𑐨𑐵𑐲𑐵 𑐠𑐸𑐰𑐵𑑅 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐣𑑂𑐴𑐵𑐥𑐵𑑄𑐐𑐸 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐣𑐾𑐥𑐵𑐮𑐨𑐵𑐲𑐵 𑐳𑐶𑐬𑐥𑐵𑑅

𑐨𑐵𑐲𑐵 𑐠𑐸𑐰𑐵𑑅 𑐦𑐞𑐶𑐣𑑂𑐡𑑂𑐬𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐣𑑂𑐴𑐵𑐥𑐵𑑄𑐐𑐸 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐣𑐾𑐥𑐵𑐮 𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐬𑐵𑐲𑑂𑐚𑑂𑐬𑐥𑐟𑐶 𑐰𑐶𑐡𑑂𑐫𑐵𑐡𑐾𑐰𑐷 𑐨𑐞𑑂𑐜𑐵𑐬𑐷𑑄 𑐰𑑄𑐐𑐸 𑐧𑐸𑐢𑐰𑐵𑑅 𑐖𑐹𑐐𑐸 𑐕𑐐𑐹 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐨𑐵𑐲𑐵 𑐠𑐸𑐰𑐵𑑅 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐬𑐵𑐲𑑂𑐚𑑂𑐬𑐥𑐟𑐶 𑐨𑐰𑐣 𑐱𑐷𑐟𑐮 𑐣𑐶𑐰𑐵𑐳𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐨𑐞𑑂𑐜𑐵𑐬𑐷𑑄 𑐨𑐵𑐲𑐵 𑐠𑐸𑐰𑐵𑑅 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐣𑑂𑐫𑐫𑑂𑐕𑐡𑑂𑐰𑑅 𑐟𑐎𑐵𑐡𑐵𑑄𑐮𑐶𑐳𑐾𑑄 𑐴𑐣𑐵𑐥𑑁𑐳𑐴𑐶𑐟𑐫𑐵 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐮𑐰𑐫𑑂 𑐣𑐰𑐵𑐳𑐾𑑄 𑐬𑐵𑐲𑑂𑐚𑑂𑐬𑐥𑐟𑐶 𑐨𑐞𑑂𑐜𑐵𑐬𑐷𑑄 𑐣𑐾𑐰𑐵𑑅 𑐨𑐵𑐫𑑂 𑐰 𑐣𑐾𑐰𑐵𑑅 𑐟𑐖𑐶𑐮𑐖𑐶𑐫𑐵 𑐠𑑅𑐐𑐸 𑐴𑐾 𑐧𑐶𑐳𑑂𑐎𑑄 𑐩𑐴𑐟𑑂𑐰 𑐡𑐸𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐬𑐘𑑂𑐖𑐣𑐵 𑐮𑐶𑐥𑐶 𑐡𑐾𑐫𑑂𑐫𑐵 𑐴𑐾 𑐩𑑁𑐮𑐶𑐎 𑐮𑐶𑐥𑐶 𑐖𑐹𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐰𑐶𑐱𑐾𑐲 𑐥𑐵𑐴𑐵𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐩𑐡𑐸𑐩𑑂𑐴 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐖𑑀𑐱𑐷𑐫𑐵𑐟 𑐮𑐸𑐩𑑄𑐎𑐵𑑅 𑐰𑐫𑑂𑐎𑐮𑑄 𑐔𑑂𑐰𑐫𑐵𑐡𑐷𑐐𑐸 ‘𑐔𑐵𑐬𑐸𑐩𑐟𑐶’ 𑐣𑐵𑑄𑐫𑐵 𑐥𑑂𑐫𑐵𑐏𑑄 𑐕𑐐𑐹 𑐎𑑂𑐫𑐣𑐾𑐐𑐸 𑐫𑐵𑐣𑐵𑐔𑑂𑐰𑐣𑐵𑐐𑐸 𑐢𑐵𑐳𑐾𑑄 𑐣𑑂𑐴𑑂𑐫𑐵𑐠𑐾 𑐫𑐵𑐣𑐵𑑅 𑐖𑐹𑐳𑐵𑑄 𑐄𑐐𑐸 𑐥𑑂𑐫𑐵𑐏𑑄 𑐎𑑂𑐫𑐣𑐵𑑅 𑐟𑑂𑐰𑑅𑐟𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐳𑐶𑐬𑐥𑐵𑑅 𑐕𑐣𑑀𑐚 𑐎𑐩𑐶𑐚𑐷𑐫𑐵 𑐎𑐖𑐶 𑐳𑐩𑐵𑐮𑑀𑐔𑐎𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐬𑑄 𑐥𑐸𑐬𑐳𑑂𑐎𑐺𑐟 𑐰𑑂𑐫𑐎𑑂𑐟𑐶𑐟𑑂𑐰 𑐨𑐵𑐲𑐵 𑐠𑐸𑐰𑐵𑑅 𑐰𑐖𑑂𑐬𑐵𑐔𑐵𑐬𑑂𑐫 𑐨𑐵𑐲𑐵, 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐕𑐩𑑂𑐴 𑐖𑑂𑐰𑑅𑐩𑐡𑐸𑐩𑑂𑐴𑑂 𑐰𑑂𑐫𑐎𑑂𑐟𑐶𑐟𑑂𑐰 𑐏𑑅 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐥𑐬𑐶𑐲𑐡𑑂𑐫𑐵 𑐟𑐵𑑅𑐃𑐟𑐎 𑐣𑐵𑐫𑑅 𑐖𑐸𑐫𑐵𑑅 𑐫𑐵𑐣𑐵𑐡𑐷𑐐𑐸 𑐣𑐾𑐟𑐺𑐟𑑂𑐰 𑐰 𑐰𑐫𑑂𑐎𑑅𑐫𑐵 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐂𑐮𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐨𑐞𑑂𑐜𑐵𑐬𑐷𑑄 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐫𑐮𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐕𑐟𑑂𑐬𑐧𑐴𑐵𑐡𑐸𑐬 𑐎𑐵𑐫𑐳𑑂𑐠𑐫𑐵𑐟 𑐴𑐣𑐵𑐥𑑁 𑐡𑐾𑐕𑐵𑐳𑐾 𑐴𑐣𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐥𑐸𑐮𑐵𑑄𑐩𑑂𑐴 𑐩𑐣𑑂𑐟𑑂𑐬𑐷 𑐧𑐸𑐡𑑂𑐢𑐶𑐬𑐵𑐖 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐳𑐩𑐵𑐖𑐳𑐾𑐰𑐷 𑐩𑑀𑐟𑐶𑐮𑐵𑐮 𑐱𑐶𑐮𑑂𑐥𑐎𑐵𑐬𑐫𑐵𑐟 𑐏𑐮𑑅𑐫𑐵 𑐩𑐵𑐣𑐵𑐬𑑂𑐠 𑐡𑐸𑐖𑑅 𑐥𑑁 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐩𑐎𑐵𑑅 𑐏𑐮𑑅 𑐫𑐮𑐫𑐵 𑐣𑐵𑐫𑑅 𑐴𑐶𑐬𑐵𑐎𑐵𑐖𑐷 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐨𑐞𑑂𑐜𑐵𑐬𑐷𑑄 𑐏𑐮𑑅𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐔𑐾𑐳 𑐎𑐵𑐳𑐵𑐫𑑂 𑐰𑐶𑐖𑐫𑐷 𑐖𑐸𑐫𑐵𑐡𑐷𑐥𑐶𑑄𑐟 𑐣𑑄 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑐳𑐵 𑐳𑐶𑐬𑐥𑐵𑑅𑐫𑐵 𑐣𑐷𑐳𑑂𑐰𑐣𑐾𑐟 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐡𑐵𑐟𑐵𑐥𑐶𑑄𑐟 𑐳𑐸𑐨𑐵𑐫𑑂 𑐥𑑁𑑄 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋