐶𑐮𑐵𑐖𑑄𑐥𑐶𑑄 𑐰𑐵 𑐀𑑄𑐐𑐶𑐎𑐺𑐟 𑐣𑐵𑐐𑐬𑐶𑐎 𑐀𑐗 𑐢𑐵𑐫 𑐨𑐵𑐬𑐟𑐷𑐫𑐟 𑐩𑐢𑐾𑐱𑐷 𑐖𑐸𑐫𑐵 𑐠𑑁𑑄 𑐴𑐾 𑐣𑐾𑐥𑐵𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐂𑐐𑐸 𑐖𑐸𑐮 𑐎𑐣𑑂𑐴𑐫 𑐴𑐾 𑐣𑐾𑐥𑐵𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐂𑐐𑐸 𑐖𑐸𑐮 𑐢𑐎𑐵 𑐦𑐖𑐸𑐮 𑐴𑐮𑑂𑐮𑐵 𑐣𑑄 𑐠𑐣 𑐄𑐮𑐶𑐴𑑄 𑐫𑐵𑐣𑐵𑐔𑑀𑑄𑐐𑐸 𑐡𑐸 𑑋 𑐐𑑀𑐬𑑂𑐏𑐵𑐮𑐶𑐟𑐫𑐳𑑄 𑐣𑐾𑐥𑐵 𑐟𑑂𑐫𑐵𑐎𑐾 𑐢𑐸𑑄𑐎𑐵 𑐡𑐾𑐱𑐫 𑐱𑐵𑐴 𑐎𑐵𑐮, 𑐬𑐵𑐞𑐵 𑐎𑐵𑐮, 𑐥𑑄𑐔𑐵𑐫𑐟 𑐎𑐵𑐮, 𑐧𑐴𑐸𑐡𑐮 𑐎𑐵𑐮𑑄 𑐁 𑐠𑑀 𑐐𑐞𑐟𑐣𑑂𑐟𑑂𑐬 𑐎𑐵𑐮𑐫 𑐠𑑂𑐫𑑄𑐧𑐮𑐾 𑑒𑑕𑑒 𑐡𑑄 𑐦𑐸𑐂 𑐢𑐸𑑄𑐎𑐐𑐸 𑐡𑐸 𑑋 𑐠𑑀 𑑒𑑕𑑒 𑐧𑐬𑑂𑐲 𑐟𑐵𑐴𑐵𑐎𑐐𑐸 𑐣𑐾𑐥𑐵𑐮𑐫𑐵 𑐂𑐟𑐶𑐴𑐵𑐳𑐫 𑐕𑐮𑐎𑐥𑐚𑐫 𑐥𑐵𑐬𑑄𑐐𑐟 𑐕𑐐𑐹 𑐖𑐩𑐵𑐟 𑐥𑐴𑐵𑐜𑐾 𑐧𑐵𑐴𑐸𑐣 (𑐎𑑂𑐲𑐾𑐟𑑂𑐬𑐷 𑐛𑐎𑐸𑐬𑐷) 𑐧𑐵𑐴𑐾𑐎 𑐩𑐢𑐾𑐱𑐷 𑐳𑐩𑐸𑐡𑐵𑐫𑑄 𑐐𑑀𑐩𑑂𑐴 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐮 ? 𑐀𑐮𑐾 𑐖𑐣𑐖𑐵𑐟𑐶𑑄 𑐐𑑀𑐩𑑂𑐴 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐮 𑐬𑐸 𑐂𑐩𑐵 𑐰𑐮 𑐂𑐩𑐵 𑐰𑐮 𑐢𑐎𑐵 𑐴𑐵𑐴𑐵𑑄 𑐏𑐵𑐫𑐵 𑐩𑐔𑐵𑐟 𑐳𑑂𑐫𑐵𑐣𑐵 𑐣𑐂𑐥𑐶𑑄 𑐕𑐚𑑂𑐚𑐸 𑐢𑑀𑑄𑐔𑐵𑐟𑐫 𑐏𑑄 𑐐𑐸𑐮𑐶 𑐖𑐎 𑐥𑐟𑑂𑐫𑐵 𑐫𑐵𑐣𑐵 𑐖𑐸𑐂𑐐𑐸 ?

𑐳𑐶𑐎𑑂𑐎𑐶𑐩𑐶𑐎𑐬𑐞 𑐰 𑐦𑐶𑐖𑐶𑐎𑐬𑐞 :

𑐣𑐾𑐥𑐵𑐮𑐫 𑐳𑐶𑐎𑑂𑐎𑐶𑐩𑐶𑐎𑐬𑐞 𑐰 𑐦𑐶𑐖𑐶𑐎𑐬𑐞𑐫𑐵 𑐴𑐮𑑂𑐮𑐵 𑐳𑐣 𑑑𑑙𑑗𑑐𑐬𑑑𑑙𑑘𑑐 𑐡𑐱𑐎𑑄 𑐣𑐶𑐳𑐾𑑄 𑐴𑐾 𑐣𑐾𑐣𑐾 𑐡𑐫𑐵 𑐰𑐿𑐔𑑀𑑄𑐐𑐸 𑐏 𑑋 𑐳𑐶𑐎𑑂𑐎𑐶𑐩𑐫 𑐀𑐣𑐫𑐵 𑐁𑐡𑐶𑐰𑐵𑐳𑐷 𑐨𑑀𑐟𑐶𑐫𑐵 𑐰 𑐮𑐾𑐥𑑂𑐔𑐵𑐟 𑐳𑑀𑐫𑐵 𑐧𑐴𑐸𑐳𑑄𑐏𑑂𑐫𑐵𑐫 𑐠𑑂𑐫𑑄𑐎 𑐰𑑄𑐥𑐶𑑄 𑐁𑐥𑑂𑐬𑐰𑐵𑐳𑐷 𑐣𑐾𑐥𑐵𑐮𑐷𑐟𑐫𑐳𑑄 𑐣𑑂𑐴𑑂𑐫𑐵𑐎𑐹𑐐𑐸 𑐥𑑂𑐬𑐖𑐵𑐟𑐣𑑂𑐟𑑂𑐬𑐫𑐵 𑐁𑐣𑑂𑐡𑑀𑐮𑐣𑐫𑐵 𑐗𑑀𑐮𑐫 𑐀𑐣 𑐖𑐹𑐐𑐸 𑐳𑑄𑐳𑐡𑐫𑐵 𑐔𑐸𑐣𑐵𑐰𑐫 𑐧𑐴𑐸𑐳𑑄𑐏𑑂𑐫𑐵𑐫 𑐟𑑂𑐫𑐵𑐥𑐶𑐣𑐶𑐐𑐸 𑐳𑐵𑑄𑐳𑐡𑐟𑐫 𑐀𑐟𑑂𑐫𑐢𑐶𑐎 𑐩𑐟 𑐳𑑄𑐏𑑂𑐫𑐵 𑐰 𑐨𑐵𑐬𑐟𑐫𑐵 𑐳𑐿𑐣𑐶𑐎 𑐧𑐮𑑄 𑐳𑐶𑐎𑑂𑐎𑐶𑐩𑐫𑐵𑐟 𑐨𑐵𑐬𑐟𑐫 𑐮𑑂𑐰𑐵𑐎 𑐕𑑂𑐫𑐵𑐫𑐾𑐐𑐸 𑐖𑑂𑐫𑐵 𑑑𑑙𑑗𑑕 𑐳𑐣𑐫 𑐫𑐵𑐐𑐸 𑐏 𑑋 𑐁𑐡𑐶𑐰𑐵𑐳𑐷 𑐨𑑀𑐟𑐶𑐫𑐵 𑐰 𑐮𑐾𑐥𑑂𑐔𑐵𑐟𑐫𑐟 𑐀𑐮𑑂𑐥𑐩𑐟𑐫 𑐮𑐵𑐎𑐵 𑐁𑐥𑑂𑐬𑐰𑐵𑐳𑐷 𑐣𑐾𑐥𑐵𑐮𑐷𑐟𑐫𑐳𑑄 𑐳𑑂𑐰𑐟𑐣𑑂𑐟𑑂𑐬 𑐡𑐾𑐱 𑐳𑐶𑐎𑑂𑐎𑐶𑐩𑐫𑐵𑐟 𑐨𑐵𑐬𑐟𑐫𑐵 𑐕𑐐𑐹 𑐥𑑂𑐬𑐵𑐣𑑂𑐟 𑐫𑐵𑐣𑐵 𑐕𑑀𑐐𑐸 𑐠𑑀 𑐑𑐚𑐣𑐵𑐫𑐵𑐟 𑐴𑐾 𑐳𑐶𑐎𑑂𑐎𑐶𑐩𑐶𑐎𑐬𑐞 𑐢𑐵𑐫𑐾𑐐𑐸 𑐫𑐵𑐣𑐵𑐔𑑀𑑄𑐐𑐸 𑐏 𑑋 𑐠𑑀 𑐴𑐾 𑐏𑑄𑐫𑐵 𑐡𑐳𑐸 𑐧𑐶𑐫𑐵 𑐩𑐢𑐾𑐱𑐷 𑐰𑐵 𑐨𑐵𑐬𑐟𑐷𑐫 𑐁𑐥𑑂𑐬𑐰𑐵𑐳𑐷𑐟𑐫𑐳𑑄 𑐣𑐾𑐥𑐵𑐫𑐵𑐟 𑐨𑐵𑐬𑐟𑐫 𑐮𑑂𑐰𑐵𑐎 𑐕𑑂𑐫𑐵𑐂𑐐𑐸 𑐖𑐸𑐮 𑐢𑐎𑐵 𑐴𑐵𑐰𑐵𑐡𑐵𑐬𑐶 𑐏𑑄𑐫𑐵 𑐧𑐫𑐧𑐫 𑐠𑐣 𑐫𑐵𑐣𑐵 𑐰𑐿𑐔𑑀𑑄𑐐𑐸 𑐏 𑑋 𑐣𑐾𑐥𑐮𑐵𑐫 𑐣 𑐩𑐢𑐾𑐱𑐷𑐟 𑐨𑐵𑐬𑐟𑐷𑐫 𑐁𑐥𑑂𑐬𑐰𑐵𑐳𑐷 𑐏 𑐣 𑐀𑐥𑐶𑑄 𑐀𑐟𑑂𑐫𑐢𑐶𑐎 𑐧𑐴𑐸𑐳𑑄𑐏𑑂𑐫𑐵𑐫 𑐴𑐾 𑐡𑐸 𑑋 𑐟𑐬𑐵𑐂 𑐨𑐹𑐩𑐶𑐂 𑐧𑐳𑑀𑐰𑐵𑐳 𑐫𑐵𑐣𑐵 𑐰𑐿𑐔𑑀𑐥𑐶𑑄 𑐩𑐢𑐾𑐱𑐷𑐟 𑐮𑐵 𑐀𑐣 𑐁𑐡𑐶𑐩 𑐎𑐵𑐮𑑄 𑐣𑐶𑐳𑐾𑑄 𑐧𑐳𑑀𑐰𑐵𑐳 𑐫𑐵𑐣𑐵𑐰𑐿𑐔𑑀𑑄𑐥𑐶𑑄 𑐁𑐡𑐶𑐰𑐵𑐳𑐷 𑐀𑐥𑐶𑑄 𑐁𑐥𑑂𑐬𑐰𑐵𑐳𑐷 𑐮𑐵 𑐩𑐏𑐸 𑑋

𑐦𑐶𑐖𑐶 𑐏𑑄 𑐴𑐵𑐣𑑄 𑐩𑐾𑐐𑐸 𑐴𑐾 𑐡𑐸 𑑋 𑐦𑐶𑐖𑐶 𑐳𑐮𑑄𑐳 𑐚𑐵𑐥𑐸𑐟𑐫 𑐡𑐾𑐱 𑐏 𑑋 𑑑𑑘𑑗𑑔 𑐳𑐣𑐫 𑐧𑐾𑐮𑐵𑐫𑐟𑑄 𑐄𑐥𑐣𑐶𑐰𑐾𑐳 𑐡𑐫𑐾𑐎𑐸𑐐𑐸 𑐦𑐶𑐖𑐶 𑑑𑑙𑑗𑑐 𑐳𑐣𑐫 𑐰𑐫𑐵 𑐟𑐶𑐣𑐶𑑄 𑐳𑑂𑐰𑐟𑐣𑑂𑐟𑑂𑐬 𑐖𑐹𑐐𑐸 𑐏 𑑋 𑐨𑐸𑐳𑐵 𑐎𑐂𑐫𑐵 𑐥𑑂𑐬𑐎𑑀𑐥𑑄 𑐫𑐵𑐣𑐵 𑐬𑐿𑐠𑐵𑐣 𑐁𑐡𑐶𑐰𑐵𑐳𑐶 𑐦𑐶𑐖𑐶𑐫𑐵 𑐁𑐥𑐵𑐮𑑄 𑐩𑐣𑐸𑐟 𑐳𑐶𑐳𑐾𑐮𑐶𑑄 𑐀𑐣 𑐟𑐸 𑐏𑐾𑐟𑐶, 𑐎𑐥𑐵𑐫 𑐏𑐾𑐟𑐶, 𑐁𑐡𑐶 𑐖𑑂𑐫𑐵 𑐫𑐵𑐎𑐾𑐟 𑐡𑐎𑐮𑐾 𑐣𑑂𑐴𑐵𑐥𑐵𑑄 𑑑𑑘𑑗𑑘 𑐳𑐣𑐫 𑐧𑐾𑐮𑐵𑐫𑐟𑐫𑐵 𑐄𑐥𑐣𑐶𑐰𑐾𑐳𑐷 𑐱𑐵𑐲𑐎𑐟𑐫𑐳𑑄 𑐨𑐵𑐬𑐟𑐫𑐵 𑐩𑐡𑐖𑐸𑐬𑐟𑐫𑐟 𑐦𑐶𑐖𑐶 𑐫𑑄𑐎𑐸𑐐𑐸 𑐏 𑑋 𑑑𑑙𑑑𑑖 𑐳𑐣𑐫 𑐟𑐎 𑐠𑐾𑑄𑐧𑐮𑐾 𑐨𑐵𑐬𑐟𑐷𑐫𑐟 𑑖𑑑 𑐴𑐖𑐵𑐬𑐫𑐵 𑐮𑑂𑐫𑐵𑐏𑐫 𑐀𑐣 𑐠𑐾𑑄𑐐𑐸 𑐏𑐣𑐾𑐡𑐸 𑑋 𑐣𑑂𑐫𑐵𑐡𑑄 𑐔𑑀𑐣𑐵 𑐨𑐵𑐬𑐟𑐫 𑐴𑐾 𑐮𑑂𑐫𑐵𑐴𑐵𑑄 𑐰𑐣𑐾 𑐡𑐂𑐐𑐸 𑐰 𑐣𑑂𑐴𑑂𑐫𑐵𑐥𑐶𑑄 𑐀𑐣 𑐴𑐾 𑐧𑐳𑑀𑐰𑐵𑐳 𑐫𑐵𑐫𑐾 𑐡𑐂𑐐𑐸 𑐳𑐬𑑂𑐟𑐫 𑐀𑐩𑐶𑐟 𑐀𑐣 𑐫𑑄𑐎𑐹𑐐𑐸 𑐏𑐳𑐵𑑄 𑐨𑐵𑐬𑐟𑐫 𑐮𑑂𑐫𑐵𑐴𑐵𑑄 𑐰𑐣𑐾𑐟 𑐠𑐥𑐶𑐣𑐶𑐐𑐸 𑐴𑐾 𑐏𑐬𑑂𑐔𑑄 𑐰𑐣𑐾𑐩𑐵𑐐𑐸 𑐰 𑐟𑐳𑐎𑑄 𑐠𑐶𑐎𑐾𑐐𑐸 𑐏𑑄 𑐖𑐹𑐧𑐮𑐾 𑐁𑐥𑐵 𑐨𑐵𑐬𑐟𑐷𑐫𑐟 𑐀𑐣 𑐴𑐾 𑐔𑑀𑐣𑐵 𑐕𑑀𑐫𑐾𑐟 𑐰𑐵𑐢𑑂𑐫 𑐖𑐹𑐰𑑄𑐐𑐸 𑐏 𑑋 𑐠𑑁𑑄𑐎𑐣𑑂𑐴𑐫 𑐩𑐹𑐎𑑄 𑑘 𑐮𑐵𑐏 𑑘𑑔 𑐴𑐖𑐵𑐬 𑑘𑑘𑑗 𑐖𑐣𑐳𑑄𑐏𑑂𑐫𑐵 𑐡𑐸𑐐𑐸 𑐦𑐶𑐖𑐶𑐂 𑐁𑐡𑐶𑐰𑐵𑐳𑐶 𑐦𑐶𑐖𑐶𑐫𑐣𑐟 𑑕𑑖𑑋𑑘 𑐥𑑂𑐬𑐟𑐶𑐱𑐟, 𑐨𑐵𑐬𑐟𑐷𑐫 𑑓𑑗𑑋𑑕 𑐥𑑂𑐬𑐟𑐶𑐱𑐟, 𑐬𑑀𑐟𑐸𑐩𑐣 𑑑𑑋𑑒 𑐰 𑐫𑐸𑐬𑑀𑐥𑐶𑐫𑐣𑐟 𑑔𑑋𑑕 𑐥𑑂𑐬𑐟𑐶𑐱𑐟𑐫𑐵 𑐮𑑂𑐫𑐵𑐏𑐫 𑐡𑐸 𑑋 𑐰𑐵𑐳𑑂𑐟𑐰𑐫 𑐠𑐥𑐶𑐣𑐶𑐐𑐸 𑐍𑐥𑐣𑐶𑐰𑐾𑐳𑐶𑐎 𑐱𑐵𑐲𑐞 𑐩𑐖𑐧𑐸𑐟 𑐫𑐵𑐣𑐵 𑐁𑐥𑐵 𑐩𑐣𑐹 𑐨𑐸𑐳𑐵𑐎𑐂𑐫𑐵 𑐩𑐴𑐵𑐩𑐵𑐬𑐶𑑄 𑐳𑐶𑐣𑐵 𑐩𑑂𑐴𑑀 𑐮𑑂𑐫𑐵𑐏𑐫 𑐮𑐵𑐣𑐵𑐰𑐥𑐶𑑄 𑐬𑐿𑐠𑐵𑐣 𑐁𑐡𑐶𑐰𑐵𑐳𑐶 𑐦𑐶𑐖𑐶𑐫𑐵 𑐖𑐣𑐟𑐵𑐫𑐵𑐟 𑐎𑐖𑐫 𑐫𑐵𑐣𑐵 𑐀𑐣𑐫𑐵 𑐥𑑂𑐬𑐵𑐎𑐺𑐟𑐶𑐎 𑐳𑑂𑐬𑑀𑐟 𑐳𑐵𑐢𑐣 𑐡𑑀𑐴𑐣 𑐫𑐵𑐫𑐾𑐟 𑐧𑐾𑐮𑐵𑐫𑐟𑐫𑐵 𑐄𑐥𑐣𑐶𑐰𑐾𑐳𑐷 𑐱𑐵𑐲𑐎𑐟𑐫𑐳𑑄 𑐨𑐵𑐬𑐟𑐫𑐵 𑐩𑐡𑐖𑐸𑐬𑐟 𑐁𑐥𑐵 𑐳𑑄𑐏𑑂𑐫𑐵𑐫 𑐀𑐣 𑐫𑑄𑐎𑐸𑐐𑐸 𑐏 𑑋 𑐣𑐾𑐥𑐵𑐮𑐫 𑐠𑑁𑐎𑐣𑑂𑐴𑐫 𑐴𑐮𑑂𑐮𑐵 𑐫𑐵𑐣𑐵𑐔𑑀𑑄𑐠𑐾𑑄 𑐨𑐵𑐬𑐟𑐷𑐫𑐟 𑐀𑐣 𑐧𑐴𑐸𑐳𑑄𑐏𑑂𑐫𑐵𑐫 𑐢𑐵𑐳𑐵 𑐩𑐡𑐸 𑑋 𑐀𑐥𑐶𑑄 𑐦𑐶𑐖𑐶𑐂 𑐣𑐎𑐶𑐟𑐶𑐣𑐶𑑄 𑐣𑐎𑐶𑐟𑐶𑐣𑐶𑑄 𑐖𑐎 𑐧𑐳𑑀𑐰𑐵𑐳 𑐫𑐵𑐰𑑄𑐥𑐶 𑐣𑑄 𑐩𑐏𑐸 𑑋 𑐨𑐵𑐬𑐟𑐷𑐫𑐟 𑐀𑐣 𑐣𑑂𑐫𑐵𑐐𑐹 𑐏𑐸𑐐𑐸 𑐥𑐸𑐳𑑂𑐟𑐵 𑐣𑑂𑐴𑐾𑐰 𑐮𑐶𑐳𑐾𑑄 𑐴𑐾 𑐧𑐳𑑀𑐰𑐵𑐳 𑐫𑐵𑐣𑐵𑐰𑐿𑐔𑑀𑐥𑐶𑑄 𑐏 𑑋 𑐦𑐶𑐖𑐶𑐫𑐵 𑐬𑐵𑐖𑐣𑐷𑐟𑐶𑐂 𑐁𑐥𑑂𑐬𑐰𑐵𑐳𑐷 𑐨𑐵𑐬𑐟𑐶𑐫 𑐰 𑐬𑐿𑐠𑐵𑐣𑐾 𑐦𑐶𑐖𑐶𑐫𑐣𑐟𑐫 𑐡𑐠𑐸𑐂 𑐐𑐵𑐎𑑄 𑐟𑐣𑐵𑐰 𑐡𑐸 𑑋 𑐟𑐬 𑑑𑑙𑑙𑑐 𑐫𑐵 𑐳𑑄𑐰𑐶𑐢𑐵𑐣𑑄 𑐣𑐶𑐐𑐸𑐮𑐶𑑄 𑐳𑑄𑐳𑐡𑐫 𑐬𑐿𑐠𑐵𑐣𑐾 𑐦𑐶𑐖𑐶𑐫𑐣𑐟𑐫 𑐧𑐶𑐲𑐾𑐱𑐵𑐢𑐶𑐎𑐵𑐬𑐫𑐵𑐟 𑐳𑐸𑐬𑐎𑑂𑐲𑐶𑐟 𑐫𑐵𑐐𑐸 𑐏 𑑋 𑑒𑑐𑑑𑑓 𑐡𑐫𑐾𑐎𑐹𑐐𑐸 𑐳𑑄𑐰𑐶𑐢𑐵𑐣𑑄 𑐦𑐶𑐖𑐶 𑐊𑐎 𑐳𑐡𑐣𑐫𑐵 𑐖𑐎 𑐡𑐫𑐾𑐎𑐮 𑑋 𑑑𑑙𑑙𑑗 𑐳𑐣𑐫 𑐖𑐹𑐐𑐸 𑐔𑐸𑐣𑐵𑐰𑐫 𑐟𑑂𑐫𑐵𑐎𑐵 𑐡𑐎𑐮𑐾 𑐣𑑂𑐴𑐵𑐥𑐵𑑄𑐩𑑂𑐴 𑐨𑐵𑐬𑐟𑐷𑐫 𑐩𑐹𑐮𑐫𑐵 𑐩𑐴𑐾𑐣𑑂𑐡𑑂𑐬 𑐔𑑁𑐢𑐬𑐷 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐂𑐟 𑐳𑐦𑐮 𑐖𑐸𑐐𑐸 𑐏 𑑋 𑐟𑐬 𑑒𑑐𑑐𑑐 𑐳𑐣𑐫 𑐰𑐫𑐵𑐐𑐸 𑐳𑐬𑐎𑐵𑐬𑐫𑐵𑐟 𑐳𑐿𑐣𑐶𑐎 𑐧𑐮𑑄 𑐀𑐥𑐡𑐳𑑂𑐟 𑐫𑐵𑐣𑐵𑐧𑐶𑐮 𑑋 𑐬𑐵𑐖𑐣𑐟𑐶𑐎 𑐀𑐳𑑂𑐠𑐶𑐬𑐟𑐵𑐫𑐵 𑐟𑐵𑐴𑐵 𑐂𑐟𑐶𑐴𑐵𑐳 𑐡𑐸𑐐𑐸 𑐦𑐶𑐖𑐶𑐂 𑐥𑐚𑐎 𑐥𑐚𑐎 𑐳𑐿𑐣𑐶𑐎 𑐧𑐮𑑄 𑐣𑐶𑐬𑑂𑐰𑐵𑐔𑐶𑐟 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐟𑐫𑐟 𑐀𑐥𑐡𑐳𑑂𑐟 𑐫𑐵𑐐𑐸 𑐂𑐟𑐶𑐴𑐵𑐳 𑐡𑐸 𑑋 𑑒𑑐𑑑𑑘 𑐳𑐣𑐫 𑐖𑐹𑐐𑐸 𑐡𑐎𑐮𑐾 𑐮𑐶𑐥𑐵𑑄𑐐𑐸 𑐔𑐸𑐣𑐵𑐰𑐫 𑐳𑐿𑐣𑐷𑐎 𑐎𑐩𑐵𑐞𑑂𑐜𑐬𑐫𑐵 𑐥𑐺𑐲𑑂𑐛𑐨𑐸𑐨𑐶 𑐡𑐸𑐩𑑂𑐴 𑐥𑑂𑐬𑐢𑐵𑐩𑐣𑑂𑐟𑑂𑐬𑐷 𑐦𑑂𑐬𑐵𑐫𑐣𑑂𑐎 𑐧𑐿𑐣𑐵𑐣𑐶𑐩𑐵𑐬𑐵𑐩𑐵𑐫𑐵 𑐦𑐶𑐖𑐶 𑐦𑐳𑑂𑐚 𑐥𑐵𑐬𑑂𑐚𑐶𑑄 𑐟𑑂𑐫𑐵𑐎𑐹𑐐𑐸 𑐏 𑐐𑐸𑐐𑐸 𑐥𑐵𑐬𑑂𑐚𑐶𑑄 𑑒𑑐𑑑𑑔 𑐣𑐶𑐳𑐾𑑄 𑐔𑐸𑐣𑐵𑐰𑐫 𑐟𑑂𑐫𑐵𑐎𑐵 𑐰𑐿𑐔𑑀𑑄𑐐𑐸 𑐏 𑑋 𑐦𑐶𑐖𑐶 𑐦𑐳𑑂𑐚 𑐥𑐵𑐬𑑂𑐚𑐶𑑄 𑐀𑐣𑐫𑐵 𑐁𑐡𑐶𑐰𑐶𑐳𑑂𑐟𑐫 𑐧𑐵𑐴𑐸𑐮𑑂𑐫 𑐥𑐵𑐬𑑂𑐚𑐷 𑐏 𑑋

𑐦𑐶𑐖𑐶𑐫𑐵 𑐠𑑀 𑐂𑐟𑐶𑐴𑐵𑐳 𑐰 𑐰𑐵𑐳𑑂𑐟𑐰𑐶𑐎𑐟𑐵 𑐳𑑂𑐫𑐸𑐥𑐶𑑄, 𑐠𑐸𑐥𑐶𑑄 𑐣𑐾𑐥𑐵𑐮𑐷𑐟 𑐢𑐵𑐳𑐵 𑐩𑑂𑐴 𑐴𑐾 𑐖𑐎 𑐡𑐸 𑐀𑐫𑐳𑐵𑑄 𑐣𑐾𑐥𑐵𑐮𑐫 𑐦𑐶𑐖𑐶𑐎𑐬𑐞𑐫𑐵 𑐴𑐮𑑂𑐮𑐵 𑐟𑐳𑐎𑑄 𑐡𑐸 𑑋 𑐠𑐠𑐾 𑐴𑐮𑑂𑐮𑐵 𑐥𑐶𑐟𑐫 𑐫𑐵𑐫𑐾𑐐𑐸 𑐖𑑂𑐫𑐵 𑐰𑐶𑐱𑐾𑐲𑐟 𑐠𑐣𑐫𑐵 𑐩𑑄𑐜𑐮𑐾 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐳𑑄 𑐡𑐶𑐩𑐵𑐐 𑐱𑐸𑐣𑑂𑐫𑐥𑐶𑑄 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐟 𑐩𑐸𑐬𑑂𑐏 𑐫𑐵𑐫𑐾𑐟 𑐕𑐾𑐮𑐵 𑐰𑐿𑐔𑑀𑑄𑐐𑐸 𑐏𑐣𑐾𑐡𑐸 𑑋 𑐢𑐵𑐟𑑂𑐠𑐾𑑄 𑐮𑐵 𑐣𑐾𑐥𑐵𑐮𑐫 𑐦𑐶𑐖𑐶𑐎𑐬𑐞 𑐦𑐶𑐖𑐶𑐂 𑐳𑑀𑐫𑐵𑑄 𑐫𑐎𑑀 𑐣𑑂𑐴𑐾𑐰 𑐖𑐧 𑐐𑑀𑐬𑑂𑐏𑐵𑐮𑐶𑐟𑐫𑐳𑑄 𑐬𑐵𑐖𑑂𑐫 𑐰𑐶𑐳𑑂𑐟𑐵𑐬 𑐫𑐵𑐟 𑐄𑐧𑐮𑐾 𑐴𑐾 𑐱𑐸𑐬𑐸 𑐖𑐸𑐂 𑐢𑐸𑑄𑐎𑐸𑐐𑐸 𑐏 𑐢𑐵𑐫𑐾𑐩𑐵 𑑋 𑐠𑐥𑐶𑐳𑑄 𑐫𑐸𑐡𑑂𑐢𑐫 𑐟𑑂𑐫𑐵𑐎𑐾 𑐢𑐸𑑄𑐎𑐵 𑐍𑐥𑐣𑐶𑐰𑐾𑐳𑐶𑐎 𑐐𑑀𑐬𑑂𑐏𑐵𑐮𑐷 𑐱𑐵𑐴 𑐖𑐸𑐖𑐸𑐥𑐶𑑄𑐳 𑐰 𑐮𑐶𑐥𑐵 𑐬𑐵𑐞𑐵 𑐱𑐵𑐲𑐎𑐟𑐫𑐳𑑄 𑐁𑐡𑐶𑐰𑐵𑐳𑐷 𑐣𑐾𑐰𑐵, 𑐠𑐵𑐬𑐸, 𑐩𑐢𑐾𑐱𑐷 𑐰 𑐖𑐣𑐖𑐵𑐟𑐶𑐟𑐫𑐐𑐸 𑐨𑐹𑐩𑐶 𑐰 𑐠𑐵𑐫 𑐧𑐵𑐫 𑐖𑐰𑐬𑐖𑐳𑑂𑐟𑐶 𑐮𑐸𑐚𑐾 𑐫𑐵𑐣𑐵 𑐠 𑐳𑑄𑐟𑐵𑐣, 𑐡𑐬𑐳𑑄𑐟𑐵𑐣, 𑐣𑑀𑐎𑐬, 𑐔𑐵𑐎𑐬 𑐰 𑐟𑐵𑐰𑐾𑐡𑐵𑐬𑐟𑐫𑐟 𑐂𑐣𑐾𑐐𑐸 𑐖𑑂𑐫𑐵 𑐀𑐩𑐶𑐳𑑄 𑐫𑐵𑐟 𑑋 𑐬𑐿𑐠𑐵𑐣𑐾 𑐁𑐡𑐶𑐰𑐵𑐳𑐶 𑐣𑐾𑐰𑐵, 𑐠𑐵𑐬𑐸, 𑐩𑐢𑐾𑐱𑐷 𑐰 𑐖𑐣𑐖𑐵𑐟𑐶𑐟𑐫𑐟 𑐀𑐩𑐶𑐐𑐸 𑐴𑐾 𑐠𑐵𑐳𑐫 𑐀𑐮𑑂𑐥𑐩𑐟𑐫 𑐮𑐵𑐎𑐵 𑐫𑑄𑐎𑐾𑐐𑐸 𑐣𑐶𑐫𑑀𑐖𑐶𑐟 𑐖𑑂𑐫𑐵 𑐐𑐸𑐐𑐸 𑐣𑐾𑐥𑐵𑐫𑐵 𑐱𑐵𑐲𑐎𑐟𑐫𑐳𑑄 𑐫𑐵𑐟 𑐰𑐿𑐟 𑐣𑐾𑐥𑐵𑐮𑐫 𑐖𑐹𑐐𑐸 𑐦𑐶𑐖𑐶𑐎𑐬𑐞 𑐢𑐵𑐫𑐾𑐩𑐵 𑑋 𑐟𑐬𑐵𑐃𑐫𑐵 𑐠𑐵𑐬𑐹𑐟𑐫 𑐦𑐸𑐎𑑄 𑐠𑐾𑑄 𑐨𑐸𑐩𑐷 𑐁𑐥𑑂𑐬𑐰𑐵𑐳𑐷𑐟𑐳𑑄 𑐴𑐜𑐥𑐾 𑐫𑐵𑐣𑐵 𑐎𑐵𑐐𑐸 𑐀𑐮𑐾 𑐳𑑀𑐣𑐶𑐐𑐮𑐫 𑐰𑐫𑐵 𑐁𑐡𑐶𑐰𑐵𑐳𑐶 𑐣𑐾𑐰𑐵𑐟𑐫𑐐𑐸 𑐨𑐸𑐩𑐷 𑐮𑐸𑐚𑐾 𑐫𑐵𑐣𑐵 𑐎𑐵𑐫𑐾𑐐𑐸 𑐰 𑐧𑐴𑐸𑐳𑑄𑐏𑑂𑐫𑐵𑐫 𑐁𑐥𑑂𑐬𑐰𑐵𑐳𑐷𑐟 𑐳𑑀𑐣𑐶𑐐𑐮𑐫 𑐡𑐸𑐟𑐶𑐣𑐵 𑐣𑐾𑐰𑐵𑐟𑐫𑐟 𑐀𑐮𑑂𑐥𑐩𑐟𑐫 𑐮𑐵𑐎𑐵 𑐫𑑄𑐎𑐸𑐐𑐸 𑐖𑑂𑐫𑐵𑐫𑐵𑐟 𑐴𑐾 𑐰𑐵𑐳𑑂𑐟𑐰𑐫 𑐣𑐾𑐥𑐵𑐫𑐵 𑐳𑐣𑑂𑐡𑐬𑑂𑐨𑐫 𑐐𑑂𑐫𑐵𑐣𑐵𑐥𑐹𑐐𑐸 𑐦𑐶𑐖𑐶𑐎𑐬𑐞 𑐢𑐵𑐫𑐾𑐩𑐵 𑑋

𑐴𑐶𑐣𑑂𑐡𑐶 𑐨𑐵𑐳𑐵𑐫𑐵 𑐏𑑄𑐫 :

𑐠𑐟 𑐣𑐰𑐵𑐫𑐟 𑐳𑐴𑐖 𑐖𑐸𑐂𑐐𑐸 𑐨𑐵𑐲𑐵 𑐳𑑂𑐰𑐾𑐔𑑂𑐕𑐵𑑄 𑐣𑐰𑐵𑐫𑐾𑐐𑐸 𑐰 𑐔𑑀𑐫𑐾𑐐𑐸 𑐀𑐢𑐶𑐎𑐵𑐬 𑐳𑐎𑐳𑐶𑐟𑑄 𑐡𑐫𑐾𑐩𑐵 𑑋 𑐳𑐸𑐣𑐵𑑄 𑐕𑐸 𑐨𑐵𑐲𑐵𑐫 𑐣𑐰𑐵𑐫𑐾𑐐𑐸 𑐐𑐸𑐐𑐸 𑐨𑐵𑐲𑐵𑐫 𑐔𑑀𑐫𑐾𑐐𑐸 𑐢𑐫𑐵𑐐𑐸 𑐏𑑄 𑐳𑐸𑑄 𑐣𑑄 𑐩𑐣𑐹𑐫𑐵 𑐠𑐐𑐸 𑐳𑑂𑐰𑐾𑐔𑑂𑐕𑐵𑑄 𑐣𑐶𑐬𑑂𑐢𑐵𑐬𑐞 𑐫𑐵𑐂𑐐𑐸 𑐏𑑄 𑐏 𑑋 𑐐𑐥 𑐟𑐶𑐫𑐵 𑐕𑑄 𑐠𑑀 𑐴𑐾 𑐖𑐎 𑐨𑐵𑐲𑐵 𑐖𑐎 𑐣𑐰𑐵𑐫 𑐡𑐂, 𑐕𑑄 𑐠𑑀 𑐴𑐾 𑐖𑐎 𑐨𑐵𑐲𑐵𑐫 𑐖𑐎 𑐔𑑀𑐫 𑐡𑐂 𑐢𑐎𑐵 𑐬𑐵𑐖𑑂𑐫 𑐱𑐎𑑂𑐟𑐶 𑐕𑐾𑐮𑐵 𑐣𑐾𑐥𑐵𑐫𑐵 𑐬𑐵𑐖𑑂𑐫𑐳𑐟𑑂𑐟𑐵𑐫 𑐩𑐣𑐥𑐬𑐶 𑐫𑐵𑐣𑐵𑐔𑑀𑑄𑐥𑐶𑑄 𑐁𑐬𑑂𑐫(𑐏𑐳 𑐀𑐴𑑄𑐎𑐵𑐬𑐷𑐟𑐫𑐳𑑄 𑐫𑐵𑐣𑐵𑐔𑑀𑑄𑐐𑐸 𑐧𑐮𑐖𑐦𑑂𑐟𑐶 𑐟𑐳𑐎𑑄 𑐣𑐶𑐣𑑂𑐡𑐣𑐷𑐫 𑐏 𑑋

𑐕𑑂𑐩𑑂𑐴 𑐣𑐾𑐰𑐵 𑐖𑐸𑐫𑐵 𑐠𑐐𑐸 𑐩𑐵𑑄 𑐨𑐵𑐫 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐬𑐵𑐖𑑂𑐫𑑄 𑐐𑐸𑐎𑐠𑑄 𑐡𑐩𑐣 𑐫𑐵𑐣𑐵𑐔𑑀𑐣 𑐢𑐵𑐫𑐵𑐐𑐸 𑐣𑐾𑐰𑐵𑐟𑐫𑐳𑑄 𑐠𑐸𑐂𑐎𑐵 𑐣𑑂𑐴𑐾𑐖𑑂𑐫𑐵𑐫𑐾 𑐦𑐫𑐾𑐩𑐵𑐐𑐸 𑐡𑐸 𑑋 𑐡𑐾 𑐡𑐸𑐣𑐾𑐫𑐵 𑐦𑐸𑐎𑑂𑐎 𑐨𑐵𑐲𑐵𑐫𑐵𑐟 𑐳𑐎𑐨𑐣𑑄 𑐕𑐾𑐮𑐾𑐐𑐸 𑐧𑐬𑐵𑐧𑐬𑐫𑐵 𑐀𑐢𑐶𑐎𑐵𑐬 𑐠𑐷 𑐠𑐷 𑐩𑐵𑑄𑐨𑐵𑐫 𑐮𑑂𑐴𑐵𑐂𑐥𑐶𑑄 𑐳𑐎𑐮 𑐣𑐾𑐥𑐵𑐩𑐶𑐫𑐵𑐟 𑐡𑐫𑐾𑐩𑐵 𑐢𑐫𑐵𑐐𑐸 𑐏𑑄 𑐗𑐷𑐳𑑄 𑐠𑐸𑐂𑐎𑐾𑐩𑐵 𑑋 𑐣𑐾𑐥𑐵𑐮𑐫 𑐖𑐎 𑐱𑐵𑐲𑐎 𑐖𑐵𑐟𑐶 𑐏𑐳(𑐁𑐬𑑂𑐫 𑐣𑐵𑐥𑑄 𑐳𑑂𑐰𑐵𑐣𑐵𑐔𑑀𑑄𑐐𑐸 𑐨𑐵𑐲𑐵, 𑐖𑐵𑐟𑐶, 𑐢𑐬𑑂𑐩, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐴𑐾 𑐖𑐎 𑐣𑐾𑐥𑐵𑐮𑐷 𑐢𑐵𑐫𑐾𑐐𑐸 𑐟𑐬 𑐣𑐾𑐥𑐵 𑐡𑐾𑐫 𑐡𑐸𑐣𑐾𑐫𑐵 𑐩𑐾𑐩𑐾𑐐𑐸 𑐖𑐵𑐟𑐶 𑐖𑐣𑐖𑐵𑐟𑐶 𑐩𑐢𑐾𑐱𑐷𑐟𑐫 𑐨𑐵𑐲𑐵, 𑐖𑐵𑐟𑐶, 𑐢𑐬𑑂𑐩, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐀𑐣𑐾𑐥𑐵𑐮𑐷 𑐫𑐵𑐫𑐾𑐐𑐸 𑐟𑐳𑐎𑑄 𑐐𑐿𑐬𑐖𑐶𑐩𑑂𑐩𑐾𑐡𑐵𑐬𑐷 𑐖𑑂𑐫𑐵 𑐳𑐬𑐎𑐵𑐬𑑄 𑐫𑐵𑐣𑐵𑐔𑑀𑑄𑐐𑐸 𑐡𑐸 𑑋 𑐩𑐾𑐐𑐸 𑐕𑐸𑑄 𑐣𑑄 𑐧𑐴𑐸𑐨𑐵𑐲𑐷, 𑐧𑐴𑐸𑐖𑐵𑐟𑐶, 𑐧𑐴𑐸𑐢𑐵𑐬𑑂𑐩𑐶𑐎 𑐡𑐾𑐱𑐫 𑐠𑐸𑐖𑑀𑐐𑐸 𑐖𑑂𑐫𑐵 𑐐𑐣𑑄 𑐖𑐸𑐫𑐵𑐔𑑀𑑄𑐐𑐸 𑐗𑐷𑐳𑑄 𑐩𑐏𑑄 𑑋

𑐣𑐾𑐥𑐵 𑐡𑐸𑐣𑐾 𑐣𑐰𑐵𑐂𑐐𑐸 𑐦𑐸𑐎𑑂𑐎 𑐨𑐵𑐲𑐵𑐟 𑐣𑐾𑐥𑐵𑐮𑐷 𑐴𑐾 𑐏 𑑋 𑐟𑐵𑐩𑐵𑑄𑐐𑑄 𑐣𑐰𑐵𑐂𑐐𑐸 𑐟𑐵𑐩𑐵𑑄𑐐 𑐨𑐵𑐫 𑐰 𑐣𑐾𑐰𑐵𑐟𑐫𑐳𑑄 𑐣𑐰𑐵𑐂𑐐𑐸 𑐣𑐾𑐥𑐵𑐮𑐨𑐵𑐲𑐵 𑐀𑐠𑐾𑐴𑐾 𑐣𑐾𑐥𑐵𑐫𑐵 𑐩𑐾𑐩𑐾𑐐𑐸 𑐨𑐵𑐲𑐵 𑐣𑑄 𑐣𑐾𑐥𑐵 𑐡𑐸𑐣𑐾 𑐣𑐰𑐵𑐂𑐐𑐸 𑐨𑐵𑐲𑐵 𑐖𑐹𑐐𑐸𑐮𑐶𑑄 𑐣𑐾𑐥𑐵𑐮𑐷 𑐨𑐵𑐲𑐵 𑐴𑐾 𑐏 𑐢𑐫𑐵𑐐𑐸 𑐏𑑄 𑐗𑐷𑐳𑑄 𑐠𑐸𑐂𑐎𑐾𑐩𑐵 𑑋 𑐏𑐫 𑐨𑐵𑐫 𑐕𑐐𑐹 𑐖𑐎 𑐣𑐾𑐥𑐵𑐮𑐷 𑐩𑐾𑐩𑐾𑐐𑐸 𑐦𑐸𑐎𑑂𑐎 𑐨𑐵𑐲𑐵𑐟 𑐀𑐣𑐾𑐥𑐵𑐮𑐷 𑐨𑐵𑐲𑐵 𑐢𑐵𑐫𑐾𑐐𑐸 𑐐𑐮𑐟 𑐏𑑄 𑐣𑐾𑐥𑐵𑐩𑐶𑐟𑐫𑐳𑑄 𑐠𑐐𑐸 𑐡𑐶𑐩𑐵𑐐𑑄 𑐮𑐶𑐎𑐵𑐣𑐵 𑐕𑑀𑐫𑐾 𑐩𑐵𑐐𑐸 𑐡𑐸 𑑋 𑐣𑐾𑐥𑐵 𑐡𑐸𑐣𑐾𑐫𑐵 𑐦𑐸𑐎𑑂𑐎 𑐖𑐵𑐟 𑐖𑐵𑐟𑐶, 𑐨𑐵𑐲𑐵 𑐨𑐵𑐲𑐷 𑐴𑐶𑐩𑐵𑐮, 𑐥𑐴𑐵𑐜, 𑐟𑐬𑐵𑐃 𑐁𑐡𑐶 𑐦𑐸𑐎𑑂𑐎 𑐐𑐠𑐾 𑐣𑐾𑐥𑐵𑐮𑐷 𑐏 𑐀𑐠𑐾𑐴𑐾 𑐨𑐵𑐲𑐵𑐫𑐵 𑐴𑐎𑐫 𑐣𑑄 𑐕𑐐𑐹 𑐏𑐫 𑐨𑐵𑐫𑐫𑐵𑐟 𑐖𑐎 𑐣𑐾𑐥𑐵𑐮𑐷 𑐡𑐬𑑂𑐖𑐵 𑐧𑐷𑐐𑐸 𑐢𑐫𑐵𑐐𑐸 𑐧𑐶𑐮𑐎𑐸𑐮 𑐐𑐮𑐟 𑐖𑑂𑐫𑐵 𑐏 𑑋

𑐨𑐵𑐬𑐟𑐫𑐵 𑐴𑐾 𑐡𑐳𑐶 𑐎𑐵𑐫𑐾 ( 𑐀𑐣 𑐴𑐶𑐣𑑂𑐡𑐷 𑐰𑐵 𑐩𑐾𑐐𑐸 𑐕𑐸𑑄 𑐣𑑄 𑐕𑐐𑐹 𑐨𑐵𑐲𑐵𑐫𑐵𑐟 𑐖𑐎 𑐨𑐵𑐬𑐟𑐷 𑐨𑐵𑐲𑐵 𑐰𑐵 𑐴𑐶𑐣𑑂𑐡𑐸𑐳𑑂𑐟𑐵𑐣𑐷 𑐨𑐵𑐲𑐵 𑐰𑐵 𑐂𑐣𑑂𑐜𑐶𑐫𑐣 𑐨𑐵𑐲𑐵 𑐢𑐵𑐂𑐐𑐸 𑐩𑐏𑐸 𑑋 𑐨𑐵𑐬𑐟 𑐡𑐸𑐣𑐾𑐫𑐵 𑐦𑐸𑐎𑑂𑐎 𑐴𑐾 𑐨𑐵𑐲𑐵𑐟 𑐨𑐵𑐬𑐟𑐷𑐫 𑐨𑐵𑐲𑐵 𑐰𑐵 𑐴𑐶𑐣𑑂𑐡𑐸𑐳𑑂𑐟𑐵𑐣𑐷 𑐨𑐵𑐲𑐵 𑐎𑐠𑑄 𑐩𑐵𑐣𑐫𑐾 𑐫𑐵𑐣𑐵 𑐟𑐐𑐸 𑐡𑐸 𑑋 𑐨𑐵𑐬𑐟 𑐡𑐸𑐣𑐾𑐫𑐵 𑐨𑐵𑐲𑐵, 𑐖𑐵𑐟𑐶, 𑐢𑐬𑑂𑐩, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐦𑐸𑐎𑑂𑐎𑑄𑐫𑐵𑐟 𑐨𑐵𑐬𑐟𑐷𑐫 𑐴𑐾 𑐢𑐵𑐂 𑑋

𑐴𑐶𑐣𑑂𑐡𑐶 𑐨𑐵𑐲𑐵𑐫𑐵𑐟 𑐨𑐵𑐬𑐟𑐫𑐵 𑐖𑐎 𑐨𑐵𑐲𑐵 𑐠𑑀 𑐧𑐶𑐡𑐾𑐱𑐶 𑐨𑐵𑐲𑐵 𑐢𑐵𑐫𑐾𑐐𑐸 𑐏𑑄 𑐧𑐶𑐮𑐎𑐸𑐮 𑐐𑐮𑐟 𑐏 𑑋 𑐳𑐣 𑑒𑑐𑑑𑑑 𑐫𑐵 𑐣𑐾𑐥𑐵𑐫𑐵 𑐟𑐠𑑂𑐫𑐵𑑄𑐎 𑐎𑐠𑑄 𑑗𑑗,𑑕𑑖𑑙 𑐩𑑂𑐴 𑐣𑐾𑐥𑐵𑐮𑐷𑑄 𑐴𑐶𑐣𑑂𑐡𑐷 𑐠𑐥𑐶𑐣𑐶𑐐𑐸 𑐩𑐵𑑄𑐨𑐵𑐫 𑐢𑐎𑐵 𑐔𑑀𑐎𑐹𑐐𑐸 𑐡𑐸 𑑋 𑐠𑑀 𑐣𑐾𑐥𑐵𑐫𑐵 𑐟𑐠𑑂𑐫𑐵𑑄𑐎𑐫𑐵𑐟 𑐴𑐾 𑐩𑐵𑐣𑐾 𑐫𑐵𑐫𑐾 𑐩𑐏𑐸 𑐢𑐵𑐫𑐾𑐐𑐸 𑐮𑐵 𑐖𑐸𑐂 𑐩𑐏𑐸 𑑋 𑐣𑐾𑐥𑐵𑐮𑐫𑐵 𑐳𑑄𑐰𑐶𑐢𑐵𑐣𑐫𑐵 𑐢𑐵𑐬𑐵 𑑖 𑐳 𑐹𑐣𑐾𑐥𑐵𑐮𑐩𑐵 𑐧𑑀𑐮𑐶𑐣𑐾 𑐳𑐧𑐿 𑐩𑐵𑐟𑐺𑐨𑐵𑐲𑐵𑐴𑐬𑐹 𑐬𑐵𑐲𑑂𑐚𑑂𑐬 𑐨𑐵𑐲𑐵 𑐴𑐸𑐣𑑂 𑑋𑐹 𑐢𑐫𑐵𑐟𑐐𑐸 𑐡𑐸 𑑋 𑐠𑑀 𑐮𑑂𑐫𑐵𑐏𑑄 𑐴𑐶𑐣𑑂𑐡𑐶 𑐣𑐾𑐥𑐵𑐮𑐫 𑐡𑐸𑐣𑐾 𑐮𑑂𑐴𑐵𑐂𑐐𑐸 𑐕𑐐𑐹 𑐩𑐵𑑄𑐨𑐵𑐫 𑐖𑐸𑐐𑐸𑐮𑐶𑑄 𑐣𑐾𑐥𑐵𑐫𑐵 𑐩𑐾𑐩𑐾𑐐𑐸 𑐨𑐵𑐲𑐵𑐫𑐵 𑐟𑐶 𑐴𑐾 𑐳𑐣𑑂𑐩𑐵𑐣 𑐠𑑀 𑐨𑐵𑐲𑐵𑐫𑐵𑐟 𑐡𑐫𑐾𑐩𑐵 𑑋 𑐡𑐾𑐱𑐫 𑐡𑐸𑐣𑐾𑐫𑐵 𑐦𑐸𑐎 𑐨𑐵𑐲𑐵𑐫𑐵𑐟 𑐳𑐩𑐵𑐣 𑐀𑐢𑐶𑐎𑐵𑐬 𑐡𑐫𑐾𑐩𑐵 𑐢𑐫𑐵𑐐𑐸 𑐥𑐎𑑂𑐲𑐫𑐵 𑐳𑐸𑑄 𑐣𑑄 𑐩𑐣𑐸𑐏𑑄 𑐴𑐶𑐣𑑂𑐡𑐶 𑐨𑐵𑐫 𑐮𑑂𑐴𑐵𑐫𑐾 𑐢𑐵𑐂𑐥𑐶𑑄𑐟 𑐕𑐶𑐩𑐶𑐐𑐸 𑐀𑐢𑐶𑐎𑐵𑐬 𑐩𑐡𑐸 𑐢𑐵𑐫𑐾𑐐𑐸 𑐖𑐸𑐂 𑐩𑐏𑐸 𑑋 𑐦𑐸𑐎 𑐨𑐵𑐫𑐫𑐵𑐟 𑐳𑐩𑐵𑐣 𑐧𑑂𑐫𑐰𑐴𑐵𑐬 𑐖𑐸𑐂𑐩𑐵 𑐢𑐫𑐵𑐐𑐸 𑐳𑐩𑐵𑐣𑑂𑐫 𑐟𑐬𑑂𑐎 𑐎𑐠𑑄 𑐣𑑄 𑐴𑐶𑐣𑑂𑐡𑐶 𑐨𑐵𑐫 𑐮𑑂𑐴𑐵𑐫𑐾 𑐢𑐵𑐂𑐥𑐶𑑄𑐟 𑐂𑐩𑐶𑐐𑐸 𑐀𑐢𑐶𑐎𑐵𑐬 𑐡𑐫𑐾 𑐴𑐾 𑐩𑐵 𑑋

𑐳𑐬𑐶𑐟𑐵 𑐐𑐶𑐬𑐶 𑐮𑐐𑐵𑐟𑐫𑐟 𑐩𑐢𑐾𑐱𑐷 𑐳𑐵𑑄𑐳𑐡𑐟𑐫𑐳𑑄 𑐳𑑄𑐳𑐡𑐫 𑐴𑐶𑐣𑑂𑐡𑐷 𑐨𑐵𑐲𑐵 𑐕𑐾𑐮 𑐢𑐫𑐵𑐐𑐸 𑐏𑑄𑐫 𑐧𑐶𑐬𑑀𑐢 𑐫𑐵𑐂𑐥𑐶𑐣𑐶𑐐𑐸 𑐗𑑀𑐮𑐫 𑐏𑐫 𑐧𑑂𑐬𑐩𑑂𑐴𑐸𑐟 𑐖𑐎 𑐩𑐏𑐸 𑐐𑐸𑐮𑐶𑑄 𑐣𑐾𑐰𑐵 𑐰 𑐖𑐣𑐖𑐵𑐟𑐶𑐫𑐵 𑐩𑐣𑐸𑐟 𑐣𑑄 𑐡𑐫𑐵𑐔𑑀𑑄𑐐𑐸 𑐢𑐵𑐳𑐵 𑐀𑐖𑐸 𑐔𑐵𑐫𑐾𑐩𑐵𑐐𑐸 𑐏𑑄 𑐏 𑑋 𑐗𑐷𑐠𑐵𑐫 𑐟𑐬𑐵𑐃𑐫𑐵 𑐣𑐾𑐥𑐵𑐮𑐷𑐟𑐫𑐳𑑄 𑐠𑐷𑐠𑐷 𑐩𑐵𑐟𑐺𑐨𑐵𑐲𑐵 𑐮𑑂𑐴𑐵𑐫𑐾𑐐𑐸 𑐫𑐵 𑑋 𑐟𑐬 𑐀𑐩𑐶𑐳𑑄 𑐴𑐶𑐣𑑂𑐡𑐷𑐫𑐵𑐟 𑐠𑐷𑐠𑐷 𑐨𑐵𑐲𑐵 𑐮𑑂𑐴𑐵𑐂𑐥𑐶𑐣𑐶𑐐𑐸 𑐡𑐠𑐸𑐂 𑐳𑐴𑐖 𑐩𑐵𑐢𑑂𑐫𑐩 𑐨𑐵𑐲𑐵 𑐎𑐠𑑄 𑐕𑐾𑐮𑐵 𑐰𑐫𑐵𑐔𑑀𑑄𑐐𑐸 𑐢𑐵𑐳𑐵 𑐕𑐐𑐹 𑐫𑐠𑐵𑐬𑑂𑐠 𑐏 𑑋 𑐳𑑄𑐳𑐡𑐫 𑐳𑐬𑐶𑐟𑐵 𑐐𑐶𑐬𑐶 𑐰𑐵 𑐩𑐾𑐥𑐶𑐳𑑄 𑐠𑐥𑐶𑑄𑐟 𑐳𑐴𑐖𑐐𑐸 𑐴𑐶𑐣𑑂𑐡𑐶 𑐨𑐵𑐳𑐵 𑐕𑐾𑐮𑐾𑐐𑐸 𑐀𑐩𑐶𑐐𑐸 𑐣𑐿𑐳𑐬𑑂𑐐𑐶𑐎 𑐀𑐢𑐶𑐎𑐵𑐬𑐫𑐵 𑐏𑑄 𑐏 𑑋 𑐣𑐾𑐰𑐵 𑐳𑐵𑑄𑐳𑐡 𑐰𑐵 𑐩𑐾𑐩𑐾𑐐𑐸 𑐖𑐣𑐖𑐵𑐟𑐷 𑐳𑐵𑑄𑐳𑐡𑐟𑐫𑐳𑑄 𑐣𑑄 𑐠𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵 𑐳𑑄𑐳𑐡𑐫 𑐕𑐾𑐮𑐾𑐐𑐸 𑐖𑑂𑐫𑐵 𑐩𑐫𑐵𑐐𑐸 𑐢𑐵𑐳𑐵 𑐟𑐳𑐎𑑄 𑐡𑐸𑑅𑐏𑐫𑐵 𑐏𑑄 𑐏 𑑋 𑐠𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵 𑐕𑐾𑐮𑐾𑐐𑐸 𑐁𑑄𑐚 𑐟𑐎𑑄 𑐫𑐵𑐫𑐾 𑐩𑐦𑐸𑐥𑐶𑑄 𑐐𑑄𑐐𑐵 𑐔𑑁𑐢𑐬𑐷 𑐠𑐖𑑂𑐫𑐵𑐥𑐶𑑄 𑐳𑐵𑑄𑐳𑐡𑐟𑐫𑐳𑑄 𑐴𑐶𑐣𑑂𑐡𑐶 𑐨𑐵𑐲𑐵 𑐕𑐾𑐮𑐾𑐐𑐸 𑐳𑐵𑐴𑐳 𑐫𑐵𑐂𑐥𑐶𑑄 𑐳𑐬𑐶𑐟𑐵 𑐐𑐶𑐬𑐶 𑐠𑐖𑑂𑐫𑐵𑐥𑐶𑑄 𑐳𑐵𑑄𑐳𑐡𑐫𑐐𑐸 𑐥𑑂𑐬𑐳𑑄𑐳𑐵 𑐫𑐵𑐫𑐾𑐐𑐸 𑐥𑐮𑑂𑐳𑐵 𑐏𑐫 𑐧𑑂𑐬𑐩𑑂𑐴𑐸𑐟𑐫 𑐮𑑂𑐫𑐸 𑐮𑑂𑐫𑐸 𑐰𑐣𑐵 𑐧𑐶𑐬𑑀𑐢 𑐫𑐵𑐣𑐵 𑐖𑐸𑐂𑐐𑐸 𑐢𑐫𑐵𑐐𑐸 𑐏𑐫 𑐧𑑂𑐬𑐩𑑂𑐴𑐸𑐟𑐫 𑐥𑑂𑐬𑐟𑐶 𑐧𑐦𑐵𑐡𑐵𑐬𑐶𑐟𑐵 𑐧𑑀𑐫𑐾𑐐𑐸 𑐖𑑂𑐫𑐵 𑐖𑐎 𑐏 𑑋

𑐨𑐵𑐬𑐟𑐫 𑐣𑑄 𑐮𑑂𑐴𑐵𑐂𑐐𑐸 𑐨𑐵𑐫 𑐖𑐹𑐐𑐸𑐮𑐶𑑄 𑐴𑐶𑐣𑑂𑐡𑐶 𑐨𑐵𑐫𑐫𑐵𑐟 𑐣𑐾𑐥𑐵𑐮𑐫 𑐠𑐵𑐫 𑐧𑐷 𑐩𑐖𑑂𑐫𑐸 𑐢𑐵𑐫𑐾𑐐𑐸 𑐟𑐬𑑂𑐎 𑐫𑐵𑐂𑐥𑐶𑑄 𑐣𑑄 𑐁𑐥𑐵𑐮𑑄 𑐡𑐸 𑑋 𑐀𑐠𑐾 𑐢𑐵𑐫𑐾𑐐𑐸 𑐏𑐳𑐵 𑐏𑐫 𑐨𑐵𑐫 𑐣𑑄 𑐣𑐾𑐥𑐵𑐮𑐷 𑐣𑐵𑐒 𑐧𑐶𑐫𑐵 𑐴𑐶𑐣𑑂𑐡𑐶 𑐳𑐬𑐴 𑐩𑐵𑐣𑑂𑐫𑐟𑐵 𑐧𑐶𑐫𑐵𑐟𑐐𑐸 𑐨𑐵𑐬𑐟𑐫𑐵 𑐕𑐐𑐹 𑐬𑐵𑐲𑑂𑐚𑑂𑐬𑐶𑐫 𑐨𑐵𑐲𑐵 𑐏 𑑋 𑐠𑑀 𑐣𑐾𑐥𑐵𑐮𑐷 𑐴𑐾 𑐢𑐫𑐵 𑐀𑐣𑐫𑐵 𑐳𑑄𑐰𑐶𑐢𑐵𑐣𑐫 𑐀𑐣𑐸𑐳𑐹𑐔𑐶 𑐴𑐾 𑐡𑐸𑐠𑑂𑐫𑐵𑐎𑐵 𑐟𑐐𑐸 𑐨𑐵𑐫 𑐏 𑑋 𑐢𑐵𑐟𑑂𑐠𑐾𑐮𑐵 𑐣𑐾𑐥𑐵𑐮𑐷 𑐣𑐵𑑄 𑐕𑐸𑐣𑐵 𑐗𑐷𑐐𑐸 𑐕𑐾𑐣𑐫 𑐎𑑀𑐔𑐶𑐣𑐵 𑐰𑐿𑐔𑑀𑑄𑐐𑐸 𑐏𑐫 𑐨𑐵𑐫 𑐣𑑄 𑐕𑐐𑐹 𑐎𑐠𑑄𑐫𑐵 𑐴𑐶𑐣𑑂𑐡𑐶 𑐨𑐵𑐲𑐵 𑐴𑐾 𑐏 𑑋 𑐔𑑀𑐫𑐾𑐐𑐸 𑐧𑑀𑐣𑐾𑐐𑐸𑐮𑐶𑐂 𑐴𑐶𑐣𑑂𑐡𑐷 𑐨𑐵𑐲𑐵𑐣𑐵𑐥𑑄 𑐟𑐳𑐎𑑄 𑐳𑐟𑐶𑐐𑐸 𑐎𑐵𑐬𑐞𑑄 𑐏𑐳 𑐨𑐵𑐲𑐵𑐫𑐵𑐟 𑐨𑐵𑐬𑐟𑐫𑐵 𑐰𑐶𑐡𑑂𑐰𑐵𑐣 𑐩𑐴𑐵𑐥𑐞𑑂𑐜𑐶𑐟 𑐬𑐵𑐴𑐸𑐮 𑐳𑐵𑑄𑐎𑐺𑐟𑑂𑐫𑐵𑐫𑐣𑑄 𑐥𑐴𑐵𑐜𑐷–𑐴𑐶𑐣𑑂𑐡𑐷 𑐨𑐵𑐲𑐵 𑐢𑐵𑐫𑐾𑐐𑐸 𑐫𑐵𑐣𑐵𑐡𑐶𑐐𑐸 𑐏 𑑋 𑐴𑐶𑐣𑑂𑐡𑐶 𑐨𑐵𑐲𑐵𑐫𑐵 𑐧𑐶𑐬𑑀𑐢 𑐫𑐵𑐂𑐥𑐶𑐳𑑄 𑐨𑐵𑐬𑐟𑐫𑐵 𑐴𑐾 𑐕𑐐𑐹 𑐬𑐵𑐲𑑂𑐚𑑂𑐬𑐶𑐫 𑐨𑐵𑐫 𑐖𑐹𑐐𑐸𑐮𑐶𑑄 𑐣𑐾𑐥𑐵𑐮𑐷 𑐣𑐵𑑄 𑐕𑐸𑐣𑐵𑐟𑐐𑐸 𑐏𑐳 𑐨𑐵𑐲𑐵𑐫𑐵𑐟 𑐣𑐾𑐥𑐵𑐮𑐫 𑐕𑐾𑐮𑐾 𑐩𑐖𑐶𑐖 𑐢𑐎𑐵 𑐣𑑄 𑐢𑐵𑐫𑐾 𑐦𑐫𑐾𑐎𑐾 𑐩𑐵𑐐𑐸 𑐏 𑑋 𑐏𑐫 𑐨𑐵𑐫𑐵𑐫𑐵𑐟 𑐨𑐵𑐬𑐟𑐫𑐵 𑐳𑑄𑐰𑐶𑐢𑐵𑐣𑐫𑐵 𑐁𑐛𑑁𑑃 𑐀𑐣𑐸𑐳𑐹𑐔𑐷𑐂 𑐟𑐫𑐵 𑐨𑐵𑐬𑐟𑐷𑐫 𑐬𑐵𑐲𑑂𑐚𑑂𑐬𑐶𑐫 𑐨𑐵𑐲𑐵𑐫𑐵 𑐩𑐵𑐣𑑂𑐫𑐟𑐵 𑐧𑑂𑐫𑐸𑐐𑐸𑐮𑐷 𑐮𑐫𑐟𑐵𑐫𑐵 𑐖𑐸𑐂𑐥𑐶𑑄 𑐣𑐾𑐥𑐵𑐮𑐷𑐟 𑐴𑐶𑐣𑑂𑐡𑐶𑐫𑐵𑐟 𑐣𑐾𑐥𑐵𑐮𑐫 𑐩𑐵𑐣𑑂𑐫𑐟𑐵 𑐧𑐶𑐐𑐸 𑐏𑑄𑐫 𑐢𑐵𑐳𑐵 𑐑𑑀𑐬 𑐧𑐶𑐬𑑀𑐢𑐷 𑑋 𑐠𑑀 𑐐𑐖𑑂𑐫𑐵𑐐𑐸 𑐡𑑂𑐰𑐿𑐢 𑐔𑐬𑐶𑐟𑑂𑐬 𑐬𑐸 𑐰𑐵𑐳𑑂𑐟𑐰𑐫 𑐨𑐵𑐬𑐟𑐫𑐵 𑐕𑐐𑐹 𑐬𑐵𑐲𑑂𑐚𑑂𑐬𑐶𑐫 𑐨𑐵𑐲𑐵𑐫𑐵𑐟 𑐣𑐾𑐥𑐵𑐮𑐫 𑐕𑐐𑐹𑐫𑐵𑑄 𑐕𑐐𑐹 𑐖𑐎 𑐸𑐣𑐾𑐥𑐵𑐮𑐷’ 𑐨𑐵𑐲𑐵 𑐢𑐫𑐵 𑐕𑐐𑐹 𑐴𑐾 𑐖𑐎 ‘𑐳𑐬𑐎𑐵𑐬𑐷 𑐎𑐵𑐩𑐎𑐵𑐖𑐫𑐵 𑐨𑐵𑐲𑐵’ 𑐢𑐎𑐵 𑐳𑑄𑐰𑐶𑐢𑐵𑐣𑑄 𑐑𑑀𑐲𑐵𑐞𑐵 𑐫𑐵𑐣𑐵 𑐟𑐫𑐾𑐐𑐸 𑐢𑐫𑐵𑐐𑐸 𑐣𑑄 𑐣𑐾𑐥𑐵𑐮 𑐢𑐫𑐵𑐐𑐸 𑐨𑐵𑐬𑐟𑐫𑐵 𑐩𑐵𑐟𑐴𑐟𑐫𑐵 𑐕𑐐𑐹 𑐬𑐵𑐖𑑂𑐫 𑐰𑐵 𑐥𑑂𑐬𑐵𑐣𑑂𑐟 𑐳𑐬𑐴 𑐖𑐎 𑐏 𑐢𑐎𑐵 𑐳𑑂𑐰𑐷𑐎𑐵𑐬 𑐫𑐵𑐫𑐠𑐾𑑄 𑐮𑐵 𑐩𑐖𑐹𑐮𑐵 𑐢𑐎𑐵 𑐣𑑂𑐴𑐾𑐳 𑐠𑐣𑐾𑐩𑐵𑐐𑐸 𑐡𑐸 𑑋

𑐴𑐶𑐣𑑂𑐡𑐶 𑐨𑐵𑐬𑐟𑐫 𑐥𑐵𑐳𑑂𑐫𑐵𑑄 𑐮𑑂𑐴𑐵𑐂𑐐𑐸 𑐨𑐵𑐫 𑐖𑐹𑐐𑐸𑐮𑐶𑑄 𑐠𑑀𑑄 𑐠𑐣𑐫𑐵 𑐏𑐳(𑐣𑐾𑐥𑐵𑐮𑐷 𑐨𑐵𑐫𑐫𑐵𑐟 𑐮𑐸𑐣𑐵 𑐕𑑀𑐂 𑐢𑐵𑐂𑐥𑐶𑑄 𑐣𑑄 𑐄𑐮𑐶𑐴𑑄 𑐏𑐣𑐵 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐗𑐷𑐐𑐸 𑐣𑑂𑐴𑑂𑐫𑑀𑐣𑐾 𑐳𑐶𑐎𑑂𑐎𑐶𑐩 𑐄𑐡𑐵𑐴𑐬𑐞 𑐡𑐸 𑑋 𑐳𑐶𑐎𑑂𑐎𑐶𑐩 𑐮𑐵 𑑑𑑙𑑗𑑔 𑐳𑐣𑐫 𑐴𑐾 𑐨𑐵𑐬𑐟𑐫 𑐴𑐾 𑐧𑐶𑐮𑐫 𑐖𑐸𑐐𑐸 𑐡𑐾𑐱 𑐏 𑑋 𑐠𑑁𑑄 𑑔𑑖 𑐡𑑄 𑐮𑐶𑐥𑐵 𑐣𑑄 𑐀𑐣 𑐏𑐫 𑐨𑐵𑐫𑐫𑐵𑐟 𑐴𑐶𑐣𑑂𑐡𑐶𑑄 𑐠𑐷 𑐣𑑄 𑐦𑐸𑐐𑐸 𑐩𑐡𑐸 𑑋 𑐣𑐾𑐥𑐵𑐮𑐫 𑐖𑐎 𑐴𑐶𑐣𑑂𑐡𑐶𑑄 𑐣𑐾𑐥𑐵𑐮𑐷 𑐨𑐵𑐫𑐫𑐵𑐟 𑐮𑐸𑐣𑐵 𑐴𑐾 𑐕𑑀𑐂 𑐢𑐵𑐫𑐾𑐐𑐸 𑐧𑐾𑐟𑐸𑐎𑐫𑐵 𑐏𑑄 𑐏 𑑋

𑐳𑐶𑐎𑑂𑐎𑐶𑐩𑐫 𑐮𑐵 𑐀𑐣𑐫𑐵 𑐳𑐬𑐎𑐵𑐬𑑄 𑐗𑐣 𑐣𑐾𑐰𑐵 𑐨𑐵𑐫 𑐮𑐐𑐵𑐫𑐟 𑐀𑐣 𑐡𑐸𑐐𑐸 𑐣𑐾𑐥𑐵𑐫𑐵 𑐠𑐷𑐠𑐷 𑐨𑐵𑐲𑐵 𑐐𑐸𑐬𑐸𑑄𑐐, 𑐩𑐐𑐬, 𑐟𑐵𑐩𑐵𑐐, 𑐬𑐵𑐂, 𑐮𑐶𑐩𑑂𑐧𑐸 𑐦𑐸𑐎𑐫𑐵𑐟 𑐠𑐾𑑄𑐎 𑐣𑑄 𑐳𑐩𑐵𑐣 𑐀𑐢𑐶𑐎𑐵𑐬 𑐧𑐶𑐫𑐵𑐟𑐐𑐸 𑐡𑐸 𑑋 𑐖𑐧𑐎𑐶 𑐣𑐾𑐥𑐵𑐮𑐫 𑐣 𑐣𑐾𑐰𑐵 𑐨𑐵𑐫 𑐣 𑐩𑐿𑐠𑐶𑐮𑐶 𑐨𑐵𑐫 𑐣 𑐨𑑀𑐖𑐥𑐸𑐬𑐷 𑐣 𑐠𑐵𑐬𑐸 𑐣 𑐐𑐸𑐬𑐸𑑄𑐐, 𑐩𑐐𑐬, 𑐟𑐵𑐩𑐵𑐐, 𑐱𑐾𑐬𑑂𑐥𑐵, 𑐬𑐵𑐂, 𑐮𑐶𑐩𑑂𑐧𑐸 𑐁𑐡𑐶 𑐕𑐸𑑄 𑐣𑑄 𑐨𑐵𑐫𑐫𑐵𑐟 𑐳𑐬𑐎𑐵𑐬𑐷 𑐩𑐵𑐣𑑂𑐫𑐟𑐵 𑐧𑑂𑐫𑐸𑐐𑐸 𑐩𑐡𑐸𑐣𑐷 𑑋 𑐴𑐶𑐣𑑂𑐡𑐶𑐫𑐵 𑐏𑑄 𑐰𑐮𑐎𑐶𑑄 𑐢𑐵𑐳𑐵 𑐧𑐬𑐸 𑐕𑐶𑐩𑐶𑐳𑑄 𑐩𑐿𑐠𑐶𑐮𑐶, 𑐨𑑀𑐖𑐥𑐸𑐬𑐶, 𑐀𑐰𑐢𑐶, 𑐣𑐾𑐰𑐵 𑐨𑐵𑐫 𑐣𑐰𑐵𑐳𑐵𑑄 𑐖𑑂𑐫𑐸 𑐣𑐶 𑐢𑐎𑐵 𑐨𑐶𑑄𑐳𑐎𑐵 𑐏𑑄 𑐮𑑂𑐴𑐵𑐫𑐾𑐐𑐸 𑐫𑐵𑐣𑐵𑐔𑑀𑑄𑐐𑐸 𑐡𑐸 𑑋 𑐠𑑀 𑐳𑐟𑑂𑐟𑐵𑐢𑐵𑐬𑐶 𑐏𑐫 𑐧𑑂𑐬𑐩𑑂𑐴𑐸𑐟𑐫 𑐗𑑄𑐐 𑐏𑑄 𑐖𑐎 𑐏 𑑋 𑐨𑐵𑐬𑐟𑐫 𑐐𑐠𑐾 𑐳𑑄𑐰𑐶𑐢𑐵𑐣𑐫 𑐀𑐣𑐸𑐳𑐸𑐔𑐷 𑐡𑐫𑐾𑐎𑐵 𑐡𑐾𑐱𑐫 𑐡𑐸𑐣𑐾 𑐡𑐸𑐐𑐸 𑐠𑑀 𑐠𑑀 𑐨𑐵𑐲𑐵 𑐢𑐎𑐵 𑐎𑐶𑐚𑐵𑐣 𑐫𑐵𑐣𑐵 𑐀𑐢𑐶𑐎𑐵𑐬 𑐧𑐶𑐫𑐵𑐟𑐮 𑐀𑐠𑐾 𑐴𑐾 𑐠𑐣 𑐣𑑄 𑐫𑐵𑐟 𑐢𑐵𑐳𑐵 𑐀𑐖𑑂𑐫𑐵𑐐𑐸 𑐏𑑄𑐫𑐵 𑐩𑐹 𑐡𑐂 𑐣𑐟𑑂𑐬 𑐩𑐏𑐸 𑑋 𑐳𑑄𑐰𑐶𑐢𑐵𑐣𑐫 𑐀𑐣𑐸𑐳𑐸𑐔𑐷 𑐡𑐫𑐾𑐎𑐵 𑐣𑐾𑐥𑐵𑐫𑐵 𑐨𑐵𑐲𑐵𑐟𑐫𑐟 𑐏𑐫 𑐨𑐵𑐫𑐟𑐶 𑐀𑐢𑐶𑐎𑐵𑐬 𑐧𑐷𑐟 𑐢𑐵𑐳𑐵 𑐠𑐣𑐫𑐵 𑐳𑐬𑐎𑐵𑐬 𑐟𑐫𑐵𑐬 𑐖𑐸𑐫𑐵𑐔𑑀𑑄𑐐𑐸 𑐩𑐡𑐸 𑑋 𑐣𑐾𑐥𑐵𑐫𑐵 𑐩𑐢𑐾𑐱𑐷 𑐰 𑐖𑐣𑐖𑐵𑐟𑐶𑐟𑐫𑐳𑑄 𑐳𑑄𑐰𑐶𑐢𑐵𑐣 𑐳𑑄𑐱𑑀𑐢𑐣 𑐫𑐵𑐫𑐾 𑐩𑐵𑐮 𑐢𑐎𑐵 𑐴𑐵𑐮𑐵𑐖𑐹𑐐𑐸 𑐫𑐵𑐟 𑐳𑐬𑐎𑐵𑐬𑑄 𑐁𑐟𑐮𑐾𑑄 𑐟𑐵𑐫𑐵𑐕𑐸 𑐟𑐎𑑄 𑐫𑐵𑐣𑐵𑐔𑑀𑑄𑐐𑐸 𑐩𑐡𑐸 𑑋 𑐬𑐵𑐖𑑂𑐫𑑄 𑐫𑐵𑐣𑐵𑐔𑑀𑑄𑐐𑐸 𑐠𑐖𑑂𑐫𑐵𑐐𑐸 𑐧𑐾𑐂𑐩𑐵𑐣𑐷 𑐖𑑂𑐫𑐵𑐏𑑄𑐫𑐵 𑐧𑐵𑐬𑐾 𑐢𑐵𑐳𑐵 𑐴𑐶𑐣𑑂𑐡𑐶 𑐧𑐶𑐬𑑀𑐢𑐷𑐟𑐫 𑐢𑑂𑐫𑐵𑐣 𑐰𑑄𑐐𑐸 𑐏𑐣 𑐩𑐡𑐸 𑑋

𑐨𑐵𑐲𑐵𑐫𑐵 𑐏𑑄 𑐰𑐂𑐧𑐮𑐾 𑐠𑐣 𑐕𑐠𑐶 𑐩𑐣𑐹𑐟𑐫𑐳𑑄 𑐟𑐳𑐎𑑄 𑐨𑑂𑐬𑐩𑐥𑐹𑐬𑑂𑐞 𑐝𑑄𑐐𑑄 𑐦𑐸𑐎 𑐨𑐵𑐲𑐵𑐫𑐵 𑐳𑐩𑐵𑐣 𑐧𑐶𑐎𑐵𑐳 𑐖𑐸𑐂𑐩𑐵 𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐩𑐵 𑐢𑐎𑐵 𑐐𑑀𑐮𑐩𑐚𑑀𑐮 𑐏𑑄 𑐮𑑂𑐴𑐵𑐫𑐾𑐐𑐸 𑐫𑐵𑐂𑐥𑐶𑑄 𑐡𑐸 𑑋 𑐠𑐸𑐏𑐾 𑐣𑑄 𑐗𑐷 𑐳𑐔𑐾𑐟 𑐖𑐸𑐂𑐩𑐵 𑑋 𑐠𑐣 𑐳𑐰𑐵𑐮 𑐨𑐵𑐲𑐵𑐫𑐵 𑐧𑐶𑐎𑐵𑐳 𑐰𑐵 𑐳𑑄𑐬𑐎𑑂𑐲𑐞𑐫𑐵 𑐏𑑄 𑐩𑐏𑐸 𑐰𑐬𑐸 𑐗𑐷𑐟 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐩𑐵𑐐𑐸 𑐏 𑑋 𑐗𑐷 𑐮𑑂𑐰𑐵𑐣𑐵 𑐔𑑀𑐣𑐵𑐐𑐸 𑐨𑐵𑐲𑐵𑐫𑐵 𑐧𑐶𑐎𑐵𑐳 𑐣𑐶𑑄𑐟𑐶𑑄 𑐖𑐎 𑐬𑑄𑐳𑐎𑑂𑐲𑐞𑐵𑐫𑐵 𑐣𑐶𑑄𑐟𑐶𑑄 𑐖𑐎 𑐩𑐏𑐸 𑐗𑐷𑐐𑐸 𑐨𑐵𑐲𑐵𑐫𑐵𑐟 𑐬𑐵𑐖𑑂𑐫𑑄 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐏 𑑋 𑐗𑐷𑐐𑐸 𑐨𑐵𑐲𑐵 𑐦𑐸𑐎 𑐠𑐵𑐳𑑄 𑐣𑐶𑐬𑑂𑐰𑐵𑐢 𑐕𑐾𑐮𑐾 𑐡𑐂𑐐𑐸 𑐀𑐢𑐶𑐎𑐵𑐬 𑐗𑐷𑐟 𑐩𑐵𑐐𑐸 𑐏 𑑋 𑐠𑑁𑑄 𑐐𑐠𑐾 𑐏𑐫 𑐨𑐵𑐫𑐫𑐵𑐟 𑐐𑐸𑐮𑐶 𑐠𑐵𑐫 𑐧𑐶𑐫𑐵𑐟𑐮 𑐗𑐷𑐐𑐸 𑐨𑐵𑐫𑐫𑐵𑐟 𑐣𑑄 𑐄𑐮𑐶 𑐴𑐾 𑐀𑐢𑐶𑐎𑐵𑐬 𑐡𑐫𑐾𑐩𑐵 𑐢𑐫𑐵𑐐𑐸 𑐗𑐷𑐐𑐸 𑐩𑐵𑐐 𑐏 𑑋
𑐣𑐾𑐰𑐵𑐟𑐫𑐐𑐸 𑐩𑐵𑐟𑐺𑐨𑐵𑐲𑐵 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐢𑐵𑐂𑐥𑐶𑑄 𑐣𑑄 𑐡𑐸 𑑋 𑐠𑑀 𑐧𑐶𑐮𑐎𑐸𑐮 𑐐𑐮𑐟 𑐏𑑄 𑐏 𑑋 𑐣𑐾𑐥𑐵 𑐡𑐾𑐫𑐵 𑐀𑐣𑐾𑐎 𑐠𑐵𑐫𑐳 𑐧𑐳𑑀𑐰𑐵𑐳 𑐫𑐵𑐣𑐵𑐔𑑀𑑄𑐥𑐶𑑄 𑐣𑐾𑐰𑐵𑐟𑐫𑐐𑐸 𑐮𑑂𑐴𑐵𑐂𑐐𑐸 𑐨𑐵𑐲𑐵𑐫𑐵𑐟 𑐐𑐣𑐫𑐵𑐐𑐸 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐢𑐵𑐫𑐾𑐐𑐸 𑐬𑐸 𑐳𑑀𑐣𑐶𑐐𑐫𑐵 𑐫𑐾𑑄, 𑐫𑐮, 𑐏𑑀𑐥, 𑐠𑐶𑐩𑐶, 𑐮𑐸𑐨𑐸, 𑐠𑐳𑐶, 𑐠𑐿𑐰, 𑐧𑐬𑐾𑐐𑐵𑑄, 𑐰𑐵𑐡𑐾, 𑐎𑐶𑐥𑐸, 𑐳𑐎𑑀 𑐁𑐡𑐶 𑐖𑐎 𑐩𑐏𑐸 𑐣𑐵𑐮𑐵, 𑐨𑑀𑐟, 𑐏𑑄𑐥𑐸, 𑐥𑐟𑐶𑑄, 𑐢𑑁𑐏𑑂𑐫𑑀, 𑐧𑐵𑐴𑐸𑐣𑐾𑐥𑐵𑐚𑐷, 𑐩𑐾𑐮𑑄𑐔𑐶, 𑐡𑐾𑐄𑐥𑐸𑐬, 𑐳𑐶𑐥𑐵, 𑐔𑑁𑐟𑐵𑐬𑐵, 𑐨𑑀𑐟𑐾𑐣𑐵𑐩𑐣𑐵𑑄, 𑐧𑐵𑐬𑑂𑐴𑐧𑐶𑐳𑐾, 𑐟𑐵𑐟𑑀𑐥𑐵𑐣𑐷, 𑐟𑑁𑐠𑐮𑐷, 𑐡𑑀𑐮𑐏𑐵, 𑐨𑑀𑐖𑐥𑐸𑐬, 𑐔𑐿𑐣𑐥𑐸𑐬, 𑐢𑐬𑐵𑐣, 𑐢𑐣𑐎𑐸𑐚𑐵, 𑐨𑐶𑐩𑐦𑐾𑐡𑐷, 𑐩𑐎𑐰𑐵𑐣𑐥𑐸𑐬, 𑐴𑐾𑐚𑑁𑐜𑐵, 𑐧𑐶𑐬𑐐𑑄𑐖, 𑐩𑐮𑑄𑐐𑐰𑐵, 𑐟𑐵𑐜𑐶, 𑐔𑐶𑐟𑐰𑐣 𑐣𑐵𑐬𑐵𑐫𑐣𑐐𑐝, 𑐧𑐸𑐚𑐰𑐮, 𑐨𑐿𑐬𑐴𑐰𑐵, 𑐣𑐎𑑂𑐰𑐵, 𑐟𑑂𑐬𑐶𑐱𑐸𑐮𑐷, 𑐢𑐵𑐡𑐶𑑄𑐐, 𑐧𑐣𑑂𑐡𑐶𑐥𑐸𑐬, 𑐟𑐣𑐴𑐸, 𑐥𑑀𑐏𑐬𑐵, 𑐥𑐵𑐮𑑂𑐥𑐵, 𑐐𑐸𑐮𑑂𑐩𑐷, 𑐏𑐮𑑄𑐐𑐵, 𑐮𑐐𑐵𑐫𑐟 𑐣𑐾𑐥𑐵𑐫𑐵 𑐦𑐸𑐎𑑄 𑐖𑐶𑐮𑑂𑐮𑐵𑐫 𑐣𑐾𑐣𑐵 𑐔𑑀𑑄𑐥𑐶𑑄 𑐣𑐾𑐰𑐵𑐟𑐫𑐳𑑄 𑐮𑑂𑐴𑐵𑐂𑐐𑐸 𑐣𑐾𑐰𑐵 𑐨𑐵𑐫𑐫𑐵𑐟 𑐏𑐫 𑐬𑐵𑐖𑑂𑐫𑑄 𑐳𑑂𑐠𑐵𑐣𑐷𑐫 𑐨𑐵𑐫 𑐢𑐵𑐫𑐾𑐰𑑄 𑐰 𑐳𑑂𑐠𑐵𑐣𑐷𑐫 𑐨𑐵𑐫 𑐖𑐸𑐂𑐐𑐸 𑐩𑐏𑐸 𑑋
𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐬𑐵𑐖𑑂𑐫𑑄 𑐫𑐵𑐣𑐵𑐔𑑀𑑄𑐐𑐸 𑐡𑐩𑐣𑐫𑐵 𑐧𑐶𑐬𑑀𑐢𑐫 𑐀𑐮𑐾 𑐦𑐸𑐎𑑄 𑐨𑐵𑐲𑐵 𑐖𑐵𑐟𑐶𑐫𑐵𑐟 𑐬𑐵𑐖𑑂𑐫𑑄 𑐳𑐩𑐵𑐣 𑐧𑑂𑐫𑐰𑐴𑐵𑐬 𑐫𑐵𑐫𑐾𑐩𑐵 𑐳𑐩𑐵𑐣 𑐀𑐢𑐶𑐎𑐵𑐬 𑐧𑐷𑐩𑐵 𑐢𑐎𑐵 𑐣𑐾𑐰𑐵 𑐖𑐵𑐟𑐶 𑐴𑐵𑐮𑐵 𑐰𑐫𑐵𑐔𑑀𑐥𑐶𑑄 𑐏 𑑋 𑐠𑐥𑐶𑐣𑐶𑐐𑐸 𑐨𑐵𑐲𑐵 𑐖𑐵𑐟𑐶𑐫𑐵𑐟 𑐣𑑂𑐫𑐵𑐫 𑐖𑐸𑐂𑐩𑐵𑐮 𑐢𑐎𑐵 𑐮𑑂𑐰𑐵𑐣𑐵 𑐴𑐵𑐮𑐵 𑐔𑑀𑐣𑐵𑐥𑐶𑑄 𑐣𑐾𑐰𑐵𑐟 𑐴𑐶𑐣𑑂𑐡𑐶 𑐨𑐵𑐲𑐵 𑐰 𑐩𑐢𑐾𑐱𑐶𑐟𑐫𑐟 𑐣𑑄 𑐬𑐵𑐖𑑂𑐫𑑄 𑐳𑐩𑐵𑐣 𑐧𑑂𑐫𑐰𑐴𑐵𑐬 𑐰 𑐳𑐩𑐵𑐣 𑐀𑐢𑐶𑐎𑐵𑐬 𑐧𑐷𑐩𑐵 𑐢𑐫𑐵𑐐𑐸 𑐏𑑄𑐫 𑐳𑐔𑐾𑐟 𑐖𑐸𑐂𑐩𑐵 𑑋 𑐴𑐶𑐣𑑂𑐡𑐶 𑐨𑐵𑐲𑐵𑐫𑐵 𑐳𑐰𑐵𑐮𑐫 𑐄𑐥𑐬𑐵𑐲𑑂𑐚𑑂𑐬𑐥𑐟𑐶 𑐥𑐬𑐩𑐵𑐣𑑂𑐡 𑐗𑐵𑑄 𑐴𑐶𑐣𑑂𑐡𑐶 𑐨𑐵𑐲𑐵𑑄 𑐳𑐥𑐠 𑐣𑐮 𑐢𑐫𑐵 𑐰𑐿𑐟 𑐬𑐵𑐖𑑂𑐫𑑄 𑐫𑐵𑐐𑐸 𑐡𑐸𑐬𑑂𑐰𑑂𑐫𑐰𑐴𑐵𑐬 𑐰 𑐎𑐵𑐬𑐰𑐵𑐴𑐷𑐫𑐵 𑐧𑐶𑐬𑑀𑐢𑐫 𑐄𑐧𑐮𑐾 𑐗𑐷 𑐴𑐣𑐾𑐧𑐴𑐩𑑂𑐴 𑐣𑐾𑐰𑐵 𑐣𑑂𑐴𑐾𑐮𑐸𑐰𑐵 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐖𑐸𑑄 𑐕𑐥𑐸 𑐟𑐵𑐎𑐐𑐸 𑐔𑑀𑐳𑐸 𑐴𑐾 𑐔𑑀𑐫𑐵 𑐠𑐥𑐶𑐣𑐶𑐐𑐸 𑐊𑐎𑐾𑐰𑐡𑑂𑐢𑐟𑐵 𑐧𑑀𑐫𑐵𑐡𑐶𑐐𑐸 𑐏𑑄 𑐠𑐣 𑐮𑐸𑐩𑑄𑐎𑐾 𑐧𑐴𑐖𑐹 𑑋 𑐧𑐴𑐸𑐨𑐵𑐲𑐷𑐫 𑐡𑐾𑐱 𑐣𑐾𑐥𑐵𑐮𑐫 𑐳𑐸𑐫𑐵𑐟 𑐕𑐸 𑐨𑐵𑐲𑐵𑑄 𑐏𑑄 𑐮𑑂𑐴𑐵𑐫𑐾 𑐔𑑀𑐫𑐾 𑐀𑐥𑐸𑐂𑐐𑐸 𑐏 𑐰 𑐨𑐵𑐫 𑐕𑐾𑐮𑐾𑐐𑐸 𑐳𑑂𑐰𑐟𑐣𑑂𑐟𑑂𑐬𑐟𑐵 𑐡𑐫𑐾𑐩𑐵 𑐀𑐮𑐾 𑐡𑐾𑐱𑐫 𑐡𑐎𑑀 𑐨𑐵𑐲𑐵𑐫𑐵𑐟 𑐳𑐩𑐵𑐣 𑐀𑐢𑐶𑐎𑐵𑐬 𑐡𑐫𑐾𑐩𑐵 𑐢𑐫𑐵𑐐𑐸 𑐗𑐷𑐐𑐸 𑐩𑐵𑐐 𑐰 𑐩𑐵𑐣𑑂𑐫𑐟𑐵 𑐏 𑑋

𑐀𑐣𑑂𑐟𑐫 :

𑐥𑐴𑐵𑐜𑐷 𑐬𑐵𑐲𑑂𑐚𑑂𑐬𑐧𑐵𑐡𑐫𑐵 𑐥𑐸𑐬𑑂𑐰𑐵𑐐𑑂𑐬𑐴𑑄 𑐐𑑂𑐬𑐳𑑂𑐚 𑐔𑐱𑑂𑐩𑐵 𑐮𑐶𑐎𑐵𑐣𑐵 𑐳𑑀𑐫 𑐩𑐦𑐸𑐟𑐮𑐾 𑐩𑐢𑐾𑐱𑐶𑐟 𑐢𑐵𑐮𑐎𑐶𑑄 𑐐𑐧𑐮𑐾𑑄 𑐡𑑀𑐴𑑀𑐬𑑀 𑐣𑐵𑐐𑐬𑐶𑐎 𑐏𑐣𑐶𑐐𑐸, 𑐐𑐧𑐮𑐾𑑄 𑐀𑑄𑐐𑐶𑐎𑐺𑐟 𑐣𑐵𑐐𑐬𑐶𑐎 𑐏𑐣𑐶𑐐𑐸, 𑐐𑐧𑐮𑐾𑑄 𑐨𑐵𑐬𑐟𑐫𑐵 𑐣𑐵𑐐𑐬𑐶𑐎 𑐏𑐣𑐶𑐐𑐸, 𑐐𑐧𑐮𑐾𑑄 𑐨𑐵𑐬𑐟𑐫𑐵 𑐖𑐵𑐳𑐸𑐳 𑐏𑐣𑐶𑐐𑐸 𑐖𑐸𑐫𑐵𑑄 𑐔𑑀𑐣𑐶 𑐟𑐶𑐣𑐶 𑑋 𑐩𑐢𑐾𑐱𑐷 𑐏𑑂𑐰𑐵𑐥𑐵 𑐏𑐣𑐎𑐶𑑄 𑐧𑐶𑐡𑐾𑐱𑐷 𑐏𑐣𑐶𑐐𑐸, 𑐢𑑀𑐟𑐶 𑐔𑐶𑐣𑐵𑐰𑐂𑐥𑐶𑑄 𑐏𑐣𑐎𑐶 𑐴𑐾 𑐨𑐵𑐬𑐟𑐶𑐫, 𑐂𑐣𑑂𑐜𑐾𑐣 𑐠𑐾𑑄 𑐔𑑀𑐣𑐶𑐐𑐸 𑐗𑐷 𑐳𑑀𑐣𑐶𑐐𑐰𑐵𑐳𑐶 𑐰𑐵 𑐥𑐴𑐵𑐜𑐷 𑐬𑐵𑐲𑑂𑐚𑑂𑐬𑐧𑐵𑐡𑐷𑐟𑐫 𑐮𑑀𑐫 𑐠𑐾𑑄 𑐴𑐾 𑐖𑐸𑐫𑐵𑐔𑑀𑑄𑐐𑐸 𑐡𑐸 𑑋

𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐮𑑂𑐰𑐵𑐣𑐵 𑐔𑑀𑑄𑐥𑐶𑑄 𑐄𑐟𑑂𑐥𑐷𑐜𑐶𑐟 𑐣𑐾𑐰𑐵𑐟𑐫𑐳𑑄 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐮𑑂𑐰𑐵𑐣𑐵 𑐔𑑀𑑄𑐥𑐶𑑄 𑐩𑐾𑐐𑐸 𑐄𑐟𑑂𑐥𑐷𑐜𑐶𑐟 𑐩𑐢𑐾𑐱𑐷𑐟𑐫 𑐩𑐬𑑂𑐩 𑐠𑐸𑐂𑐎𑐵 𑐀𑐩𑐶𑐐𑐸 𑐥𑑄𑐮𑐶𑐐𑐸 𑐥𑐮𑑂𑐳𑐵 𑐧𑐎𑑄𑐦𑐸𑐳𑑂𑐬𑐸 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐳𑑄 𑐠𑐾𑑄 𑐴𑐾 𑐩𑐢𑐾𑐱𑐷𑐟𑐫 𑐧𑐶𑐬𑑀𑐢𑐫 𑐁𑐢𑐵𑐬𑐴𑐷𑐣 𑐏𑑄 𑐮𑑂𑐴𑐵𑐣𑐵 𑐩𑑂𑐰𑐵𑐩𑐡𑐸 𑐮𑐵𑑄𑐕𑐣𑐵 𑐧𑐶𑐫𑐵 𑐔𑐬𑐶𑐟𑑂𑐬 𑐴𑐟𑑂𑐫𑐵 𑐫𑐵𑐣𑐵 𑐖𑐸𑐂𑐐𑐸 𑐧𑐶𑐮𑐎𑐸𑐮 𑐮𑑀𑐐𑐸 𑐖𑑂𑐫𑐵 𑐩𑐏𑐸 𑑋 𑐩𑐹 𑐏𑑄 𑐣𑐾𑐥𑐵𑐮𑐫𑐵 𑐥𑐴𑐵𑐜𑐾 𑐬𑐵𑐲𑑂𑐚𑑂𑐬𑐰𑐵𑐡𑐷𑐟𑐫𑐳𑑄 𑐧𑐶𑐫𑐵𑐔𑑀𑑄𑐐𑐸 𑐳𑑄𑐎𑐷𑐬𑑂𑐞 𑐬𑐵𑐲𑑂𑐚𑑂𑐬𑐰𑐵𑐡𑐫𑐵 𑐣𑐵𑐬𑐵𑐫 𑐟𑐶𑑄𑐟𑐶𑑄𑐣𑑂𑐴𑐸𑐫𑐵 𑐖𑐸𑐂𑐐𑐸 𑐥𑐮𑑂𑐳𑐵 𑐩𑐢𑐾𑐳𑐷𑐟𑐫 𑐩𑐸𑐡𑑂𑐡𑐵𑐫𑐵 𑐧𑐵𑐬𑐾𑐫 𑐨𑐟𑐶𑐔𑐵 𑐟𑐦𑐵𑐐𑐸 𑐣𑐸𑐐𑐮𑑄 𑐔𑐎𑑄𑐐𑐸 𑐡𑐺𑐲𑑂𑐚𑐶𑐎𑑀𑐞 𑐖𑑀𑐣𑐵 𑐩𑐢𑐾𑐳𑐷 𑐰 𑐖𑐣𑐖𑐵𑐟𑐶𑐫𑐵𑐟 𑐕𑐠𑐵𑐫 𑐴𑐫𑐾𑐐𑐸 𑐖𑑂𑐫𑐵 𑐫𑐵𑐫𑐾𑐐𑐸 𑐥𑑂𑐬𑐫𑐟𑑂𑐣 𑐠𑐣 𑐖𑐸𑐂𑐩𑐵𑐐𑐸 𑐡𑐸 𑑋

𑐩𑐢𑐾𑐱𑐷𑐟𑐫𑐟 𑐣𑐾𑐥𑐵𑐫𑐵 𑐳𑐩𑐵𑐣 𑐣𑐵𑐐𑐬𑐶𑐎𑐫𑐵 𑐧𑑂𑐫𑐰𑐴𑐵𑐬 𑐩𑐫𑐵𑐳𑐾𑑄 𑐕𑐶𑐥𑐶𑑄 𑐨𑐵𑐬𑐟𑐫𑐵 𑐣𑐵𑐐𑐬𑐶𑐎, 𑐕𑐶𑐥𑐶𑑄 𑐨𑐵𑐬𑐟𑐫𑐵 𑐡𑐮𑐵𑐮, 𑐕𑐶𑐥𑐶𑑄 𑐨𑐵𑐬𑐟𑑄 𑐰𑐥𑐶𑑄 𑐢𑐎𑐵 𑐴𑐾𑐰𑐵𑐫 𑐔𑐰𑐵𑐫 𑐫𑐵𑐣𑐵, 𑐕𑐶𑐩𑐶𑐟 𑐀𑐢𑐶𑐎𑐵𑐬 𑐡𑐂𑐩𑐏𑐸 𑐢𑐎𑐵 𑐬𑐵𑐖𑑂𑐫𑑄 𑐁 𑐠𑐾𑑄 𑐴𑐾 𑐥𑐾𑐮𑐾 𑐫𑐵𑐣𑐵 𑐔𑑀𑐣𑐾𑐐𑐸 𑐫𑐵𑐟 𑐢𑐵𑐳𑐵 ( 𑐕𑐶𑐥𑐶𑑄 𑐗𑐣 𑐗𑐣 𑐴𑐾 𑐣𑐾𑐥𑐵𑐮𑑄 𑐟𑐵𑐥𑐵𑐣𑐵 𑐴𑐸𑑄 𑐢𑐵𑐫𑐾 𑐠𑐾𑑄 𑐖𑐎 𑐖𑐹𑐰𑐣𑐶𑐐𑐸 𑐥𑐎𑑂𑐎𑐵 𑐡𑐸 𑑋 𑐠𑑀 𑐟𑐳𑐎𑑄 𑐐𑐮𑐟 𑐬𑐰𑐿𑐫𑐵 𑐏 𑑋 𑐠𑐖𑑂𑐫𑐵𑐐𑐸 𑐖𑑂𑐫𑐵 𑐣𑐾𑐥𑐵𑐫𑐵 𑐬𑐵𑐖𑑂𑐫𑐳𑐟𑑂𑐟𑐵 𑐰 𑐥𑐴𑐵𑐜𑐷 𑐬𑐵𑐲𑑂𑐚𑑂𑐬𑐧𑐵𑐡𑐷𑐟𑐳𑑄 𑐂𑐮𑐫 𑐴𑐾 𑐩𑐡𑐶𑐎𑐮 𑐢𑐵𑐳𑐵 𑐀𑐥𑐩𑐵𑐣 𑐦𑐫𑐵 𑐡𑑀𑐳𑑂𑐬𑑀 𑐡𑐬𑑂𑐖𑐵𑐫𑐵 𑐣𑐾𑐥𑐵𑐮𑐷 𑐖𑐸𑐫𑐵 𑐔𑑀𑐣𑐾𑐐𑐸 𑐳𑑀𑐫𑐵𑑄 𑐡𑐾𑐱 𑐴𑐾 𑐎𑐸𑐔𑐵 𑐠𑐮𑐾𑐐𑐸 𑐰𑐵 𑐨𑐵𑐬𑐟𑐫 𑐮𑑂𑐰𑐵𑐎𑐖𑑂𑐫𑐵 𑐰𑐣𑐾𑐐𑐸 𑐧𑐵𑑄𑐮𑐵 𑐢𑐵𑐫𑐾𑐟 𑐣𑑄 𑐕𑐸𑑄 𑐧𑐾𑐬 𑐩𑐡𑐫𑐵 𑐰𑐣𑐾𑐦𑐸 𑐢𑐫𑐵𑐐𑐸 𑐏𑑄 𑐄𑐎𑑂𑐬𑐾𑐣𑑄 𑐎𑐸𑐔𑐵 𑐡𑐮𑐵𑐰𑑄𑐐𑐸 𑐎𑑂𑐬𑐶𑐩𑐶𑐫𑐵 𑐠𑐾𑑄 𑐰𑐶𑐱𑑂𑐰𑐫𑐵 𑐩𑐾𑐩𑐾𑐐𑐸 𑐡𑐾𑐱𑐫𑐵 𑐡𑐸𑐬𑑂𑐑𑐚𑐣𑐵𑑄 𑐠𑐸𑐂𑐎𑐾𑐩𑐵 𑐠𑑀 𑐏𑑄 𑐠𑐸𑐂𑐎𑐾 𑐩𑐦𑐸𑐟 𑐢𑐵𑐳𑐵 𑐣𑐾𑐥𑐵 𑐖𑐎 𑐀𑐖𑑂𑐫𑐵𑐐𑐸 𑐡𑐸𑐬𑑂𑐑𑐚𑐣𑐵𑐫 𑐩𑐠𑐾𑐣𑐷 𑐢𑐵𑐫𑐾 𑐠𑐵𑐎𑐸 𑑋 𑐳𑐶 𑐎𑐾 𑐬𑐵𑐰𑐟 𑐮𑐵 𑐁 𑐳𑐸𑑄𑐎 𑐔𑑀𑑄𑐔𑑀𑐐𑐸 𑐡𑐸 𑐟𑐬 𑐀𑐣 𑐩𑐾𑐩𑐾𑐥𑐶𑑄 𑐴𑐖𑐵𑐬𑑁𑑄 𑐳𑐶 𑐎𑐾 𑐬𑐵𑐰𑐟𑐟 𑐧𑐸𑐂 𑐢𑐸𑑄𑐎𑐸𑐮 𑐢𑐎𑐵 𑐩𑐠𑐸𑐂𑐎𑐾𑐐𑐸 𑐩𑐸𑐏𑐬𑑂𑐟𑐵 𑐩𑐫𑐵𑐫𑐾𑐐𑐸 𑐴𑐾 𑐣𑐾𑐥𑐵𑐫𑐵 𑐣𑐶𑑄𑐟𑐶𑑄 𑐧𑐵𑑄𑐮𑐵𑐂 𑑋

𑐩𑐢𑐾𑐳𑐷 𑐖𑐣𑐖𑐵𑐟𑐶 𑐕𑐠𑐵𑐫 𑐔𑑀𑐣𑐵 𑐁𑐣𑑂𑐡𑑀𑐮𑐣 𑐫𑐵𑐫𑐾𑐦𑐸𑐳𑐵 𑐴𑐾 𑐖𑐎 𑐡𑐩𑐣𑐎𑐵𑐬𑐷 𑐳𑐟𑑂𑐟𑐵𑐢𑐵𑐬𑐷 𑐁𑐬𑑂𑐫(𑐏𑐳 𑐀𑐣𑑂𑐢𑐬𑐵𑐲𑑂𑐚𑑂𑐬𑐵𑐡𑐷𑐟𑐫 𑐕𑑂𑐫𑑀𑑄 𑐎𑑀𑐕𑐸𑐎𑐾 𑐦𑐂 𑐣𑐟𑑂𑐬 𑐩𑐏𑐸 𑐢𑐫𑐵𑐐𑐸 𑐏𑑄 𑐣𑐾𑐰𑐵𑐟𑐫𑐳𑑄 𑐠𑐸𑐂𑐎𑐾𑐩𑐵𑐐𑐸 𑐡𑐸 𑑋 𑐩𑐢𑐾𑐳𑐷 𑐰 𑐖𑐣𑐖𑐵𑐟𑐶 𑐕𑐠𑐵𑐫 𑐔𑑀𑐣𑐵 𑐮𑑂𑐰𑐵𑐫𑐾 𑐩𑐦𑐫𑐾𑐎𑑄 𑐳𑐟𑑂𑐟𑐵𑐢𑐵𑐬𑐷 𑐣𑐱𑑂𑐮𑐰𑐵𑐡𑐷 𑐁𑐬𑑂𑐫(𑐏𑐳𑐫𑐵 𑐡𑐩𑐣𑐎𑐵𑐬𑐷 𑐣𑐷𑐟𑐶𑐫𑐵𑐟 𑐧𑐸𑐎𑐾 𑐦𑐂𑐩𑐏𑐸 𑐢𑐵𑐫𑐵𑐐𑐸 𑐏𑑄 𑐳𑐎𑐳𑑂𑐫𑐵𑑄 𑐩𑐴𑐳𑐸𑐳 𑐫𑐵𑐫𑐾𑐩𑐵 𑑋 𑐠𑐥𑐶𑐣𑐶𑐐𑐸 𑐀𑐢𑐶𑐎𑐵𑐬𑐫𑐵 𑐥𑑂𑐬𑐵𑐥𑑂𑐟𑐶𑐫𑐵 𑐣𑐶𑐟𑐶𑑄 𑐣𑐾𑐰𑐵𑐟, 𑐖𑐣𑐖𑐵𑐟𑐶 𑐀𑐮𑐾 𑐩𑐢𑐾𑐱𑐶 𑐳𑐎𑐮𑐾𑑄 𑐣𑐶𑐬𑑄𑐟𑐬 𑐖𑐵𑐫𑐾𑐩𑐵𑐐𑐸 𑐡𑐸 𑑋

𑐠𑐐𑐸 𑐀𑐢𑐶𑐎𑐵𑐬 𑐣𑐶𑐟𑐶𑑄 𑐣𑐵𑐥𑑄 𑐣𑐵𑐥𑑄 𑐖𑐣𑐖𑐵𑐟𑐶, 𑐠𑐵𑐬𑐸, 𑐩𑐢𑐾𑐱𑐶𑐟𑐫𑐟 𑐠𑑁𑑄𑐫𑐵 𑐳𑐬𑐎𑐵𑐬𑑄 𑐫𑐵𑐣𑐵𑐔𑑀𑑄𑐐𑐸 𑐡𑐩𑐣 𑐰 𑐀𑐟𑑂𑐫𑐵𑐔𑐵𑐬𑐫𑐵 𑐰𑐶𑐬𑑀𑐢𑐫𑑂 𑐣𑑄 𑐳 𑐟𑐫𑐵 𑐣𑐾𑐰𑐵𑐟𑐫𑐳𑑄 𑐁𑐣𑑂𑐡𑑀𑐮𑐣𑐫 𑐳𑐵𑐠 𑐧𑐷 𑐦𑐫𑐾𑐩𑐵𑐐𑐸 𑐡𑐸 𑑋 𑐡𑐎𑐮𑐾 𑐣𑑂𑐴𑐵𑐥𑐵𑑄 𑐣𑐾𑐰𑐵𑐟𑐫𑐳𑑄 𑐠𑐠𑐰𑐫𑑂 𑐳𑐴𑐮𑐴 𑐫𑐵𑐫𑐾𑐩𑐵𑐮 𑐀𑐮𑐾 𑐳𑑄𑐐𑐛𑐶𑐟 𑐖𑐸𑐂𑐩𑐵𑐮 𑑋 𑐳𑑄𑐐𑐛𑐶𑐟 𑐩𑐖𑐸𑐂𑐎𑑄 𑐣𑐾𑐰𑐵𑐟 𑐧𑐮𑑂𑐮𑐵𑐂 𑐩𑐏𑐸 𑐢𑐎𑐵 𑐠𑐸𑐂𑐎𑐾 𑐩𑐵𑐮 𑑋 𑐠𑐥𑐶𑑄 𑐎𑑂𑐰𑐵𑐟𑑂𑐟𑐸𑐎𑑂𑐎 𑐳𑑄𑐐𑐛𑐶𑐟 𑐖𑐸𑐫𑐵 𑐣𑑂𑐴𑑂𑐫𑐖𑑂𑐫𑐵𑐣𑐵 𑐰𑐣𑐾𑐩𑐵𑐮 𑑋 𑐄𑐎𑐶𑐫𑐵 𑐣𑐵𑐥𑐣𑐵𑐥𑑄 𑐖𑐣𑐖𑐵𑐟𑐷 𑐰 𑐩𑐢𑐾𑐱𑐷𑐟 𑐮𑐶𑐳𑐾𑑄 𑐣𑑄 𑐖𑐵𑐣𑐵 𑐣𑐾𑐰𑐵𑐟 𑐣𑑂𑐴𑐾𑐖𑑂𑐫𑐵𑐫𑐾 𑐦𑐫𑐾𑐎𑐾 𑐩𑐵𑐮 𑑋